☰
ಮಹಾರಾಷ್ಟ್ರ ಸರ್ಕಾರವು ಮಕ್ಕಳ ಬಿಸಿಯೂಟ ಯೋಜನೆಯಲ್ಲಿ ಮೊಟ್ಟೆ ಮತ್ತು ಸಕ್ಕರೆಯನ್ನು ತೆಗೆದುಹಾಕಿದೆ. ಈ ಕ್ರಮವು ಶಿಕ್ಷಣತಜ್ಞರು ಮತ್ತು ಶಾಲಾ ಸಮಿತಿಗಳಿಂದ ಟೀಕೆಗೆ ಗುರಿಯಾಗಿದೆ. ಶಾಲೆಗಳು ಈಗ ದಾನಿಗಳನ್ನು ಅವಲಂಬಿಸಬೇಕಾಗಿದೆ.
ಮುಂಬೈ (ಜ.31): ಮಹಾರಾಷ್ಟ್ರ ಸರ್ಕಾರ ಮಕ್ಕಳ ಬಿಸಿಯೂಟದಲ್ಲಿ ನೀಡಲಾಗುವ ಮೊಟ್ಟೆ ಹಾಗೂ ಸಕ್ಕರೆಯನ್ನು ಕಿತ್ತುಕೊಳ್ಳುವ ನಿರ್ಧಾರ ಮಾಡಿದೆ. ಮಹಾರಾಷ್ಟ್ರ ಸರ್ಕಾರವು ಇತ್ತೀಚಿನ ಅಧಿಸೂಚನೆಯ ಪ್ರಕಾರ, ಸರ್ಕಾರಿ ಶಾಲೆಗಳಿಗೆ ಮಧ್ಯಾಹ್ನದ ಬಿಸಿಯೂಟ ಕಾರ್ಯಕ್ರಮದಲ್ಲಿ ಮೊಟ್ಟೆ ಮತ್ತು ಸಕ್ಕರೆಗೆ ನೀಡುವ ಹಣವನ್ನು ನಿಲ್ಲಿಸಿದೆ, ಈ ಕ್ರಮವು ಶಿಕ್ಷಣತಜ್ಞರು ಮತ್ತು ಶಾಲಾ ಸಮಿತಿಗಳಿಂದ ತೀವ್ರ ಟೀಕೆಗೆ ಗುರಿಯಾಗಿದೆ. ಮಂಗಳವಾರ ಈ ಆದೇಶ ಹೊರಡಿಸಲಾಗಿದ್ದು, ಈ ವಸ್ತುಗಳನ್ನು ಒದಗಿಸುವ ಜವಾಬ್ದಾರಿಯನ್ನು ಶಾಲಾ ನಿರ್ವಹಣಾ ಸಮಿತಿಗಳಿಗೆ (SMCs) ವರ್ಗಾಯಿಸಿದೆ. ಈಗ ಶಾಲೆಗಳು ಮಕ್ಕಳಿಗೆ ಮೊಟ್ಟೆ ಹಾಗೂ ಸಕ್ಕರೆಯನ್ನು ನೀಡಲು ದಾನಿಗಳನ್ನು ಅವಲಂಬಿಸಬೇಕಾಗಿದೆ. ವಿದ್ಯಾರ್ಥಿಗಳಲ್ಲಿ ಪ್ರೋಟೀನ್ ಕೊರತೆಯನ್ನು ನೀಗಿಸಲು ರಾಜ್ಯವು ನವೆಂಬರ್ 2023 ರಲ್ಲಿ ಮೊಟ್ಟೆಗಳನ್ನು ಪರಿಚಯಿಸಿದ ಕೆಲವೇ ತಿಂಗಳುಗಳ ನಂತರ ಈ ಕ್ರಮ ಕೈಗೊಳ್ಳಲಾಗಿದೆ.
