ಕಾವೇರಿ ಕೊಳ್ಳ ಭಾಗಗಳಿಗೆ ಕೇಂದ್ರ ತಾಂತ್ರಿಕ ತಂಡ ಭೇಟಿ

ಮಂಡ್ಯ(ಅ. 07): ಕಾವೇರಿ ಕೊಳ್ಳದ ಪ್ರದೇಶಗಳಿಗೆ ಕೇಂದ್ರದ ತಾಂತ್ರಿಕ ತಂಡ ಭೇಟಿ ಕೊಟ್ಟು ಪರಿಸ್ಥಿತಿಯನ್ನ ಅವಲೋಕಿಸಿದೆ. ಬೆಳಗ್ಗೆ ಬೆಂಗಳೂರಿಂದ ಮದ್ದೂರಿಗೆ ಹೆಲಿಕಾಪ್ಟರ್’​​ನಲ್ಲಿ ಬಂದಿಳಿದ ಸಿಡಬ್ಲ್ಯೂಸಿ ಅಧ್ಯಕ್ಷ ಜಿ.ಎಸ್.ಝಾ ನೇತೃತ್ವದ ತಂಡ ಬರಿದಾದ ಕೊಳ್ಳ, ಕಾಲುವೆ, ಬೆಳೆ ಹಾಗೂ ಜಲಕ್ಷಾಮದ ಸಾಕ್ಷಾತ್ ಕಂಡಿದ್ದಾರೆ. ಬೆಳಗ್ಗೆ ವಿಧಾನಸೌಧದಿಂದ ತೆರಳಿದ ತಂಡ ವಾಸ್ತವ ಸ್ಥಿತಿಯನ್ನ ಅರಿಯುವ ನಿಟ್ಟಿನಲ್ಲಿ ಮಂಡ್ಯ ಜಿಲ್ಲೆಯ ಸುತ್ತಲಿನ ಗ್ರಾಮಗಳಿಗೆ ಭೇಟಿ ನೀಡಿತು. ಮಂಡ್ಯ-ಮದ್ದೂರು ಸುತ್ತಲಿನ ಪ್ರದೇಶಗಳ ವೀಕ್ಷಣೆ ಬಳಿಕ ಮಾತಾಡಿದ ಜಿ.ಎಸ್.ಝಾ, ವಸ್ತುಸ್ಥಿತಿಗೆ ಅನುಗುಣವಾಗಿ ಸುಪ್ರೀಂಕೋರ್ಟ್​’ಗೆ ವರದಿ ಸಲ್ಲಿಸುವುದಾಗಿ ಹೇಳಿದರು.

ಬೆಳಗ್ಗೆ ಮತ್ತು ಮಧ್ಯಾಹ್ನ ದೊಡ್ಡರಸಿನಕೆರೆ, ಮಾದರಹಳ್ಳಿಕೆರೆ, ಮಳವಳ್ಳಿ ತಾಲೂಕಿನ ಶೆಟ್ಟಹಳ್ಳಿ, ಕಿರುಗಾವಲು, ಮಳವಳ್ಳಿಕೆರೆ ಅಚ್ಚುಕಟ್ಟು ಪ್ರದೇಶಕ್ಕೆ ಕೇಂದ್ರದ ತಂಡ ಭೇಟಿ ನೀಡಿತು. ಸಂಜೆ 6 ಗಂಟೆ ಬಳಿಕ ಕೆಆರ್​​ಎಸ್​ ಡ್ಯಾಮಿನ ಕಡೆಗೆ ಅಧ್ಯಯನ ತಂಡ ತೆರಳಿ ನೀರಿನ ಮಟ್ಟ ಹಾಗೂ ಒಳಹರಿವು ಹಾಗೂ ಹೊರಹರಿವನ್ನ ಪರಿಶೀಲಿಸಿತು. ಇನ್ನು, ಬೆಳಗ್ಗೆ ವಿಧಾನಸೌಧದಲ್ಲಿ ತಾಂತ್ರಿಕ ತಂಡವನ್ನ ರಾಜ್ಯ ಜಲಸಂಪನ್ಮೂಲ ಸಚಿವ ಎಂ.ಬಿ. ಪಾಟೀಲ್ ಭೇಟಿಯಾಗಿದರು. ಈ ಸಂದರ್ಭದಲ್ಲಿ ರಾಜ್ಯದ ನೀರಿನ ಕೊರತೆಯನ್ನ ಸವಿವರವಾಗಿ ಮನವರಿಕೆ ಮಾಡಿಕೊಟ್ಟರು. ಅಲ್ಲದೇ, ಯಾವುದೇ ಕಾರಣಕ್ಕೂ ಮತ್ತೆ ಕಾವೇರಿ ನೀರು ಬಿಡುವಂತೆ ಹೇಳಬೇಡಿ ಎಂದೂ ಕೇಂದ್ರದ ಅಧ್ಯಯನ ತಂಡಕ್ಕೆ ಮನವಿ ಮಾಡಿದರೆನ್ನಲಾಗಿದೆ.

ರಮ್ಯಾ ಪ್ರತ್ಯಕ್ಷ.!
ಈ ಮಧ್ಯೆ, ಇಷ್ಟು ದಿನ ಕಾವೇರಿ ಹೋರಾಟದಲ್ಲಿ ಅಷ್ಟಾಗಿ ಕಾಣಿಸಿಕೊಳ್ಳದ ಮಾಜಿ ಸಂಸದೆ ರಮ್ಯಾ ಇವತ್ತು ಮದ್ದೂರಿನಲ್ಲಿ ದಿಢೀರ್ ಕಾಣಿಸಿಕೊಂಡ್ರು. ಕೇಂದ್ರ ತಾಂತ್ರಿಕ ತಂಡ ಭೇಟಿಯಾದ ಕಾಂಗ್ರೆಸ್​ ನಾಯಕಿ, ಜಿಲ್ಲೆಯ ವಾಸ್ತವ ಸ್ಥಿತಿಯ ವಿವರಣೆ ನೀಡಿದರು.

- ಬ್ಯೂರೋ ರಿಪೋರ್ಟ್, ಸುವರ್ಣ ನ್ಯೂಸ್​