ಮಂಕಿಪಾಕ್ಸ್ ರೋಗದ ಕುರಿತ ನಿಮ್ಮೆಲ್ಲ ಪ್ರಶ್ನೆಗಳಿಗೆ ತಜ್ಞ ವೈದ್ಯರ ಉತ್ತರ..
ಮಂಕಿ ಪಾಕ್ಸ್ ಇತ್ತೀಚೆಗೆ ಹೊಸ ಸಾಂಕ್ರಾಮಿಕವಾಗಿ ಜನರಲ್ಲಿ ಭೀತಿ ಹುಟ್ಟಿಸುತ್ತಿದೆ. ಅತೀ ಹೆಚ್ಚು ಪ್ರಚಾರದಲ್ಲಿ ಇರುವ ಮಂಕಿಪಾಕ್ಸ್ ಬಗ್ಗೆ ಜನರ ಸಂದೇಹಗಳಿಗೆ ಪರಿಹಾರ ಒದಗಿಸಿದ್ದಾರೆ ವೈದ್ಯರಾದ ಡಾ. ಶಿವಮೂರ್ತಿ ಎನ್.
ಮಂಕಿಪಾಕ್ಸ್ (ಕೋತಿ ಸಿಡುಬು) ರೋಗ
ಕಂಡು ಕೇಳರಿಯದ ಹೊಸ ರೋಗಗಳು ಇತ್ತೀಚೆಗೆ ಹೆಚ್ಚು ಸದ್ದು ಮಾಡುತ್ತಿವೆ. ಯಾಕೆ ಹೀಗೆ ಆಗುತ್ತಿದೆ? ಪ್ರಳಯ ಆಗುತ್ತದೆ ಎಂದು ಮಾಧ್ಯಮಗಳು ಬಹಳ ವರ್ಷಗಳಿಂದ ಹೇಳುತ್ತಾ ಬರುತ್ತಿವೆ. ಹಾಗಾದರೆ ಇದೇನಾ ಆ ಪ್ರಳಯ? ಮನುಕುಲದ ಅಂತ್ಯ ಸಮೀಪ ಬಂದಿದೆಯೇ? ಹೀಗೆಲ್ಲ ನಿಮ್ಮ ಮನಸ್ಸಿಗೆ ಅನಿಸುತ್ತಿರಬಹುದು. ವೈದ್ಯನಾದ ನಾನು ಭವಿಷ್ಯ ಹೇಳುವುದು ಸಾಧ್ಯವಿಲ್ಲ. ಆದರೆ ವೈಜ್ಞಾನಿಕವಾಗಿ ನೋಡಿದರೆ ನನಗ್ಯಾವ ಹೊಸತೂ ಕಾಣಿಸುತ್ತಿಲ್ಲ. ವೈದ್ಯಕೀಯ ಇತಿಹಾಸ ತೆಗೆದು ನೋಡಿದರೆ ಹತ್ತು ವರ್ಷಕ್ಕೊಮ್ಮೆ ಹೊಸ ಮಾದರಿಯ ವಿಷಭರಿತ ವೈರಸ್‌ಗಳು ಕಾಣಿಸುವುದು ಸಾಮಾನ್ಯ. ಪ್ರತಿ ಪ್ರಾಣಿ ಪಕ್ಷಿಗಳಲ್ಲೂ ಆಗಾಗ ಹೊಸ ವೈರಸ್ ಸಂತತಿ ಜನ್ಮ ತಾಳುತ್ತಿರುತ್ತವೆ. ಹಾಗೇ ಈ ಬಾರಿ ಮಾನವನಲ್ಲಿ ಆಗಿದೆ. ನೂರು ವರ್ಷಗಳಲ್ಲಿ ಒಂದು ಮುಖ್ಯ ಪ್ಯಾಂಡಮಿಕ್ (ಜಾಗತಿಕ ರೋಗ) ಬರುತ್ತದೆ. ಅದೇ ಈಗ ಕೊರೋನ ರೂಪದಲ್ಲಿ ಬಂದಿದೆ. ಕೆಲವೊಮ್ಮೆ ರೋಗಗಳು ಪ್ರಾಣಿಗಳಿಂದ ಮತ್ತು ಪಕ್ಷಿಗಳಿಂದ ಮನುಷ್ಯನಿಗೆ ಹರಡುವ ಸಾಧ್ಯತೆ ಇರುತ್ತದೆ. ಹಾಗೆ ಹರಡಿ ಬಂದಿರುವುದೇ ಈ ಮಂಕಿಪಾಕ್ಸ್ (ಕೋತಿ ಸಿಡುಬು).