ಈ ಹಿಂದಿನ ನೀತಿಯ ಅಡಿಯಲ್ಲಿ ಪ್ರತಿ ವಿದ್ಯಾರ್ಥಿಗೆ ವಾರಕ್ಕೆ ಒಂದು ಮೊಟ್ಟೆ ನೀಡಲಾಗುತ್ತಿತ್ತು. ಮೊಟ್ಟೆ ನೀಡದೇ ಇದ್ದಲ್ಲಿ ಆ ದಿನ ಹಣ್ಣುಗಳನ್ನು ನೀಡಲಾಗುತ್ತಿತ್ತು. ಕನಿಷ್ಠ ಶೇ. 40ರಷ್ಟು ಪೋಷಕರು ವಿರೋಧ ಮಾಡಿದ ಸಂದರ್ಭಗಳಲ್ಲಿ ಶಾಲೆಗಳು ಮೊಟ್ಟೆಗಳನ್ನು ನೀಡುವುದನ್ನು ತಪ್ಪಿಸುವಂತೆ ಸೂಚನೆ ನೀಡಲಾಗುತ್ತಿತ್ತು. ಇದರಿಂದ ಸರ್ಕಾರಕ್ಕೆ ವಾರ್ಷಿಕ 50 ಕೋಟಿ ರೂಪಾಯಿ ವೆಚ್ಚವಾಗುತ್ತಿತ್ತು. ಈ ಯೋಜನೆ ರಾಜ್ಯ 24 ಲಕ್ಷ ವಿದ್ಯಾರ್ಥಿಗಳಿಗೆ ಸಿಗುತ್ತಿತ್ತು. ಮೊಟ್ಟೆಯ ಬದಲಿಗೆ ಶಾಲೆಗಳು, ಎಗ್ ಪುಲಾವ್, ರೈಸ್ ಖೀರ್ ಮತ್ತು ನಚ್ನಿ (ರಾಗಿ) ಸತ್ವದಂತಹ ಭಕ್ಷ್ಯಗಳು ನೀಡುವಂತೆ ತಿಳಿಸಲಾಗಿದೆ. ಹಾಗೇನಾದರೂ ಮೊಟ್ಟೆ ಹಾಗೂ ಸಕ್ಕರೆ ನೀಡಬೇಕಿದ್ದಲ್ಲಿ ದಾನಿಗಳಿಂದ ಪಡೆಯಬಹುದು ಎಂದು ತಿಳಿಸಲಾಗಿದೆ.
"ಸರ್ಕಾರವು ಹೆಚ್ಚುವರಿ ಹಣವನ್ನು ಒದಗಿಸುವುದಿಲ್ಲವಾದ್ದರಿಂದ ಶಾಲಾ ನಿರ್ವಹಣಾ ಸಮಿತಿಗಳು ಸಾರ್ವಜನಿಕ ಭಾಗವಹಿಸುವಿಕೆಯ ಮೂಲಕ ಸಂಪನ್ಮೂಲಗಳನ್ನು ವ್ಯವಸ್ಥೆ ಮಾಡಲು ಪ್ರಯತ್ನಿಸಬೇಕು" ಎಂದು GR ಹೇಳಿದೆ.
