ಅಮೆರಿಕಾಗೆ ನುಸುಳುವ ವೇಳೆ ತಂದೆ, ಮಗಳ ಸಾವು!: ಫೋಟೋ ವೈರಲ್
ಸಾರಾಂಶ
ಅಕ್ರಮವಾಗಿ ಅಮೆರಿಕ ಪ್ರವೇಶ ಯತ್ನ ವೇಳೆ ತಂದೆ, ಮಗಳ ಸಾವು| ಜಾಗತಿಕ ಮಟ್ಟದಲ್ಲಿ ವೈರಲ್ ಆಯ್ತು ಫೋಟೋ
ಸಿಯುದಾದ್ ವಿಕ್ಟೋರಿಯಾ[ಜೂ.27]: ಮೆಕ್ಸಿಕೋದಿಂದ ರಿಯೋ ಗ್ರಾಂಡೆ ನದಿ ಮೂಲಕ ಅಮೆರಿಕವನ್ನು ಅಕ್ರಮವಾಗಿ ಪ್ರವೇಶಿಸಲು ಯತ್ನಿಸಿದ ಸಾಲ್ವೆಡರ್ ದೇಶದ ವ್ಯಕ್ತಿಯೊಬ್ಬ ತನ್ನ 2 ವರ್ಷದ ಪುತ್ರಿ ಜೊತೆ ನೀರಿನಲ್ಲಿ ಕೊಚ್ಚಿ ಹೋಗಿ ಸಾವನ್ನಪ್ಪಿದ್ದಾನೆ. ಇಬ್ಬರ ಶವಗಳು ಬುಧವಾರ ನದಿ ತೀರದಲ್ಲಿ ಪತ್ತೆಯಾಗಿದೆ.
ಮಗಳನ್ನು ಬೆನ್ನಿಗೆ ಕಟ್ಟಿಕೊಂಡು ನದಿ ದಾಟುವಾಗಲೇ ದುರ್ಘಟನೆ ನಡೆದು, ಅದೇ ಸ್ಥಿತಿಯಲ್ಲಿ ತಂದೆ ಮತ್ತು ಮಗಳು ಶವವಾಗಿ ಪತ್ತೆಯಾಗಿದ್ದು, ಈ ಫೋಟೋ ಜಾಗತಿಕ ಮಟ್ಟದಲ್ಲಿ ವೈರಲ್ ಆಗಿದೆ. ಸಾಲ್ವೆಡರ್ ಪ್ರಜೆಯಾದ ಆಸ್ಕರ್ ಮಾರ್ಟಿನೆಜ್ ರಾಮಿರೆಜ್(25) ಅವರು ತಮ್ಮ 21 ವರ್ಷದ ಪತ್ನಿ ಹಾಗೂ 2 ವರ್ಷದ ಹೆಣ್ಣು ಮಗುವಿನೊಂದಿಗೆ ಭಾನುವಾರವೇ ಮೆಕ್ಸಿಕೋದ ರಿಯೋ ಗ್ರಾಂಡೆ ನದಿಯನ್ನು ಈಜಿಕೊಂಡು ಅಮೆರಿಕ ಪ್ರವೇಶಿಸಲು ಮುಂದಾಗಿದ್ದ.
ಇದಕ್ಕಾಗಿ ಮಗಳನ್ನು ಟೀಶರ್ಟ್ ಒಳಗೆ ಹಾಕಿ ಬೆನ್ನ ಹಿಂದೆ ಕಟ್ಟಿಕೊಂಡು ಸುರಕ್ಷಿತವಾಗಿ ನದಿ ದಾಟಲು ನಿರ್ಧರಿಸಿದ್ದ. ಆದರೆ, ನದಿಯ ಮಧ್ಯಭಾಗದಲ್ಲಿ ಪ್ರವಾಹಕ್ಕೆ ಸಿಲುಕಿ ಪತಿ-ಪತ್ನಿಯರು ಪ್ರತ್ಯೇಕಗೊಂಡಿದ್ದು, ಪತ್ನಿ ಈಜಿಕೊಂಡು ದಡ ಸೇರಿದ್ದಾಳೆ. ಆದರೆ, ಪತಿ ಮತ್ತು ಮಗಳ ಮೃತದೇಹಗಳು ಸೋಮವಾರ ಟಾಮಲಿಪಸ್ ರಾಜ್ಯದಲ್ಲಿರುವ ಮಟಮೊರೊಸ್ ಎಂಬಲ್ಲಿ ಪತ್ತೆಯಾಗಿವೆ.
ಎರಡು ವರ್ಷಗಳ ಹಿಂದೆ ಸಿರಿಯಾ ದೇಶ 5 ವರ್ಷ ಪುಟ್ಟಬಾಲಕಿಯೊಬ್ಬಳು ಕೂಡಾ ಹೀಗೆ ಸಮುದ್ರ ತೀರದಲ್ಲಿ ಶವವಾಗಿ ಪತ್ತೆಯಾಗಿದ್ದಳು. ಅದು ಕೂಡಾ ಭಾರೀ ಸುದ್ದಿಯಾಗಿತ್ತು.
ಕರ್ನಾಟಕ, ಭಾರತ (India News) ಮತ್ತು ಜಗತ್ತಿನ ಕ್ಷಣಕ್ಷಣದ ಕನ್ನಡ ಸುದ್ದಿ (Kannada News) ಅಪ್ಡೇಟ್ಗಳಿಗಾಗಿ ಏಷ್ಯಾನೆಟ್ ಸುವರ್ಣ ನ್ಯೂಸ್ ಫಾಲೋ ಮಾಡಿ. ಬ್ರೇಕಿಂಗ್ ಸುದ್ದಿ (Latest Kannada News), ವಿಶೇಷ ವರದಿಗಳು ಮತ್ತು ನೇರ ಪ್ರಸಾರಗಳೊಂದಿಗೆ (kannada news live) ಸಂಪೂರ್ಣ ಮಾಹಿತಿ ಒಂದೇ ಕ್ಲಿಕ್ನಲ್ಲಿ ಲಭ್ಯ. ಏಷ್ಯಾನೆಟ್ ಸುವರ್ಣ ನ್ಯೂಸ್ ಅಧಿಕೃತ ಆ್ಯಪ್ ಡೌನ್ಲೋಡ್ ಮಾಡಿ ಹಾಗು ಎಲ್ಲಾ ಅಪ್ಡೇಟ್ ಗಳನ್ನು ಪಡೆಯಿರಿ.