Asianet Suvarna News

ಭಾರತ ಜತೆಗಿನ ಯುದ್ಧ ಸ್ಥಗಿತಕ್ಕೆ ಟ್ರಂಪ್‌ ಮಧ್ಯಸ್ಥಿಕೆ ಕಾರಣ, ಕಾಶ್ಮೀರ ಸಮಸ್ಯೆಗೆ ಪರಿಹಾರ ಬೇಕಿದೆ: ಶೆಹಬಾಜ್‌

Gowthami K — Sat, 26 Sep 2026 10:02:51 +0530

ವಿಶ್ವಸಂಸ್ಥೆ: ‘ 2025ರಲ್ಲಿ ಭಾರತ- ಪಾಕಿಸ್ತಾನ ನಡುವಿನ ಯುದ್ಧ ಸ್ಥಗಿತಕ್ಕೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಸಕಾಲಿಕ ಮಧ್ಯಸ್ಥಿಕೆಯೇ ಕಾರಣ’ ಎಂದು ಪಾಕಿಸ್ತಾನ ಪ್ರಧಾನಿ ಶೆಹಬಾಜ್‌ ಷರೀಫ್‌ ವಿಶ್ವಸಂಸ್ಥೆ ಹೇಳಿದ್ದಾರೆ. ಇದೇ ವೇಳೆ ಕಾಶ್ಮೀರ ವಿಚಾರಗಳ ಬಗ್ಗೆಯೂ ಮಾತನಾಡಿದ್ದಾರೆ.

ವಿಶ್ವಸಂಸ್ಥೆಯಲ್ಲಿ ಸುದೀರ್ಘ 23 ನಿಮಿಷಗಳ ಕಾಲ ಮಾತನಾಡಿದ ಷರೀಫ್‌, ಟ್ರಂಪ್‌ ಅವರ ದೃಢ ನಿಶ್ಚಯ ಮತ್ತು ದೂರದೃಷ್ಟಿಯ ನಾಯಕತ್ವಕ್ಕೆ ಧನ್ಯವಾದ ತಿಳಿಸಿದರು. ಇದೇ ವೇಳೆ ಅವರು ಮತ್ತೆ ಕಾಶ್ಮೀರದ ತಂಟೆಗೆ ಬರುವ ತಮ್ಮ ಹಳೆ ಚಾಳಿ ಮುಂದುವರೆಸಿದ್ದಾರೆ.

‘ ಅಮೆರಿಕ ಅಧ್ಯಕ್ಷರ ಸಕಾಲಿಕ ಹಸ್ತಕ್ಷೇಪದಿಂದ ದಕ್ಷಿಣ ಏಷ್ಯಾದಲ್ಲಿ ಲಕ್ಷಾಂತರ ಜೀವಗಳು ಉಳಿದಿದೆ. 2025ರ ಸಂಘರ್ಷವನ್ನು ದಕ್ಷಿಣ ಏಷ್ಯಾ ಮತ್ತೆ 2025ರ ರ ಸಂಘರ್ಷದ ಆ ಪ್ರಪಾತವನ್ನು ಮತ್ತೆ ಎಂದಿಗೂ ತಲುಪದಂತೆ ನೋಡಿಕೊಳ್ಳಲು ಕಾಶ್ಮೀರ ಸಮಸ್ಯೆಗೆ ನ್ಯಾಯಯುತ ಪರಿಹಾರ ಬೇಕಿದೆ’ ಎಂದರು.

ತಮ್ಮ ಭಾಷಣದಲ್ಲಿ ಷರೀಫ್‌ ಸಿಂಧು ಜಲ ಒಪ್ಪಂದದ ಬಗ್ಗೆಯೂ ಉಲ್ಲೇಖಿಸಿದ್ದಾರೆ. ಇದರ ಜತೆಗೆ ಅಮೆರಿಕ- ಇರಾನ್ ಯುದ್ಧ ಸ್ಥಗಿತದ ಬಗ್ಗೆ ಪಾಕ್‌ ಪ್ರಯತ್ನದ ಬಗ್ಗೆಯೂ ಟ್ರಂಪ್‌ ಮಾತನಾಡಿದ್ದು, ‘ ಪಾಕಿಸ್ತಾನವು ಸಂಘಟಿತ ಪ್ರಯತ್ನಗಳ ತ್ವರಿತ ಕಾರ್ಯಾಚರಣೆ ನಡೆಸಿತು. ಇಸ್ಲಾಮಾಬಾದ್‌ನಲ್ಲಿ ಅಮೆರಿಕ ಮತ್ತು ಇರಾನ್‌ ಅನ್ನು ಒಂದೇ ಸೂರಿನಡಿಯಲ್ಲಿ ಯಶಸ್ವಿಯಾಗಿ ತಂದಿತು. ಇಸ್ಲಾಮಾಬಾದ್ ಮಾತುಕತೆಯಿಂದ ಹಿಡಿದು ಇಸ್ಲಾಮಾಬಾದ್ ತಿಳುವಳಿಕೆ ಒಪ್ಪಂದದವರೆಗೆ, ಈ ಗಂಭೀರ ಸಂಘರ್ಷವನ್ನು ಕೊನೆಗೊಳಿಸಲು ಅನೇಕ ಐತಿಹಾಸಿಕ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಅವರು ಹೇಳಿದರು.

ದ್ವಿಪಕ್ಷೀಯ ಸಂಬಂಧಕ್ಕೆ ಬಲ: ಟ್ರಂಪ್‌-ಕ್ಸಿ ಪಣ

ಸದ್ಯ ಅಮೆರಿಕ ಭೇಟಿಯಲ್ಲಿರುವ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಹಾಗೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ದ್ವಿಪಕ್ಷೀಯ ಮಾತುಕತೆ ಯಶ ಕಂಡಿದೆ ಹಾಗೂ ಹಳೆಯ ವೈಷಮ್ಯ ಮರೆತು ಪರಸ್ಪರ ಸಂಬಂಧ ಬಲಪಡಿಸಲು ಉಭಯ ನಾಯಕರು ಪಣ ತೊಟ್ಟಿದ್ದಾರೆ,

ಕ್ಸಿ ಜತೆ ಉಭಯ ದೇಶಗಳ ದ್ವಿಪಕ್ಷೀಯ ಸಂಬಂಧಗಳ ಕುರಿತು ಚರ್ಚೆ ನಡೆಸಿದ ಟ್ರಂಪ್‌, ‘ಅಮೆರಿಕ-ಚೀನಾ ಬಾಂಧವ್ಯ ಈಗ ಹಿಂದೆಂದಿಗಿಂತ ಉತ್ತಮವಾಗಿದೆ’ ಎಂದು ವರ್ಣಿಸಿದರು. ಜತೆಗೆ, ಎರಡೂ ಕಡೆಯವರ ಸಾಮಾನ್ಯ ಹಿತಾಸಕ್ತಿಗಳ ಆಧಾರದಲ್ಲಿ ಭವಿಷ್ಯದ ಸಂಬಂಧಗಳ ದಿಕ್ಕು ರೂಪಿಸುವುದಾಗಿ ಅವರು ಹೇಳಿದರು.

ಓವಲ್‌ ಕಚೇರಿಯಲ್ಲಿ ಕ್ಸಿ ಜತೆ 2 ಗಂಟೆ ಮಾತುಕತೆ ಬಳಿಕ ಶ್ವೇತಭವನದಲ್ಲಿ ಆಯೋಜಿಸಲಾಗಿದ್ದ ಔತಣಕೂಟದಲ್ಲಿ ಮಾತನಾಡಿದ ಟ್ರಂಪ್, ‘ಅಮೆರಿಕನ್ನರು ಮತ್ತು ಚೀನಿಯರು ಸರಕು, ಜ್ಞಾನ, ಸಂಪ್ರದಾಯಗಳು, ಆಲೋಚನೆಗಳನ್ನು ವಿನಿಮಯಿಸಿಕೊಂಡಿದ್ದಾರೆ. ಇದು ವಾಣಿಜ್ಯ ಮತ್ತು ಗೌರವಕ್ಕೆ ಬುನಾದಿಯಾಗಿದೆ’ ಎಂದರು.

ಜಿನ್‌ಪಿಂಗ್‌ ಮಾತನಾಡಿ, ‘ನಮ್ಮ ಸಂಬಂಧಗಳು ಐತಿಹಾಸಿಕ ಘಟ್ಟ ತಲುಪಿವೆ. ಟ್ರಂಪ್‌ ಜತೆಗಿನ ಮಾತುಕತೆ ವೇಳೆ ಅನೇಕ ವಿಚಾರಗಳಲ್ಲಿ ಸಾಮಾನ್ಯ ಒಮ್ಮತಕ್ಕೆ ಬರಲಾಗಿದೆ’ ಎಂದರು.

ಪೇಟೆಂಟ್ ಉಲ್ಲಂಘನೆ, ಆ್ಯಪಲ್ ಕಂಪನಿಗೆ ₹54,000 ಕೋಟಿ ದಂಡ; iPhone ಈ ಫೀಚರ್ ಕಡಿತಗೊಳ್ಳುತ್ತಾ?

Sathish Kumar KH — Mon, 28 Sep 2026 10:12:57 +0530

ನವದೆಹಲಿ/ವಾಷಿಂಗ್ಟನ್: ಐಫೋನ್‌ಗಳು ಮತ್ತು ಆ್ಯಪಲ್ ವಾಚ್‌ಗಳಲ್ಲಿ (Apple Watches) ಬಳಸುವ ಟ್ಯಾಪಿಂಗ್ ಅಥವಾ ಸ್ಪರ್ಶ ಅನುಭವ ನೀಡುವ ತಂತ್ರಜ್ಞಾನವು ಪೇಟೆಂಟ್ (ಹಕ್ಕುಸ್ವಾಮ್ಯ) ನಿಯಮಗಳನ್ನು ಉಲ್ಲಂಘಿಸಿದೆ ಎಂದು ತೀರ್ಪು ನೀಡಿರುವ ಅಮೆರಿಕದ ಫೆಡರಲ್ ನ್ಯಾಯಾಲಯವು, ತಂತ್ರಜ್ಞಾನ ದಿಗ್ಗಜ ಆ್ಯಪಲ್ ಕಂಪನಿಗೆ ಬರೋಬ್ಬರಿ 54,000 ಕೋಟಿ ರೂ. ($5.7 ಬಿಲಿಯನ್) ದಂಡ ವಿಧಿಸಿದೆ. ಅಮೆರಿಕದ ಇತಿಹಾಸದಲ್ಲೇ ಇಂತಹ ಪ್ರಕರಣದಲ್ಲಿ ವಿಧಿಸಲಾದ ಅತಿ ದೊಡ್ಡ ಮೊತ್ತದ ದಂಡ ಇದಾಗಿದೆ.

ಸ್ಯಾನ್ ಡಿಯಾಗೋ ಮೂಲದ 'ಟ್ಯಾಕ್ಷನ್ ಟೆಕ್ನಾಲಜಿ' (Taction Technology) ಎನ್ನುವ ಕಂಪನಿಯು, ಐಫೋನ್ ಸಂಸ್ಥೆಯು ತಮ್ಮ ಕಂಪನಿಯ ಪೇಟೆಂಟ್ ವೈಬ್ರೇಶನ್ ತಂತ್ರಜ್ಞಾನವನ್ನು (Vibration Technology) ಅನುಮತಿಯಿಲ್ಲದೆ ಫೋನ್ ಮತ್ತು ವಾಚ್‌ಗಳ 'Taptic Engine' ನಲ್ಲಿ ಬಳಸಿಕೊಂಡಿದೆ ಎಂದು ಆರೋಪಿಸಿ 2021ರಲ್ಲಿ ಮೊಕದ್ದಮೆ ಹೂಡಿತ್ತು.

ಪ್ರಕರಣದ ಹಿನ್ನೆಲೆ:

2023ರಲ್ಲಿ ಕೆಳಹಂತದ ಫೆಡರಲ್ ನ್ಯಾಯಾಲಯವು ಆ್ಯಪಲ್ ಪರವಾಗಿ ತೀರ್ಪು ನೀಡಿ ದೂರು ವಜಾಗೊಳಿಸಿತ್ತು. ಆದರೆ ಇದನ್ನು ಪ್ರಶ್ನಿಸಿ ಟ್ಯಾಕ್ಷನ್ ಟೆಕ್ನಾಲಜಿ ಕಂಪನಿಯು ಮೇಲ್ಮನವಿ ಸಲ್ಲಿಸಿದ್ದು, ನಂತರ ಫೆಡರಲ್ ಸರ್ಕ್ಯೂಟ್ ಈ ಪ್ರಕರಣವನ್ನು ಮರುಪರಿಶೀಲನೆಗೆ ಒಳಪಡಿಸಿತ್ತು.

ಸೆಪ್ಟೆಂಬರ್ 14ರಂದು ಆರಂಭವಾದ ವಿಚಾರಣೆಯಲ್ಲಿ, ಆ್ಯಪಲ್‌ನ 'Taptic Engine' (ಇದು ಐಫೋನ್ ಮತ್ತು ವಾಚ್‌ಗಳಲ್ಲಿ ಸ್ಪರ್ಶ ಅನುಭವ, ವೈಬ್ರೇಶನ್ ಹಾಗೂ ಹೃದಯದ ಬಡಿತದ ಸಿಮ್ಯುಲೇಶನ್ ನೀಡುತ್ತದೆ) ಟ್ಯಾಕ್ಷನ್ ಕಂಪನಿಯ ಎರಡು ಪೇಟೆಂಟ್‌ಗಳನ್ನು (Nos. 10,659,885 ಮತ್ತು 10,820,117) ಉಲ್ಲಂಘಿಸಿದೆ ಎಂದು 7 ಮಂದಿಯ ಜ್ಯೂರಿ ಒಮ್ಮತದ ತೀರ್ಪು ನೀಡಿದೆ. ಆದರೆ ಆ್ಯಪಲ್ ಉದ್ದೇಶಪೂರ್ವಕವಾಗಿ ಈ ಕೃತ್ಯ ಎಸಗಿಲ್ಲ ಎಂದೂ ನ್ಯಾಯಾಲಯ ತಿಳಿಸಿದೆ. ಇನ್ನು ಈಗಾಗಲೇ ಇರುವ ಐಫೋನ್ ಹಾಗೂ ವಾಚ್‌ನಲ್ಲಿನ ಸೌಲಭ್ಯ ಕಡಿತಗೊಳ್ಳುತ್ತದೆಯೇ ಎಂಬುದಕ್ಕೆ ಸ್ಪಷ್ಟನೆ ಸಿಕ್ಕಿಲ್ಲ.

ಆ್ಯಪಲ್ ಪ್ರತಿಕ್ರಿಯೆ ಏನು?

ನ್ಯಾಯಾಲಯದ ತೀರ್ಪನ್ನು ತಳ್ಳಿಹಾಕಿರುವ ಆ್ಯಪಲ್ ಕಂಪನಿಯು, 'ಜ್ಯೂರಿಯ ಪರಿಗಣನೆಗೆ ಧನ್ಯವಾದಗಳು, ಆದರೆ ಇಂದಿನ ತೀರ್ಪು ಮತ್ತು ವಿಧಿಸಿರುವ ದಂಡದ ಮೊತ್ತವನ್ನು ನಾವು ಬಲವಾಗಿ ವಿರೋಧಿಸುತ್ತೇವೆ. ಇದು ವಾಸ್ತವ ಸಂಗತಿಗಳಿಗೆ ವಿರುದ್ಧವಾಗಿದೆ. ನಮ್ಮ 'Taptic Engine' ತಂತ್ರಜ್ಞಾನವು ಟ್ಯಾಕ್ಷನ್ ತಂತ್ರಜ್ಞಾನಕ್ಕಿಂತ ಸಂಪೂರ್ಣವಾಗಿ ಭಿನ್ನವಾಗಿದೆ. ನಾವು ಇದರ ವಿರುದ್ಧ ಮೇಲ್ಮನವಿ (Appeal) ಸಲ್ಲಿಸುತ್ತೇವೆ' ಎಂದು ಸ್ಪಷ್ಟಪಡಿಸಿದೆ.

ಮತ್ತೊಂದೆಡೆ, ಟ್ಯಾಕ್ಷನ್ ಕಂಪನಿಯ ಪರ ವಕೀಲ ಲ್ಯಾನ್ಸ್ ಯಾಂಗ್ ಮಾತನಾಡಿ, 'ನಾವು ಈ ಪ್ರಕರಣದ ನ್ಯಾಯಕ್ಕಾಗಿ ಐದುವರೆ ವರ್ಷ ಕಾಯಬೇಕಾಯಿತು. ಜ್ಯೂರಿ ನಮ್ಮ ಪರವಾಗಿ ತೀರ್ಪು ನೀಡಿರುವುದು ಸಂತಸ ತಂದಿದೆ' ಎಂದಿದ್ದಾರೆ. ಸದ್ಯ ಈ ಪ್ರಕರಣವು ಮೇಲ್ಮನವಿ ಹಂತಕ್ಕೆ ತಲುಪಿದ್ದು, ಎಲ್ಲರ ಕಣ್ಣು ಆ್ಯಪಲ್‌ನ ಮುಂದಿನ ಕಾನೂನು ಹೋರಾಟದ ಮೇಲಿದೆ.

ಪುರುಷ ವೇಷ ತೊಟ್ಟು ತಾಲಿಬಾನಿಗಳಿಗೇ ಚಮಕ್ ಕೊಟ್ಟ ಧೀರೆ: ಏಷ್ಯನ್ ಕ್ರೀಡಾಕೂಟದಲ್ಲಿ ಬೆಳ್ಳಿಯ ತಾರೆ

Suchethana D — Thu, 24 Sep 2026 18:24:44 +0530

ಟೋಕಿಯೊ: ಮನಸ್ಸಿದ್ದರೆ ಮಾರ್ಗ ಎಂದು ಹಿರಿಯರು ಹೇಳಿರುವುದು ಸುಖಾಸುಮ್ಮನೆ ಅಲ್ಲ. ಎಲ್ಲವೂ ಇದ್ದರೂ ಅದಿಲ್ಲ, ಇದಿಲ್ಲ ಎನ್ನುತ್ತಾ ಬೇರೆಯವರನ್ನೇ ದೂಷಿಸುತ್ತಾ, ಎಲ್ಲದ್ದಕ್ಕೂ ಸರ್ಕಾರವನ್ನೇ ಹೊಣೆ ಮಾಡುತ್ತಾ, ಸರ್ಕಾರ ಅದು ಕೊಟ್ಟಿಲ್ಲ, ಇದು ಕೊಟ್ಟಿಲ್ಲ ಎಂದೇ ಜೀವನಪೂರ್ತಿ ಗೊಣಗುಡುತ್ತಲೇ ಜೀವಿಸುವವರು ಸಾಕಷ್ಟು ಮಂದಿ ಕಾಣಸಿಗುತ್ತಾರೆ. ಆದರೆ ಎಲ್ಲ ಕಠಿಣ ಸವಾಲುಗಳನ್ನು ಎದುರಿಸಿ, ಕೆಲವೊಮ್ಮೆ ಜೀವ ಭಯವನ್ನೂ ಬಿಟ್ಟು ಅಂದುಕೊಂಡ ಕಾರ್ಯ ಮಾಡುವವರೂ ಇದೇ ವೇಳೆ ನಮ್ಮ ಕಣ್ಣಮುಂದೆಯೇ ಇದ್ದಾರೆ. ಅದರಲ್ಲಿಯೂ ಹೆಣ್ಣೊಬ್ಬಳು ಮನೆಯಿಂದ ಹೊರಕ್ಕೆ ಹೋಗುವುದೇ ಅಸಾಧ್ಯ ಎನ್ನುವ ಸ್ಥಿತಿಯಲ್ಲಿ, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪದಕ ಗಳಿಸುತ್ತಾಳೆ ಎಂದರೆ ಆಕೆ ಅದೆಂಥ ಛಲಗಾತಿ ಇರಬೇಕು ಅಲ್ಲವೆ?

ಆಕೆಯೇ, ಅಫ್ಘಾನಿಸ್ತಾನದ ಮಹಿಳಾ ಸೈಕ್ಲಿಸ್ಟ್ 23 ವರ್ಷದ ಫರಿಬಾ ಹಶಿಮಿ. ತಾಲಿಬಾನಿಗಳ ಕೈಯಲ್ಲಿ ಸಿಲುಕಿ ನಲುಗುತ್ತಿದ್ದರೂ, ಈಕೆ ಅಂಥ ಕಠಿಣ ಪರಿಸ್ಥಿತಿಯನ್ನು, ಎಲ್ಲಾ ಬಂಧಗಳನ್ನೂ, ಎಲ್ಲಾ ಗೋಡೆಗಳನ್ನೂ ಒಡೆದು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಮಿಂಚಿದ್ದಾಳೆ. ತನ್ನ ದೇಶದಲ್ಲಿ ಸ್ತ್ರೀಯರು ಎಂದರೆ ಕಾಲ ಕಸಕ್ಕಿಂತಲೂ ಕಡೆ, ಅವರಿಗೆ ಸಾವಿರಾರು ನಿರ್ಬಂಧ ಎನ್ನುವುದು ತಿಳಿದರೂ, ತನ್ನೊಳಗಿನ ಪ್ರತಿಭೆಯನ್ನು ಅನಾವರಣಗೊಳಿಸಲು ಆಕೆ ಪುರುಷ ವೇಷ ತೊಟ್ಟಳು ಎಂದರೆ ನಂಬುತ್ತೀರಾ? ಬಹುಶಃ ಬಾಲಿವುಡ್, ಹಾಲಿವುಡ್ ಸಿನಿಮಾಗಳಲ್ಲಿ ಇಂಥ ಸ್ಟೋರಿ ಕಾಣಸಿಗಬಹುದು. ಆದರೆ ನಿಜಕ್ಕೂ ತಾಲಿಬಾನಿಗಳ ಕಪಿಮುಷ್ಟಿಯಿಂದ ಪುರುಷ ವೇಷ ತೊಟ್ಟು ಹೊರಬಂದು ಮಿಂಚಿರುವ ಫರಿಬಾ ಹಶಿಮಿ, ಇದೀಗ ಇಡೀ ವಿಶ್ವ ಮೆಚ್ಚುವ ಹೆಣ್ಣುಮಗಳಾಗಿದ್ದಾಳೆ.

ಬೆಳ್ಳಿ ಪದಕ ಗೆದ್ದ ಧೀರೆ

ಜಪಾನ್‌ನಲ್ಲಿ ನಡೆಯುತ್ತಿರುವ ಏಷ್ಯನ್ ಕ್ರೀಡಾಕೂಟದಲ್ಲಿ ಫರಿಬಾ ಹಶಿಮಿ ಅಸಾಧಾರಣವಾಗಿ ಉತ್ತಮ ಪ್ರದರ್ಶನ ನೀಡಿ, ಮಹಿಳಾ ಸೈಕ್ಲಿಂಗ್ ರಸ್ತೆ ಓಟದಲ್ಲಿ ತಮ್ಮ ದೇಶಕ್ಕಾಗಿ ಬೆಳ್ಳಿ ಪದಕ ಗೆದ್ದರು. ಗಮನಾರ್ಹ ವಿಷಯವೆಂದರೆ ಅವರು ತಮ್ಮ ದೇಶದಲ್ಲಿ ತರಬೇತಿ ಪಡೆಯುವುದು ಅಸಾಧ್ಯವಾಗಿತ್ತು, ಆದರೆ ಅವರು ಒಂದು ತಂತ್ರವನ್ನು ರೂಪಿಸಿದರು ಮತ್ತು ತರಬೇತಿಯನ್ನು ಮುಂದುವರೆಸಿದರು, ಇದರ ಪರಿಣಾಮವಾಗಿ ಅವರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪದಕಗಳನ್ನು ಗೆದ್ದರು. ಆಫ್ಘನ್ನಲ್ಲಿ, ಮಹಿಳಾ ಸೈಕ್ಲಿಸ್ಟ್‌ಗೆ ಅವರ ಸ್ವಂತ ದೇಶದಲ್ಲಿ ತರಬೇತಿ ಬಹುತೇಕ ಅಸಾಧ್ಯವಾಗಿತ್ತು. ಹಾಗೆ ಮಾಡಲು, ಮಹಿಳೆಯರು ಬಹಳ ಸೀಮಿತ ಹಕ್ಕುಗಳನ್ನು ಹೊಂದಿರುವ ಸ್ಥಳದಲ್ಲಿ ಅವರು ಪುರುಷನಂತೆ ಉಡುಗೆ ತೊಟ್ಟರು. "ನಾನು ತರಬೇತಿಗೆ ಹೋದಾಗಲೆಲ್ಲಾ, ನಾನು ಹುಡುಗನಂತೆ ಉಡುಗೆ ತೊಟ್ಟಿದ್ದೆ" ಎಂದು ಅವರು ವಿವರಿಸುತ್ತಾರೆ. ಯಾರೂ ತನ್ನನ್ನು ಗುರುತಿಸದಂತೆ ಸಾಧ್ಯವಾದಾಗಲೆಲ್ಲಾ ತನ್ನ ಮುಖವನ್ನು ಮರೆಮಾಡಿಕೊಂಡಿದ್ದೇನೆ ಎಂದು ಫರಿಬಾ ವಿವರಿಸುತ್ತಾರೆ. ಕೆಲವೊಮ್ಮೆ, ನನ್ನನ್ನು ಗುರುತಿಸಿದಾಗ, ಪುರುಷರು ನನ್ನ ಮೇಲೆ ಕಲ್ಲು ಎಸೆಯಲು ಅಥವಾ ನನ್ನನ್ನು ಹೊಡೆಯಲು ಪ್ರಯತ್ನಿಸಿದ್ದರು. ಆದ್ದರಿಂದ ಪುರುಷನಂತೆ ತರಬೇತಿ ಪಡೆದೆ ಎನ್ನುತ್ತಾರೆ ಯುವತಿ.