1. ಕೊರೋನ ಮತ್ತು ಮಂಕಿಪಾಕ್ಸ್‌ಗೂ ಏನಾದರೂ ಸಂಬಂಧ ಇದೆಯೇ?
ಇಲ್ಲ. ಕೊರೋನವೇ ಬೇರೆ. ಮಂಕಿ ಪಾಕ್ಸೇ ಬೇರೆ.
2. ಎಲ್ಲಿಂದ ಬಂತು ಈ ಮಂಕಿ ಪಾಕ್ಸ್ (ಕೋತಿ ಸಿಡುಬು)? ಇದೇನು ಹೊಸ ರೋಗವೇ?
ಇದೊಂದು ಹಳೆಯ ರೋಗ. ಮಂಕಿಪಾಕ್ಸ್ ವೈರಾಣುವಿನಿಂದ ಬರುತ್ತದೆ. ಇದನ್ನು 1958ರಲ್ಲಿ ಗುರುತಿಸಲಾಗಿದೆ. 1970ರಲ್ಲಿ ಮೊದಲ ಸೋಂಕಾದ ಮಾನವನನ್ನು ಕಾಂಗೋ ದೇಶದಲ್ಲಿ ಪತ್ತೆ ಹಚ್ಚಲಾಗಿತ್ತು. ಹೆಚ್ಚಿನ ಪತ್ತೆಯಾದ ರೋಗಿಗಳು ಆಫ್ರಿಕಾ ಖಂಡದಲ್ಲಿ ಜೀವಿಸಿರುವವರಾಗಿರುತ್ತಾರೆ. ಮಂಕಿಪಾಕ್ಸ್ ವೈರಸ್ ಇಲಿಗಳಲ್ಲಿ ಮತ್ತು ಕೋತಿಗಳಲ್ಲಿ ಹರಡುವುದು ಸಾಮಾನ್ಯ. ಸೋಂಕಾದ ಪ್ರಾಣಿಗಳು ಮನುಷ್ಯನ ಸಂಪರ್ಕ ಪಡೆದಾಗ ಅವರಿಗೂ ಹರಡುವ ಸಾಧ್ಯತೆ ಇರುತ್ತದೆ.
2003ರಲ್ಲಿ ಅಮೆರಿಕಾದಲ್ಲಿ 47 ರೋಗಿಗಳು ಪತ್ತೆಯಾಗಿದ್ದರು. ಆಫ್ರಿಕಾದಿಂದ ತರಿಸಿಕೊಂಡ ಪ್ರಾಣಿಗಳ ಮೂಲಕ ಸೋಂಕು ಅಮೆರಿಕಕ್ಕೆ ರವಾನೆಯಾಗಿರುವ ಶಂಕೆ ವ್ಯಕ್ತಪಡಿಸಲಾಗಿತ್ತು.
ಈ ರೋಗ ಕೂಡ ಸಿಡುಬು ರೋಗಕ್ಕೆ ಸಂಭಂದಿಸಿದ್ದರಿಂದ ಚಿಕನ್ ಪಾಕ್ಸ್ ಲಸಿಕೆ ಪಡೆಯುವುದರಿಂದ ರೋಗನಿರೋಧಕ ಶಕ್ತಿ ಬೆಳೆಸಿಕೊಳ್ಳಲು ಸಾಧ್ಯವಿದೆ. ಇದು ಶೇಖಡಾ 85ರಷ್ಟು ರಕ್ಷಣೆ ನೀಡುತ್ತದೆ.
