ಸುರಂಗ, ಸೇತುವೆ, ಎತ್ತರದ ಹೆದ್ದಾರಿ ಟೋಲ್‌ ಶೇ.50 ಕಡಿತ

ಸೇತುವೆ, ಸುರಂಗ, ಮೇಲ್ಸೇತುವೆ ಅಥವಾ ಎತ್ತರದ ಹೆದ್ದಾರಿಗಳಂತಹ ವಿಶೇಷ ರಚನೆಗಳನ್ನು ಹೊಂದಿರುವ ರಾಷ್ಟ್ರೀಯ ಹೆದ್ದಾರಿಗಳ ಟೋಲ್ ದರವನ್ನು ಶೇ.50ರವರೆಗೆ ಕಡಿತಗೊಳಿಸಿ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದೆ. ಇದು ವಾಣಿಜ್ಯ ವಾಹನ ಮಾಲೀಕರಿಗೆ ಪ್ರಯೋಜನ ನೀಡಲಿದೆ.

ನವದೆಹಲಿ: ಸೇತುವೆ, ಸುರಂಗ, ಮೇಲ್ಸೇತುವೆ ಅಥವಾ ಎತ್ತರದ ಹೆದ್ದಾರಿಗಳಂತಹ ವಿಶೇಷ ರಚನೆಗಳನ್ನು ಹೊಂದಿರುವ ರಾಷ್ಟ್ರೀಯ ಹೆದ್ದಾರಿಗಳ ಟೋಲ್ ದರವನ್ನು ಶೇ.50ರವರೆಗೆ ಕಡಿತಗೊಳಿಸಿ ಕೇಂದ್ರ ಸರ್ಕಾರ ಆದೇಶ ಹೊರಡಿಸಿದೆ. ಇದು ವಾಣಿಜ್ಯ ವಾಹನ ಮಾಲೀಕರಿಗೆ ಪ್ರಯೋಜನ ನೀಡಲಿದೆ.

ಪ್ರಸ್ತುತ, ರಾಷ್ಟ್ರೀಯ ಹೆದ್ದಾರಿಗಳ ಇಂಥ ವಿಶೇಷ ಭಾಗಗಳಿಗೆ ಟೋಲ್ ದರ ಸಾಮಾನ್ಯ ಟೋಲ್‌ಗಿಂತ 10 ಪಟ್ಟು ಹೆಚ್ಚಾಗಿದೆ. ಮಂಗಳವಾರ ಬಿಡುಗಡೆಯಾದ ಪರಿಷ್ಕೃತ ಅಧಿಸೂಚನೆಯಲ್ಲಿ, ಇಂಥ ವಿಭಾಗಗಳ ಶುಲ್ಕವನ್ನು ಲೆಕ್ಕಹಾಕಲು ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು ಹೊಸ ಸೂತ್ರವನ್ನು ರೂಪಿಸಿದೆ.

‘ಹೊಸ ನಿಯಮವು ವಾಣಿಜ್ಯ ವಾಹನಗಳಿಗೆ ಹೆಚ್ಚು ಪ್ರಯೋಜನವನ್ನು ನೀಡುತ್ತದೆ. ಇದುವರೆಗೆ ಖಾಸಗಿ ವಾಹನ ಮಾಲೀಕರು ಪಾವತಿಸುವುದಕ್ಕಿಂತ 4ರಿಂದ 5 ಪಟ್ಟು ಹೆಚ್ಚು ಶುಲ್ಕವನ್ನು ವಾಣಿಜ್ಯ ವಾಹನಗಳಿಗೆ ವಿಧಿಸಲಾಗುತ್ತಿತ್ತು. ಹೊಸ ನಿಯಮವು, ಈಗಾಗಲೇ ಇರುವ ಟೋಲ್ ಪ್ಲಾಜಾಗಳಿಗೆ ಮುಂದಿನ ಪರಿಷ್ಕರಣೆ ದಿನಾಂಕದಿಂದ ಜಾರಿಗೆ ಬರಲಿದೆ. ಹೊಸ ಟೋಲ್ ಪ್ಲಾಜಾಗಳಿಗೆ, ಇದು ಕಾರ್ಯಾಚರಣೆಯ ಪ್ರಾರಂಭವಾದ ದಿನಾಂಕದಿಂದ ಅನ್ವಯಿಸುತ್ತದೆ. ರಿಯಾಯಿತಿದಾರರ ನಿರ್ವಹಣೆಯ ಶುಲ್ಕ ಪ್ಲಾಜಾಗಳಿಗೆ, ರಿಯಾಯಿತಿ ಒಪ್ಪಂದಗಳ ಅವಧಿ ಮುಗಿದ ನಂತರ ಇದು ಜಾರಿಗೆ ಬರುತ್ತದೆ’ ಎಂದು ಸಚಿವಾಲಯ ತಿಳಿಸಿದೆ.

