ದೆಹಲಿ ಗುರುದ್ವಾರ ಮಂದಿರ ಆಸ್ಪತ್ರೆಯಲ್ಲಿ ಅತೀ ಕಡಿಮೆ ದರದಲ್ಲಿ ಸೇವೆ; 50 ರೂ.ಗೆ MRI ಸ್ಕಾನ್!

ಚುನಾವಣಾ ಪ್ರಚಾರದ ವೇಳೆ ಎಲ್ಲಾ ಪಕ್ಷಗಳು ಅತೀ ಕಡಿಮೆ ದರದಲ್ಲಿ ಆರೋಗ್ಯ ಸೇವೆ, ಬಡವರಿಗೆ ಉಚಿತ ಅನ್ನೋ  ಘೋಷವಾಕ್ಯಗಳು ಮೊಳಗಿಸುವುದು ಸಾಮಾನ್ಯ. ಆದರೆ ಯಾವ ಸರ್ಕಾರಗಳು ಕಾರ್ಯಗತ ಮಾಡಿಲ್ಲ. ಇದೀಗ ದೆಹಲಿಯ ಗುರುದ್ವಾರ ಮಂದಿರ ಆಸ್ಪತ್ರೆ ಇದೀಗ ದೇಶದಲ್ಲೇ ಅತ್ಯಂತ ಕಡಿಮೆ ದರದಲ್ಲಿ ಆರೋಗ್ಯ ಸೇವೆ ನೀಡುತ್ತಿದೆ.

ದೆಹಲಿ(ಡಿ.01): ಭಾರತದಲ್ಲಿ ಅತ್ಯಂತ ಕಡಿಮೆ ದರದಲ್ಲಿ ಆರೋಗ್ಯ ಸೇವೆ ಲಭ್ಯವಾಗುತ್ತಿದೆ. ದೆಹಲಿಯ ಸಿಖ್ ಗುರುದ್ವಾರ ಸಾಹೀಬ್ ಬಂಗ್ಲಾ ಮಂದಿರ ಆಸ್ಪತ್ರೆ ಕಡಿಮೆ ದರದಲ್ಲಿ ಆರೋಗ್ಯ ಸೇವೆಯನ್ನು ಸಾಕಾರಗೊಳಿಸುತ್ತಿದೆ. ಕೇವಲ 50 ರೂಪಾಯಿಗೆ MRI ಸ್ಕಾನ್ ಲಭ್ಯವಿದೆ. ಈ ಕುರಿತು ದೆಹಲಿ ಸಿಖ್ ಗುರುದ್ವಾರ ಆಡಳಿತ ಸಮಿತಿ(DSGMC) ಹೇಳಿದೆ.

ಗುರುದ್ವಾರ ಆವರಣದಲ್ಲಿರುವ ಹರಿಕೃಷ್ಣ ಆಸ್ಪತ್ರೆ ಇದೀಗ ಕಡಿಮೆ ದರದಲ್ಲಿ ಆರೋಗ್ಯ ಸೇವೆ ನೀಡುತ್ತಿದೆ. ಈ ತಿಂಗಳಿನಿಂದ(ಡಿಸೆಂಬರ್ 01)  MRI ಸ್ಕಾನ್ ಸೇವೆ ಲಭ್ಯವಿದೆ. ಇನ್ನು ಮುಂದಿನ ವಾರದಿಂದ ಕೇವಲ 600 ರೂಪಾಯಿಗೆ ಡಯಾಲಿಸ್ ಕೂಡ ಲಭ್ಯವಿದೆ. ಇತ್ತೀಚೆಗೆ ಗುರುದ್ವಾರ ಮಂದಿರದ ಆಸ್ಪತ್ರೆಗೆ 6 ಕೋಟಿ ಮೌಲ್ಯದ ಉಪಕರಣಗಳನ್ನು ದಾನ ನೀಡಿದ್ದರು.

ಕಡು ಬಡತನ ಸೇರಿದಂತೆ ಆರ್ಥಿಕ ಸಾಮರ್ಥ್ಯವಿಲ್ಲದವರಿಗೆ 50 ರೂಪಾಯಿಯಲ್ಲಿ  MRI ಸ್ಕಾನ್ ಸೇವೆ ನೀಡಲಾಗುತ್ತಿದೆ. ಇನ್ನು ಇತರರಿಗೆ 800 ರೂಪಾಯಿಯಲ್ಲಿ  MRI ಸ್ಕಾನ್ ನೀಡಲಾಗುವುದು ಎಂದು ಆಡಳಿತ ಮಂಡಳಿ ಹೇಳಿದೆ. X ray, ಅಲ್ಟ್ರಾಸೌಂಡ್ ಸೇವೆಗಳು ಕೇವಲ 150 ರೂಪಾಯಿಗೆ ಲಭ್ಯವಾಗಲಿದೆ.

ಇತರೆಡೆ  MRI ಸ್ಕಾನ್ ಬೆಲೆ ಕನಿಷ್ಠ 2,500 ರೂಪಾಯಿ ಇದೆ. ಆದರೆ ಗುರುದ್ವಾರ ಮಂದಿರ ಇದೀಗ ಅತೀ ಕಡಿಮೆ ಬೆಲೆಯಲ್ಲಿ ಆರೋಗ್ಯ ಸೇವೆ ನೀಡೋ ಮೂಲಕ ದೇಶಕ್ಕೆ ಮಾದರಿಯಾಗಿದೆ.