ಸಿಬಿಎಸ್‌ಇ ಕ್ಲಾಸ್‌ 12 ರಿಸಲ್ಟ್‌ ಶುಕ್ರವಾರ ಘೋಷಣೆಯಾಗಿದ್ದು, ಒಟ್ಟಾರೆ 87.33ರಷ್ಟು ಫಲಿತಾಂಶ ದಾಖಲಾಗಿದೆ. ಕೇರಳದ ತಿರುವನಂತಪುರ ವಲಯ ಅಗ್ರಸ್ಥಾನ ಪಡೆದಿದ್ದರೆ, ಪ್ರಯಾಗ್ರಾಜ್ ಕೊನೆಯ ಸ್ಥಾನ ಪಡೆದುಕೊಂಡಿದೆ.
ಬೆಂಗಳೂರು (ಮೇ.12): ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಶನ್ (CBSE) 12 ನೇ ತರಗತಿಯ ಬೋರ್ಡ್ ಪರೀಕ್ಷೆಯ ಫಲಿತಾಂಶಗಳನ್ನು ಪ್ರಕಟಿಸಿದೆ. ವಿದ್ಯಾರ್ಥಿಗಳು ಡಿಜಿಲಾಕರ್‌ (DigiLocker) ಮತ್ತು ಉಮಂಗ್‌ ( UMANG) ಅಪ್ಲಿಕೇಶನ್‌ಗಳ ಜೊತೆಗೆ results.cbse.nic.in ಮತ್ತು cbseresults.nic.in ನಲ್ಲಿ ಇದನ್ನು ಪರಿಶೀಲಿಸಬಹುದು. ಮಂಡಳಿಯು ಈ ಫಲಿತಾಂಶಗಳನ್ನು IVRS ಮತ್ತು SMS ಮೂಲಕವೂ ಒದಗಿಸಲಿದೆ. CBSE 12 ನೇ ತರಗತಿಯ ಬೋರ್ಡ್ ಪರೀಕ್ಷೆಗಳು ಫೆಬ್ರವರಿ, ಮಾರ್ಚ್ ಮತ್ತು ಏಪ್ರಿಲ್‌ನಲ್ಲಿ ನಡೆದವು. ಒಟ್ಟು 16,96,770 ವಿದ್ಯಾರ್ಥಿಗಳು ಈ ಬಾರಿ ಪರೀಕ್ಷೆ ಬರೆಯಲು ಅರ್ಹತೆ ಪಡೆದುಕೊಂಡಿದ್ದರು. ವಿದ್ಯಾರ್ಥಿಗಳು ತಮ್ಮ ಅಂಕಗಳನ್ನು ಆನ್‌ಲೈನ್‌ನಲ್ಲಿ ರೋಲ್ ಸಂಖ್ಯೆ, ಶಾಲಾ ಸಂಖ್ಯೆ ಮತ್ತು ಅಡ್ಮಿಟ್‌ ಕಾರ್ಡ್ ಐಡಿ ಬಳಸಿ ಪರಿಶೀಲಿಸಬಹುದು. ಸಿಬಿಎಸ್‌ಇ 10ನೇ ತರಗತಿ ಫಲಿತಾಂಶ ಇನ್ನೂ ಪ್ರಕಟವಾಗಿಲ್ಲ. ಶೀಘ್ರದಲ್ಲಿಯೇ 10ನೇ ತರಗತಿ ಫಲಿತಾಂಶ ಕೂಡ ಪ್ರಕಟವಾಗಿವ ಸಾಧ್ಯತೆ ಇದೆ.
ಈ ವರ್ಷ ಸಿಬಿಎಸ್‌ಇ 12 ನೇ ತರಗತಿ ಬೋರ್ಡ್ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ವಿದ್ಯಾರ್ಥಿಗಳ ಶೇಕಡಾವಾರು ಶೇಕಡಾ 87.33 ರಷ್ಟಿದೆ. ವಿದ್ಯಾರ್ಥಿಗಳ ನಡುವಿನ ಅನಾರೋಗ್ಯಕರ ಸ್ಪರ್ಧೆಯನ್ನು ತಡೆಗಟ್ಟಲು 12 ನೇ ತರಗತಿಯ ಮೆರಿಟ್ ಪಟ್ಟಿಯನ್ನು ಪ್ರಕಟಿಸದಿರಲು ಸಿಬಿಎಸ್‌ಇ ನಿರ್ಧರಿಸಿದೆ. ಇದಲ್ಲದೆ, ಸಿಬಿಎಸ್‌ಇ ಮೊದಲ, ಎರಡನೇ ಅಥವಾ ಮೂರನೇ ವಿಭಾಗಗಳನ್ನು ನೀಡಿಲ್ಲ. ವಿಷಯಗಳಲ್ಲಿ ಅತ್ಯಧಿಕ ಅಂಕಗಳನ್ನು ಗಳಿಸಿದ 0.1 ಪ್ರತಿಶತ ವಿದ್ಯಾರ್ಥಿಗಳಿಗೆ ಮೆರಿಟ್ ಪ್ರಮಾಣಪತ್ರವನ್ನು ನೀಡುವುದಾಗಿ ಮಂಡಳಿ ತಿಳಿಸಿದೆ.