ಯಾರಿಗೆಲ್ಲಾ ಟೋಲ್‌ ಹಣ ಕಟ್ಟುವುದರಿಂದ ವಿನಾಯಿತಿ ಇದೆ?

ಪ್ರತಿ ಜಿಲ್ಲೆಗಳಲ್ಲೂ ರಸ್ತೆ ಬಳಸಿದ್ದಕ್ಕೆ ಟೋಲ್ ಗೇಟ್‌ಗಳಲ್ಲಿ ಟೋಲ್ ಹಣ ಕಟ್ಟಬೇಕಾಗುತ್ತೆ. ರಸ್ತೆ, ಹೈವೇಗಳ ನಿರ್ಮಾಣ ಮತ್ತು ನಿರ್ವಹಣೆಗೆ ಸರ್ಕಾರ ಟೋಲ್ ತೆರಿಗೆ ವಿಧಿಸುತ್ತೆ. ಆದ್ರೆ ರಾಷ್ಟ್ರೀಯ ಹೆದ್ದಾರಿ ಕಾಯ್ದೆ ಪ್ರಕಾರ ಕೆಲವರು ಟೋಲ್ ಕಟ್ಟಬೇಕಾಗಿಲ್ಲ. ಯಾರಿಗೆಲ್ಲಾ ಟೋಲ್‌ ಕಟ್ಟೋದರಿಂದ ವಿನಾಯಿತಿ ಇದೆ ಅನ್ನೋದನ್ನ ಇಲ್ಲಿ ನೋಡೋಣ. 

ರಾಷ್ಟ್ರೀಯ ಮತ್ತು ರಾಜ್ಯ ಹೆದ್ದಾರಿ, ಸೇತುವೆ, ಸುರಂಗ ಮಾರ್ಗಗಳ ನಿರ್ವಹಣೆಗೆ ಟೋಲ್ ಹಣ ಬಳಸಲಾಗುತ್ತದೆ. ರಸ್ತೆ, ಹೈವೇಗಳ ರಿಪೇರಿಗೂ ಈ ಹಣವೇ ಮೂಲ ಆಧಾರ. ರಾಷ್ಟ್ರೀಯ ಹೆದ್ದಾರಿ ಕಾಯ್ದೆ ಪ್ರಕಾರ ಕೆಲವರು ಟೋಲ್ ಕಟ್ಟೋ ಅಗತ್ಯ ಇಲ್ಲ. ಯಾಕಂದ್ರೆ ಅವರು ಸಾಮಾನ್ಯ ಜನರಿಗಿಂತ ಮುಖ್ಯ ವ್ಯಕ್ತಿಗಳು. ಅವರ್ಯಾರು ಅಂತ ಈಗ ನೋಡೋಣ. 

NHAI ಟೋಲ್ ವಸೂಲಿ ಬಗ್ಗೆ ಕೆಲವು ನಿಯಮ, ವಿನಾಯಿತಿಗಳನ್ನು ಹೊರಡಿಸಿದೆ. ವಾಹನದ ಪ್ರಕಾರ, ದೂರದ ಆಧಾರದ ಮೇಲೆ ಟೋಲ್ ಬದಲಾಗುತ್ತೆ. ಟ್ರಕ್, ಬಸ್‌ಗಳಿಗೆ ಕಾರುಗಳಿಗಿಂತ ದುಬಾರಿ. ಟೋಲ್ ಗೇಟ್‌ನ 20 ಕಿ.ಮೀ ವ್ಯಾಪ್ತಿಯಲ್ಲಿ ವಾಸಿಸುವವರಿಗೆ ಲೋಕಲ್ ಪಾಸ್ ಸಿಗುತ್ತೆ. ಇದನ್ನ ತಿಂಗಳಿಗೊಮ್ಮೆ ರೀಚಾರ್ಜ್ ಮಾಡಿಕೊಳ್ಳಬೇಕು. ಟೋಲ್ ಪ್ಲಾಜಾ ಹತ್ತಿರ ಇರೋರು ಆಗಾಗ ಅದನ್ನ ದಾಟಿ ಹೋಗ್ಬೇಕಾಗುತ್ತೆ. ಪ್ರತಿ ಸಲ ಟೋಲ್ ಕಟ್ಟೋದು ದುಬಾರಿ. ಅದಕ್ಕೆ ಮಾಸಿಕ ಪಾಸ್ ಕೊಡಲಾಗುತ್ತದೆ.

