Shubman Gill's Record-Breaking Innings: ಇಂಗ್ಲೆಂಡ್ ಎದುರು ಡಬಲ್ ಸೆಂಚುರಿ ಬಾರಿಸಿ 6 ಅಪರೂಪದ ದಾಖಲೆ ಬರೆದ ಶುಭ್‌ಮನ್ ಗಿಲ್!

ಭಾರತ ಟೆಸ್ಟ್ ತಂಡದ ನಾಯಕ ಶುಭ್‌ಮನ್ ಗಿಲ್, ಇಂಗ್ಲೆಂಡ್ ಎದುರಿನ ಎಜ್‌ಬಾಸ್ಟನ್ ಟೆಸ್ಟ್‌ ಪಂದ್ಯದಲ್ಲಿ ಭರ್ಜರಿ ದ್ವಿಶತಕ ಸಿಡಿಸುವ ಮೂಲಕ ಅಪರೂಪದ ದಾಖಲೆ ತಮ್ಮ ಹೆಸರಿಗೆ ಬರೆಸಿಕೊಂಡಿದ್ದಾರೆ. ಈ ಕುರಿತಾದ ರಿಪೋರ್ಟ್ ಇಲ್ಲಿದೆ ನೋಡಿ.

ಇಂಗ್ಲೆಂಡ್ ಎದುರು ಬರ್ಮಿಂಗ್‌ಹ್ಯಾಮ್‌ನ ಎಜ್‌ಬಾಸ್ಟನ್‌ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾ ಟೆಸ್ಟ್ ಕ್ಯಾಪ್ಟನ್ ಶುಭ್‌ಮನ್ ಗಿಲ್, ಆಕರ್ಷಕ ದ್ವಿಶತಕ ಸಿಡಿಸಿ ಅಬ್ಬರಿಸಿದ್ದಾರೆ. 

ಶುಭ್‌ಮನ್ ಗಿಲ್ 387 ಎಸೆತಗಳನ್ನು ಎದುರಿಸಿ 269 ರನ್‌ಗಳ ಮ್ಯಾರಥಾನ್ ಇನ್ನಿಂಗ್ಸ್ ಆಡಿದರು. ಇದರಲ್ಲಿ 30 ಬೌಂಡರಿಗಳು ಮತ್ತು 3 ಸಿಕ್ಸರ್‌ಗಳು ಸೇರಿದ್ದವು, ಇದು ಭಾರತ ತಂಡವನ್ನು ಮೊದಲ ಇನ್ನಿಂಗ್ಸ್‌ನಲ್ಲಿ 550 ರನ್‌ಗಳ ಗಡಿ ದಾಟಲು ಸಹಾಯ ಮಾಡಿತು. ಮೊದಲ ದಿನದಾಟದಂತ್ಯಕ್ಕೆ 216 ಎಸೆತಗಳಲ್ಲಿ 114 ರನ್‌ ಗಳಿಸಿದ್ದ ಗಿಲ್, ಎರಡನೇ ದಿನವೂ ಭರ್ಜರಿ ಬ್ಯಾಟಿಂಗ್ ನಡೆಸಿದರು.

ತಮ್ಮ 269 ರನ್‌ಗಳ ಮ್ಯಾರಥಾನ್ ಇನ್ನಿಂಗ್ಸ್‌ನಲ್ಲಿ, ಶುಭ್‌ಮನ್ ಗಿಲ್, ಹಲವಾರು ದಾಖಲೆಗಳನ್ನು ಮುರಿಯುವಲ್ಲಿ ಯಶಸ್ವಿಯಾದರು. ಭಾರತೀಯ ನಾಯಕ ಸಾಧಿಸಿದ ಮೈಲಿಗಲ್ಲುಗಳು ಯಾವುವು ನೋಡೋಣ ಬನ್ನಿ.

1. ಭಾರತ ನಾಯಕನಾಗಿ ಗರಿಷ್ಠ ವೈಯುಕ್ತಿಕ ಟೆಸ್ಟ್ ಸ್ಕೋರ್:

ತಮ್ಮ ಅದ್ಭುತ 269 ರನ್‌ಗಳ ಇನ್ನಿಂಗ್ಸ್‌ನೊಂದಿಗೆ, ಶುಭ್‌ಮನ್ ಗಿಲ್ ಭಾರತದ ಟೆಸ್ಟ್ ನಾಯಕನಾಗಿ ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್‌ ಬಾರಿಸಿ ವಿರಾಟ್ ಕೊಹ್ಲಿ ಅವರ ದಾಖಲೆಯನ್ನು ಮುರಿದರು. ಕೊಹ್ಲಿ ಅಕ್ಟೋಬರ್ 2019 ರಲ್ಲಿ ಪುಣೆಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಅಜೇಯ 254 ರನ್ ಗಳಿಸಿದ್ದರು. ಕೊಹ್ಲಿ ಅವರ 254 ರನ್‌ಗಳ ಗಡಿಯನ್ನು ದಾಟಿದ ನಂತರ, ಶುಭ್‌ಮನ್ ಗಿಲ್ ಈಗ ನಾಯಕನಾಗಿ ಅತಿ ಹೆಚ್ಚು ವೈಯಕ್ತಿಕ ಸ್ಕೋರ್‌ ದಾಖಲಿಸಿದ ಭಾರತೀಯ ಬ್ಯಾಟರ್ ಎನಿಸಿಕೊಂಡರು.

