ಭಾರತ, ಪಾಕಿಸ್ತಾನ ಹಾಗೂ ಫಿಲಿಪ್ಪೀನ್ಸ್‌ನಿಂದ ಹೊರಡುವ ಮತ್ತು ಈ ದೇಶಗಳ ಮೂಲಕ ಬರುವ ವಿಮಾನಗಳಿಗೆ ನಿಷೇಧ| ಏ.20ರಿಂದ ಅನ್ವಯವಾಗುವಂತೆ ಮುಂದಿನ ಎರಡು ವಾರಗಳ ಕಾಲ ಹಾಂಗ್ಕಾಂಗ್ ನಿಷೇಧ
ಹಾಂಗ್ಕಾಂಗ್*(ಏ.20): ಭಾರತ, ಪಾಕಿಸ್ತಾನ ಹಾಗೂ ಫಿಲಿಪ್ಪೀನ್ಸ್‌ನಿಂದ ಹೊರಡುವ ಮತ್ತು ಈ ದೇಶಗಳ ಮೂಲಕ ಬರುವ ವಿಮಾನಗಳಿಗೆ ಏ.20ರಿಂದ ಅನ್ವಯವಾಗುವಂತೆ ಮುಂದಿನ ಎರಡು ವಾರಗಳ ಕಾಲ ಹಾಂಗ್ಕಾಂಗ್ ನಿಷೇಧ ವಿಧಿಸಿದೆ.
ಇದೇ ಮೊದಲ ಬಾರಿ ಹಾಂಗ್‌ಕಾಂಗ್‌ನಲ್ಲಿ ಎನ್‌501ವೈ ರೂಪಾಂತರಿ ಕೊರೋನಾ ವೈರಸ್ ಪತ್ತೆಯಾಗಿರುವುದರಿಂದ ಈ ನಿರ್ಧಾರ ಕೈಗೊಂಡಿದೆ. ಭಾರತ, ಪಾಕ್‌ ಹಾಗೂ ಫಿಲಿಪ್ಪೀನ್ಸ್‌ ‘ಅತ್ಯಂತ ಅಪಾಯಕಾರಿ ದೇಶಗಳು’ ಎಂದು ಹಾಂಗ್ಕಾಂಗ್ ಪರಿಗಣಿಸಿದೆ.
ಕಳೆದ 14 ದಿನಗಳಲ್ಲಿ ಈ ದೇಶದಿಂದ ಬಂದವರಲ್ಲಿ ದೊಡ್ಡ ಪ್ರಮಾಣದಲ್ಲಿ ಕೊರೋನಾ ಸೋಂಕು ಪತ್ತೆಯಾಗಿರುವುದರಿಂದ ಹಾಂಗ್ಕಾಂಗ್ ಕಠಿಣ ಕ್ರಮಕ್ಕೆ ಮುಂದಾಗಿದೆ ಎಂದು ಹೇಳಲಾಗಿದೆ. ಹಾಂಗ್‌ಕಾಂಗ್‌ನಲ್ಲಿ ಭಾನುವಾರ 30 ಜನರಲ್ಲಿ ಕೊರೋನಾ ಕಾಣಿಸಿಕೊಂಡಿದ್ದು, ಆ ಪೈಕಿ 29 ಜನರು ಹೊರಗಿನಿಂದ ಬಂದವರು.
75 ಲಕ್ಷ ಜನಸಂಖ್ಯೆಯ ಹಾಂಗ್‌ಕಾಂಗ್‌ನಲ್ಲಿ ಈವರೆಗೆ 11,600 ಕೇಸು ಪತ್ತೆಯಾಗಿದ್ದು, 209 ಜನರು ಕೊರೋನಾಕ್ಕೆ ಬಲಿಯಾಗಿದ್ದಾರೆ.