ಅಮೆರಿಕಾದ ಕಾಂಗ್ರೆಸ್ ಸಮಿತಿಯು ಭಾರತವನ್ನು ನ್ಯಾಟೋಗೆ ಸೇರ್ಪಡೆ ಮಾಡುವ ಮೂಲಕ ನ್ಯಾಟೋವನ್ನು ಇನ್ನಷ್ಟು ಬಲಪಡಿಸುವ ಶಿಫಾರಸು ಮಾಡಿತ್ತು. ಆದರೆ. ಭಾರತ ಅಮೆರಿಕದ ಆಫರ್‌ಅನ್ನು ತಿರಸ್ಕರಿಸಿದೆ.
ನವದೆಹಲಿ (ಜೂ.10): ನಾರ್ಥ್‌ ಅಟ್ಲಾಂಟಿಕ್ ಟ್ರೀಟಿ ಆರ್ಗನೈಸೇಶನ್ ಅಥವಾ ನ್ಯಾಟೋಗೆ ಸೇರುವ ಯಾವುದೇ ಉದ್ದೇಶವಿಲ್ಲ ಎಂದು ಭಾರತ ಸ್ಪಷ್ಟವಾಗಿ ಹೇಳಿದೆ. ಈ ಮಿಲಿಟರಿ ಮೈತ್ರಿ ಭಾರತದ ಉದ್ದೇಶಕ್ಕೆ ಸೂಕ್ತವಲ್ಲ ಎಂದೂ ಈ ವೇಳೆ ತಿಳಿಸಿದೆ. ನವದೆಹಲಿಯಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌ ಅವರು ಈ ಹೇಳಿಕೆ ನೀಡಿದ್ದಾರೆ. ಯುನೈಟೆಡ್ ಸ್ಟೇಟ್ಸ್‌ನ ಪ್ರಬಲ ಕಾಂಗ್ರೆಷನಲ್ ಸಮಿತಿಯು ಭಾರತವನ್ನು ಸೇರಿಸುವ ಮೂಲಕ ನ್ಯಾಟೋ ಪ್ಲಸ್ ಅನ್ನು ಬಲಪಡಿಸಲು ಶಿಫಾರಸು ಮಾಡಿತ್ತು. ಆದರೆ, ಭಾರತ ಮಾತ್ರ ನಯವಾಗಿ ಈ ಆಫರ್‌ಅನ್ನು ತಿರಸ್ಕಾರ ಮಾಡಿದೆ. ನ್ಯಾಟೋದ ಪ್ಯಾರಾಮೀಟರ್‌ಗಳು ಭಾರತಕ್ಕೆ ಯಾವುದೇ ರೀತಿಯಲ್ಲೂ ಅನ್ವಯವಾಗೋದಿಲ್ಲ ಎಂದು ತಿಳಿಸಿದೆ. ನೆರೆಯ ಚೀನಾದಿಂದ ತನ್ನ ಗಡಿಗಳನ್ನು ರಕ್ಷಿಸಲು ಮತ್ತು ಇಂಡೋ-ಪೆಸಿಫಿಕ್ ಪ್ರದೇಶದಲ್ಲಿ ಚೀನಾದ ಆಕ್ರಮಣದ ವಿರುದ್ಧ ಜಾಗತಿಕ ಭದ್ರತೆಯನ್ನು ಬಲಪಡಿಸಲು ಭಾರತವು ನ್ಯಾಟೋಗೆ ಸೇರಬೇಕು ಎಂದು ಅಮೆರಿಕ ಹೇಳಿತ್ತು.ಮಿತ್ರರಾಷ್ಟ್ರಗಳ ನಡುವೆ ರಕ್ಷಣಾ ಸಹಕಾರ ಮತ್ತು ಗುಪ್ತಚರ ಹಂಚಿಕೆಯನ್ನು ಹೆಚ್ಚಿಸಲು ನ್ಯಾಟೋ ಪ್ಲಸ್‌ನಲ್ಲಿ ಭಾರತವನ್ನು ಸೇರಿಸಲು ಕಾಂಗ್ರೆಸ್ ಸಮಿತಿಯು ಶಿಫಾರಸು ಮಾಡಿದೆ.
