ಪ್ರಸ್ತುತ ಕೃತಕ ಬುದ್ಧಮತ್ತೆ ಕ್ಷೇತ್ರದಲ್ಲಿ ವ್ಯಾಪಕವಾಗಿ ಸದ್ದು ಮಾಡುತ್ತಿರುವ ಚಾಟ್‌ ಜಿಪಿಟಿಯ ಮೂಲ ಕಂಪನಿಯಾಗಿರುವ ಓಪನ್‌ ಎಐ ಸಹಸಂಸ್ಥಾಪಕರಾಗಿದ್ದ ಸ್ಯಾಮ್ ಆಲ್ಟ್‌ಮನ್‌ರನ್ನು ಕಂಪನಿಯಿಂದಲೇ ವಜಾ ಮಾಡಲಾಗಿದೆ.
ನವದೆಹಲಿ (ನ.18): ಚಾಟ್‌ಜಿಪಿಟಿಯ ಹಿಂದಿರುವ ಕಂಪನಿಯಾದ ಓಪನ್‌ಎಐ ಸಹ-ಸಂಸ್ಥಾಪಕ ಮತ್ತು ಸಿಇಒ ಸ್ಯಾಮ್ ಆಲ್ಟ್‌ಮ್ಯಾನ್ ಅವರನ್ನು ಹುದ್ದೆಯಿಂದ ವಜಾ ಮಾಡಲಾಗಿದೆ. ಮಂಡಳಿಗೆ ಇನ್ನು ಮುಂದೆ ಅವರ ಸಾಮರ್ಥ್ಯದ ಮೇಲೆ ವಿಶ್ವಾಸವಿಲ್ಲ, ಆದ್ದರಿಂದ ಅವರು ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು OpenAI ಕಂಪನಿ ತಿಳಿಸಿತ್ತು ಎಂದು ಶುಕ್ರವಾರ ವರದಿಯಾಗಿದೆ. ಕಂಪನಿಯ ಮುಖ್ಯ ತಂತ್ರಜ್ಞಾನ ಅಧಿಕಾರಿ (ಸಿಟಿಒ) ಮೀರಾ ಮುರತಿ ಈಗ ಹಂಗಾಮಿ ಸಿಇಒ ಪಾತ್ರವನ್ನು ವಹಿಸಲಿದ್ದಾರೆ. ಕಂಪನಿಯು ಕಾಯಂ ಸಿಇಒಗಾಗಿ ಹುಡುಕಾಟವನ್ನು ಮುಂದುವರಿಸಲಿದೆ. ಹೆಚ್ಚುವರಿಯಾಗಿ, ಕಂಪನಿಯ ಅಧ್ಯಕ್ಷ ಗ್ರೆಗ್ ಬ್ರಾಕ್‌ಮನ್ ಸಹ ರಾಜೀನಾಮೆ ನೀಡಲಿದ್ದಾರೆ. ಓಪನ್‌ ಎಐ ಕುರಿತಾಗಿ ಚರ್ಚೆ ಮಾಡಲು ನಡೆದಿದ್ದ ಗೂಗಲ್‌ ಮೀಟ್‌ನಲ್ಲಿ ಸ್ಯಾಮ್ ಆಲ್ಟ್‌ಮನ್‌ಗೆ ಹುದ್ದೆಯಿಂದ ಕೆಳಗಿಳಿಯುವಂತೆ ಮಂಡಳಿ ಸೂಚನೆ ನೀಡಿತ್ತು ಎನ್ನಲಾಗಿದೆ. ಸ್ಯಾನ್ ಫ್ರಾನ್ಸಿಸ್ಕೋ ಮೂಲದ ಓಪನ್‌ ಎಐ ಕೃತಕ ಬುದ್ಧಿಮತ್ತೆಯನ್ನು ಅಭಿವೃದ್ಧಿಪಡಿಸುವ ಖಾಸಗಿ ಸಂಶೋಧನಾ ಪ್ರಯೋಗಾಲಯವಾಗಿದೆ. ಇದನ್ನು 2015 ರಲ್ಲಿ ಆಲ್ಟ್ಮನ್, ಎಲಾನ್‌ ಮಸ್ಕ್ (ಇವರು ಓಪನ್‌ಎಐ ಮಂಡಳಿಯಲ್ಲಿಲ್ಲ) ಮತ್ತು ಇತರರು ಲಾಭರಹಿತ ಸಂಸ್ಥೆಯಾಗಿ ಸ್ಥಾಪಿಸಿದರು.