2. ಗವಾಸ್ಕರ್, ದ್ರಾವಿಡ್ ಸಾಲಿಗೆ ಸೇರಿದ ಗಿಲ್:

ತಮ್ಮ ಮೊದಲ ಟೆಸ್ಟ್ ಡಬಲ್ ಸೆಂಚುರಿಯ ನಂತರ, ಶುಭ್‌ಮನ್ ಗಿಲ್ ಭಾರತೀಯ ಬ್ಯಾಟಿಂಗ್ ದಂತಕಥೆಗಳಾದ ರಾಹುಲ್ ದ್ರಾವಿಡ್ ಮತ್ತು ಸುನಿಲ್ ಗವಾಸ್ಕರ್ ಅವರೊಂದಿಗೆ  ದಿಗ್ಗಜರ ಸಾಲಿಗೆ ಸೇರಿದ್ದಾರೆ. ದ್ರಾವಿಡ್ ಮತ್ತು ಗವಾಸ್ಕರ್ ನಂತರ ಇಂಗ್ಲೆಂಡ್‌ನಲ್ಲಿ ಡಬಲ್ ಸೆಂಚುರಿ ಗಳಿಸಿದ ಮೂರನೇ ಭಾರತೀಯ ಬ್ಯಾಟ್ಸ್‌ಮನ್ ಗಿಲ್ ಆದರು. ಗವಾಸ್ಕರ್ 1979 ರಲ್ಲಿ 221 ರನ್ ಗಳಿಸಿದರು ಮತ್ತು ದ್ರಾವಿಡ್ 2002 ರಲ್ಲಿ 217 ರನ್ ಗಳಿಸಿದರು, ಇಬ್ಬರೂ ಓವಲ್‌ನಲ್ಲಿ. ಮತ್ತೆ, 23 ವರ್ಷಗಳ ನಂತರ, ಶುಭ್‌ಮನ್ ಗಿಲ್ ಎಂಬ ಇನ್ನೊಬ್ಬ ಭಾರತೀಯ ಬ್ಯಾಟ್ಸ್‌ಮನ್ ಇಂಗ್ಲೆಂಡ್‌ನಲ್ಲಿ ಟೆಸ್ಟ್ ಡಬಲ್ ಶತಕ ಗಳಿಸಿದರು.

3. ಇಂಗ್ಲೆಂಡ್‌ ನೆಲದಲ್ಲಿ ಗರಿಷ್ಠ ವೈಯುಕ್ತಿಕ ಸ್ಕೋರ್ ಬಾರಿಸಿದ ಗಿಲ್: 

ತಮ್ಮ 269 ರನ್‌ಗಳ ಇನ್ನಿಂಗ್ಸ್‌ನೊಂದಿಗೆ, ಶುಭ್‌ಮನ್ ಗಿಲ್, ಸುನಿಲ್ ಗವಾಸ್ಕರ್ ಅವರ 46 ವರ್ಷಗಳ ಭಾರತೀಯ ದಾಖಲೆಯನ್ನು ಮುರಿದಿದ್ದಾರೆ. ಸುನಿಲ್ ಗವಾಸ್ಕರ್ ಇಂಗ್ಲೆಂಡ್‌ ನೆಲದಲ್ಲಿ ಗವಾಸ್ಕರ್ 221 ರನ್ ಸಿಡಿಸಿದ್ದರು. ಶುಭ್‌ಮನ್‌ ಗಿಲ್  ಅವರ ದಾಖಲೆ ಬ್ರೇಕ್ ಮಾಡಿದ್ದಾರೆ

4. ಅಜರುದ್ದೀನ್ ದಾಖಲೆ ಬ್ರೇಕ್:

