ಮತ್ತೆ ಕೃಷಿ ಭಯೋತ್ಪಾದನೆಗೆ ಯತ್ನ: ಚೀನಿ ಮಹಿಳೆ ಬಂಧನ

ಚೀನಾದಿಂದ ಜೈವಿಕ ವಸ್ತುವನ್ನು ಅಕ್ರಮವಾಗಿ ಅಮೆರಿಕಕ್ಕೆ ಸಾಗಿಸುತ್ತಿದ್ದ ಆರೋಪ ಹೊತ್ತಿದ್ದ ಮಹಿಳೆಯನ್ನು ಇಲ್ಲಿನ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿದೆ.

ಡೆಟ್ರಾಯಿಟ್(ಅಮೆರಿಕ): ಚೀನಾದಿಂದ ಜೈವಿಕ ವಸ್ತುವನ್ನು ಅಕ್ರಮವಾಗಿ ಅಮೆರಿಕಕ್ಕೆ ಸಾಗಿಸುತ್ತಿದ್ದ ಆರೋಪ ಹೊತ್ತಿದ್ದ ಮಹಿಳೆಯನ್ನು ಇಲ್ಲಿನ ವಿಮಾನ ನಿಲ್ದಾಣದಲ್ಲಿ ಬಂಧಿಸಲಾಗಿದೆ. ಇಂತಹ ಪ್ರಕರಣದಲ್ಲಿ ಕೆಲವೇ ದಿನದ ಅಂತರದಲ್ಲಿ ಆದ 3ನೇ ವ್ಯಕ್ತಿಯ ಬಂಧನ ಇದಾಗಿದ್ದು, ಕೃಷಿ ಭಯೋತ್ಪಾದನೆಯ ಭಯವನ್ನು ಇನ್ನಷ್ಟು ಹೆಚ್ಚಿಸಿದೆ.

ಜಗತ್ತನ್ನೇ ವರ್ಷಗಳ ಕಾಲ ಕಾಡಿದ ಕೊರೋನಾದ ಹುಟ್ಟೂರಾದ ಚೀನಾದ ವುಹಾನ್‌ನಲ್ಲಿ ಪಿಎಚ್‌ಡಿ ವಿದ್ಯಾರ್ಥಿಯಾಗಿರುವ ಚೆಂಗ್ಶುವಾನ್‌ ಹಾನ್‌, ಹುಳವೊಂದಕ್ಕೆ ಸಂಬಂಧಿಸಿದ್ದ ವಸ್ತುವಿದ್ದ ಪ್ಯಾಕೆಟ್‌ಗಳನ್ನು ಅಮೆರಿಕಕ್ಕೆ ಕಳ್ಳಸಾಗಣೆ ಮಾಡಿದ್ದಳು. ಅಮೆರಿಕದ ಕಾನೂನಿನ ಪ್ರಕಾರ, ಈ ಜೈವಿಕ ವಸ್ತುವನ್ನು ದೇಶಕ್ಕೆ ತರಲು ಸರ್ಕಾರದ ಅನುಮತಿ ಕಡ್ಡಾಯ. ಆದರೆ ಈಕೆ ಸುಳ್ಳು ಹೇಳಿ, ಮಿಚಿಗನ್‌ ವಿಶ್ವವಿದ್ಯಾಲಯಕ್ಕೆ ಅದನ್ನು ಕಳಿಸಿದ್ದಳು ಎನ್ನಲಾಗಿದೆ.

ಈ ಬಗ್ಗೆ ಅಮೆರಿಕದ ಗುಪ್ತಚರ ಸಂಸ್ಥೆ ಎಫ್‌ಬಿಐನ ನಿರ್ದೇಶದ ಕಾಶ್‌ ಪಟೇಲ್‌ ಎಕ್ಸ್‌ನಲ್ಲಿ ಮಾಹಿತಿ ಹಂಚಿಕೊಂಡಿದ್ದು, ‘ರೌಡ್‌ ವರ್ಮ್ಸ್‌ (ಜಣತು ಹುಳ)ಗೆ ಸಂಬಂಧಿಸಿದ ಜೈವಿಕ ವಸ್ತುವಿದ್ದ 4 ಪೊಟ್ಟಣಗಳನ್ನು ಮಿಚಿಗನ್‌ ವಿವಿಯಲ್ಲಿರುವವರಿಗೆ ಚೀನಾದಿಂದ ಕಳಿಸಿರುವ ಆರೋಪವನ್ನು ಹಾನ್‌ ಹೊತ್ತಿದ್ದಾಳೆ. ಜೂ.8ರಂದು ಎಫ್‌ಬಿಐ ಅಧಿಕಾರಿಗಳು ಬಂಧಿಸಿದಾಗ ಅವರಿಗೆ ಆ ಬಗ್ಗೆ ಸುಳ್ಳು ಹೇಳಿದ್ದಲ್ಲದೆ, ತನ್ನೆಲ್ಲಾ ಎಲೆಕ್ಟ್ರಾನಿಕ್‌ ಉಪಕರಣಗಳ ಡೇಟಾ ಅಳಿಸಿಹಾಕಿದ್ದಾಳೆ’ ಎಂದು ಬರೆದಿದ್ದಾರೆ.

ಕಳೆದ ವಾರವಷ್ಟೇ, ಚೀನಾದಿಂದ ಇದೇ ಮಿಚಿಗನ್‌ ವಿವಿಗೆ ವಿಷಕಾರಿ ಶಿಲೀಂಧ್ರ(ಫಂಗಸ್‌) ಸಾಗಿಸುತ್ತಿದ್ದ ಯುವ ಪ್ರೇಮಿಗಳನ್ನುಅಮೆರಿಕದಲ್ಲಿ ಬಂಧಿಸಲಾಗಿತ್ತು. ಈ ಫಂಗಸ್‌ ಬೆಳೆಗಳಿಗೆ ರೋಗಕಾರಕ ಎನ್ನಲಾಗಿದೆ.