ಬೆಂಗಳೂರು: ಕ್ರಿಕೆಟಿಗರಿಗೂ ಹಾಗೂ ಬಾಲಿವುಡ್ ನಟಿಯರಿಗೂ ಇರುವ ಲಿಂಕ್ ಈಗ ಗುಟ್ಟಾಗಿ ಏನೂ ಉಳಿದಿಲ್ಲ. ಹಲವು ಕ್ರಿಕೆಟಿಗರು ಬಾಲಿವುಡ್ ನಟಿಯರನ್ನು ಮದುವೆಯಾಗಿ ಸುಂದರ ಬದುಕು ಕಟ್ಟಿಕೊಂಡಿದ್ದಾರೆ. ಅದೇ ರೀತಿ ಮತ್ತೆ ಕೆಲವರು ಇದಕ್ಕೆ ತದ್ವಿರುದ್ದ ಎನ್ನುವಂತೆ ಡೇಟಿಂಗ್ ನಡೆಸಿ ಕೊನೆಗೆ ಅವರನ್ನು ಮದುವೆಯಾಗದೇ ಕೈಕೊಟ್ಟಿದ್ದೂ ಇದೆ.
ಟೀಂ ಇಂಡಿಯಾ ಮಾಜಿ ಕ್ರಿಕೆಟಿಗ ಹಾಗೂ ಮಾಜಿ ಕೋಚ್ ರವಿಶಾಸ್ತ್ರಿ ತಮ್ಮ ಪತ್ನಿ ರಿತು ಅವರಿಂದ ದೂರವಾಗಿ ಸಾಕಷ್ಟು ಸಮಯಗಳೇ ಕಳೆದಿವೆ. ಇದಾದ ಬಳಿಕ ಬಾಲಿವುಡ್ ನಟಿ ನಿಮ್ರತ್ ಕೌರ್ ಜತೆ ರವಿ ಶಾಸ್ತ್ರಿ ಹೆಸರು ಥಳಕು ಹಾಕಿಕೊಂಡಿತ್ತು.
ಕೆಲ ವರ್ಷಗಳ ಕಾಲ ರವಿಶಾಸ್ತ್ರಿ ಹಾಗೂ ನಿಮ್ರತ್ ಕೌರ್ ಡೇಟಿಂಗ್ ನಡೆಸುತ್ತಿರುವುದರ ಕುರಿತಂತೆ ಸಾಕಷ್ಟು ಸುದ್ದಿಯಾಗಿತ್ತು. ಆದರೆ ಈ ಜೋಡಿಯ ಮೇಲೆ ಯಾರ ಕೆಂಗಣ್ಣು ಬಿತ್ತೋ ಗೊತ್ತಿಲ್ಲ, ಇಬ್ಬರು ಕೆಲ ಸಮಯದ ಬಳಿಕ ದೂರವಾದರು. ಹೀಗಾಗಿ ಇವರ ಲವ್‌ ಸ್ಟೋರಿ ಡೇಟಿಂಗ್‌ನಲ್ಲೇ ಅಂತ್ಯವಾಯಿತು.
2000ನೇ ಇಸವಿಯ ಆರಂಭದಲ್ಲಿ ಟೀಂ ಇಂಡಿಯಾ ನಾಯಕರಾಗಿದ್ದ ಸೌರವ್ ಗಂಗೂಲಿ ಜತೆ ನಟಿ ನಗ್ಮಾ ಹೆಸರು ಥಳಕು ಹಾಕಿಕೊಂಡಿತ್ತು. ಗುಟ್ಟಾಗಿ ಈ ಜೋಡಿ ಡೇಟಿಂಗ್ ನಡೆಸುತ್ತಿದ್ದರು ಎಂದು ಆಗ ಮಾಧ್ಯಮಗಳಲ್ಲಿ ವರದಿಯಾಗಿತ್ತು.
ಸೌರವ್ ಗಂಗೂಲಿ, ಟೀಂ ಇಂಡಿಯಾ ನಾಯಕರಾಗಿ ನೇಮಕವಾದ ಬಳಿಕ ಮಾಧ್ಯಮಗಳ ಗಮನ ದಾದಾ ಮೇಲೆ ಹೆಚ್ಚು ಎನ್ನುವಂತೆ ಆಯಿತು. ಕೊನೆಗೆ ಅದೇನಾಯಿತೋ ಗೊತ್ತಿಲ್ಲ ನಗ್ಮಾ ಹಾಗೂ ಸೌರವ್ ಗಂಗೂಲಿ ಒಟ್ಟಿಗೆ ಕಾಣಿಸಿಕೊಳ್ಳಲೇ ಇಲ್ಲ.
2008ರಲ್ಲಿ ಯುವರಾಜ್ ಸಿಂಗ್ ಯಶಸ್ಸಿನ ಉತ್ತುಂಗದಲ್ಲಿದ್ದಾಗ ಅವರ ಜತೆ ಬಾಲಿವುಡ್ ನಟಿ ದೀಪಿಕಾ ಪಡುಕೋಣೆ ನಡುವೆ ಡೇಟಿಂಗ್ ನಡೆಯುತ್ತಿತ್ತು. ಚೊಚ್ಚಲ ಆವೃತ್ತಿಯ ಟಿ20 ವಿಶ್ವಕಪ್ ಸಂದರ್ಭದಲ್ಲಿ ಈ ಜೋಡಿ ಮೊದಲ ಬಾರಿಗೆ ಭೇಟಿಯಾಗಿದ್ದರು.
