ಜಡೇಜಾ ಶತಕ ಸಿಡಿಸುತ್ತಿದ್ದಂತೆಯೇ ಮತ್ತೆ ಕೈ ಕುಲುಕಲು ಬಂದ ಇಂಗ್ಲೆಂಡ್ ಆಟಗಾರನಿಗೆ ಮುಖಭಂಗ! ತಿರುಗಿಯೂ ನೋಡದ ಸುಂದರ್!

ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಟೆಸ್ಟ್‌ನಲ್ಲಿ ಜಡೇಜಾ ಮತ್ತು ಸುಂದರ್ ಶತಕ ಬಾರಿಸಿದರು. ಸ್ಟೋಕ್ಸ್ ಡ್ರಾಗೆ ಕೈಕೊಟ್ಟ ನಂತರ ಜಡೇಜಾ ಶತಕ ಸಿಡಿಸಿದರು. ಬ್ರೂಕ್ ಕೈಕುಲುಕಲು ಮುಂದಾದಾಗ ಸುಂದರ್ ನಿರ್ಲಕ್ಷಿಸಿದರು.

ಮ್ಯಾಂಚೆಸ್ಟರ್: ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಕ್ರಿಕೆಟ್ ಟೆಸ್ಟ್‌ನಲ್ಲಿ ಬೆನ್ ಸ್ಟೋಕ್ಸ್ ಕೈಕುಲುಕುವ ವಿವಾದದಲ್ಲಿ ಮತ್ತೊಬ್ಬ ಇಂಗ್ಲೆಂಡ್ ಆಟಗಾರ ಟ್ರೋಲ್‌ಗೆ ಒಳಗಾಗಿದ್ದಾರೆ. ಇಂಗ್ಲೆಂಡ್‌ನ ಹ್ಯಾರಿ ಬ್ರೂಕ್‌ರನ್ನು ಭಾರತೀಯ ಆಟಗಾರರು ಅವಮಾನಿಸಿದರು. ಜಡೇಜಾ ಮತ್ತು ವಾಷಿಂಗ್ಟನ್ ಸುಂದರ್ ಶತಕದ ಸಮೀಪದಲ್ಲಿದ್ದಾಗ ಇಂಗ್ಲೆಂಡ್ ನಾಯಕ ನಾಟಕೀಯವಾಗಿ ಡ್ರಾಗೆ ಒಪ್ಪಿಕೊಂಡು ಕೈಕೊಡಲು ಬಂದರು. ಜಡೇಜಾ ಮತ್ತು ಸುಂದರ್ ಅವರ ಶತಕಗಳನ್ನು ತಡೆಯುವ ದುರುದ್ದೇಶ ಸ್ಟೋಕ್ಸ್‌ನ ಹಠಾತ್ ಡ್ರಾಗೆ ಒಪ್ಪಿಗೆಯ ಹಿಂದೆ ಇತ್ತು ಎಂಬುದು ಸ್ಪಷ್ಟವಾಗಿತ್ತು.

ಆದರೆ ಸ್ಟೋಕ್ಸ್‌ಗೆ ಕೈಕೊಡಲು ನಿರಾಕರಿಸಿದ ಜಡೇಜಾ ಶತಕ ಪೂರ್ಣಗೊಳಿಸಲು ಸಜ್ಜಾಗಿದ್ದರು. ನಂತರ ಬ್ರೂಕ್ ಮತ್ತು ಡಕೆಟ್‌ ಎದುರು ಜಡ್ಡು ನೀನು ಶತಕ ಹೊಡೆಯಲು ಹೊರಟಿದ್ದೀಯಾ ಎಂದು ಸ್ಟೋಕ್ಸ್ ಜಡೇಜಾರನ್ನು ಕೆಣಕಿದರು. ಇದಕ್ಕೆ ಜಡೇಜಾ, ನೀವು ಏನು ಬಯಸುತ್ತೀರಿ, ನಾವು ಡ್ರಾಗೆ ಒಪ್ಪಿಕೊಂಡು ಹಿಂತಿರುಗಬೇಕೆಂದು ನೀವು ಬಯಸುತ್ತೀರಾ ಎಂದು ಜಡೇಜಾ ಪ್ರಶ್ನಿಸಿದರು. ಆದರೆ ನೀನು ಕೈಕೊಡು, ನಿನ್ನಿಂದ ಅದು ಸಾಧ್ಯ ಎಂದು ಸ್ಟೋಕ್ಸ್ ಹೇಳಿದಾಗ, ನನಗೆ ಅದು ಸಾಧ್ಯವಿಲ್ಲ ಎಂದು ಜಡೇಜಾ ಹೇಳಿದರು.

ನಂತರ ಬ್ಯಾಟಿಂಗ್ ಮುಂದುವರಿಸಿದ ಜಡೇಜಾ, ಹ್ಯಾರಿ ಬ್ರೂಕ್‌ ಬೌಲಿಂಗ್‌ನಲ್ಲಿ ಸಿಕ್ಸರ್‌ ಬಾರಿಸಿ ತನ್ನ ಐದನೇ ಟೆಸ್ಟ್ ಶತಕ ಪೂರ್ಣಗೊಳಿಸಿದರು. ಜಡೇಜಾ ಹೆಲ್ಮೆಟ್ ತೆಗೆದು ಶತಕ ಆಚರಿಸುತ್ತಿರುವಾಗ, ಹ್ಯಾರಿ ಬ್ರೂಕ್ ಕೈ ಕುಲುಕಲು ಮುಂದೆ ಬಂದರು. ವಾಷಿಂಗ್ಟನ್ ಸುಂದರ್ ಕಡೆಗೆ ಬ್ರೂಕ್ ಕೈಚಾಚಿದರು. ಈ ಸಮಯದಲ್ಲಿ ವಾಷಿಂಗ್ಟನ್ ಸುಂದರ್ 92 ರನ್‌ಗಳಿಸಿದ್ದರು. ಆದರೆ ಕೈಚಾಚಿದ ಬ್ರೂಕ್‌ರನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿ ಜಡೇಜಾ ಅವರ ಶತಕವನ್ನು ಆಚರಿಸಲು ಸುಂದರ್ ಮುಂದಾದರು.

