ಪೋಷಕರೇ ಹುಷಾರ್‌.. ಬಂದಿದೆ ಮಕ್ಕಳ ಜೀವ ತೆಗೆಯೋ ಆಟ!| ಮೂವರು ಜಿಗಿದು ಒಬ್ಬನನ್ನು ದಿಢೀರ್‌ ಬೀಳಿಸುವ ಆಟ| ಆನ್‌ಲೈನ್‌ನಲ್ಲಿ ‘ಸ್ಕಲ್ ಬ್ರೇಕರ್’ ಜನಪ್ರಿಯ| ಪೋಷಕರು, ಶಿಕ್ಷಕರ ಆತಂಕ
ನವದೆಹಲಿ[ಫೆ.16]: ಈ ಹಿಂದೆ ಕೀಕಿ, ಬ್ಲೂವೇಲ್‌ ಹಾಗೂ ಮೋಮೋ ಚಾಲೆಂಜ್‌ ಎಂಬ ಅಪಾಯಕಾರಿ ಆಟಗಳು ಆನ್‌ಲೈನ್‌ನಲ್ಲಿ ಸದ್ದು ಮಾಡಿ ಜನರಲ್ಲಿ ಆತಂಕಕ್ಕೆ ಕಾರಣವಾಗಿದ್ದವು. ಇದಕ್ಕೆ ಈಗ ಹೊಸ ಸೇರ್ಪಡೆ ‘ಟ್ರಿಪ್ಪಿಂಗ್‌ ಜಂಪ್‌’ ಅಥವಾ ‘ಸ್ಕಲ್ ಬ್ರೇಕರ್ ಚಾಲೆಂಜ್‌’.
ಸ್ಕಲ್ ಬ್ರೇಕರ್ ಚಾಲೆಂಜ್‌ ಎಂಬ ಈ ಆಟ ಶಾಲಾ-ಕಾಲೇಜು ವಿದ್ಯಾರ್ಥಿಗಳಲ್ಲಿ ಮತ್ತು ಟಿಕ್ಟಾಕ್, ಫೇಸ್‌ಬುಕ್‌, ಟ್ವೀಟರ್‌ ಹಾಗೂ ವಾಟ್ಸ್‌ಆ್ಯಪ್‌ನಂತಹ ಸಾಮಾಜಿಕ ಜಾಲತಾಣಗಳಲ್ಲಿ ಜನಪ್ರಿಯವಾಗತೊಡಗಿದೆ. ಹೆಸರೇ ಹೇಳುವಂತೆ ಇದು ‘ತಲೆ ಬುರುಡೆ ಒಡೆಯುವ’ ಸವಾಲಿನ ಆಟ. ಹೀಗಾಗಿ ಮಕ್ಕಳ ಜೀವ ತೆಗೆಯಬಹುದಾದ ಈ ಸವಾಲಿನ ಆಟದ ಬಗ್ಗೆ ಪೋಷಕರಲ್ಲಿ ಆತಂಕ ಮನೆ ಮಾಡಿದೆ.
ಈ ಆಟ ಆಡಿ ಈಗಾಗಲೇ ಅನೇಕರ ತಲೆಬುರುಡೆ ಹಾಗೂ ಭುಜಕ್ಕೆ ಗಾಯಗಳಾಗಿದ್ದು, ಆಸ್ಪತ್ರೆಯ ತೀವ್ರ ನಿಗಾ ಘಟಕಗಳಲ್ಲಿ ಚಿಕಿತ್ಸೆ ಪಡೆಯುತ್ತಿರುವುದು ವರದಿಯಾಗಿದೆ. ಇದರ ಬೆನ್ನಲ್ಲೇ ಪೊಲೀಸರು, ವೈದ್ಯರು ಹಾಗೂ ಶಾಲೆಯ ಪ್ರಾಚಾರ್ಯರು ಮಕ್ಕಳಿಗೆ ಈ ಆಟದ ವಿರುದ್ಧ ಎಚ್ಚರಿಕೆಯ ಸಂದೇಶ ನೀಡತೊಡಗಿದ್ದಾರೆ.
ಇಬ್ಬರು ಸೇರಿ ಒಬ್ಬನನ್ನು ಬೀಳಿಸುವ ಆಟ, ಮೂವರು ಮಕ್ಕಳು ಸೇರಿ ಆಡುವ ಆಟವೇ ‘ಸ್ಕಲ್ ಬ್ರೇಕರ್ ಚಾಲೆಂಜ್‌’
ಮೂರೂ ಮಕ್ಕಳು ಅಕ್ಕಪಕ್ಕ ನಿಲ್ಲುತ್ತಾರೆ. ಮೊದಲು ಅಕ್ಕ-ಪಕ್ಕದ ಇಬ್ಬರೂ ಮಕ್ಕಳು ಜಿಗಿಯಲು ಆರಂಭಿಸುತ್ತಾರೆ. ನಂತರ ಮಧ್ಯದಲ್ಲಿರುವವನು ಜಿಗಿಯಲು ಆರಂಭಿಸುತ್ತಾನೆ. ಹೀಗೆ ಮೂವರೂ ಏಕಕಾಲಕ್ಕೆ ಜಂಪ್‌ ಮಾಡುತ್ತಿರುವಾಗ ಅಕ್ಕ-ಪಕ್ಕದಲ್ಲಿರುವವರು, ಮಧ್ಯದವನ ಕಾಲಿಗೆ ಒದ್ದು ತೊಡರುಗಾಲು ಹಾಕುತ್ತಾರೆ. ಆಗ ಮಧ್ಯದಲ್ಲಿರುವವನು ಕೆಳಕ್ಕೆ ಬಿದ್ದು, ಆತನ ತಲೆ ಅಥವಾ ಭುಜ ನೆಲಕ್ಕೆ ರಭಸವಾಗಿ ತಾಗುವ ಸಾಧ್ಯತೆ ಇರುತ್ತದೆ. ಹೀಗಾದಲ್ಲಿ ತಲೆಬುರುಡೆಗೆ ಪೆಟ್ಟಾಗಬಹುದು. ಮರಣವೂ ಸಂಭವಿಸಬಹುದು. ಇದೇ ‘ಸ್ಕಲ್ ಬ್ರೇಕರ್ ಚಾಲೆಂಜ್‌’.
