ಭಾರತದ ಅತ್ಯಮೂಲ್ಯ 500 ಕಂಪನಿಗಳ ಪಟ್ಟಿ ಫೆ.12ರಂದು ಬಿಡುಗಡೆ ಮಾಡಲಾಗಿದ್ದು, ಈ ಪಟ್ಟಿಯಲ್ಲಿ ರಿಲಯನ್ಸ್ ಮೊದಲ ಸ್ಥಾನ ಅಲಂಕರಿಸಿದೆ. ಇದರ ಜೊತೆಗೆ ಕರ್ನಾಟಕದ ನವೋದ್ಯಮ ಕಂಪೆನಿ ಪ್ರಾಬಲ್ಯ ಸಾಧಿಸಿದೆ.
ನವದೆಹಲಿ (ಫೆ.13): ಭಾರತದ ಅತ್ಯಮೂಲ್ಯ 500 ಕಂಪನಿಗಳ ಪಟ್ಟಿ ಫೆ.12ರಂದು ಬಿಡುಗಡೆ ಮಾಡಲಾಗಿದ್ದು, ಈ ಪಟ್ಟಿಯಲ್ಲಿ ರಿಲಯನ್ಸ್ ಮೊದಲ ಸ್ಥಾನ ಅಲಂಕರಿಸಿದ್ದು, ಈ ಬಾರಿ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ ಮತ್ತು ಎಚ್‌ಡಿಎಫ್‌ಸಿ ಬ್ಯಾಂಕ್ ಕ್ರಮವಾಗಿ 2 ಮತ್ತು 3ನೇ ಸ್ಥಾನದಲ್ಲಿದೆ. ಇದರ ಜೊತೆಗೆ ಕರ್ನಾಟಕ ಮೂಲದ ನವೋದ್ಯಮಗಳು ಪ್ರಾಬಲ್ಯವನ್ನು ಸಾಧಿಸಿರುವುದು ವರದಿಯಿಂದ ಬಹಿರಂಗವಾಗಿದೆ.
ಆಕ್ಸಿಸ್ ಬ್ಯಾಂಕ್‌ನ ಖಾಸಗಿ ಬ್ಯಾಂಕಿಂಗ್ ಘಟಕಗಳಾದ ಬರ್ಗಂಡಿ ಪ್ರೈವೇಟ್ ಮತ್ತು ಹುರುನ್ ಇಂಡಿಯಾ ಜಂಟಿಯಾಗಿ ಬಿಡುಗಡೆ ಮಾಡಿರುವ ವರದಿಯಲ್ಲಿ ಭಾರತದ ಗರಿಷ್ಠ ಮೌಲ್ಯದ ಕಂಪನಿಗಳ ಇತ್ತೀಚಿನ ವರದಿಯಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್ (ಆರ್‌ಐಎಲ್) ಮೂರನೇ ವರ್ಷ ಅಗ್ರಸ್ಥಾನ ಅಲಂಕರಿಸಿದೆ.
ಭಾರತದಲ್ಲಿದೆ ವಿಶ್ವದ ಅತ್ಯುತ್ತಮ ಡಿಜಿಟಲ್ ಎಕಾನಮಿ;ನೊಬೆಲ್ ಪುರಸ್ಕೃತ ಸ್ಪೆನ್ಸ್ ಮೆಚ್ಚುಗೆ!
ಬಿಡುಗಡೆ ಮಾಡಿರುವ 500 ಕಂಪೆನಿಗಳ ಪಟ್ಟಿಯಲ್ಲಿ ರಿಲಯನ್ಸ್ ಇಂಡಸ್ಟ್ರೀಸ್‌ನ ಒಟ್ಟು ಮಾರುಕಟ್ಟೆ ಮೌಲ್ಯ 15.6 ಲಕ್ಷ ಕೋಟಿ ರೂಪಾಯಿಗಳಲ್ಲಿ ದಾಖಲಿಸಿದೆ, ಇದು ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ ನ 12.4 ಲಕ್ಷ ಕೋಟಿ ರೂಪಾಯಿ ಮತ್ತು ಎಚ್‌ಡಿಎಫ್‌ಸಿ ಬ್ಯಾಂಕ್ 11.3 ಲಕ್ಷ ಕೋಟಿ ರೂ. ಗಿಂತ ಹೆಚ್ಚು.
ಎಚ್‌ಡಿಎಫ್‌ಸಿ ಬ್ಯಾಂಕ್‌ನೊಂದಿಗೆ ಎಚ್‌ಡಿಎಫ್‌ಸಿಯ ಎಲ್ಲಾ ವಿಂಗ್‌ಗಳ ವಿಲೀನದ ಕಾರಣದಿಂದ 10 ಲಕ್ಷ ಕೋಟಿ ಮಾರುಕಟ್ಟೆ ಮೌಲ್ಯ ಹೊಂದಿರುವ ಮೂರನೇ ಭಾರತೀಯ ಕಂಪನಿಯಾಗಿ ಹೊರ ಹೊಮ್ಮಲು ಸಾಧ್ಯವಾಯ್ತು ಎಂದು ವರದಿ ಹೇಳಿದೆ.