ಅಫ್ಘಾನಿಸ್ತಾನ ಬದಲಾಗುವ ಭರವಸೆ

23 ವರ್ಷದ ಹಶಿಮಿ ಮಂಗಳವಾರ ತನ್ನ ಓಟವನ್ನು 2 ಗಂಟೆ, 50 ನಿಮಿಷ, 5 ಸೆಕೆಂಡುಗಳಲ್ಲಿ ಪೂರ್ಣಗೊಳಿಸಿ ಬೆಳ್ಳಿ ಪದಕ ಗೆದ್ದರು. 2021 ರಲ್ಲಿ ಅಫ್ಘಾನಿಸ್ತಾನವನ್ನು ತೊರೆದ ನಂತರ ಪ್ರಾರಂಭವಾದ ತನ್ನ ಪ್ರಯಾಣದಲ್ಲಿ ಮತ್ತೊಂದು ಮೈಲಿಗಲ್ಲು ಎಂದು ಅವರು ಹೇಳಿದರು. "2021 ರಲ್ಲಿ, ತಾಲಿಬಾನ್ ನನ್ನ ದೇಶಕ್ಕೆ ಬಂದಾಗ, ನನ್ನ ಕನಸನ್ನು ನನಸಾಗಿಸಲು ನಾನು ನನ್ನ ದೇಶದಿಂದ ಪಲಾಯನ ಮಾಡಿದ್ದೇನೆ. ಏಕೆಂದರೆ ನಾನು ನನ್ನ ಕನಸನ್ನು ನನಸಾಗಿಸಲು ಬಯಸುತ್ತೇನೆ ಎಂದಿದ್ದಾರೆ. ಫರಿಬಾ ಹಶಿಮಿ ಅಫ್ಘಾನಿಸ್ತಾನದಲ್ಲಿ ಮಹಿಳೆಯರಿಗಾಗಿ ಅನೇಕ ಕನಸುಗಳನ್ನು ಹೊಂದಿದ್ದಾರೆ, ತನಗಾಗಿ ಕನಸುಗಳನ್ನು ಹೊಂದಿದ್ದಾರೆ ಮತ್ತು ಈಡೇರಲು ಸಮಯ ತೆಗೆದುಕೊಳ್ಳಬಹುದಾದ ಕನಸುಗಳನ್ನು ಹೊಂದಿದ್ದಾರೆ. "ನಾನು ನಿಜವಾಗಿಯೂ ಸಂತೋಷವಾಗಿದ್ದೇನೆ ಮತ್ತು ಭಾವನೆಗಳಿಂದ ತುಂಬಿದ್ದೇನೆ. ಅದನ್ನು ನಿಮಗೆ ಹೇಗೆ ವಿವರಿಸಬೇಕೆಂದು ನನಗೆ ತಿಳಿದಿಲ್ಲ. ಒಂದು ದಿನ ನಾನು ನನ್ನ ದೇಶಕ್ಕೆ ಹಿಂತಿರುಗುತ್ತೇನೆ ಮತ್ತು ಕಾಬೂಲ್‌ನ ಬೀದಿಗಳಲ್ಲಿ ನಡೆಯುತ್ತೇನೆ - ಮತ್ತು ಅದೇ ಉತ್ಸಾಹವನ್ನು ಹಂಚಿಕೊಳ್ಳಲು ಮಹಿಳೆಯರೊಂದಿಗೆ ಭುಜಕ್ಕೆ ಭುಜಕ್ಕೆ ನಡೆಯುತ್ತೇನೆ ಎಂದು ನಾನು ಭಾವಿಸುತ್ತೇನೆ" ಎಂದು ಅವರು ಹೇಳಿದರು.

ಪಾಕಿಸ್ತಾನದಲ್ಲಿ ಶೋಚನೀಯ ಸ್ಥಿತಿ: ಆಸ್ಪತ್ರೆಗೆ ಹೋಗಿ ಮರಳಿ ಬರುವ ಪುಟ್ಟ ಮಕ್ಕಳಲ್ಲಿ ಏಡ್ಸ್‌ ಪತ್ತೆ!

Gowthami K — Fri, 25 Sep 2026 10:21:23 +0530

ಇಸ್ಲಾಮಾಬಾದ್‌: ಆರ್ಥಿಕ ಬಿಕ್ಕಟ್ಟಿನಲ್ಲಿರುವ ಪಾಕಿಸ್ತಾನದಲ್ಲಿ ಇದೀಗ ಆರೋಗ್ಯ ವಲಯವೂ ಹಳಿ ತಪ್ಪಿದ್ದು, ಆಸ್ಪತ್ರೆಗಳಿಗೆ ಚಿಕಿತ್ಸೆಗೆ ಹೋಗುವ ಪುಟ್ಟ ಮಕ್ಕಳಲ್ಲಿ ಎಚ್‌ಐವಿ ಸೋಂಕು ಕಾಣಿಸಿಕೊಳ್ಳುತ್ತಿದೆ. ಇದು ಪೋಷಕರಲ್ಲಿ ಆತಂಕಕ್ಕೆ ಕಾರಣವಾಗಿದೆ. ಸಾಮಾನ್ಯ ಖಾಯಿಲೆಗೆ ಚಿಕಿತ್ಸೆಗೆಂದು ಆಸ್ಪತ್ರೆಗೆ ಹೋಗುವ ಮಕ್ಕಳಲ್ಲಿ ಚಿಕಿತ್ಸೆ ಪಡೆದು ವಾರ, ತಿಂಗಳುಗಳ ಬಳಿಕ ಎಚ್‌ಐವಿ ಪಾಸಿಟಿವ್‌ ಎಂದು ವರದಿಯಾಗುತ್ತಿದೆ.

ಚುಚ್ಚುಮದ್ದು ಮತ್ತು ಇಂಟ್ರಾವೆನಸ್‌ ಚಿಕಿತ್ಸೆ ಸಂದರ್ಭದಲ್ಲಿ ಸಿರಿಂಜ್‌ ಮತ್ತು ಸೂಜಿಗಳ ಮರು ಬಳಕೆ, ಕಳಪೆ ಸೋಂಕು ನಿಯಂತ್ರಣ ವ್ಯವಸ್ಥೆಯು ಮಕ್ಕಳಿಗೆ ಎಚ್‌ಐವಿ ಸೋಂಕು ಹರಡುವುದಕ್ಕೆ ಕಾರಣವಾಗಿರಬಹುದು ಎಂದು ವಿಶ್ಲೇಷಿಸಲಾಗಿದೆ. ಘಟನೆಯಲ್ಲಿ ಹಲವು ಮಕ್ಕಳು ಸಾವನ್ನಪ್ಪಿದ್ದಾರೆ.ಹೀಗೆ ಮಕ್ಕಳಲ್ಲಿ ಏಡ್ಸ್‌ ಕಾಣಿಸಿಕೊಳ್ಳುತ್ತಿರುವುದು ಸಾಮಾಜಿಕವಾಗಿ ಕುಟುಂಬಗಳ ಮೇಲೆ ಒತ್ತಡ ಹೇರುವುದರ ಜೊತೆಗೆ ಜೀವನಪೂರ್ಣ ಅದಕ್ಕೆ ಚಿಕಿತ್ಸೆ ಪಡೆಯಬೇಕಾದ ಮತ್ತು ಅದಕ್ಕಾಗಿ ಹೆಚ್ಚಿನ ಹಣಕಾಸಿನ ಹೊರೆ ಹೊರಬೇಕಾದ ಅನಿವಾರ್ಯತೆ ಸೃಷ್ಟಿಸಿದೆ. ಹೀಗಾಗಿ ಇಡೀ ಪ್ರಕರಣದ ಕುರಿತು ಸೂಕ್ತ ತನಿಖೆ ನಡೆಸುವಂತೆ ಪೋಷಕರು ಸರ್ಕಾರವನ್ನು ಒತ್ತಾಯಿಸಿದ್ದಾರೆ.

ಎನ್‌ಪಿಆರ್‌ ವರದಿ ಬಿಚ್ಚಿಟ್ಟ ಆಘಾತಕಾರಿ ಸತ್ಯ

ರಾಷ್ಟ್ರೀಯ ಸಾರ್ವಜನಿಕ ರೇಡಿಯೋ (NPR) ಸಿದ್ಧಪಡಿಸಿರುವ ವರದಿಯ ಪ್ರಕಾರ, ಮಕ್ಕಳು ಸಾಮಾನ್ಯ ಕಾಯಿಲೆಗಳ ತಪಾಸಣೆ ಅಥವಾ ದೈನಂದಿನ ವೈದ್ಯಕೀಯ ಕಾರ್ಯವಿಧಾನಗಳಿಗೆ ಒಳಗಾಗಿದ್ದರು. ಆದರೆ ಚಿಕಿತ್ಸೆ ಪಡೆದ ವಾರ ಅಥವಾ ತಿಂಗಳುಗಳ ನಂತರ ನಡೆಸಿದ ರಕ್ತ ಪರೀಕ್ಷೆಯಲ್ಲಿ ಮಕ್ಕಳಿಗೆ ಎಚ್‌ಐವಿ ಪಾಸಿಟಿವ್‌ ಇರುವುದು ಧೃಡಪಟ್ಟಿದೆ. ಈ ಕುಟುಂಬಗಳಲ್ಲಿ ಯಾವುದೇ ರೀತಿಯ ಸೋಂಕಿನ ಹಿನ್ನೆಲೆ ಅಥವಾ ಅಪಾಯಕಾರಿ ಅಂಶಗಳಿಲ್ಲದಿದ್ದರೂ ಮಕ್ಕಳಿಗೆ ವೈರಸ್‌ ತಗುಲಿರುವುದಕ್ಕೆ ಆಸ್ಪತ್ರೆಯ ಲೋಪವೇ ಏಕೈಕ ಕಾರಣ ಎಂದು ಸಂತ್ರಸ್ತ ಕುಟುಂಬಗಳು ಸ್ಪಷ್ಟಪಡಿಸಿವೆ.

ಸೂಜಿ ಮತ್ತು ಸಿರಿಂಜ್‌ಗಳ ಮರುಬಳಕೆ

ಸಂದರ್ಶನದಲ್ಲಿ ಮಾತನಾಡಿದ ಪೋಷಕರು, ಆರೋಗ್ಯ ಕೇಂದ್ರಗಳಲ್ಲಿ ಪಾಲಿಸಲಾಗುತ್ತಿರುವ ಅತ್ಯಂತ ಕಳಪೆ ನೈರ್ಮಲ್ಯ ಪದ್ಧತಿಗಳನ್ನು ಬೆಟ್ಟು ಮಾಡಿ ತೋರಿಸಿದ್ದಾರೆ. ವಿಶೇಷವಾಗಿ ಚುಚ್ಚುಮದ್ದು ನೀಡುವಾಗ ಮತ್ತು ಇಂಟ್ರಾವೆನಸ್‌ (IV) ಚಿಕಿತ್ಸೆ ನೀಡುವ ಸಂದರ್ಭದಲ್ಲಿ ಬಳಸಿದ ಸಿರಿಂಜ್‌ಗಳು ಹಾಗೂ ಸೂಜಿಗಳನ್ನು ಮತ್ತೆ ಮತ್ತೆ ಮರುಬಳಕೆ ಮಾಡುತ್ತಿರುವುದೇ ಈ ಸೋಂಕು ಹರಡಲು ಮುಖ್ಯ ಕಾರಣ ಎಂದು ಅವರು ಬಲವಾಗಿ ನಂಬಿದ್ದಾರೆ.

ಆರು ಮಕ್ಕಳ ಸಾವು: ಕುಟುಂಬಗಳಿಗೆ ಅಪಾರ ನಷ್ಟ

ಈ ಭೀಕರ ವೈದ್ಯಕೀಯ ಲೋಪವು ಸೃಷ್ಟಿಸಿರುವ ಪರಿಣಾಮ ಅತ್ಯಂತ ವಿನಾಶಕಾರಿಯಾಗಿದೆ. ಸೋಂಕಿನ ತೀವ್ರತೆ ತಾಳಲಾರದೆ ಈಗಾಗಲೇ ಕನಿಷ್ಠ ಆರು ಮಕ್ಕಳು ಜೀವ ಕಳೆದುಕೊಂಡಿದ್ದಾರೆ. ಬದುಕುಳಿದ ಮಕ್ಕಳು ತಮ್ಮ ಜೀವಿತಾವಧಿಯುದ್ದಕ್ಕೂ ಔಷಧೋಪಚಾರ ಮತ್ತು ವೈದ್ಯಕೀಯ ಮೇಲ್ವಿಚಾರಣೆಯಲ್ಲೇ ದಿನದೂಡಬೇಕಾದ ಪರಿಸ್ಥಿತಿ ಎದುರಾಗಿದೆ.

ಎಚ್‌ಐವಿ ವೈರಸ್‌ ದೇಹದ ನೈಸರ್ಗಿಕ ರೋಗನಿರೋಧಕ ಶಕ್ತಿಯನ್ನು ಸಂಪೂರ್ಣವಾಗಿ ಕುಗ್ಗಿಸುತ್ತದೆ. ಪ್ರಸ್ತುತ ಇದಕ್ಕೆ ಸಂಪೂರ್ಣ ಪರಿಹಾರವಿಲ್ಲದಿದ್ದರೂ, ಆಂಟಿರೆಟ್ರೋವೈರಲ್ ಥೆರಪಿ (ART) ಮೂಲಕ ವೈರಸ್ ಅನ್ನು ನಿಯಂತ್ರಣದಲ್ಲಿಟ್ಟುಕೊಂಡು ದೀರ್ಘಾಯುಷ್ಯ ಪಡೆಯಲು ಸಾಧ್ಯವಿದೆ. ಆದಾಗ್ಯೂ, ಆರ್ಥಿಕವಾಗಿ ಹಿಂದುಳಿದಿರುವ ಈ ಕುಟುಂಬಗಳಿಗೆ ದುಬಾರಿ ಔಷಧಗಳ ವೆಚ್ಚ, ಪದೇ ಪದೇ ಆಸ್ಪತ್ರೆಗೆ ಅಲೆಯುವುದು ಮತ್ತು ಸಮಾಜದಲ್ಲಿ ಎದುರಿಸಬೇಕಾದ ಕಳಂಕದ ಭಯವು ಹೆಚ್ಚುವರಿ ಸಾಮಾಜಿಕ ಹಾಗೂ ಆರ್ಥಿಕ ಹೊರೆಯನ್ನು ತಂದೊಡ್ಡಿದೆ.

ಕಠಿಣ ತನಿಖೆಗೆ ಹೆಚ್ಚಿದ ಒತ್ತಡ

ಯಾವ ತಪ್ಪು ಮಾಡದ ಪುಟ್ಟ ಮಕ್ಕಳು ಈ ರೀತಿ ಪ್ರಾಣಾಂತಿಕ ಕಾಯಿಲೆಗೆ ತುತ್ತಾಗಿರುವುದಕ್ಕೆ ಪೋಷಕರು ಈಗ ಆರೋಗ್ಯ ಇಲಾಖೆಯಿಂದ ಸ್ಪಷ್ಟ ವಿವರಣೆ ಮತ್ತು ಉತ್ತರಗಳನ್ನು ಕೇಳುತ್ತಿದ್ದಾರೆ. ಮೂಲಭೂತ ವೈದ್ಯಕೀಯ ಸುರಕ್ಷತಾ ಮಾನದಂಡಗಳಲ್ಲಿ ಲೋಪ ಎಸಗಿದವರ ವಿರುದ್ಧ ತಕ್ಷಣವೇ ಉನ್ನತ ಮಟ್ಟದ ತನಿಖೆ ನಡೆಸಬೇಕು ಎಂದು ಒತ್ತಾಯಿಸಿದ್ದಾರೆ.

ಈ ಘಟನೆಯು ಪಾಕಿಸ್ತಾನದ ವೈದ್ಯಕೀಯ ಸೌಲಭ್ಯಗಳಲ್ಲಿನ ಸುರಕ್ಷತಾ ವ್ಯವಸ್ಥೆಯ ಮೇಲಿರುವ ಬೃಹತ್ ಲೋಪವನ್ನು ಜಗಜ್ಜಾಹೀರುಗೊಳಿಸಿದೆ. ಪೀಡಿತ ಕುಟುಂಬಗಳು ಮತ್ತು ಮಾನವ ಹಕ್ಕುಗಳ ನಿಯೋಗಗಳು ತಕ್ಷಣವೇ ಈ ಬಗ್ಗೆ ಸಮಗ್ರ ತನಿಖೆ ನಡೆಸಿ, ಆಸ್ಪತ್ರೆಗಳ ಮೇಲೆ ಕಟ್ಟುನಿಟ್ಟಿನ ಉಸ್ತುವಾರಿ ವಹಿಸಬೇಕು ಹಾಗೂ ವೈದ್ಯಕೀಯ ಉಪಕರಣಗಳ ಬಳಕೆಯಲ್ಲಿ ಕಠಿಣ ಭದ್ರತಾ ನಿಯಮಗಳನ್ನು ಜಾರಿಗೆ ತರಬೇಕು ಎಂದು ಸರ್ಕಾರವನ್ನು ಆಗ್ರಹಿಸಿವೆ.

ಬಡತನದಲ್ಲೇ ಬೆಂದು ಸಾವನ್ನಪ್ಪಿದ ಅಜ್ಜಿಯ ಮನೆಯಲ್ಲಿತ್ತು 10 ಕೋಟಿ ರೂ. ಕಲ್ಲು! ಮುಂದೇನಾಯ್ತು ನೋಡಿ

Suchethana D — Sun, 27 Sep 2026 17:16:50 +0530

ಕೆಲವೊಮ್ಮೆ ಅದೃಷ್ಟ ನಮ್ಮ ಮನೆಯಲ್ಲಿಯೇ ಅಡಗಿ ಕುಳಿತಿರುತ್ತದೆ, ಇಲ್ಲವೇ ನಮ್ಮ ಸುತ್ತಲೂ ಇರುತ್ತದೆ. ಆದರೆ ಆ ಅದೃಷ್ಟವನ್ನು ಅನುಭವಿಸುವ ಹಣೆಬರಹ ಇಲ್ಲದಿದ್ದರೆ ಅದು ನಮ್ಮ ಬಳಿಯೇ ಇದ್ದರೂ ಅದು ನಮಗೆ ತಿಳಿಯುವುದೇ ಇಲ್ಲ. ವಿಧಿಯ ಲೀಲೆ ಅದೇ ರೀತಿ ಆಗಿರುವ ಕಾರಣ, ಯಾರ ಪಾಲಿಗೆ ಏನು ಬರೆದಿರುತ್ತದೆಯೋ, ಅದನ್ನಷ್ಟೇ ಅನುಭವಿಸಲು ಸಾಧ್ಯ ಎನ್ನುವ ಮಾತಿಗೆ ಸಾಕ್ಷಿಯಾಗಿ ನಿಂತಿದೆ ಈ ಸ್ಟೋರಿ. ಕಡು ಬಡತನದಲ್ಲಿಯೇ ಬೆಂದು ಹೋಗಿ, ಕೊನೆಗೆ ಅದೇ ಬಡತನದಲ್ಲಿಯೇ ಕೊನೆಯುಸಿರೆಳೆದ ಅಜ್ಜಿಯ ಸ್ಟೋರಿ ಇದು. ಆಕೆ ಸತ್ತ ಮೇಲೆ ತಿಳಿದದ್ದು, ಅವಳು ದಿನನಿತ್ಯವೂ ಬಳಸುತ್ತಿದ್ದ ವಸ್ತುವೊಂದು ಸುಮಾರು 10 ಕೋಟಿ ಬೆಲೆ ಬಾಳುವಂಥದ್ದಾಗಿತ್ತು ಎನ್ನುವುದು!

ಇದು ನಡೆದಿರುವುದು ರೊಮೇನಿಯಾದ ರಾಜಧಾನಿ ಬುಖಾರೆಸ್ಟ್‌ನಲ್ಲಿ. ಈ ಸ್ಟೋರಿ ಇದೀಗ ಮತ್ತೆ ವೈರಲ್ ಆಗುತ್ತಿದೆ. ಇಲ್ಲಿಯ ಅಜ್ಜಿಯೊಬ್ಬಳು ಕಡುಬಡತನದಲ್ಲಿ ಜೀವನ ಸಾಗಿಸುತ್ತಿದ್ದಳು. ಮಧ್ಯಮ ಕುಟುಂಬವಳಾಗಿದ್ದ ಈ ಅಜ್ಜಿಯ ಮನೆಯನ್ನು ಒಮ್ಮೆ ಕಳ್ಳರು ಲೂಟಿ ಮಾಡಿ ಎಲ್ಲವನ್ನೂ ಹೊತ್ತೊಯ್ದಾಗ ಏನೂ ಇಲ್ಲದ ಈಕೆ ಬಡವಳಾಗಿಯೇ ಜೀವನ ಮಾಡಬೇಕಾದ ಸ್ಥಿತಿ ಬಂದಿತ್ತು. ಅವಳು ತನ್ನ ಮನೆಯ ಬಾಗಿಲು ಮುಚ್ಚಿಕೊಳ್ಳಬಾರದು ಎನ್ನುವ ಕಾರಣಕ್ಕೆ ಅಡ್ಡಲಾಗಿ ಒಂದು ಕಲ್ಲನ್ನು ಇಟ್ಟಿರುತ್ತಿದ್ದಳು. ಅದು ಸುಮಾರು 3.5 ಕೆ.ಜಿ ತೂಕದ ಕಲ್ಲು. ಅದೇ ಕಲ್ಲನ್ನು ಅಡ್ಡಲಾಗಿ ಇಟ್ಟು ದಿನವೂ ಮಲಗುತ್ತಿದ್ದಳು. ಆದರೆ ಆಕೆಯ ಪಾಲಿಗೆ ಅದೊಂದು ಕಲ್ಲಾಗಿತ್ತು, ಕೇವಲ ಕಲ್ಲು ಮಾತ್ರ. ಅದರ ಬೆಲೆಯೇ ಆಕೆಗೆ ತಿಳಿದಿರಲಿಲ್ಲ. ಬಹುಶಃ ಆಕೆಗೆ ಅದರ ಬೆಲೆ ತಿಳಿದಿದ್ದರೆ ಜೋಪಡಿಯಿಂದ ಐಷಾರಾಮಿ ಬಂಗಲೆಯಲ್ಲಿ ಆಕೆ ಕೋಟ್ಯಧಿಪತಿಯಾಗಿ ಬದುಕಬಹುದಿತ್ತು.

