ಜಾತ್ರೆಗೆ ಬಂದ ಸ್ಪೈಡರ್‌ಮ್ಯಾನ್‌... ಜಾನಪದ ನೃತ್ಯಕ್ಕೆ ಬೆರಗಾಗಿ ಸಖತ್ ಸ್ಟೆಪ್

ಇಲ್ಲೊಬ್ಬರು ಸ್ಪೈಡರ್ ಮ್ಯಾನ್ ವೇಷ ಧರಿಸಿ ಸ್ಥಳೀಯ ಜಾತ್ರೆಯೊಂದರಲ್ಲಿ ಕುಣಿದು ಕುಪ್ಪಳಿಸಿದ್ದು, ಇದರ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಸ್ಪೈಡರ್ ಮ್ಯಾನ್ ಹೆಸರು ಯಾರು ಕೇಳಿಲ್ಲ ಹೇಳಿ, ಈ ಹೆಸರು ಕೇಳಿದ ಕೂಡಲೇ ಮಕ್ಕಳ ಕಿವಿ ಚಿಗುರಿ ಬಿಡುತ್ತದೆ. ಹಲವರಿಗೆ ಸ್ಪೈಡರ್‌ಮ್ಯಾನ್‌ ಸ್ಫೂರ್ತಿ, ಹಲವರ ಪಾಲಿನ ಹೀರೋ ಸ್ಪೈಡರ್ ಮ್ಯಾನ್. ಅಷ್ಟೊಂದು ಪ್ರಭಾವ ಬೀರಿದ ಸಿನಿಮಾ ಇದು. ಇದಾದ ಬಳಿಕ ಸ್ಪೈಡರ್ ಮ್ಯಾನ್‌ಗಿರುವ ಈ ಅಭಿಮಾನಿ ಬಳಗವನ್ನು ನೋಡಿದ ಆಟಿಕೆ ಕಂಪನಿಗಳು ಈ ರೀತಿಯ ಹಲವು ಆಟಿಕೆಗಳನ್ನು ಬಿಡುಗಡೆ ಮಾಡಿ ಮಾರುಕಟ್ಟೆಯಲ್ಲಿ ಯಶಸ್ವಿಯೂ ಆದವು. ಆದೆಲ್ಲಾ ಈಗ್ಯಾಕೆ ಅಂತಿರಾ, ಇಲ್ಲೊಬ್ಬರು ಸ್ಪೈಡರ್ ಮ್ಯಾನ್ ವೇಷ ಧರಿಸಿ ಸ್ಥಳೀಯ ಜಾತ್ರೆಯೊಂದರಲ್ಲಿ ಕುಣಿದು ಕುಪ್ಪಳಿಸಿದ್ದು, ಇದರ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.

ಇನ್ಸ್ಟಾಗ್ರಾಮ್‌ ಇನ್‌ಫ್ಲುಯೆನ್ಸರ್ ಒಬ್ಬರು ಈ ವಿಡಿಯೋವನ್ನು ಪೋಸ್ಟ್ ಮಾಡಿದ್ದಾರೆ. ಅಪರಿಚಿತ ವ್ಯಕ್ತಿಯೊಬ್ಬರು ಸ್ಪೈಡರ್ ಮ್ಯಾನ್ ಸಿನಿಮಾದ ಮಾರ್ವೆಲ್ ವೇಷ ಧರಿಸಿ ಜಾತ್ರೆಯಲ್ಲಿ ಜಾನಪದ ಹಾಡಿಗೆ ನೃತ್ಯ ಮಾಡುತ್ತಿದ್ದಾರೆ. ವಿಡಿಯೋದಲ್ಲಿ ಕಾಣಿಸುವಂತೆ ಈಗಾಗಲೇ ಜಾತ್ರೆಯೊಂದರ ಮಾರುಕಟ್ಟೆ ಪ್ರದೇಶದಲ್ಲಿ ಜಾನಪದ ನೃತ್ಯ ಮಾಡುವ ಮಹಿಳೆಯರ ಗುಂಪಿನೊಂದಿಗೆ ಆ ತಂಡದ ಭಾಗದಂತೆ ಸೇರಿಕೊಂಡ ಸ್ಪೈಡರ್ ಮ್ಯಾನ್‌ ಅವರೊಂದಿಗೆ ಸಖತ್ ಆಗಿ ಹೆಜ್ಜೆ ಹಾಕುತ್ತಾರೆ. ಇನ್ಸ್ಟಾಗ್ರಾಮ್‌ನಲ್ಲಿ ಉಲ್ಲೇಖಿಸಿರುವಂತೆ ಈ ದೃಶ್ಯವನ್ನು ಸೋನಾಝುರಿ ಪ್ರದೇಶದ ಶಾಂತಿನಿಕೇತನ ಬಳಿ ಸೆರೆ ಹಿಡಿಯಲಾಗಿದೆ.

