2024ರ ಬಳಿಕ ಮೊದಲ ಬಾರಿಗೆ ಡಾಲರ್ ವಿರುದ್ಧ ಏರಿಕೆ ಕಂಡ ರೂಪಾಯಿ ಮೌಲ್ಯ!

ಡಾಲರ್ ಎದುರು ರೂಪಾಯಿ ಏಳು ತಿಂಗಳ ಗರಿಷ್ಠ ಮಟ್ಟ ೮೪ರ ಗಡಿ ದಾಟಿದೆ. ವಿದೇಶಿ ಹೂಡಿಕೆ ಹೆಚ್ಚಳ, ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದದ ನಿರೀಕ್ಷೆಗಳು ರೂಪಾಯಿ ಏರಿಕೆಗೆ ಕಾರಣ. ಷೇರುಪೇಟೆಯಲ್ಲಿ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರ ಖರೀದಿ ಹೆಚ್ಚಳವೂ ಪೂರಕ. ಆದರೆ, ಭಾರತ-ಪಾಕಿಸ್ತಾನ ಉದ್ವಿಗ್ನತೆ ರೂಪಾಯಿ ಮೇಲೆ ಒತ್ತಡ ತರುತ್ತಿದೆ.

ದೆಹಲಿ (ಮೇ 02): 2024ನೇ ಸಾಲಿನಲ್ಲಿ ಕಳೆದ 7 ತಿಂಗಳಿನಲ್ಲಿ ಮೊದಲ ಬಾರಿಗೆ ಭಾರತೀಯ ರೂಪಾಯಿಯ ಮೌಲ್ಯವು ಅಮೇರಿಕಾದ ಡಾಲರ್ ಎದುರು 84ರ ಗಡಿ ದಾಟಿದೆ. ಭಾರತೀಯ ಷೇರು ಮಾರುಕಟ್ಟೆಯಲ್ಲಿ ವಿದೇಶಿ ಹೂಡಿಕೆ ಹೆಚ್ಚಳ ಮತ್ತು ಅಮೆರಿಕದೊಂದಿಗಿನ ವ್ಯಾಪಾರ ಒಪ್ಪಂದದ ಬಗ್ಗೆ ಆಶಾಭಾವನೆಗಳು ರೂಪಾಯಿಗೆ ಪೂರಕವಾಗಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. 

ಡಾಲರ್ ಎದುರು 84.0987ಕ್ಕೆ ವಹಿವಾಟು ಆರಂಭಿಸಿದ ರೂಪಾಯಿ, ನಂತರ 83.9075ಕ್ಕೆ ತಲುಪಿತು. 2024ರ ಅಕ್ಟೋಬರ್ 1ರ ನಂತರ ಮೊದಲ ಬಾರಿಗೆ ರೂಪಾಯಿ 84ಕ್ಕಿಂತ ಕೆಳಗೆ ವಹಿವಾಟು ನಡೆಸಿದೆ. ಭಾರತೀಯ ಷೇರುಗಳು ಮತ್ತು ಬಾಂಡ್‌ಗಳಲ್ಲಿ ಹೂಡಿಕೆ ಹೆಚ್ಚಳ ಮತ್ತು ಭಾರತ-ಅಮೆರಿಕ ನಡುವಿನ ಸುಂಕ ಮಾತುಕತೆಗಳು ರೂಪಾಯಿ ಏರಿಕೆಗೆ ಕಾರಣವಾಗಿವೆ ಎಂದು ತಜ್ಞರು ಹೇಳಿದ್ದಾರೆ. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಸತತ 11 ಅವಧಿಗಳಲ್ಲಿ ಭಾರತೀಯ ಷೇರುಗಳನ್ನು ಖರೀದಿಸಿದ್ದಾರೆ. ಇದು ಕಳೆದೆರಡು ವರ್ಷಗಳಲ್ಲಿ ಅತಿ ದೀರ್ಘ ಖರೀದಿ ಅವಧಿಯಾಗಿದೆ.

