ಆಸೀಸ್ ಎದುರು ಭಾರತಕ್ಕೆ ಹ್ಯಾಟ್ರಿಕ್ ಸೋಲು, ಏಕದಿನ ಸರಣಿ ಕ್ಲೀನ್‌ಸ್ವೀಪ್ ಮಾಡಿದ ಕಾಂಗರೂ ಪಡೆ

ಮೊದಲು ಬ್ಯಾಟ್‌ ಮಾಡಿದ ಆಸೀಸ್‌ 7 ವಿಕೆಟ್‌ಗೆ ಬರೋಬ್ಬರಿ 338 ರನ್‌ ಕಲೆಹಾಕಿತು. ಇದು ಭಾರತ ಏಕದಿನಲ್ಲಿ ಯಾವುದೇ ಎದುರಾಳಿ ತಂಡಕ್ಕೆ ಬಿಟ್ಟುಕೊಟ್ಟ ಗರಿಷ್ಠ ಮೊತ್ತ. ಫೋಬ್‌ ಲಿಚ್‌ಫೀಲ್ಡ್‌(125 ಎಸೆತಗಳಲ್ಲಿ 119) ಭರ್ಜರಿ ಶತಕ ಸಿಡಿಸಿದರೆ, ಅಲೀಸಾ ಹೀಲಿ 82 ರನ್‌ ಚಚ್ಚಿದರು.

ಮುಂಬೈ(ಜ.03): ಆಸ್ಟ್ರೇಲಿಯಾ ವಿರುದ್ಧದ 3ನೇ ಏಕದಿನ ಪಂದ್ಯದಲ್ಲಿ ಭಾರತ 190 ರನ್‌ ಹೀನಾಯ ಸೋಲನುಭವಿಸಿದ್ದು, 3 ಪಂದ್ಯಗಳ ಸರಣಿಯಲ್ಲಿ 0-3 ವೈಟ್‌ವಾಶ್‌ ಮುಖಭಂಗಕ್ಕೊಳಗಾಗಿದೆ. ಇದು ಭಾರತಕ್ಕೆ ಏಕದಿನದಲ್ಲಿ ಎದುರಾದ ರನ್‌ ಅಂತರದ 3ನೇ ಅತಿ ದೊಡ್ಡ ಸೋಲು. ಜೊತೆಗೆ ಆಸೀಸ್‌ ವಿರುದ್ಧ ತವರಿನಲ್ಲಿ ಭಾರತ ಸತತ 10ನೇ ಸೋಲನುಭವಿಸಿತು.

ಮೊದಲು ಬ್ಯಾಟ್‌ ಮಾಡಿದ ಆಸೀಸ್‌ 7 ವಿಕೆಟ್‌ಗೆ ಬರೋಬ್ಬರಿ 338 ರನ್‌ ಕಲೆಹಾಕಿತು. ಇದು ಭಾರತ ಏಕದಿನಲ್ಲಿ ಯಾವುದೇ ಎದುರಾಳಿ ತಂಡಕ್ಕೆ ಬಿಟ್ಟುಕೊಟ್ಟ ಗರಿಷ್ಠ ಮೊತ್ತ. ಫೋಬ್‌ ಲಿಚ್‌ಫೀಲ್ಡ್‌(125 ಎಸೆತಗಳಲ್ಲಿ 119) ಭರ್ಜರಿ ಶತಕ ಸಿಡಿಸಿದರೆ, ಅಲೀಸಾ ಹೀಲಿ 82 ರನ್‌ ಚಚ್ಚಿದರು. ಈ ಜೋಡಿ ಮೊದಲ ವಿಕೆಟ್‌ಗೆ 28.5 ಓವರ್‌ಗಳಲ್ಲಿ 189 ರನ್‌ ಜೊತೆಯಾಟವಾಡಿತು. ಕರ್ನಾಟಕದ ಶ್ರೇಯಾಂಕ ಪಾಟೀಲ್‌ 57 ರನ್‌ 3 ವಿಕೆಟ್‌ ಕಿತ್ತರು.