ಓಪನ್‌ ಎಐನಲ್ಲಿ ಕಳೆದ ಸಮಯವನ್ನು ನಾನು ಬಹಳವಾಗಿ ಇಷ್ಟಪಟ್ಟಿದ್ದೇನೆ ಎಂದು ಸಿಇಒ ಹುದ್ದೆಯನ್ನು ತೊರೆಯುವ ಬಗ್ಗೆ ಸ್ಯಾಮ್ ಆಲ್ಟ್ಮನ್ ಸೋಶಿಯಲ್‌ ಮೀಡಿಯಾ ವೇದಿಕೆಯಲ್ಲಿ ಬರೆದುಕೊಂಡಿದ್ದಾರೆ ಇದು ನನಗೆ ವೈಯಕ್ತಿಕವಾಗಿ ಮತ್ತು ಜಗತ್ತಿಗೆ ಆಶಾದಾಯಕವಾಗಿ ಸ್ವಲ್ಪ ಪರಿವರ್ತನೆಯಾಗಿದೆ. ಅಂತಹ ಪ್ರತಿಭಾವಂತ ಜನರೊಂದಿಗೆ ಕೆಲಸ ಮಾಡಲು ನಾನು ಇಷ್ಟಪಡುತ್ತೇನೆ. ಈಗ ನಾನು ಮುಂದೆ ಏನು ಮಾಡುತ್ತೇನೆ ಎಂಬುದರ ಕುರಿತು ಹೇಳಲು ಬಹಳಷ್ಟು ಇದೆ ಎಂದು ಅವರು ಬರೆದಿದ್ದಾರೆ.
ಯಾರೀಕೆ ಮೀರಾ ಮುರುತಿ: ಮಾಧ್ಯಮ ವರದಿಗಳ ಪ್ರಕಾರ, 34 ವರ್ಷದ ಮೀರಾ ಅವರ ಪೋಷಕರು ಭಾರತೀಯ ಮೂಲದವರು. ಆದರೆ, ಮೀರಾ ಜನಿಸಿದ್ದು ಅಲ್ಬೇನಿಯಾದಲ್ಲಿ ಬಳಿಕ ಅವರು ಕೆನಡಾದಲ್ಲಿ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಓದಿದ್ದರು. ಅಲ್ಲಿನ ಡಾರ್ಟ್ಮೌತ್ ಕಾಲೇಜಿನಲ್ಲಿ ಪದವಿಪೂರ್ವ ವಿದ್ಯಾರ್ಥಿಯಾಗಿದ್ದಾಗ ಅವರು ಹೈಬ್ರಿಡ್ ರೇಸ್‌ಕಾರ್ ಅನ್ನು ನಿರ್ಮಿಸಿದರು. ಶಾಲೆಯಲ್ಲಿದ್ದಾಗ, ಅವರು ಗೋಲ್ಡ್‌ಮನ್ ಸ್ಯಾಚ್ಸ್‌ನಲ್ಲಿ ತರಬೇತಿ ಪಡೆದರು. ಟೆಸ್ಲಾದಲ್ಲಿ ಕೆಲ ವರ್ಷ ಕೆಲಸ ಮಾಡಿದ ಬಳಿಕ 20018ರಲ್ಲಿ ಇವರು ಓಪನ್‌ ಎಐಗೆ ಸೇರಿಕೊಂಡಿದ್ದರು. ಟೆಸ್ಲಾದಲ್ಲಿ ಮಾಡೆಲ್‌ ಎಕ್ಸ್‌ ಕಾರ್‌ಅನ್ನು ನಿರ್ಮಾಣ ಮಾಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಟೆಸ್ಲಾದಲ್ಲಿ ಮೂರು ವರ್ಷಗಳ ಕಾಲ ಸೀನಿಯರ್‌ ಪ್ರಾಡಕ್ಟ್‌ ಮ್ಯಾನೇಜರ್‌ ಆಗಿ ಕೆಲಸ ನಿರ್ವಹಿಸಿದ ಬಳಿಕ ಎಐ ಕ್ಷೇತ್ರದಲ್ಲಿ ಕೆಲಸ ಮಾಡಲು ತೀರ್ಮಾನ ಮಾಡಿದ್ದರು.
