4 ರಾಶಿಗೆ ಚಿಕ್ಕ ವಯಸ್ಸಲ್ಲೇ ಮನೆ, ಜಮೀನು ಖರೀದಿ ಯೋಗ; ಅಮ್ಮನಿಂದಲೂ ಸಿಗುತ್ತೆ ಆಸ್ತಿ

ಜ್ಯೋತಿಷ್ಯದ ಪ್ರಕಾರ, ಜಾತಕದ ನಾಲ್ಕನೇ ಮನೆ ಬಲವಾಗಿದ್ದರೆ ಸ್ವಂತ ಮನೆ ಹೊಂದುವ ಯೋಗ ಸುಲಭವಾಗಿ ಒಲಿಯುತ್ತದೆ.4 ರಾಶಿಯವರಿಗೆ ಪೂರ್ವಜರ ಆಸ್ತಿ, ಸ್ವಂತ ಪರಿಶ್ರಮ ಅಥವಾ ಅನಿರೀಕ್ಷಿತ ಮೂಲಗಳಿಂದ ಮನೆ ಖರೀದಿಸುವ ಅದೃಷ್ಟ ಹೇಗೆ ಲಭಿಸುತ್ತದೆ ಎಂಬುದನ್ನು ಈ ಲೇಖನ ವಿವರಿಸುತ್ತದೆ.

Home

ಒಬ್ಬರಿಗೆ ಸ್ವಂತ ಮನೆ ಸಿಗುವ ಅವಕಾಶ ಅವರ ಶ್ರಮವನ್ನು ಅವಲಂಬಿಸಿದ್ದರೂ, ಜ್ಯೋತಿಷ್ಯದ ಪ್ರಕಾರ ಕೆಲವು ರಾಶಿಗಳಿಗೆ ಈ ಅದೃಷ್ಟ ಸುಲಭವಾಗಿ ಒಲಿಯುತ್ತದೆ. ಜಾತಕದಲ್ಲಿ ಆಸ್ತಿ, ಭೂಮಿ, ವಾಹನ ಮತ್ತು ಸುಖವನ್ನು ಸೂಚಿಸುವ 'ನಾಲ್ಕನೇ ಮನೆ' ಬಲವಾಗಿದ್ದಾಗ, ಅವರಿಗೆ ಪೂರ್ವಜರ ಆಸ್ತಿಯಿಂದ ಅಥವಾ ಸುಲಭವಾಗಿ ಮನೆ ಖರೀದಿಸುವ ಯೋಗ ಉಂಟಾಗುತ್ತದೆ.

ಕರ್ಕಾಟಕ ರಾಶಿ

ಚಂದ್ರನ ಆಳ್ವಿಕೆಯಲ್ಲಿ ಜನಿಸುವ ಕರ್ಕಾಟಕ ರಾಶಿಯವರಿಗೆ, ಜಾತಕದ ನಾಲ್ಕನೇ ಮನೆ ಯಾವಾಗಲೂ ಅನುಕೂಲಕರವಾಗಿರುತ್ತದೆ. ಇದರಿಂದ ಇವರು ಶಾಂತಿಯುತ ವಾತಾವರಣದಲ್ಲಿ, ಪ್ರಕೃತಿ ಸೌಂದರ್ಯವಿರುವ ಸ್ಥಳಗಳ ಬಳಿ ತಮಗೆ ಇಷ್ಟವಾದ ಮನೆಯನ್ನು ಕಟ್ಟಿಕೊಳ್ಳುತ್ತಾರೆ. ಇವರಿಗೆ ತಾಯಿಯ ಕಡೆಯಿಂದ ಆಸ್ತಿಪಾಸ್ತಿ ಸಿಗಬಹುದು ಅಥವಾ ಸಂಬಂಧಿಕರ ಬೆಂಬಲ ಚೆನ್ನಾಗಿ ಸಿಗುತ್ತದೆ. ಬ್ಯಾಂಕ್‌ಗಳಲ್ಲಿ ಗೃಹ ಸಾಲ (Home Loan) ಪಡೆಯುವಾಗ ಯಾವುದೇ ಅಡೆತಡೆಗಳಿಲ್ಲದೆ ಬೇಗನೆ ಅನುಮೋದನೆ ಸಿಗುವುದರಿಂದ, ಇವರು ಅಂದುಕೊಂಡ ಸಮಯದಲ್ಲಿ ಸುಲಭವಾಗಿ ಮನೆ ಕಟ್ಟಿಬಿಡುತ್ತಾರೆ.

ಮಕರ ರಾಶಿ

ಕಠಿಣ ಪರಿಶ್ರಮ ಮತ್ತು ಪ್ರಾಮಾಣಿಕತೆಗೆ ಹೆಸರಾದ ಶನಿಯ ಪ್ರಭಾವದಲ್ಲಿರುವ ಮಕರ ರಾಶಿಯವರು, ರಿಯಲ್ ಎಸ್ಟೇಟ್ ಮತ್ತು ಭೂಮಿ ಹೂಡಿಕೆಗಳಲ್ಲಿ ಉತ್ತಮ ಯೋಜಕರಾಗಿರುತ್ತಾರೆ. ಚಿಕ್ಕ ವಯಸ್ಸಿನಿಂದಲೇ ಸಣ್ಣ ಉಳಿತಾಯವನ್ನು ಪ್ರಾರಂಭಿಸಿ, ಭವಿಷ್ಯಕ್ಕಾಗಿ ಅಡಿಪಾಯ ಹಾಕಿಕೊಳ್ಳುವುದರಲ್ಲಿ ಇವರು ನಿಪುಣರು. ತಾವು ಉಳಿಸಿದ ಹಣದಿಂದ ದೊಡ್ಡ ಜಮೀನು ಅಥವಾ ಹಳೆಯ ಮನೆಗಳನ್ನು ಖರೀದಿಸಿ, ಅದನ್ನು ತಮಗೆ ಬೇಕಾದ ಹಾಗೆ ನವೀಕರಿಸಿಕೊಳ್ಳುತ್ತಾರೆ. ಅಲ್ಲದೆ, ಮಾರುಕಟ್ಟೆಯಲ್ಲಿ ಕಡಿಮೆ ಬಡ್ಡಿಯ ಸಾಲಗಳನ್ನು ಪತ್ತೆಹಚ್ಚಿ, ಅದನ್ನು ಸರಿಯಾಗಿ ಬಳಸಿಕೊಂಡು ಆಸ್ತಿಗಳನ್ನು ತಮ್ಮದಾಗಿಸಿಕೊಳ್ಳುವುದರಲ್ಲಿ ಇವರು ನಿಸ್ಸೀಮರು.

