ನಿವೃತ್ತ ಶಿಕ್ಷಕನಿಗೆ ಬೆಳ್ಳಿ ರಥದಲ್ಲಿ ಅದ್ದೂರಿ ಬೀಳ್ಕೊಡುಗೆ, ಶಿಕ್ಷಕ ಸೇವೆಗೆ ಗ್ರಾಮಸ್ಥರಿಂದ ಗೌರವ

ಮಳವಳ್ಳಿಯಲ್ಲಿ ನಿವೃತ್ತ ಶಿಕ್ಷಕ ಶಿವಕುಮಾರ್ ಅವರಿಗೆ ಬೆಳ್ಳಿ ರಥದಲ್ಲಿ ಮೆರವಣಿಗೆ ಮಾಡಿ, ಚಿನ್ನದ ಸರ ಹಾಗೂ ಬೆಳ್ಳಿ ಕಡಗ ನೀಡಿ ಗೌರವಿಸಲಾಯಿತು. 35 ವರ್ಷಗಳ ಸೇವೆ ಸಲ್ಲಿಸಿದ ಶಿಕ್ಷಕರಿಗೆ ಗ್ರಾಮಸ್ಥರು ಮತ್ತು ಹಳೆಯ ವಿದ್ಯಾರ್ಥಿಗಳು ಭಾವಪೂರ್ಣ ಬೀಳ್ಕೊಡುಗೆ ನೀಡಿದರು.

ಮಂಡ್ಯ (ಜೂ. 29): ಮಂಡ್ಯ ಜಿಲ್ಲೆಯ ಮಳವಳ್ಳಿಯಲ್ಲಿ ಶಿಕ್ಷಕನಿಗೆ ಬೆಳ್ಳಿ ರಥದಲ್ಲಿ ಮೆರವಣಿಗೆ ಮಾಡಿ, ಚಿನ್ನದ ಸರ ಹಾಗೂ ಬೆಳ್ಳಿ ಕಡಗ ನೀಡಿ ಅದ್ದೂರಿ ಬೀಳ್ಕೊಡುಗೆ ಸಮಾರಂಭ ನಡೆದ ಅಪೂರ್ವ ಘಟನೆಯು ಎಲ್ಲರ ಗಮನ ಸೆಳೆದಿದೆ.

ಮಳವಳ್ಳಿಯ ಬಂಡೂರು ಸರ್ಕಾರಿ ಶಾಲೆಯಲ್ಲಿ 35 ವರ್ಷಗಳ ಕಾಲ ಸೇವೆ ಸಲ್ಲಿಸಿದ ಗಣಿತ ಶಿಕ್ಷಕ ಶಿವಕುಮಾರ್ ಅವರು ನಿವೃತ್ತರಾಗಿದ್ದು, ಗ್ರಾಮಸ್ಥರು ಹಾಗೂ ಹಳೆಯ ವಿದ್ಯಾರ್ಥಿಗಳಿಂದ ಭಾವಪೂರ್ಣವಾಗಿ ಬೀಳ್ಕೊಡಲಾಯಿತು.

ಶಿಕ್ಷಕ ಶಿವಕುಮಾರ್ ಅವರು ತಮ್ಮ ಸಾಧನೆಯ ಮೂಲಕ ಅನೇಕ ವಿದ್ಯಾರ್ಥಿಗಳಿಗೆ ಶಿಕ್ಷಣದ ಬೆಳಕನ್ನು ಬಿತ್ತಿದ್ದರು. ಸರಳ ಬದುಕು, ಶಿಸ್ತಿನ ಕಲಿಕೆ ಹಾಗೂ ಅಂತರಂಗದಲ್ಲಿ ವಿದ್ಯಾರ್ಥಿಗಳ ಪ್ರೀತಿಗೆ ಪಾತ್ರರಾಗಿದ್ದ ಈ ಶಿಕ್ಷಕರಿಗೆ, ಅವರ ಸೇವೆಗೆ ಗೌರವದ ನೋಟವಾಗಿ ಗ್ರಾಮಸ್ಥರು ಬೆಳ್ಳಿ ರಥದಲ್ಲಿ ಮೆರವಣಿಗೆ ಮಾಡಿ, ವಾದ್ಯಮೇಳದೊಂದಿಗೆ ಅದ್ಧೂರಿ ಸಮಾರಂಭವೊಂದನ್ನು ಆಯೋಜಿಸಿದರು.

ಈ ವೇಳೆ ಶಿಕ್ಷಕ ಶಿವಕುಮಾರ್ ಅವರಿಗೆ ಚಿನ್ನದ ಸರ, ಬೆಳ್ಳಿ ಕಡಗ, ಪುಷ್ಪವೃಷ್ಟಿ ಮತ್ತು ಸ್ಮರಣಿಕೆಯನ್ನೂ ನೀಡಿ ಗೌರವಿಸಲಾಯಿತು. ಹಳೆಯ ವಿದ್ಯಾರ್ಥಿಗಳು 'ನಾವು ಶಿಕ್ಷಕರಿಂದ ಶಿಸ್ತನ್ನು, ಆದರ್ಶವನ್ನು ಕಲಿತೆವು. ಅವರು ನಮ್ಮ ಜೀವನದ ದಾರಿ ದೀಪ' ಎಂದರು.

ಗ್ರಾಮದ ಹಿರಿಯರು, ಶಾಲೆಯ ಸಿಬ್ಬಂದಿ, ಪೋಷಕರು ಹಾಗೂ ನೂರಾರು ಮಂದಿ ವಿದ್ಯಾರ್ಥಿಗಳು ಈ ಸಮಾರಂಭದಲ್ಲಿ ಭಾಗವಹಿಸಿ ಶಿಕ್ಷಕರಿಗೆ ಕೃತಜ್ಞತೆ ಸಲ್ಲಿಸಿದರು. ಈ ದೃಷ್ಠಾಂತದ ಮೂಲಕ ಒಂದು ಶಿಕ್ಷಕನ ಪ್ರಾಮುಖ್ಯತೆ, ಪ್ರಭಾವ ಮತ್ತು ಸಮಾಜದಲ್ಲಿ ಅವರ ಪಾತ್ರವನ್ನು ಮತ್ತೊಮ್ಮೆ ನೆನಪಿಸಲಾಗಿತ್ತು.