ರೆಸಾರ್ಟ್‌ಗೆ ಪ್ರವಾಸ ಹೋದ ಪ್ರಿಯತಮೆ ಸಾವು, ಪ್ಲಾನ್ ಮಾಡಿ ಕೊಂದೇ ಬಿಟ್ನಾ ಪ್ರಿಯಕರ?

ಪಾಲ್ಘರ್ ಜಿಲ್ಲೆಯ ರೆಸಾರ್ಟ್‌ನಲ್ಲಿ ಯುವತಿಯೊಬ್ಬಳು ಸಂಶಯಾಸ್ಪದವಾಗಿ ಮೃತಪಟ್ಟಿದ್ದಾಳೆ. ಪ್ರಿಯಾಂಕಾ ಪವಾರ್ ತನ್ನ ಪ್ರಿಯಕರನ ಜೊತೆ ರಿಸಾರ್ಟ್‌ನಲ್ಲಿದ್ದಾಗ, ಇದ್ದಕ್ಕಿದ್ದಂತೆ ಅಸ್ವಸ್ಥಳಾಗಿ ಮೃತಪಟ್ಟಳು. ಕುಟುಂಬಸ್ಥರು ಹತ್ಯೆಯ ಶಂಕೆ ವ್ಯಕ್ತಪಡಿಸಿದ್ದಾರೆ.

ಮಹಾರಾಷ್ಟ್ರ: ಪಾಲ್ಘರ್ ಜಿಲ್ಲೆಯ ಕೆಳವೆ ಬೀಚ್ ಬಳಿಯಿರುವ ಪ್ರಸಿದ್ಧ ರೆಸಾರ್ಟ್‌ನಲ್ಲಿ ನಡೆದ ಯುವತಿಯ ಮೃತ್ಯು ಕೇವಲ ಆಕಸ್ಮಿಕವಲ್ಲ, ಸಂಭಾವ್ಯ ಅಪರಾಧದ ಸೂಚನೆ ನೀಡುತ್ತಿದೆ. 27 ವರ್ಷದ ವಿವಾಹಿತ ಪ್ರಿಯಾಂಕಾ ಪವಾರ್ ಅವರ ಸಂಶಯಾಸ್ಪದ  ಸಾವು ‘ಪ್ರೇಮ ಪ್ರವಾಸ’ವೊಂದರ ದುರಂತ ಅಂತ್ಯವಾಗಿದೆ.

ಮೂಲತಃ ನಾಲಾಸೋಪಾರದವರಾದ ಪ್ರಿಯಾಂಕಾ ಪವಾರ್, ತನ್ನ 25 ವರ್ಷದ ಪ್ರಿಯಕರ ಮಯೂರ್ ಸಾಳುಂಖೆ ಜೊತೆ 'ದರ್ಯಾ ನಿವಾಸ್' ರಿಸಾರ್ಟ್‌ನಲ್ಲಿದ್ದರು. ಇಬ್ಬರೂ ಆನ್‌ಲೈನ್ ಬುಕಿಂಗ್ ಮಾಡಿ ಶನಿವಾರ ರೆಸಾರ್ಟ್‌ಗೆ ಬಂದಿದ್ದರು. ಕೆಲವೇ ಗಂಟೆಗಳಲ್ಲಿ ಪ್ರಿಯಾಂಕಾಗೆ ಉಸಿರಾಟದ ತೊಂದರೆ ಕಾಣಿಸಿಕೊಂಡು, ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ, ವೈದ್ಯರು ಅವರನ್ನು ಮೃತಪಟ್ಟಿರುವುದಾಗಿ ಘೋಷಿಸಿದರು.

