ಕೊಹ್ಲಿ-ಧೋನಿ ಹೆಸರಿನಲ್ಲಿದ್ದ ಸಾರ್ವಕಾಲಿಕ ದಾಖಲೆ ಮುರಿದ ಶೊಯೆಬ್ ಮಲಿಕ್..!

ಪಾಕಿಸ್ತಾನ ಕ್ರಿಕೆಟ್‌ ತಂಡವು ಟಿ20 ಕ್ರಿಕೆಟ್‌ನಲ್ಲಿ ಕೊನೆಗೂ ಗೆಲುವಿನ ಹಳಿಗೆ ಮರಳಿದೆ. ತಂಡಕ್ಕೆ ಕಮ್‌ಬ್ಯಾಕ್ ಮಾಡಿದ ಸಾನಿಯಾ ಮಿರ್ಜಾ ಪತಿ ಶೊಯೆಬ್ ಮಲಿಕ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಈ ಕುರಿತಾದ ವಿವರ ಇಲ್ಲಿದೆ ನೋಡಿ...

ಲಾಹೋರ್‌(ಜ.25): ಬಾಂಗ್ಲಾದೇಶ ವಿರುದ್ಧದ ಮೊದಲ ಟಿ20 ಪಂದ್ಯದಲ್ಲಿ ಪಾಕಿಸ್ತಾನ ತಂಡವು ಭರ್ಜರಿ ಜಯಭೇರಿ ಬಾರಿಸಿದೆ. ಈ ಮೂಲಕ ಬರೋಬ್ಬರಿ 7 ಟಿ20 ಸೋಲಿನ ಬಳಿಕ ಪಾಕ್ ಗೆಲುವಿನ ಹಳಿಗೆ ಮರಳಿದೆ.

ಬಾಂಗ್ಲಾ ವಿರುದ್ಧ ಸರಣಿಗೆ ತಂಡ ಕೂಡಿಕೊಂಡ ಶೋಯೆಬ್ ಮಲಿಕ್ ಆಕರ್ಷಕ ಅಜೇಯ ಅರ್ಧಶತಕ ಸಿಡಿಸುವ ಮೂಲಕ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಇದರ ಜತೆಗೆ ಧೋನಿ-ಕೊಹ್ಲಿ ಹೆಸರಿನಲ್ಲಿದ್ದ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆಸಿಕೊಳ್ಳುವಲ್ಲಿ ಯಶಸ್ವಿಯಾದರು. ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಮಲಿಕ್ 17 ಬಾರಿ ಯಶಸ್ವಿ ಮ್ಯಾಚ್ ಫಿನೀಶರ್ ಎನಿಸಿಕೊಂಡರು. ಈ ಮೊದಲು ಧೋನಿ ಹಾಗೂ ಕೊಹ್ಲಿ ಟಿ20 ಕ್ರಿಕೆಟ್‌ನಲ್ಲಿ ಚೇಸಿಂಗ್ ಮಾಡುವ ವೇಳೆ 15 ಬಾರಿ ಅಜೇಯರಾಗುಳಿದು ತಂಡವನ್ನು ಗೆಲುವಿನ ದಡ ಸೇರಿಸಿದ್ದಾರೆ.  

ಶೋಯಿಬ್‌ ಮಲಿಕ್‌ ಅಜೇಯ ಅರ್ಧಶತಕದ ನೆರವಿನಿಂದ ಪಾಕಿಸ್ತಾನ, ಬಾಂಗ್ಲಾದೇಶ ವಿರುದ್ಧ ಮೊದಲ ಟಿ20 ಪಂದ್ಯದಲ್ಲಿ 5 ವಿಕೆಟ್‌ಗಳ ಗೆಲುವು ಸಾಧಿಸಿದೆ. ಈ ಜಯದೊಂದಿಗೆ ಪಾಕಿಸ್ತಾನ 3 ಪಂದ್ಯಗಳ ಟಿ20 ಸರಣಿಯಲ್ಲಿ 1-0 ಮುನ್ನಡೆ ಪಡೆದಿದೆ.

ಬಾಂಗ್ಲಾ ನೀಡಿದ 142 ರನ್‌ಗಳ ಗುರಿಯನ್ನು ಬೆನ್ನತ್ತಿದ ಪಾಕಿಸ್ತಾನ, ಹಸನ್‌ ಅಲಿ (36), ಮಲಿಕ್‌ (ಅಜೇಯ 58) ಜವಬ್ದಾರಿಯುತ ಆಟದಿಂದಾಗಿ 19.3 ಓವರಲ್ಲಿ 5 ವಿಕೆಟ್‌ಗೆ 142 ರನ್‌ಗಳಿಸಿತು. ಮೊಹಮದ್‌ ನಯೀಮ್‌ (43) ಹೋರಾಟದ ಹೊರತಾಗಿಯೂ ಬಾಂಗ್ಲಾ 20 ಓವರಲ್ಲಿ 5 ವಿಕೆಟ್‌ಗೆ 141 ರನ್‌ ಗಳಿಸಿತು.

ಸ್ಕೋರ್‌:
ಬಾಂಗ್ಲಾದೇಶ 141/5
ಪಾಕಿಸ್ತಾನ 142/5