‘ವಿಫಲವಾದ’ ಕಿಡ್ನಿ, ಮರು ಪರೀಕ್ಷೆಯಲ್ಲಿ ನಾರ್ಮಲ್‌ !
3. ಇತ್ತೀಚೆಗೆ ಮಂಕಿಪಾಕ್ಸ್ ರೋಗ ಮಾಧ್ಯಮಗಳಲ್ಲಿ ಏಕೆ ಸದ್ದು ಮಾಡುತ್ತಿದೆ?
ಇತ್ತೀಚೆಗೆ ಯಾವುದೇ ಅಂತಾರಾಷ್ಟ್ರೀಯ ಸೋಂಕುಗಳು ಸುದ್ದಿ ಮಾಡುವುದು ಸಹಜವಾಗಿದೆ. ಜನರು ಈ ವಿದ್ಯಮಾನಗಳ ಬಗ್ಗೆ ತಿಳಿದುಕೊಳ್ಳುವುದು ಒಳ್ಳೆಯದು. ಆತಂಕ ಪಡುವ ಅಗತ್ಯವಿಲ್ಲ. ಎಚ್ಚರಿಕೆ ಅಗತ್ಯವಿದೆ.
4. ಮಂಕಿಪಾಕ್ಸ್ ಕಾಯಿಲೆ ಎಂದರೇನು ?
ಹಿಂದೆ ಹೇಳಿದಂತೆ ಮಂಕಿಪಾಕ್ಸ್ ಒಂದು ವೈರಾಣುವಿನ ಸೋಂಕಿನಿಂದ ಉಂಟಾಗುವ ಅಪರೂಪದ ಕಾಯಿಲೆಯಾಗಿದೆ. ಮಂಕಿಪಾಕ್ಸ್ ವೈರಸ್ ಪಾಕ್ಸ್ ವಿರಿಡೆ ಕುಟುಂಬದಲ್ಲಿ ಆರ್ಥೋಪಾಕ್ಸ್ ವೈರಸ್ ಕುಲಕ್ಕೆ ಸೇರಿದ ಒಂದು ವೈರಸ್. ಇದೊಂದು ಪ್ರಾಣಿಗಳಿಂದ ಪ್ರಾಣಿಗಳಿಗೆ ಹರಡುವ ಸೋಂಕು ರೋಗವಾಗಿದೆ. ಹೆಚ್ಚಾಗಿ ಮಧ್ಯ ಮತ್ತು ಪಶ್ಚಿಮ ಆಫ್ರಿಕಾದ ಉಷ್ಣವಲಯದ ಮಳೆಕಾಡು ಪ್ರದೇಶಗಳಲ್ಲಿ ಕಂಡುಬರುತ್ತದೆ ಮತ್ತು ಸಾಂದರ್ಭಿಕವಾಗಿ ಇತರ ಪ್ರದೇಶಗಳಿಗೆ ಹರಡುವ ಸಾಧ್ಯತೆ ಇರುತ್ತದೆ.
5. ಮಂಕಿಪಾಕ್ಸ್ ಕಾಯಿಲೆ ಹೇಗೆ ಹರಡುತ್ತದೆ?
ಮಂಕಿಪಾಕ್ಸ್ ಮನುಷ್ಯನಲ್ಲಿ ಕಾಣುವುದು ಬಹಳ ಅಪರೂಪ. ಸೋಂಕಿತ ಪ್ರಾಣಿಗಳ ರಕ್ತ, ದೈಹದಿಂದ ಸ್ರವಿಸುವ ದ್ರವಗಳು ಅಥವಾ ಚರ್ಮದ ಅಥವಾ ದೇಹದ ಅಂಗಾಂಶಗಳಿಗೆ ತಾಗಿದಾಗ ಅಥವಾ ಸೋಂಕಿತ ದ್ರವಗಳು ಗಾಯಗಳೊಂದಿಗೆ ನೇರ ಸಂಪರ್ಕಕ್ಕೆ ಬಂದಾಗ ಮಂಕಿಪಾಕ್ಸ್ ರೋಗ ಹರಡುವ ಸಾಧ್ಯತೆ ಇದೆ.