ವಿಧಿಯಾಟವೇ ಬೇರೆಯಾಗಿತ್ತು

ಆದರೆ ವಿಧಿಯಾಟವೇ ಬೇರೆಯಾಗಿತ್ತು. ಕಡು ಬಡತನದಲ್ಲಿಯೇ ಅಜ್ಜಿ ಕೊನೆಯುಸಿರೆಳೆದಳು. ನಂತರ ಆಕೆಯ ಅಂತಿಮ ಸಂಸ್ಕಾರ ಮಾಡಲು ಬಂದವರ ಕಣ್ಣಿಗೆ ಆ ಕಲ್ಲು ಬಿದ್ದಿದೆ. ಅದು ಅಮೂಲ್ಯವಾಗಿರುವ ಕಲ್ಲು ಎಂದು ಒಬ್ಬರಿಗೆ ತಿಳಿಯುತ್ತಲೇ ಅದರ ವರದಿಯನ್ನು ಸರ್ಕಾರಕ್ಕೆ ಮಾಡಿದರು. ಬಳಿಕ, ನಡೆದ ಸಂಶೋಧನೆಯಿಂದ ಅಚ್ಚರಿ ಬಹಿರಂಗಗೊಂಡಿತು. ಅದು ಸುಮಾರು 9-10 ಕೋಟಿ ರೂ. ಬೆಲೆ ಬಾಳುವ ಕಲ್ಲು ಎನ್ನುವುದು ತಿಳಿಯಿತು. ವರದಿಗಳ ಪ್ರಕಾರ, ಅಜ್ಜಿಗೆ ಆ ಕಲ್ಲು ನದಿಯ ದಡದಲ್ಲಿ 30-40 ವರ್ಷಗಳ ಹಿಂದೆಯೇ ಸಿಕ್ಕಿತ್ತು. ಮನೆಯ ಬಾಗಿಲು ಪದೇ ಪದೇ ತೆಗೆದುಕೊಳ್ಳುವ ಕಾರಣ, ಆ ಕಲ್ಲನ್ನು ಅಡ್ಡಲಾಗಿ ಇಡಲು ಆಕೆ ತಂದಿದ್ದಳು. ಕೊನೆಗೆ ಅದು ಆಂಬರ್ ಕಲ್ಲು ಎಂದು ಪತ್ತೆಯಾಗಿದೆ. ಇದು ವಿಶ್ವದ ಅತ್ಯಂತ ಅಮೂಲ್ಯ ಕಲ್ಲುಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ. ಈ ಕೆಂಪು ಕಲ್ಲು ಸುಮಾರು 70 ಮಿಲಿಯನ್ ವರ್ಷಗಳಷ್ಟು ಹಳೆಯದು ಎಂದು ಸಹ ಕಂಡುಹಿಡಿಯಲಾಗಿದೆ. ಮರಗಳಿಂದ ಸ್ರವಿಸುವ ಗಮ್ ಸಂಗ್ರಹದಿಂದ ಆಂಬರ್ ರೂಪುಗೊಳ್ಳುತ್ತದೆ. ಇದು ಹೆಚ್ಚಾಗಿ ಚಿನ್ನ ಅಥವಾ ಕೆಂಪು ಬಣ್ಣದ್ದಾಗಿರುತ್ತದೆ. ಅಂತಹ ಕಲ್ಲುಗಳು ರೊಮೇನಿಯಾದ ಕೋಲ್ಟಿಯಲ್ಲಿ ಕಂಡುಬರುತ್ತವೆ.

100 ವರ್ಷಗಳಿಗೂ ಹೆಚ್ಚು ಕಾಲ ಉತ್ಖನನ

ಆಂಬರ್ ಅನ್ನು ಕಂಡುಹಿಡಿಯಲು 100 ವರ್ಷಗಳಿಗೂ ಹೆಚ್ಚು ಕಾಲ ಇಲ್ಲಿ ಉತ್ಖನನ ನಡೆಸಲಾಗುತ್ತಿದೆ. ಆ ಮಹಿಳೆಯ ಮನೆಯಲ್ಲಿರುವ ಕಲ್ಲನ್ನು ರುಮೆನೈಟ್ ಎಂದು ಕರೆಯಲಾಗುತ್ತದೆ. ವರದಿಗಳ ಪ್ರಕಾರ, ಆ ಮಹಿಳೆಯ ಮನೆಯನ್ನು ಒಮ್ಮೆ ಕಳ್ಳತನ ಮಾಡಲಾಗಿತ್ತು. ಕಳ್ಳರು ಅನೇಕ ಬೆಲೆಬಾಳುವ ವಸ್ತುಗಳನ್ನು ಕದ್ದರು, ಆದರೆ ಈ ಕಲ್ಲು ಬಾಗಿಲಲ್ಲೇ ಇತ್ತು. ಅದು ಎಷ್ಟು ಬೆಲೆಬಾಳುತ್ತದೆ ಎಂದು ಕಳ್ಳರಿಗೂ ಊಹಿಸಲು ಸಾಧ್ಯವಾಗಲಿಲ್ಲ. 1991 ರಲ್ಲಿ ಮಹಿಳೆಯ ಮರಣದ ನಂತರ, ಆಕೆಯ ಸಂಬಂಧಿಕರು ಆ ಕಲ್ಲನ್ನು ತೆಗೆದುಕೊಂಡರು. ಅದರಲ್ಲಿ ಏನಾದರೂ ವಿಶೇಷತೆ ಇದೆ ಮತ್ತು ಅದನ್ನು ಮಾರಾಟ ಮಾಡುವ ಮೂಲಕ ಸ್ವಲ್ಪ ಆದಾಯವನ್ನು ಗಳಿಸಬಹುದು ಎಂದು ಅವರು ನಂಬಿದ್ದರು. ಅವರು ಅದನ್ನು ರೊಮೇನಿಯನ್ ಸರ್ಕಾರಕ್ಕೆ ಮಾರಾಟ ಮಾಡಿದರು, ನಂತರ ಅದನ್ನು ವಸ್ತುಸಂಗ್ರಹಾಲಯದಲ್ಲಿ ಇರಿಸಲಾಯಿತು. ಕಲ್ಲಿನ ಮೇಲಿನ ಸಂಶೋಧನೆಯು ಅದು ಸುಮಾರು 38 ರಿಂದ 70 ಮಿಲಿಯನ್ ವರ್ಷಗಳಷ್ಟು ಹಳೆಯದು ಎಂದು ಬಹಿರಂಗಪಡಿಸಿತು. ಮಿಚಿಗನ್‌ನಲ್ಲಿ ಇದೇ ರೀತಿಯ ಘಟನೆ ಸಂಭವಿಸಿದೆ. ಒಬ್ಬ ವ್ಯಕ್ತಿ ಆ ಕಲ್ಲನ್ನು ಮೆಟ್ಟಿಲು ಕಲ್ಲಾಗಿ ಬಳಸುತ್ತಿದ್ದ. ನಂತರ, ಅದು $100,000 ಮೌಲ್ಯದ್ದಾಗಿದೆ ಎಂದು ಕಂಡುಹಿಡಿಯಲಾಯಿತು.

Volodymyr Zelenskyy ಭಾರತ ಸೇರಿ 47 ದೇಶಗಳ ಪ್ರಜೆಗಳನ್ನು ಯುದ್ಧಕ್ಕೆ ದಾಳವಾಗಿ ಬಳಸುತ್ತಿದೆ ರಷ್ಯಾ!

Gowthami K — Fri, 25 Sep 2026 11:11:43 +0530

ನ್ಯೂಯಾರ್ಕ್: ತನ್ನ ದೇಶದ ವಿರುದ್ಧ ಯುದ್ಧದಲ್ಲಿ ರಷ್ಯಾ ದೇಶವು ಭಾರತ ಸೇರಿದಂತೆ ಒಟ್ಟು 47 ದೇಶಗಳ ಪ್ರಜೆಗಳನ್ನು ಅಕ್ರಮವಾಗಿ ಬಳಸಿಕೊಳ್ಳುತ್ತಿದೆ ಎಂದು ಉಕ್ರೇನ್ ಅಧ್ಯಕ್ಷ ಜೆಲೆನ್ಸ್ಕಿ ವಿಶ್ವಸಂಸ್ಥೆಯ ಮಹಾಧಿವೇಶನದಲ್ಲಿ ಆರೋಪ ಮಾಡಿದ್ದಾರೆ. ನ್ಯೂಯಾರ್ಕ್‌ನಲ್ಲಿ ನಡೆಯುತ್ತಿರುವ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯ (UNGA) ಉನ್ನತ ಮಟ್ಟದ ಮಹಾಧಿವೇಶನವನ್ನು ಉದ್ದೇಶಿಸಿ ಮಾತನಾಡಿದ ಅವರು, ವಿವಿಧ ದೇಶಗಳ ಜನರನ್ನು ಮೋಸ ಮತ್ತು ವಂಚನೆಯ ಮೂಲಕ ರಷ್ಯಾಕ್ಕೆ ಕರೆತರಲಾಗುತ್ತಿದ್ದು, ಅವರಲ್ಲಿ ಹಲವರು ಯುದ್ಧಭೂಮಿಯಲ್ಲಿ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ಹೀಗಾಗಿ ‘ಪುಟಿನ್ ನಿಮ್ಮ ದೇಶದ ಜನರನ್ನು ಈ ಯುದ್ಧಕ್ಕೆ ಎಳೆಯಲು ಬಿಡಬೇಡಿ. ರಷ್ಯಾದ ಆರ್ಥಿಕ ಮೂಲಗಳನ್ನು ಮತ್ತು ವ್ಯಾಪಾರವನ್ನು ನಿರ್ಬಂಧಿಸಿ’ ಎಂದು 47 ದೇಶಗಳ ಪ್ರತಿನಿಧಿಗಳಿಗೆ ಮನವಿ ಮಾಡಿದರು.

ಅಭಿವೃದ್ಧಿಶೀಲ ಹಾಗೂ ಬಡ ರಾಷ್ಟ್ರಗಳ ಪ್ರಜೆಗಳನ್ನು ರಷ್ಯಾದ ಸಮರಕ್ಕೆ ಬಳಸಿಕೊಳ್ಳಲಾಗುತ್ತಿದೆ ಎಂಬುದನ್ನು ಉಲ್ಲೇಖಿಸಿದ ಝೆಲೆನ್ಸ್ಕಿ, ನಾವು ತಡೆಹಿಡಿದಿರುವ ಯುದ್ಧ ಕೈದಿಗಳಲ್ಲಿ ಉತ್ತರ ಕೊರಿಯಾದವರಲ್ಲದೆ ಹಲವು ದೇಶಗಳ ಜನರಿದ್ದಾರೆ. ಘಾನಾ, ನೇಪಾಳ, ತಜಿಕಿಸ್ತಾನ್, ಭಾರತ, ಯೆಮೆನ್, ಕೀನ್ಯಾ, ಜಿಂಬಾಬ್ವೆ, ಕ್ಯೂಬಾ, ಬೆಲಾರಸ್, ಸುಡಾನ್ ಹಾಗೂ ದಕ್ಷಿಣ ಆಫ್ರಿಕಾದಂತಹ 47 ದೇಶಗಳ ನಾಗರಿಕರು ವಂಚನೆ ಮತ್ತು ಹುನ್ನಾರಗಳಿಗೆ ಒಳಗಾಗಿ ರಷ್ಯಾ ಸೇರಿದ್ದಾರೆ. ಅವರು ರಷ್ಯನ್ನರಲ್ಲ, ನಿಮ್ಮ ದೇಶಗಳ ಪ್ರಜೆಗಳು. ರಷ್ಯಾ ತನ್ನ ಸಾವು-ನೋವಿನ ಮುಖವಾಡವನ್ನು ಮುಚ್ಚಿಕೊಳ್ಳಲು ಮತ್ತು ತನ್ನ ಹುಚ್ಚುತನಕ್ಕೆ ನಿಮ್ಮ ಜನರ ಜೀವಗಳನ್ನು ಬಲಿಕೊಡಲು ಅವಕಾಶ ನೀಡಬೇಡಿ ಎಂದು ವಿಶ್ವದ ನಾಯಕರಿಗೆ ನೇರ ಮನವಿ ಮಾಡಿದರು.

ಭಾರತೀಯರ ಸಾವಿನ ಕುರಿತು ವಿದೇಶಾಂಗ ಕಾರ್ಯದರ್ಶಿ ನೀಡಿದ ಮಾಹಿತಿ

ಝೆಲೆನ್ಸ್ಕಿ ಅವರ ಈ ಹೇಳಿಕೆಗೆ ಬಲ ತುಂಬುವಂತೆ, ಭಾರತದ ವಿದೇಶಾಂಗ ಕಾರ್ಯದರ್ಶಿ ವಿಕ್ರಮ್ ಮಿಶ್ರಿ ಅವರು ಈ ತಿಂಗಳ ಆರಂಭದಲ್ಲಿ ನೀಡಿರುವ ಅಧಿಕೃತ ಮಾಹಿತಿ ಗಮನಾರ್ಹವಾಗಿದೆ. ರಷ್ಯಾದ ಸಶಸ್ತ್ರ ಪಡೆಗಳಿಗೆ ಭಾರತೀಯ ಪ್ರಜೆಗಳನ್ನು ನೇಮಕ ಮಾಡಿಕೊಂಡಿರುವ ವಿಚಾರವನ್ನು ಭಾರತ ಸರ್ಕಾರವು ರಷ್ಯಾದೊಂದಿಗೆ ಅತ್ಯುನ್ನತ ಮಟ್ಟದಲ್ಲಿ ಚರ್ಚೆ ನಡೆಸಿದೆ.

ಕೊನೆಯ ಅಧಿಕೃತ ಲೆಕ್ಕಾಚಾರದ ಪ್ರಕಾರ, ರಷ್ಯಾದ ಸೈನ್ಯಕ್ಕೆ ಸೇರ್ಪಡೆಗೊಂಡಿದ್ದ 227 ಭಾರತೀಯ ಪ್ರಜೆಗಳ ಮಾಹಿತಿ ನಮ್ಮ ಬಳಿಯಿತ್ತು. ಅದರಲ್ಲಿ 139 ಭಾರತೀಯರನ್ನು ಸೈನ್ಯದಿಂದ ಯಶಸ್ವಿಯಾಗಿ ಬಿಡುಗಡೆಗೊಳಿಸಲಾಗಿದೆ. ಆದರೆ, ಅತ್ಯಂತ ದುರದೃಷ್ಟವಶಾತ್ ಯುದ್ಧದಲ್ಲಿ ಭಾಗಿಯಾಗಿ ಇದುವರೆಗೆ 51 ಭಾರತೀಯರು ಪ್ರಾಣ ಕಳೆದುಕೊಂಡಿದ್ದಾರೆ ಎಂದು ವಿಕ್ರಮ್ ಮಿಶ್ರಿ ಸ್ಪಷ್ಟಪಡಿಸಿದ್ದಾರೆ.

ಆರ್ಥಿಕ ನಿರ್ಬಂಧ ಮತ್ತು ರಷ್ಯಾದ ಆದಾಯಕ್ಕೆ ತಡೆ

ತಮ್ಮ ಭಾಷಣದಲ್ಲಿ ರಷ್ಯಾದ ಆರ್ಥಿಕ ಮೂಲಗಳನ್ನು ಸ್ಥಗಿತಗೊಳಿಸಲು ಅಂತಾರಾಷ್ಟ್ರೀಯ ಸಮುದಾಯಕ್ಕೆ ಕರೆ ನೀಡಿದ ಝೆಲೆನ್ಸ್ಕಿ, ರಷ್ಯಾದೊಂದಿಗೆ ವ್ಯಾಪಾರ ಮಾಡುವ ಮೂಲಕ ಯಾರೆಲ್ಲ ಹಣವನ್ನು ಪೂರೈಸುತ್ತಾರೋ, ಅವರು ರಷ್ಯಾಗೆ ಯುದ್ಧವನ್ನು ಮುಂದುವರಿಸಲು ಹೆಚ್ಚಿನ ಸಮಯ ನೀಡುತ್ತಿದ್ದಾರೆ. ರಷ್ಯಾದಲ್ಲಿ ಹಣವಿದ್ದಾಗಲೆಲ್ಲ ಅದು ರಾಜತಾಂತ್ರಿಕ ಸಂಧಾನಗಳಿಗೆ ಸ್ಪಂದಿಸುವುದಿಲ್ಲ. ವಿಶ್ವಸಂಸ್ಥೆಯಲ್ಲಿ ವೀಟೋ ಅಧಿಕಾರದ ದುರುಪಯೋಗವು ಜಾಗತಿಕ ಶಾಂತಿಗೆ ಧಕ್ಕೆ ತರುತ್ತಿದೆ. ರಷ್ಯಾದ ಶೀಮಂತ ಉದ್ಯಮಿಗಳು ಮೇಲಿನ ನಿರ್ಬಂಧಗಳನ್ನು ಸಡಿಲಗೊಳಿಸುವುದು ಪುಟಿನ್ ಅವರಿಗೆ ಯುದ್ಧ ಮುಂದುವರಿಸಲು ಆಮ್ಲಜನಕ ನೀಡಿದಂತೆ ಎಂದರು.

ಪ್ರಸ್ತುತ ರಷ್ಯಾದ ಬಜೆಟ್ ಕೊರತೆಯು ಇತಿಹಾಸದಲ್ಲೇ ಅತ್ಯಂತ ಗರಿಷ್ಠ ಮಟ್ಟದಲ್ಲಿದ್ದು, ಹಲವು ರಷ್ಯನ್ ಪ್ರಾಂತ್ಯಗಳು ದಿವಾಳಿಯಾಗಿವೆ. ಆದ್ದರಿಂದ ಮಾಸ್ಕೋದ ಆರ್ಥಿಕ ಆದಾಯದ ಮೇಲೆ ಕಠಿಣ ಜಾಗತಿಕ ನಿರ್ಬಂಧಗಳನ್ನು ಹೇರುವುದೊಂದೇ ಈ ಭೀಕರ ಯುದ್ಧವನ್ನು ಅಂತ್ಯಗೊಳಿಸಲು ಇರುವ ಏಕೈಕ ಮಾರ್ಗ ಎಂದು ಝೆಲೆನ್ಸ್ಕಿ ಪ್ರತಿಪಾದಿಸಿದರು.

ಬರೋಬ್ಬರಿ 1 ಸಾವಿರ ಕೋಟಿ ರೂ. ಒಡತಿಯಾಗಿರುವ ಕಿಮ್ ಕರ್ದಾಶಿಯನ್‌ಗೆ 109 ರೂ ಪರಿಹಾರ ನೀಡಿದ ಫ್ರಾನ್ಸ್ ಕೋರ್ಟ್!

Gowthami K — Mon, 28 Sep 2026 11:17:34 +0530

ವಿಶ್ವಪ್ರಸಿದ್ಧ ಅಮೆರಿಕನ್ ಮಾಡೆಲ್, ರಿಯಾಲಿಟಿ ಟಿವಿ ತಾರೆ ಹಾಗೂ ಉದ್ಯಮಿ ಕಿಮ್ ಕರ್ದಾಶಿಯನ್ ಅವರಿಗೆ ಫ್ರಾನ್ಸ್‌ನ ಪ್ಯಾರಿಸ್ ನ್ಯಾಯಾಲಯವು ಕೇವಲ ಒಂದು ಯೂರೋ ಪರಿಹಾರ ನೀಡುವಂತೆ ಆದೇಶಿಸಿದೆ. ಪ್ರಸ್ತುತ ಭಾರತೀಯ ರೂಪಾಯಿ ಮೌಲ್ಯದಲ್ಲಿ ಒಂದು ಯೂರೋ ಎಂದರೆ ಸುಮಾರು 109 ರೂಪಾಯಿಗಳು. 1 ಸಾವಿರ ಕೋಟಿ ರೂಪಾಯಿ ಆಸ್ತಿಯೊಡತಿಯಾಗಿರುವ ಜಾಗತಿಕ ಗ್ಲಾಮರ್ ಐಕಾನ್‌ಗೆ ಕೇವಲ ₹109 ಪರಿಹಾರವೇ ಎಂಬ ಆಶ್ಚರ್ಯ ಮೂಡುವುದು ಸಹಜ. ಮೇಲ್ನೋಟಕ್ಕೆ ಇದು ಅವರಿಗೆ ನಡೆದ ಅವಮಾನದಂತೆ ಕಂಡರೂ, ಈ ವಿಚಿತ್ರ ಹಾಗೂ ಅಪರೂಪದ ತೀರ್ಪಿನ ಹಿಂದೆ ಸತ್ಯವಾದ ಕಾನೂನು ಕಾರಣವೊಂದಿದೆ.

2016ರ ಪ್ಯಾರಿಸ್ ಫ್ಯಾಷನ್ ವೀಕ್ ವೇಳೆ ನಡೆದ ಭೀಕರ ದರೋಡೆ

ಈ ಪ್ರಕರಣಕ್ಕೆ ಮೂಲ ಕಾರಣವಾಗಿದ್ದು 2016ರ ಅಕ್ಟೋಬರ್ 2ರಂದು ನಡೆದ ಭೀಕರ ಘಟನೆ. ಪ್ಯಾರಿಸ್ ಫ್ಯಾಷನ್ ವೀಕ್‌ನಲ್ಲಿ ಭಾಗವಹಿಸಲು ಆಗಮಿಸಿದ್ದ ಕಿಮ್ ಕರ್ದಾಶಿಯನ್, ನಗರದ ಐಷಾರಾಮಿ 'ಹೋಟೆಲ್ ಡಿ ಪೋರ್ಟಾಲೆಸ್'ನಲ್ಲಿ ತಂಗಿದ್ದರು. ಆ ಸಂದರ್ಭದಲ್ಲಿ ಪೋಲಿಸ್ ಸಮವಸ್ತ್ರದಲ್ಲಿ ಬಂದ ಸಶಸ್ತ್ರ ದರೋಡೆಕೋರರ ತಂಡವೊಂದು ಕಿಮ್ ತಂಗಿದ್ದ ಕೊಠಡಿಗೆ ದಿಢೀರ್ ನುಗ್ಗಿತ್ತು. ಕಿಮ್ ಅವರ ಮೇಲೆ ಬಂದೂಕು ತೋರಿಸಿ, ಪ್ಲಾಸ್ಟಿಕ್ ಜಿಪ್ ಟೈ ಮತ್ತು ಟೇಪ್‌ಗಳಿಂದ ಅವರ ಕೈಕಾಲುಗಳನ್ನು ಕಟ್ಟಿಹಾಕಿದ ದರೋಡೆಕೋರರು, ಕೋಟ್ಯಂತರ ರೂಪಾಯಿ ಮೌಲ್ಯದ ಆಭರಣಗಳನ್ನು ದೋಚಿ ಪರಾರಿಯಾಗಿದ್ದರು. ಇದರಲ್ಲಿ ಘಟನೆಗೂ ಮುನ್ನ ಗಿವೆಂಚಿ ಫ್ಯಾಷನ್ ಪ್ರದರ್ಶನದಲ್ಲಿ ಕಿಮ್ ಧರಿಸಿದ್ದ ಅತ್ಯಂತ ಬೆಲೆಬಾಳುವ ವಜ್ರದ ಉಂಗುರವೂ ಸೇರಿತ್ತು. ದೋಚಲಾದ ಒಟ್ಟು ಆಭರಣಗಳ ಮೌಲ್ಯ ಸುಮಾರು ₹50 ಕೋಟಿಗೂ ಹೆಚ್ಚು ಅಧಿಕವಾಗಿತ್ತು. ಈ ದಾಳಿಯನ್ನು ಕಿಮ್ ಕರ್ದಾಶಿಯನ್ ತಮ್ಮ ಜೀವನದ ಅತ್ಯಂತ ಭಯಾನಕ ಅನುಭವ ಎಂದು ಬಣ್ಣಿಸಿದ್ದಾರೆ.

ತಾತಂದಿರ ದರೋಡೆ ಪಡೆ!

ಈ ಪ್ರಕರಣದ ತನಿಖೆ ನಡೆಸಿದ ಪ್ಯಾರಿಸ್ ಪೊಲೀಸರಿಗೆ ಆಘಾತಕಾರಿ ಸತ್ಯವೊಂದು ತಿಳಿದುಬಂದಿತ್ತು. ಈ ದರೋಡೆ ನಡೆಸಿದ ತಂಡದಲ್ಲಿದ್ದ ಹೆಚ್ಚಿನ ಆರೋಪಿಗಳು ಹಿರಿಯ ನಾಗರಿಕರಾಗಿದ್ದರು. ವಿಚಾರಣೆ ಎದುರಿಸಿದ ಆರೋಪಿಗಳಲ್ಲಿ ಆರು ಮಂದಿ 60 ರಿಂದ 70 ರ ವಯೋಮಾನದವರಾಗಿದ್ದರು. ಹಿರಿಯ ವಯಸ್ಸಿನವರಾಗಿದ್ದೂ ಇಂತಹ ಬೃಹತ್ ದರೋಡೆ ನಡೆಸಿದ್ದರಿಂದ, ಫ್ರೆಂಚ್ ಮಾಧ್ಯಮಗಳು ಈ ಪಡೆಗೆ 'ಲೆಸ್ ಪಾಪಿಸ್ ಬ್ರಾಕರ್ಸ್' (Les Papis Braqueurs) ಅಂದರೆ ಅಜ್ಜಂದಿರ ದರೋಡೆಕೋರರು ಎಂದೇ ನಾಮಕರಣ ಮಾಡಿದ್ದವು. ಅಂತಿಮವಾಗಿ ಪ್ರಕರಣದಲ್ಲಿ ಎಂಟು ಮಂದಿ ದೋಷಿಗಳು ಎಂದು ನ್ಯಾಯಾಲಯ ತೀರ್ಪು ನೀಡಿದೆ.

