ಗ್ರಾಮ ಪಂಚಾಯ್ತಿ ಚುನಾವಣೆ: ಒಂದಕ್ಕೆ ಬಟನ್‌ ಒತ್ತಿದ್ರೆ ಇಬ್ಬರಿಗೆ ಮತ

ಗ್ರಾಮದ 2 ಬೂತ್‌ಗಳ ಪೈಕಿ ಒಂದು ಮತಕೇಂದ್ರದಲ್ಲಿ ಕೈಕೊಟ್ಟ ಮತಯಂತ್ರ| ಮತಯಂತ್ರ ಕ್ರಮ ಸಂಖ್ಯೆ -6 ಬಟನ್‌ ಒತ್ತಿದರೆ ಬೇರೆ ಚಿಹ್ನೆಗೂ ಹೋದ ಮತ| ಮತದಾನ ಸ್ಥಗಿತಗೊಳಿಸಿದ ಗ್ರಾಮಸ್ಥರು| 

ಬೀದರ್‌(ಡಿ.28): ತಾಲೂಕಿನ ಕಪಲಾಪೂರ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯ ಕಪಲಾಪೂರ (ಎ) ಗ್ರಾಮದ ಮತಗಟ್ಟೆ ಸಂಖ್ಯೆ-01 ರಲ್ಲಿ ಮತಯಂತ್ರದಲ್ಲಿನ ಅಚ್ಚರಿಯ ದೋಷದ ಆರೋಪದಿಂದಾಗಿ ಮತದಾನ ಕೆಲಕಾಲ ಸ್ಥಗಿತಗೊಂಡಿತ್ತು.

ಗ್ರಾಮದ 2 ಬೂತ್‌ಗಳ ಪೈಕಿ ಒಂದು ಮತಕೇಂದ್ರದಲ್ಲಿ ಮತಯಂತ್ರ ಕೈಕೊಟ್ಟಿತು. ಅಷ್ಟೇ ಅಲ್ಲ ಮತಯಂತ್ರ ಕ್ರಮ ಸಂಖ್ಯೆ -6 ಬಟನ್‌ ಒತ್ತಿದರೆ ಬೇರೆ ಚಿಹ್ನೆಗೂ ಹೋಗುತ್ತಿದೆ ಎಂದು ಮತದಾರರೊಬ್ಬರು ಮತದಾನದ ಸಂದರ್ಭ ಮತಯಂತ್ರದ ವಿಡಿಯೋ ಮಾಡಿ ಇಬ್ಬರಿಗೆ ಮತ ಬೀಳುವ ಕೆಂಪು ದೀಪಗಳು ಉರಿಯುವುದನ್ನು ತೋರಿಸಿದ್ದಾರೆ. 

ಇದನ್ನು ಗಮಿಸಿದ ಗ್ರಾಮಸ್ಥರು ಮತದಾನ ಸ್ಥಗಿತಗೊಳಿಸಿ, ಮತಯಂತ್ರ ಬಲಾಯಿಸುವಂತೆ ಆಗ್ರಹಿಸಿದ್ದರು ಎನ್ನಲಾಗಿದೆ. ಅಲ್ಲದೇ ಈ ವಿಡಿಯೋ ವೈರಲ್‌ ಆಗಿದೆ.