ನೋಟಿಸ್'ಗೆ ಉತ್ತರಿಸಿದ ದರ್ಶನ್ ಕುಟುಂಬ ಹಾಗೂ ಶಾಮನೂರು : ಮುಂದೇನಾಗುತ್ತೆ ?

ಬೆಂಗಳೂರು(ಅ.5): ನಟ ದರ್ಶನ್​ ಮನೆ ಹಾಗೂ ಮಾಜಿ ಸಚಿವ ಶಾಮನೂರು ಶಿವಶಂಕರಪ್ಪ ಮಾಲೀಕತ್ವದ ಎಸ್​ ಎಸ್​ ಆಸ್ಪತ್ರೆಗೆ ಜಿಲ್ಲಾಧಿಕಾರಿಗಳು ನೀಡಿದ್ದ ನೋಟಿಸ್​ಗೆ ಪ್ರತಿಷ್ಠಿತರಿಂದ ಉತ್ತರ ಸಿಕ್ಕಿದೆ. ಸರ್ಕಾರಿ ಬಿ ಖರಾಬು ಭೂಮಿ ಒತ್ತುವರಿ ಮಾಡಿ ಬೆಂಗಳೂರಿನ ರಾಜರಾಜೇಶ್ವರಿನಗರದ ಐಡಿಯಲ್​ ಹೋಮ್ಸ್ನಲ್ಲಿ 84 ಸರ್ಕಾರಿ ನಿವೇಶನಗಳು ಒತ್ತುವರಿಯಾಗಿತ್ತು. ಈ ಸಂಬಂಧ ನಗರ ಜಿಲ್ಲಾಧಿಕಾರಿಗಳು ದಾಖಲೆ ಸಮೇತ ಉತ್ತರ ನೀಡುವಂತೆ ಇಂದಿಗೆ ಗಡುವು ನೀಡಿ ನೋಟಿಸ್​ ಜಾರಿ ಮಾಡಿದ್ದರು.  ಈ ನೋಟಿಸ್​ಗೆ   ಇಬ್ಬರು ಉತ್ತರ  ನೀಡಿದ್ದಾರೆ.

ಬಿಡಿಎ ಅನುಮೋದಿತ ಲೇಔಟ್​ನಲ್ಲಿ ಮನೆ ಹಾಗೂ ಆಸ್ಪತ್ರೆ ಇದೆ. ಹೀಗಾಗಿ ಎಲ್ಲ ದಾಖಲೆಗಳನ್ನು ಪರಿಶೀಲಿಸಿ ಸರ್ಕಾರಕ್ಕೆ ಪ್ರತಿ ವರ್ಷ ಕಂದಾಯ ಕಟ್ಟಿ ವಾಸವಿದ್ದೇವೆ ಎಂದು ಸ್ಪಷ್ಟನೆ ನೀಡಿದ್ದಾರೆ.   ತಪ್ಪು ನಮ್ಮದಲ್ಲ  ಎಂದು ಪರೋಕ್ಷವಾಗಿ ಬಿಡಿಎ ಕಡೆ ಬೊಟ್ಟು ಮಾಡಿದ್ದಾರೆ.

ನೋಟಿಸ್​ಗೆ ಉತ್ತರ ನೀಡಿರುವ ದರ್ಶನ್​ ಪತ್ನಿ ವಿಜಯಲಕ್ಷ್ಮೀ ಬಿಡಿಎ ಅನುಮೋದನೆ ನೀಡಿ ಕಟ್ಟಿರುವ ಕಟ್ಟಡವನ್ನು ಖರೀದಿಸಿದ್ದೇವೆ. ಹಾಗಾಗಿ ತಮ್ಮಿಂದ ಕಾನೂನು ಉಲ್ಲಂಘನೆಯಾಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ. ಇತ್ತ ಶ್ಯಾಮನೂರು ಶಿವಶಂಕರಪ್ಪ ಆಸ್ಪತ್ರೆ, ತಾವು ಸಾರ್ವಜನಿಕರ ಸೇವೆ ಮಾಡುತ್ತಿದ್ದು , ಜಿಲ್ಲಾಡಳಿತ ತೆರವಿನಿಂದ ಆಗುವ ಸಮಸ್ಯೆಯನ್ನು ಗಮನದಲ್ಲಿಟ್ಟುಕೊಟ್ಟು ಕ್ರಮ ಕೈಗೊಳ್ಳಿ ಎಂದು ಸ್ಪಷ್ಟನೆ ನೀಡಿದ್ದಾರೆ. ಈ ಬಗ್ಗೆ ಬೆಂಗಳೂರು ಜಿಲ್ಲಾಧಿಕಾರಿ ವಿ.ಶಂಕರ್ ಮಾತನಾಡಿ, ಕಾನೂನು ಪ್ರಕಾರ ಕ್ರಮ  ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.