ಹಣಕ್ಕಾಗಿ ಅಲ್ಲ, ನ್ಯಾಯದ ಗುರುತಿಸುವಿಕೆಗಾಗಿ ಹೋರಾಟ

ಬಂದೂಕಿನ ತುದಿಯಲ್ಲಿ ನಡೆದ ಈ ಭೀಕರ ದರೋಡೆಯು ಕಿಮ್ ಕರ್ದಾಶಿಯನ್ ಮತ್ತು ಅವರ ಜೊತೆಗಿದ್ದ ಸ್ಟೈಲಿಸ್ಟ್ ಸಿಮೋನ್ ಹಾರೋಶ್ ಅವರ ಮೇಲೆ ತೀವ್ರ ಮಾನಸಿಕ ಆಘಾತವನ್ನು ಉಂಟುಮಾಡಿತ್ತು. ಆದರೆ, ಈಗಾಗಲೇ ಅಪಾರ ಸಂಪತ್ತನ್ನು ಹೊಂದಿರುವ ಕಿಮ್ ಅವರಿಗೆ ದರೋಡೆಕೋರರಿಂದ ಹಣಗಳಿಸುವ ಉದ್ದೇಶವಿರಲಿಲ್ಲ. ಬದಲಿಗೆ, ತಮಗಾದ ಮಾನಸಿಕ ಕಿರುಕುಳ ಮತ್ತು ಆಘಾತಕ್ಕೆ ನ್ಯಾಯಾಂಗ ವ್ಯವಸ್ಥೆಯಲ್ಲಿ ಸಾಂಕೇತಿಕವಾಗಿ ನ್ಯಾಯ ಸಿಗಬೇಕು ಎಂಬ ಕಾರಣಕ್ಕಾಗಿ, ನನಗೆ ಕೇವಲ ಸಾಂಕೇತಿಕವಾಗಿ ಒಂದು ಯೂರೋ ಪರಿಹಾರ ನೀಡಿದರೆ ಸಾಕು ಎಂದು ಅವರು ಪ್ಯಾರಿಸ್ ನ್ಯಾಯಾಲಯದಲ್ಲಿ ಮನವಿ ಮಾಡಿದ್ದರು.

ಕಿಮ್ ಕರ್ದಾಶಿಯನ್ ಮತ್ತು ಸಿಮೋನ್ ಹಾರೋಶ್ ಅವರ ಮನವಿಯನ್ನು ಆಲಿಸಿದ ನ್ಯಾಯಾಲಯವು, ಇಬ್ಬರಿಗೂ ತಲಾ ಒಂದು ಯೂರೋ (ಸುಮಾರು ₹109) ಪರಿಹಾರ ನೀಡುವಂತೆ ಆದೇಶಿಸಿದೆ. ತೀರ್ಪಿನ ನಂತರ ಅಸೋಸಿಯೇಟೆಡ್ ಪ್ರೆಸ್‌ಗೆ ನೀಡಿದ ಜಂಟಿ ಹೇಳಿಕೆಯಲ್ಲಿ ಕಿಮ್ ಮತ್ತು ಸಿಮೋನ್, ಈ ಆಘಾತಕಾರಿ ಘಟನೆಯ ನೋವು ಇಂದಿಗೂ ನಮ್ಮನ್ನು ಕಾಡುತ್ತಿದೆ. ಇಂದಿನ ನಿರ್ಧಾರವು ಹಣಕಾಸಿನ ಪರಿಹಾರಕ್ಕಾಗಿ ಅಲ್ಲ, ಬದಲಿಗೆ ತಪ್ಪಿತಸ್ಥರ ಹೊಣೆಗಾರಿಕೆ ಮತ್ತು ನಮಗಾದ ಆಘಾತದ ಅಧಿಕೃತ ಸ್ವೀಕೃತಿಗಾಗಿ. ನಮಗೆ ಬೆಂಬಲ ನೀಡಿದ ನ್ಯಾಯಾಲಯಕ್ಕೆ ಕೃತಜ್ಞತೆಗಳು ಎಂದು ತಿಳಿಸಿದ್ದಾರೆ.

ಹೋಟೆಲ್ ನೌಕರನಿಗೆ ಸಿಕ್ಕಿತು ₹1 ಕೋಟಿಗೂ ಹೆಚ್ಚು ಪರಿಹಾರ

ಇದೇ ಘಟನೆಯಲ್ಲಿ ಬಂದೂಕಿನ ತುದಿಯಲ್ಲಿ ಬೆದರಿಕೆಗೆ ಒಳಗಾಗಿ ದರೋಡೆಕೋರರನ್ನು ಕಿಮ್ ಅವರ ಕೊಠಡಿಗೆ ಕರೆದೊಯ್ಯಲು ನಿರ್ಬಂಧಿಸಲ್ಪಟ್ಟಿದ್ದ ಹೋಟೆಲ್‌ನ ಮಾಜಿ ಉದ್ಯೋಗಿಗೆ ಪ್ಯಾರಿಸ್ ನ್ಯಾಯಾಲಯವು ಸುಮಾರು ₹1 ಕೋಟಿಗೂ ಹೆಚ್ಚು ಪರಿಹಾರ ಘೋಷಿಸಿದೆ. ಆತ ಪ್ರಕರಣದಲ್ಲಿ ₹5 ಕೋಟಿಗೂ ಹೆಚ್ಚು ನಷ್ಟಪರಿಹಾರ ಕೋರಿದ್ದರೂ, ಕೋರ್ಟ್ ಆತನ ಸ್ಥಿತಿಯನ್ನು ಪರಿಗಣಿಸಿ ಈ ಮೊತ್ತವನ್ನು ನಿಗದಿಪಡಿಸಿದೆ. ಜೊತೆಗೆ ಹೋಟೆಲ್‌ಗೆ €50,000 ನೀಡಲು ಆದೇಶಿಸಲಾಗಿದೆ.

ಸಾಂಕೇತಿಕ ಪರಿಹಾರ ಕೋರಿದ ಇತರ ಜಾಗತಿಕ ಸೆಲೆಬ್ರಿಟಿಗಳು

ಹಣಕ್ಕಿಂತ ಹೆಚ್ಚಾಗಿ ತತ್ವ ಮತ್ತು ಸತ್ಯದ ಗೆಲುವಿಗಾಗಿ ಕೇವಲ 1 ಡಾಲರ್ ಅಥವಾ 1 ಪೌಂಡ್ ಸಾಂಕೇತಿಕ ಪರಿಹಾರ ಕೋರುವುದು ಜಾಗತಿಕ ಮಟ್ಟದಲ್ಲಿ ಇದೇ ಮೊದಲೇನಲ್ಲ:

ಟೇಲರ್ ಸ್ವಿಫ್ಟ್: 2017ರಲ್ಲಿ ಅಮೆರಿಕದ ಪ್ರಸಿದ್ಧ ಗಾಯಕಿ ಟೇಲರ್ ಸ್ವಿಫ್ಟ್, ತಮ್ಮ ಮೇಲೆ ನಡೆದ ಲೈಂಗಿಕ ಕಿರುಕುಳ ಪ್ರಕರಣದಲ್ಲಿ ಮಾಜಿ ರೇಡಿಯೋ ಡಿಜೆ ಡೇವಿಡ್ ಮುಲ್ಲರ್ ವಿರುದ್ಧ ನ್ಯಾಯಾಲಯದಲ್ಲಿ ಕೇವಲ 1 ಡಾಲರ್ ಪರಿಹಾರ ಕೋರಿ ಗೆದ್ದಿದ್ದರು.

ಗ್ವಿನೆತ್ ಪಾಲ್ಟ್ರೋ: 2023ರಲ್ಲಿ ನಟಿ ಗ್ವಿನೆತ್ ಪಾಲ್ಟ್ರೋ, 2016ರ ಸ್ಕೀಯಿಂಗ್ ಅಪಘಾತಕ್ಕೆ ಸಂಬಂಧಿಸಿದ ದಾವೆಯಲ್ಲಿ ಎದುರಾಳಿಯಿಂದ ಕೇವಲ ಸಾಂಕೇತಿಕ 1 ಡಾಲರ್ ಮತ್ತು ತಮ್ಮ ವಕೀಲರ ವೆಚ್ಚವನ್ನು ಪರಿಹಾರವಾಗಿ ಪಡೆದಿದ್ದರು.

ಮೇಘನ್ ಮಾರ್ಕಲ್: ಬ್ರಿಟನ್ನಿನ ಡಚೆಸ್ ಆಫ್ ಸಸೆಕ್ಸ್ ಮೇಘನ್ ಮಾರ್ಕಲ್, ತಮ್ಮ ಖಾಸಗಿ ಪತ್ರವನ್ನು ಅಕ್ರಮವಾಗಿ ಪ್ರಕಟಿಸಿದ ಮಾಧ್ಯಮ ಸಂಸ್ಥೆಯ ವಿರುದ್ಧದ ಹಕ್ಕುಸ್ವಾಮ್ಯ ಹಾಗೂ ಖಾಸಗಿತನದ ಮೊಕದ್ದಮೆಯಲ್ಲಿ ಗೆದ್ದು ಕೇವಲ £1 (ಒಂದು ಪೌಂಡ್) ಸಾಂಕೇತಿಕ ಪರಿಹಾರ ಸ್ವೀಕರಿಸಿದ್ದರು.

ಒಟ್ಟಿನಲ್ಲಿ, ಕಿಮ್ ಕರ್ದಾಶಿಯನ್ ಪ್ರಕರಣದ ಈ ತೀರ್ಪು, ನ್ಯಾಯಾಲಯದ ಕಟ್ಟೆ ಏರುವುದು ಬರಿ ಹಣಗಳಿಕೆಗಾಗಿ ಅಲ್ಲ, ಬದಲಿಗೆ ನೈತಿಕ ಹೊಣೆಗಾರಿಕೆ ಮತ್ತು ಸತ್ಯದ ಉಳಿವಿಗಾಗಿ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.

ಕೋವಿಡ್‌ನಲ್ಲಿ ಅಪ್ಪನ ಸ್ನೇಹಿತ ಕೊಟ್ಟ ಚೆಸ್‌ ಬೋರ್ಡ್‌‌ನಲ್ಲಿತ್ತು ಅದೃಷ್ಟ! 11ರ ಬಾಲೆಯೀಗ ಗ್ರ್ಯಾಂಡ್‌ಮಾಸ್ಟರ್

Suchethana D — Tue, 29 Sep 2026 19:50:54 +0530

ವಾಯುವ್ಯ ಲಂಡನ್‌ನ ಹ್ಯಾರೋದಲ್ಲಿ ವಾಸಿಸುತ್ತಿರುವ, ಭಾರತೀಯ ಮೂಲದ ಚೆಸ್ ಆಟಗಾರ್ತಿ ಬೋಧನಾ ಶಿವಾನಂದನ್ ಕೇವಲ 11ನೇ ವಯಸ್ಸಿನಲ್ಲಿ ಇತಿಹಾಸ ನಿರ್ಮಿಸಿದ್ದಾಳೆ. ಇಂಗ್ಲೆಂಡ್ ತಂಡವನ್ನು ಪ್ರತಿನಿಧಿಸಿದ ಬೋಧನಾ, ಉಜ್ಬೇಕಿಸ್ತಾನ್‌ನ ಸಮರ್‌ಕಂಡ್‌ನಲ್ಲಿ ನಡೆದ 46ನೇ ಚೆಸ್ ಒಲಿಂಪಿಯಾಡ್‌ನಲ್ಲಿ ಅತ್ಯಂತ ಕಿರಿಯ ಮಹಿಳಾ ಗ್ರ್ಯಾಂಡ್‌ಮಾಸ್ಟರ್ ಆಗುವ ಹೆಗ್ಗಳಿಕೆಯನ್ನು ಪಡೆದಿದ್ದಾಳೆ.

ಅಂತರರಾಷ್ಟ್ರೀಯ ಚೆಸ್ ಒಕ್ಕೂಟವು (FIDE) ಈ ಸಾಧನೆಯನ್ನು ದೃಢಪಡಿಸಿದೆ. ಈ ಬಾಲೆ, ಚೆಸ್ ಒಲಿಂಪಿಯಾಡ್‌ನಲ್ಲಿ ಇಂಗ್ಲೆಂಡ್‌ನ ಅಗ್ರ ಬೋರ್ಡ್‌ನಲ್ಲಿ ಎಲ್ಲಾ 11 ಸುತ್ತುಗಳನ್ನು ಆಡಿ 8 ಅಂಕಗಳೊಂದಿಗೆ ಪಂದ್ಯಾವಳಿಯನ್ನು ಪೂರ್ಣಗೊಳಿಸಿದ್ದಾಳೆ. ತಂಡದ ಅತ್ಯುತ್ತಮ ಆಟಗಾರರಿಗೆ ಸಾಮಾನ್ಯವಾಗಿ ಅಗ್ರ ಬೋರ್ಡ್ ಅನ್ನು ಮೀಸಲಿಡಲಾಗುತ್ತದೆ. ತಮ್ಮ ಐತಿಹಾಸಿಕ ಸಾಧನೆಯ ಕುರಿತು FIDE ಜೊತೆ ಮಾತನಾಡುತ್ತಾ ಬೋಧನಾ, "ಇದನ್ನು ಸಾಧಿಸಿರುವುದಕ್ಕೆ ನನಗೆ ಸಂತೋಷವಿದೆ, ಆದರೆ ನಾನು ಇಲ್ಲಿಗೆ ನಿಲ್ಲಲು ಬಯಸುವುದಿಲ್ಲ. ನಾನು ಆಟವನ್ನು ಮುಂದುವರಿಸಲು ಮತ್ತು ಇತಿಹಾಸವನ್ನು ಸೃಷ್ಟಿಸಲು ಬಯಸುತ್ತೇನೆ" ಎಂದಿದ್ದಾಳೆ.

ಒಲಿಂಪಿಯಾಡ್‌ನಲ್ಲಿನ ತಮ್ಮ ಅತ್ಯುತ್ತಮ ಪ್ರದರ್ಶನದ ವೇಳೆ, ಬೋಧನಾ ತಮ್ಮ ಎರಡನೇ 'ಇಂಟರ್ನ್ಯಾಷನಲ್ ಮಾಸ್ಟರ್' (IM) ಮಾನದಂಡವನ್ನು (norm) ಪೂರೈಸಿದಳು. ಇದರೊಂದಿಗೆ, ಅವರು 'ಇಂಟರ್ನ್ಯಾಷನಲ್ ಮಾಸ್ಟರ್' ಪ್ರಶಸ್ತಿಯನ್ನು ಪಡೆಯುವತ್ತ ಹತ್ತಿರವಾಗಿದ್ದಾಳೆ.

ಲಾಕ್‌ಡೌನ್ ಸಮಯದಲ್ಲಿ ಚೆಸ್ ಆಟದ ಆರಂಭ

ಚೆಸ್‌ನಲ್ಲಿ ಬೋಧನಾಳ ಪ್ರಯಾಣವು ಸಾಕಷ್ಟು ಆಸಕ್ತಿದಾಯಕವಾಗಿದೆ. ಈಕೆ ಮೊದಲು ಕೋವಿಡ್-19 ಲಾಕ್‌ಡೌನ್ ಸಮಯದಲ್ಲಿ ಈ ಆಟವನ್ನು ಆಡಲು ಪ್ರಾರಂಭಿಸಿದಳು. ಬಾಲಕಿಯ ತಂದೆಯ ಸ್ನೇಹಿತರೊಬ್ಬರು ಭಾರತಕ್ಕೆ ಮರಳುವಾಗ ಬೋಧನಾ ಅವರ ಕುಟುಂಬಕ್ಕೆ ಕೆಲವು ಬ್ಯಾಗ್‌ಗಳನ್ನು ನೀಡಿದ್ದರು; ಅವುಗಳಲ್ಲಿ ಒಂದರಲ್ಲಿ ಚೆಸ್ ಬೋರ್ಡ್ ಇತ್ತು. ನಂತರ ಬೋಧನಾ ಸ್ವತಃ ಆಟವನ್ನು ಕಲಿಯಲು ಪ್ರಾರಂಭಿಸಿದಳು ಮತ್ತು ಈ ಕ್ರೀಡೆಯಲ್ಲಿ ತ್ವರಿತವಾಗಿ ತನ್ನದೇ ವಿಶಿಷ್ಟ ಗುರುತು ಮೂಡಿಸಿಕೊಂಡಳು.

ಅನೇಕ ದಾಖಲೆ ನಿರ್ಮಾಣ

ಬೋಧನಾ ಇತ್ತೀಚಿನ ವರ್ಷಗಳಲ್ಲಿ ಹಲವಾರು ದಾಖಲೆಗಳನ್ನು ನಿರ್ಮಿಸಿದ್ದಾಳೆ. ಕಳೆದ ತಿಂಗಳಷ್ಟೇ, ಈಕೆ ಬ್ರಿಟಿಷ್ ಚೆಸ್ ಚಾಂಪಿಯನ್‌ಶಿಪ್‌ನಲ್ಲಿ ಬ್ರಿಟನ್‌ನ ಅತ್ಯಂತ ಕಿರಿಯ ಮಹಿಳಾ ಚಾಂಪಿಯನ್ ಆಗುವ ದಾಖಲೆಯನ್ನು ನಿರ್ಮಿಸಿದ್ದಾಳೆ. ವೇಗದ ಮಾದರಿಯ (faster formats) ಆಟಗಳಲ್ಲೂ ಅತ್ಯುತ್ತಮ ಪ್ರದರ್ಶನ ನೀಡಿದ್ದಾಳೆ. ಯುಕೆ (UK) ಓಪನ್ ಮಹಿಳಾ ಬ್ಲಿಟ್ಜ್ ಚಾಂಪಿಯನ್ ಆಗಿದ್ದಾಳೆ ಮತ್ತು ಬ್ರಿಟಿಷ್ ಮಹಿಳಾ ರಾಪಿಡ್ ಚಾಂಪಿಯನ್ ಪ್ರಶಸ್ತಿಯನ್ನು ಹಂಚಿಕೊಂಡಿದ್ದಾಳೆ. ಕೇವಲ 11ನೇ ವಯಸ್ಸಿನಲ್ಲಿ 'ವುಮನ್ ಗ್ರಾಂಡ್‌ಮಾಸ್ಟರ್' (Woman Grandmaster) ಪ್ರಶಸ್ತಿಯನ್ನು ಪಡೆಯುವುದು ಬೋಧನಾಳ ವೇಗವಾಗಿ ಪ್ರಗತಿ ಕಾಣುತ್ತಿರುವ ಚೆಸ್ ವೃತ್ತಿಜೀವನದಲ್ಲಿ ಮತ್ತೊಂದು ಪ್ರಮುಖ ಮೈಲಿಗಲ್ಲಾಗಿದೆ.

ಭಯೋತ್ಪಾದಕ ದೇಶ ಈ ಪ್ರಶ್ನೆ ಕೇಳುತ್ತಿದೆಯಾ? ವಿಶ್ವಸಂಸ್ಥೆಯಲ್ಲಿ ಪಾಕ್ ಮುಖವಾಡ ಕಳಚಿದ ಜೈಶಂಕರ್

Chethan Kumar — Sat, 26 Sep 2026 10:05:11 +0530

ನ್ಯೂಯಾರ್ಕ್ (ಸೆ.26) ವಿಶ್ವಸಂಸ್ಥೆಯ 81ನೇ ಜನರಲ್ ಅಸೆಂಬ್ಲಿಯಲ್ಲಿ ಹಲವು ಹೈಡ್ರಾಮಗಳು ನಡೆದಿದೆ. ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ಭಾಷಣದ ವೇಳೆ ಮುಸ್ಲಿಂ ರಾಷ್ಟ್ರಗಳ ಪ್ರತಿನಿಧಿಗಳು ಹೊರನಡೆದ ಸಂದರ್ಭ ಸೇರಿದಂತೆ ಹಲವು ಘಟನೆಗಳು ನಡೆದಿದೆ. ಇದರ ನಡುವೆ ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಭಾರತವನ್ನು ಇಕ್ಕಟ್ಟಿಗೆ ಸಿಲುಕಿಸಲು ಮಾಡಿದ ಪಾಕಿಸ್ತಾನದ ಪ್ರಯತ್ನವನ್ನು ಭಾರತದ ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಒಂದೇ ವಾಕ್ಯದ ಉತ್ತರದಲ್ಲಿ ವಿಫಲಗೊಳಿಸಿದ್ದಾರೆ. ಇಷ್ಟೇ ಅಲ್ಲ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪಾಕಿಸ್ತಾನದ ಮುಖವಾಡವನ್ನ ಕಳಚಿದ್ದಾರೆ.

ಟೆರರಿಸ್ಟ್ ಕಂಟ್ರಿ ಈ ಪ್ರಶ್ನೆ ನನ್ನಲ್ಲಿ ಕೇಳುತ್ತಿದೆಯಾ?

ವಿಶ್ವಸಂಸ್ಥೆಯ 81ನೇ ಜನರಲ್ ಅಸೆಂಬ್ಲಿಯ ಹಲವು ವೇದಿಕೆಗಳಲ್ಲಿ ಪಾಕಿಸ್ತಾನ ಮುಖಭಂಗ ಅನುಭವಿಸಿದೆ. ಇದರಿಂದ ಕೆರಳಿದ್ದ ಪಾಕಿಸ್ತಾನ ಪತ್ರಕರ್ತನ ವಿದೇಶಾಂಕ ಸಚಿವ ಎಸ್ ಜೈಶಂಕರ್ ಸೇರಿದಂತೆ ವಿಶ್ವಸಂಸ್ಥೆ ಪ್ರತಿನಿಧಿಗಳ ಸಂವಾದದಲ್ಲಿ ಪಾಕಿಸ್ತಾನ ಪತ್ರಕರ್ತ ಪ್ರಶ್ನೆ ಕೇಳಿದ್ದಾನೆ. ಯಾವಾಗ ಭಾರತ ಸರ್ಕಾರ ಪಾಕಿಸ್ತಾನದಲ್ಲಿ ಭಯೋತ್ಪಾದಕ ಚಟುವಟಿಕೆಗಳನ್ನು ನಿಲ್ಲಿಸುತ್ತೆ? ಯಾವಾಗ ಭಾರತ ಸರ್ಕಾರ ಭಯೋತ್ಪಾದಕರಿಗೆ ಆರ್ಥಿಕ ಬಲ ನೀಡಿ ಪಾಕಿಸ್ತಾನಕ್ಕೆ ಕಳುಹಿಸುವ ಸಂಪ್ರದಾಯಕ್ಕೆ ಅಂತ್ಯಹಾಡುತ್ತೆ ಎಂದು ಪ್ರಶ್ನಿಸಿದ್ದಾನೆ. ಈ ಪ್ರಶ್ನೆಗೆ ವಿದೇಶಾಂಗ ಸಚಿವ ಎಸ್ ಜೈಶಂಕರ್ ತಾಳ್ಮೆಯಿಂದ ಮರು ಪ್ರಶ್ನೆ ಹಾಕಿದ್ದಾರೆ. ಭಯೋತ್ಪಾದಕ ದೇಶವೊಂದು ಈ ಪ್ರಶ್ನೆಯನ್ನು ನನ್ನಲ್ಲಿ ಕೇಳುತ್ತಿದೆಯಾ ಎಂದು ಜೈಶಂಕರ್ ಪ್ರಶ್ನಿಸಿದ್ದಾರೆ. ಈ ಪ್ರಶ್ನೆಯೊಂದಿಗೆ ಜೈಶಂಕರ್ ತಮ್ಮ ಮಾತು ಮುಗಿಸಿದ್ದಾರೆ.

