ಅಂಬಾನಿ ಮನೆ ಸ್ಫೋಟ​: ಮಹತ್ವದ ಸುಳಿವು ಲಭ್ಯ!

ಅಂಬಾನಿ ಮನೆ ಸ್ಫೋಟ​: ಐಎಂ ಉಗ್ರರ ಕೈವಾಡ?| ತಿಹಾರ್‌ ಜೈಲಲ್ಲಿ ಉಗ್ರನ ಸೆಲ್‌ನಿಂದ ಮೊಬೈಲ್‌ ವಶ| ಈ ಮೊಬೈಲ್‌ ಮೂಲಕ ಟೆಲಿಗ್ರಾಂ ಸಂದೇಶ ರವಾನೆ

ನವ​ದೆ​ಹ​ಲಿ(ಮಾ.13): ಉದ್ಯಮಿ ಮುಕೇಶ್‌ ಅಂಬಾನಿ ನಿವಾ​ಸದ ಮುಂದೆ ಸ್ಫೋಟ​ಕ​ಗ​ಳನ್ನು ಒಳ​ಗೊಂಡಿದ್ದ ಕಾರನ್ನು ತಾವೇ ನಿಲ್ಲಿ​ಸಿ​ದ್ದಾಗಿ ಹೇಳಿ​ಕೊಂಡಿದ್ದ ಜೈ​ಷ್‌-ಉಲ್‌-ಹಿಂದ್‌ ಎಂಬ ಸಂಘ​ಟ​ನೆಯ ಟೆಲಿಗ್ರಾಂ ಖಾತೆ ಜನ್ಮ ತಾಳಿದ್ದು ದಿಲ್ಲಿಯ ತಿಹಾರ್‌ ಜೈಲಿ​ನಲ್ಲೇ ಎಂಬ ಮಾಹಿತಿ ಸಿಕ್ಕಿದೆ. ಜೊತೆಗೆ ಈ ಟೆಲಿಗ್ರಾಂ ಸಂದೇಶ ರವಾನೆಯಾಗಿರುವುದು, ಇಂಡಿ​ಯನ್‌ ಮುಜಾ​ಹಿ​ದೀನ್‌ ಉಗ್ರ ಸಂಘ​ಟನೆಯ ತೆಹ​ಸೀನ್‌ ಅಖ್ತರ್‌ ಅಲಿ​ಯಾಸ್‌ ಮೋನು ಎಂಬಾತನ ಬಳಿಯಿಂದ ಎಂಬುದೂ ಖಚಿತಪಟ್ಟಿದೆ. ಹೀಗಾಗಿ ಈ ದೃಷ್ಯತ್ಯದ ಹಿಂದೆ ಇಂಡಿಯನ್‌ ಮುಜಾಹಿದೀನ್‌ ಕೈವಾಡವಿರಬಹುದು, ಇಲ್ಲವೇ ಉದ್ಯಮಿಯಿಂದ ಹಣ ಕಬಳಿಸಲು ಉಗ್ರರು ಸುಮ್ಮನೆ ಟೆಲಿಗ್ರಾಂ ಆ್ಯಪ್‌ ಮೂಲಕ ಧಮಕಿ ಹಾಕಿರಬಹುದು ಎಂದು ಹೇಳಲಾಗುತ್ತಿದೆ.

2014ರ ಲೋಕ​ಸಭೆ ಚುನಾ​ವ​ಣೆ ವೇಳೆ ನರೇಂದ್ರ ಮೋದಿ ಅವರ ಪಟನಾ ರಾರ‍ಯಲಿ​ಯಲ್ಲಿ ವಿಧ್ವಂಸಕ ಕೃತ್ಯಕ್ಕೆ ಯತ್ನಿ​ಸಿದ ಕೇಸ್‌​ನಲ್ಲಿ ತೆಹ​ಸೀನ್‌ ಅಖ್ತ​ರ್‌​ನನ್ನು ಬಂಧಿಸಿ, ತಿಹಾರ್‌ ಜೈಲಿ​ನ​ಲ್ಲಿ​ಡ​ಲಾ​ಗಿದೆ. ಅಂಬಾನಿ ಮನೆ ಸ್ಫೋಟ​ಕ​ಕ್ಕಾಗಿ ಸ್ಫೋಟ​ಕ​ಗ​ಳನ್ನು ಹೊಂದಿದ್ದ ಕಾರನ್ನು ನಿಲ್ಲಿ​ಸಿ​ದಾಗಿ ಸಂದೇಶ ರವಾ​ನಿ​ಸ​ಲಾದ ಟೆಲಿಗ್ರಾಂ ಖಾತೆಯನ್ನೂ ಇವ​ನೇ ಸೃಷ್ಟಿ​ಸಿ​ದ್ದಾನೆ ಎಂಬುದು ಪೊಲೀ​ಸರ ತನಿ​ಖೆ​ಯಲ್ಲಿ ಕಂಡು​ಬಂದಿದೆ. ಈ ಹಿನ್ನೆ​ಲೆ​ಯಲ್ಲಿ ತೆಹ​ಸೀ​ನ್‌ ಅಖ್ತ​ರ್‌​ನನ್ನು ವಶಕ್ಕೆ ಪಡೆದು, ಈ ಬಗ್ಗೆ ವಿಚಾ​ರಣೆ ನಡೆ​ಸಲು ಪೊಲೀ​ಸರು ತೀರ್ಮಾ​ನಿ​ಸಿ​ದ್ದಾರೆ ಎಂದು ತಿಳಿ​ದು​ಬಂದಿದೆ.

ತನ್ನ ಮೊಬೈಲ್‌ ಸಂಖ್ಯೆ ಗುರುತು ಹಿಡಿ​ಯ​ದಂತೆ ಟಾರ್‌ ಬ್ರೌಸರ್‌ ಮೂಲಕ ಟೆಲಿ​ಗ್ರಾಂನಲ್ಲಿ ಖಾತೆ ತೆರೆ​ದಿದ್ದ ಉಗ್ರ ಅಖ್ತ​ರ್‌, ಉದ್ಯಮಿ ಮುಕೇಶ್‌ ನಿವಾ​ಸ​ದ ಮುಂದೆ ಪತ್ತೆ​ಯಾ​ಗಿದ್ದ ಸ್ಫೋಟಕ ತುಂಬಿದ ಕಾರನ್ನು ನಿಲ್ಲಿ​ಸಿದ್ದು ತಾವೇ ಎಂಬ ಸಂದೇಶ ರವಾ​ನಿ​ಸಿದ್ದ.