Online Partner Fruad: ಇನ್​ಸ್ಟಾದಲ್ಲಿ ಲವ್​ ಮಾಡಿ ಬೆಂಗಳೂರ ಯುವಕನಿಗೆ 44 ಲಕ್ಷ ರೂ. ಟೋಪಿ ಹಾಕಿದ 'ಬೆಳದಿಂಗಳ ಬಾಲೆ'

ಇನ್​ಸ್ಟಾಗ್ರಾಮ್​ ಗೆಳತಿ ವೆಲ್​ಕಮ್​ ವೆಲ್​ಕಮ್​ ಅಂದ... 44 ಲಕ್ಷ ರೂಪಾಯಿ ಕಳಕೊಂಡ ಬೆಂಗಳೂರಿನ ಈ ಯುವಕನ ಕಥೆ ಕೇಳಿ! ಹೆಣ್ಣುಮಕ್ಕಳ ಬಣ್ಣಬಣ್ಣದ ಮಾತುಗಳಿಂದ ಮರುಳಾಗುವ ಮೊದಲು ಈ ಸ್ಟೋರಿಯನ್ನೊಮ್ಮೆ ನೋಡಿ... 

ಮೋಸ ಹೋಗುವವರು ಇರುವವರೆಗೂ ಮೋಸ ಮಾಡುವವರು ಇದ್ದೇ ಇರುತ್ತಾರೆ ಎಂದು ಸಾರಿ ಸಾರಿ ಸೈಬರ್​ ಕ್ರೈಮ್​ ಪೊಲೀಸರು ಬಡಿದುಕೊಂಡರೂ, ಆನ್​ಲೈನ್​ನಲ್ಲಿ ಕೋಟಿ ಕೋಟಿ ಹಣ ಕಳೆದುಕೊಂಡವರು ಅದೆಷ್ಟೋ So called educted ವರ್ಗದವರು! ಬಾಯಿ ಬಿಟ್ಟರೆ 'ನಾನೇನು ಅನ್​ಎಜುಕೇಟೆಡ್ಡಾ' ಎಂದು ಕೇಳುವ ದೊಡ್ಡ ವರ್ಗವೇ ಇದೆ. ಆದರೆ ಇಂದು ಅತ್ಯಂತ ಸುಲಭದಲ್ಲಿ ಬಲೆಗೆ ಬೀಳುವ, ಪದೇ ಪದೇ ಎಚ್ಚರಿಕೆ ನೀಡಿದರೂ ಮೋಸದ ಸುಳಿಯಲ್ಲಿ ಸಿಲುಕುತ್ತಿರುವವರನ್ನು ನೋಡಿದರೆ ಎಲ್ಲರೂ ಡಬಲ್​ ಗ್ರಾಜುಯೇಟ್​ಗಳೇ ಆಗಿರುತ್ತಾರೆ ಎನ್ನುವುದು ತಿಳಿದುಬರುತ್ತಿದೆ. ಅದೇ ರೀತಿ ಈಗ ಬೆಂಗಳೂರಿನ ಯುವಕನೊಬ್ಬ ಆನ್​ಲೈನ್​ನಲ್ಲಿ ಪ್ರೀತಿಸಲು ಹೋಗಿ 44 ಲಕ್ಷ ರೂಪಾಯಿ ಕಳೆದುಕೊಂಡಿದ್ದಾನೆ.