ಈ ವಾರ ಭಾರತ-ಅಮೆರಿಕ ವ್ಯಾಪಾರ ಒಪ್ಪಂದ ನಡೆಯಲಿದೆ ಎಂಬ ನಿರೀಕ್ಷೆಯಿದೆ. ಜೊತೆಗೆ ಚೀನಾ ಅಮೆರಿಕದೊಂದಿಗೆ ವ್ಯಾಪಾರ ಮಾತುಕತೆಗೆ ಮುಂದಾಗಿರುವುದು ರೂಪಾಯಿಗೆ ಅನುಕೂಲಕರವಾಗಿದೆ. ಆದರೆ, ಭಾರತ-ಪಾಕಿಸ್ತಾನ ನಡುವಿನ ಉದ್ವಿಗ್ನತೆ ರೂಪಾಯಿ ಮೇಲೆ ಜಾಗತಿಕ ಮಟ್ಟದಲ್ಲಿ ಒತ್ತಡ ತರುತ್ತಿದೆ. ಕಳೆದ ವಾರ ಪಹಲ್ಗಾಮ್‌ನಲ್ಲಿ ಪ್ರವಾಸಿಗರ ಮೇಲೆ ನಡೆದ ಉಗ್ರರ ದಾಳಿಯ ನಂತರ ಉಭಯ ದೇಶಗಳ ನಡುವಿನ ಸಂಬಂಧ ಹದಗೆಟ್ಟಿದೆ. ಇದರಿಂದಾಗಿ ಉಭಯ ದೇಶಗಳ ಕರೆನ್ಸಿಗಳ ಮೇಲೆ ಒತ್ತಡ ಹೆಚ್ಚಾಗಿದೆ.

ಭಾರತದ ಜೊತೆ ಒಪ್ಪಂದಕ್ಕೆ ಟ್ರಂಪ್ ಉತ್ಸುಕ: 
ಭಾರತದ ಜೊತೆಗಿನ ಸುಂಕದ ಕುರಿತಾದ ಚರ್ಚೆಗಳು ಚೆನ್ನಾಗಿ ಮುಂದುವರಿಯುತ್ತಿವೆ ಎಂದು ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ. ಬೇಗನೆ ಎರಡೂ ದೇಶಗಳು ಒಪ್ಪಂದಕ್ಕೆ ಬರುತ್ತವೆ ಎಂಬ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ ಎಂದು ರಾಯಿಟರ್ಸ್ ವರದಿ ಮಾಡಿದೆ. ಅಮೆರಿಕ ಭಾರತದ ಜೊತೆ ವ್ಯಾಪಾರ ಒಪ್ಪಂದ ಮಾಡಿಕೊಂಡಿದೆ ಮತ್ತು ಅದನ್ನು ಘೋಷಿಸುವ ಮುನ್ನ ಭಾರತ ಸರ್ಕಾರದ ಅಂತಿಮ ಅನುಮತಿಗಾಗಿ ಕಾಯುತ್ತಿದೆ ಎಂದು ಯುಎಸ್ ವಾಣಿಜ್ಯ ಕಾರ್ಯದರ್ಶಿ ಹೊವಾರ್ಡ್ ಲುಡ್ನಿಕ್ ಹೇಳಿದ ನಂತರ ಟ್ರಂಪ್ ಈ ಹೇಳಿಕೆ ನೀಡಿದ್ದಾರೆ. ಈ ವಾರ ಅಥವಾ ಮುಂದಿನ ವಾರ ಯುಎಸ್ ಜೊತೆ ವ್ಯಾಪಾರ ಒಪ್ಪಂದಕ್ಕೆ ಸಹಿ ಹಾಕುವ ಮೊದಲ ರಾಷ್ಟ್ರಗಳಲ್ಲಿ ಭಾರತವೂ ಒಂದು ಎಂದು ಯುಎಸ್ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆನ್ ಕೂಡ ಹೇಳಿದ್ದಾರೆ.

