ಅತ್ಯಾಧುನಿಕ, ನೂತನ ವೈಶಿಷ್ಟ್ಯಗಳ ಜತೆಗೆ ಶೀಘ್ರದಲ್ಲೇ ಮಾರುಕಟ್ಟೆಗೆ ಲಗ್ಗೆ ಇಡಲಿದೆ ಮಹೀಂದ್ರಾ ಥಾರ್ 2.0!

ಮಹೀಂದ್ರಾ ಥಾರ್‌ ಇದೀಗ ದೇಶದ ಅತ್ಯಂತ ಜನಪ್ರಿಯ SUV ಗಳಲ್ಲಿ ಒಂದಾಗಿದೆ. ಈಗಾಗಲೇ ಇದು ಸಾಕಷ್ಟು ಖ್ಯಾತಿ ಗಳಿಸಿದ್ದು, ಭಾರತದ ರಸ್ತೆಗಳಲ್ಲಿ ಹೆಚ್ಚಾಗಿ ಕಾಣಬಹುದಾಗಿದೆ. ಆದರೆ, ಮುಂದಿನ ವರ್ಷ ಮಹೀಂದ್ರಾ ಥಾರ್‌ನ ಹೊಸ ವರ್ಷನ್‌ ಭಾರತೀಯ ಮಾರುಕಟ್ಟೆಗಳಿಗೆ ಲಗ್ಗೆ ಇಡಲಿದೆ. ಈ ಹೊಸ ಮಹೀಂದ್ರಾ ಥಾರ್‌ನ ವೈಶಿಷ್ಟ್ಯಗಳೇನು ನೋಡಿ..

ಭಾರತೀಯ ಮಾರುಕಟ್ಟೆಯು ಥಾರ್‌ನ 5 - ಬಾಗಿಲಿನ ಆವೃತ್ತಿಯನ್ನು ಶೀಘ್ರದಲ್ಲೇ ಪಡೆಯಲಿದೆ. ಮಹೀಂದ್ರಾ ಥಾರ್ 5 - ಡೋರ್ ಭಾರತದಲ್ಲಿ 2024 ರಲ್ಲಿ ಬಿಡುಗಡೆಯಾಗಲಿದೆ ಎಂದು ಕಂಪನಿಯು ಈಗಾಗಲೇ ದೃಢಪಡಿಸಿದೆ ಮತ್ತು SUV ದೇಶಾದ್ಯಂತ ಹಲವಾರು ಬಾರಿ ಗುರುತಿಸಲ್ಪಟ್ಟಿದೆ. 

ಇನ್ನು, ಮಹೀಂದ್ರಾ ಹೊಸ ಥಾರ್‌ನ ಪರೀಕ್ಷೆ ಮುಚ್ಚುಮರೆಯಿಂದ ಮಾಡಲಾಗುತ್ತಿದ್ರೂ, ಈ ಎಸ್‌ಯುವಿಯ ಬಗ್ಗೆ ಈಗಾಗಲೇ ನಾನಾ ವಿವರಗಳು, ವೈಶಿಷ್ಟ್ಯಗಳು ಸೋರಿಕೆಯಾಗಿದೆ.

ಮಹೀಂದ್ರಾ ಥಾರ್ 5-ಬಾಗಿಲಿನ ಎಸ್‌ಯುವಿನಲ್ಲಿ ಸನ್‌ರೂಫ್ ಅನ್ನು ಸಹ ಮೊದಲೇ ಗುರುತಿಸಲಾಗಿದೆ. ಆದರೂ, ಮೋಟಾರ್‌ಬೀಮ್ ಹಂಚಿಕೊಂಡ ಹೊಸ ವಿಡಿಯೋದಲ್ಲಿ ಮುಂಬರುವ ಎಸ್‌ಯುವಿಯಲ್ಲಿ ಸನ್‌ರೂಫ್ ಅನ್ನು ಸ್ಪಷ್ಟವಾಗಿ ಬಹಿರಂಗಪಡಿಸುತ್ತದೆ.

ಹೊಸ ಮಹೀಂದ್ರಾ ಥಾರ್‌ನ ಹೊರಭಾಗವು ಪ್ರಸ್ತುತ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿರುವ ಥಾರ್‌ನಂತೆಯೇ ಕಾಣುತ್ತದೆ. ಅದರೆ, ಹೊಸ ಆವೃತ್ತಿಯು ದೀರ್ಘವಾದ ವೀಲ್‌ಬೇಸ್ ಅನ್ನು ಪಡೆಯುತ್ತದೆ ಅಂದರೆ 2ನೇ ಸಾಲಿನ ಪ್ರಯಾಣಿಕರಿಗೆ ಹೆಚ್ಚಿನ ಸ್ಥಳಾವಕಾಶವನ್ನು ನೀಡುತ್ತದೆ ಮತ್ತು ಬೂಟ್ ಸ್ಪೇಸ್‌ ಪ್ರಮಾಣವನ್ನು ಹೆಚ್ಚಿಸುತ್ತದೆ ಎಂದು ತಿಳಿದುಬಂದಿದೆ.

ಥಾರ್ 5 - ಬಾಗಿಲು, ಎಸ್‌ಯುವಿ ಎತ್ತರದ ಪಿಲ್ಲರ್‌ಗಳೊಂದಿಗೆ ಬಾಕ್ಸ್ ಆಕಾರವನ್ನು ಉಳಿಸಿಕೊಳ್ಳುತ್ತದೆ. ಹಾಗೂ, SUV ಹೊಸ ಮಿಶ್ರಲೋಹದ ಚಕ್ರಗಳನ್ನು ಪಡೆಯುತ್ತದೆ ಎಂದು ಹೇಳಲಾಗಿದೆ.

ಪ್ರಸ್ತುತ ನೀವು ದೇಶದಲ್ಲಿ 5 - ಬಾಗಿಲಿನ ಆಫ್-ರೋಡರ್ ವಾಹನದ ಬಗ್ಗೆ ಮಾತನಾಡುವಾಗ, ಮಾರುತಿ ಸುಜುಕಿ ಜಿಮ್ನಿ ಎಂಬ ಹೆಸರು ಮನಸ್ಸಿನಲ್ಲಿ ಮೂಡುತ್ತದೆ. ಹೊಸ ಥಾರ್ ಪ್ರತಿಯೊಂದು ಅಂಶದಲ್ಲೂ ಜಿಮ್ನಿಗಿಂತ ಗಮನಾರ್ಹವಾಗಿ ದೊಡ್ಡದಾಗಿರುತ್ತದೆ. 

ಹಾಗೂ, ಮಹೀಂದ್ರಾ ಥಾರ್ 5 - ಡೋರ್ 2.2-ಲೀಟರ್ ಡೀಸೆಲ್ ಮತ್ತು 2.0-ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್‌ಗಳಿಂದ ನಿಯಂತ್ರಿಸಲ್ಪಡುತ್ತದೆ ಎಂದೂ ತಿಳಿದುಬಂದಿದೆ.