WTC Final: ಗಂಭೀರ್ ತಂತ್ರಗಳಿಂದ ಟೀಂ ಇಂಡಿಯಾ ಕಥೆ ಮುಗೀತಾ? ಫೈನಲ್ ತಲುಪೋಕೆ ಇನ್ನೂ ಚಾನ್ಸ್ ಇದೆಯಾ?

ಹಲವು ಆಂತರಿಕ ಸವಾಲುಗಳು ಮತ್ತು ಹಿರಿಯ ಆಟಗಾರರ ನಿರ್ಗಮನದಿಂದ ಸಂಕಷ್ಟದಲ್ಲಿರುವ ಟೀಮ್ ಇಂಡಿಯಾ, ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಪಾಯಿಂಟ್ಸ್ ಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿದೆ. ಫೈನಲ್ ತಲುಪಲು ಉಳಿದಿರುವ 8 ಪಂದ್ಯಗಳಲ್ಲಿ ಕನಿಷ್ಠ 7ರಲ್ಲಿ ಗೆಲ್ಲಬೇಕಾದ ಕಠಿಣ ಪರಿಸ್ಥಿತಿಯಲ್ಲಿದ್ದು, ನ್ಯೂಜಿಲೆಂಡ್ ಮತ್ತು ಆಸ್ಟ್ರೇಲಿಯಾದಂತಹ ಬಲಿಷ್ಠ ತಂಡಗಳನ್ನು ಎದುರಿಸಬೇಕಿದೆ.

ಗೌತಮ್ ಗಂಭೀರ್ ಅವರ ನಿರಂತರ ಪ್ರಯೋಗಗಳು ಮತ್ತು ತಂಡದ ನಿಲುವು, ಸರಿಯಾದ ಮೂರನೇ ಕ್ರಮಾಂಕದ ಬ್ಯಾಟರ್ ಇಲ್ಲದಿರುವುದು, ಫಸ್ಟ್ ಕ್ಲಾಸ್ ಕ್ರಿಕೆಟ್‌ನಲ್ಲಿ ಸಾಕಷ್ಟು ಅನುಭವವಿಲ್ಲದ ಆಟಗಾರರಿಗೆ ತಂಡದಲ್ಲಿ ನೇರ ಪ್ರವೇಶ ಸಿಗುತ್ತಿರುವುದು, ಕೇವಲ ಯುವ ಆಟಗಾರರಿಂದಲೇ ತುಂಬಿರುವ ಪೇಸ್ ಬೌಲಿಂಗ್ ವಿಭಾಗ... ಹೀಗೆ ಪಟ್ಟಿ ಬೆಳೆಯುತ್ತಲೇ ಹೋಗುತ್ತದೆ. ಕೆಲ ಆಟಗಾರರಿಗೆ ಮಾತ್ರ ಹೆಚ್ಚು ಅವಕಾಶಗಳನ್ನು ನೀಡಿ, ಉಳಿದವರನ್ನು ಕಡೆಗಣಿಸುವುದು, ಜಸ್ಪ್ರೀತ್ ಬುಮ್ರಾರಂತಹ ಅದ್ಭುತ ಪ್ರತಿಭೆ ಗಾಯದಿಂದಾಗಿ ತಂಡಕ್ಕೆ ಅಲಭ್ಯರಾಗಿರುವುದು, ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಚೇತೇಶ್ವರ್ ಪೂಜಾರ ಮತ್ತು ರವಿಚಂದ್ರನ್ ಅಶ್ವಿನ್ ಅವರಂತಹ ಹಿರಿಯ ಆಟಗಾರರ ಹಠಾತ್ ನಿರ್ಗಮನ. ಹೀಗೆ ಟೀಂ ಇಂಡಿಯಾ ಒಂದು ರೀತಿ ಬದಲಾವಣೆಯ ಹಾದಿಯಲ್ಲಿದೆ.