ಈಗ ಪ್ರಧಾನ ಮಂತ್ರಿ ಪೋಷಣ್ ಯೋಜನೆ ಎಂದು ಕರೆಯಲ್ಪಡುವ ಮಧ್ಯಾಹ್ನದ ಬಿಸಿಯೂಟ ಯೋಜನೆಯು ಸರ್ಕಾರಿ ಮತ್ತು ಸರ್ಕಾರಿ ಅನುದಾನಿತ ಶಾಲೆಗಳ 12 ಕೋಟಿಗೂ ಹೆಚ್ಚು ಮಕ್ಕಳನ್ನು ಒಳಗೊಂಡ ಕೇಂದ್ರ ಪ್ರಾಯೋಜಿತ ಉಪಕ್ರಮವಾಗಿದೆ. ಈ ಯೋಜನೆಯಡಿಯಲ್ಲಿ, ಪ್ರಾಥಮಿಕ ವಿದ್ಯಾರ್ಥಿಗಳು (1 ರಿಂದ 5 ನೇ ತರಗತಿಗಳು) ಪ್ರತಿ ಊಟಕ್ಕೆ ಕನಿಷ್ಠ 450 ಕ್ಯಾಲೋರಿಗಳು ಮತ್ತು 12 ಗ್ರಾಂ ಪ್ರೋಟೀನ್ ಪಡೆಯಬೇಕು, ಆದರೆ ಹಿರಿಯ ಪ್ರಾಥಮಿಕ ವಿದ್ಯಾರ್ಥಿಗಳು (6 ರಿಂದ 8 ನೇ ತರಗತಿಗಳು) ಪ್ರತಿ ಊಟಕ್ಕೆ 700 ಕ್ಯಾಲೋರಿಗಳು ಮತ್ತು 20 ಗ್ರಾಂ ಪ್ರೋಟೀನ್ ಅಗತ್ಯವಿದೆ. ಪೌಷ್ಠಿಕಾಂಶದ ಮಾನದಂಡಗಳನ್ನು ಪೂರೈಸಿದರೆ, ಮೆನುಗಳನ್ನು ನಿರ್ಧರಿಸಲು ರಾಜ್ಯಗಳಿಗೆ ಆಯ್ಕೆಗಳು ರುತ್ತದೆ ಮತ್ತು ಕರ್ನಾಟಕ ಮತ್ತು ಕೇರಳದಂತಹ ಕೆಲವು ರಾಜ್ಯಗಳು ರಾಜ್ಯದ ಸಂಪನ್ಮೂಲಗಳನ್ನು ಬಳಸಿಕೊಂಡು ಮೊಟ್ಟೆಗಳನ್ನು ಒದಗಿಸಲು ಆಯ್ಕೆ ಮಾಡಿಕೊಂಡಿವೆ.
ದಕ್ಷಿಣದ ಹಲವಾರು ರಾಜ್ಯಗಳಲ್ಲಿ ಮೊಟ್ಟೆ ವಿತರಣೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರದ ಈ ನಿರ್ಧಾರವು ಭಿನ್ನವಾಗಿದೆ. ಕರ್ನಾಟಕ ಇತ್ತೀಚೆಗೆ ತನ್ನ ಮಧ್ಯಾಹ್ನದ ಊಟ ಯೋಜನೆಯಡಿಯಲ್ಲಿ ವಿದ್ಯಾರ್ಥಿಗಳಿಗೆ ವಾರಕ್ಕೆ ಆರು ದಿನ ಒಂದು ಮೊಟ್ಟೆ ನೀಡಲಾಗುವುದು ಎಂದು ಘೋಷಿಸಿತು. ಈ ತಿಂಗಳ ಆರಂಭದಲ್ಲಿ, ಕೇರಳವು ವಿದ್ಯಾರ್ಥಿಗಳಿಗೆ ವಾರಕ್ಕೆ ಒಂದು ಬಾರಿ ಮೊಟ್ಟೆ ಮತ್ತು ವಾರಕ್ಕೆ ಎರಡು ಬಾರಿ ಹಾಲು ಒದಗಿಸಲು ಹೆಚ್ಚುವರಿಯಾಗಿ 22.66 ಕೋಟಿ ರೂ.ಗಳನ್ನು ನಿಗದಿಪಡಿಸಿದೆ. ಒಟ್ಟಾರೆಯಾಗಿ, 14 ರಾಜ್ಯಗಳು ಮತ್ತು ಒಂದು ಕೇಂದ್ರಾಡಳಿತ ಪ್ರದೇಶವು ಪ್ರಸ್ತುತ ತಮ್ಮ ಮಧ್ಯಾಹ್ನದ ಊಟ ಕಾರ್ಯಕ್ರಮಗಳ ಭಾಗವಾಗಿ ಮೊಟ್ಟೆಗಳನ್ನು ಒದಗಿಸುತ್ತಿದೆ. ಆದರೆ, ಆರ್ಥಿಕ ಹಾಗೂ ವ್ಯವಸ್ಥಾಪನಾ ಕಾಳಜಿಗಳನ್ನು ಉಲ್ಲೇಖಿಸಿ, ಶಾಲಾ ಊಟದಲ್ಲಿ ಮೊಟ್ಟೆಗಳನ್ನು ಸೇರಿಸುವುದನ್ನು ಹಿಂತೆಗೆದುಕೊಂಡ ಅಥವಾ ನಿರ್ಬಂಧಿಸಿದ ಮಧ್ಯಪ್ರದೇಶ ಮತ್ತು ಗೋವಾದಂತಹ ರಾಜ್ಯಗಳೊಂದಿಗೆ ಮಹಾರಾಷ್ಟ್ರ ಈಗ ಸೇರಿಕೊಂಡಿದೆ.
