ಮೈಸೂರು ವಿಭಾಗದ 30 ರೈಲ್ವೇ ನಿಲ್ದಾಣಕ್ಕೆ ಉಚಿತ ವೈಫೈ ಸೌಲಭ್ಯ

ಇಂಟರ್‌ನೆಟ್‌ನಲ್ಲಿ ಬ್ರೌಸ್ ಮಾಡುತ್ತಲೇ ಇರುವ ಡಾಟಾ ಪ್ರಿಯರಿಗೆ ಸಂತಸದ ಸುದ್ದಿ. ಕೇಂದ್ರ ಸರ್ಕಾರದ ಡಿಜಿಟಲ್‌ ಇಂಡಿಯಾ ಯೋಜನೆಯಡಿ ನೈಋುತ್ಯ ರೈಲ್ವೆ ವ್ಯಾಪ್ತಿಯ 125 ರೈಲು ನಿಲ್ದಾಣಗಳಿಗೆ ಉಚಿತ ವೈಫೈ ಸೌಲಭ್ಯ ಕಲ್ಪಿಸಲಾಗಿದೆ.

ಮೈಸೂರು(ಜು.19): ಕೇಂದ್ರ ಸರ್ಕಾರದ ಡಿಜಿಟಲ್‌ ಇಂಡಿಯಾ ಯೋಜನೆಯಡಿ ರಾಜ್ಯದ ರೈಲು ನಿಲ್ದಾಣಗಳಿಗೆ ಉಚಿತ ವೈಫೈ ಕಲ್ಪಿಸುವ ಉದ್ದೇಶದೊಂದಿಗೆ ಈಗ ಹೊಸದಾಗಿ ನೈಋುತ್ಯ ರೈಲ್ವೆ ವ್ಯಾಪ್ತಿಯ 125 ರೈಲು ನಿಲ್ದಾಣಗಳಿಗೆ ಉಚಿತ ವೈಫೈ ಕಲ್ಪಿಸಲಾಗಿದೆ.

2016-17 ರಿಂದ 2017-18ರವರೆಗೆ ಮೊದಲ ಹಂತದಲ್ಲಿ ನೈಋುತ್ಯ ರೈಲ್ವೆಯ 153 ರೈಲು ನಿಲ್ದಾಣಗಳಿಗೆ ವೈಫೈ ಸೌಲಭ್ಯ ಕಲ್ಪಿಸಲಾಗಿತ್ತು. ಈಗ ಹೊಸದಾಗಿ ಪ್ರಸಕ್ತ ಸಾಲಿಗೆ 125 ನಿಲ್ದಾಣಗಳಿಗೆ ಈ ಸೌಲಭ್ಯ ಕಲ್ಪಿಸಲು ರೈಲ್ವೆ ಖಾತೆ ರಾಜ್ಯ ಸಚಿವ ಸುರೇಶ್‌ ಅಂಗಡಿ ಅನುಮೋದನೆ ನೀಡಿದ್ದಾರೆ. ಗೂಗಲ್‌ ಮತ್ತು ರೈಲ್‌ವೈರ್‌ ಜೊತೆಗೂಡಿ ಈ ಸೌಲಭ್ಯ ಕಲ್ಪಿಸಲಾಗುತ್ತಿದೆ.

ಪ್ರತಿನಿತ್ಯ 20 ಸಾವಿರ ಜನರಿಗೆ ಯೋಜನೆ ಫಲಾನುಭವ:

ಈ ಬಾರಿ 125 ರೈಲು ನಿಲ್ದಾಣಗಳ ಪೈಕಿ ಹುಬ್ಬಳ್ಳಿ ವಿಭಾಗದ 58 ನಿಲ್ದಾಣ, ಬೆಂಗಳೂರು ವಿಭಾಗದ 37 ಮತ್ತು ಮೈಸೂರು ವಿಭಾಗದ 30 ನಿಲ್ದಾಣಗಳಿಗೆ ಇದರ ಸೌಲಭ್ಯ ಲಭ್ಯವಾಗಲಿದೆ. ವೈಫೈಗೆ ಹೋಗಿ ಒನ್‌ ಟೈಮ್‌ ಒಟಿಪಿ ಪಡೆದು ಈ ಸೇವೆ ಬಳಸಬಹುದು. ಪ್ರತಿನಿತ್ಯ ಸುಮಾರು 20 ಸಾವಿರ ಮಂದಿ ಪ್ರಯಾಣಿಕರು ಈ ಸೇವೆ ಪಡೆಯುವರು. ಮುಂದಿನ ಹಂತದಲ್ಲಿ ಉಳಿದ 92 ರೈಲು ನಿಲ್ದಾಣಗಳಿಗೆ ಈ ಸೌಲಭ್ಯ ದೊರಕಿಸಿಕೊಡಲಾಗುವುದು.

ಒಂದು ಅಧ್ಯಯನದ ಪ್ರಕಾರ ಕೇರಳದಲ್ಲಿ ಓರ್ವ ಮಹಿಳೆಯು ರೈಲ್ವೆ ನಿಲ್ದಾಣದಲ್ಲಿ ಆಟೋ ಓಡಿಸುತ್ತ, ಈ ವೈಫೈ ಸೇವೆ ಪಡೆದುಕೊಂಡು ತನ್ನ ಜ್ಞಾನಮಟ್ಟವನ್ನು ಹೆಚ್ಚಿಸಿಕೊಳ್ಳುವ ಜೊತೆಗೆ ತನ್ನ ಮಗನಿಗೆ ವಿದ್ಯಾಭ್ಯಾಸಕ್ಕೆ ನೆರವಾಗಿದ್ದಾರೆ. ಮುಂಬೈನಲ್ಲಿ ಫ್ಯಾಷನ್‌ ಡಿಸೈನಿಂಗ್‌ ವಿದ್ಯಾರ್ಥಿಯು ಈ ಸೌಲಭ್ಯ ಬಳಸಿಕೊಂಡು ತನ್ನ ಕ್ರಿಯಾಶೀಲತೆಯನ್ನು ಪ್ರದರ್ಶಿಸಿ ಉದ್ಯೋಗ ದೊರಕಿಸಿಕೊಂಡ ಉದಾಹರಣೆ ಇದೆ. ಹೀಗೆ ಉಚಿತ ವೈಫೈ ಅನೇಕರಿಗೆ ನೆರವಾಗಿದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ.