ಪಂಚಕುಲಾ[ಡಿ.17]: ಪ್ರೊ ಕಬಡ್ಡಿ 6ನೇ ಆವೃತ್ತಿಯಲ್ಲಿ ಹಾಲಿ ಚಾಂಪಿಯನ್ ಪಾಟ್ನಾ ಪೈರೇಟ್ಸ್ ನಿರ್ಣಾಯಕ ಹಂತದಲ್ಲಿ ಸೋಲಿನ ಹಳಿಗಿಳಿದಿದೆ. ಭಾನುವಾರ ಇಲ್ಲಿನ ತೌ ದೇವಿ ಲಾಲ್ ಕ್ರೀಡಾಂಗಣದಲ್ಲಿ ನಡೆದ ‘ಬಿ’ ವಲಯದ ಪಂದ್ಯದಲ್ಲಿ ಪಾಟ್ನಾ, ಯುಪಿ ಯೋಧಾ ವಿರುದ್ಧ 31-47 ಅಂತರದಲ್ಲಿ ಪರಾಭವಗೊಂಡಿತು.

ಇದರೊಂದಿಗೆ ಬೆಂಗಳೂರು ಬುಲ್ಸ್, ‘ಬಿ’ ವಲಯದಲ್ಲಿ ಅಗ್ರಸ್ಥಾನದೊಂದಿಗೆ ಪ್ಲೇ-ಆಫ್ ಗೇರುವ ಸಾಧ್ಯತೆ ಹೆಚ್ಚಿದೆ. 19 ಪಂದ್ಯಗಳಲ್ಲಿ ಪಾಟ್ನಾಗಿದು 9ನೇ ಸೋಲು. ತಂಡ 52 ಅಂಕಗಳೊಂದಿಗೆ 2ನೇ ಸ್ಥಾನದಲ್ಲಿದೆ. ಬುಲ್ಸ್ 18 ಪಂದ್ಯಗಳಿಂದ 64 ಅಂಕ ಪಡೆದಿದ್ದು, ಮುಂದಿನ ಪಂದ್ಯದಲ್ಲಿ ಜಯಿಸಿದರೆ, ತಂಡದ ಅಂಕ 69ಕ್ಕೇರಲಿದೆ. ಪಾಟ್ನಾ ತನಗೆ ಉಳಿದಿರುವ 3 ಪಂದ್ಯಗಳಲ್ಲಿ ಗೆದ್ದರೂ
ಗರಿಷ್ಠ 15 ಅಂಕ ಸಂಪಾದಿಸಲಿದ್ದು, ಒಟ್ಟಾರೆ 67ಕ್ಕೇರಬಹುದು. ಆದರೆ 4ನೇ ಸ್ಥಾನದಲ್ಲಿರುವ ಬೆಂಗಾಲ್ ವಾರಿಯರ್ಸ್‌ ಗೆ ಇನ್ನೂ 6 ಪಂದ್ಯ ಬಾಕಿ ಇದ್ದು, ಗರಿಷ್ಠ 30 ಅಂಕ ಗಳಿಸಬಹುದಾಗಿದೆ. ಹೀಗಾಗಿ, ಬೆಂಗಾಲ್ ಫಲಿತಾಂಶದ ಮೇಲೆ ಬುಲ್ಸ್ ಕಣ್ಣಿಡಬೇಕಿದೆ.

14ನೇ ನಿಮಿಷದಲ್ಲಿ ಪಾಟ್ನಾವನ್ನು ಆಲೌಟ್ ಮಾಡಿದ ಯು.ಪಿ, 15-10ರಲ್ಲಿ ಮುನ್ನಡೆಯಿತು. ಮೊದಲಾರ್ಧದ ಮುಕ್ತಾಯಕ್ಕೆ ಯುಪಿ 22-17ರ ಮುನ್ನಡೆ ಸಾಧಿಸಿತು. ದ್ವಿತೀಯಾರ್ಧದಲ್ಲೂ ಪಾಟ್ನಾ ಪುಟಿದೇಳಲಿಲ್ಲ. 24ನೇ ನಿಮಿಷ 2ನೇ ಬಾರಿ, 29ನೇ ನಿಮಿಷದಲ್ಲಿ 3ನೇ ಬಾರಿಗೆ ಆಲೌಟ್ ಆದ ಕಾರಣ ಯೋಧಾ ಮುನ್ನಡೆ 38-21ಕ್ಕೇರಿತು. ಇದರೊಂದಿಗೆ ಯೋಧಾ ಗೆಲುವು ಖಚಿತವಾಯಿತು. ಪಂದ್ಯದುದ್ದಕ್ಕೂ ರೈಡ್ ಮಷಿನ್ ಪ್ರದೀಪ್ ನರ್ವಾಲ್ ವೈಫಲ್ಯ ಅನುಭವಿಸಿದರು.

ಶ್ರೇಷ್ಠ ರೈಡರ್:ಪ್ರಶಾಂತ್ (ಯೋಧಾ, 10 ಅಂಕ)
ಶ್ರೇಷ್ಠ ಡಿಫೆಂಡರ್: ಸಚಿನ್ (ಯೋಧಾ, 05 ಅಂಕ]

ಗುಜರಾತ್ ತಂಡಕ್ಕೆ 15ನೇ ಗೆಲುವು:
‘ಎ’ ವಲಯದಲ್ಲಿ ಅಗ್ರಸ್ಥಾನದೊಂದಿಗೆ ಪ್ಲೇ-ಆಫ್‌ಗೇರಲು ಪೈಪೋಟಿ ಹೆಚ್ಚುತ್ತಿದೆ. ಜೈಪುರ ವಿರುದ್ಧ ಭಾನುವಾರ ನಡೆದ ಪಂದ್ಯದಲ್ಲಿ 34-30ರಲ್ಲಿ ಗೆದ್ದ ಗುಜರಾತ್, 15ನೇ ಗೆಲುವು ಸಂಪಾದಿಸಿದೆ.

20 ಪಂದ್ಯಗಳಿಂದ 83 ಅಂಕ ಪಡೆದು 2ನೇ ಸ್ಥಾನದಲ್ಲಿದೆ. ತವರು ಚರಣದ ಮೊದಲೆರಡು ಪಂದ್ಯಗಳಲ್ಲಿ ಅಜೇಯವಾಗಿದ್ದ ಪ್ಯಾಂಥರ್ಸ್‌ ತಂಡಕ್ಕೆ ಇದು 11ನೇ ಸೋಲಾಗಿದೆ. 

ವರದಿ: ಸ್ಪಂದನ್ ಕಣಿಯಾರ್, ಕನ್ನಡಪ್ರಭ