 ವಾಹನ ಎಷ್ಟು ದೂರ ಹೋಗುತ್ತೋ ಅಷ್ಟಕ್ಕೆ ಮಾತ್ರ ಟೋಲ್ ಕಟ್ಟುವಂತೆ ಕೇಂದ್ರ ಸರ್ಕಾರ, NHAI ಪ್ಲಾನ್ ಮಾಡ್ತಿದೆ. ಜಿಪಿಎಸ್, ಇಂಟರ್ನೆಟ್ ಬಳಸಿ ಈ ವ್ಯವಸ್ಥೆ ರೂಪಿಸಲು ಪ್ರಯತ್ನ ನಡೀತಿದೆ. ಹೀಗಾದಲ್ಲಿ ಟೋಲ್ ವಸೂಲಿ ಪಾರದರ್ಶಕವಾಗಿರುತ್ತೆ. 2 ಕಿ.ಮೀ ಹೋದ್ರೆ ಅಷ್ಟಕ್ಕೆ ಮಾತ್ರ ಟೋಲ್ ಆಟೋಮ್ಯಾಟಿಕ್ ಆಗಿ ಕಟ್ ಆಗುತ್ತೆ. 200 ಕಿ.ಮೀ ಹೋದ್ರೆ ಅದಕ್ಕೆ ತಕ್ಕ ಟೋಲ್ ಕಟ್ ಆಗುತ್ತೆ. ಫಾಸ್ಟ್‌ಟ್ಯಾಗ್ ಬಂದ್ಮೇಲೆ ಟೋಲ್ ವಸೂಲಿ ಪಾರದರ್ಶಕವಾಗಿದೆ. 

ಕೇಂದ್ರ ಸರ್ಕಾರದ ನಿಯಮದ ಪ್ರಕಾರ ಕೆಲವು ವಾಹನಗಳಿಗೆ ಟೋಲ್ ಇಲ್ಲ. ದ್ವಿಚಕ್ರ ವಾಹನ, ಆಂಬ್ಯುಲೆನ್ಸ್, ಅಗ್ನಿಶಾಮಕದಂತಹ ವಾಹನಗಳಿಗೆ ಟೋಲ್ ಇಲ್ಲ. ಸೇನಾ ವಾಹನ, ರಾಷ್ಟ್ರಪತಿ, ಪ್ರಧಾನಿ, ಮುಖ್ಯಮಂತ್ರಿ, ಸಂಸದರು, ಹೈಕೋರ್ಟ್ ನ್ಯಾಯಾಧೀಶರ ವಾಹನಗಳಿಗೆ ಟೋಲ್ ಇಲ್ಲ. ಪರಮವೀರ ಚಕ್ರ, ಅಶೋಕ ಚಕ್ರ ಪುರಸ್ಕೃತರು, ಸರ್ಕಾರಿ ಬಸ್‌ಗಳಿಗೂ ಟೋಲ್ ಇಲ್ಲ. ಸರ್ಕಾರವೇ ನಡೆಸುವ ಬಸ್‌ ಸಂಸ್ಥೆಗಳು ಅಂದರೆ, ಕೆಎಸ್‌ಆರ್‌ಟಿಸಿಯಂಥ ಬಸ್‌ಗಳಿಗೆ ಟೋಲ್‌ ಇರೋದಿಲ್ಲ. 

24 ಗಂಟೆಯಲ್ಲಿ ಒಂದೇ ಟೋಲ್ ಪ್ಲಾಜಾನ ಎರಡು ಸಲ ದಾಟಿದ್ರೆ 1.5 ಪಟ್ಟು ಮಾತ್ರ ಟೋಲ್ ಕಟ್ಟಬೇಕು. ಎರಡಕ್ಕಿಂತ ಹೆಚ್ಚು ಸಲ ದಾಟಿದ್ರೆ ಮೂರನೇ ಎರಡರಷ್ಟು ಟೋಲ್ ಕಟ್ಟಿದ್ರೆ ಸಾಕು. ಹೈವೇಯಲ್ಲಿ ಸ್ವಂತ ವಾಹನದಲ್ಲಿ ಆಗಾಗ ಓಡಾಡೋರಿಗೆ ಮಾಸಿಕ ಪಾಸ್ ಇದೆ. ಅಗತ್ಯವಿದ್ರೆ ತೆಗೆದುಕೊಳ್ಳಿ. ನೀವು ಈ ಕೆಟಗರಿಯಲ್ಲಿದ್ರೆ ಫ್ರೀ ಟೋಲ್ ಸೌಲಭ್ಯ ಪಡ್ಕೊಳ್ಳಿ.