ಒಂದು ವೇಳೆ ಹಾರ್ದಿಕ್ ಪಾಂಡ್ಯ ತಲೆದಂಡವಾದ್ರೆ ಮುಂಬೈ ಇಂಡಿಯನ್ಸ್ ಮುಂದಿನ ಕ್ಯಾಪ್ಟನ್ ಯಾರು?

ಬೆಂಗಳೂರು: ಐಪಿಎಲ್ 2026ರಲ್ಲಿ ಮುಂಬೈ ಇಂಡಿಯನ್ಸ್ ಸತತ ಸೋಲು ಕಾಣುತ್ತಿದೆ. ಹೀಗಾಗಿ ಹಾರ್ದಿಕ್ ಪಾಂಡ್ಯ ನಾಯಕತ್ವದ ಬಗ್ಗೆ ಟೀಕೆಗಳು ಹೆಚ್ಚಾಗಿವೆ. ಪಾಂಡ್ಯರನ್ನು ನಾಯಕತ್ವದಿಂದ ತೆಗೆದುಹಾಕುವ ಚರ್ಚೆ ನಡೆಯುತ್ತಿದೆ. ಹಾಗಾದ್ರೆ, ಮುಂಬೈ ತಂಡದ ಹೊಸ ನಾಯಕನ ರೇಸ್‌ನಲ್ಲಿರುವ ಆ 4 ಆಟಗಾರರು ಯಾರು ಗೊತ್ತಾ? 

ಚೆನ್ನೈ ಎದುರು ಹೀನಾಯ ಸೋಲು ಕಂಡ ಮುಂಬೈ ಇಂಡಿಯನ್ಸ್

ಐಪಿಎಲ್ 2026 ಸೀಸನ್‌ ಆರಂಭಕ್ಕೂ ಮುನ್ನ ಮುಂಬೈ ಇಂಡಿಯನ್ಸ್ ಮೇಲೆ ಭಾರೀ ನಿರೀಕ್ಷೆಗಳಿದ್ದವು. ನೀತಾ ಅಂಬಾನಿ ನೇತೃತ್ವದ ಮ್ಯಾನೇಜ್‌ಮೆಂಟ್, ಶೆರ್ಫಾನೆ ರುದರ್‌ಫೋರ್ಡ್, ಕ್ವಿಂಟನ್ ಡಿ ಕಾಕ್ ಅವರಂತಹ ಸ್ಫೋಟಕ ಆಟಗಾರರನ್ನು ತಂಡಕ್ಕೆ ಸೇರಿಸಿಕೊಂಡಿತ್ತು. ಆದರೆ, ಮೈದಾನದಲ್ಲಿ ತಂಡ ಸತತವಾಗಿ ವಿಫಲವಾಗುತ್ತಿದೆ. ಈ ಸೀಸನ್‌ನಲ್ಲಿ ಆಡಿದ ಮೊದಲ 7 ಪಂದ್ಯಗಳಲ್ಲಿ ಮುಂಬೈ 5ರಲ್ಲಿ ಸೋತಿದೆ. ಏಪ್ರಿಲ್ 23ರಂದು ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 103 ರನ್‌ಗಳ ಹೀನಾಯ ಸೋಲು ಕಂಡಿದ್ದು, ಇದು ಮುಂಬೈ ಇತಿಹಾಸದಲ್ಲೇ ಅತಿದೊಡ್ಡ ಸೋಲಾಗಿದೆ.

ನಾಯಕನಾಗಿ ಹಾರ್ದಿಕ್ ಪಾಂಡ್ಯ ಫೇಲ್

ಹಾರ್ದಿಕ್ ಪಾಂಡ್ಯ ಕಳೆದ ಮೂರು ಸೀಸನ್‌ಗಳಿಂದ ಮುಂಬೈ ತಂಡವನ್ನು ಮುನ್ನಡೆಸುತ್ತಿದ್ದಾರೆ. ಆದರೆ, ಅವರ ನಾಯಕತ್ವದಲ್ಲಿ ತಂಡ ಒಮ್ಮೆಯೂ ಫೈನಲ್‌ ತಲುಪಿಲ್ಲ. ಸತತ ಸೋಲು ಮತ್ತು ಆಟಗಾರರನ್ನು ಒಗ್ಗೂಡಿಸುವಲ್ಲಿ ವಿಫಲರಾಗಿದ್ದಾರೆ ಎಂಬ ಟೀಕೆಗಳು ಕೇಳಿಬರುತ್ತಿವೆ. ಹೀಗಾಗಿ, ಪಾಂಡ್ಯರನ್ನು ಕೆಳಗಿಳಿಸಿದರೆ, ನಾಯಕತ್ವದ ರೇಸ್‌ನಲ್ಲಿ ನಾಲ್ವರು ಆಟಗಾರರು ಮುಂಚೂಣಿಯಲ್ಲಿದ್ದಾರೆ.

