Dev Diwali 2022 ಮೇಲೆ ಗ್ರಹಣದ ಕರಿನೆರಳು, ಏನಿದು ದೇವರ ದೀಪಾವಳಿ?

ಈ ಬಾರಿ ದೀಪಾವಳಿ ಆಚರಣೆಗೆ ಸೂರ್ಯಗ್ರಹಣ ಕೊಂಚ ಮಟ್ಟಿಗೆ ಅಡ್ಡಿ ತಂದಿತ್ತು. ಹಾಗೆಯೇ ಮುಂಬರುವ ದೇವ್ ದೀಪಾವಳಿಗೆ ಚಂದ್ರಗ್ರಹಣದ ನೆರಳು ಬೀಳಲಿದೆ. ಏನಪ್ಪಾ ಈ ಕಾಕತಾಳೀಯ?

ಮೊನ್ನೆಯಷ್ಟೇ ದೀಪಾವಳಿ ಸಂಭ್ರಮದ ಮೇಲೆ ಸೂರ್ಯಗ್ರಹಣದ ಕತ್ತಲು ಕೊಂಚ ಮಟ್ಟಿಗೆ ಆತಂಕ ಸೃಷ್ಟಿಸಿತ್ತು. ಇದೀಗ ದೀಪಾವಳಿಯಾಗಿ 15 ದಿನಕ್ಕೆ ಬರುವ ದೇವ್ ದೀಪಾವಳಿಗೆ ಚಂದ್ರಗ್ರಹಣವಾಗುತ್ತಿದೆ. ಏನಿದು ದೇವ್ ದೀಪಾವಳಿ, ಯಾವಾಗ ಆಚರಿಸಲಾಗುತ್ತದೆ, ಏಕಾಗಿ ಆಚರಿಸಲಾಗುತ್ತದೆ, ಚಂದ್ರಗ್ರಹಣದಿಂದ ಇದಕ್ಕೇನು ಅಡ್ಡಿ ಎಂಬುದನ್ನು ವಿವರವಾಗಿ ತಿಳಿಯೋಣ. 

ವರ್ಷದ ಕೊನೆಯ ಚಂದ್ರಗ್ರಹಣ ಈ ಬಾರಿಯ ಕಾರ್ತಿಕ ಪೂರ್ಣಿಮೆಯಂದು ಸಂಭವಿಸುತ್ತಿದೆ. ಪಂಚಾಂಗದ ಪ್ರಕಾರ, ಕಾರ್ತಿಕ ಪೂರ್ಣಿಮೆಯ ತಿಥಿಯು 7 ಮತ್ತು 8 ನವೆಂಬರ್ 2022ರಂದು ಎರಡು ದಿನಗಳು ಇರಲಿದೆ. ದೇವ್ ದೀಪಾವಳಿಯನ್ನು ಕಾರ್ತಿಕ ಪೂರ್ಣಿಮೆಯ ದಿನದಂದು ಆಚರಿಸಲಾಗುತ್ತದೆ. ಹೀಗಾಗಿ ಈ ಬಾರಿಯ ದೇವ್ ದೀಪಾವಳಿಯನ್ನು ಚಂದ್ರಗ್ರಹಣದ ನೆರಳಿನಲ್ಲಿ ಆಚರಿಸಬೇಕಾಗುವುದು.

ದೇವ್ ದೀಪಾವಳಿ ಮುಹೂರ್ತ
ದೇವ್ ದೀಪಾವಳಿಯನ್ನು, ಕಾರ್ತಿಕ ಪೂರ್ಣಿಮಾ ತಿಥಿಯಂದು ಪ್ರದೋಷ ಕಾಲದಲ್ಲಿ ನವೆಂಬರ್ 7ರಂದು ಆಚರಿಸಲಾಗುತ್ತದೆ. ಕಾರ್ತಿಕ ಮಾಸದ ಶುಕ್ಲ ಪಕ್ಷದ ಹುಣ್ಣಿಮೆ ದಿನಾಂಕ ನವೆಂಬರ್ 7ರಂದು ಸಂಜೆ 04:15ರಿಂದ ನವೆಂಬರ್ 8ರ ಸಂಜೆ 04:31ರವರೆಗೆ ಇರುತ್ತದೆ. 2022ರ ಎರಡನೇ ಚಂದ್ರಗ್ರಹಣವು ನವೆಂಬರ್ 8ರಂದು ಮಧ್ಯಾಹ್ನ 1.32 ರಿಂದ 7.27 ರವರೆಗೆ ಭಾರತದ ಸಮಯದ ಪ್ರಕಾರ ಸಂಭವಿಸುತ್ತದೆ, ಇದು ಭಾರತದಲ್ಲಿಯೂ ಗೋಚರಿಸುತ್ತದೆ. ಭಾರತದಲ್ಲಿ ಈ ಚಂದ್ರಗ್ರಹಣವು 8 ನವೆಂಬರ್ 2022ರಂದು ಭಾರತೀಯ ಕಾಲಮಾನದ ಪ್ರಕಾರ ಸಂಜೆ 5.32ಕ್ಕೆ ಗೋಚರಿಸುತ್ತದೆ ಮತ್ತು ಸಂಜೆ 6.18 ಕ್ಕೆ ಕೊನೆಗೊಳ್ಳುತ್ತದೆ. ಈ ರೀತಿಯಾಗಿ ನೋಡಿದರೆ ತಿಥಿ ಒಂದೇ ಆದರೂ ದೇವ್ ದೀಪಾವಳಿಗೆ ಚಂದ್ರಗ್ರಹಣ ಅಡ್ಡಿಯಾಗಲಾರದು. 

