ಉತ್ತರಕನ್ನಡ‌: ಕೆಸರಿನಲ್ಲಿ ಸಿಲುಕಿದ ಮತಯಂತ್ರಗಳನ್ನು ಸಾಗಿಸುತ್ತಿದ್ದ ಲಾರಿ

ಉತ್ತರ ಕನ್ನಡ ಜಿಲ್ಲೆಯ ಹಳಿಯಾಳ ಪಟ್ಟಣದ ಹವಗಿಯ ಸರಕಾರಿ ಪದವಿ ಕಾಲೇಜಿನ‌ ಭದ್ರತಾ ಕೊಠಡಿಯಿಂದ ಕುಮಟಾಕ್ಕೆ ಸಾಗಿಸುತ್ತಿದ್ದ ವೇಳೆ ನಡೆದ ಘಟನೆ. 

ಕಾರವಾರ(ಮೇ.11): ಮತಯಂತ್ರಗಳನ್ನು ಸಾಗಿಸುತ್ತಿದ್ದ ಕಂಟೈನರ್ ಲಾರಿ ಕೆಸರಿನಲ್ಲಿ ಹುದುಗಿದ ಘಟನೆ ಉತ್ತರಕನ್ನಡ‌ ಜಿಲ್ಲೆಯ ಹಳಿಯಾಳದಲ್ಲಿ ಇಂದು(ಗುರುವಾರ) ಬೆಳಗಿನ ಜಾವ ನಡೆದಿದೆ. ಹಳಿಯಾಳ ಪಟ್ಟಣದ ಹವಗಿಯ ಸರಕಾರಿ ಪದವಿ ಕಾಲೇಜಿನ‌ ಭದ್ರತಾ ಕೊಠಡಿಯಿಂದ ಕುಮಟಾಕ್ಕೆ ಸಾಗಿಸುತ್ತಿದ್ದ ವೇಳೆ ಈ ಘಟನೆ ಜರುಗಿದೆ. 

ಬೆಳಗ್ಗಿನ ಜಾವ 4 ಗಂಟೆಯ ಸುಮಾರಿಗೆ ಕಂಟೈನರ್ ಲಾರಿ ಕೆಸರಿನಲ್ಲಿ ಸಿಲುಕಿಕೊಂಡಿತ್ತು. ಭಾರೀ ಮಳೆ ಸುರಿದಿದ್ದ ಕಾರಣ ಕಾಲೇಜು ಮೈದಾನದ ಕೆಸರಿನಲ್ಲಿ ಮತಯಂತ್ರಗಳನ್ನು ಸಾಗಿಸುತ್ತಿದ್ದ ಲಾರಿ ಸಿಲುಕಿಕೊಂಡಿತ್ತು. 

ಜೆಸಿಬಿ ಮೂಲಕ ಸತತ 1.30 ಗಂಟೆಗಳ ಪ್ರಯತ್ನದ ಬಳಿಕ ಕಂಟೈನರ್ ಲಾರಿಯನ್ನು ಹೊರಗೆಳೆಯಲಾಗಿದೆ. ನಂತರ ಅಧಿಕಾರಿಗಳು ಮತಯಂತ್ರಗಳನ್ನು ಕುಮಟಾ ಬಾಳಿಗಾ ಕಾಲೇಜಿನ ಭದ್ರತಾ ಕೊಠಡಿಯಲ್ಲಿರಿಸಿದ್ದಾರೆ.