ಈ ವಿಡಿಯೋವನ್ನು 44 ಸಾವಿರಕ್ಕೂ ಹೆಚ್ಚು ಜನ ವೀಕ್ಷಿಸಿದ್ದಾರೆ. ಅಲ್ಲದೇ 4 ಸಾವಿರಕ್ಕೂ ಹೆಚ್ಚು ಜನ ಲೈಕ್ ಮಾಡಿದ್ದಾರೆ. ಈ ವಿಡಿಯೋ ನೋಡಿದ ಅನೇಕರು ಸ್ವಾರಸ್ಯಕರವಾಗಿ ಕಾಮೆಂಟ್ ಮಾಡಿದ್ದಾರೆ. ಈ ವಿಡಿಯೋಗೆ ಈ ಸ್ಪೈಡರ್‌ಮ್ಯಾನ್ ವೇಷಧಾರಿಯೂ ತನ್ನ ಖಾತೆಯಿಂದ ಕಾಮೆಂಟ್ ಮಾಡಿದ್ದು, ನಾನು ಪಶ್ಚಿಮ ಬಂಗಾಳದ ಹಲವು ಪ್ರದೇಶಗಳಲ್ಲಿ ಈ ರೀತಿ ಜನರನ್ನು ಮನೋರಂಜಿಸುತ್ತೇನೆ ನನ್ನನ್ನು ಬೆಂಬಲಿಸಿ ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೆ ಕೆಲವರು ನಗುವ ಇಮೋಜಿಯನ್ನು ಕಾಮೆಂಟ್ ಮಾಡಿದ್ದಾರೆ. ಒಬ್ಬರು ಆರ್‌ಐಪಿ ಸೈಡರ್‌ಮ್ಯಾನ್ ಎಂದು ಕಾಮೆಂಟ್ ಮಾಡಿದ್ದಾರೆ. ಮತ್ತೊಬ್ಬರು ನಮ್ಮ ಜಾನಪದ ಕಲೆಯನ್ನು ಈ ರೀತಿ ಅವಮಾನಿಸಬೇಡಿ ಎಂದು ಪ್ರತಿಕ್ರಿಯಿಸಿದ್ದಾರೆ. 

ಕೆಲ ದಿನಗಳ ಹಿಂದೆ ಭಿಕ್ಷುಕನೋರ್ವ ಜಾಕ್‌ ಸ್ಪೆರೋ ವೇಷ ಧರಿಸಿ ಭಿಕ್ಷೆ ಬೇಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿತ್ತು, ಈ ವಿಡಿಯೋದಲ್ಲಿ ವೇಷ ಧರಿಸಿದಾತ ಜಾನಿಡಿಪ್(ಕೆರಿಬಿಯನ್‌ ಫ್ರಂಚೈಸ್‌ ಅಲ್ಲಿ ಪೈರೆಟ್ ಪಾತ್ರಧಾರಿ) ತರ ನಟನೆ ಮಾಡುತ್ತಾ ಜನರಿಂದ ಹಣ ಕೇಳುತ್ತಿದ್ದ. ಜೊತೆಗೆ ಈ ಪಾತ್ರವನ್ನು ಸಂಪೂರ್ಣಗೊಳಿಸಲು ಆತ ಆಟಿಕೆ ಗನ್ ಅನ್ನು ಇಟ್ಟುಕೊಂಡಿದ್ದ.

ಜಾನಿ ಡಿಪ್‌ ಇತ್ತೀಚೆಗೆ ತಮ್ಮ ಮಾಜಿ ಪತ್ನಿ ಅಂಬೆರ್‌ ಹೆರ್ಡ್‌ ವಿರುದ್ಧ ಕಾನೂನು ಹೋರಾಟದಲ್ಲಿ ದೊಡ್ಡ ಗೆಲುವು ದಾಖಲಿಸಿದ ಸಂದರ್ಭದಲ್ಲೇ ಈ ಜಾಕ್‌ ಸ್ಪೆರೋ ವೇಷಧಾರಿ ಭಿಕ್ಷುಕನ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಂಚಲನ ಮೂಡಿಸಿತ್ತು. ಅಲ್ಲದೇ ನೆಟ್ಟಿಗರು ಈ ಭಿಕ್ಷುಕನಿಗೆ ಥಮ್ಸಪ್ ನೀಡಿದ್ದರು. ಜೊತೆಗೆ ಜಾನಿ ಡೆಬ್ಟ್ (Johnny debt) ಎಂದು ತಮಾಷೆಯಾಗಿ ಕಾಮೆಂಟ್ ಮಾಡಿದ್ದರು. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ವೈರಲ್ ಆಗಿದಲ್ಲದೇ 8 ಮಿಲಿಯನ್‌ಗೂ ಹೆಚ್ಚು ಜನ ಆ ವಿಡಿಯೋವನ್ನು ವೀಕ್ಷಿಸಿದ್ದರು.