ವೃಷಭ ರಾಶಿ

ಶುಕ್ರನನ್ನು ರಾಶ್ಯಾಧಿಪತಿಯಾಗಿ ಹೊಂದಿರುವ ವೃಷಭ ರಾಶಿಯವರಿಗೆ ಸುಂದರ ಮತ್ತು ಸುಸಜ್ಜಿತ ಮನೆ ಹೊಂದುವ ಯೋಗ ಸಹಜವಾಗಿಯೇ ಹೆಚ್ಚು. ಇವರು ಐಷಾರಾಮಿ ಜೀವನವನ್ನು ಇಷ್ಟಪಡುತ್ತಾರೆ, ಹಾಗಾಗಿ ತಮ್ಮ ಇಚ್ಛೆಗೆ ತಕ್ಕಂತೆ ಎಲ್ಲಾ ಆಧುನಿಕ ಸೌಲಭ್ಯಗಳಿರುವ ಮನೆಯನ್ನೇ ಆಯ್ಕೆ ಮಾಡಿಕೊಳ್ಳುತ್ತಾರೆ. ಇವರು ಹೆಚ್ಚು ಕಷ್ಟಪಟ್ಟು ಹೂಡಿಕೆ ಮಾಡದೆಯೇ, ಪೂರ್ವಜರ ಆಸ್ತಿ ಅಥವಾ ಮನೆಗಳು ಹುಡುಕಿಕೊಂಡು ಬರುವ ಸಾಧ್ಯತೆ ಹೆಚ್ಚು. ಕೇವಲ ಮನೆ ಮಾತ್ರವಲ್ಲ, ತಮ್ಮ ವೈಯಕ್ತಿಕ ಜೀವನದಲ್ಲೂ ಬಯಸಿದ ಐಷಾರಾಮಿ ಸ್ಥಿತಿಯನ್ನು ತಲುಪುವ ಅದೃಷ್ಟ ಇವರಿಗಿರುತ್ತದೆ.

ವೃಶ್ಚಿಕ ರಾಶಿ

ಭೂಮಿ ಮತ್ತು ಜಮೀನಿನ ಅಧಿಪತಿಯಾದ ಮಂಗಳನನ್ನು ರಾಶ್ಯಾಧಿಪತಿಯಾಗಿ ಹೊಂದಿರುವವರು ವೃಶ್ಚಿಕ ರಾಶಿಯವರು. ಈ ಕಾರಣದಿಂದಾಗಿಯೇ, ಜಮೀನು ಮತ್ತು ಆಸ್ತಿಗಳನ್ನು ಸಂಪಾದಿಸುವುದರಲ್ಲಿ ಇವರಿಗೆ ವಿಶೇಷ ಯೋಗವಿದೆ. ಜೀವನದ ಆರಂಭದಲ್ಲಿ ಕೆಲವು ಹೋರಾಟಗಳನ್ನು ಎದುರಿಸಬೇಕಾದರೂ, ಇದ್ದಕ್ಕಿದ್ದಂತೆ ಅನಿರೀಕ್ಷಿತ ಮೂಲಗಳಿಂದ ಆಸ್ತಿ ಸೇರುವ ಯೋಗ ಇವರಿಗೆ ಉಂಟಾಗುತ್ತದೆ. ವಿಶೇಷವಾಗಿ, ಮದುವೆಯ ನಂತರವೇ ಇವರ ಆಸ್ತಿ ಗಳಿಕೆ ವೇಗ ಪಡೆಯುತ್ತದೆ. ಜೀವನ ಸಂಗಾತಿಯ ಅದೃಷ್ಟ ಅಥವಾ ಇಬ್ಬರ ಜಂಟಿ ಪ್ರಯತ್ನದಿಂದ ಇವರು ಭವ್ಯವಾದ ಮನೆಯನ್ನು ಕಟ್ಟಬಲ್ಲರು.

Disclaimer: ಇದು ಅಂತರ್ಜಾಲದಲ್ಲಿ ಲಭ್ಯವಿರುವ ಮಾಹಿತಿಯನ್ನು ಆಧರಿಸಿದೆ. ಇದನ್ನು ಏಷ್ಯಾನೆಟ್ ಸುವರ್ಣ ನ್ಯೂಸ್ ದೃಢೀಕರಿಸುವದಿಲ್ಲ. ಬಳಕೆದಾರರು ಇವನ್ನು ಕೇವಲ ಮಾಹಿತಿಯನ್ನಾಗಿ ಮಾತ್ರ ಪರಿಗಣಿಸಬೇಕಾಗಿ ವಿನಂತಿ.