ಪಾಕಿಸ್ತಾನದ ಜನಪ್ರಿಯ ನಟಿ ಹುಮೈರಾ ಅಸ್ಗರ್ ಅವರು ತಮ್ಮ ಮನೆಯಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. 32 ವರ್ಷದ ಹುಮೈರಾ ಪಾಕಿಸ್ತಾನದ ಚಾನೆಲ್ ARYಯ ರಿಯಾಲಿಟಿ ಶೋ ತಮಾಷ ಘರ್ನಲ್ಲಿ ಭಾಗವಹಿಸಿದ್ದರು.
ಜುಲೈ 8ರಂದು ಅವರ ಕರಾಚಿ ಪೊಲೀಸರು ಅವರ ಮನೆಯ ಬಾಗಿಲು ಮುರಿದು ಒಳ ಹೋದಾಗ ಅವರ ಮೃತದೇಹ ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಅವರು ಇತ್ತೆಹಾದ್ ಕಮರ್ಷಿಯಲ್ ಎಂಬ ಸ್ಥಳದಲ್ಲಿ ಬಾಡಿಗೆ ಮನೆಯಲ್ಲಿ ವಾಸಿಸುತ್ತಿದ್ದರು.
2024 ರಿಂದ ಹುಮೈರಾ ಮನೆ ಬಾಡಿಗೆ ಪಾವತಿಸಿಲ್ಲ ಎಂದು ಮನೆ ಮಾಲೀಕರು ಆರೋಪಿಸಿದ ನಂತರ, ಸ್ಥಳೀಯ ಕೋರ್ಟ್ ಅವರ ಅಪಾರ್ಟ್ಮೆಂಟ್ ಖಾಲಿ ಮಾಡುವಂತೆ ಆದೇಶಿಸಿದ ನಂತರ ಪೊಲೀಸರು ಮನೆಗೆ ಭೇಟಿ ನೀಡಿದಾಗ ಘಟನೆ ಬೆಳಕಿಗೆ ಬಂದಿದೆ
ಕರಾಚಿಯ ರಕ್ಷಣಾ ವಸತಿ ಪ್ರಾಧಿಕಾರದಲ್ಲಿರುವ ಹುಮೈರಾ ಮನೆಗೆ ಮಧ್ಯಾಹ್ನ 3.15 ರ ಸುಮಾರಿಗೆ ಪೊಲೀಸರು ಭೇಟಿ ನೀಡಿ ಬಾಗಿಲು ಬಡಿದಿದ್ದಾರೆ ತೆರೆಯದಿದ್ದಾಗ ಬೀಗ ಮುರಿದು ಒಳಹೋದ ಪೊಲೀಸರಿಗೆ ಅಲ್ಲಿ ಹುಮೈರಾ ಶವ ಕಂಡಿದೆ.
ನಟಿಯ ದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ಜಿನ್ನಾ ಸ್ನಾತಕೋತ್ತರ ವೈದ್ಯಕೀಯ ಕೇಂದ್ರಕ್ಕೆ ಕಳುಹಿಸಲಾಗಿದೆ. ಪರೀಕ್ಷೆಯ ನಂತರ ಸಾವಿನ ಕಾರಣ ತಿಳಿಯಲಿದೆ ಪೊಲೀಸರ ಪ್ರಕಾರ ಹುಮೈರಾ ಮೃತಪಟ್ಟು ಹಲವು ದಿನಗಳೇ ಕಳೆದಿವೆ.
ಹುಮೈರಾ ಕೆಲ ದಿನಗಳ ಹಿಂದೆಯೇ ಸಾವನ್ನಪ್ಪಿದ್ದಾರೆ ದೇಹ ಕೊಳೆತಿಿತ್ತು ಆಕೆ ಸಾವಿಗೀಡಾಗಿ ಕನಿಷ್ಠ ಎರಡು ವಾರಗಳು ಕಳೆದಿರಬಹುದು ಎಂದು ಪೊಲೀಸ್ ಶಸ್ತ್ರಚಿಕಿತ್ಸಕ ಡಾ. ಸುಮ್ಮಯ್ಯ ಸೈಯದ್ ಡಾನ್ ನ್ಯೂಸ್ಗೆ ತಿಳಿಸಿದ್ದಾರೆ
ಪೊಲೀಸರ ಪ್ರಕಾರ ಬೇರೆಯವರು ಕೃತ್ಯ ನಡೆಸಿದ ಲಕ್ಷಣ ಅಲ್ಲಿ ಕಂಡು ಬಂದಿಲ್ಲ. ಮನೆಯ ಕಬ್ಬಿಣದ ಗೇಟ್, ಮರದ ಬಾಗಿಲು ಮತ್ತು ಬಾಲ್ಕನಿ ಎಲ್ಲವೂ ಒಳಗಿನಿಂದ ಲಾಕ್ ಆಗಿದ್ದವು. ಆಕೆ ಅಲ್ಲಿ ಒಬ್ಬಂಟಿಯಾಗಿ ವಾಸಿಸುತ್ತಿದ್ದರು.