ಒಂದು ಕಡೆ ಯುವಿ ಕ್ರಿಕೆಟ್‌ನಲ್ಲಿ ತನ್ನದೇ ಆದ ಛಾಪು ಮೂಡಿಸಿದರೆ, ದೀಪಿಕಾ ಪಡುಕೋಣೆ ಸಹಾ ಬಾಲಿವುಡ್‌ನಲ್ಲಿ ಯಶಸ್ಸಿನ ಮೆಟ್ಟಿಲು ಏರಲಾರಂಭಿಸಿದರು. ಇಬ್ಬರು ಒಳ್ಳೆಯ ಸ್ನೇಹಿತರಾಗಿದ್ದ ಈ ಜೋಡಿ, ಆಮೇಲೆ ಡೇಟಿಂಗ್‌ನಲ್ಲೇ ಈ ಲವ್‌ ಸ್ಟೋರಿ ಅಂತ್ಯವಾಯಿತು. ಯುವಿ, ಹೇಜಲ್‌ ಕೀಚ್ ಅವರನ್ನು ವರಿಸಿದರೆ, ದೀಪಿಕಾ ಪಡುಕೋಣೆ ರಣವೀರ್ ಸಿಂಗ್ ಅವರ ಕೈಹಿಡಿದರು.
2012ರ ವೇಳೆಯಲ್ಲಿ ವಿವಾದಿತ ನಟಿ ಸೋಫಿಯಾ ಹೈಯತ್ ಅವರು ತಾವು ಕ್ರಿಕೆಟಿಗ ರೋಹಿತ್ ಶರ್ಮಾ ಜತೆ ಡೇಟಿಂಗ್ ನಡೆಸುತ್ತಿರುವುದಾಗಿ ಹೇಳಿದ ಹೇಳಿಕೆ ಸಾಕಷ್ಟು ಸಂಚಲನಕ್ಕೆ ಕಾರಣವಾಗಿತ್ತು. ಆದರೆ ಈ ಸಂಬಂಧ ಹೆಚ್ಚು ಹೊತ್ತು ಉಳಿಯಲಿಲ್ಲ.
ರೋಹಿತ್ ಶರ್ಮಾ ಹಾಗೂ ಸೋಫಿಯಾ ಹೈಯತ್ ಯಾವ ಕಾರಣಕ್ಕೆ ಬೇರ್ಪಟ್ಟರು ಎನ್ನುವುದು ಸ್ಪಷ್ಟವಾಗಿಲ್ಲ. ಒಂದು ಸಂದರ್ಶನದಲ್ಲಿ ಸೋಫಿಯಾ, ತಾವು ರೋಹಿತ್ ಜತೆ ಡೇಟಿಂಗ್ ಮಾಡುವಾಗ ಜಂಟಲ್‌ಮನ್‌ ರೀತಿ ಕಾಣುತ್ತಿದ್ದರು ಎಂದು ಹೇಳಿದ್ದರು. ಸದ್ಯ ರೋಹಿತ್ ಶರ್ಮಾ, ರಿತಿಕಾ ಸಜ್ದೇ ಜತೆ ದಾಂಪತ್ಯ ಜೀವನಕ್ಕೆ ಕಾಲಿರಿಸಿದ್ದು, ಒಂದು ಸುಂದರ ಮಗುವಿದೆ.
ಟೀಂ ಇಂಡಿಯಾ ಮಾಜಿ ವೇಗಿ ಜಹೀರ್ ಖಾನ್, ಬಾಲಿವುಡ್ ನಟಿ ಸಾಗರಿಕ ಘಾಟ್ಗೆ ಅವರನ್ನು ಮದುವೆಯಾಗಿ ಸುಂದರ ಸಂಸಾರ ನಡೆಸುತ್ತಿದ್ದಾರೆ. ಆದರೆ ಜಾಕ್, ಸಾಗರಿಕಾ ಅವರನ್ನು ಮದುವೆಯಾಗುವ ಮುನ್ನ ನಟಿ ಇಶಾ ಶರ್ವಾನಿ ಜತೆ ಡೇಟಿಂಗ್ ನಡೆಸಿದ್ದು ಗುಟ್ಟಾಗಿ ಏನೂ ಉಳಿದಿಲ್ಲ.
ಜಹೀರ್ ಖಾನ್ ಹಾಗೂ ಇಶಾ ಶರ್ವಾನಿ ಬರೋಬ್ಬರಿ 8 ವರ್ಷಗಳ ಕಾಲ ಡೇಟಿಂಗ್ ನಡೆಸಿದ್ದರು. ಇಬ್ಬರು ಮದುವೆಗೆ ವೆಡ್ಡಿಂಗ್ ಕಾರ್ಡ್‌ ಕೂಡಾ ಪ್ರಿಂಟ್ ಹಾಕಿಸಿದ್ದರು ಎಂದೆಲ್ಲಾ ವರದಿಯಾಗಿತ್ತು. ಆದರೆ ಕಾರಣಾಂತರದಿಂದ ಈ ಜೋಡಿ ಪ್ರೇಮಕಥೆ ಮದುವೆ ಎನ್ನುವ ಬಂಧನಕ್ಕೆ ಒಳಗಾಗಲಿಲ್ಲ.