ಮರು ಪ್ರಶ್ನೆಯಲ್ಲೇ ಪಾಕಿಸ್ತಾನ ನೈಜ ಚಿತ್ರಣ ಬಯಲು

ಜೈಶಂಕರ್ ಮರು ಪ್ರಶ್ನೆಯಲ್ಲಿ ಉತ್ತರವೂ ಅಡಗಿತ್ತು. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಘೋಷಿಸಿದ ಪಟ್ಟಿಯಲ್ಲಿರುವ ಹಲವು ಭಯೋತ್ಪಾದಕರಿಗೆ ಪಾಕಿಸ್ತಾನ ನಿರಂತರ ಆಶ್ರಯ ನೀಡುತ್ತಾ ಬಂದಿದೆ. ಹಫೀಸ್ ಸಯೀದ್ ಸೇರಿದಂತೆ ಪ್ರಮುಖರನ್ನು ಪಾಕಿಸ್ತಾನ ಬಂಧಿಸಿಲ್ಲ. ಈ ಕುರಿತು ಪಾಕಿಸ್ತಾನ ಪ್ರಧಾನಿ ಶೆಹಬಾಝ್ ಷರೀಫ್‌ಗೆ ಪ್ರಶ್ನೆ ಕೇಳಿದಾಗ ಉತ್ತರಿಸಿದರೆ ಸಾಗಿದ್ದಾರೆ. ಪಾಕಿಸ್ತಾನ ಭಾರತದ ಮೇಲೆ ನಿರಂತರ ಭಯೋತ್ಪಾದಕ ದಾಳಿ ನಡೆಸುತ್ತಾ ಬಂದಿದೆ. 2025ರ ಪಹೆಲ್ಗಾಂ ದಾಳಿ ಇತ್ತೀಚಿನ ಘನಘೋರ ಘಟನೆ. ಅಮಾಯಕ ಪ್ರವಾಸಿಗರ ಮೇಲೆ ಪಾಕಿಸ್ತಾನ ಮೂಲದ ಭಯೋತ್ಪಾದಕರು ದಾಳಿ ನಡೆಸಿದ್ದರು. ಧರ್ಮ ಕೇಳಿ ಈ ದಾಳಿ ನಡೆದಿತ್ತು. 26 ಮಂದಿ ಬಲಿಯಾಗಿದ್ದರು. ಈ ದಾಳಿ ಹಿಂದಿನ ಉಗ್ರ ಸಂಘಟನೆಗಳನ್ನು ಗುರುತಿಸಿದ ಭಾರತ, ಆಪರೇಶನ್ ಸಿಂದೂರ್ ಕಾರ್ಯಾಚರಣೆ ಮೂಲಕ ತಿರೇಗೇಟು ನೀಡಿತ್ತು.

ಬುಧವಾರ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಆಯೋಗ ಮಂಡಳಿ ಸಭೆಯಲ್ಲೂ ಪಾಕಿಸ್ತಾನವನ್ನು ಭಾರತ ತರಾಟೆಗೆ ತೆಗೆದುಕೊಂಡಿತ್ತು. ಭಾರತದ ರಾಯಭಾರ ಅದಿಕಾರಿ ಕ್ಷಿತಿಜ್ ತ್ಯಾಗಿ ಪಾಕಿಸ್ತಾನದ ಭಯೋತ್ಪಾದಕತೆ ಕುರಿತು ಪ್ರಖರ ಮಾತುಗಳಲ್ಲಿ ವಿವರಿಸಿದ್ದರು. ಪಾಕಿಸ್ತಾನ ಭಯೋತ್ಪಾದಕರ ಸಾಕಿ ಸಲಹುವ ಬದಲು ಆರ್ಥಿಕತೆ, ಜನರಿಗೆ ಮೂಲಭೂತ ಸೌಕರ್ಯ, ಆಹಾರ ಒದಗಿಸುವಲ್ಲಿ ಪ್ರಯತ್ನ ಮಾಡಬೇಕು ಎಂದಿದ್ದರು. ಮತ್ತೊಂದು ದೇಶದ ಪ್ರದೇಶದಲ್ಲಿ ಭಯೋತ್ಪಾದಕರ ಬಿಟ್ಟು ಆಕ್ರಮಿಸಿಕೊಳ್ಳುವ ಪ್ರಯತ್ನ ಮಾಡುವ ಬದಲು ತನ್ನ ನೆಲದ ಜನರ ಬಗ್ಗೆ ಕಾಳಜಿ ತೋರಲಿ ಎಂದಿದ್ದರು. ಯುವ ಸಮೂಹವನ್ನು ಭಯೋತ್ಪಾದಕರಾಗಿ ಪರಿವರ್ತಿಸಿ ಮತ್ತೊಂದು ದೇಶಕ್ಕೆ ಕಳುಹಿಸುವ ಬದಲು ತಮ್ಮ ದೇಶದ ಜನರಿಗೆ ಉದ್ಯೋಗವಕಾಶ, ಬದುಕು ಕಟ್ಟಿಕೊಳ್ಳಲು ನೆರವಾಗುವುದು ಉತ್ತಮ. ಇತ್ತೀಚೆಗೆ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರದಲ್ಲಿ ಸ್ಥಳೀಯರು ಸರ್ಕಾರದ ವಿರುದ್ದ ಪ್ರತಿಭಟನೆ ನಡೆಸಿದಾಗ ಅವರ ಮೇಲೆ ಗುಂಡು ಹಾರಿಸಿ ಕ್ರೌರ್ಯ ಮೆರೆಯುವ ಬದಲು ಅವರ ಬೇಡಿಕೆ, ಸಮಸ್ಯೆಗಳನ್ನು ಆಲಿಸಿ ಪರಿಹಾರ ಕಂಡುಕೊಳ್ಳಬೇಕಿತ್ತು ಎಂದು ತ್ಯಾಗಿ ಹೇಳಿದ್ದರು.

ಲಂಚ್ ಬ್ರೇಕ್‌ನಲ್ಲಿ ಬದಲಾದ ಯುವತಿ ಲೈಫ್, ₹19 ಕೋಟಿ ಜಾಕ್‌ಪಾಟ್ ಕಸದ ಬುಟ್ಟಿಗೆ ಸೇರಬೇಕಿದ್ದ ಬದುಕಿನಲ್ಲಿ ಅದೃಷ್ಟ!

Gowthami K — Fri, 25 Sep 2026 16:26:28 +0530

ಯಾರ ಅದೃಷ್ಟ ಯಾವಾಗ, ಹೇಗೆ, ಎಲ್ಲಿ ಬದಲಾಗುತ್ತದೆ ಎಂದು ಊಹಿಸುವುದು ಯಾರಿಂದಲೂ ಸಾಧ್ಯವಿಲ್ಲ. ಇದಕ್ಕೆ ಅತ್ಯುತ್ತಮ ಉದಾಹರಣೆಯಂತಿರುವ ಘಟನೆಯೊಂದು ಅಮೆರಿಕದಲ್ಲಿ ನಡೆದಿದೆ. ಕಚೇರಿಯ ದಿನನಿತ್ಯದ ಕೆಲಸದ ಒತ್ತಡದಿಂದ ಕೊಂಚ ನಿರಾಳತೆ ಪಡೆಯಲು ಊಟದ ವಿರಾಮದಲ್ಲಿ ಹೊರಗೆ ಹೋದ ಮಹಿಳೆಯೊಬ್ಬರ ಇಡೀ ಜೀವನವೇ ಕೆಲವೇ ನಿಮಿಷಗಳಲ್ಲಿ ಸಂಪೂರ್ಣವಾಗಿ ಬದಲಾಗಿಹೋಯಿತು!

ಒತ್ತಡದ ವಾತಾವರಣದಲ್ಲಿದ್ದ ಆ ಅಮೆರಿಕನ್ ಮಹಿಳೆ ಊಟಕ್ಕೆ ಹೊರಬಿದ್ದಾಗ ಖರೀದಿಸಿದ ಒಂದು ಸಣ್ಣ ಲಾಟರಿ ಟಿಕೆಟ್, ಆಕೆಗೆ ಬರೋಬ್ಬರಿ $2 ಮಿಲಿಯನ್ (ಸುಮಾರು ₹19.17 ಕೋಟಿ) ಮೌಲ್ಯದ ಬಂಪರ್ ಜಾಕ್‌ಪಾಟ್ ತಂದುಕೊಟ್ಟಿತು. ಆದರೆ, ಈ ಘಟನೆಯ ಅತ್ಯಂತ ಕುತೂಹಲಕಾರಿ ಮತ್ತು ಆಶ್ಚರ್ಯಕರ ಸಂಗತಿಯೆಂದರೆ ಇಷ್ಟೊಂದು ಬೃಹತ್ ಮೊತ್ತದ ಆಸ್ತಿ ಒಲಿದರೂ ಆಕೆ ತಕ್ಷಣ ಕೆಲಸಕ್ಕೆ ರಾಜೀನಾಮೆ ನೀಡಲಿಲ್ಲ ಮಾತ್ರವಲ್ಲ ಸಂಭ್ರಮಾಚರಣೆ ಮಾಡಲಿಲ್ಲ. ಬದಲಿಗೆ, ಏನೂ ಆಗಿಲ್ಲವೇನೋ ಎಂಬಂತೆ ಸದ್ದಿಲ್ಲದೆ ಕಚೇರಿಗೆ ಹಿಂತಿರುಗಿ, ತನ್ನ ದಿನನಿತ್ಯದ ಶಿಫ್ಟ್ ಕೆಲಸ ಪೂರ್ಣಗೊಳಿಸಿದರು!

ಒತ್ತಡದ ದಿನ ತಂದಿತ್ತ 'ಬಂಪರ್ ಲಕ್

ಸಾಮಾನ್ಯವಾಗಿ ಉದ್ಯೋಗಿಗಳಿಗೆ ಊಟದ ವಿರಾಮ ಎಂದರೆ ತ್ವರಿತವಾಗಿ ತಿಂಡಿ ಊಟ ಮುಗಿಸುವುದು, ಸಣ್ಣ ನಡಿಗೆ ಅಥವಾ ಕೆಲಸದ ಒತ್ತಡದಿಂದ ಕೆಲ ನಿಮಿಷಗಳ ಕಾಲ ಕಣ್ಣುಮುಚ್ಚಿ ಕುಳಿತುಕೊಳ್ಳುವುದು. ಆದರೆ, ವರ್ಜೀನಿಯಾದ ಪೋರ್ಟ್ಸ್‌ಮೌತ್ ನಿವಾಸಿಯಾದ ಈ ಮಹಿಳೆಗೆ ಆ ಸಣ್ಣ ವಿರಾಮವೇ ಆರ್ಥಿಕ ಸ್ವಾತಂತ್ರ್ಯ ತಂದುಕೊಟ್ಟಿತು.

ಕಚೇರಿಯಲ್ಲಿ ವಿಪರೀತ ಕೆಲಸದ ಒತ್ತಡವಿದ್ದ ಕಾರಣ, ಅವರು ಮನಸ್ಸನ್ನು ಹಗುರಗೊಳಿಸಲು 'ಲವ್ ಫುಡ್ ಮಾರ್ಟ್' ಎಂಬ ಅಂಗಡಿಗೆ ತೆರಳಿದರು. ಅಲ್ಲಿ ತಮ್ಮ ಅದೃಷ್ಟವನ್ನು ಪರೀಕ್ಷಿಸಲು $20 (ಸುಮಾರು ₹1,916) ವೆಚ್ಚ ಮಾಡಿ 'ಪ್ಲಾಟಿನಂ 7s' ಎಂಬ ಸ್ಕ್ರ್ಯಾಚ್-ಆಫ್ ಟಿಕೆಟ್ ಖರೀದಿಸಿದರು. ಅಂಗಡಿಯ ಒಳಗಡೆಯೇ ಟಿಕೆಟ್ ಸ್ಕ್ರ್ಯಾಚ್ ಮಾಡಿದ ಅವರಿಗೆ ತಮ್ಮ ಕಣ್ಣುಗಳನ್ನೇ ನಂಬಲಾಗಲಿಲ್ಲ. ಆ ಲಾಟರಿ ಆಟದ ಅತ್ಯುನ್ನತ ಮತ್ತು ಗರಿಷ್ಠ ಬಹುಮಾನವಾದ 19.17 ಕೋಟಿ ರೂ ಹಣ ಅವರಿಗೇ ಸಿಕ್ಕಿತ್ತು!

ಕೋಟಿ ಗೆದ್ದರೂ ಕಚೇರಿಗೆ ಮರಳಿ ಕರ್ತವ್ಯ ಮೆರೆದ ಸಂಯಮ!

ಲಾಟರಿ ಗೆದ್ದ ವಿಷಯ ತಿಳಿಯುತ್ತಿದ್ದಂತೆ ಬಹುತೇಕರು ಆನಂದಭಾಷ್ಪ ಹರಿಸುತ್ತಾರೆ, ಸಹೋದ್ಯೋಗಿಗಳಿಗೆಲ್ಲ ಸುದ್ದಿ ತಿಳಿಸುತ್ತಾರೆ ಅಥವಾ ತಕ್ಷಣ ಕೆಲಸ ತೊರೆದು ಮನೆಗೆ ಓಡುತ್ತಾರೆ. ಆದರೆ ಈ ಮಹಿಳೆ ಪ್ರದರ್ಶಿಸಿದ ಸಂಯಮ ನಿಜಕ್ಕೂ ವಿಶಿಷ್ಟವಾದದ್ದು.

ತಮ್ಮ ಊಟದ ಸಮಯ ಮುಗಿಯುತ್ತಾ ಬಂದಿದ್ದರಿಂದ, ಅವರು ಆ ಅದೃಷ್ಟದ ಟಿಕೆಟ್ ಅನ್ನು ಅತ್ಯಂತ ಸುರಕ್ಷಿತವಾಗಿ ತಮ್ಮ ಬ್ಯಾಗ್‌ನಲ್ಲಿ ಇಟ್ಟುಕೊಂಡು ಸದ್ದಿಲ್ಲದೆ ಕಚೇರಿಗೆ ಹಿಂತಿರುಗಿದರು. ನನಗೆ ಆ ಕ್ಷಣವೇ ವಿಜಯವನ್ನು ಸಂಭ್ರಮಿಸಲು ಸಮಯವಿರಲಿಲ್ಲ. ಹಾಗಾಗಿ ಕಚೇರಿಗೆ ಹಿಂತಿರುಗಿ, ಏನೂ ಸಂಭವಿಸಿಲ್ಲವೇನೋ ಎಂಬಂತೆ ಸಾಮಾನ್ಯ ಉದ್ಯೋಗಿಯಂತೆ ನನ್ನ ಕೆಲಸವನ್ನು ಪೂರ್ಣಗೊಳಿಸಿದೆ ಎಂದು ಅವರು ನಂತರ ವರ್ಜೀನಿಯಾ ಲಾಟರಿ ಅಧಿಕಾರಿಗಳ ಬಳಿ ನೆನಪಿಸಿಕೊಂಡಿದ್ದಾರೆ.

ತಮ್ಮ ಖಾತೆಗೆ ಕೋಟ್ಯಂತರ ರೂಪಾಯಿ ಸೇರಲಿದೆ ಎಂಬ ಸತ್ಯ ಗೊತ್ತಿದ್ದರೂ, ಆಕೆ ತನ್ನ ವೃತ್ತಿಪರತೆಗೆ ಎಲ್ಲೂ ಧಕ್ಕೆ ತರದೆ ದಿನದ ಕೆಲಸವನ್ನು ಪೂರ್ಣಗೊಳಿಸಿದ್ದು ಎಲ್ಲರ ಆಶ್ಚರ್ಯಕ್ಕೆ ಕಾರಣವಾಗಿದೆ.

ರಹಸ್ಯವಾಗಿಟ್ಟ ಗುರುತು ಮತ್ತು ಭಾರಿ ನಗದು ಬಹುಮಾನ

'ಪೀಪಲ್' ನಿಯತಕಾಲಿಕೆಯ ವರದಿಗಳ ಪ್ರಕಾರ, ಅಮೆರಿಕದ ವರ್ಜೀನಿಯಾ ರಾಜ್ಯದ ಗೌಪ್ಯತಾ ಕಾನೂನುಗಳ ಅಡಿಯಲ್ಲಿ ಈ ಮಹಿಳೆ ತಮ್ಮ ಗುರುತನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸದಿರಲು ನಿರ್ಧರಿಸಿದ್ದಾರೆ. ವರ್ಜೀನಿಯಾ ಲಾಟರಿ ನಿಯಮಗಳ ಪ್ರಕಾರ, ವಿಜೇತರಿಗೆ ಬಹುಮಾನದ ಹಣ ಪಡೆಯಲು ಎರಡು ಆಯ್ಕೆಗಳಿದ್ದವು. ಮುಂದಿನ 30 ವರ್ಷಗಳ ಅವಧಿಯಲ್ಲಿ ವಾರ್ಷಿಕ ಕಂತುಗಳ ರೂಪದಲ್ಲಿ ಸಂಪೂರ್ಣ $2 ಮಿಲಿಯನ್ ಪಡೆಯುವುದು. ಇಲ್ಲವೇ ಒಂದೇ ಬಾರಿಗೆ ನಗದು ರೂಪದಲ್ಲಿ ಭಾಗಶಃ ಪಾವತಿ (Lump Sum) ಪಡೆದುಕೊಳ್ಳುವುದು.

ಆ ಮಹಿಳೆ ಎರಡನೇ ಆಯ್ಕೆಯನ್ನು ಆರಿಸಿಕೊಂಡು, ತೆರಿಗೆಯ ನಂತರ ಒಂದೇ ಬಾರಿಗೆ ಸುಮಾರು ₹8 ಕೋಟಿಗೂ ಹೆಚ್ಚು ನಗದನ್ನು ಮನೆಗೆ ಕೊಂಡೊಯ್ದರು. ಇನ್ನು ಈ ಅದೃಷ್ಟದ ಲಾಟರಿ ಟಿಕೆಟ್ ಮಾರಾಟ ಮಾಡಿದ 'ಲವ್ ಫುಡ್ ಮಾರ್ಟ್' ಅಂಗಡಿಗೂ ಲಾಟರಿ ಸಂಸ್ಥೆಯಿಂದ ವಿಶೇಷ ಬೋನಸ್ ಲಭಿಸಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್

ಒತ್ತಡದಲ್ಲಿದ್ದ ಉದ್ಯೋಗಿಯೊಬ್ಬರಿಗೆ ಊಟದ ವಿರಾಮದಲ್ಲಿ ಒಲಿದ ಈ 'ಜಾಕ್‌ಪಾಟ್' ಕಥೆ ಈಗ ಇಂಟರ್ನೆಟ್ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ವೈರಲ್ ಆಗಿದೆ. ರೂ. 19 ಕೋಟಿ ಗೆದ್ದ ಮೇಲೆಯೂ ಆಕೆ ತೋರಿಸಿದ ಶಿಸ್ತು, ಸಂಯಮ ಮತ್ತು ಶಾಂತತೆಯನ್ನು ಕಂಡು ನೆಟ್ಟಿಗರು ವಿಸ್ಮಯಗೊಂಡಿದ್ದಾರೆ.

ಶವಪೆಟ್ಟಿಗೆಯಿಂದ ಗುನುಗುವ ಶಬ್ದ ಬಂತೆಂದು ತೆರೆದು ನೋಡಿದಾಗ ಸತ್ತ ಮಹಿಳೆ ಜೀವಂತ, ಕೆಲವೇ ಗಂಟೆಗಳಲ್ಲಿ ಕಾದಿತ್ತು ಶಾಕ್!

Ashwini HR — Fri, 25 Sep 2026 13:37:31 +0530

70 year old dead woman wakes up inside coffin in China: ವೃದ್ಧೆಯೊಬ್ಬರು ಮೃತಪಟ್ಟಿದ್ದಾರೆ ಎಂದು ನಂಬಿ ಕುಟುಂಬಸ್ಥರು ಅಂತ್ಯಕ್ರಿಯೆಗೆ ಸಿದ್ಧತೆ ನಡೆಸಿ, ಮೃತದೇಹವನ್ನು ಶವಪೆಟ್ಟಿಗೆಯಲ್ಲಿ ಇರಿಸಿದ್ದರು. ಆದರೆ ಮರುದಿನ ಆ ಶವಪೆಟ್ಟಿಗೆಯೊಳಗಿಂದ ವಿಚಿತ್ರವಾದ ಗುನುಗುವ ಶಬ್ದ ಕೇಳಿಬಂದಿದ್ದು, ತೆರೆದು ನೋಡಿದಾಗ ಆಕೆ ಜೀವಂತವಾಗಿ ಉಸಿರಾಡುತ್ತಿರುವುದು ಪತ್ತೆಯಾಗಿದೆ! ಚೀನಾದ ಹೆಬೈ ಪ್ರಾಂತ್ಯದಲ್ಲಿ ನಡೆದ ಈ ರೋಚಕ ಹಾಗೂ ನಂಬಲಸಾಧ್ಯವಾದ ಘಟನೆಯು ಸದ್ಯ ಇಡೀ ವಿಶ್ವದಾದ್ಯಂತ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ, ಆತಂಕ ಮತ್ತು ಆಶ್ಚರ್ಯಕ್ಕೆ ಕಾರಣವಾಗಿದೆ.

ಅಷ್ಟಕ್ಕೂ ಆಗಿದ್ದೇನು?

ಚೀನಾದ ಹೆಬೈ ಪ್ರಾಂತ್ಯಕ್ಕೆ ಸೇರಿದ ಸುಮಾರು 70 ವರ್ಷದ ವೃದ್ಧೆಯೊಬ್ಬರು ಕಳೆದ ಹತ್ತು ವರ್ಷಗಳಿಂದ ಮೆದುಳಿನ ರಕ್ತ ಹೆಪ್ಪುಗಟ್ಟುವಿಕೆ ಅಂದರೆ ಸೆರೆಬ್ರಲ್ ಥ್ರಂಬೋಸಿಸ್ ಸಮಸ್ಯೆಯಿಂದ ತೀವ್ರವಾಗಿ ಬಳಲುತ್ತಿದ್ದರು. ಇದರ ಜೊತೆಗೆ ಆಕೆಗೆ ಕ್ಯಾನ್ಸರ್ ಕೂಡ ಬಾಧಿಸಿತ್ತು ಎಂದು ಚೀನಾ ಮಾಧ್ಯಮಗಳು ವರದಿ ಮಾಡಿವೆ. ಆಕೆಯ ಆರೋಗ್ಯ ದಿನದಿಂದ ದಿನಕ್ಕೆ ತೀರಾ ಕ್ಷೀಣಿಸಿದ್ದರಿಂದ ಇನ್ನು ಯಾವುದೇ ಚಿಕಿತ್ಸೆ ನೀಡಲು ಸಾಧ್ಯವಿಲ್ಲವೆಂದು ಆಸ್ಪತ್ರೆಯ ವೈದ್ಯರು ತಿಳಿಸಿದ್ದರು. ಹೀಗಾಗಿ ಕುಟುಂಬಸ್ಥರು ಆಕೆಯನ್ನು ಮನೆಗೆ ಕರೆತಂದು ತಾವೇ ಸ್ವತಃ ಉಪಚರಿಸುತ್ತಿದ್ದರು.

ಸೆಪ್ಟೆಂಬರ್ 8 ರಂದು ಆಕೆಯ ದೇಹದಲ್ಲಿ ಯಾವುದೇ ಚಲನವಲನ ಅಥವಾ ಉಸಿರಾಟ ಕಾಣಿಸಲಿಲ್ಲ. ಇದರಿಂದ ಆಕೆ ಮೃತಪಟ್ಟಿದ್ದಾಳೆ ಎಂದು ಭಾವಿಸಿದ ಕುಟುಂಬಸ್ಥರು, ಬೇರೆ ಊರುಗಳಿಂದ ಸಂಬಂಧಿಕರು ಅಂತಿಮ ದರ್ಶನಕ್ಕೆ ಬರುವವರೆಗೂ ಮೃತದೇಹ ಹಾಳಾಗಬಾರದೆಂದು ಶೈತ್ಯೀಕರಣದ ಸೌಲಭ್ಯವಿದ್ದ ಶವಪೆಟ್ಟಿಗೆಯಲ್ಲಿ ಇರಿಸಿದರು. ಎಲ್ಲವೂ ಮುಗಿಯಿತು ಎಂದೇ ಎಲ್ಲರೂ ಅಂದುಕೊಂಡಿದ್ದರು. ಆದರೆ ಮಾರನೇ ದಿನ ಸಂಜೆ ವೃದ್ಧೆಯ ಸೊಸೆಗೆ ಶವಪೆಟ್ಟಿಗೆಯ ಒಳಗಿನಿಂದ ಸಣ್ಣದಾಗಿ ಸದ್ದು ಕೇಳಿಸತೊಡಗಿತು.

