
ಅಹಮದಾಬಾದ್[ಜ.05]: ತಾಯಿಯಿಂದ ಬೇರೆಯಾದ ಚಿರತೆ ಮರಿಗೆ ಸಿಂಹಿಣಿಯು ಹಾಲುಣಿಸುತ್ತಿರುವ ಅಪರೂಪದ ಪ್ರಸಂಗ ಗುಜರಾತ್ನ ಗಿರ್ ಅರಣ್ಯದಲ್ಲಿ ನಡೆದಿದೆ. ಈ ಸಿಂಹಿಣಿಗೆ ಮೊದಲೇ ಎರಡು ಮರಿಗಳು ಇದ್ದವು. ಅದು ತನ್ನ ಮರಿಗಳ ಜತೆಗೆ ಚಿರತೆ ಮರೆಗೂ ಹಾಲುಣಿಸುತ್ತಿರುವುದನ್ನು ಪಶ್ಚಿಮ ಗಿರ್ ಅರಣ್ಯ ಸಿಬ್ಬಂದಿ ಗಮನಿಸಿದ್ದಾರೆ. ಇಷ್ಟೇ ಅಲ್ಲದೆ, ಬೇರೆ ಸಿಂಹಗಳು ಬಂದು ಚಿರತೆ ಮರಿಯನ್ನು ಬೇಟೆಯಾಡಬಹುದು ಎಂಬ ಆತಂಕದಿಂದ ಕಣ್ಗಾವಲನ್ನೂ ಇರಿಸಿದೆ ಎಂದು ಪಶ್ಚಿಮ ಗಿರ್ ಅರಣ್ಯ ವಿಬಾಗದ ಉಪ ಅರಣ್ಯ ಸಂರಕ್ಷಕ ಧೀರಜ್ ಮಿತ್ತಲ್ ಹೇಳಿದ್ದಾರೆ.
6 ದಿನಗಳ ಹಿಂದೆಯೇ ಅರಣ್ಯ ಸಿಬ್ಬಂದಿಗಳು ಇದನ್ನು ನೋಡಿದ್ದಾರೆ. ಈ ಕುರಿತಾದ ಚಿತ್ರಗಳನ್ನು ಹಾಗೂ ವಿಡಿಯೋಗಳನ್ನು ಮಿತ್ತಲ್ ಅವರು ಹಂಚಿಕೊಂಡಿದ್ದು, ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿವೆ. ಚಿತ್ರಗಳನ್ನು ಗಮನಿಸಿದಾಗ ಚಿರತೆ ಮರಿ ನಿರಾಳವಾಗಿರುವುದು ಕಂಡುಬರುತ್ತದೆ.
‘ಇದು ಅಪರೂಪದ ಪ್ರಸಂಗ. ಸಿಂಹಗಳು ಸಾಮಾನ್ಯವಾಗಿ ಚಿರತೆಗಳನ್ನು ಕೊಲ್ಲುತ್ತವೆ. ಆದರೆ ಇಲ್ಲಿ ಇದಕ್ಕೆ ತದ್ವಿರುದ್ಧ ಪ್ರಸಂಗ ನಡೆದಿದೆ. ಸಿಂಹಿಣಿಯು ಚಿರತೆ ಮರಿಗೆ ಹಾಲುಣಿಸಿ ಅದರ ಮೇಲೆ ಯಾವ ಪ್ರಾಣಿಗಳೂ ದಾಳಿ ಮಾಡದಂತೆ ಕಣ್ಗಾವಲು ಇಟ್ಟಿದೆ. ಚಿರತೆ ಮರಿ ಕೂಡ ಇದಕ್ಕೆ ಸ್ಪಂದಿಸುತ್ತಿದ್ದು ಸಿಂಹಿಣಿಯ ಸಂಜ್ಞೆ ಹಾಗೂ ಧ್ವನಿಗಳನ್ನು ಅರ್ಥ ಮಾಡಿಕೊಳ್ಳುತ್ತಿದೆ’ ಎಂದು ಹೇಳಿದರು.
ಈ ಚಿರತೆ ಮರಿ ಆಕಸ್ಮಿಕವಾಗಿ ತಾಯಿ ಚಿರತೆಯಿಂದ ಬೇರ್ಪಟ್ಟಿರಬಹುದು. ಇಷ್ಟೇ ಅಲ್ಲ, ಸಿಂಹಿಣಿಯೊಂದಿಗೆ ತನ್ನ ಮರಿ ಇರುವುದನ್ನು ನೋಡಿ ಹತ್ತಿರ ಹೋಗಲು ಭಯಪಡುತ್ತಿರಬಹುದು ಎಂದೂ ಅವರು ಹೇಳಿದರು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