ಪಾಸ್‌ ಆದವರ ಪ್ರಮಾಣ ಕಡಿಮೆ: ಈ ವರ್ಷ, ಒಟ್ಟು 16,60,511 ವಿದ್ಯಾರ್ಥಿಗಳು ಸಿಬಿಎಸ್‌ಇ 12 ನೇ ತರಗತಿಯ ಬೋರ್ಡ್ ಪರೀಕ್ಷೆಯನ್ನು ತೆಗೆದುಕೊಂಡಿದ್ದರು. ಇದರಲ್ಲಿ 14,50,174 ಅಥವಾ 87.33 ಶೇಕಡಾ ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ ಎಂದು ಘೋಷಿಸಲಾಗಿದೆ. ಕಳೆದ ವರ್ಷ ಪಾಸ್‌ ಆದವರ ಪ್ರಮಾಣ ಶೇ. 92.71ರಷ್ಟಿದ್ದರೆ, ಈ ವರ್ಷ ಇದರ ಪ್ರಮಾಣ ಕಡಿಮೆಯಾಗಿದೆ. ತಿರುವನಂತಪುರವು ಸಿಬಿಎಸ್‌ಇ 12 ನೇ ತರಗತಿಯ ಫಲಿತಾಂಶಗಳಲ್ಲಿ 99.91% ರಷ್ಟು ಉತ್ತೀರ್ಣತೆಯೊಂದಿಗೆ ಅತ್ಯುತ್ತಮ-ಕಾರ್ಯನಿರ್ವಹಣೆಯ ಪ್ರದೇಶವಾಗಿದೆ ಮತ್ತು ಪ್ರಯಾಗ್ರಾಜ್ 78.05% ನೊಂದಿಗೆ ಪಟ್ಟಿಯ ಕೊನೆಯ ಸ್ಥಾನದಲ್ಲಿದೆ. ಬೆಂಗಳೂರು 2ನೇ ಸ್ಥಾನ ಪಡೆದುಕೊಂಡಿದ್ದು, ಒಟ್ಟಾರೆ 98.64ರಷ್ಟು ಫಲಿತಾಂಶ ದಾಖಲಾಗಿದೆ.
CBSE, NCRTE ಪಠ್ಯಕ್ರಮದಿಂದ ಮೊಘಲರ ಪಾಠಗಳಿಗೆ ಕೊಕ್‌
ಫೆ.15ಕ್ಕೆ ಮುಂದಿನ ವರ್ಷದ ಪರೀಕ್ಷೆ: ಇದೇ ವೇಳೆ, 10 ಮತ್ತು 12 ನೇ ತರಗತಿಯ 2024 ರ ಬೋರ್ಡ್ ಪರೀಕ್ಷೆಗಳು ಫೆಬ್ರವರಿ 15 ರಂದು ಪ್ರಾರಂಭವಾಗಲಿದೆ ಎಂದು ಸಿಬಿಎಸ್‌ಇ ಮಾಹಿತಿ ನೀಡಿದೆ.
CBSE Board Exams 2023: ಬೋರ್ಡ್ ಪರೀಕ್ಷೆಯಲ್ಲಿ ಹೆಚ್ಚಿನ ಅಂಕ ಗಳಿಸಲು ಈ ವಿಧಾನ ಅನುಸರಿಸಿ
ಇನ್ನು ಸಿಬಿಎಸ್‌ಇ 12ನೇ ತರಗತಿಯಲ್ಲಿ ವಿದ್ಯಾರ್ಥಿನಿಯರು ಪಾಸ್‌ ಆದ ಪ್ರಮಾಣ ಶೇ. 90.68ರಷ್ಟಿದ್ದರೆ, ವಿದ್ಯಾರ್ಥಿಗಳ ಪ್ರಮಾಣ ಶೇ. 84.67ರಷ್ಟಿದೆ. ಇನ್ನು ತೃತೀಯಲಿಂಗಿಗ ವಿದ್ಯಾರ್ಥಿಗಳ ಪಾಸ್‌ ಪ್ರಮಾಣ ಶೇ. 60ರಷ್ಟಿದೆ. ಜವಾಹರ್ ನವೋದಯ ವಿದ್ಯಾಲಯಗಳು (ಜೆಎನ್‌ವಿಗಳು) ಶೇಕಡ 97.51 ರಷ್ಟು ಉತ್ತೀರ್ಣರಾಗುವುದರೊಂದಿಗೆ ಉತ್ತಮ ಪ್ರದರ್ಶನ ನೀಡಿದ ಶಾಲೆಗಳಾಗಿವೆ. ಒಟ್ಟು 1,12,838 ವಿದ್ಯಾರ್ಥಿಗಳು ಸಿಬಿಎಸ್‌ಇ 12 ನೇ ತರಗತಿ ಬೋರ್ಡ್ ಪರೀಕ್ಷೆ 2023 ರಲ್ಲಿ ಶೇಕಡಾ 90 ಅಥವಾ ಅದಕ್ಕಿಂತ ಹೆಚ್ಚಿನ ಅಂಕಗಳನ್ನು ಗಳಿಸಿದ್ದಾರೆ, ಅದರ ಫಲಿತಾಂಶವನ್ನು ಇಂದು ಮುಂಚಿತವಾಗಿ ಪ್ರಕಟಿಸಲಾಗಿದೆ.
ಸಿಬಿಎಸ್‌ಇ ವಲಯವಾರು ಉತ್ತೀರ್ಣ ಪ್ರಮಾಣ