2025ರ ಅಂತ್ಯದ ವೇಳೆಗೆ ಎರಡೂ ದೇಶಗಳು ಸಹಿ ಹಾಕಲು ಉದ್ದೇಶಿಸಿರುವ ದ್ವಿಪಕ್ಷೀಯ ವ್ಯಾಪಾರ ಒಪ್ಪಂದದ ಭಾಗವಾಗಿ ಭಾರತ ಅಮೆರಿಕಕ್ಕೆ ವಿಶೇಷ ಸ್ನೇಹ ರಾಷ್ಟ್ರ ಸ್ಥಾನಮಾನ ನೀಡುವುದಾಗಿ ಭರವಸೆ ನೀಡಬಹುದು ಎಂದು ರಾಯಿಟರ್ಸ್ ವರದಿ ಮಾಡಿದೆ. ವ್ಯಾಪಾರ ಚರ್ಚೆಗಳಲ್ಲಿ ಭಾರತ ಈ ಸ್ಥಾನಮಾನವನ್ನು ಬಹಳ ವಿರಳವಾಗಿ ಮಾತ್ರ ನೀಡುತ್ತದೆ. ಇದಲ್ಲದೆ, ವ್ಯಾಪಾರದಲ್ಲಿ ಭಾರತ ಯುಎಸ್‌ಗೆ ಹಲವು ಭರವಸೆಗಳನ್ನು ಮತ್ತು ಮುಂಗಡ ರಿಯಾಯಿತಿಗಳನ್ನು ನೀಡಿದೆ. ಚೀನಾ, ಕೆನಡಾ, ಯುರೋಪಿಯನ್ ಒಕ್ಕೂಟ ಸೇರಿದಂತೆ ಅಮೆರಿಕದ ಇತರ ಹಲವು ದೊಡ್ಡ ವ್ಯಾಪಾರ ಪಾಲುದಾರರಿಗಿಂತ ಹೆಚ್ಚಿನ ಆಸಕ್ತಿಯನ್ನು ಭಾರತ ತೋರಿಸುತ್ತಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ಎರಡೂ ದೇಶಗಳ ನಡುವೆ ವ್ಯಾಪಾರ ನಡೆಸುವ 24 ವಿಭಾಗಗಳಲ್ಲಿ 19 ವಿಭಾಗಗಳ ಕುರಿತು ತ್ವರಿತ ಚರ್ಚೆಗಳು ನಡೆಯಲಿವೆ. ಸೋಯಾಬೀನ್, ಜೋಳ ಮುಂತಾದ ಕೃಷಿ ಉತ್ಪನ್ನಗಳು ಮತ್ತು ಮಿಲಿಟರಿ ಉಪಕರಣಗಳು ಸೇರಿದಂತೆ ಉಳಿದ ಐದು ವಿಭಾಗಗಳನ್ನು ಎರಡನೇ ಹಂತದಲ್ಲಿ ಚರ್ಚಿಸಬಹುದು. ಶೈತ್ಯೀಕರಿಸಿದ ಮಾಂಸ ಮತ್ತು ಮೀನು, ಕೋಳಿ, ಹಲವು ಹಣ್ಣುಗಳು, ಜ್ಯೂಸ್‌ಗಳು ಸೇರಿದಂತೆ ವಿವಿಧ ಕೃಷಿ ಉತ್ಪನ್ನಗಳ ಸುಂಕವನ್ನು ಶೇ.0 ರಿಂದ ಶೇ.5ಕ್ಕೆ ಇಳಿಸಲು ಭಾರತ ಸಿದ್ಧವಾಗಿದೆ ಎಂದು ಸ್ಪಷ್ಟಪಡಿಸಿದೆ. ಈ ಉತ್ಪನ್ನಗಳಿಗೆ ಪ್ರಸ್ತುತ ಶೇ.30 ರಿಂದ ಶೇ.100ರವರೆಗೆ ಸುಂಕವಿದೆ. ಪ್ರತಿಯಾಗಿ, ಜವಳಿ, ಆಟಿಕೆಗಳು, ಚರ್ಮದ ವಸ್ತುಗಳು, ಪೀಠೋಪಕರಣಗಳು, ರತ್ನಗಳು, ಆಭರಣಗಳು, ವಾಹನ ಘಟಕಗಳು ಮುಂತಾದ ಉದ್ಯೋಗ ಕ್ಷೇತ್ರಗಳಿಗೆ ಅನುಕೂಲಕರವಾದ ಸುಂಕ ಪರಿಗಣನೆಯನ್ನು ನವದೆಹಲಿ ಕೋರಿದೆ ಎಂದು ಯುಎಸ್ ಅಧಿಕಾರಿಗಳು ತಿಳಿಸಿದ್ದಾರೆ.

ಭಾರತೀಯ ರಫ್ತಿನ ಮೇಲೆ ಹೆಚ್ಚುವರಿ ಸುಂಕ ವಿಧಿಸುವುದನ್ನು ಅಮೆರಿಕ ತಾತ್ಕಾಲಿಕವಾಗಿ 90 ದಿನಗಳವರೆಗೆ ಸ್ಥಗಿತಗೊಳಿಸಿದೆ. ಸೀಗಡಿಯಿಂದ ಉಕ್ಕಿನವರೆಗೆ ಅಮೆರಿಕಕ್ಕೆ ಭಾರತದಿಂದ ರಫ್ತಾಗುವ ವಸ್ತುಗಳ ಮೇಲೆ ಶೇ.26ರಷ್ಟು ಹೆಚ್ಚುವರಿ ಸುಂಕವನ್ನು ಟ್ರಂಪ್ ವಿಧಿಸಿದ್ದರು.