ಶುಭ್‌ಮನ್ ಗಿಲ್ ಇಂಗ್ಲೆಂಡ್‌ನಲ್ಲಿ ಟೆಸ್ಟ್ ಡಬಲ್ ಸೆಂಚುರಿ ಗಳಿಸಿದ ಮೂರನೇ ಭಾರತೀಯ ಬ್ಯಾಟ್ಸ್‌ಮನ್ ಮಾತ್ರವಲ್ಲ, ಇಂಗ್ಲೆಂಡ್‌ನಲ್ಲಿ ಭಾರತೀಯ ನಾಯಕನಾಗಿ ಅತಿಹೆಚ್ಚು ದಾಖಲಿದ ಕ್ಯಾಪ್ಟನ್ ಏನಿಸಿದರು. ಈ ಮೊದಲು ಅಜರುದ್ದೀನ್ 1990 ರಲ್ಲಿ ಮಾಂಚೆಸ್ಟರ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ 179 ರನ್ ಗಳಿಸಿದ್ದರು. ಈಗ, ಗಿಲ್ ಎಜ್‌ಬಾಸ್ಟನ್‌ನಲ್ಲಿ ತಮ್ಮ ಅದ್ಭುತ 269 ರನ್‌ಗಳ ಇನ್ನಿಂಗ್ಸ್‌ನೊಂದಿಗೆ ನಾಯಕನಾಗಿ ಅತಿ ಹೆಚ್ಚು ವೈಯಕ್ತಿಕ ಟೆಸ್ಟ್ ಸ್ಕೋರ್‌ನ ದಾಖಲೆಯನ್ನು ಬರೆದಿದ್ದಾರೆ.

5. SENA ರಾಷ್ಟ್ರಗಳಲ್ಲಿ ಟೆಸ್ಟ್ ಡಬಲ್ ಸೆಂಚುರಿ ಗಳಿಸಿದ ಮೊದಲ ಏಷ್ಯಾದ ನಾಯಕ

ತಮ್ಮ ಮೊದಲ ಟೆಸ್ಟ್ ಡಬಲ್ ಸೆಂಚುರಿಯೊಂದಿಗೆ, SENA ರಾಷ್ಟ್ರಗಳಲ್ಲಿ (ದಕ್ಷಿಣ ಆಫ್ರಿಕಾ, ಇಂಗ್ಲೆಂಡ್, ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾ) ಈ ಐತಿಹಾಸಿಕ ಸಾಧನೆ ಮಾಡಿದ ಮೊದಲ ಏಷ್ಯಾದ ನಾಯಕ ಎಂಬ ಹೆಗ್ಗಳಿಕೆಗೆ ಶುಭ್‌ಮನ್ ಗಿಲ್ ಪಾತ್ರರಾದರು. ಕುಮಾರ್ ಸಂಗಕ್ಕರ, ವಿರಾಟ್ ಕೊಹ್ಲಿ, ಸುನಿಲ್ ಗವಾಸ್ಕರ್, ಇಂಜಮಾಮ್-ಉಲ್-ಹಕ್ ಅಥವಾ ಮಿಸ್ಬಾ-ಉಲ್-ಹಕ್ ಸೇರಿದಂತೆ ಯಾವುದೇ ಇತರ ಏಷ್ಯಾದ ನಾಯಕರು SENA ದೇಶಗಳಲ್ಲಿ ತಂಡವನ್ನು ಮುನ್ನಡೆಸುತ್ತಿರುವಾಗ ಟೆಸ್ಟ್ ಡಬಲ್ ಸೆಂಚುರಿ ಗಳಿಸಲು ಸಾಧ್ಯವಾಗಿರಲಿಲ್ಲ. 

6. ಟೆಸ್ಟ್ ಮತ್ತು ಏಕದಿನ ಪಂದ್ಯಗಳಲ್ಲಿ ಡಬಲ್ ಸೆಂಚುರಿ

ಟೆಸ್ಟ್ ಕ್ರಿಕೆಟ್‌ನಲ್ಲಿ ಡಬಲ್ ಸೆಂಚುರಿಯೊಂದಿಗೆ, ಶುಭ್‌ಮನ್ ಗಿಲ್ ಈಗ ಟೆಸ್ಟ್ ಮತ್ತು ಏಕದಿನ ಪಂದ್ಯಗಳಲ್ಲಿ ಡಬಲ್ ಸೆಂಚುರಿ ಬಾರಿಸಿದ ಕೆಲವೇ ಕೆಲವು ಬ್ಯಾಟರ್‌ಗಳಲ್ಲಿ ಒಬ್ಬರೆನಿಸಿದ್ದಾರೆ. ಟೆಸ್ಟ್ ಮತ್ತು ಏಕದಿನ ಎರಡೂ ಮಾದರಿಗಳಲ್ಲಿ ಡಬಲ್ ಸೆಂಚುರಿ ಗಳಿಸಿರುವ ಭಾರತೀಯ ಬ್ಯಾಟ್ಸ್‌ಮನ್‌ಗಳಾದ ರೋಹಿತ್ ಶರ್ಮಾ, ವೀರೇಂದ್ರ ಸೆಹ್ವಾಗ್ ಮತ್ತು ವೀರೇಂದ್ರ ಸೆಹ್ವಾಗ್ ಅವರಂತಹ ದಿಗ್ಗಜ ಬ್ಯಾಟರ್‌ಗಳ ಪಟ್ಟಿಗೆ ಗಿಲ್ ಸೇರ್ಪಡೆಯಾದರು.