ರಾಜ್ಯದ ಶೂಟರ್'ಗಳಿಗೆ ಹೊಸ ಆಶಾಕಿರಣ: ಬೆಂಗಳೂರಿನಲ್ಲೇ ನಿರ್ಮಾಣವಾಗಲಿದೆ ಶೂಟಿಂಗ್ ರೇಂಜ್

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಬೇಕು, ಒಲಿಂಪಿಕ್ಸ್​'ನಲ್ಲಿ ದೇಶವನ್ನು ಪ್ರತಿನಿಧಿಸಬೇಕು ಎಂಬ ಕನಸು ಹೊತ್ತಿರುವ ರಾಜ್ಯದ ಶೂಟರ್​ಗಳಿಗೆ ಸಂತಸದ ಸುದ್ದಿಯೊಂದು ಇಲ್ಲಿದೆ. ರಾಜ್ಯದ ಶೂಟಿಂಗ್​ ಕ್ರೀಡಾಪಟುಗಳಿಗಾಗಿ ಅಂತಾರಾಷ್ಟ್ರೀಯ ದರ್ಜೆಯ ಶೂಟಿಂಗ್​ ರೇಂಜ್​ ಬೆಂಗಳೂರಿನಲ್ಲಿ ನಿರ್ಮಾಣವಾಗಲಿದೆ. ಮುಂದಿನ ಬಜೆಟ್​ನಲ್ಲಿ ಇದನ್ನು ಘೋಷಣೆ ಮಾಡಲು ರಾಜ್ಯ ಸರ್ಕಾರ ಚಿಂತಿಸಿದೆ.

ಬೆಂಗಳೂರು(ಡಿ. 31): ಕರ್ನಾಟಕದ ಶೂಟಿಂಗ್​ ಕ್ರೀಡಾಪಟುಗಳು ಶೂಟಿಂಗ್​ ಅಭ್ಯಾಸಕ್ಕಾಗಿ ಇನ್ನು ಮುಂದೆ ಚಿಂತಿಸುವ ಅಗತ್ಯವಿಲ್ಲ. ಶೂಟರ್'​ಗಳಿಗಾಗಿ ರಾಜ್ಯ ಸರ್ಕಾರವೇ ಶೂಟಿಂಗ್​ ರೇಂಜ್​ ನಿರ್ಮಿಸಲು ಮುಂದಾಗಿದೆ. ಶೂಟಿಂಗ್​ ರೇಂಜ್​ ಅಂದ್ರೆ ರೈಫಲ್​ ಶೂಟಿಂಗ್​ ಅಭ್ಯಾಸಕ್ಕೆ ಬೇಕಾದ ಒಂದು ಅತ್ಯಾಧುನಿಕ ವ್ಯವಸ್ಥೆ. ಆದ್ರೆ ಈವರೆಗೆ ಇಡೀ ರಾಜ್ಯದಲ್ಲಿ ಎಲ್ಲೂ ರಾಜ್ಯದ ಶೂಟಿಂಗ್​ ಕ್ರೀಡಾಪಟುಗಳಿಗಾಗಿ ಶೂಟಿಂಗ್​ ರೇಂಜ್​ ಇರಲಿಲ್ಲ. ಹೀಗಾಗಿ ಈಗ ರಾಜ್ಯ ಸರ್ಕಾರ ಶೂಟಿಂಗ್​ ರೇಂಜ್​ ಸ್ಥಾಪನೆಗೆ ಚಿಂತನೆ ನಡೆಸಿದೆ. ಅಂದಾಜು ಸುಮಾರು 10 ಕೋಟಿ ರೂ. ವೆಚ್ಚದಲ್ಲಿ  ಬೆಂಗಳೂರಿನಲ್ಲೇ ಈ ರೇಂಜ್​ ಸ್ಥಾಪನೆಯಾಗಲಿದ್ದು, ಮುಂದಿನ ಫೆಬ್ರವರಿಯಲ್ಲಿ ಮಂಡನೆಯಾಗಲಿರುವ ರಾಜ್ಯ ಬಜೆಟ್​ನಲ್ಲಿ ಘೋಷಣೆಯಾಗುವ ಸಾಧ್ಯತೆಯಿದೆ.