ಉದಯೋನ್ಮುಖ ಕಂಪನಿಗಳಲ್ಲಿ ಸುಜ್ಲಾನ್ ಎನರ್ಜಿ ಅತ್ಯಂತ ವೇಗದಲ್ಲಿ ಬೆಳೆಯುತ್ತಿರುವ ಕಂಪೆನಿಯಾಗಿದೆ. 2023 ರಲ್ಲಿ ಸುಜ್ಲಾನ್ ಎನರ್ಜಿ ಶೇ.436 ಬೆಳವಣಿಗೆಯನ್ನು ದಾಖಲಿಸಿದೆ. ವೇಗವಾಗಿ ಬೆಳೆಯುತ್ತಿರುವ ಕಂಪನಿಗಳ ಪಟ್ಟಿಯಲ್ಲಿ ಜಿಂದಾಲ್ ಸ್ಟೇನ್‌ಲೆಸ್ ಮತ್ತು JSW ಇನ್ಫ್ರಾಸ್ಟ್ರಕ್ಚರ್ ನಂತರದ ಸ್ಥಾನದಲ್ಲಿ ಪ್ರಾಬಲ್ಯ ಹೊಂದಿದೆ.
HCL ಟೆಕ್ನಾಲಜೀಸ್ ಮತ್ತು ಕೋಟಕ್ ಮಹೀಂದ್ರಾ ಬ್ಯಾಂಕ್ ಈ ವರ್ಷ ಟಾಪ್ 10ರೊಳಗಿನ ಪಟ್ಟಿಗೆ ಮರಳಿದೆ. ಹೆಚ್ಚುವರಿಯಾಗಿ, ರಿಲಯನ್ಸ್ ಇಂಡಸ್ಟ್ರೀಸ್‌ನಿಂದ ಹೊರಬಂದ ನಂತರ ಜಿಯೋ ಫೈನಾನ್ಷಿಯಲ್ ಸರ್ವಿಸಸ್ 28 ನೇ ಸ್ಥಾನವನ್ನು ಪಡೆದುಕೊಂಡಿದೆ.
2023 ರ ಪಟ್ಟಿಯಲ್ಲಿರುವ ಕಂಪನಿಗಳ ಒಟ್ಟು ಮಾರುಕಟ್ಟೆ ಮೌಲ್ಯವು ಒಂದು ವರ್ಷದ ಹಿಂದೆ 226 ಲಕ್ಷ ಕೋಟಿ ರೂಪಾಯಿಗಳಿಗೆ ಹೋಲಿಸಿದರೆ 2023ರಲ್ಲಿ 231 ಲಕ್ಷ ಕೋಟಿ ರೂಪಾಯಿಗಳಿಗೆ ಹೆಚ್ಚಾಗಿದೆ. ಪಟ್ಟಿಯಲ್ಲಿರುವ ಕಂಪನಿಗಳ ಒಟ್ಟು ಮಾರುಕಟ್ಟೆ ಮೌಲ್ಯವು ಸೌದಿ ಅರೇಬಿಯಾ, ಸ್ವಿಟ್ಜರ್ಲೆಂಡ್ ಮತ್ತು ಸಿಂಗಾಪುರದಂತಹ ಆಂತರಿಕ ಉತ್ಪನ್ನ (ಜಿಡಿಪಿ) ಗಿಂತ ಹೆಚ್ಚಾಗಿದೆ ಎಂದು ವರದಿ ತಿಳಿಸಿದೆ.
500 ಹೆಚ್ಚು ಮೌಲ್ಯಯುತ ಕಂಪನಿಗಳ ಪಟ್ಟಿಯಲ್ಲಿ 437 ಕಂಪನಿಗಳು ತಮ್ಮ ಮಂಡಳಿಗಳಲ್ಲಿ ಮಹಿಳಾ ಪ್ರಾತಿನಿಧ್ಯಕ್ಕೆ ಒತ್ತು ನೀಡಿದೆ. ಮುಂಚೂಣಿಯಲ್ಲಿರುವ ಮಹಿಳಾ ಉದ್ಯೋಗದಾತ ಕಂಪೆನಿಳಲ್ಲಿ 1,35,703 ಮಹಿಳೆಯರಿಗೆ ಉದ್ಯೋಗ ಕಲ್ಪಿಸಿರುವ ಇನ್ಫೋಸಿಸ್‌ ಮುಂಚೂಣಿಯಲ್ಲಿದೆ. ನಂತರದ ಸ್ಥಾನದಲ್ಲಿ ವಿಪ್ರೋ 90,721 ಇದೆ. 3ನೇ ಸ್ಥಾನದಲ್ಲಿನ ಪೇಜ್‌ ಇಂಡಸ್ಟ್ರೀಸ್‌ನಲ್ಲಿ 20,113 ಮಹಿಳಾ ಉದ್ಯೋಗಿಗಳಿದ್ದಾರೆ. ವಲಯವಾರು ಪ್ರಾತಿನಿಧ್ಯದ ವಿಷಯದಲ್ಲಿ 76 ಕಂಪೆನಿಗಳು ಹಣಕಾಸು ಸೇವೆಗಳು ಮತ್ತು 58 ಕಂಪನಿಗಳು ಆರೋಗ್ಯ ರಕ್ಷಣೆಯ ಬಗ್ಗೆ ಮುಂಚೂಣಿಯಲ್ಲಿದೆ. ಗ್ರಾಹಕ ಸರಕುಗಳಿಗೆ ಹತ್ತಿರವಾಗಿ 38 ಕಂಪನಿಗಳು ಕರ್ತವ್ಯ ನಿರ್ವಹಿಸುತ್ತವೆ.