1. ರೋಹಿತ್ ಶರ್ಮಾ

ರೋಹಿತ್ ಶರ್ಮಾ ಮುಂಬೈ ಇಂಡಿಯನ್ಸ್‌ಗೆ 5 ಐಪಿಎಲ್ ಟ್ರೋಫಿಗಳನ್ನು ಗೆಲ್ಲಿಸಿಕೊಟ್ಟಿದ್ದಾರೆ. ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಯಶಸ್ವಿ ನಾಯಕರಲ್ಲಿ ಇವರೂ ಒಬ್ಬರು. ಟೀಂ ಇಂಡಿಯಾಗೆ 2024ರ ಟಿ20 ವಿಶ್ವಕಪ್ ಗೆಲ್ಲಿಸಿಕೊಟ್ಟಿರುವ ರೋಹಿತ್, ಒತ್ತಡವನ್ನು ನಿಭಾಯಿಸುವುದರಲ್ಲಿ ನಿಸ್ಸೀಮರು. ಮ್ಯಾನೇಜ್‌ಮೆಂಟ್‌ಗೆ ಸುರಕ್ಷಿತ ಆಯ್ಕೆ ಬೇಕಿದ್ದರೆ, ರೋಹಿತ್‌ಗಿಂತ ಉತ್ತಮ ಆಯ್ಕೆ ಮತ್ತೊಂದಿಲ್ಲ.

2. ಮಿಚೆಲ್ ಸ್ಯಾಂಟ್ನರ್

ನ್ಯೂಜಿಲೆಂಡ್‌ನ ಮಿಚೆಲ್ ಸ್ಯಾಂಟ್ನರ್ ಈ ರೇಸ್‌ನಲ್ಲಿ ಅಚ್ಚರಿಯ ಆಯ್ಕೆಯಾಗಬಹುದು. ಅಂತರಾಷ್ಟ್ರೀಯ ಮಟ್ಟದಲ್ಲಿ ಕಿವೀಸ್ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಿದ ಅನುಭವ ಅವರಿಗಿದೆ. ಶಾಂತ ಸ್ವಭಾವದಿಂದ ನಿರ್ಧಾರಗಳನ್ನು ತೆಗೆದುಕೊಳ್ಳುವುದು ಮತ್ತು ಸ್ಪಿನ್ನರ್‌ಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳುವುದರಲ್ಲಿ ಸ್ಯಾಂಟ್ನರ್ ನಿಪುಣರು. ವಿದೇಶಿ ನಾಯಕನನ್ನು ನೇಮಿಸುವುದಾದರೆ, ಸ್ಯಾಂಟ್ನರ್ ಮುಂಬೈಗೆ ಉತ್ತಮ ಆಯ್ಕೆಯಾಗಬಹುದು.

3. ಸೂರ್ಯಕುಮಾರ್ ಯಾದವ್

'ಮಿಸ್ಟರ್ 360' ಆಟಗಾರ ಎಂದೇ ಖ್ಯಾತರಾದ ಸೂರ್ಯಕುಮಾರ್ ಯಾದವ್, ಈಗಾಗಲೇ ಟೀಂ ಇಂಡಿಯಾವನ್ನು ನಾಯಕನಾಗಿ ಮುನ್ನಡೆಸಿದ ಅನುಭವ ಹೊಂದಿದ್ದಾರೆ. ಐಪಿಎಲ್ 2026ರಲ್ಲಿ ಅವರ ಬ್ಯಾಟ್ ಸದ್ದು ಮಾಡುತ್ತಿಲ್ಲವಾದರೂ, ತಂತ್ರಗಾರಿಕೆಯಲ್ಲಿ ಸೂರ್ಯಗೆ ಉತ್ತಮ ಹೆಸರಿದೆ. ಸದ್ಯ ಅವರು ತಂಡದ ಉಪನಾಯಕರಾಗಿಯೂ ಕಾರ್ಯನಿರ್ವಹಿಸುತ್ತಿದ್ದಾರೆ. ಹಾರ್ದಿಕ್ ನಂತರ ನಾಯಕತ್ವದ ಜವಾಬ್ದಾರಿ ಹೊರಲು ಸೂರ್ಯ ಅರ್ಹ ಆಟಗಾರ.

4. ಜಸ್ಪ್ರೀತ್ ಬುಮ್ರಾ

2013ರಿಂದ ಮುಂಬೈ ಇಂಡಿಯನ್ಸ್‌ನ ಪ್ರಮುಖ ಆಟಗಾರನಾಗಿರುವ ಜಸ್ಪ್ರೀತ್ ಬುಮ್ರಾ, ಈ ಲೀಗ್‌ನಲ್ಲಿ 152 ಪಂದ್ಯಗಳಿಂದ 185 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಬುಮ್ರಾ ಕೇವಲ ಹಿರಿಯ ಆಟಗಾರನಲ್ಲ, ಆಟವನ್ನು ಅರ್ಥಮಾಡಿಕೊಳ್ಳುವುದರಲ್ಲೂ ಮುಂದಿದ್ದಾರೆ. ಈಗಾಗಲೇ ಭಾರತ ಟೆಸ್ಟ್ ತಂಡವನ್ನು ಮುನ್ನಡೆಸಿದ ಅನುಭವ ಅವರಿಗಿದೆ. ಪ್ಯಾಟ್ ಕಮಿನ್ಸ್ ಮಾದರಿಯಲ್ಲಿ, ಬೌಲರ್ ಆಗಿ ತಂಡದ ಹಣೆಬರಹ ಬದಲಾಯಿಸಬಲ್ಲರು ಎಂದು ವಿಶ್ಲೇಷಕರು ನಂಬಿದ್ದಾರೆ.