ವಿಧಾನಸಭೆಯಲ್ಲಿ ಶಾಸಕರು ಅಶಿಸ್ತಿನಿಂದ ವರ್ತಿಸಿದರೆ, ಗದ್ದಲ ಎಬ್ಬಿಸಿದರೆ ಅಮಾನತು ಶಿಕ್ಷೆಗೆ ಗುರಿ| ವಿಧಾನಸಭೆಗೆ ಟಿ-ಶರ್ಟ್‌ ಧರಿಸಿ ಬಂದ ಶಾಸಕನನ್ನು ಹೊರಗಟ್ಟಿದ ಸ್ಪೀಕರ್‌!
ಗಾಂಧಿನಗರ(ಮಾ.16): ವಿಧಾನಸಭೆಯಲ್ಲಿ ಶಾಸಕರು ಅಶಿಸ್ತಿನಿಂದ ವರ್ತಿಸಿದರೆ, ಗದ್ದಲ ಎಬ್ಬಿಸಿದರೆ ಅಮಾನತು ಶಿಕ್ಷೆಗೆ ಗುರಿಯಾಗುವುದು ಹೊಸದಲ್ಲ. ಆದರೆ, ಟಿ- ಶರ್ಟ್‌ ಧರಿಸಿ ಬಂದ ಕಾರಣಕ್ಕೆ ಸದನದ ಕಲಾಪದಿಂದ ಶಾಸಕರೊಬ್ಬರನ್ನು ಸ್ಪೀಕರ್‌ ಹೊರಗೆ ಕಳುಹಿಸಿರುವ ಘಟನೆ ಗುಜರಾತ್ ವಿಧಾನಸಭೆಯಲ್ಲಿ ನಡೆದಿದೆ.
ಕಾಂಗ್ರೆಸ್‌ ಶಾಸಕ ವಿಮಲ್‌ ಚೂಡಸಮ ಎನ್ನುವವರು ಸೋಮವಾರ ಸದನಕ್ಕೆ ಟಿ- ಶರ್ಟ್‌ ಧರಿಸಿ ಆಗಮಿಸಿದ್ದರು. ಆದರೆ, ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ಸ್ಪೀಕರ್‌ ರಾಜೇಂದ್ರ ತ್ರಿವೇದಿ, ಶಾಸಕನನ್ನು ಸದನದಿಂದ ಹೊರಗೆ ಕಳುಹಿಸಿದ್ದಾರೆ.
ಶಾಸಕರಾದವರು ಶರ್ಟ್‌ ಅಥವಾ ಕುರ್ತಾ ಧರಿಸಬೇಕು ಮತ್ತು ಸದನದ ಗೌರವ ಮತ್ತು ಮರ್ಯಾದೆಯನ್ನು ಕಾಪಾಡಬೇಕು. ಈ ಬಗ್ಗೆ ಮೊದಲೇ ತಿಳಿಸಿದ್ದ ಹೊರತಾಗಿಯೂ ಚೂಡಸಮ ಶಿಸ್ತನ್ನು ಉಲ್ಲಂಘಿಸಿದ್ದಾರೆ ಎಂದು ಸ್ಪೀಕರ್‌ ತಮ್ಮ ಅಸಮಾಧಾನ ಹೊರಹಾಕಿದ್ದಾರೆ.