ದೇಶ, ರಾಜ್ಯದಲ್ಲಿ ಕೊರೋನಾ ಅಭಿಯಾನ, ಹೀಗಿದೆ ಸ್ಥಿತಿಗತಿ!

* ಕೊರೋನಾ ಹಾವಳಿ ಮಧ್ಯೆ ದೇಶದಲ್ಲಿ ಮುಂದುವರೆದ ಲಸಿಕೆ ಅಭಿಯಾನ * ದೇಶ, ರಾಜ್ಯದಲ್ಲಿ ಎಲ್ಲಿಗೆ ತಲುಪಿದೆ ವ್ಯಾಕ್ಸಿನೇಷನ್ ಡ್ರೈವ್? * ದೇಶದ ಸರಾಸರಿಗಿಂತ ಕರ್ನಾಟಕದಲ್ಲಿ ಲಸಿಕೆ ಪಡೆದವರ ಸರಾಸರಿಯೇ ಹೆಚ್ಚು

ನವದೆಹಲಿ(ಜೂ.27): ದೇಶದಲ್ಲಿ ಕೊರೋನಾ ಲಸಿಕೆ ಅಭಿಯಾನ ಭರದಿಂದ ಸಾಗಿದೆ. ಡಿಸೆಂಬರ್‌ನೊಳಗೆ ಇಡೀ ದೇಶದ ಅರ್ಹ ನಾಗರಿಕರಿಗೆ ಲಸಿಕೆ ನೀಡುವ ಪ್ರಕ್ರಿಯೆ ಪೂರ್ಣಗೊಳಿಸುವ ಗುರಿ ಸರ್ಕಾರ ಹೊಂದಿದೆ. ಇನ್ನು ಆರಂಭದಲ್ಲಿ ಲಸಿಕೆ ಹಾಕಿಸಿಕೊಳ್ಳಲು ಹಿಂದೇಟು ಹಾಕಿದ ಜನರು ಕೂಡಾ ಕೊರೋನಾ ಎರಡನೇ ಅಲೆ ಬಂದ ಬಳಿಕ ಎಚ್ಚೆತ್ತುಕೊಂಡಿದ್ದಾರೆ. ಲಸಿಕೆ ಪಡೆಯಲು ನೋಂದಾವಣೆ ಮಾಡಿಕೊಳ್ಳುತ್ತಿದ್ದು, ಕೇಂದ್ರಗಳತ್ತ ಧಾವಿಸುತ್ತಿದ್ದಾರೆ. ಹೀಗಿರುವಾಗ ಲಸಿಕೆ ಪೂರೈಕೆಯಲ್ಲಿ ಕೊಂಚ ವಿಳಂಬವಾಗುತ್ತಿದೆಯಾದರೂ, ಈ ಕೊರತೆ ನೀಗಿಸಲು ಸರ್ಕಾರ ಸೂಕ್ತ ಕ್ರಮಗಳನ್ನು ತೆಗೆದುಕೊಂಡಿದೆ.

ಹೀಗಿರುವಾಗ ದೇಶದಲ್ಲಿ ಲಸಿಕೆ ಅಭಿಯಾನ ಎಲ್ಲಿಗೆ ತಲುಪಿದೆ ಎಂಬ ಕುತೂಹಲ ಕಾಡುವುದು ಸಹಜ. ಅದರಲ್ಲೂ ಕಳೆದೊಂದು ವಾರದಿಂದ ಲಸಿಕೆ ಅಭಿಯಾನಕ್ಕೆ ಹೆಚ್ಚಿನ ಮಹತ್ವ ನೀಡಲಾಗುತ್ತಿದ್ದು, ರಾಜ್ಯಗಲೂ ಈ ನಿಟ್ಟಿನಲ್ಲಿ ಗಮನ ಹರಿಸುತ್ತಿವೆ. ಕಳೆದೊಂದು ವಾರದಲ್ಲಿ ಅತೀ ಹೆಚ್ಚು ಲಸಿಕೆ ನೀಡಿದ ಪಟ್ಟಿಯಲ್ಲಿ ಉತ್ತರ ಪ್ರದೇಶ ಮೊದಲ ಸ್ಥಾನದಲ್ಲಿದ್ದರೆ, ಮಧ್ಯಪ್ರದೇಶ ಎರಡನೇ ಹಾಗೂ ಕರ್ನಾಟಕ ಮೂರನೇ ಸ್ಥಾನದಲ್ಲಿದೆ. 