ಭಾರತವನ್ನು ನ್ಯಾಟೋಗೆ ಸೇರಿಸುವುದರಿಂದ ದೇಶವು ಸುಧಾರಿತ ಮಿಲಿಟರಿ ತಂತ್ರಜ್ಞಾನವನ್ನು ಹೆಚ್ಚು ಪರಿಣಾಮಕಾರಿಯಾಗಿ ಪ್ರವೇಶಿಸಲು ಅನುವು ಮಾಡಿಕೊಡುತ್ತದೆ ಹೇಳಿತ್ತು.
ಇದಕ್ಕೆ ವ್ಯತಿರಿಕ್ತವಾಗಿ ಅಭಿಪ್ರಾಯ ವ್ಯಕ್ತಪಡಿಸಿದ ಭಾರತ, ಚೀನಾದ ಯಾವುದೇ ಆಕ್ರಮಣವನ್ನು ತನ್ನದೇ ಆದ ರೀತಿಯಲ್ಲಿ ಎದುರಿಸಲು ನಾವು ಸಮರ್ಥವಾಗಿದ್ದೇವೆ. ಹಿಮಾಲಯ ಪ್ರದೇಶದಿಂದ ಉಭಯ ದೇಶಗಳ ನಡುವಿನ ಭೌಗೋಳಿಕ ಪ್ರತ್ಯೇಕತೆಯು ಪ್ರಸ್ತುತ ಚೀನಾಕ್ಕೆ ಭಾರತಕ್ಕೆ ನೇರ ಬೆದರಿಕೆಯನ್ನು ಒಡ್ಡಲು ಅಸಾಧ್ಯವಾಗಿದೆ. ಹೆಚ್ಚುವರಿಯಾಗಿ, ಚೀನಾ ಪ್ರಸ್ತುತ ಆರ್ಥಿಕ ಬಿಕ್ಕಟ್ಟನ್ನು ಎದುರಿಸುತ್ತಿದೆ, ರಫ್ತು ಮತ್ತು ಆಮದು ಕಡಿಮೆಯಾಗುತ್ತಿದೆ ಎಂದು ಭಾರತವು ತಿಳಿಸಿದೆ. ಇದು ದೇಶದ ಆರ್ಥಿಕ ಮರುಕಳಿಸುವಿಕೆಯ ನಿಧಾನಗತಿಯನ್ನು ಸೂಚಿಸುತ್ತದೆ ಎಂದು ಹೇಳಿದೆ.
ಭಾರತದ ನಿಲುವು ತನ್ನದೇ ಆದ ರಕ್ಷಣಾ ಸಾಮರ್ಥ್ಯಗಳ ಮೇಲಿನ ವಿಶ್ವಾಸ ಮತ್ತು ಭೌಗೋಳಿಕ ರಾಜಕೀಯ ಪರಿಸ್ಥಿತಿಯ ಮೌಲ್ಯಮಾಪನವನ್ನು ಆಧರಿಸಿದೆ. ದೇಶವು ಎದುರಿಸುತ್ತಿರುವ ಯಾವುದೇ ಭದ್ರತಾ ಸವಾಲುಗಳನ್ನು ಪರಿಣಾಮಕಾರಿಯಾಗಿ ನಿಭಾಯಿಸಬಹುದೆನ್ನುವ ವಿಶ್ವಾಸವಿದೆ ಮತ್ತು ನ್ಯಾಟೋನಂತಹ ಮಿಲಿಟರಿ ಮೈತ್ರಿಯೊಂದಿಗೆ ಸೇರಿಕೊಳ್ಳೋದಕ್ಕಿಂತ ಹೆಚ್ಚಾಗಿ ತನ್ನ ಸ್ವತಂತ್ರ ವಿದೇಶಾಂಗ ನೀತಿಯನ್ನು ಕಾಪಾಡಿಕೊಳ್ಳಲು ಭಾರತ ಆದ್ಯತೆ ನೀಡುತ್ತದೆ ಎಂದಿದ್ದಾರೆ.