ಕೆಲ ದಿನಗಳ ಹಿಂದೆ ಈ ಘಟನೆ ನಡೆದಿದ್ದು, ಇದೀಗ ಬೆಳಕಿಗೆ ಬಂದಿದೆ. ಅರ್ಚನಾ ಎನ್ನುವ ಹೆಸರಿನಲ್ಲಿ ಗುರುತಿಸಿಕೊಂಡಾಕೆ, ಇನ್​ಸ್ಟಾಗ್ರಾಮ್​ನಲ್ಲಿ ಈ ಯುವಕನನ್ನು ಬಲೆಗೆ ಬೀಳಿಸಿ 44 ಲಕ್ಷ ರೂಪಾಯಿ ಎಗರಿಸಿದ್ದಾಳೆ. ಅಷ್ಟಕ್ಕೂ ಈ ಅರ್ಚನಾ ಎಂದು ಹೇಳಿಕೊಂಡಿರುವವರು ಗಂಡಸೋ, ಹೆಂಗಸೋ ಎನ್ನುವುದು ಕೂಡ ಇನ್ನೂ ಬಯಲಾಗಬೇಕಿದೆ ಅಷ್ಟೇ. ಅಷ್ಟಕ್ಕೂ ಈ ಯುವಕ ಆನ್​ಲೈನ್​ನಲ್ಲಿ ಜೀವನ ಸಂಗಾತಿಯನ್ನು ಹುಡುಕುತ್ತಿದ್ದ. ಇಂಥವರನ್ನೇ ವಂಚಕರು ಟಾರ್ಗೆಟ್​ ಮಾಡುವುದು ಎಂದು ಇದಾಗಲೇ ಹಲವಾರು ಕಡೆಗಳಲ್ಲಿ ಸೈಬರ್​ ಕ್ರೈಂನವರು ಎಚ್ಚರಿಕೆಯನ್ನು ನೀಡುತ್ತಲೇ ಇದ್ದಾರೆ. ಆದರೆ ಪ್ರೀತಿಗೆ ಕಣ್ಣಿಲ್ಲ, ಕಿವಿಯಿಲ್ಲ, ಏನೇನೂ ಇಲ್ಲ... ಎನ್ನುವಂತೆ ಲವ್​ನಲ್ಲಿ ಬಿದ್ದವರಿಗೆ ಯಾವ ಎಚ್ಚರಿಕೆಯೂ ಕೇಳಿಸುವುದೇ ಇಲ್ಲ ಎನ್ನುವುದಕ್ಕೆ ಈ ಘಟನೆ ಮತ್ತೊಮ್ಮೆ ಸಾಕ್ಷಿಯಾಗಿದೆ.

ಜೀವನ ಸಂಗಾತಿಯನ್ನು ಹುಡುಕುತ್ತಿದ್ದ ಯುವಕನಿಗೆ ಇನ್‌ಸ್ಟಾಗ್ರಾಮ್ ಮೂಲಕ ಪರಿಚಯವಾದದ್ದೇ ಈ ಬೆಳದಿಂಗಳ ಬಾಲೆ "ಅರ್ಚನಾ". ತನ್ನನ್ನು ತಾನು ಅರ್ಚನಾ ಎಂದು ಹೇಳಿಕೊಂಡಿರುವಾಕೆ ಯುವಕನ ಸಂಪರ್ಕಕ್ಕೆ ಬಂದಿದ್ದಾಳೆ. ಇದು ಕಣ್​ ಕಣ್ಣ ಸಲುಗೆ ಅಲ್ಲ, ಬದಲಿಗೆ ಮೆಸೇಜ್​ ಮೆಸೇಜ್​ಗಳ ಸಲುಗೆ ಆಗಿದೆ. ಆರಂಭದಲ್ಲಿ ಹಾಯ್​, ಹೆಲ್ಲೋ ಮೂಲಕ ಪ್ರಾರಂಭವಾಗಿ ಕೊನೆಗೆ ತೀರಾ ವೈಯಕ್ತಿಯ ವಿಷಯಗಳವರೆಗೂ ಹೋಗಿದೆ ಸಂದೇಶ. ಈ ಆಸಾಮಿಯನ್ನು ಸುಲಭದಲ್ಲಿ ಬ್ರೇನ್​ವಾಷ್​ ಮಾಡಬಹುದು ಎಂದುಕೊಂಡ ಆ ಮಹಿಳೆ, ಬಿಟ್‌ಕಾಯಿನ್ ಹೂಡಿಕೆ ಬಗ್ಗೆ ಬೋಧನೆ ಮಾಡಿದ್ದಾಳೆ. ಹೆಣ್ಣೊಬ್ಬಳು ಇಷ್ಟೆಲ್ಲಾ ಉಪದೇಶ ಮಾಡುವಾಗ ಅದೂ ಇಷ್ಟೊಂದು ಪ್ರೀತಿಯಿಂದ ಬೇಡ ಎನ್ನಲು ಆದೀತೆ? ಈ ಯುವಕ ಹಳ್ಳಕ್ಕೆ ಬಿದ್ದಿದ್ದಾನೆ!