OpenAI ಈಕೆಯನ್ನು ಅಪ್ಲೈಡ್ AI ಮತ್ತು ಪಾಲುದಾರಿಕೆಗಳ ಉಪಾಧ್ಯಕ್ಷರನ್ನಾಗಿ ನೇಮಿಸಿತು. ಆ ಸಮಯದಲ್ಲಿ, ಕಂಪನಿಯು ಲಾಭರಹಿತ ಸಂಸ್ಥೆಯಾಗಿತ್ತು. ಇದು ನಂತರ ಹಣವನ್ನು ಸಂಗ್ರಹಿಸಲು ಮತ್ತು AI ಉತ್ಪನ್ನಗಳನ್ನು ರಚಿಸಲು ಲಾಭದಾಯಕ ಕಂಪನಿಯಾಗಿ ತನ್ನನ್ನು ಪುನರ್ರಚಿಸಿತು. ಮೀರಾ ಮುರತಿ ಅವರು ChatGPT ಮತ್ತು DALL-E ನಂತಹ ಕ್ರಾಂತಿಕಾರಿ ಉತ್ಪನ್ನಗಳ ಅಭಿವೃದ್ಧಿಯಲ್ಲಿ ಕೆಲಸ ಮಾಡಿದ್ದಾರೆ. ಕಳೆದ ವರ್ಷ ಅವರನ್ನು ಮುಖ್ಯ ತಂತ್ರಜ್ಞಾನ ಅಧಿಕಾರಿ ಅಂದರೆ ಸಿಟಿಒ ಮಾಡಲಾಗಿತ್ತು. ಇಂಜಿನಿಯರ್‌ಗಳು ಚಾಟ್‌ಜಿಪಿಟಿಯ ಆವೃತ್ತಿಗಳನ್ನು ನಿಗದಿತ ಅವಧಿಯಲ್ಲಿ ಅಭಿವೃದ್ಧೊ ಮಾಡುತ್ತಿದ್ದಾರೆ ಎಂದು ಹೇಳಿದ್ದರು.
ಭಾರತದಿಂದ ChatGPTಗೆ ಪ್ರತಿಸ್ಪರ್ಧೆ ಸಾಧ್ಯವಿಲ್ಲ, AI ಸಂಸ್ಥಾಪಕನ ಸವಾಲು ಸ್ವೀಕರಿಸಿದ ಟೆಕ್ ಮಹೀಂದ್ರ!
ಚಾಟ್‌ ಜಿಪಿಟಿ ನಿರ್ಮಾಣ ಮಾಡಿದ ಓಪನ್‌ ಎಐ ಕಂಪನಿಯ ಮೂಲ ಸದಸ್ಯರು
ಸ್ಯಾಮ್ ಆಲ್ಟ್ಮನ್: ಉದ್ಯಮಿ. ಓಪನ್‌ಎಐಗಿಂತ ಮೊದಲು, ಅವರು ವೈ-ಕಾಂಬಿನೇಟರ್‌ನ ಅಧ್ಯಕ್ಷರಾಗಿದ್ದರು, ಇದು ಸ್ಟಾರ್ಟ್-ಅಪ್‌ಗಳಿಗೆ ಧನಸಹಾಯ ನೀಡಿತು. ನಂತರ OpenAI ನ CEO ಆದರು.
ಚಾಟ್‌ ಜಿಪಿಟಿಯಿಂದ ನೌಕರಿ ನಷ್ಟ ಸಂಭವ : ಸಿಇಒ ಸ್ಯಾಮ್!
ಇಲ್ಯಾ ಸೆಟ್‌ಸ್ಕೇವರ್: ಓಪನ್‌ಎಐನ ಮುಖ್ಯ ವಿಜ್ಞಾನಿ.
ಗ್ರೆಗ್ ಬ್ರಾಕ್‌ಮನ್: ಓಪನ್‌ಎಐ ಅಧ್ಯಕ್ಷ.
ವೊಜ್ಸೀಕ್ ಜೊರೆಂಬಾ: OpenAI ನಲ್ಲಿ ಕೋಡೆಕ್ಸ್ ಮತ್ತು ಲಾಂಗ್ವೇಜ್ ವಾಚ್ ಸಂಶೋಧನಾ ತಂಡಗಳ ಮುಖ್ಯಸ್ಥ.
ಎಲೋನ್ ಮಸ್ಕ್: OpenAI ನಲ್ಲಿ ಹೂಡಿಕೆ ಮಾಡಿದ್ದಾರೆ.
ಜಾನ್ ಶುಲ್ಮನ್: AI ಸಂಶೋಧನಾ ವಿಜ್ಞಾನಿ.
ಆಂಡ್ರೆಜ್ ಕಾರ್ಪತಿ: ಸಂಶೋಧನಾ ವಿಜ್ಞಾನಿ.
ಈ ಎಲ್ಲರಲ್ಲಿ, ಸ್ಯಾಮ್ ಆಲ್ಟ್ಮನ್ ಪಾತ್ರವು ಅತ್ಯಂತ ಮಹತ್ವದ್ದಾಗಿದೆ, ಏಕೆಂದರೆ ಚಾಟ್‌ ಜಿಪಿಟಿ ಸಂಶೋಧನೆಯನ್ನು ವಿನ್ಯಾಸಗೊಳಿಸಿದವರು ಅವರಾಗಿದ್ದರು. ಅಂದರೆ, AI ಗೆ ಸಂಬಂಧಿಸಿದ ಈ ಸಂಶೋಧನೆಯನ್ನು ಹೇಗೆ ಮಾಡಲಾಗುತ್ತದೆ ಮತ್ತು ಏನನ್ನು ಉತ್ಪಾದಿಸಬೇಕು ಎಂಬುದನ್ನು ಅವರೇ ನಿರ್ಧರಿಸಿದ್ದರು.