ಅಸಮರ್ಪಕವಾಗಿ ಬೇಯಿಸಿದ ಮಾಂಸ ಮತ್ತು ಸೋಂಕಿತ ಪ್ರಾಣಿಗಳ ಉತ್ಪನ್ನಗಳ ಮೂಲಕವೂ ಮಂಕಿಪಾಕ್ಸ್ ವೈರಸ್ ಹರಡಬಹುದಾಗಿದೆ. ಸೋಂಕಿತ ವ್ಯಕ್ತಿಯೊಂದಿಗೆ ಯಾವುದೇ ಸಂಪರ್ಕ ಬಂದರೂ ವೈರಾಣು ಹರಡುವ ಸಾಧ್ಯತೆ ಇದೆ.
ಈ ವೈರಾಣು ಉಸಿರಾಟದ ಮೂಲಕವೂ ಹರಡಬಹುದಾಗಿದೆ. ಪ್ರಾಣಿಪ್ರಿಯರು ಈ ಬಗ್ಗೆ ಎಚ್ಚರ ವಹಿಸಬೇಕು. ಸಾಕು ಪ್ರಾಣಿಗಳನ್ನು ಸೋಂಕಿತ ಪ್ರಾಣಿಗಳ ಮತ್ತು ವ್ಯಕ್ತಿಯ ಜೊತೆ ಸೇರುವುದನ್ನು ತಡೆಯಬೇಕು ಮತ್ತು ಸೋಂಕಿನ ಲಕ್ಷಣಗಳಿದ್ದರೆ ಪಶುವೈದ್ಯರ ಸಲಹೆ ಪಡೆಯಬೇಕು.
ಮಂಕಿಪಾಕ್ಸ್ ಸೋಂಕು ಲೈಂಗಿಕ ಸಂಪರ್ಕದಿಂದ ವೇಗವಾಗಿ ಹರಡ್ತಿದೆ ; ವಿಶ್ವ ಆರೋಗ್ಯ ಸಂಸ್ಥೆ
6. ಮಂಕಿಪಾಕ್ಸ್ ವೈರಸ್ ದೇಹ ಸೇರಿದ ನಂತರ ಎಷ್ಟು ದಿನಗಳಾದ ಮೇಲೆ ರೋಗಲಕ್ಷಣಗಳು ಕಾಣಿಸಬಹುದು?
ವೈರಸ್ ಗಳು ದೇಹ ಪ್ರವೇಶಿಸಿದ ನಂತರ ಜೀವಕೋಶಗಳಲ್ಲಿ ಬೆಳೆದು ರೋಗಲಕ್ಷಣಗಳನ್ನು ಹೊರಹಾಕಲು 5ರಿಂದ 21 ದಿನಗಳ ಕಾಲ ಬೇಕಾಗುತ್ತದೆ.
7. ಮಂಕಿಪಾಕ್ಸ್ ಕಾಯಿಲೆ ಲಕ್ಷಣಗಳಾವುವು?
ದೇಹದಲ್ಲಿ ಮಂಕಿಪಾಕ್ಸ್ ರೋಗವು ಅನೇಕ ಲಕ್ಷಣಗಳನ್ನು ತೋರಬಹುದು. ಅವೆಂದರೆ, ಜ್ವರ, ಚರ್ಮದ ಮೇಲೆ ದದ್ದಾಗುವುದು, ತೀವ್ರವಾದ ತಲೆನೋವು, ಮೈಕೈ ನೋವು, ಸ್ನಾಯುಗಳ ನೋವು, ಶಕ್ತಿ ಹೀನತೆ ಮತ್ತು ದುಗ್ಧರಸ ಗ್ರಂಥಿಗಳ ಊತ ಇತರೆ.