ಈಗಾಗಲೇ ಅನೇಕ ವಿದ್ಯಾರ್ಥಿಗಳು ಈ ಆಟವನ್ನು ಆಡಿ, ಇದನ್ನು ವಿಡಿಯೋ ಮಾಡಿಕೊಳ್ಳುತ್ತಿದ್ದು, ಅದನ್ನು ಟಿಕ್ಟಾಕ್, ಫೇಸ್‌ಬುಕ್‌, ಟ್ವೀಟರ್‌ ಹಾಗೂ ವಾಟ್ಸ್‌ಆ್ಯಪ್‌ ಮೂಲಕ ಹರಿಬಿಡುತ್ತಿದ್ದಾರೆ. ತನ್ಮೂಲಕ ಇತರರು ಆಡಲು ಪ್ರೇರಣೆ ನೀಡುತ್ತಿದ್ದಾರೆ.
skull_breaker_challange
kindly educate ur children not to do this ever..it can b dangerous for them.. pic.twitter.com/ekUfWR4RA5
ಸ್ಪೇನ್‌ ಮೂಲದ ಡೇಂಜರ್‌ ಗೇಮ್‌
ಸ್ಕಲ್ ಬ್ರೇಕರ್ ಚಾಲೆಂಜ್‌ ಉಗಮವಾಗಿದ್ದು ಸ್ಪೇನ್‌ನಲ್ಲಿ. ‘ರಾಂಪ್‌ಕ್ರೆನೋಸ್‌’ ಎಂದು ಸ್ಪ್ಯಾನಿಷ್‌ ಭಾಷೆಯಲ್ಲಿ ಇದನ್ನು ಕರೆಯುತ್ತಾರೆ. ಈ ಪದದ ಇಂಗ್ಲಿಷ್‌ ಅರ್ಥ ‘ಸ್ಕಲ್ ಬ್ರೇಕರ್’ ಎಂದು. ಈಗ ಈ ಆಟ ವಿಶ್ವದೆಲ್ಲೆಡೆ ಹರಡತೊಡಗಿದೆ.
ಆಟ ನಿಷೇಧಿಸಲು ಪೋಷಕರ ಬೇಡಿಕೆ
‘ಮಕ್ಕಳು ಇಂದು ಮೊಬೈಲ್‌ನಲ್ಲಿ ಚುರುಕಾಗಿರುತ್ತಾರೆ. ಮೊಬೈಲ್‌ನಲ್ಲಿ ಏನೇನೋ ವಿಡಿಯೋಗಳನ್ನು ನೋಡುತ್ತಿರುತ್ತಾರೆ. ಅಂಥದ್ದರಲ್ಲಿ ಸ್ಕಲ್ ಬ್ರೇಕರ್‌ನಂಥ ಆಟ ನೋಡಿ ಪ್ರಭಾವಗೊಂಡರೆ ಅದು ಆತಂಕಕಾರಿ. ಇದಕ್ಕೆ ನಿಷೇಧ ಹೇರಬೇಕು’ ಎಂದು ಪೋಷಕರು ಆಗ್ರಹಿಸಿದ್ದಾರೆ. ಈ ಆಟವು ಅತಿ ಅಪಾಯಕಾರಿ. ಇದರಿಂದ ದೇಹದ ಕೀಲುಗಳು, ಮಂಡಿ, ಬೆನ್ನು, ಸೊಂಟ, ತಲೆಬುರುಡೆ ಹಾಗೂ ಭುಜಕ್ಕೆ ಹಾನಿಯಾಗಬಹುದು. ಜೋರಾಗಿ ಪೆಟ್ಟು ಬಿದ್ದರೆ ಮರಣವೂ ಸಂಭವಿಸಬಹುದು ಎಂದು ವೈದ್ಯರು ಎಚ್ಚರಿಸಿದ್ದಾರೆ. ಇನ್ನು ಹಲವು ಶಾಲೆಗಳ ಪ್ರಾಚಾರ್ಯರು ಈ ಬಗ್ಗೆ ಪ್ರತಿಕ್ರಿಯಿಸಿ, ‘ಮಕ್ಕಳಿಗೆ ಈ ಆಟದ ವಿರುದ್ಧ ಜಾಗೃತಿ ಮೂಡಿಸಲು ಯತ್ನಿಸಲಾಗುವುದು’ ಎಂದು ಹೇಳಿದ್ದಾರೆ. ಪೊಲೀಸರು ಈ ಆಟದ ವಿರುದ್ಧ ಅನೇಕ ದೇಶಗಳಲ್ಲಿ ಸಮರ ಸಾರಿದ್ದು, ಇದನ್ನು ಉತ್ತೇಜಿಸುವವರ ವಿರುದ್ಧ ಕ್ರಮ ಜರುಗಿಸುವ ಎಚ್ಚರಿಕೆ ನೀಡಿದ್ದಾರೆ.