ಸದ್ಯ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (WTC) ಪಾಯಿಂಟ್ಸ್ ಪಟ್ಟಿಯಲ್ಲಿ ಭಾರತ, ಆಸ್ಟ್ರೇಲಿಯಾ, ದಕ್ಷಿಣ ಆಫ್ರಿಕಾ, ನ್ಯೂಜಿಲೆಂಡ್ ಮತ್ತು ಬಾಂಗ್ಲಾದೇಶದಂತಹ ತಂಡಗಳಿಗಿಂತಲೂ ಕೆಳಗಿದೆ. ಐದನೇ ಸ್ಥಾನಕ್ಕೆ ಕುಸಿದಿರುವುದಕ್ಕೆ ಮೇಲೆ ಹೇಳಿದ ಕಾರಣಗಳು ಸಾಕಾಗುವುದಿಲ್ಲ. ಯಾಕಂದ್ರೆ, ಭಾರತ ಆಡಿರುವ 10 ಟೆಸ್ಟ್‌ಗಳಲ್ಲಿ 5ರಲ್ಲಿ ಗೆದ್ದು, 4ರಲ್ಲಿ ಸೋತು, 1 ಪಂದ್ಯವನ್ನು ಡ್ರಾ ಮಾಡಿಕೊಂಡಿದೆ. ಒಟ್ಟು 64 ಪಾಯಿಂಟ್ಸ್ ಗಳಿಸಿ, 53.3% ಪರ್ಸೆಂಟೇಜ್ ಹೊಂದಿದೆ. ಈ ನಾಲ್ಕು ಸೋಲುಗಳಲ್ಲಿ ಎರಡು ಇಂಗ್ಲೆಂಡ್ ಪ್ರವಾಸದಲ್ಲಾದರೆ, ಇನ್ನೆರಡು ತವರಿನಲ್ಲೇ ದಕ್ಷಿಣ ಆಫ್ರಿಕಾ ವಿರುದ್ಧ ಬಂದಿದ್ದು. ಒಂದು ಕಾಲದಲ್ಲಿ ಯಾವುದೇ ತಂಡವನ್ನು ತವರಿನಲ್ಲಿ ಸೋಲಿಸುವ ತಾಕತ್ತು ಭಾರತಕ್ಕಿತ್ತು.

ಆದರೆ, ಇಂದಿನ ಪರಿಸ್ಥಿತಿ ಹಾಗಿಲ್ಲ. ಹಾಗಾಗಿಯೇ, ಈ ಸಬೂಬುಗಳು ಸಾಕಾಗುವುದಿಲ್ಲ. ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್ ಪಂದ್ಯ ಮುಗಿದರೆ, ಈ WTC ಸೈಕಲ್‌ನಲ್ಲಿ ಭಾರತಕ್ಕೆ ಇನ್ನು ಕೇವಲ ಎರಡು ಸರಣಿಗಳು ಮಾತ್ರ ಬಾಕಿ ಉಳಿಯುತ್ತವೆ. ಹಾಗಾದರೆ, ಶುಭ್ಮನ್ ಗಿಲ್ ನಾಯಕತ್ವದ ತಂಡಕ್ಕೆ ಫೈನಲ್ ತಲುಪುವ ಅವಕಾಶ ಇದೆಯಾ?

ಭಾರತದ ಮುಂದಿದೆ ಅಗ್ನಿ ಪರೀಕ್ಷೆ

ಗಾಲೆ ಟೆಸ್ಟ್‌ನಲ್ಲಿ ಭಾರತ ತಂಡದ ಗೆಲುವು, ತಂಡದ ಪಾಯಿಂಟ್ಸ್ ಶೇಕಡಾವಾರು ಪ್ರಮಾಣವನ್ನು 48.15% ರಿಂದ 53.33% ಕ್ಕೆ ಏರಿಸಿದೆ. ಇನ್ನು ಶ್ರೀಲಂಕಾ ವಿರುದ್ಧದ ಎರಡನೇ ಟೆಸ್ಟ್, ನಂತರ ನ್ಯೂಜಿಲೆಂಡ್ ವಿರುದ್ಧ ಅವರದೇ ನೆಲದಲ್ಲಿ ಎರಡು ಟೆಸ್ಟ್‌ಗಳ ಸರಣಿ, ಆ ಬಳಿಕ ಆಸ್ಟ್ರೇಲಿಯಾ ತಂಡದ ಭಾರತ ಪ್ರವಾಸದಲ್ಲಿ ಐದು ಪಂದ್ಯಗಳ ಸರಣಿ ನಡೆಯಲಿದೆ. ಅಂದರೆ, ಈ ಚಾಂಪಿಯನ್‌ಶಿಪ್ ಸೈಕಲ್‌ನಲ್ಲಿ ಭಾರತಕ್ಕೆ ಒಟ್ಟು 8 ಟೆಸ್ಟ್‌ಗಳು ಬಾಕಿ ಇವೆ.

ಕಳೆದ WTC ಸೈಕಲ್‌ನಲ್ಲಿ ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾ ಫೈನಲ್ ತಲುಪಿದ್ದವು. ದಕ್ಷಿಣ ಆಫ್ರಿಕಾದ ಪಾಯಿಂಟ್ಸ್ ಶೇಕಡಾವಾರು 69.4% ಮತ್ತು ಆಸ್ಟ್ರೇಲಿಯಾದ್ದು 67.54% ಇತ್ತು. ಸದ್ಯ ಭಾರತದ ಪರ್ಸೆಂಟೇಜ್ 53.3%. ಫೈನಲ್ ತಲುಪಬೇಕಾದರೆ ಕನಿಷ್ಠ 60% ಆದರೂ ಬೇಕು. ಅಂದರೆ, ಭಾರತಕ್ಕೆ 66 ಪಾಯಿಂಟ್ಸ್ ಅವಶ್ಯಕತೆ ಇದೆ.