ಜ್ವರ ಕಾಣಿಸಿಕೊಂಡ 1-3 ದಿನಗಳಲ್ಲಿ ಮಂಕಿಪಾಕ್ಸ್ ರೋಗಿಗಳಲ್ಲಿ ಚರ್ಮದ ಮೇಲೆ ದದ್ದುಗಳು ಕಾಣಿಸಿಕೊಳ್ಳಬಹುದು. ಅವು ಮುಖದ ಮೇಲೆ ಹೆಚ್ಚು ಸಂಖ್ಯೆಯಲ್ಲಿ ಕಾಣಬಹುದು. ಅದಲ್ಲದೇ, ಅಂಗೈಗಳು ಮತ್ತು ಪಾದಗಳ ಅಡಿಭಾಗ, ಬಾಯಿಯ ಒಳಮೇಲ್ಮೈಯಲ್ಲಿ, ಜನನಾಂಗಗಳ ಮೇಲೆ, ಮತ್ತು ಕಣ್ಣಿನ ರೆಪ್ಪೆ ಮತ್ತು ಕಣ್ಣಿನ ಹೊರಪದರವಾದ ಕಾಂಜಂಕ್ಟಿವಾ ಮತ್ತು ಪಾರದರ್ಶಕ ಭಾಗವಾದ ಕಾರ್ನಿಯಾದಲ್ಲಿ ದದ್ದುಗಳು ಕಾಣಬಹುದು. ಇಂಥ ಸಂದರ್ಭದಲ್ಲಿ ಕಣ್ಣಿನ ದೃಷ್ಟಿ ದೋಷ ಉಂಟಾಗುವ ಸಾಧ್ಯತೆ ಇರುತ್ತದೆ.
ದದ್ದುಗಳು ತನ್ನ ಸ್ವರೂಪವನ್ನು ಬದಲಾಯಿಸಿಕೊಳ್ಳತ್ತಾ ನೀರು ತುಂಬಿದ, ಕೀವು ತುಂಬಿದ ಗುಳ್ಳೆಗಳಾಗಿ ಮಾರ್ಪಾಡಾಗುತ್ತವೆ. ನಂತರ ಮಚ್ಚೆಗಳು ಉಳಿದುಕೊಳ್ಳಬಹುದು.
8. ಮಂಕಿಪಾಕ್ಸ್ ನ್ನು ಅಥವಾ ಇತರೆ ಸಿಡುಬು ಇವುಗಳನ್ನು ಬೇರ್ಪಡಿಸುವುದು ಹೇಗೆ? ಎಲ್ಲ ಸಿಡುಬು ಒಂದೇ ಅಲ್ಲವೇ?
ಇಲ್ಲ. ಎಲ್ಲಾ ಸಿಡುಬು ಒಂದೇ ಅಲ್ಲ. ಮಂಕಿಪಾಕ್ಸ್, ಸ್ಮಾಲ್ ಪಾಕ್ಸ್, ಚಿಕನ್ ಪಾಕ್ಸ್ ಒಂದೇ ಕುಟುಂಬದ ಸದಸ್ಯರಾದರೂ ಅವು ಬೇರೆ ಬೇರೆ ಜೀವತಂತ್ರಾಂಶಗಳನ್ನು ಹೊಂದಿವೆ. ಹಾಗಾಗಿ ಇದನ್ನು ಕಂಡು ಹಿಡಿಯಲು ಪಿಸಿಆರ್ ಟೆಸ್ಟ್ ಮಾಡಿದರೆ ತಿಳಿಯುತ್ತದೆ.
ಮಂಕಿಪಾಕ್ಸ್ ಸೋಂಕು 100ಕ್ಕೆ ಏರಿಕೆ, ವ್ಯಾಧಿ ಉಲ್ಬಣ ಸಾಧ್ಯತೆ: ಡಬ್ಲ್ಯುಎಚ್‌ಒ
9. ಮಂಕಿಪಾಕ್ಸ್ ಗೆ ಚಿಕಿತ್ಸೆ ಏನು?
ಅನೇಕ ವೈರಸ್ ಗಳಿಗೆ ಚಿಕಿತ್ಸೆ ಇಲ್ಲ. ಅವಕ್ಕೆ ಉತ್ತಮ ದೇಹದ ರೋಗನಿರೋಧಕ ಶಕ್ತಿಯೇ ಚಿಕಿತ್ಸೆಯಾಗಿದೆ. ಅದರೆ ಮಂಕಿಪಾಕ್ಸ್ ಗೆ ಸದ್ಯಕ್ಕೆ ಯಾವುದೇ ನಿರ್ದಿಷ್ಟ ಚಿಕಿತ್ಸೆ ಇಲ್ಲ.