ಒಟ್ಟಾರೆಯಾಗಿ ಎಷ್ಟು ಲಸಿಕೆ?

ದೇಶದಲ್ಲಿ ಈವರೆಗೂ ಒಟ್ಟು 31,65,59,644 ಲಸಿಕೆ ಡೋಸ್‌ಗಳನ್ನು ನೀಡಲಾಗಿದೆ. ಇದರಲ್ಲಿ 26,17,27,189 ಮಂದಿ ಕೇವಲ ಮೊದಲ ಡೋಸ್‌ ಪಡೆದಿದ್ದರೆ, 5,48,32,455 ಮಂದಿ ಎರಡನೇ ಡೋಸ್‌ ಲಸಿಕೆ ಪಡೆದಿದ್ದಾರೆ. ಭಾರತದಲ್ಲಿ ಅತೀ ಹೆಚ್ಚು ಲಸಿಕೆ ನೀಡಿದ ರಾಜ್ಯಗಳ ಪಟ್ಟಿಯಲ್ಲಿ ಮಹಾರಾಷ್ಟ್ರ(3,10,33,034 ಲಸಿಕೆ) ಮೊದಲ ಸ್ಥಾನದಲ್ಲಿದ್ದರೆ, ಉತ್ತರ ಪ್ರದೇಶ(3,04,53,930 ಲಸಿಕೆ) ಎರಡನೇ ಸ್ಥಾನದಲ್ಲಿದೆ.  ಈ ಪಟ್ಟಿಯಲ್ಲಿ ಕರ್ನಾಟಕ(2,16,22,687 ಲಸಿಕೆ) ಐದನೇ ಸ್ಥಾನದಲ್ಲಿದೆ.

ಭಾರತ: ಅರ್ಹರು(18 ವರ್ಷಕ್ಕಿಂತ ಮೇಲ್ಪಟ್ಟವರು): 95 ಕೋಟಿ
ಕನಿಷ್ಠ ಮೊದಲ ಡೋಸ್ ಪಡೆದವರು: 28.02%
ಎರಡೂ ಡೋಸ್ ಪಡೆದವರು: 5.77%

ಕರ್ನಾಟಕ: ಅರ್ಹರು(18 ವರ್ಷಕ್ಕಿಂತ ಮೇಲ್ಪಟ್ಟವರು): 5.11 ಕೋಟಿ
ಕನಿಷ್ಠ ಮೊದಲ ಡೋಸ್ ಪಡೆದವರು: 35.42%
ಎರಡೂ ಡೋಸ್ ಪಡೆದವರು: 6.85%

ಬೆಂಗಳೂರು ನಗರ+BBMP: ಅರ್ಹರು(18 ವರ್ಷಕ್ಕಿಂತ ಮೇಲ್ಪಟ್ಟವರು): 1 ಲಕ್ಷ
ಕನಿಷ್ಠ ಮೊದಲ ಡೋಸ್ ಪಡೆದವರು: 54.16%
ಎರಡೂ ಡೋಸ್ ಪಡೆದವರು: 9.58%

ಈ ಅಂಕಿ ಅಂಶಗಳನ್ನು ಗಮನಿಸಿದರೆ ಭಾರತದಲ್ಲಿ ಈವರೆಗೆ ವಿತರಣೆಯಾದ ಮೊದಲ ಹಾಗೂ ಎರಡನೇ ಲಸಿಕೆಯ ಸರಾಸರಿಗಿಂತ, ಕರ್ನಾಟಕದಲ್ಲಿ ವಿತರಣೆಯಾದ ಲಸಿಕೆಯ ಸರಾಸರಿ ಹೆಚ್ಚಿದೆ ಎಂಬುವುದು ಉಲ್ಲೇಖನೀಯ.