ಅಸಲಿಗೆ ರಾಜ್ಯದಲ್ಲಿ ಇಂತಹದೊಂದು ಶೂಟಿಂಗ್​ ರೇಂಜ್​ನ ಅವಶ್ಯಕತೆ ಇದೆ ಎಂಬುದು ಕೂಡಾ ರಾಜ್ಯ ಸರ್ಕಾರದ ಗಮನದಲ್ಲೇ ಇರಲಿಲ್ಲ. ಇತ್ತೀಚೆಗೆ ವಿಕಾಸಸೌಧದಲ್ಲಿ ನಡೆದ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ಜನ ಮನ ಸಂವಾದ ಕಾರ್ಯಕ್ರಮದಲ್ಲಿ  ರಾಷ್ಟ್ರೀಯ ಮಟ್ಟದ ಶೂಟರ್​ ಒಬ್ಬರು ಈ ಕೊರತೆಯ ಬಗ್ಗೆ ರಾಜ್ಯ ಸರ್ಕಾರದ ಗಮನ ಸೆಳೆದಿದ್ದರು. ಈ ಬೇಡಿಕೆಗೆ ತಕ್ಷಣ ಸ್ಪಂದಿಸಿರುವ ಕ್ರೀಡಾ ಸಚಿವರು ಕೂಡಲೇ ಕ್ರಿಯಾ ಯೋಜನೆ ಸಿದ್ದಪಡಿಸಲು ಇಲಾಖೆಯ ಅಧಿಕಾರಿಗಳಿಗೆ ನಿರ್ದೇಶಿಸಿದ್ದಾರೆ. ಆದ್ರೆ ಅಂತಾರಾಷ್ಟ್ರೀಯ ಮಟ್ಟದ ಸೌಲಭ್ಯ ರಾಜ್ಯದ ಶೂಟರ್​ಗಳಿಗೂ ಲಭಿಸಬೇಕಾದ್ರೆ ರಾಜ್ಯದಲ್ಲೇ ಸುಸಜ್ಜಿತ ರೇಂಜ್​ನ ಅಗತ್ಯತೆಯಿದೆ.

ಸದ್ಯ ರಾಜ್ಯದ ಶೂಟಿಂಗ್​ ಕ್ರೀಡಾಪಟುಗಳೆಲ್ಲರೂ ಬೆಂಗಳೂರಿನ ಕೆಂಗೇರಿಯಲ್ಲಿರುವ ಭಾರತೀಯ ಕ್ರೀಡಾ ಪ್ರಾಧಿಕಾರದ ನಿರ್ವಹಣೆಯಲ್ಲಿರುವ ಜಗದಾಳೆ ಶೂಟಿಂಗ್​ ರೇಂಜ್'​ನಲ್ಲಿ ಅಭ್ಯಾಸ ಮಾಡುತ್ತಿದ್ದಾರೆ. ಅಲ್ಲದೇ ಶೂಟಿಂಗ್​ ಸಂಬಂಧಿತ ಅಭ್ಯಾಸ, ಸ್ಫರ್ಧೆಗಳು ಸದ್ಯ ಜಗದಾಳೆ ಶೂಟಿಂಗ್​ ರೇಂಜ್​'ನಲ್ಲೇ ನಡೆಯುತ್ತಿವೆ. ಆದ್ರೆ ನಾವು ಕೂಡಾ ಒಲಿಂಪಿಕ್ಸ್​'ನಲ್ಲಿ ಪದಕ ಗೆಲ್ಲಬೇಕಾದ್ರೆ ನಮಗೂ ಸುಸಜ್ಜಿತ ಶೂಟಿಂಗ್​ ರೇಂಜ್​ ಬೇಕು ಅನ್ನೋದು ಕ್ರೀಡಾಳುಗಳ ಬೇಡಿಕೆಯಾಗಿದೆ. ಅದಕ್ಕೆ ತಕ್ಕಂತೆ ರಾಜ್ಯ ಸರ್ಕಾರವೂ ಸ್ಪಂದಿಸಿದ್ರೆ ಒಲಿಂಪಿಕ್ಸ್​'ನಲ್ಲಿ ರಾಜ್ಯದ ಶೂಟರ್'​ಗಳನ್ನೂ ಕಾಣಬಹುದು.

- ಕಿರಣ್​ ಹನಿಯಡ್ಕ, ಪೊಲಿಟಿಕಲ್​ ಬ್ಯೂರೋ, ಸುವರ್ಣ ನ್ಯೂಸ್​