ಸಿಡುಬು ವಿರುದ್ಧ ಬಳಸುವ ವ್ಯಾಕ್ಸಿನ್ ಮಂಕಿಪಾಕ್ಸ್ ರೋಗವನ್ನು ತಡೆಗಟ್ಟುವಲ್ಲಿ ಶೇಕಡಾ 85 ℅ರಷ್ಟು ಪರಿಣಾಮಕಾರಿ ಎಂದು ತಿಳಿದಿದೆ. ಆದ್ದರಿಂದ, ಮಂಕಿಪಾಕ್ಸ್ ನ ಗಂಭೀರ ಲಕ್ಷಣಗಳನ್ನು ತಡೆಗಟ್ಟಲು ಸಿಡುಬು ಲಸಿಕೆಯನ್ನು ತೆಗೆದುಕೊಂಡಿದ್ದರೆ ಹೆದರುವ ಅವಶ್ಯಕತೆ ಇಲ್ಲ.
ಸೋಂಕಾದವರು ರೋಗಲಕ್ಷಣಗಳು ಬರುವ ಮುನ್ನ ಕೆಲವು ಔಷಧಗಳನ್ನು ನಿಮ್ಮ ವೈದ್ಯರು ಸಲಹೆ ಮಾಡುವರು. ಅಕಸ್ಮಾತ್ ನೀವು ಸೋಂಕು ಹೊಂದಿರುವ ಅನುಮಾನ ಇದ್ದರೆ ವೈದ್ಯರ ಸಲಹೆ ಪಡೆಯಿರಿ.
10. ಲೈಂಗಿಕ ಸಂಪರ್ಕ ದಿಂದ ವೈರಸ್ ಹರಡಬಹುದೇ?
ಹಿಂದೆ ಹೇಳಿದಂತೆ ಮಂಕಿಪಾಕ್ಸ್ ಸೊಂಕಿರುವ ವ್ಯಕ್ತಿಯೊಂದಿಗೆ ಚರ್ಮದಿಂದ ಚರ್ಮಕ್ಕೆ ತಗುಲಿದರೆ ವೈರಸ್ ಹಂಚಿಕೊಳ್ಳುವ ಸಾಧ್ಯತೆ ಇರುತ್ತದೆ. ಹಾಗೆಯೇ ಮಂಕಿಪಾಕ್ಸ್ ಉಸಿರಾಟದಲ್ಲಿ ಇರುವ ಉಗಳುಗುಳ್ಳೆಗಳಲ್ಲಿ ವೈರಸ್ ಅಡಗಿದ್ದರೆ, ಅಥವಾ ಗಾಯಗಳು, ಮೂಗು, ಬಾಯಿ ಅಥವಾ ಕಣ್ಣುಗಳು ಸ್ರವಿಸುವ ರಸಗಳಲ್ಲಿ ಇದ್ದರೆ ಆಗ ಈ ಮೂಲಕ ವೈರಾಣುಗಳು ದೇಹವನ್ನು ಪ್ರವೇಶಿಸಬಹುದು. ಜನನಾಂಗದಲ್ಲಿ ಸಿಡುಬು ಗುಳ್ಳೆಗಳಿದ್ದರೆ ಆಗಲೂ ಲೈಂಗಿಕ ಕ್ರಿಯೆಯಿಂದ ರೋಗ ಹರಡುವ ಸಾಧ್ಯತೆ ಇದೆ.
ಡಾ. ಶಿವಮೂರ್ತಿ ಎನ್., ಔಷಧಶಾಸ್ತ್ರಜ್ಞರು, ಸಿಡಿಸೈಮರ್ ವೈದ್ಯಕೀಯ ಮಹಾವಿದ್ಯಾಲಯ, ಬೆಂಗಳೂರು.
