ಟೋಕಿಯೋ 2020: ಸಿಂಧು ಪದಕಕ್ಕೆ ಮತ್ತಷ್ಟು ಹತ್ತಿರ, ಸೆಮೀಸ್‌ಗೆ ಲಗ್ಗೆ

* ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಸಿಂಧು ಸೆಮೀಸ್‌ಗೆ ಲಗ್ಗೆ * ಅಕಾನೆ ಯಮಗುಚಿ ಎದುರು ನೇರ ಗೇಮ್‌ಗಳಲ್ಲಿ ಗೆಲುವು * ಪದಕ ಗೆಲ್ಲುವ ಸನಿಹದಲ್ಲಿ ಪಿ.ವಿ. ಸಿಂಧು

ಟೋಕಿಯೋ(ಜು.30): ಭಾರತದ ತಾರಾ ಬ್ಯಾಡ್ಮಿಂಟನ್‌ ಆಟಗಾರ್ತಿ ಪಿ.ವಿ. ಸಿಂಧು ಕ್ವಾರ್ಟರ್‌ ಫೈನಲ್‌ನಲ್ಲಿ ಜಪಾನಿನ ಅಕಾನೆ ಯಮಗುಚಿಯನ್ನು ನೇರ ಗೇಮ್‌ಗಳಿಂದ ರೋಚಕವಾಗಿ ಮಣಿಸುವ ಮೂಲಕ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟಿದ್ದಾರೆ. ಸಿಂಧು 21-13, 22-20 ನೇರ ಗೇಮ್‌ಗಳಲ್ಲಿ ಗೆಲುವು ಸಾಧಿಸಿ ಸೆಮಿಫೈನಲ್‌ಗೆ ಪ್ರವೇಶಿಸಿದ್ದಾರೆ. ಈ ಮೂಲಕ ಹೈದರಾಬಾದ್‌ ಆಟಗಾರ್ತಿ ಮತ್ತೊಂದು ಒಲಿಂಪಿಕ್ಸ್‌ ಪದಕಕ್ಕೆ ಹತ್ತಿರವಾಗಿದ್ದಾರೆ.

ಮೊದಲ ಗೇಮ್‌ನ ಆರಂಭದಲ್ಲೇ ಉಭಯ ಆಟಗಾರ್ತಿಯರು ಚುರುಕಿನ ಆಟಕ್ಕೆ ಮೊರೆಹೋದರು. ಪರಿಣಾಮ 6-6 ಅಂಕಗಳ ಸಮಬಲ ಸಾಧಿಸಿದ್ದರು. ಆ ಬಳಿಕ ಆಟಕ್ಕೆ ಕುದುರಿಕೊಂಡ ಸಿಂಧು ನಿಧಾನವಾಗಿ ಅಂಕಗಳನ್ನು ಹೆಚ್ಚಿಸುತ್ತಾ ಸಾಗಿದರು. ಮೊದಲ ಗೇಮ್‌ನಲ್ಲಿ ಆತಿಥೇಯ ಜಪಾನ್‌ ಆಟಗಾರ್ತಿ ಮೇಲುಗೈ ಸಾಧಿಸದಂತೆ ನೋಡಿಕೊಳ್ಳುವಲ್ಲಿ ಸಿಂಧು ಯಶಸ್ವಿಯಾದರು. ಅಂತಿಮವಾಗಿ 21-13 ಅಂಕಗಳ ಅಂತರದಲ್ಲಿ ಮೊದಲ ಗೇಮ್‌ ಸಿಂಧು ಪಾಲಾಯಿತು.

ಇನ್ನು ಎರಡನೇ ಗೇಮ್‌ನ ಆರಂಭದಲ್ಲೇ ಸಿಂಧು, ಜಪಾನ್‌ ಆಟಗಾರ್ತಿಯ ಮೇಲೆ ಬಿಗಿ ಹಿಡಿತ ಸಾಧಿಸುವಲ್ಲಿ ಯಶಸ್ವಿಯಾದರು. 6-5ರಲ್ಲಿ ಮುನ್ನಡೆ ಸಾಧಿಸಿದ್ದ ಸಿಂಧು, ಇದಾದ ಬಳಿಕ ಸತತ 4 ಅಂಕಗಳನ್ನು ಗಳಿಸುವ ಮೂಲಕ 10-5ರ ಮುನ್ನಡೆ ಸಾಧಿಸಿದರು. ಆ ಬಳಿಕ ಯಮಗುಚಿ ಕೂಡಾ ಕಮ್‌ಬ್ಯಾಕ್‌ ಮಾಡುವ ಯತ್ನ ಮಾಡಿದರು. ಪರಿಣಾಮ 15-15ರಲ್ಲಿ ಸಮಬಲ ಸಾಧಿಸುವಲ್ಲಿ ಯಮಗುಚಿ ಯಶಸ್ವಿಯಾದರು. ಬಳಿಕ ಗೇಮ್‌ ಪಾಯಿಂಟ್‌ ಕಾಪಾಡಿಕೊಳ್ಳುವ ಮೂಲಕ 20-20ರ ಸಮಬಲ ಸಾಧಿಸುವಲ್ಲಿ ಸಿಂಧು ಯಶಸ್ವಿಯಾದರು.ಬಳಿಕ 22-20 ಅಂಕಗಳ ಅಂತರದಲ್ಲಿ ಭರ್ಜರಿ ಗೆಲುವು ದಾಖಲಿಸುವ ಮೂಲಕ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟಿದ್ದಾರೆ

ಈ ಹಿಂದೆ ಉಭಯ ಆಟಗಾರ್ತಿಯರು 18 ಬಾರಿ ಮುಖಾಮುಖಿಯಾಗಿದ್ದು, ಈ ಪೈಕಿ ಸಿಂಧು 11 ರಲ್ಲಿ ಗೆಲುವು ದಾಖಲಿಸಿದ್ದರೆ, ಅಕಾನೆ ಯಮಗುಚಿ 7 ಬಾರಿ ಮಾತ್ರ ಗೆಲುವಿನ ನಗೆ ಬೀರಿದ್ದರು. ಇತ್ತೀಚೆಗೆ ಆಲ್‌ ಇಂಗ್ಲೆಂಡ್‌ ಓಪನ್ ಬ್ಯಾಡ್ಮಿಂಟನ್‌ ಟೂರ್ನಿಯ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಈ ಇಬ್ಬರು ಆಟಗಾರ್ತಿಯರು ಕಡೆಯ ಬಾರಿಗೆ ಮುಖಾಮುಖಿಯಾಗಿದ್ದರು. ಮೊದಲ ಗೇಮ್‌ನಲ್ಲಿ ಸಿಂಧು ಹಿನ್ನೆಡೆ ಅನುಭವಿಸಿದರೂ ಆ ಬಳಿಕ 16-21, 21-16, 21-19 ಗೆಲುವು ಸಾಧಿಸುವ ಮೂಲಕ ಭಾರತದ ಆಟಗಾರ್ತಿ ಮೇಲುಗೈ ಸಾಧಿಸಿದ್ದರು.