ಹೆಚ್ಚಿನ ಆದಾಯದ ಭರವಸೆ ನೀಡಿರುವ ಆ ಬಾಲೆ, ಆರಂಭದಲ್ಲಿ ಸಣ್ಣ ವಹಿವಾಟುಗಳನ್ನು ಪ್ರಯತ್ನಿಸಲು ಒತ್ತಾಯಿಸಿದ್ದಾಳೆ. ಕೊನೆಗೆ ಈತನಿಗೆ ಗುಂಡಿ ತೋಡಲು ಶುರು ಮಾಡಿದ್ದಾಳೆ. ಅವಳು ಹೇಳಿದಂತೆಲ್ಲಾ, ಬೇರೆ ಬೇರೆ ಬ್ಯಾಂಕ್​ ಖಾತೆಗಳನ್ನು ನೀಡಿರುವ ಆಕೆ, ಹಣವನ್ನು ವರ್ಗಾಯಿಸಲು ಕೇಳಿದ್ದಾಳೆ. ಇವನೂ ಹಾಗೆಯೇ ಮಾಡಿದ್ದಾನೆ. ಆರಂಭದಲ್ಲಿ ಆಮಿಷ ಒಡ್ಡಲು ಡಬಲ್​ ಹಣವನ್ನೂ ನೀಡಿದ್ದಾಳೆ ಆಕೆ. ಇನ್ನೇನು, ಲಡ್ಡು ಬಾಯಲ್ಲೇ ಬಿತ್ತೆಂದ ಆಸಾಮಿ, ಹೆಚ್ಚು ಹೆಚ್ಚು ಹಣ ಹಾಕಿ, ಆಕೆಯ ಸುಮಧುರ ಮಾತಿಗೆ ಮರಳುಗಾಗಿ 44 ಲಕ್ಷ ರೂಪಾಯಿ ಅವಳು ಹೇಳಿದ ಖಾತೆಗೆ ಜಮಾ ಮಾಡಿದ್ದಾನೆ. ಇಷ್ಟಾಗುತ್ತಿದ್ದಂತೆಯೇ ಇವನಲ್ಲಿದ್ದ ದುಡ್ಡು ಖಾಲಿಯಾಗುವುದು ತಿಳಿದಾಗ ಸುಂದರಿ ಅದೃಶ್ಯಳಾಗಿದ್ದಾಳೆ. ಯುವಕನ ಸಂಪರ್ಕಕ್ಕೆ ಸಿಗದೇ ಮಾಯವಾದಾಗಲೇ ವಾಸ್ತವ ಜಗತ್ತಿಗೆ ಬಂದ ಯುವಕನಿಗೆ ತಾನು ಸ್ವರ್ಗದಲ್ಲಿ ಇಲ್ಲ, ಬದಲಿಗೆ ನರಕಕ್ಕೆ ಹೋಗಿರುವುದು ತಿಳಿದಿದೆ! ಕೊನೆಗೆ ಸೈಬರ್​ ಕ್ರೈಂನವರಿಗೆ ದೂರು ಸಲ್ಲಿಸಿದ್ದು, ತನಿಖೆ ನಡೆಯುತ್ತಿದೆ.