ಗರ್ಭಿಣಿಯ 'ಭ್ರೂಣದೊಳಗೆ ಮತ್ತೊಂದು ಭ್ರೂಣ': 5 ಲಕ್ಷದಲ್ಲಿ ಒಬ್ಬರಿಗೆ ಮಾತ್ರವೇ ಆಗುವ ಕೇಸ್‌!
ಸುಮಾರು 60,000 ಶಿಕ್ಷಕರನ್ನು ಸದಸ್ಯರನ್ನಾಗಿ ಹೊಂದಿರುವ ಶಿವಸೇನಾ ಯುಬಿಟಿ ಥಾಣೆ ಜಿಲ್ಲೆಯ ಶಿಕ್ಷಕ ಸೇನಾ ವಿಭಾಗದ ಮುಖ್ಯಸ್ಥ ಪ್ರಮೋದ್ ಪಟೋಲ್ ಅವರ ಪ್ರಕಾರ, “ಮೊಟ್ಟೆ ಪ್ರೋಟೀನ್‌ನ ಅತ್ಯುತ್ತಮ ಮತ್ತು ಶ್ರೀಮಂತ ಮೂಲವಾಗಿದೆ. ಪ್ರತಿ ಶಾಲೆಯಲ್ಲಿ ಕೆಲವು ಪೋಷಕರು ತಮ್ಮ ಮಗು ಮೊಟ್ಟೆ ತಿನ್ನುವುದನ್ನು ಬಯಸುವುದಿಲ್ಲ ಮತ್ತು ಶಿಕ್ಷಕರು ಮೊಟ್ಟೆಯ ಬದಲಿಗೆ ಹಣ್ಣುಗಳನ್ನು ನೀಡುತ್ತಾರೆ. ಆದರೆ ರಾಜ್ಯ ಸರ್ಕಾರದ ಈ ಆದೇಶವನ್ನು ಸರ್ಕಾರಿ ಶಾಲೆಗಳ ಪ್ರಾಂಶುಪಾಲರ ಹೆಗಲ ಮೇಲೆ ಹೆಚ್ಚುವರಿ ಹೊರೆ ಎಂದು ನಾನು ಭಾವಿಸುತ್ತೇನೆ. ಈಗ, ವಿದ್ಯಾರ್ಥಿಗಳಿಗೆ ಮೊಟ್ಟೆಗಳನ್ನು ನೀಡಲು ಪ್ರಾಂಶುಪಾಲರು ಖಾಸಗಿ ಸಂಸ್ಥೆಗಳಿಂದ ಪ್ರಾಯೋಜಕತ್ವವನ್ನು ಪಡೆಯಬೇಕು. ಪ್ರಾಂಶುಪಾಲರ ಪ್ರಾಥಮಿಕ ಕೆಲಸವೆಂದರೆ ಕಲಿಸುವುದು ಆದರೆ, ನಮ್ಮ ವ್ಯವಸ್ಥೆಯಲ್ಲಿ, ಸರ್ಕಾರವು ಅವರಿಗೆ ಇತರ ಜವಾಬ್ದಾರಿಗಳನ್ನು ನೀಡುತ್ತದೆ' ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಒಂದೇ ವಾರದಲ್ಲಿ ಬೋಳು ತಲೆ; 3 ಗ್ರಾಮದ ಜನರಲ್ಲಿ ಶುರುವಾಯ್ತು ಆತಂಕ, ತನಿಖೆ ಆರಂಭ!