ಜೀವ ಉಳಿದದ್ದು ಹೇಗೆ?

ಅನುಮಾನಗೊಂಡ ಸೊಸೆ ತಕ್ಷಣ ಕುಟುಂಬದ ಇತರ ಸದಸ್ಯರನ್ನು ಕೂಗಿ ಕರೆದಳು. ಎಲ್ಲರೂ ಸೇರಿ ಭಯದಿಂದಲೇ ಶವಪೆಟ್ಟಿಗೆಯನ್ನು ತೆರೆದು ನೋಡಿದಾಗ, ಒಳಗಿದ್ದ ವೃದ್ಧೆ ನಿಧಾನವಾಗಿ ಉಸಿರಾಡುತ್ತಿರುವುದು ಕಂಡುಬಂದು ಎಲ್ಲರೂ ಆಘಾತಕ್ಕೊಳಗಾದರು. ತಕ್ಷಣ ಆಕೆಯನ್ನು ಹೊರತೆಗೆದಾಗ ಆಕೆ ಕಣ್ಣುಗಳನ್ನು ತೆರೆದಳು. ಆದರೆ ತೀವ್ರ ನಿಶ್ಯಕ್ತಿಯಿಂದಾಗಿ ಆಕೆಗೆ ಮಾತನಾಡಲು ಅಥವಾ ನೀರು ಕುಡಿಯಲು ಕೂಡ ಸಾಧ್ಯವಾಗುತ್ತಿರಲಿಲ್ಲ. ಆಕೆಯನ್ನು ಡೀಪ್-ಫ್ರೀಜರ್ ಬದಲಿಗೆ ಸಾಮಾನ್ಯ ಶೈತ್ಯೀಕರಿಸಿದ ಪೆಟ್ಟಿಗೆಯಲ್ಲಿ ಇರಿಸಿದ್ದರಿಂದ ಜೀವ ಉಳಿದುಕೊಂಡಿತ್ತು.

ವಿಜ್ಞಾನ ಹೇಳುವುದೇನು?

ವೈದ್ಯಕೀಯ ತಜ್ಞರ ಪ್ರಕಾರ ಈ ವಿಚಿತ್ರ ಸ್ಥಿತಿಯನ್ನು ‘ಅಪ್ಯಾರೆಂಟ್ ಡೆತ್’ ಅಥವಾ ‘ತೋರಿಕೆಯ ಸಾವು’ ಎಂದು ಕರೆಯಲಾಗುತ್ತದೆ. ವ್ಯಕ್ತಿಯು ತೀವ್ರವಾದ ಕೋಮಾ ಅಥವಾ ಅರೆಪ್ರಜ್ಞಾವಸ್ಥೆಯಲ್ಲಿದ್ದಾಗ ಹೃದಯ ಬಡಿತ ಹಾಗೂ ಉಸಿರಾಟವು ಅತ್ಯಂತ ಕ್ಷೀಣವಾಗಿರುತ್ತದೆ. ಇದರಿಂದ ವೈದ್ಯಕೀಯ ತಪಾಸಣೆ ಮಾಡದ ಸಾಮಾನ್ಯ ಜನರು ವ್ಯಕ್ತಿ ಮೃತಪಟ್ಟಿದ್ದಾನೆ ಎಂದು ತಪ್ಪಾಗಿ ಭಾವಿಸುತ್ತಾರೆ.

ಆದರೆ ಕುಟುಂಬಸ್ಥರಿಗೆ ಸಿಕ್ಕ ಈ ಪುನರ್ಜನ್ಮದ ಆನಂದ ಹೆಚ್ಚು ಕಾಲ ಉಳಿಯಲಿಲ್ಲ. ಉಸಿರಾಟ ಪತ್ತೆಯಾದ ಕೆಲವೇ ಗಂಟೆಗಳಲ್ಲಿ ಸೆಪ್ಟೆಂಬರ್ 11 ರಂದು ಆಕೆ ನಿಜವಾಗಿಯೂ ಕೊನೆಯುಸಿರೆಳೆದರು. ನಂತರ ಸೆಪ್ಟೆಂಬರ್ 13 ರಂದು ಆಕೆಯ ಅಂತ್ಯಕ್ರಿಯೆಯನ್ನು ನೆರವೇರಿಸಲಾಯಿತು. ಸೋಶಿಯಲ್ ಮೀಡಿಯಾದಲ್ಲಿ ಕೆಲವರು ಈ ಘಟನೆಯ ಸತ್ಯಾಸತ್ಯತೆಯನ್ನು ಪ್ರಶ್ನಿಸಿದರೂ, ಕುಟುಂಬಸ್ಥರು ತಾವು ಸುಳ್ಳು ಹೇಳುವ ಅಗತ್ಯವಿಲ್ಲವೆಂದು ಸ್ಪಷ್ಟಪಡಿಸಿದ್ದಾರೆ. ತೀವ್ರ ಅನಾರೋಗ್ಯದ ವ್ಯಕ್ತಿಯ ಸಾವನ್ನು ಕೇವಲ ಕಣ್ಣಿನ ಅಂದಾಜಿನಲ್ಲಿ ತೀರ್ಮಾನಿಸದೆ, ವೈದ್ಯರಿಂದ ನಿಖರವಾಗಿ ಪರೀಕ್ಷಿಸಿ ಮರಣ ದೃಢೀಕರಿಸುವುದು ಎಷ್ಟು ಅತ್ಯಗತ್ಯ ಎಂಬುದನ್ನು ಈ ಘಟನೆ ಜಗತ್ತಿಗೆ ಎಚ್ಚರಿಸಿದೆ.

ಎಲ್ಲರೂ ಡಾಲರ್ ನೋಡ್ತಾರೆ, ಆದ್ರೆ ತ್ಯಾಗಗಳನ್ನಲ್ಲ...; ಕೆನಡಾದಲ್ಲಿರುವ ಭಾರತೀಯ ಯುವತಿಯ ವಿಡಿಯೋ ವೈರಲ್

Sathish Kumar KH — Sun, 27 Sep 2026 13:10:32 +0530

ವಿದೇಶದಲ್ಲಿ ಕೆಲಸ ಮಾಡಿಕೊಂಡು ಕೈತುಂಬಾ ಸಂಪಾದನೆ ಮಾಡುವವರ ಲೈಫ್‌ಸ್ಟೈಲ್ ಹೊರಗಿನಿಂದ ನೋಡೋಕೆ ಸಖತ್ ಅಟ್ರಾಕ್ಟಿವ್ ಆಗಿ ಕಾಣುತ್ತೆ. ಆದರೆ, ಅದರ ಹಿಂದಿರುವ ಒಂಟಿತನ, ಕುಟುಂಬದಿಂದ ದೂರವಿರುವ ನೋವು ಹಾಗೂ ದಿನನಿತ್ಯದ ಒದ್ದಾಟಗಳು ಯಾರಿಗೂ ಕಾಣಿಸುವುದಿಲ್ಲ. ಇದೇ ವಿಚಾರವನ್ನು ಕೆನಡಾದಲ್ಲಿ ನೆಲೆಸಿರುವ ಭಾರತೀಯ ಯುವತಿಯೊಬ್ಬಳು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾಳೆ. ಕನುಪ್ರಿಯಾ ಎಂಬ ಯುವತಿ ತನ್ನ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ಬಗ್ಗೆ ಒಂದು ವಿಡಿಯೋ ಪೋಸ್ಟ್ ಮಾಡಿದ್ದಾಳೆ.

ಎಲ್ಲರೂ ಡಾಲರ್ ನೋಡ್ತಾರೆ, ಆದ್ರೆ ತ್ಯಾಗಗಳನ್ನಲ್ಲ...

ವಿದೇಶದಲ್ಲಿರುವವರು ಸಾಕಷ್ಟು ಹಣ ಸಂಪಾದನೆ ಮಾಡುತ್ತಾರೆ ಎಂದು ಎಲ್ಲರೂ ಅಂದುಕೊಳ್ಳುತ್ತಾರೆ. ಆದರೆ, ಅದಕ್ಕಾಗಿ ಅವರು ತೆರುವ ಬೆಲೆಯನ್ನು ಕೂಡ ಅರ್ಥಮಾಡಿಕೊಳ್ಳಬೇಕು ಎನ್ನುವುದು ಈ ಯುವತಿಯ ಸಂದೇಶ. ಎರಡು-ಮೂರು ವರ್ಷಗಳ ನಂತರ ಊರಿಗೆ ವಾಪಸ್ ಹೋದಾಗ, ಅಪ್ಪ-ಅಮ್ಮನಿಗೆ ವಯಸ್ಸಾಗಿರುವುದು ಅರಿವಿಗೆ ಬರುತ್ತದೆ. ಮನೆಯಲ್ಲಿ ನಡೆಯುವ ಶುಭಕಾರ್ಯಗಳು ಹಾಗೂ ಹಬ್ಬ-ಹರಿದಿನಗಳನ್ನು ಕೇವಲ ವಿಡಿಯೋ ಕಾಲ್ ಮೂಲಕವಷ್ಟೇ ನೋಡಬೇಕಾದ ಅನಿವಾರ್ಯತೆ ಇರುತ್ತದೆ. ಒಂದು ಸಣ್ಣ ಹುಷಾರಿಲ್ಲದಿದ್ದರೂ, ವಿದೇಶದಲ್ಲಿ ನಮ್ಮನ್ನು ನಾವೇ ನೋಡಿಕೊಳ್ಳಬೇಕಾದ ಪರಿಸ್ಥಿತಿಯನ್ನು ಆಕೆ ವಿವರಿಸಿದ್ದಾಳೆ.

ಮಾತ್ರೆ ನುಂಗುವುದರಿಂದ ಹಿಡಿದು, ಅಡುಗೆ ಮಾಡುವುದು ಹಾಗೂ ಮನೆಗೆಲಸದವರೆಗೆ ಪ್ರತಿಯೊಂದೂ ನಮ್ಮದೇ ಜವಾಬ್ದಾರಿಯಾಗಿರುತ್ತದೆ. 'ಒಂದು ಕಪ್ ಟೀ ಬೇಕಾ?' ಎಂದು ಕೇಳಲು ಕೂಡ ಹತ್ತಿರದಲ್ಲಿ ಯಾರೂ ಇರುವುದಿಲ್ಲ. ಕೆಲವೊಮ್ಮೆ ಹುಷಾರಿಲ್ಲದಿದ್ದರೂ ಕೆಲಸಕ್ಕೆ ಹೋಗಲೇಬೇಕಾದ ಅನಿವಾರ್ಯತೆ ಇರುತ್ತದೆ ಎಂದು ಆಕೆ ಹೇಳಿದ್ದಾಳೆ. ಊರಿನಲ್ಲಿ ಕುಟುಂಬದವರೆಲ್ಲಾ ಒಟ್ಟಾಗಿ ಹಬ್ಬ ಆಚರಿಸುವಾಗ, ವಿದೇಶದಲ್ಲಿ ಕೆಲಸ ಮಾಡಬೇಕಾದಾಗಿನ ಬೇಸರವನ್ನು ಯುವತಿ ವಿಡಿಯೋದಲ್ಲಿ ಹಂಚಿಕೊಂಡಿದ್ದಾಳೆ. 'ಎಲ್ಲರೂ ಡಾಲರ್ ಲೆಕ್ಕ ಹಾಕ್ತಾರೆ, ಆದ್ರೆ ನಮ್ಮ ತ್ಯಾಗಗಳು ಯಾರಿಗೂ ಕಾಣಲ್ಲ' ಎನ್ನುವ ಸಂದೇಶವನ್ನು ಕನುಪ್ರಿಯಾ ಈ ವಿಡಿಯೋ ಮೂಲಕ ಸಾರಿದ್ದಾಳೆ.

View this post on Instagram

A post shared by Kanupria | Canada Explorer (@kanutalescanada)

ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ

ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ, ವಿದೇಶದಲ್ಲಿ ನೆಲೆಸಿರುವ ಅನೇಕರು ಕಮೆಂಟ್ ಮಾಡಿದ್ದಾರೆ. ವಿದೇಶಿ ಜೀವನ ಯಾವಾಗಲೂ ಐಷಾರಾಮಿಯಾಗಿರುವುದಿಲ್ಲ, ಕುಟುಂಬವನ್ನು ಮಿಸ್ ಮಾಡಿಕೊಳ್ಳುವುದೇ ಅತಿ ದೊಡ್ಡ ಕಷ್ಟ ಎಂದು ಹಲವರು ಒಪ್ಪಿಕೊಂಡಿದ್ದಾರೆ. ಆದರೆ, ಇನ್ನೊಂದೆಡೆ ಕೆಲವರು ಭಿನ್ನವಾಗಿ ಪ್ರತಿಕ್ರಿಯಿಸಿದ್ದಾರೆ. 'ಹೆಚ್ಚು ಹಣ ಸಂಪಾದನೆ ಮಾಡಬೇಕೆಂದರೆ, ಕೆಲವೊಂದನ್ನು ಕಳೆದುಕೊಳ್ಳಲೇಬೇಕು. ಎಲ್ಲವೂ ಒಟ್ಟಿಗೆ ಸಿಗಬೇಕು ಎನ್ನುವುದು ಕೇವಲ ಆಸೆ ಮಾತ್ರ. ಒಂದು ಕಡೆ ಕಳೆದುಕೊಂಡರೆ, ಇನ್ನೊಂದು ಕಡೆ ಏನಾದರೂ ಸಿಗುತ್ತದೆ' ಎಂದು ಕೆಲವರು ವಾಸ್ತವವನ್ನು ಎತ್ತಿ ತೋರಿಸಿದ್ದಾರೆ.

ಒಂದು ಮನೆ, ನೂರು ಕಥೆ: ಅಮೆರಿಕದ ಕ್ಯಾಮೆಲ್ಟ್ ಯುಗಕ್ಕೆ ಮೌನ ಸಾಕ್ಷಿ, ಇದು ಐತಿಹಾಸಿಕ ಕೆನಡಿ ಕಾಂಪೌಂಡ್‌ನ ಸ್ಟೋರಿ!

Gowthami K — Tue, 29 Sep 2026 13:38:11 +0530

ಮನೆ ಎಂಬುದು ಕೇವಲ ನಾಲ್ಕು ಗೋಡೆಗಳು ಮತ್ತು ಮೇಲ್ಛಾವಣಿಯಿಂದ ಕೂಡಿರುವ ಕಟ್ಟಡವಲ್ಲ. ಅದು ತನ್ನೊಡಲಲ್ಲಿ ಬದುಕಿದ ಜನರ ಭಾವನೆಗಳು, ನೆನಪುಗಳು ಮತ್ತು ಜೀವಂತ ಕಥೆಗಳನ್ನು ಕಾಯ್ದಿರಿಸುವ ನೆಲೆ. ಅನುಭವಿಸಿದ ಅಪಾರ ಸಂತೋಷ ಹಾಗೂ ನುಂಗಿಹಾಕಿದ ಕಹಿ ಸತ್ಯಗಳಿಗೆ ಮನೆಗಳೇ ಮೌನ ಸಾಕ್ಷಿ. ಅಂತಹದ್ದೇ ಒಂದು ವಿಶೇಷ ಸಾಕ್ಷಿ ಮ್ಯಾಸಚೂಸೆಟ್ಸ್‌ನ ಕೇಪ್ ಕಾಡ್‌ನಲ್ಲಿರುವ, ಅಂದಿನ ಕಾಲಕ್ಕೆ $25,000 (24 ಲಕ್ಷ ರೂ) ಮೌಲ್ಯದಲ್ಲಿದ್ದ ಕಡಲತೀರದ 'ಕೆನಡಿ ಕಾಂಪೌಂಡ್'. ಅಮೆರಿಕನ್ ರಾಜಕೀಯ ಇತಿಹಾಸದ ಅತ್ಯಂತ ಭವ್ಯ ಹಾಗೂ ಅತ್ಯಂತ ಕರಾಳ ಕ್ಷಣಗಳನ್ನು ಈ ಆಸ್ತಿ ತನ್ನೊಳಗೆ ಬಚ್ಚಿಟ್ಟುಕೊಂಡಿದೆ.

ಮ್ಯಾಸಚೂಸೆಟ್ಸ್‌ನ ಹಯಾನಿಸ್ ಬಂದರಿನಲ್ಲಿ ಕೇಪ್ ಕಾಡ್ ಕಡಲತೀರದುದ್ದಕ್ಕೂ ಹರಡಿರುವ ಮೂರು ಭವ್ಯ ಮನೆಗಳ ಈ ಸಮುಚ್ಛಯ, ಕೆನಡಿ ರಾಜಮನೆತನದ ಅನೇಕ ಪ್ರಮುಖ ಘಟನೆಗಳಿಗೆ ರಂಗಸಜ್ಜಿಕೆಯಾಗಿತ್ತು. ಜಾನ್ ಎಫ್. ಕೆನಡಿ ಅವರು ಜಾಕಿ ಅವರಿಗೆ ವಿವಾಹದ ಪ್ರಸ್ತಾವನೆ ಸಲ್ಲಿಸಿದ ನಂತರ ಕರೆತಂದ ಸ್ಥಳವಿದು. ಮುಂದೆ ಇದುವೇ ಅಮೆರಿಕದ "ಬೇಸಿಗೆ ಶ್ವೇತಭವನ" ಎನಿಸಿಕೊಂಡಿತು. ಅಷ್ಟೇ ಅಲ್ಲ, ಅಧ್ಯಕ್ಷ ಜೆಎಫ್‌ಕೆ ಅವರ ಹ*ತ್ಯೆಯ ದುರಂತ ಸುದ್ದಿಯನ್ನು ಅವರ ತಾಯಿ ರೋಸ್ ಕೆನಡಿ ಕೇಳಿದ್ದೂ ಇದೇ ಮನೆಯಲ್ಲೇ!

ಸಾಮ್ರಾಜ್ಯವೊಂದರ ಆರಂಭ , ಕೆನಡಿ ಕುಟುಂಬದ ಆಗಮನ

ಜಾನ್ ಎಫ್. ಕೆನಡಿ ಹಯಾನಿಸ್ ಪೋರ್ಟ್ ಮ್ಯೂಸಿಯಂ ಪ್ರಕಾರ, ಈ ಕಾಂಪೌಂಡ್‌ನ ಇತಿಹಾಸ 1926 ರಿಂದ ಪ್ರಾರಂಭವಾಗುತ್ತದೆ. ಆ ಬೇಸಿಗೆಯಲ್ಲಿ, ಕೆನಡಿ ಕುಟುಂಬದ ಪಿತಾಮಹ ಜೋಸೆಫ್ ಪಿ. ಕೆನಡಿ ಸೀನಿಯರ್ ತಮ್ಮ ಕುಟುಂಬಕ್ಕಾಗಿ ಹಯಾನಿಸ್ ಬಂದರಿನಲ್ಲಿದ್ದ 'ಮಾಲ್ಕಮ್ ಕಾಟೇಜ್' ಅನ್ನು ಬಾಡಿಗೆಗೆ ಪಡೆದರು.

ಆರಂಭದಲ್ಲಿ ಅವರು ಕೊಹಾಸೆಟ್ ಎಂಬ ಕರಾವಳಿ ಪಟ್ಟಣದಲ್ಲಿ ಬೇಸಿಗೆಯ ಮನೆಗಾಗಿ ಹುಡುಕಾಟ ನಡೆಸಿದ್ದರು. ಆದರೆ, 'ಆಲ್ ಥಿಂಗ್ಸ್ ಇಂಟರೆಸ್ಟಿಂಗ್' ವರದಿಯ ಪ್ರಕಾರ, ಜೋಸೆಫ್ ಕೆನಡಿ ಅವರು ಐರಿಶ್ ಕ್ಯಾಥೋಲಿಕ್ ಹಿನ್ನೆಲೆಯವರಾಗಿದ್ದರಿಂದ, ಅಲ್ಲಿನ ಶ್ರೀಮಂತ 'ಕೊಹಾಸೆಟ್ ಗಾಲ್ಫ್ ಕ್ಲಬ್' ಅವರಿಗೆ ಪ್ರವೇಶ ನಿರಾಕರಿಸಿತ್ತು. ಆದರೆ ಹಯಾನಿಸ್‌ಪೋರ್ಟ್ ಕ್ಲಬ್ ಐರಿಶ್ ಕ್ಯಾಥೋಲಿಕ್‌ಗಳನ್ನು ಗೌರವದಿಂದ ಸ್ವಾಗತಿಸುತ್ತದೆ ಎಂದು ತಿಳಿದ ಕೆನಡಿ ಸೀನಿಯರ್, ತಮ್ಮ ವಾಸ್ತವ್ಯವನ್ನು ಇಲ್ಲಿಗೆ ಬದಲಾಯಿಸಿದರು.

ಈ ಪ್ರದೇಶದ ಸೌಂದರ್ಯಕ್ಕೆ ಮಾರುಹೋದ ಜೋಸೆಫ್, ಎರಡು ವರ್ಷಗಳ ನಂತರ (1928 ರಲ್ಲಿ) $25,000 ನೀಡಿ ಮಾಲ್ಕಮ್ ಕಾಟೇಜ್ ಅನ್ನು ಶಾಶ್ವತವಾಗಿ ಖರೀದಿಸಿದರು. ಜೋಸೆಫ್, ಅವರ ಪತ್ನಿ ರೋಸ್ ಮತ್ತು ಅವರ 9 ಮಕ್ಕಳು ಜೋಸೆಫ್ ಜೂನಿಯರ್, ಜಾನ್, ರೋಸ್ಮರಿ, ಕ್ಯಾಥ್ಲೀನ್, ಯೂನಿಸ್, ಪೆಟ್ರೀಷಿಯಾ, ರಾಬರ್ಟ್, ಜೀನ್ ಮತ್ತು ಎಡ್ವರ್ಡ್ ಇಡೀ ಕುಟುಂಬಕ್ಕೆ ಇದು ನೆಚ್ಚಿನ ಬೇಸಿಗೆಯ ತಾಣವಾಯಿತು.

"ಬೇಸಿಗೆ ಶ್ವೇತಭವನ" ಮತ್ತು ರಾಜಕೀಯ ಪ್ರಭಾವ

ಕಾಲಕ್ರಮೇಣ, ಬೆಳೆದು ದೊಡ್ಡವನಾದ ಜಾನ್ ಎಫ್. ಕೆನಡಿ ತನ್ನ ತಂದೆಯ ಮನೆಯ ಹಿಂಭಾಗದಲ್ಲೇ ಹಯಾನಿಸ್ ಬಂದರಿನಲ್ಲಿ ಸ್ವಂತ ಮನೆಯೊಂದನ್ನು ಖರೀದಿಸಿದರು. ಅವರ ಕಿರಿಯ ಸಹೋದರ ರಾಬರ್ಟ್ ಸಹ ಪಕ್ಕದಲ್ಲೇ ಮತ್ತೊಂದು ಆಸ್ತಿಯನ್ನು ಪಡೆದರು. ಒಟ್ಟು ಆರು ಎಕರೆ ವಿಸ್ತೀರ್ಣದಲ್ಲಿ ಸಾಗರ ತೀರಕ್ಕೆ ಮುಖ ಮಾಡಿ ನಿಂತಿರುವ ಈ ಮೂರು ಭವ್ಯ ಆಸ್ತಿಗಳನ್ನೇ ಇಂದು 'ಕೆನಡಿ ಕಾಂಪೌಂಡ್' ಎಂದು ಕರೆಯಲಾಗುತ್ತದೆ.

1960 ರಲ್ಲಿ ಅಮೆರಿಕದ ಅಧ್ಯಕ್ಷೀಯ ಚುನಾವಣೆಗೆ ಸ್ಪರ್ಧಿಸಿದಾಗ, ಕೆನಡಿ ಕಾಂಪೌಂಡ್ ಜೆಎಫ್‌ಕೆ ಅವರ ಚುನಾವಣಾ ಪ್ರಚಾರದ ಕೇಂದ್ರ ಕಚೇರಿಯಾಗಿ ಮಾರ್ಪಟ್ಟಿತು. ಬೋಸ್ಟನ್‌ನಲ್ಲಿ ಮತದಾನ ಮಾಡಿದ ನಂತರ, ಅವರು ಇಲ್ಲೇ ಕುಳಿತು ಚುನಾವಣಾ ಫಲಿತಾಂಶಗಳನ್ನು ವೀಕ್ಷಿಸಿದರು ಮತ್ತು ರಿಚರ್ಡ್ ನಿಕ್ಸನ್ ವಿರುದ್ಧದ ತಮ್ಮ ಐತಿಹಾಸಿಕ ವಿಜಯವನ್ನು ಆಚರಿಸಿದರು. ಅಧ್ಯಕ್ಷರಾದ ನಂತರ ವಾಷಿಂಗ್ಟನ್ ಡಿಸಿಗೆ ತೆರಳಿದರೂ, ಕೆನಡಿ ಕುಟುಂಬವು ತಮ್ಮ ಬೇಸಿಗೆಯನ್ನು ಇಲ್ಲೇ ಕಳೆಯುತ್ತಿತ್ತು. ಹೀಗಾಗಿ ಇದು ಜಾಗತಿಕವಾಗಿ "ಬೇಸಿಗೆ ಶ್ವೇತಭವನ" ಎಂದೇ ಪ್ರಸಿದ್ಧವಾಯಿತು.