ಕರ್ನಾಟಕದ ನವೋದ್ಯಮ ಕಂಪೆನಿಗಳ ಪ್ರಾಬಲ್ಯ:
ವಿಶೇಷವೆಂದರೆ ಭಾರತದ ಅತ್ಯಮೂಲ್ಯ 500 ಕಂಪನಿಗಳ ಪಟ್ಟಿಯಲ್ಲಿ ಕರ್ನಾಟಕ ಮೂಲದ ಕಂಪನಿಗಳಾದ ಜೆರೋಧಾ, ರೇಜರ್‌ಪೇ, ಸ್ವಿಗಿ, ಕ್ರೆಡ್‌, ಮೀಶೊ ಮತ್ತು ಓಲಾ ಎಲೆಕ್ಟ್ರಿಕ್‌ನಂತಹ ಹೊಸ ನವೋದ್ಯಮಗಳು ಸ್ಥಾನ ಪಡೆದಿದೆ. ಜೊತೆಗೆ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ದೈತ್ಯ ಕಂಪನಿಗಳಾದ ಇನ್ಫೋಸಿಸ್‌, ವಿಪ್ರೋ, ಮತ್ತು ಮೈಂಡ್‌ಟ್ರೀ ಕೂಡ ಈ ಪಟ್ಟಿಯಲ್ಲಿದೆ. ಪಟ್ಟಿಯಲ್ಲಿನ 61 ಕಂಪನಿಗಳ ನೆಲೆ ಇರುವುದು ಕರ್ನಾಟಕದಲ್ಲಿ ಎಂಬುದು ಮತ್ತೊಂದು ವಿಶೇಷ. ಇವುಗಳಲ್ಲಿ 35 ನವೋದ್ಯಮ ಕ್ಷೇತ್ರದಿಂದ ಗುರುತಿಸಿಕೊಂಡಿದೆ.
ಪಟ್ಟಿಯಲ್ಲಿರುವ ಅರ್ಧಕ್ಕಿಂತ ಹೆಚ್ಚು ಕಂಪನಿಗಳು ಕಳೆದ ವರ್ಷದಲ್ಲಿ 1000 ಕೋಟಿ ರೂ ಗಿಂತ ಹೆಚ್ಚಿನ ಮೌಲ್ಯದ ಬೆಳವಣಿಗೆಯನ್ನು ದಾಖಲಿಸಿವೆ. ಅದರಲ್ಲಿ 75 ಕಂಪನಿಗಳು ರೂ 10,000 ಕೋಟಿಗಿಂತ ಹೆಚ್ಚಿನ ಮೌಲ್ಯದ ಬೆಳವಣಿಗೆಯನ್ನು ದಾಖಲಿಸಿವೆ. ಉದಾಹರಣೆಗೆ, ಮೇಘಾ ಇಂಜಿನಿಯರಿಂಗ್ (150 ಪ್ರತಿಶತದಷ್ಟು), ಉತ್ಪಾದನಾ ಸೇವೆಗಳ ಸ್ಟಾರ್ಟ್ಅಪ್ ಝೆಟ್ವರ್ಕ್ (100 ಪ್ರತಿಶತದಷ್ಟು) ಮತ್ತು ಬೆನೆಟ್ ಕೋಲ್ಮನ್ (ಶೇಕಡಾ 100 ರಷ್ಟು) ಪಟ್ಟಿಯಲ್ಲಿರದ ಕಂಪನಿಗಳಲ್ಲಿ ಮೌಲ್ಯದ ಬೆಳವಣಿಗೆಯಾಗಿದೆ.
ವರದಿ ಪ್ರಕಾರ ಮೌಲ್ಯಯುವ ಕಂಪೆನಿಗಳ ಪಟ್ಟಿಯಲ್ಲಿರುವ 44 ಪ್ರತಿಶತ ಕಂಪನಿಗಳು ಸೇವೆಗಳನ್ನು ಮಾರಾಟ ಮಾಡುತ್ತವೆ; 56 ಪ್ರತಿಶತದಷ್ಟು ಜನರು ಭೌತಿಕ ಉತ್ಪನ್ನಗಳನ್ನು ಮಾರಾಟ ಮಾಡುತ್ತಾರೆ ಆದರೆ 66 ಪ್ರತಿಶತ ಕಂಪನಿಗಳು ಗ್ರಾಹಕರನ್ನು ಎದುರಿಸುತ್ತಿವೆ, 34 ಪ್ರತಿಶತ ವ್ಯಾಪಾರದಿಂದ ವ್ಯವಹಾರಕ್ಕೆ (B2B) ಇವೆ.