ಟೆಸ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಪಾಯಿಂಟ್ಸ್ ಹಂಚಿಕೆ ಹೀಗಿದೆ: 

ಗೆಲುವಿಗೆ 12, ಟೈ ಆದರೆ 6, ಡ್ರಾ ಆದರೆ 4 ಮತ್ತು ಸೋತರೆ ಶೂನ್ಯ ಪಾಯಿಂಟ್ಸ್. ಒಟ್ಟು ಗಳಿಸಿದ ಪಾಯಿಂಟ್ಸ್ ಅನ್ನು, ಆಡಿದ ಪಂದ್ಯಗಳ ಒಟ್ಟು ಪಾಯಿಂಟ್ಸ್‌ನಿಂದ ಭಾಗಿಸಿ 100ರಿಂದ ಗುಣಿಸಿದರೆ ಶೇಕಡಾವಾರು ಸಿಗುತ್ತದೆ. ಉದಾಹರಣೆಗೆ, ಭಾರತ 10 ಟೆಸ್ಟ್ ಆಡಿದೆ, ಅಂದರೆ ಒಟ್ಟು 120 ಪಾಯಿಂಟ್‌ಗಳಿಗೆ ಸ್ಪರ್ಧಿಸಿದೆ. ಇದರಲ್ಲಿ 64 ಪಾಯಿಂಟ್ಸ್ ಗಳಿಸಿದೆ. (64/120)*100 = 53.3%.

ಈ 66 ಪಾಯಿಂಟ್ಸ್ ಗುರಿ ಮುಟ್ಟಲು ಭಾರತ, ಬಾಕಿ ಇರುವ 8 ಪಂದ್ಯಗಳಲ್ಲಿ ಕನಿಷ್ಠ 5ರಲ್ಲಿ ಗೆದ್ದು, 2 ಪಂದ್ಯಗಳನ್ನು ಡ್ರಾ ಮಾಡಿಕೊಳ್ಳಬೇಕು. ಆಗ 68 ಪಾಯಿಂಟ್ಸ್ ಸಿಗುತ್ತದೆ. 6 ಪಂದ್ಯ ಗೆದ್ದರೆ 72 ಪಾಯಿಂಟ್ಸ್ ಆಗುತ್ತದೆ. 68 ಪಾಯಿಂಟ್ಸ್ ಗಳಿಸಿದರೆ, ಭಾರತದ ಪರ್ಸೆಂಟೇಜ್ 61% ತಲುಪಬಹುದು. ಆದರೆ, ಇದು ಕೂಡ ಸುರಕ್ಷಿತವಲ್ಲ. ಉಳಿದ 8 ಪಂದ್ಯಗಳಲ್ಲಿ 7 ಪಂದ್ಯಗಳನ್ನು ಗೆದ್ದರೆ ಮಾತ್ರ ಭಾರತ 68% ಕ್ಕಿಂತ ಹೆಚ್ಚು ಗಳಿಸಿ ನಿರಾಳವಾಗಬಹುದು.

ಆದರೆ, ಇಲ್ಲಿ ದೊಡ್ಡ ಸವಾಲು ಇರುವುದೇ ಎದುರಾಳಿಗಳಿಂದ. ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ವಿಜೇತ ಆಸ್ಟ್ರೇಲಿಯಾ ಮತ್ತು ಬಲಿಷ್ಠ ನ್ಯೂಜಿಲೆಂಡ್ ತಂಡಗಳು. ಕಿವೀಸ್ ವಿರುದ್ಧ ಅವರದೇ ನೆಲದಲ್ಲಿ ಆಡುವುದು ಭಾರತಕ್ಕೆ ಸುಲಭವಲ್ಲ. ಇತ್ತ ಆಸ್ಟ್ರೇಲಿಯಾ ತಂಡಕ್ಕೆ ಭಾರತದ ಪಿಚ್‌ಗಳು ಹೊಸದೇನಲ್ಲ. ಈ ಹಿಂದೆ ದಕ್ಷಿಣ ಆಫ್ರಿಕಾ ಮತ್ತು ನ್ಯೂಜಿಲೆಂಡ್ ತಂಡಗಳು ಭಾರತವನ್ನು ಕ್ಲೀನ್ ಸ್ವೀಪ್ ಮಾಡಿದ್ದವು. ಹಾಗಾಗಿ, ಆಸ್ಟ್ರೇಲಿಯಾವನ್ನು ಸುಲಭವಾಗಿ ಮಣಿಸಬಹುದು ಎಂದು ಹೇಳಲಾಗದು.

ಹೀಗಾಗಿ, ಭಾರತದ ಫೈನಲ್ ಪ್ರವೇಶದ ಸಾಧ್ಯತೆಗಳು ತುಂಬಾ ಕಡಿಮೆ. ಒಂದು ಸಣ್ಣ ತಪ್ಪು ಕೂಡ ದಾರಿ ತಪ್ಪಿಸಬಹುದು. ಇಲ್ಲಿಂದ ಮುಂದಕ್ಕೆ ಪ್ರತಿ ಎಸೆತವೂ ನಿರ್ಣಾಯಕ ಎನ್ನುವುದರಲ್ಲಿ ಅನುಮಾನವಿಲ್ಲ.