ದೇವ್ ದೀಪಾವಳಿಯ ಮಹತ್ವ(Dev Diwali significance)
ದೇವ್ ದೀಪಾವಳಿಯನ್ನು ಪ್ರತಿ ವರ್ಷ ಕಾರ್ತಿಕ ಮಾಸದ ಹುಣ್ಣಿಮೆಯಂದು ಆಚರಿಸಲಾಗುತ್ತದೆ. ಹಿಂದೂ ಧರ್ಮದಲ್ಲಿ ದೀಪಾವಳಿಯಂತೆ ದೇವ್ ದೀಪಾವಳಿಗೂ ಮಹತ್ವವಿದೆ. ಈ ಹಬ್ಬವನ್ನು ಬೆಳಕಿನ ಹಬ್ಬ ಎಂದೂ ಕರೆಯುತ್ತಾರೆ. ಈ ದೇವ್ ದೀಪಾವಳಿ ಹಬ್ಬವನ್ನು ದೀಪಾವಳಿಯ ನಂತರ ನಿಖರವಾಗಿ 15 ದಿನಗಳ ನಂತರ ಆಚರಿಸಲಾಗುತ್ತದೆ. ದೇವ್ ದೀಪಾವಳಿಯನ್ನು ಮುಖ್ಯವಾಗಿ ಗಂಗಾ ನದಿಯ ದಡದಲ್ಲಿರುವ ಕಾಶಿಯಲ್ಲಿ ಆಚರಿಸಲಾಗುತ್ತದೆ. ಈ ದಿನದಂದು ದೇವತೆಗಳು ಪವಿತ್ರ ಭೂಮಿ ಕಾಶಿಗೆ ಇಳಿದು ದೀಪಾವಳಿಯನ್ನು ಆಚರಿಸುತ್ತಾರೆ ಎಂದು ನಂಬಲಾಗಿದೆ. ಈ ದೇವರ ದೀಪಾವಳಿಯಂದು ವಾರಣಾಸಿಯ ಘಾಟ್‌ಗಳನ್ನು ಮಣ್ಣಿನ ದೀಪಗಳ ಬೆಳಗುವಿಕೆಯಿಂದ ಅಲಂಕರಿಸಲಾಗುತ್ತದೆ. ಈ ದಿನದಂದು ಕಾಶಿ ನಗರದಲ್ಲಿ ವಿಭಿನ್ನವಾದ ಸೊಬಗು ಕಂಡುಬರುತ್ತದೆ. ದೇವ್ ದೀಪಾವಳಿಯ ರಾತ್ರಿ ಗಂಗಾ ಘಾಟ್‌ನ ನೋಟವು ಮೋಡಿ ಮಾಡುತ್ತದೆ. 

ಪೌರಾಣಿಕ ಹಿನ್ನೆಲೆ(Mythological background)
ದಂತಕಥೆಯ ಪ್ರಕಾರ, ಕಾರ್ತಿಕ ಪೂರ್ಣಿಮೆಯ ದಿನದಂದು ಶಿವನು ರಾಕ್ಷಸ ತ್ರಿಪುರಾಸುರನನ್ನು ಕೊಂದನು. ತ್ರಿಪುರಾಸುರನ ವಧೆಯ ನಂತರ ಎಲ್ಲಾ ದೇವ-ದೇವತೆಗಳು ಒಟ್ಟಾಗಿ ಸಂತೋಷಪಟ್ಟರು. ಈ ದಿನದಂದು ಎಲ್ಲಾ ದೇವತೆಗಳು ಶಿವನೊಂದಿಗೆ ಭೂಮಿಗೆ ಬಂದು ದೀಪವನ್ನು ಬೆಳಗಿಸುವ ಮೂಲಕ ಸಂತೋಷವನ್ನು ಆಚರಿಸುತ್ತಾರೆ. ಈ ಕಾರಣಕ್ಕಾಗಿಯೇ ಕಾರ್ತಿಕ ಪೂರ್ಣಿಮೆಯಂದು ಕಾಶಿಯಲ್ಲಿ ದೇವ್ ದೀಪಾವಳಿಯನ್ನು ಆಚರಿಸುವ ಸಂಪ್ರದಾಯ ಶತಮಾನಗಳಿಂದಲೂ ನಡೆದುಕೊಂಡು ಬಂದಿದೆ.

ದೇವ್ ದೀಪಾವಳಿಯಂದು ದೀಪ ದಾನದ ಮಹತ್ವ(Deepdaan significance)
ದೇವ್ ದೀಪಾವಳಿಯ ದಿನದಂದು ಗಂಗಾ ಸ್ನಾನದ ಮಹತ್ವವನ್ನು ಶಾಸ್ತ್ರಗಳಲ್ಲಿ ಹೇಳಲಾಗಿದೆ. ಈ ದಿನ ಗಂಗಾಸ್ನಾನ ಮಾಡುವುದರಿಂದ ವರ್ಷವಿಡೀ ಶುಭ ಫಲ ಸಿಗುತ್ತದೆ ಎಂಬ ನಂಬಿಕೆ ಇದೆ. ಅಲ್ಲದೆ ಈ ದಿನ ಪವಿತ್ರ ನದಿಯಲ್ಲಿ ಸ್ನಾನ ಮಾಡಿದ ನಂತರ ದೀಪವನ್ನು ದಾನ ಮಾಡುವುದು ಶ್ರೇಯಸ್ಕರ. ಈ ದೀಪವನ್ನು ನದಿಯ ದಡದಲ್ಲಿ ಮಾಡಲಾಗುತ್ತದೆ.