ಮ್ಯೂಸಿಯಂ ದಾಖಲೆಗಳ ಪ್ರಕಾರ, ಬೇಸಿಗೆಯ ದಿನಗಳಲ್ಲಿ ಹಯಾನಿಸ್ ಬಂದರು ಅಂತರರಾಷ್ಟ್ರೀಯ ಮಟ್ಟದ ಪ್ರಮುಖ ಸುದ್ದಿ ಕೇಂದ್ರವಾಗುತ್ತಿತ್ತು. ಪತ್ರಿಕೆಗಳು, ಟಿವಿ ಮತ್ತು ನಿಯತಕಾಲಿಕೆಗಳ ವರ್ಣರಂಜಿತ ಛಾಯಾಚಿತ್ರಗಳು ಈ ಶ್ರೀಮಂತ, ಶಕ್ತಿಶಾಲಿ ಮತ್ತು ಆಕರ್ಷಕ ಕುಟುಂಬವು ಕಡಲತೀರದ ಮಡಿಲಲ್ಲಿ ರಾಜಕೀಯ ಕಾರ್ಯಗಳನ್ನು ನಿರ್ವಹಿಸುತ್ತಾ, ವಿಶ್ರಮಿಸುವುದನ್ನು ಜಗತ್ತಿಗೆ ತೋರಿಸುತ್ತಿದ್ದವು.

ಸಂತೋಷದ ಜೊತೆಯಲ್ಲೇ ಸಾಗಿದ ಸರಣಿ ದುರಂತಗಳು

ಸಂತೋಷದ ಕ್ಷಣಗಳಿಗೆ ಸಾಕ್ಷಿಯಾಗಿದ್ದ ಈ ಮನೆ, ಶೀಘ್ರದಲ್ಲೇ ಅತೀವ ಶೋಕಕ್ಕೂ ಸಾಕ್ಷಿಯಾಯಿತು. ನವೆಂಬರ್ 22, 1963 ರಂದು, ಡಲ್ಲಾಸ್‌ನಲ್ಲಿ ಅಧ್ಯಕ್ಷ ಜೆಎಫ್‌ಕೆ ಅವರ ಮೇಲೆ ಗುಂಡು ಹಾರಿಸಲಾಗಿದೆ ಎಂಬ ಆಘಾತಕಾರಿ ಸುದ್ದಿಯನ್ನು ಆಗಿನ ಅಟಾರ್ನಿ ಜನರಲ್ ಆಗಿದ್ದ ರಾಬರ್ಟ್ ಕೆನಡಿ, ಹಯಾನಿಸ್‌ನಲ್ಲಿದ್ದ ತಾಯಿ ರೋಸ್ ಕೆನಡಿಗೆ ತಿಳಿಸಿದರು. ಕೆಲವೇ ಕ್ಷಣಗಳಲ್ಲಿ ಮಗನ ನಿಧನದ ಸುದ್ದಿಯೂ ಬಂದಿತು. ಜೆಎಫ್‌ಕೆ ಹ*ತ್ಯೆಯು ಅಮೆರಿಕನ್ ರಾಜಕೀಯದ ಸುವರ್ಣ ಯುಗದ ಅಂತ್ಯವನ್ನು ಸೂಚಿಸಿತಾದರೂ, ಕೆನಡಿ ಕಾಂಪೌಂಡ್ ಮಾತ್ರ ಕುಟುಂಬದ ಮುಖ್ಯ ಸಭೆಯ ತಾಣವಾಗಿಯೇ ಉಳಿಯಿತು.

20 ನೇ ಶತಮಾನದ ದ್ವಿತೀಯಾರ್ಧದಲ್ಲೂ ಕೆನಡಿ ಕುಟುಂಬವು ಹಯಾನಿಸ್ ಬಂದರಿನಲ್ಲಿ ಒಂದಾಗುವುದನ್ನು ಮುಂದುವರಿಸಿತು. 1994 ರಲ್ಲಿ, ಜೆಎಫ್‌ಕೆ ಅವರ ಮಗ ಜಾನ್ ಎಫ್. ಕೆನಡಿ ಜೂನಿಯರ್, ತಮ್ಮ ಗೆಳತಿ ಕ್ಯಾರೊಲಿನ್ ಬೆಸೆಟ್ ಅವರನ್ನು ಕುಟುಂಬಕ್ಕೆ ಪರಿಚಯಿಸಲು ಇಲ್ಲಿಗೆ ಕರೆತಂದರು. ಆದರೆ ಜೆ. ರಾಂಡಿ ತಾರಾಬೊರೆಲ್ಲಿ ಅವರ 'ದಿ ಕೆನಡಿ ಹೀರ್ಸ್' ಪುಸ್ತಕದ ಪ್ರಕಾರ, ಈ ಭೇಟಿ ಸುಗಮವಾಗಿರಲಿಲ್ಲ. ರಾಬರ್ಟ್ ಕೆನಡಿ ಅವರ ವಿಧವೆ ಎಥೆಲ್, ಕ್ಯಾರೊಲಿನ್ ಅವರ ಬಳಿ ಫೆಡರಲ್ ಶಸ್ತ್ರಾಸ್ತ್ರ ನಿಷೇಧದ ಕುರಿತು ಪ್ರಶ್ನಿಸಿದಾಗ, ಕ್ಯಾರೊಲಿನ್ ಅಜ್ಞಾನ ವ್ಯಕ್ತಪಡಿಸಿದರು. ಆಗ ಎಥೆಲ್, "ನೀವು ಅದರ ಬಗ್ಗೆ ಸ್ವಲ್ಪ ಓದಿಕೊಳ್ಳುವುದು ಒಳ್ಳೆಯದು" ಎಂದು ವ್ಯಂಗ್ಯವಾಡಿದ್ದರು.

ಆ ಘಟನೆಯಿಂದಾಗಿ ಕ್ಯಾರೊಲಿನ್ ಮತ್ತೆ ಅಲ್ಲಿಗೆ ಕಾಲಿಡುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದರೂ, ವಿಧಿಯಾಟ ಬೇರೆಯೇ ಇತ್ತು. 1999 ರ ಜುಲೈ 16 ರಂದು, ಕುಟುಂಬದ ವಿವಾಹ ಕಾರ್ಯಕ್ರಮಕ್ಕೆ ಭಾಗವಹಿಸಲು ಜೆಎಫ್‌ಕೆ ಜೂನಿಯರ್, ಕ್ಯಾರೊಲಿನ್ ಮತ್ತು ಅವರ ಸಹೋದರಿ ಲಾರೆನ್ ಹಾರಿಸುತ್ತಿದ್ದ ವಿಮಾನವು ಮಾರ್ಥಾಸ್ ವೈನ್‌ಯಾರ್ಡ್ ಕರಾವಳಿಯಲ್ಲಿ ಅಪಘಾತಕ್ಕೀಡಾಗಿ ಮೂವರೂ ಮೃತಪಟ್ಟರು.

ಅಷ್ಟೇ ಅಲ್ಲ, ಕುಟುಂಬದ ಪಿತಾಮಹ ಜೋಸೆಫ್ ಪಿ. ಕೆನಡಿ ಸೀನಿಯರ್ (1969), ತಾಯಿ ರೋಸ್ (1995) ಮತ್ತು ಮಗ ಟೆಡ್ ಕೆನಡಿ (2009) ಎಲ್ಲರೂ ಇದೇ ಹಯಾನಿಸ್ ಬಂದರಿನ ಮನೆಯಲ್ಲೇ ಕೊನೆಯುಸಿರೆಳೆದರು.

ಪರಂಪರೆ ಮತ್ತು ಪ್ರಸ್ತುತ ಸ್ಥಿತಿ

ದುರಂತಗಳ ಸರಣಿ ಒಂದೆಡೆಯಾದರೆ, ಈ ಮನೆ ಅನೇಕ ಶುಭ ಸಮಾರಂಭಗಳಿಗೂ ಸಾಕ್ಷಿಯಾಗಿದೆ. 1953 ರಲ್ಲಿ ಜೆಎಫ್‌ಕೆ-ಜಾಕಿ ಅವರ ನಿಶ್ಚಿತಾರ್ಥದಿಂದ ಹಿಡಿದು, ಇತ್ತೀಚೆಗೆ 2023 ರಲ್ಲಿ ರಾಬರ್ಟ್ ಮತ್ತು ಎಥೆಲ್ ಅವರ ಮೊಮ್ಮಗಳು ಸಾರಾ ಕೆನಡಿಯ ವಿವಾಹದವರೆಗೆ ಹಲವು ಸಂಭ್ರಮಗಳು ಇಲ್ಲಿ ನಡೆದಿವೆ.

ಆಸ್ತಿಯನ್ನು ಖರೀದಿಸಿ ಸುಮಾರು ಒಂದು ಶತಮಾನ ಕಳೆದರೂ, ಕೆನಡಿ ಕುಟುಂಬದ ಇಂದಿನ ಪೀಳಿಗೆಯೂ ಸಹ ಜುಲೈ 4 ರ ಅಮೆರಿಕದ ಸ್ವಾತಂತ್ರ್ಯ ದಿನಾಚರಣೆಯನ್ನು ಆಚರಿಸಲು ಈ ಹಯಾನಿಸ್ ಬಂದರಿನಲ್ಲೇ ಒಟ್ಟುಗೂಡುತ್ತದೆ. ಕಡಲತೀರದ ವಿಹಂಗಮ ನೋಟವನ್ನು ಹೊಂದಿರುವ ಈ ವಿಶಾಲ ಆಸ್ತಿಯು ಇಂದಿಗೂ ಇತಿಹಾಸದ ಜೀವಂತ ಸಂಕೇತವಾಗಿದೆ.

ತನ್ನ ಪತಿಯ ಅಂತ್ಯಕ್ರಿಯೆಯ ಕೇವಲ ನಾಲ್ಕು ದಿನಗಳ ನಂತರ, ಜಾಕಿ ಕೆನಡಿ 'ಲೈಫ್' ಪತ್ರಿಕೆಯ ವರದಿಗಾರರಿಗೆ ಒಂದು ಮಾತು ಹೇಳಿದ್ದರು: "ಒಂದು ಕಾಲದಲ್ಲಿ 'ಕ್ಯಾಮೆಲಾಟ್' (Camelot - ಸಾಂಸ್ಕೃತಿಕ ಭವ್ಯತೆಯ ಯುಗ) ಎಂದು ಕರೆಯಲ್ಪಡುವ ಕಲ್ಪನಾ ಲೋಕದಂತೆ ಒಂದು ಸಣ್ಣ ಹೊಳೆಯುವ ಕ್ಷಣವಿತ್ತು, ಅದನ್ನು ಜಗತ್ತು ಎಂದಿಗೂ ಮರೆಯಬಾರದು."

ಜಾಕಿ ಹೇಳಿದ ಆ ಹೊಳೆಯುವ ಕ್ಷಣದಂತೆ, ಈ ಕೆನಡಿ ಕಾಂಪೌಂಡ್ ಸಹ ಅಮೆರಿಕದ ಇತಿಹಾಸದಲ್ಲಿ ಎಂದಿಗೂ ಮರೆಯಾಗದ ಒಂದು ಭವ್ಯ ಅಧ್ಯಾಯವಾಗಿ ಉಳಿದುಕೊಂಡಿದೆ.

40 ಸಾವಿರ ಇಲಿ, 1 ಲೀಟರ್‌ಗೆ 18 ಲಕ್ಷ ರೂ; ವಿಶ್ವದ ಅತಿ ದುಬಾರಿ ಹಾಲಿನ ಸ್ಪೆಷಾಲಿಟಿ ಏನು?

Mahmad Rafik — Sat, 26 Sep 2026 21:17:42 +0530

ಹಸು, ಮೇಕೆ ಹಾಲಿನ ಬಗ್ಗೆ ಕೇಳಿರುತ್ತೇವೆ. ಆದ್ರೆ ಇಲಿಗಳಿಂದಲೂ ಹಾಲು ಸಂಗ್ರಹಣೆ ಮಾಡಲಾಗುತ್ತದೆ. ಆದ್ರೆ ಇಲಿ ಹಾಲು ವಿಶ್ವದಲ್ಲಿಯೇ ಅತ್ಯಂತ ದುಬಾರಿಯಾಗಿದೆ. ಒಂದು ಲೀಟರ್ ಹಾಲು ಉತ್ಪಾದನೆಗೆ ಎಷ್ಟು ಇಲಿಗಳು ಬೇಕಾಗುತ್ತೆವೆ ಎಂಬಿತ್ಯಾದಿ ಮಾಹಿತಿಯನ್ನು ಈ ಲೇಖನ ಒಳಗೊಂಡಿದೆ.

ಹಸು, ಮೇಕೆ, ಸೋಯಾ ಹಾಲು ಅಂತ ನಾವು ಸಾಕಷ್ಟು ವೆರೈಟಿ ನೋಡಿದ್ದೀವಿ. ಆದ್ರೆ ಪ್ರಪಂಚದಲ್ಲೇ ಅತಿ ದುಬಾರಿ ಹಾಲು ಯಾವುದು ಅಂದ್ರೆ ಅದು ಇಲಿ ಹಾಲು! ಹೌದು, ಇಲಿಯಿಂದ ಹಾಲು ಕರೆಯೋದು ಅಷ್ಟು ಸುಲಭವಲ್ಲ.

30 ನಿಮಿಷ ಕಷ್ಟಪಟ್ಟರೆ ಸ್ವಲ್ಪವೇ ಹಾಲು ಸಿಗುತ್ತೆ. 1 ಲೀಟರ್ ಹಾಲು ಬೇಕು ಅಂದ್ರೆ ಬರೋಬ್ಬರಿ 40,000 ಇಲಿಗಳು ಬೇಕು. ಇದರ ಬೆಲೆ 23,000 ಯುರೋಗಳು. ಅಂದ್ರೆ ನಮ್ಮ ರೂಪಾಯಿ ಲೆಕ್ಕದಲ್ಲಿ ಬರೋಬ್ಬರಿ 18 ಲಕ್ಷ ರೂಪಾಯಿ.

ಸಂಶೋಧಕರು ಇಲಿ ಹಾಲನ್ನು ಒಂದು ಪ್ರಮುಖ ಅಸ್ತ್ರವಾಗಿ ಬಳಸುತ್ತಾರೆ. ಮಲೇರಿಯಾ ಬ್ಯಾಕ್ಟೀರಿಯಾವನ್ನು ನಾಶಮಾಡುವ ಔಷಧಿಗಳನ್ನು ತಯಾರಿಸಲು ಇದು ತುಂಬಾ ಸಹಾಯ ಮಾಡುತ್ತೆ. ವಿಜ್ಞಾನಿಗಳು ಹಸುವಿನ ಹಾಲಿನ ಬದಲು ಇಲಿ ಹಾಲನ್ನೇ ಹೆಚ್ಚು ಇಷ್ಟಪಡ್ತಾರೆ. ಬೇರೆ ಪ್ರಾಣಿಗಳಿಗೆ ಹೋಲಿಸಿದರೆ ಇಲಿಯ ಡಿಎನ್‌ಎ ಮನುಷ್ಯನ ದೇಹಕ್ಕೆ ತುಂಬಾ ಹತ್ತಿರವಾಗಿದೆ.

ಇದರಿಂದ ಪ್ರಯೋಗದ ಫಲಿತಾಂಶಗಳನ್ನು ಸುಲಭವಾಗಿ ಕಂಡುಹಿಡಿಯಬಹುದು. ಸಾವಿರಾರು ಹಸುಗಳನ್ನು ಸಾಕುವುದಕ್ಕಿಂತ ಸಾವಿರಾರು ಇಲಿಗಳನ್ನು ನಿರ್ವಹಿಸುವುದು ತುಂಬಾ ಸುಲಭ.

ಒಂದು ಲೀಟರ್ ಹಾಲು ಉತ್ಪಾದನೆ ಮಾಡಲು ಸಾವಿರಾರು ಇಲಿಗಳು ಬೇಕಾಗುತ್ತವೆ. ಅದಕ್ಕಾಗಿಯೇ ಈ ಹಾಲಿಗೆ ಇಷ್ಟೊಂದು ಡಿಮ್ಯಾಂಡ್ ಮತ್ತು ಬೆಲೆ. ಅತಿ ಹೆಚ್ಚು ಹಾಲು ಕೊಡುವ ಪ್ರಾಣಿಗಳ ಪಟ್ಟಿಯನ್ನು ನೋಡಿದರೆ, ಒಂದು ಹಸು ವರ್ಷಕ್ಕೆ 10,000 ಲೀಟರ್ ಹಾಲು ಕೊಡುತ್ತೆ. ಇದು ಅದರ ತೂಕಕ್ಕಿಂತ 7 ಪಟ್ಟು ಹೆಚ್ಚು. ಅದೇ ರೀತಿ, ಮೇಕೆಗಳು ಒಂದು ವರ್ಷದಲ್ಲಿ ತಮ್ಮ ತೂಕಕ್ಕಿಂತ 12 ಪಟ್ಟು ಹೆಚ್ಚು ಹಾಲನ್ನು ಕೊಡುತ್ತವೆ.

ಹಾಲು ಉತ್ಪಾದನೆಯಲ್ಲಿ ನೀಲಿ ತಿಮಿಂಗಿಲವೇ ನಂಬರ್ ಒನ್. ಇದು ದಿನಕ್ಕೆ 600 ಲೀಟರ್ ಹಾಲು ಉತ್ಪಾದನೆ ಮಾಡುತ್ತೆ. ಈ ಹಾಲಿನಲ್ಲಿ ಕೊಬ್ಬಿನಾಂಶ ತುಂಬಾ ಇರುತ್ತೆ. ಇದನ್ನು ಕುಡಿಯುವ ಮರಿ ತಿಮಿಂಗಿಲ ಒಂದೇ ದಿನದಲ್ಲಿ ದಪ್ಪ ಆಗುತ್ತೆ. ಮಲೇರಿಯಾ ಗುಣಪಡಿಸಲು ಮತ್ತು ಸಂಶೋಧನಾ ವಸ್ತುಗಳನ್ನು ತಯಾರಿಸಲು ಇಲಿ ಹಾಲನ್ನು ತಳೀಯವಾಗಿ ಮಾರ್ಪಡಿಸಲಾಗುತ್ತದೆ. ಈ ವೈದ್ಯಕೀಯ ಕಾರಣಗಳಿಂದಾಗಿಯೇ ಇಲಿ ಹಾಲು ತುಂಬಾ ದುಬಾರಿಯಾಗಿದೆ ಎಂದು ಅಧ್ಯಯನಗಳು ಹೇಳುತ್ತವೆ.

ವಿವಾದಕ್ಕೀಡಾದ ಅನಂತ್ ಅಂಬಾನಿಗೆ ನೀಡಿದ ಫ್ರೊಫೆಸರ್ ಸ್ಥಾನ, ಇಂಗ್ಲೆಂಡ್ ಯೂನಿವರ್ಸಿಟಿ ಸ್ಪಷ್ಟನೆ

Chethan Kumar — Sun, 27 Sep 2026 23:00:47 +0530

ಬೆಂಗಳೂರು (ಸೆ.27) ವಂತಾರ ಚೇರ್ಮೆನ್, ರಿಲಯನ್ಸ್ ಗ್ರೂಪ್ ಬೋರ್ಡ್ ಸದಸ್ಯ ಅನಂತ್ ಅಂಬಾನಿಗೆ ಇತ್ತೀಚೆಗೆ ಇಂಗ್ಲೆಂಡ್‌ನ ಕ್ಯಾಸ್ಟಲ್ ಯೂನಿವರ್ಸಿ ಪ್ರೊಫೆಸರ್ ಗೌರವ ನೀಡಿದೆ. ವಿಶ್ವವಿದ್ಯಾಲಯ ನೀಡಿದ ಪ್ರೊಫೆಸರ್ ಆಫ್ ಪ್ರಾಕ್ಟೀಸ್ ಗೌರವ ವಿವಾದಕ್ಕೀಡಾಗಿದೆ. ಇದರ ಬೆನ್ನಲ್ಲೇ ಕ್ಯಾಸ್ಟಲ್ ಯೂನಿವರ್ಸಿ ಸ್ಪಷ್ಟನೆ ನೀಡಿದೆ. ಅನಂತ್ ಅಂಬಾನಿ ಪ್ರೊಫೆಸರ್ ಗೌರವವನ್ನು ಖರೀದಿಸಿಲ್ಲ ಎಂದು ಸ್ಪಷ್ಟಪಡಿಸಿದೆ. ಇಷ್ಟೇ ಅಲ್ಲ ಅಂಬಾನಿ ಕಂಪನಿಯಿಂದ ಯೂನಿವರ್ಸಿಟಿ ಯಾವುದೇ ದೇಣಿಗೆಯನ್ನು ಪಡೆದಿಲ್ಲ ಎಂದಿದೆ.

ಪ್ರಾಣಿ ಹಾಗೂ ಪರಿಸರ ಸಂರಕ್ಷಣೆಯಲ್ಲಿ ಅನಂತ್ ಕೊಡುಗೆ

ಅನಂತ್ ಅಂಬಾನಿಗೆ ಪ್ರೊಫೆಸರ್ ಆಫ್ ಪ್ರಾಕ್ಟೀಸ್ ಗೌರವ ನೀಡಲಾಗಿದೆ. ಇದಕ್ಕೆ ಪ್ರಮುಖ ಕಾರಣಗಳಿವೆ. ಪ್ರಾಣಿ ಹಾಗೂ ಪರಿಸರ ಸಂರಕ್ಷಣೆಯಲ್ಲಿ ಅನಂತ್ ಅಂಬಾನಿ ಕೊಡುಗೆಯನ್ನು ಪರಿಗಣಿಸಲಾಗಿದೆ. ವಂತಾರಾ ಮೂಲಕ ಪ್ರಾಣಿಗಳ ಸಂರಕ್ಷಣೆ, ಆರೈಕೆ ಮಾಡಲಾಗುತ್ತಿದೆ. ಜೈವಿಕ ವೈವಿದ್ಯತೆಯನ್ನು ಸಂರಕ್ಷಿಸುವ ಕೆಲಸದಲ್ಲಿ ವಂತಾರ ನಿರಂತರವಾಗಿ ಕೆಲಸ ಮಾಡುತ್ತಿದೆ. ಪ್ರಾಣಿಗಳಿಗಾಗಿ ಲಕ್ಷ ಲಕ್ಷ ರೂಪಾಯಿ ಖರ್ಚು ಮಾಡಲಾಗುತ್ತಿದೆ. ಜೊತೆಗೆ ಪರಿಸರ ಸಂರಕ್ಷಣೆಯಲ್ಲೂ ಅನಂತ್ ಅಂಬಾನಿ ಕೂಡುಗೆಯನ್ನು ಪರಿಗಣಿಸಲಾಗಿದೆ. ರಿಲಯನ್ಸ್ ಗ್ರೂಪ್ ಹಸಿರು ಶಕ್ತಿ ಹಾಗೂ ಭವಿಷ್ಯದ ಹಸಿರೀಕರಣ ಯೋಜನೆಯಲ್ಲಿ ಅನಂತ್ ಅಂಬಾನಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಅನಂತ್ ಅಂಬಾನಿಯ ಈ ಕೊಡುಗೆಗಳನ್ನು ಪರಿಗಣಿಸಿ ಗೌರವ ಹುದ್ದೆ ನೀಡಲಾಗಿದೆ ಎಂದು ವಿಶ್ವವಿದ್ಯಾಲಯ ಸ್ಪಷ್ಟಪಡಿಸಿದೆ.