ಇದರಿಂದ ಮುಜುಗರಕ್ಕೊಳಗಾದ ಬ್ರೂಕ್ ಮತ್ತೆ ಬೌಲಿಂಗ್ ಮಾಡಲು ಹಿಂತಿರುಗಿದರು. ನಂತರ ಬ್ರೂಕ್‌ರ ಮುಂದಿನ ಓವರ್‌ನಲ್ಲಿ ಬೌಂಡರಿ ಮತ್ತು ಎರಡು ರನ್ ಗಳಿಸಿದ ಸುಂದರ್ ತಮ್ಮ ಮೊದಲ ಟೆಸ್ಟ್ ಶತಕ ಪೂರ್ಣಗೊಳಿಸಿ ಸಂಭ್ರಮಿಸಿದರು.

ಹೀಗಿತ್ತು ನೋಡಿ ಆ ಕ್ಷಣ:

ಭಾರತ ಹಾಗೂ ಇಂಗ್ಲೆಂಡ್ ನಡುವಿನ ಮ್ಯಾಂಚೆಸ್ಟರ್ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಟೀಂ ಇಂಡಿಯಾ, ಮೊದಲ ಇನ್ನಿಂಗ್ಸ್‌ನಲ್ಲಿ 358 ರನ್‌ಗಳಿಗೆ ಸರ್ವಪತನ ಕಂಡಿತು. ಇದಕ್ಕುತ್ತರವಾಗಿ ಇಂಗ್ಲೆಂಡ್ ತಂಡವು ಜೋ ರೂಟ್ ಹಾಗೂ ಬೆನ್ ಸ್ಟೋಕ್ಸ್ ಆಕರ್ಷಕ ಶತಕಗಳ ನೆರವಿನಿಂದ 669 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು. ಈ ಮೂಲಕ ಮೊದಲ ಇನ್ನಿಂಗ್ಸ್‌ನಲ್ಲಿ ಆತಿಥೇಯ ಇಂಗ್ಲೆಂಡ್‌ ತಂಡವು ಬರೋಬ್ಬರಿ 311 ರನ್‌ಗಳ ಬೃಹತ್ ಮುನ್ನಡೆ ಸಾಧಿಸಿತು.

ಇನ್ನು ಭಾರೀ ಹಿನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಟೀಂ ಇಂಡಿಯಾ, ಉತ್ತಮ ಆರಂಭ ಪಡೆಯಲು ವಿಫಲವಾಯಿತು. ಮೊದಲ ಓವರ್‌ನಲ್ಲೇ ಕ್ರಿಸ್ ವೋಕ್ಸ್, ಭಾರತದ ಆರಂಭಿಕ ಬ್ಯಾಟರ್ ಯಶಸ್ವಿ ಜೈಸ್ವಾಲ್ ಮತ್ತು ಸಾಯಿ ಸುದರ್ಶನ್ ಅವರಿಗೆ ಪೆವಿಲಿಯನ್ ಹಾದಿ ತೋರಿಸಿದರು. ಟೀಂ ಇಂಡಿಯಾ ಖಾತೆ ತೆರೆಯುವ ಮುನ್ನವೇ ಎರಡು ವಿಕೆಟ್ ಕಳೆದುಕೊಂಡಿತು. ಇದಾದ ಬಳಿಕ ಮೂರನೇ ವಿಕೆಟ್‌ಗೆ ಜತೆಯಾದ ನಾಯಕ ಶುಭ್‌ಮನ್ ಗಿಲ್ ಹಾಗೂ ಕೆ ಎಲ್ ರಾಹುಲ್ 188 ರನ್‌ಗಳ ಆಕರ್ಷಕ ಜತೆಯಾಟವಾಡುವ ಮೂಲಕ ಟೀಂ ಇಂಡಿಯಾವನ್ನು ಆರಂಭಿಕ ಆಘಾತದಿಂದ ಪಾರು ಮಾಡಿದರು. ಕೆ ಎಲ್ ರಾಹುಲ್ 90 ರನ್ ಸಿಡಿಸಿ ವಿಕೆಟ್ ಒಪ್ಪಿಸಿದರೆ, ನಾಯಕ ಶುಭ್‌ಮನ್ ಗಿಲ್ 103 ರನ್ ಸಿಡಿಸಿ ಜೋಫ್ರಾ ಆರ್ಚರ್‌ಗೆ ವಿಕೆಟ್ ಒಪ್ಪಿಸಿದರು. ಇದಾದ ಬಳಿಕ ನಾಲ್ಕನೇ ವಿಕೆಟ್‌ಗೆ ಜತೆಯಾದ ವಾಷಿಂಗ್ಟನ್ ಸುಂದರ್ ಹಾಗೂ ರವೀಂದ್ರ ಜಡೇಜಾ ಮುರಿಯದ ದ್ವಿಶತಕದ ಜತೆಯಾಟವಾಡುವ ಮೂಲಕ ಪಂದ್ಯ ಡ್ರಾ ಆಗುವಂತೆ ಮಾಡಿದರು.