ಈ ಕಾರಣದಿಂದಾಗಿ ನ್ಯಾಟೋಗೆ ಸೇರುವ ಆಹ್ವಾನವನ್ನು ಭಾರತ ತಿರಸ್ಕರಿಸಿದೆ, ಮೈತ್ರಿ ತನ್ನ ರಕ್ಷಣಾ ಅಗತ್ಯಗಳಿಗೆ ಸೂಕ್ತವಲ್ಲ ಎಂದು ಹೇಳಿದೆ. ಯಾವುದೇ ಸಂಭಾವ್ಯ ಬೆದರಿಕೆಗಳನ್ನು ಎದುರಿಸುವ ಸಾಮರ್ಥ್ಯದಲ್ಲಿ ಭಾರತವು ವಿಶ್ವಾಸವನ್ನು ಹೊಂದಿದೆ ಮತ್ತು ತನ್ನದೇ ಆದ ಸ್ವತಂತ್ರ ವಿದೇಶಾಂಗ ನೀತಿಯನ್ನು ಅನುಸರಿಸಲು ಆದ್ಯತೆ ಎಂದಿದೆ.
ಅಮೆರಿಕದ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಜೇಕ್ ಸುಲ್ಲಿವಾನ್ ಅವರು ಜೂನ್ 13-14 ರವರೆಗೆ ಭಾರತಕ್ಕೆ ಭೇಟಿ ನೀಡಲಿದ್ದು, ಪ್ರಧಾನಿ ನರೇಂದ್ರ ಮೋದಿ ಅವರ ಮುಂಬರುವ ಯುನೈಟೆಡ್ ಸ್ಟೇಟ್ಸ್ ಪ್ರವಾಸಕ್ಕೆ ಸಿದ್ಧತೆಯ ಬಗ್ಗೆ ಮಾತನಾಡಲಿದ್ದಾರೆ. ಭೇಟಿಯು ದ್ವಿಪಕ್ಷೀಯ ಸಂಬಂಧಗಳ ಹೆಚ್ಚುತ್ತಿರುವ ಪ್ರಾಮುಖ್ಯತೆಯನ್ನು ಎತ್ತಿ ತೋರಿಸುತ್ತದೆ ಮತ್ತು ರಕ್ಷಣಾ ಒಪ್ಪಂದಗಳು ಮತ್ತು ತಾಂತ್ರಿಕ ಸಹಯೋಗಗಳಿಗೆ ಅಡಿಪಾಯ ಹಾಕುವ ಗುರಿಯನ್ನು ಹೊಂದಿದೆ.
ವಿಶ್ವದ ಅತೀದೊಡ್ಡ ಸೇನಾ ಒಕ್ಕೂಟ ನ್ಯಾಟೋಗೆ 31ನೇ ಸದಸ್ಯ ರಾಷ್ಟ್ರವಾಗಿ ಸೇರಿದ ಫಿನ್ಲೆಂಡ್‌!
ಜೂನ್ 21-24ರವರೆಗೆ ಮೋದಿ ಅವರ ಅಮೆರಿಕ ಪ್ರವಾಸದ ವೇಳೆ ಜೆಟ್ ಎಂಜಿನ್ ಉತ್ಪಾದನೆ, ಡ್ರೋನ್ ಸ್ವಾಧೀನ ಸೇರಿದಂತೆ ಮಹತ್ವದ ರಕ್ಷಣಾ ಒಪ್ಪಂದಗಳು ಪ್ರಕಟವಾಗುವ ನಿರೀಕ್ಷೆ ಇದೆ. ಈ ಸಹಯೋಗಗಳು ಭಾರತದ ರಕ್ಷಣಾ ಸಾಮರ್ಥ್ಯಗಳು ಮತ್ತು ತಾಂತ್ರಿಕ ಶಕ್ತಿಯನ್ನು ಬಲಪಡಿಸುವ ಗುರಿಯನ್ನು ಹೊಂದಿವೆ, ಪ್ರಾದೇಶಿಕ ಸವಾಲುಗಳನ್ನು ಎದುರಿಸಲು ಮತ್ತು ಯುನೈಟೆಡ್ ಸ್ಟೇಟ್ಸ್‌ಗೆ ಪ್ರಮುಖ ಪಾಲುದಾರನಾಗಿ ಭಾರತದ ಸ್ಥಾನವನ್ನು ಗಟ್ಟಿಗೊಳಿಸುತ್ತವೆ.
Russia Ukraine Crisis: ನ್ಯಾಟೋ ಒಕ್ಕೂಟ ಎಂದರೇನು?: ನ್ಯಾಟೋ ಬಗ್ಗೆ ರಷ್ಯಾಕ್ಕೇಕೆ ಸಿಟ್ಟು?