ಶೈಕ್ಷಣಿಕ ಅರ್ಹತೆಯಲ್ಲ, ಕೊಡುಗೆ ಮುಖ್ಯ

ಕ್ಯಾಸಲ್ ಯೂನಿವರ್ಸಿಟಿ ನೀಡುವ ಪ್ರೊಫೆಸರ್ ಆಫ್ ಪ್ರಾಕ್ಟೀಸ್ ಗೌರವ ಶೈಕ್ಷಣಿಕ ಅರ್ಹತೆ ಪರಗಿಣಿಸಿ ನೀಡುವ ಗೌರವವಲ್ಲ. ಇದು ಆಯ್ದೆ ಕ್ಷೇತ್ರಗಳಲ್ಲಿನ ಕೊಡುಗೆ ಪರಿಗಣಿಸಿ ನೀಡುವುದಾಗಿದೆ. ಅನಂತ್ ಅಂಬಾನಿ ಪರಿಸರ ಹಾಗೂ ಪ್ರಾಣಿ ಸಂರಕ್ಷಣೆ ವಿಚಾರದಲ್ಲಿನ ಕೊಡುಗೆ ಪರಿಗಣಿಸಿ ನೀಡಲಾಗಿದೆ ಎಂದು ವಿಶ್ವವಿದ್ಯಾಲಯ ಸ್ಪಷ್ಟಪಡಿಸಿದೆ. ಇದೇ ವೇಳೆ ಅನಂತ್ ಅಂಬಾನಿ ಹಾಹೂ ಅಂಬಾನಿ ಕಂಪನಿಗಳಿಂದ ಯಾವುದೇ ದೇಣಿಗೆ ಪಡೆದಿಲ್ಲ. ಪಡೆಯುವ ಅವಶ್ಯಕತೆಯೂ ಕ್ಯಾಸಲ್ ಯೂನಿವರ್ಸಿಟಿಗಿಲ್ಲ ಎಂದು ವಿಶ್ವವಿದ್ಯಾಲಯ ಸ್ಪಷ್ಟಪಡಿಸಿದೆ.

ಅನಂತ್ ಅಂಬಾನಿಗೆ ಪ್ರೊಫೆಸರ್ ಆಫ್ ಪ್ರಾಕ್ಟೀಸ್ ಗೌರವ ಪ್ರಕಟವಾದ ಬೆನ್ನಲ್ಲೇ ಭಾರಿ ವಿವಾದ ಸೃಷ್ಟಿಯಾಗಿತ್ತು. ವಿಶ್ವವಿದ್ಯಾಲಯ ಹಣದ ಕೊರತೆ ಎದುರಿಸಿದಾಗ ಕಾರ್ಪೋರೇಟ್ ಕಂಪನಿಗಳು, ಉದ್ಯಮಿಗಳನ್ನು ಹೊಗಳಿ ದುಡ್ಡು ಮಾಡುತ್ತದೆ ಎಂಬ ಆರೋಪ ಕೇಳಿಬಂದಿತ್ತು. ಅನಂತ್ ಅಂಬಾನಿ ದುಡ್ಡು ನೀಡಿ ಪ್ರೊಫೆಸರ್ ಗೌರವ ಗಿಟ್ಟಿಸಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿತ್ತು.

ವಿಶ್ವದಾದ್ಯಂತ 'IMAX'ನಲ್ಲಿ ಯಶ್ 'ರಾಮಾಯಣ' ಬಿಡುಗಡೆ.. 'ರಾವಣ' ಪೋಸ್ಟರ್‌ ರಿಲೀಸ್ ಬಳಿಕ ಆಗಿರೋ ಬೆಳವಣಿಗೆ ಏನು?

Shriram Bhat — Tue, 29 Sep 2026 17:01:10 +0530

Worldwide Developement after Ramayana Yash official poster Release ‘ರಾಮಾಯಣ’ ಚಿತ್ರದಲ್ಲಿನ ರಾಕಿಂಗ್ ಸ್ಟಾರ್ ಯಶ್ ‘ರಾವಣ’ನ ಖಡಕ್ ಲುಕ್ ಬಿಡುಗಡೆ ನೋಡಿ ಜಗತ್ತು ಹೇಳುತ್ತಿರೋದೇನು?

ಭಾರತೀಯ ಚಿತ್ರರಂಗದ ಅತ್ಯಂತ ನಿರೀಕ್ಷಿತ ಬೃಹತ್ ದೃಶ್ಯಕಾವ್ಯ ‘ರಾಮಾಯಣ’ ಸಿನಿಮಾ. ಇದೀಗ ಇದೇ ಚಿತ್ರತಂಡ ರಾಕಿಂಗ್ ಸ್ಟಾರ್ ಯಶ್ ಅವರ 'ರಾವಣ' ಪಾತ್ರದ ಮೊದಲ ಅಧಿಕೃತ ಪೋಸ್ಟರ್ ಅನ್ನು ಬಿಡುಗಡೆ ಮಾಡಿದೆ. ಈ ಪೋಸ್ಟರ್‌ನಲ್ಲಿ ಯಶ್ ಅತ್ಯಂತ ಗಂಭೀರ ಹಾಗೂ ಶಕ್ತಿಯುತ ಅವತಾರದಲ್ಲಿ ಕಾಣಿಸಿಕೊಂಡಿದ್ದು, ಪ್ರೇಕ್ಷಕರಲ್ಲಿ ಚಿತ್ರದ ಮೇಲಿನ ನಿರೀಕ್ಷೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಚಿತ್ರದ ಟ್ರೇಲರ್ ಬಿಡುಗಡೆಯಾದಾಗಿನಿಂದಲೂ ಯಶ್ ಅವರ ರಾವಣನ ಪಾತ್ರವು ಅಪಾರ ಕುತೂಹಲ ಮೂಡಿಸಿತ್ತು. ತಮ್ಮ ಮೊದಲ ನೋಟದಲ್ಲೇ ತೀವ್ರತೆ ಹಾಗೂ ಪ್ರಭಾವಶಾಲಿ ವ್ಯಕ್ತಿತ್ವದಿಂದ ಪ್ರೇಕ್ಷಕರ ಗಮನ ಸೆಳೆದಿದ್ದ ಯಶ್, ಇದೀಗ ಬಿಡುಗಡೆಯಾಗಿರುವ ಪೋಸ್ಟರ್‌ನಲ್ಲಿ ರಾಜ ಗಾಂಭೀರ್ಯದೊಂದಿಗೆ ವಿಜೃಂಭಿಸಿದ್ದಾರೆ.

ಹೊಳೆಯುವ ಚಿನ್ನದ ಕಿರೀಟ, ಮುತ್ತಿನ ಹಾರಗಳು

ಹೊಸ ಪೋಸ್ಟರ್‌ನಲ್ಲಿ ಯಶ್ ರತ್ನಖಚಿತವಾದ ಹೊಳೆಯುವ ಚಿನ್ನದ ಕಿರೀಟ, ಮುತ್ತಿನ ಹಾರಗಳು ಹಾಗೂ ಭಾರವಾದ ಚಿನ್ನದ ಬಳೆಗಳನ್ನು ಧರಿಸಿ ಕಂಗೊಳಿಸುತ್ತಿದ್ದಾರೆ. ಅವರ ತೀವ್ರ ನೋಟ ಮತ್ತು ಗಂಭೀರ ಉಪಸ್ಥಿತಿಯು ಪ್ರೇಕ್ಷಕರನ್ನು ಆಕರ್ಷಿಸುತ್ತದೆ. ಲಂಕಾಧಿಪತಿ ರಾವಣ ಮಹಾನ್ ಜ್ಞಾನಿ, ಅತ್ಯಂತ ಶಕ್ತಿಶಾಲಿ ರಾಜ ಹಾಗೂ ಅಪ್ರತಿಮ ಆಡಳಿತಗಾರ. ಆ ಪಾತ್ರದ ಗಾಂಭೀರ್ಯ ಮತ್ತು ಗತ್ತುಗಳನ್ನು ಯಶ್ ಅತ್ಯಂತ ನಿಖರವಾಗಿ ತಮ್ಮ ಅಭಿನಯ ಹಾಗೂ ಲುಕ್‌ನಲ್ಲಿ ತಂದಿದ್ದಾರೆ. ಈ ಪೋಸ್ಟರ್ ರಾವಣನ ಪಾತ್ರವನ್ನು ಬೆಳ್ಳಿತೆರೆಯ ಮೇಲೆ ಎಷ್ಟು ಅದ್ಧೂರಿಯಾಗಿ ಹಾಗೂ ಬೃಹತ್ ಪ್ರಮಾಣದಲ್ಲಿ ಕಲ್ಪಿಸಲಾಗಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ.

ಶ್ರೀರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ

ಮಹಾಕಾವ್ಯ ರಾಮಾಯಣದ ಭವ್ಯತೆ, ಭಾವನೆಗಳು ಹಾಗೂ ಕಾಲಾತೀತ ಪಾತ್ರಗಳನ್ನು ಬೆಳ್ಳಿತೆರೆಯ ಮೇಲೆ ವಿಶಾಲ ದೃಶ್ಯಕಾವ್ಯವಾಗಿ ತರಲು ನಿರ್ದೇಶಕ ನಿತೀಶ್ ತಿವಾರಿ ಶ್ರಮಿಸುತ್ತಿದ್ದಾರೆ. ಚಿತ್ರದಲ್ಲಿ ಶ್ರೀರಾಮನಾಗಿ ರಣಬೀರ್ ಕಪೂರ್, ಸೀತೆಯಾಗಿ ಸಾಯಿ ಪಲ್ಲವಿ, ರಾವಣನಾಗಿ ರಾಕಿಂಗ್ ಸ್ಟಾರ್ ಯಶ್, ಹನುಮಂತನಾಗಿ ಸನ್ನಿ ಡಿಯೋಲ್ ಹಾಗೂ ಲಕ್ಷ್ಮಣನಾಗಿ ರವಿ ದುಬೆ ಅಭಿನಯಿಸುತ್ತಿದ್ದಾರೆ. ಈ ಚಿತ್ರವು ಭಾರತದಲ್ಲಿ ಹಿಂದಿ, ತಮಿಳು, ತೆಲುಗು, ಕನ್ನಡ ಹಾಗೂ ಮಲಯಾಳಂ ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ.

ನಮಿತ್ ಮಲ್ಹೋತ್ರಾ ಅವರ 'ಪ್ರೈಮ್ ಫೋಕಸ್ ಸ್ಟುಡಿಯೋಸ್', 8 ಬಾರಿ ಆಸ್ಕರ್ ಪ್ರಶಸ್ತಿ ವಿಜೇತ 'DNEG' ಸಂಸ್ಥೆ ಹಾಗೂ ಯಶ್ ಅವರ 'ಮಾನ್ಸ್‌ಟರ್ ಮೈಂಡ್ ಕ್ರಿಯೇಷನ್ಸ್' ಜಂಟಿಯಾಗಿ ಈ ಬಿಗ್ ಬಜೆಟ್ ಸಿನಿಮಾವನ್ನು ನಿರ್ಮಿಸುತ್ತಿವೆ. ಎರಡು ಭಾಗಗಳಲ್ಲಿ ಮೂಡಿಬರುತ್ತಿರುವ ಈ ದೃಶ್ಯಕಾವ್ಯವು ವಿಶ್ವದಾದ್ಯಂತ IMAX ರೂಪದಲ್ಲಿ ಬಿಡುಗಡೆಯಾಗಲಿದ್ದು, 'ಭಾಗ 1' ಮುಂಬರುವ 2026ರ ದೀಪಾವಳಿಗೆ ಹಾಗೂ 'ಭಾಗ 2' 2027ರ ದೀಪಾವಳಿಗೆ ಜಾಗತಿಕವಾಗಿ ತೆರೆಕಾಣಲಿದೆ.

ಮಗು ಅತ್ತಾಗ 'ಹನುಮಾನ್ ಚಾಲೀಸಾ' ಪಠಿಸ್ತಾರೆ ಈ ಚೀನೀ ಮಹಿಳೆ, ಅದರ ಪ್ರಯೋಜನ ವಿವರಿಸಿದ ತಾಯಿ

Ganesh Mabla Gowda — Tue, 29 Sep 2026 23:08:15 +0530

ಚೀನಾದ ಮಹಿಳೆಯೊಬ್ಬರು ಸದ್ಯ ಸೋಶಿಯಲ್ ಮೀಡಿಯಾದಲ್ಲಿ ಸಖತ್ ಟ್ರೆಂಡಿಂಗ್‌ನಲ್ಲಿದ್ದಾರೆ. ಅದಕ್ಕೆ ಕಾರಣ.. ತನ್ನ ಮಗು ಅತ್ತಾಗಲೆಲ್ಲ ಹನುಮಾನ್ ಚಾಲೀಸಾ ಪಠಣ ಮಾಡುವ ವಿಚಾರಕ್ಕೆ.. ಹೌದು, ಚೀನಾದ ಮಹಿಳೆಗೂ ಹನುಮಾನ್ ಚಾಲೀಸಾಗೂ ಏನು ಸಂಬಂಧ ಎಂದು ನೀವು ಕೇಳಬಹುದು. ಆದರೆ, ಆಕೆಗೆ 'ಹನುಮಾನ್ ಚಾಲೀಸಾ'ದ ಶಕ್ತಿ ಏನು ಅನ್ನೋದು ಗೊತ್ತಾಗಿದೆ.

ಸಾರಾ ಜೇನ್ (sara janeho) ಎಂಬ ಮಹಿಳೆ ತನ್ನ ದಿನಚರಿಯನ್ನು ಇನ್‌ಸ್ಟಾಗ್ರಾಮನ್‌ನಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ನನ್ನ ಮಗು ಅಳುವಾಗಲೆಲ್ಲಾ ನಾನು ಹನುಮಾನ್ ಚಾಲೀಸಾ ಪಠಿಸುತ್ತೇನೆ. ನಂತರ ಮಗು ಆಳವಾದ ನಿದ್ರೆಗೆ ಜಾರುತ್ತದೆ. ಇದೇ ವೇಳೆ ಹನುಮಾನ್ ಚಾಲೀಸಾ ತನಗೆ ಹೇಗೆ ತಿಳಿದಿತ್ತು ಎಂಬುದನ್ನು ಅವರು ವಿವರಿಸಿದ್ದಾರೆ. ವೀಡಿಯೊವನ್ನು ನೋಡುವುದರಿಂದ ನೀವು ಆಶ್ಚರ್ಯಚಕಿತರಾಗುವಿರಿ. ಬಳಕೆದಾರರು ಇದಕ್ಕೆ ವಿವಿಧ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತಿದ್ದಾರೆ..

ವಾಸ್ತವವಾಗಿ.. 40 ವರ್ಷದ ಅಮೇರಿಕನ್ ಮಹಿಳೆ ಅಮೆರಿಕದಲ್ಲಿ ವಾಸಿಸುತ್ತಿದ್ದಾರೆ. ಅವರು ತಮ್ಮ ತಾಯ್ತನದ ಒಂದು ಫೋಟೋವನ್ನು ಹಂಚಿಕೊಂಡಿದ್ದಾರೆ. ತಮ್ಮ ಮಗುವಿನೊಂದಿಗೆ ತಮ್ಮ ದಿನಗಳನ್ನು ಹೇಗೆ ಕಳೆಯುತ್ತಿದ್ದಾರೆ ಎಂಬುದನ್ನ ವಿವರಿಸಿದ್ದಾರೆ. ಅದೇ ವಿಡಿಯೋದಲ್ಲಿ ಸಾರಾ ತಮ್ಮ ಮಗುವಿನ ದಿನಚರಿಗೆ ಸಂಬಂಧಿಸಿದ ಹಲವಾರು ವಿಷಯಗಳನ್ನು ಉಲ್ಲೇಖಿಸಿದ್ದಾರೆ. ಅವುಗಳಲ್ಲಿ ಒಂದು ಹನುಮಾನ್ ಚಾಲೀಸಾ ಕೂಡ ಒಂದಾಗಿದೆ.

ಮಹಿಳೆ ಹೇಳಿದ್ದೇನು?

ಮಗು ಹಠ ಮಾಡುವಾಗ ಅಥವಾ ಜೋರಾಗಿ ಅಳುತ್ತಿರುವಾಗ.. ಭಾರತೀಯ ಭಕ್ತಿಗೀತೆ ‘ಹನುಮಾನ್ ಚಾಲೀಸಾ’ ಹಾಕಿದರೆ ಅದು ಕೇವಲ 5 ಸೆಕೆಂಡುಗಳಲ್ಲಿ ಸುಮ್ಮನಾಗಿ ಬಿಡುತ್ತದೆ. 2 ನಿಮಿಷಗಳಲ್ಲಿ ನಿದ್ದೆಗೆ ಜಾರುತ್ತದೆ! ನಾನು 'ಬರ್ನಿಂಗ್ ಮ್ಯಾನ್' ಕಾರ್ಯಕ್ರಮಕ್ಕೆ ಹೋದಾಗ ಭಾರತೀಯ ಸ್ನೇಹಿತರಿಂದ ಈ ಹಾಡನ್ನು ಕೇಳಿ ತಿಳಿದುಕೊಂಡೆ. ಈಗ ಪ್ರತಿದಿನ ಬೆಳಗ್ಗೆ ಇದನ್ನು ಹಾಕುತ್ತೇನೆ ಎಂದಿದ್ದಾರೆ.

ಇನ್ನೂ ಮುಂದುವರಿದು.. ಮಗುವಿಗೆ ಎದೆಹಾಲು ಪಂಪ್ ಮಾಡಿ ಕೊಡುತ್ತಿರುವ ಬಾಡಿಗೆ ತಾಯಿಗೆ ನಾನು ಕಡಲೆಕಾಯಿ ಮತ್ತು ಸೋಯಾ ಹಾಲನ್ನು ಕಳುಹಿಸುತ್ತಿದ್ದೇನೆ. ಇದರಿಂದ ಮಗುವಿಗೆ ಮುಂದೆ ಯಾವುದೇ ಅಲರ್ಜಿ ಬರುವುದಿಲ್ಲ. ಮಗುವಿನ ಬರಿಗಾಲುಗಳು ಕಲ್ಲು, ಹುಲ್ಲು ಅಥವಾ ಮಣ್ಣಿನಂತಹ ನೈಸರ್ಗಿಕ ಮೇಲ್ಮೈಗಳನ್ನು ಸ್ಪರ್ಶಿಸುವುದರಿಂದ ಅವರ ನರಮಂಡಲ ಮತ್ತು ದೈಹಿಕ ಬೆಳವಣಿಗೆಗೆ ಸಹಕಾರಿಯಾಗುತ್ತದೆ. ಆದ್ದರಿಂದ ನಾನು ಪ್ರತಿದಿನ ಮಗುವನ್ನು ತೋಟಕ್ಕೆ ಕರೆದೊಯ್ದು 'ಗ್ರೌಂಡಿಂಗ್' (ನೆಲಕ್ಕೆ ಸ್ಪರ್ಶಿಸುವಂತೆ) ಮಾಡುತ್ತೇನೆ. ಪುಟ್ಟ ಮಕ್ಕಳ ಪಾದಗಳಲ್ಲಿ 2 ಲಕ್ಷಕ್ಕೂ ಹೆಚ್ಚು ನರಗಳ ತುದಿಗಳಿರುತ್ತವೆ! ನನ್ನ ಮಗು ಜೆ ಜೊತೆ ಪ್ರಯತ್ನಿಸಲು ನೀವು ನೀಡುವ ಇನ್ಯಾವುದಾದರೂ ಸಲಹೆಗಳಿವೆಯೇ? ❤️ ಎಂದು ಬರೆದುಕೊಂಡಿದ್ದಾರೆ.

ಈ ವೀಡಿಯೊವನ್ನು ಈಗಾಗಲೇ ಲಕ್ಷಾಂತರ ಜನರು ವೀಕ್ಷಿಸಿದ್ದಾರೆ. ಅನೇಕರು ಇದನ್ನು ಇಷ್ಟಪಟ್ಟಿದ್ದಾರೆ. ಸಾಮಾಜಿಕ ಮಾಧ್ಯಮ ಬಳಕೆದಾರರು ವೀಡಿಯೊಗೆ ವಿವಿಧ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತಿದ್ದಾರೆ. ಒಬ್ಬ ಬಳಕೆದಾರರು ನಿಮ್ಮ ಮಗು ತುಂಬಾ ಮುದ್ದಾಗಿದೆ ಎಂದು ಬರೆದಿದ್ದಾರೆ. ಮತ್ತೊಬ್ಬರು ಸಂಗೀತ ಕೇಳುವುದರಿಂದ ಶಿಶುಗಳು ಶಾಂತವಾಗುತ್ತವೆ ಎಂದು ಬರೆದಿದ್ದಾರೆ. ಮತ್ತೊಬ್ಬರು ಎಂತಹ ಮುದ್ದಾದ ಮಗು! ಅವನು ಮಲಗಿರುವಾಗ ಇನ್ನೂ ಮುದ್ದಾಗಿರಬೇಕು ಎಂದು ಬರೆದಿದ್ದಾರೆ.

View this post on Instagram

A post shared by Sara Jane Ho (@sarajaneho)

ಜಗತ್ತನ್ನೇ ಗೆದ್ದ ಅಲೆಕ್ಸಾಂಡರ್ - ಅರಿಸ್ಟಾಟಲ್ ಪಾಠ ಕಲಿತ , 2300 ವರ್ಷಗಳ ಹಳೆಯ ಪುರಾತನ ಶಾಲೆ ಪತ್ತೆ!

Gowthami K — Tue, 29 Sep 2026 19:08:19 +0530

ಏಥೆನ್ಸ್ (ಗ್ರೀಸ್): ಜಗತ್ತಿನ ಸರ್ವಶ್ರೇಷ್ಠ ತತ್ವಜ್ಞಾನಿಗಳಲ್ಲಿ ಒಬ್ಬರಾದ ಅರಿಸ್ಟಾಟಲ್ ಹಾಗೂ ಜಗತ್ತನ್ನೇ ಗೆಲ್ಲ ಹೊರಟ ಅವರ ಶಿಷ್ಯ ಅಲೆಕ್ಸಾಂಡರ್ ದಿ ಗ್ರೇಟ್ ಅವರ ಐತಿಹಾಸಿಕ ಬಾಂಧವ್ಯದ ಕುರಿತು ಇತಿಹಾಸದ ಪುಟಗಳಲ್ಲಿ ರೋಚಕ ಉಲ್ಲೇಖಗಳಿವೆ. ಆದರೆ, ಗುರುವಿನಿಂದ ಕಲಿಯಲು ಶಿಷ್ಯ ಹಾಗೂ ಸಹಪಾಠಿಗಳು ಕುಳಿತುಕೊಳ್ಳುತ್ತಿದ್ದ ಆ ಭವ್ಯ ತರಗತಿಗಳು ನಿಜವಾಗಿ ಹೇಗಿದ್ದವು? ಈ ಐಕಾನ್ ಜೋಡಿ ಜ್ಞಾನ ಹಂಚಿಕೊಂಡಿದ್ದ ಸ್ಥಳ ಎಲ್ಲಿದೆ? ಎಂಬ ಕುತೂಹಲಕ್ಕೆ ಈಗ ಪುರಾತತ್ತ್ವ ಶಾಸ್ತ್ರಜ್ಞರು ಉತ್ತರ ಕಂಡುಕೊಂಡಿದ್ದಾರೆ.

ಉತ್ತರ ಗ್ರೀಸ್‌ನ ಉತ್ತರ ಭಾಗದಲ್ಲಿ ನಡೆಯುತ್ತಿರುವ ಉತ್ಖನನದ ವೇಳೆ, ಯುವ ಅಲೆಕ್ಸಾಂಡರ್ ಮತ್ತು ಆತನ ಮಾರ್ಗದರ್ಶಕ ಅರಿಸ್ಟಾಟಲ್ ಅವರ ಆರಂಭಿಕ ಶಿಕ್ಷಣದ ದಿನಗಳ ಮೇಲೆ ಬೆಳಕು ಚೆಲ್ಲುವ ಅತ್ಯಪರೂಪದ ಪುರಾತತ್ತ್ವ ಆವಿಷ್ಕಾರ ಸಂಭವಿಸಿದೆ.

ಮೀಜಾದ 'ರಾಯಲ್ ಜಿಮ್ನಾಷಿಯಂ'ನಲ್ಲಿ ಸಿಕ್ಕ ಸಭಾಂಗಣಗಳು

ಗ್ರೀಕ್ ಸರ್ಕಾರ ಮತ್ತು ಹೆಲೆನಿಕ್ ಸಂಸ್ಕೃತಿ ಸಚಿವಾಲಯದ ಅಧಿಕಾರಿಗಳು ನೀಡಿರುವ ಅಧಿಕೃತ ಮಾಹಿತಿ ಪ್ರಕಾರ, 'