ಪ್ರಜ್ವಲ್ ವಿರುದ್ಧ ಶಿಸ್ತು'ಕ್ರಮಕ್ಕೆ ಮುಂದಾದ ಗೌಡರು : ಹಾಸನ ಟಿಕೆಟ್ ಬಗ್ಗೆ ಮಾಜಿ ಪ್ರಧಾನಿ ಸುಳಿವು

ಇಂತಹ ಹೇಳಿಕೆಗಳನ್ನು ನೀಡಿದರೆ ಟಿಕೆಟ್​ ಸಿಗುತ್ತಾ? ಪ್ರಜ್ವಲ್​ ಹಿಂದೆ ಮುಂದೆ ಓಡಾಡಿಕೊಂಡಿರುವವರು ಸರಿ ಇಲ್ಲ. ಅವರಿಗೆ ಬೇರೆ ಉದ್ದೇಶ ಇದ್ದಂತೆ ಇದೆ.ನಮ್ಮ ಕುಟುಂಬದಿಂದ ಭವಾನಿ, ಅನಿತಾ ರಾಜಕೀಯಕ್ಕೆ ಇಳಿದಿದ್ದಾರೆ. ನಮ್ಮ ಕುಟುಂಬದ ಉಳಿದ ಹೆಣ್ಣುಮಕ್ಕಳು ರಾಜಕೀಯಕ್ಕೆ ಬರಲ್ಲ.

ಬೆಂಗಳೂರು(ಜು.07): ಪಕ್ಷದ ಬಗ್ಗೆ ಭಿನ್ನಾಭಿಪ್ರಯ ವ್ಯಕ್ತಪಡಿಸಿದ ಹೆಚ್.ಡಿ.ರೇವಣ್ಣ ಅವರ ಪುತ್ರ ಪ್ರಜ್ವಲ್ ರೇವಣ್ಣ ವಿರುದ್ಧ ಜೆಡಿಎಸ್ ವರಿಷ್ಠರಾದ ದೇವೇಗೌಡರು ಶಿಸ್ತುಕ್ರಮಕ್ಕೆ ಮುಂದಾಗಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ರೇವಣ್ಣ ಈಗಾಗಲೇ ಪ್ರಜ್ವಲ್ ಬಗ್ಗೆ ಮಾತನಾಡಿ, ಗಂಭೀರವಾಗಿ ಪರಿಗಣಿಸಬೇಡಿ ಎಂದು ಹೇಳಿದ್ದಾರೆ.ಹುಣಸೂರು ಸ್ಪರ್ಧೆ ಬಗ್ಗೆ ಪ್ರಜ್ವಲ್​ ಹೇಳಿಕೆ ವಿವಾದವಾಗಿದೆ. ಆವೇಶದ ಮಾತುಗಳು ಅವನ ಮುಂದಿನ ನಡೆಗೆ ತೊಂದರೆಯಾಗುತ್ತದೆ.ಟಿಕೆಟ್​ ವಿಚಾರವಾಗಿ ಅಂತಿಮ ತೀರ್ಮಾನ ನನ್ನದೇ.ನಮ್ಮ ಕುಟುಂಬದಲ್ಲಿ ಯಾವುದೇ ಭಿನ್ನಮತವಿಲ್ಲ. ಕುಟುಂಬದಿಂದ ಪಕ್ಷ ಹೊಡೆಯಲು ಬಿಡಲ್ಲ.ಪ್ರಜ್ವಲ್'​ಗೆ ರಾಜಕೀಯದಲ್ಲಿ ಬೆಳೆಯುವ ಆಸೆಯಿದೆ. ಹೀಗೆ ಮಾತನಾಡುತ್ತಿದ್ದರೆ ಅವನ ಭವಿಷ್ಯಕ್ಕೆ ತೊಂದರೆಯಾಗುತ್ತದೆ' ಎಂದು ಮೊಮ್ಮಗನ ಹೇಳಿಕೆಯ ಬಗ್ಗೆ ಎಚ್ಚರಿಕೆ ನೀಡಿದರು.

ಇಂತಹ ಹೇಳಿಕೆಗಳನ್ನು ನೀಡಿದರೆ ಟಿಕೆಟ್​ ಸಿಗುತ್ತಾ? ಪ್ರಜ್ವಲ್​ ಹಿಂದೆ ಮುಂದೆ ಓಡಾಡಿಕೊಂಡಿರುವವರು ಸರಿ ಇಲ್ಲ. ಅವರಿಗೆ ಬೇರೆ ಉದ್ದೇಶ ಇದ್ದಂತೆ ಇದೆ.ನಮ್ಮ ಕುಟುಂಬದಿಂದ ಭವಾನಿ, ಅನಿತಾ ರಾಜಕೀಯಕ್ಕೆ ಇಳಿದಿದ್ದಾರೆ. ನಮ್ಮ ಕುಟುಂಬದ ಉಳಿದ ಹೆಣ್ಣುಮಕ್ಕಳು ರಾಜಕೀಯಕ್ಕೆ ಬರಲ್ಲ. ಪ್ರಜ್ವಲ್​ ಹೇಳಿದ ಸೂಟ್​ಕೇಸ್​ ಮಾತು ಜೀರ್ಣಿಸಿಕೊಳ್ಳಲು ಆಗುತ್ತಿಲ್ಲ. ಶಿಸ್ತು ಇಲ್ಲ ಅಂದ್ರೆ ಮಗ ಆದರೇನು? ಮೊಮ್ಮಗ ಆದರೇನು? ಶಿಸ್ತು ಕ್ರಮ ಕೈಗೊಳ್ಳಲು ನಾನು ಹಿಂದೆ ಮುಂದೆ ನೋಡಲ್ಲ. ನನ್ನ ಜೀವನದಲ್ಲಿ ಸೂಟ್​ಕೇಸ್​ ರಾಜಕಾರಣ ಮಾಡಿಲ್ಲ. ಪ್ರಜ್ವಲ್​ ತನ್ನ ತಪ್ಪನ್ನು ತಿದ್ದಿಕೊಳ್ಳಲು ಅವಕಾಶ ಕೊಡುತ್ತೇನೆ. ಪ್ರಜ್ವಲ್​ ಮಾತು ನನ್ನ ಮನಸ್ಸಿಗೆ ತುಂಬಾ ನೋವು ತಂದಿದೆ.ಪಕ್ಷದಲ್ಲಿ ಶಿಸ್ತು ಮುಖ್ಯ. ಆವೇಶದಲ್ಲಿ ಮಾತನಾಡಿದರೇ ಏನೂ ನಡೆಯಲ್ಲ. ಇಂತಹದ್ದನ್ನೆಲ್ಲಾ ನಾನು ತುಂಬಾ ನೋಡಿ ಬಿಟ್ಟಿದ್ದೇನೆ' ಎಂದು ಆಕ್ರೋಶ ವ್ಯಕ್ತಪಡಿಸಿದರು.

4 ಜನದಿಂದ ದಾರಿ ತಪ್ಪುತ್ತಿದ್ದಾನೆ

ಪಕ್ಷದ ವರಿಷ್ಠನಾಗಿ ಕ್ರಮ ಕೈಗೊಳ್ಳದಿದ್ದರೆ ತಪ್ಪಾಗುತ್ತೆ. ಪ್ರಜ್ವಲ್​ಗೆ ಮೊದಲು ಬೇಲೂರಿನಿಂದ ಸ್ಪರ್ಧಿಸಲು ಇಷ್ಟವಿತ್ತು. ಆಗಲ್ಲವೆಂದಿದಕ್ಕೆ ಹುಣಸೂರಿಗೆ ಹೋಗಿದ್ದಾನೆ.ಶಿಸ್ತು ಕ್ರಮ ಏನು ಅಂತ ಕಾದು ನೋಡಿ. ಕಾರ್ಯಕರ್ತರು ಹೇಳಿದ ಕೂಡಲೇ ಸ್ಪರ್ಧೆ ಮಾಡಲು ಆಗುತ್ತಾ? ಯಾವುದೋ ಕೆಟ್ಟಗಳಿಗೆ ಅಷ್ಟೇ, ಪ್ರಜ್ವಲ್​ ಜೊತೆ ಇರುವ 3-4 ಜನ ಅವನ ದಾರಿ ತಪ್ಪಿಸುತ್ತಿದ್ದಾರೆ. ನನಗೆ ಲೋಕಸಭೆ ಚುನಾವಣೆಗೆ ಸ್ಪರ್ಧಿಸಲು ಶಕ್ತಿ ಇಲ್ಲ. ಅಲ್ಲಿ ಯಾರು ಇಲ್ಲ ಅನ್ನೋ ಕೊರತೆ ಕಾಡ್ತಿದೆ, ಯಾರೂ ಕೂಡ ಇಲ್ಲ. ಪರೋಕ್ಷವಾಗಿ ಪ್ರಜ್ವಲ್​ಗೆ ಹಾಸನ್​ ಎಂಪಿ ಟಿಕೆಟ್​ ಸಾಧ್ಯತೆಯ ಸುಳಿವು ನೀಡಿದರು.

ರಾಜಕೀಯ ಅಂದ್ರೆ ಮಕ್ಕಳಾಟವಲ್ಲ. ಒಂದು ಕ್ಷೇತ್ರ ಆಯ್ಕೆ ಮಾಡೋದು ಎಷ್ಟು ಕಷ್ಟ ಅಂತ ಗೊತ್ತಿದೆ. ಕೇಳಿದವರಿಗೆಲ್ಲ ಕೇಳಿದ ಕಡೆ ಟಿಕೆಟ್​ ಕೊಡಲು ಆಗುತ್ತಾ? ಪಕ್ಷ ಉಳಿಸೋದು ಮತ್ತೆ ಅಧಿಕಾರಕ್ಕೆ ತರುವುದು ನನ್ನ ಉದ್ದೇಶ' ಎಂದು ತಮ್ಮ ಮುಂದಿನ ನಡೆಯನ್ನು ಬಿಚ್ಚಿಟ್ಟರು.