ಮೃತ್ಯುವಾಗುವ ಕೆಲ ಹೊತ್ತು ಮುಂಚೆ ಇಬ್ಬರ ನಡುವೆ ಜಗಳ ನಡೆದಿತ್ತು ಎಂದು ಸಿಬ್ಬಂದಿ  ಹೇಳಿದ್ದಾರೆ. ಮಯೂರ್ ಸಾಳುಂಖೆಯ ವರ್ತನೆ ಸಂಶಯಾಸ್ಪದವಾಗಿತ್ತು, ಮೃತ್ಯುವಿನ ಮೊದಲು ರೆಸಾರ್ಟ್ ಸಿಬ್ಬಂದಿಯಿಂದ ಔಷಧಿಗಳ ಬಗ್ಗೆ ಪ್ರಿಯಕರ ವಿಚಾರಿಸುತ್ತಿದ್ದ ಎಂದು ತಿಳಿದುಬಂದಿದೆ. ಮೃತದೇಹದ ಮೇಲೆ ಯಾವುದೇ ಗಾಯಗಳಿಲ್ಲದ ಕಾರಣ ಮೃತ್ಯುವಿಗೆ ‘ಆಕಸ್ಮಿಕ ಅಸ್ವಸ್ಥತೆ’ ಎಂದು ಹೇಳಲಾಗುತ್ತಿದ್ದರೂ, ಕುಟುಂಬಸ್ಥರು ಅದನ್ನು ನಂಬಲು ಸಿದ್ಧರಿಲ್ಲ.

ಪ್ರಿಯಾಂಕಾ ಕುಟುಂಬಸ್ಥರು ಇದು ಆಕಸ್ಮಿಕ ಮೃತ್ಯುವಲ್ಲ, ಹತ್ಯೆ ಎಂದು ಆರೋಪಿಸಿದ್ದಾರೆ. “ಮಗಳು ಖುಷಿಯಾಗಿದ್ದಳು, ಹೀಗೆ ಇದ್ದಕ್ಕಿದ್ದಂತೆ ಹೋಗುತ್ತಾಳೆ ಅಂತ ಯೋಚಿಸಿಯೂ ಇರಲಿಲ್ಲ. ಯಾರ ಜೊತೆಯೂ ಜಗಳ ಇರಲಿಲ್ಲ. ಆದರೆ ಆ ಹುಡುಗನ ಮೇಲೆ ನಮಗೆ ಮೊದಲಿನಿಂದಲೂ ಸಂಶಯವಿತ್ತು,” ಎಂದು ಆಕೆಯ ತಾಯಿ ಹೇಳಿದ್ದಾರೆ.

ಪೊಲೀಸರು ಪ್ರಸ್ತುತ ಆಕಸ್ಮಿಕ  ಸಾವು ಪ್ರಕರಣ ದಾಖಲಿಸಿದ್ದಾರೆ, ಆದರೆ ಘಟನಾ ಸ್ಥಳದಲ್ಲಿ ವಿಧಿವಿಜ್ಞಾನ ತಂಡದ ತನಿಖೆ ನಡೆಯುತ್ತಿದೆ. ಮಯೂರ್ ಸಾಳುಂಖೆಯ ಮೇಲೆ ನಿಗಾ ಇಡಲಾಗಿದೆ, ಅವರ ಕರೆಗಳ ದಾಖಲೆ ಮತ್ತು ರೆಸಾರ್ಟ್‌ನ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಲಾಗುತ್ತಿದೆ.

ಈ ಘಟನೆ ರೆಸಾರ್ಟ್‌ಗಳ ಭದ್ರತೆ ಮತ್ತು ಗ್ರಾಹಕರ ಚಲನವಲನಗಳ ದಾಖಲೆಗಳನ್ನು ಗಂಭೀರವಾಗಿ ಪರಿಗಣಿಸುವ ಅಗತ್ಯವನ್ನು ಸೃಷ್ಟಿಸಿದೆ. ಇಂತಹ ಘಟನೆಗಳು ಪ್ರವಾಸಿ ತಾಣಗಳ ವಿಶ್ವಾಸಾರ್ಹತೆಯನ್ನು ಹಾಳು ಮಾಡುತ್ತವೆ ಎಂದು ಸ್ಥಳೀಯ ವ್ಯಾಪಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.