ಬೃಹತ್‌ ಗುರಿ ಬೆನ್ನತ್ತಿದ ಭಾರತ 32.4 ಓವರ್‌ಗಳಲ್ಲಿ ಕೇವಲ 148ಕ್ಕೆ ಸರ್ವಪತನ ಕಂಡಿತು. ಭಾರತದ ಯಾರೊಬ್ಬರಿಗೂ 30+ ರನ್‌ ಗಳಿಸಲಾಗಲಿಲ್ಲ. ಜಾರ್ಜಿಯಾ ವೇರ್‌ಹ್ಯಾಮ್ 23ಕ್ಕೆ 3 ವಿಕೆಟ್‌ ಕಬಳಿಸಿದರು.

ಸ್ಕೋರ್‌: 
ಆಸ್ಟ್ರೇಲಿಯಾ 50 ಓವರಲ್ಲಿ 338/7(ಲಿಚ್‌ಫೀಲ್ಡ್‌ 119, ಹೀಲಿ 82, ಶ್ರೇಯಾಂಕ 3-57)
ಭಾರತ 32.4 ಓವರ್‌ಗಳಲ್ಲಿ 148/10 (ಸ್ಮೃತಿ 29, ಜೆಮಿಮಾ 25, ವೇರ್‌ಹ್ಯಾಮ್ 3-23)

ನಿವೃತ್ತಿ ಟೆಸ್ಟ್‌ ಪಂದ್ಯಕ್ಕೂ ಮುನ್ನ ಡೇವಿಡ್‌ ವಾರ್ನರ್‌ರ ‘ಬ್ಯಾಗಿ ಗ್ರೀನ್‌’ ಕಳ್ಳತನ!

ಸಿಡ್ನಿ: ಬುಧವಾರದಿಂದ ನಿವೃತ್ತಿಯ ಟೆಸ್ಟ್‌ (ಪಾಕ್‌ ವಿರುದ್ಧ 3ನೇ ಟೆಸ್ಟ್‌) ಆಡಲಿರುವ ಆಸ್ಟ್ರೇಲಿಯಾದ ತಾರಾ ಕ್ರಿಕೆಟಿಗ ಡೇವಿಡ್‌ ವಾರ್ನರ್‌, ತಮ್ಮ ಬ್ಯಾಗಿ ಗ್ರೀನ್‌ (ಟೆಸ್ಟ್‌ಗೆ ಪಾದಾರ್ಪಣೆ ಮಾಡಿದಾಗ ಕೊಡುವ ಕ್ಯಾಪ್‌) ಕಳೆದುಕೊಂಡಿದ್ದಾರೆ. ಈ ಬಗ್ಗೆ ಪಂದ್ಯದ ಹಿಂದಿನ ದಿನವಾದ ಮಂಗಳವಾರ ಸಾಮಾಜಿಕ ತಾಣಗಳಲ್ಲಿ ವಿಡಿಯೋವೊಂದನ್ನು ಹಂಚಿಕೊಂಡ ವಾರ್ನರ್‌, ತಮ್ಮ ಕದ್ದವರಿಗೆ ಅದನ್ನು ಹಿಂದಿರುಗಿಸುವಂತೆ ಮನವಿ ಮಾಡಿದ್ದಾರೆ.

‘ನನ್ನ ಬ್ಯಾಗ್‌ನೊಳಗೆ ಬ್ಯಾಗಿ ಗ್ರೀನ್‌ ಕ್ಯಾಪ್ ಇತ್ತು. ಬ್ಯಾಗ್‌ ಯಾರೋ ಕಳವು ಮಾಡಿದ್ದಾರೆ. ದಯವಿಟ್ಟು ಅದನ್ನು ಹಿಂದಿರುಗಿಸಿ. ಕ್ಯಾಪ್‌ನೊಂದಿಗೆ ನನಗೆ ಭಾವನಾತ್ಮಕ ಸಂಬಂಧವಿದೆ. ಬೇಕಿದ್ದರೆ ಬ್ಯಾಗ್‌ ನೀವೇ ಇಟ್ಟುಕೊಳ್ಳಿ’ ಎಂದು ವಾರ್ನರ್‌ ಕೇಳಿಕೊಂಡಿದ್ದಾರೆ.