ನೆಲ ಕಚ್ಚಿದ ಪೇಟಿಎಂಗೆ ಮತ್ತೆ ಜೀವ

ವಂಚನೆಗೆ ಅವಕಾಶ ಕಲ್ಪಿಸುತ್ತಿದೆ ಎಂಬ ಆರೋದಿಂದ ಪೇಟಿಎಂ ಕಂಪನಿಯೇ ಮುಳುಗಿದಂತಾಗಿತ್ತು. ಆದರೆ, ಇದೀಗ ಮತ್ತೆ ಚಿಗುರಿಕೊಳ್ಳುತ್ತಿದೆ.

ಫಿನ್‌ಟೆಕ್ ಕಂಪನಿಯಾದ ಪೇಟಿಎಂ ಮತ್ತೆ ಟ್ರ್ಯಾಕ್‌ಗೆ ಮರಳುತ್ತಿದೆ.

ಪೇಟಿಎಂ ಷೇರುಗಳು ಭಾರಿ ಏರಿಕೆ ಕಂಡಿವೆ. ಷೇರು ಕೇವಲ ಒಂದು ದಿನದಲ್ಲಿಯೇ ಶೇ.13 ರಷ್ಟು ಏರಿಕೆಯಾಗಿ ರೂ 629 ರ ಮಟ್ಟ ತಲುಪಿದೆ.

ಆಗಸ್ಟ್ 30ರ ಬೆಳಗ್ಗೆ ಪೇಟಿಎಂ ಷೇರುಗಳು ರೂ 543 . ನಂತರ ಅದರಲ್ಲಿ ಭಾರಿ ಏರಿಕೆ ಕಂಡುಬಂದಿದೆ. ಶುಕ್ರವಾರದ ಮಾರುಕಟ್ಟೆ ಮುಗಿಯುವ ವೇಳೆಗೆ ಪೇಟಿಎಂ ಷೇರುಗಳು ರೂ 623 ರ ಸುಮಾರಿಗೆ ವಹಿವಾಟು ನಡೆಸುತ್ತಿವೆ.

ಫಿನ್‌ಟೆಕ್ ಕಂಪನಿಯಲ್ಲಿ ಏರಿಕೆಗೆ ದೊಡ್ಡ ಕಾರಣವೆಂದರೆ ಪೇಟಿಎಂ ಪೇಮೆಂಟ್ಸ್ ಸರ್ವೀಸಸ್ (PPSL) ನಲ್ಲಿ ಡೌನ್‌ಸ್ಟ್ರೀಮ್ ಹೂಡಿಕೆಗೆ ಅನುಮೋದನೆ ದೊರೆತಿದೆ.

ಈ ಸುದ್ದಿಯ ನಂತರ, ಹೂಡಿಕೆದಾರರು ಪೇಟಿಎಂ ಷೇರುಗಳನ್ನು ಭಾರಿ ಪ್ರಮಾಣದಲ್ಲಿ ಖರೀದಿಸುತ್ತಿದ್ದಾರೆ. ಇದರೊಂದಿಗೆ, ಕಂಪನಿಯ ಮಾರುಕಟ್ಟೆ ಬಂಡವಾಳ ಕೂಡ ರೂ 39,000 ಕೋಟಿ ದಾಟಿದೆ.

PPSL ಆಗಸ್ಟ್ 27 ರಂದು ಹಣಕಾಸು ಸಚಿವಾಲಯದ ಹಣಕಾಸು ಸೇವೆಗಳ ಇಲಾಖೆಯಿಂದ ಡೌನ್‌ಸ್ಟ್ರೀಮ್ ಹೂಡಿಕೆಗೆ ಅನುಮೋದನೆ ಪಡೆದಿದೆ ಎಂದು ಪೇಟಿಎಂ ತಿಳಿಸಿದೆ.

ಈ ಅನುಮೋದನೆ ನಂತರ, ಕಂಪನಿಯು ಪಾವತಿ ಸಂಗ್ರಾಹಕ (PA) ಪರವಾನಗಿಗಾಗಿ ಅರ್ಜಿ ಸಲ್ಲಿಸಲಿದೆ. ಇದೇ ಕಾರಣಕ್ಕೆ ಷೇರು ಭಾರಿ ಏರುತ್ತಿದೆ. 

ಕಳೆದ 6 ತಿಂಗಳಲ್ಲಿ ಪೇಟಿಎಂ ಷೇರುಗಳು ಹೂಡಿಕೆದಾರರಿಗೆ ಶೇ.35 ರಷ್ಟು ಆದಾಯ ನೀಡಿವೆ. ಅದೇ ಸಮಯದಲ್ಲಿ, ಕಳೆದ ಒಂದು ತಿಂಗಳಲ್ಲಿ ಅದು ಶೇ.11 ರಷ್ಟು ಏರಿಕೆಯಾಗಿದೆ.

ಜನವರಿ 2024ರಲ್ಲಿ, ಭಾರತೀಯ ರಿಸರ್ವ್ ಬ್ಯಾಂಕ್ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ನಲ್ಲಿ ಲಂಗು ಲಗಾಮಿಲ್ಲದೇ ಹಣ ವ್ಯವಹಾರ ನಡೆದ  ಕಾರಣ ಹಲವು ನಿರ್ಬಂಧಗಳನ್ನು ವಿಧಿಸಿತು. ಅದರ ನಂತರ ಷೇರುಗಳು ತೀವ್ರ ಕುಸಿತ ಕಂಡವು.

ಒಂದು ಹಂತದಲ್ಲಿ, ಪೇಟಿಎಂ ಷೇರುಗಳು ರೂ 310 ರ ಮಟ್ಟ ತಲುಪಿದವು. ಆದಾಗ್ಯೂ, ನಂತರ ಅದು ಕ್ರಮೇಣ ಚೇತರಿಸಿಕೊಂಡಿತು. ಈಗ ಮತ್ತೆ ವೇಗವನ್ನು ಪಡೆಯಲು ಪ್ರಾರಂಭಿಸಿದೆ.