ಯಾರ ಪಾಲಾಗುತ್ತೆ ಈ ಬಾರಿಯ ಗೋಲ್ಡನ್ ಬ್ಯಾಟ್? ರೇಸ್'ನಲ್ಲಿದ್ದಾರೆ ಟೀಂ ಇಂಡಿಯಾದ ತ್ರಿಮೂರ್ತಿಗಳು

ಚಾಂಪಿಯನ್ಸ್ ಟ್ರೋಫಿಯಲ್ಲಿ ಗೋಲ್ಡನ್ ಬ್ಯಾಟ್ ಗೆಲ್ಲಲು ಇಷ್ಟು ದಿನ ಬೇರೆ ಬೇರೆ ತಂಡದ ಆಟಗಾರರ ನಡುವೆ ಸ್ಪರ್ಧೆ ಇರುತ್ತಿತ್ತು. ಆದರೆ ಈ ಬಾರಿ ಮಾತ್ರ ಭಾರತೀಯ ಆಟಗಾರರ ನಡುವೆ ಫೈಟ್ ಬಿದ್ದಿದೆ. ಅದು ತ್ರಿಮೂರ್ತಿಗಳ ನಡುವೆ. ಹಾಗಾದ್ರೆ ಈ ಸಲ ಗೋಲ್ಡನ್ ಬ್ಯಾಟ್​ ರೇಸ್​ನಲ್ಲಿ ಇರುವವರು ಯಾರು? ಇಲ್ಲಿದೆ ವಿವರ.

ಗೋಲ್ಡನ್​​ ಬ್ಯಾಟ್​'ಗೆ ತ್ರಿಮೂರ್ತಿಗಳ ನಡುವೆ ಬಿದ್ದಿದೆ ಬಿಗ್ ಫೈಟ್

ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಗೆಲ್ಲಲು ಟೀಂ ಇಂಡಿಯಾ ಇನ್ನೊಂದು ಪಂದ್ಯ ಗೆಲ್ಲಬೇಕು. ಆ ಪಂದ್ಯದಲ್ಲಿ ಹೀರೋ ಆಗೋಕೆ 11 ಆಟಗಾರರು ಕಾದು ಕುಳಿತಿದ್ದಾರೆ. ಆದರೆ ಮೂವರು ಮಾತ್ರ ಹೀರೋ ಆಗುವುದರ ಜೊತೆ ಗೋಲ್ಡನ್ ಬ್ಯಾಟ್ ಹಿಡಿಯಲು ಕಾದು ಕುಳಿತಿದ್ದಾರೆ.

ಚಾಂಪಿಯನ್ಸ್ ಟ್ರೋಫಿಯಲ್ಲಿ ಗರಿಷ್ಠ ರನ್ ಸರದಾರರಿಗೆ ಗೋಲ್ಡನ್ ಬ್ಯಾಟ್ ಮತ್ತು ಗರಿಷ್ಠ ವಿಕೆಟ್ ಟೇಕರ್​ಗೆ ಗೋಲ್ಡನ್ ಬಾಲ್ ಕೊಡಲಾಗುತ್ತದೆ. ಗೋಲ್ಡನ್ ಬಾಲ್ ಪಾಕಿಸ್ತಾನದ ಹಸನ್ ಅಲಿ ಪಾಲಾಗುವುದು ಹೆಚ್ಚುಕಮ್ಮಿ ಖಚಿತ​. ಆದರೆ ಗೋಲ್ಡನ್ ಬ್ಯಾಟ್​'​ಗಾಗಿ ಟೀಂ ಮೂವರ ನಡುವೆ ಸ್ಪರ್ಧೆ ಏರ್ಪಟ್ಟಿದೆ. ಆ ಮೂವರು ಭಾರತೀಯ ಆಟಗಾರರೇ ಎನ್ನುವುದೇ ವಿಶೇಷ.

ಹೌದು, ಗೋಲ್ಡನ್ ಬ್ಯಾಟ್ ಹಿಡಿಯಲು ಈ ತ್ರಿಮೂರ್ತಿಗಳ ನಡ್ವೆ ಫೈಟ್ ಬಿದ್ದಿದೆ. ಓಪನರ್​'ಗಳಾದ ಶಿಖರ್ ಧವನ್, ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಗೋಲ್ಡನ್ ಬ್ಯಾಟ್ ಹಿಡಿಯುವ ರೇಸ್​ನಲ್ಲಿದ್ದಾರೆ. ಫೈನಲ್ ಫೈಟ್​ನಲ್ಲಿ ಪಾಕಿಸ್ತಾನ ವಿರುದ್ಧ ಯಾರೋ ಅಬ್ಬರಿಸ್ತಾರೋ ಅವರ ಕೈಗೆ ಗೋಲ್ಡನ್ ಬ್ಯಾಟ್ ಸಿಗಲಿದೆ.

ಅದ್ಭುತ ಫಾರ್ಮ್​ನಲ್ಲಿ ತ್ರಿಮೂರ್ತಿಗಳು

ಈ ಮೂವರು ಆಟಗಾರರು ಅದ್ಭುತ ಫಾರ್ಮ್​ನಲ್ಲಿದ್ದಾರೆ. ಎಲ್ಲರೂ ಸ್ಫೋಟಕ ಬ್ಯಾಟ್ಸ್​ಮನ್​ಗಳೇ. ಭಾರತ ಆಡಿರುವ ನಾಲ್ಕು ಪಂದ್ಯಗಳಲ್ಲಿ ತಲಾ ಮೂರಲ್ಲಿ ಇವರು ಕ್ಲಿಕ್ ಆಗಿದ್ದಾರೆ. ಟೀಂ ಇಂಡಿಯಾ ಫೈನಲ್​ಗೇರಲು ಈ ತ್ರಿಮೂರ್ತಿಗಳ ಬ್ಯಾಟಿಂಗ್ ಕಾರಣ. ಆ ಮಟ್ಟಕ್ಕೆ ರನ್ ಹೊಳೆ ಹರಿಸಿದ್ದಾರೆ.

ಈ ಸಲದ ಚಾಂಪಿಯನ್ಸ್​ ಟ್ರೋಫಿಯಲ್ಲಿ ಈ ಮೂವರು ಸಾಧನೆ ಹೀಗಿದೆ. ಶಿಖರ್ ಧವನ್ 4 ಪಂದ್ಯಗಳಲ್ಲಿ 79.25ರ ಸರಾಸರಿಯಲ್ಲಿ 317 ರನ್ ಹೊಡೆದಿದ್ದಾರೆ. 102.25ರ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟಿಂಗ್ ಮಾಡಿ ಒಂದು ಶತಕ, 2 ಅರ್ಧಶತಕ ದಾಖಲಿಸಿದ್ದಾರೆ. ಇನ್ನು ರೋಹಿತ್ ಶರ್ಮಾ 101.25ರ ಸರಾಸರಿಯಲ್ಲಿ 304 ರನ್ ಬಾರಿಸಿದ್ದಾರೆ. 87.60ರ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟ್ ಬೀಸಿ ಒಂದು ಸೆಂಚುರಿ, ಎರಡು ಹಾಫ್ ಸೆಂಚುರಿ ಹೊಡೆದಿದ್ದಾರೆ. ನಾಯಕ ವಿರಾಟ್ ಕೊಹ್ಲಿ 253.00ರ ಸರಾಸರಿಯಲ್ಲಿ 253 ರನ್ ಸಿಡಿಸಿದ್ದಾರೆ. 100.39ರ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟಿಂಗ್ ಮಾಡಿರುವ ವಿರಾಟ್, ಮೂರು ಅರ್ಧಶತಕ ದಾಖಲಿಸಿದ್ದಾರೆ.

ತ್ರಿವಳಿಗಳಲ್ಲಿ ಯಾರಿಗೆ ಗೋಲ್ಡನ್ ಬ್ಯಾಟ್..?

ಈಗ ಈ ತ್ರಿಮೂರ್ತಿಗಳಲ್ಲಿ ಗೋಲ್ಡನ್ ಬ್ಯಾಟ್ ಯಾರಿಗೆ ಸಿಗುತ್ತೆ ಅನ್ನೋ ಕುತೂಹಲ ಕ್ರಿಕೆಟ್ ಅಭಿಮಾನಿಗಳಲ್ಲಿ ಇದೆ. ಮೂವರು ಒಳ್ಳೆ ಫಾರ್ಮ್​ನಲ್ಲಿದ್ದಾರೆ. ಪಾಕಿಸ್ತಾನ ವಿರುದ್ಧ ಅದ್ಭುತ ಟ್ರ್ಯಾಕ್ ರೆಕಾರ್ಡ್​ ಹೊಂದಿದ್ದಾರೆ. ಹೀಗಾಗಿಯೇ ಯಾರಿಗೆ ಗೋಲ್ಡನ್ ಬ್ಯಾಟ್​ ಸಿಗುತ್ತೆ ಅನ್ನೋದನ್ನ ಹೇಳೋದು ಕಷ್ಟ.  ಪಾಕಿಸ್ತಾನ ವಿರುದ್ಧ ಪಂದ್ಯ ಯಾರು ಗೆಲ್ಲಿಸಿಕೊಡ್ತಾರೋ ಅವರೇ ಹೀರೋ. ಅವರಿಗೆ ಈ ಗೋಲ್ಡನ್ ಬ್ಯಾಟ್​.