1200 ರು ಇದ್ದ ಕೊರೋನಾ ಪರೀಕ್ಷಾ ದರ ಭಾರೀ ಇಳಿಕೆ

ದೇಶದಲ್ಲಿ ಮಹಾಮಾರಿ ಕೊರೋನಾ ತನ್ನ ಅಟ್ಟಹಾಸ ಮೆರೆಯುತ್ತಿರುವ ಬೆನ್ನಲ್ಲೇ ಇದೀಗ ಪರೀಕ್ಷಾ ದರವನ್ನು ಕೆಲವೆಡೆ ಭಾರೀ ಪ್ರಮಾಣದಲ್ಲಿ ಇಳಿಸಲಾಗುತ್ತಿದೆ. 

ಭುವನೇಶ್ವರ್‌ (ಡಿ.04) : ಕೊರೋನಾ ಪತ್ತೆಗಾಗಿ ನಡೆಸಲಾಗುವ ಆರ್‌ಟಿ-ಪಿಸಿಆರ್‌ ಪರೀಕ್ಷಾ ದರವನ್ನು ದೆಹಲಿ ಸರ್ಕಾರ 2400 ರು.ನಿಂದ 800 ರು.ಗೆ ಇಳಿಸಿದ ಬೆನ್ನಲ್ಲೇ ಒಡಿಶಾ ಸರ್ಕಾರ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದೆ. 

ಖಾಸಗಿ ಪ್ರಯೋಗಾಲಯಗಳಲ್ಲಿ ಆರ್‌ಟಿ-ಪಿಸಿಆರ್‌ ದರವನ್ನು 1200 ರು.ನಿಂದ 400 ರು.ಗೆ ಇಳಿಕೆ ಮಾಡಿದೆ. 

ಇದರಿಂದಾಗಿ ದೇಶದಲ್ಲಿ ಅತ್ಯಂತ ಕಡಿಮೆ ದರಕ್ಕೆ ಆರ್‌ಟಿ- ಪಿಸಿಆರ್‌ ನಡೆಸುವ ರಾಜ್ಯ ಎನಿಸಿಕೊಂಡಿದೆ. ಈ ಸಂಬಂಧ ಅಧಿಸೂಚನೆ ಹೊರಡಿಸಿರುವ ರಾಜ್ಯ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ, ಕೊರೋನಾ ಟೆಸ್ಟಿಂಗ್‌ ಕಿಟ್‌ಗಳು ಮತ್ತು ಇತರ ಸಾಧನಗಳ ಬೆಲೆಯಲ್ಲಿ ಗಣನೀಯ ಪ್ರಮಾಣದ ಇಳಿಕೆಯಾದ ಕಾರಣಕ್ಕೆ ಆರ್‌ಟಿ-ಪಿಸಿಆರ್‌ ಪರೀಕ್ಷೆಯ ದರವನ್ನು 1200 ರು.ನಿಂದ 400 ರು.ಗೆ ಇಳಿಸಲಾಗಿದೆ ಎಂದು ಹೇಳಿದೆ. ಸರ್ಕಾರಿ ಪ್ರಯೋಗಾಲಯಗಳಲ್ಲಿ ಕೊರೋನಾ ಪರೀಕ್ಷೆ ಉಚಿತ ಇದೆ.