ಗಡಿ ಸಂಘರ್ಷ ನಡುವೆ ಚಳಿಗಾಲದ ಪಹರೆ ಸವಾಲು; ಭಾರತೀಯ ಸೇನೆಗೆ ವಿಶೇಷ ಟೆಂಟ್!

ಭಾರತ ಹಾಗೂ ಚೀನಾ ನಡುವಿ ಗಡಿ ಸಂಘರ್ಷ ಮಾತುಕತೆ ಮೂಲಕ ಬಗೆ ಹರಿಸುವ ಪ್ರಯತ್ನಗಳು ಕೈಗೂಡುತ್ತಿಲ್ಲ. ಕಳೆದ ಕೆಲ ತಿಂಗಳುಗಳಿಂದ ಚೀನಾ ಸೇನೆಯ ಅತಿಕ್ರಮ ಪ್ರವೇಶವನ್ನು ಭಾರತೀಯ ಸೇನೆ ಹಿಮ್ಮೆಟ್ಟಿಸುತ್ತಲೇ ಇದೆ. ಗಡಿಯಲ್ಲಿ ಉದ್ವಿಘ್ನ ವಾತಾವರಣ ನಿರ್ಮಾಣವಾಗಿರುವ ಕಾರಣ ಚಳಿಗಾಲದ ಪಹರೆ ಅತ್ಯಂತ ಸವಾಲಿನಿಂದ ಕೂಡಿದೆ. ಇದಕ್ಕಾಗಿ ಭಾರತೀಯ ಸೇನೆ ತಯಾರಿ ಮಾಡಿಕೊಂಡಿದೆ. 

ನವದೆಹಲಿ(ಸೆ.22):  ಭಾರತ ಹಾಗೂ ಚೀನಾ ಗಡಿಯಲ್ಲಿ ಪ್ರತಿ ವರ್ಷ ಚಳಿಗಾಲದ ಸಮಯದಲ್ಲಿ ಉಭಯ  ದೇಶಗಳು ಸೇನೆಯನ್ನು ಹಿಂದಕ್ಕೆ ಕರೆಸಿಕೊಳ್ಳುತ್ತದೆ. ಇದು ವಾಡಿಕೆ. ಚಳಿಗಾಲ ಮುಗಿದ ಬಳಿಕ ಮತ್ತೆ ಉಭಯ ದೇಶಗಳು ತಮ್ಮ ತಮ್ಮ ಗಡಿ ಪೋಸ್ಟ್ ವಶಪಡಿಸಿಕೊಂಡು ಪಹರೆ ಕಾಯುತ್ತದೆ. ಆದರೆ ಈ ಬಾರಿ ಪರಿಸ್ಥಿತಿ ಹಾಗಿಲ್ಲ. ಕಳೆದ ಕೆಲ ತಿಂಗಳುಗಳಿಂದ ಭಾರತ ಹಾಗೂ ಚೀನಾ ಗಡಿಯಲ್ಲಿ ಉದ್ವಿಘ್ನ ವಾತಾವರಣವಿದೆ. ಇದೀಗ ಚಳಿಗಾಲ ಸನಿಹವಾಗುತ್ತಿದ್ದು, ಭಾರತೀಯ ಸೇನೆ ಹಲವು ಸವಾಲು ಎದುರಿಸಲು ಸಜ್ಜಾಗಿದೆ.

ಚೀನಾ ಗಡಿ ಕಾಯುವು ಭಾರತೀಯ ಸೈನಿಕರಿಗೆ ಇದೀಗ ವಿಶೇಷ ಟೆಂಟ್ ನೀಡಲಾಗಿದೆ. ಚಳಿಗಾಲದಲ್ಲಿ ಗಡಿಯ ಕೆಲ ಭಾಗದಲ್ಲಿ -45 ಡಿಗ್ರಿ ಚಳಿ ದಾಖಲಾಗುತ್ತದೆ. ಇಷ್ಟೇ ಅಲ್ಲ ಎಲ್ಲಾ ಕಡೆ ಮಂಜುಗಡ್ಡೆ ಆವರಿಸುತ್ತದೆ. ಈ ವೇಳೆ ಪಹರೆ ಅತ್ಯಂತ ಸವಾಲಿನಿಂದ ಕೂಡಿದೆ. ಇದಕ್ಕಾಗಿ ಸೇನಗೆ ವಿಶೇಷ ಟೆಂಟ್ ನೀಡಲಾಗಿದೆ. ಈ ಟೆಂಟ್ ಮೈನಸ್ 40 ರಿಂದ ಮೈನಸ್ 50 ಡಿಗ್ರಿ ವರೆಗಿನ ಚಳಿಯನ್ನು ತಡೆಯಲಿದೆ. ಟೆಂಟ್ ಒಳಗಡೆ ಬೆಚ್ಚಿಗಿನ ವಾತಾವರಣ ಒದಗಿಸಲಿದೆ. 

ಪ್ಯಾಂಗಾಂಗ್ ಲೇಕ್ ಸರೋವರ, ಗಲ್ವಾಣ್ ಕಣಿವೆ ಸೇರಿದಂತೆ ಭಾರತ ಚೀನಾದ 70 ಕಿಲೋಮೀಟರ್ ಗಡಿಯಲ್ಲಿ ಕಿರಿಕ್ ನಡೆಯುತ್ತಲೆ ಇದೆ. ಈ ಬಾರಿ ಚಳಿಗಾಲದಲ್ಲೂ ಹದ್ದಿನ ಕಣ್ಣಿಡಬೇಕಾದ ಪರಿಸ್ಥಿತಿ ಬಂದೊದಗಿದೆ. ಇದಕ್ಕಾಗಿ ಭಾರತೀಯ ಸೇನೆ ಈಗಲೇ ಸಿದ್ಧತೆ ಆರಂಭಿಸಿದೆ. ಟೆಂಟ್ ಜೊತೆಗೆ ಇತರ ಕೆಲ ಸೌಕರ್ಯಗಳನ್ನು ಒದಗಿಸಲು ಸೇನೆ ಮುಂದಾಗಿದೆ.