ಇತ್ತ ಹುಮೈರಾ ಅಸ್ಗರ್ ಅವರ ಶವವನ್ನು ಪಡೆಯಲು ಕುಟುಂಬ ನಿರಾಕರಿಸಿದೆ ಎಂದು ವರದಿಯಾಗಿದೆ. ವರ್ಷಗಳ ಹಿಂದೆ ಅವರು ಸಂಬಂಧಗಳನ್ನು ಕಡಿದುಕೊಂಡಿದ್ದಾರೆ. ಹೀಗಾಗಿ ಅವರ ಶವವನ್ನು ಪಡೆದುಕೊಳ್ಳುವುದಿಲ್ಲ ಎಂದು ಕುಟುಂಬ ಹೇಳಿದೆ.
ಹುಮೈರಾ ಅಸ್ಗರ್ ಅವರ ಸೋದರ ಹಾಗೂ ತಂದೆ ಅವರ ಶವವನ್ನು ಪಡೆಯಲು ನಿರಾಕರಿಸಿದ್ದಾರೆ ಎಂದು ಕರಾಚಿಯ ಪೊಲೀಸ್ ಅಧಿಕಾರಿಗಳು ಬಹಿರಂಗಪಡಿಸಿದ್ದಾರೆ.
ಹುಮೈರಾ ಮನೆ ಮಾಲೀಕರ ಮೂಲಕ ಅವರ ಪೋಷಕರನ್ನು ಸಂಪರ್ಕಿಸಿದಾಗ ಆಕೆಯ ತಂದೆ ಕರಾಚಿಗೆ ಬರಲು ನಿರಾಕರಿಸಿದ್ದಲ್ಲದೇ ಎರಡು ವರ್ಷಗಳ ಹಿಂದೆಯೇ ಆಕೆ ಕುಟುಂಬದ ಸಂಪರ್ಕವನ್ನು ಕಡಿದುಕೊಂಡಿದ್ದಾಗಿ ಹೇಳಿದ್ದಾರೆ.
ಆದರೂ ಕುಟುಂಬದವರು ಆಕೆಯ ಶವವನ್ನು ಪಡೆಯುವಂತೆ ಮನವೊಲಿಸುವ ಪ್ರಯತ್ನ ನಡೆದಿದೆ ಎಂದು ವರದಿಯಾಗಿದೆ.
ಹುಮೈರಾ ಅವರು ತಾವು ವಾಸವಿದ್ದ ಅಪಾರ್ಟ್ಮೆಂಟ್ನ ಜನರೊಂದಿಗೆ ಹೆಚ್ಚು ಮಾತನಾಡುತ್ತಿರಲಿಲ್ಲ, ನೆರೆಹೊರೆಯವರಿಗೂ ಅವರು ಬಹಳ ವಿರಳವಾಗಿ ಕಾಣಿಸಿಕೊಳ್ಳುತ್ತಿದ್ದರು.
ಹುಮೈರಾ ಅವರ ಈ ಸಾವು ಪಾಕಿಸ್ತಾನಿ ಕಿರುತೆರೆ ವಲಯದಲ್ಲಿ ಆಘಾತ ಮೂಡಿಸಿದೆ. ಅಲ್ಲಿನ ನಟರು ಮತ್ತು ಕಲಾವಿದರು ಆನ್ಲೈನ್ನಲ್ಲಿ ಹುಮೈರಾ ಅಗಲಿಕೆಗೆ ಆಘಾತ ಆತಂಕ ವ್ಯಕ್ತಪಡಿಸಿ ಭಾವುಕರಾಗಿದ್ದಾರೆ.