ಮ್ಯಾನ್ಮಾರ್ ಸೇನೆ ವಿರುದ್ಧ ಬೀದಿಗಿಳಿದ 33 ಜನರ ಹತ್ಯೆ!
ಫೆ.1ರಿಂದ ಈವರೆಗೆ 51 ಮಂದಿ ಪ್ರತಿಭಟನಾಕಾರರ ಹತ್ಯೆ| ಮ್ಯಾನ್ಮಾರ್ ಉದ್ವಿಗ್ನ ಸ್ಥಿತಿ ಬಗ್ಗೆ ವಿಶ್ವಸಂಸ್ಥೆಯಿಂದಲೂ ಕಳವಳ
ಯಾಂಗೊನ್(ಮಾ.04): ಪ್ರಜಾಸತ್ತಾತ್ಮಕ ಸರ್ಕಾರ ವಜಾಗೊಳಿಸಿ ದೇಶದ ಆಡಳಿತವನ್ನು ತನ್ನ ಕೈಗೆತ್ತಿಕೊಂಡ ಸೇನಾಡಳಿತದ ವಿರುದ್ಧ ಮ್ಯಾನ್ಮಾರ್ ಜನತೆ ಬೀದಿಗಿಳಿದಿದ್ದಾರೆ. ಈ ಹಿನ್ನೆಲೆಯಲ್ಲಿ ಈ ಪ್ರತಿಭಟನಾಕಾರರನ್ನು ಬೆದರಿಸಲು ಮ್ಯಾನ್ಮಾರ್ ಭದ್ರತಾ ಪಡೆ ಹಿಂಸೆಯ ಹಾದಿ ಹಿಡಿದಿದ್ದು, ಸೇನೆಯ ದಾಳಿಯಲ್ಲಿ 33 ಮಂದಿ ಪ್ರತಿಭಟನಾಕಾರರು ಸಾವನ್ನಪ್ಪಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ವರದಿಯಾಗಿದೆ.
ತನ್ಮೂಲಕ ಫೆ.1ರಂದು ಮಿಲಿಟರಿ ಆಡಳಿತ ಜಾರಿಯಾದ ಬಳಿಕ ನಡೆಯುತ್ತಿರುವ ಪ್ರತಿಭಟನೆಯಲ್ಲಿ ಸಾವನ್ನಪ್ಪಿದವರ ಸಂಖ್ಯೆ 51ಕ್ಕೆ ಏರಿಕೆಯಾಗಿದೆ. ಈ ಬಗ್ಗೆ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಕಚೇರಿ ಕಳವಳ ವ್ಯಕ್ತಪಡಿಸಿದೆ.
ಮಿಲಿಟರಿ ಆಡಳಿತದ ವಿರುದ್ಧ ದೇಶದ ವಿವಿಧ ನಗರಗಳಲ್ಲಿ ಭಾರೀ ಪ್ರಮಾಣದ ಪ್ರತಿಭಟನೆಗಳು ನಡೆಯುತ್ತಿದ್ದು, ಪ್ರತಿಭಟನಾಕಾರರನ್ನು ಚದುರಿಸಲು ಮ್ಯಾನ್ಮಾರ್ ಭದ್ರತಾ ಪಡೆಗಳು ಗುಂಡಿನ ದಾಳಿ, ರಬ್ಬರ್‌ ಬುಲೆಟ್‌, ಅಶ್ರುವಾಯು ದಾಳಿಗಳ ಮೊರೆ ಹೋಗಿದೆ.
ಫೆ.1ರಂದು ನಡೆದ ಕ್ಷಿಪ್ರಕ್ರಾಂತಿಯ ಭಾಗವಾಗಿ ಸರ್ಕಾರವನ್ನು ವಜಾಗೊಳಿಸಿದ ಮಿಲಿಟರಿ ಆಡಳಿತವನ್ನು ತನ್ನ ತೆಕ್ಕೆಗೆ ತೆಗೆದುಕೊಂಡಿತು. ಆ ಬಳಿಕ ಪ್ರಜಾಪ್ರಭುತ್ವದ ಹೋರಾಟಗಾರ್ತಿ ಆಂಗ್‌ ಸ್ಯಾನ್‌ ಸೂಕಿ ಅವರನ್ನು ಬಂಧನದಲ್ಲಿಟ್ಟಿತ್ತು.
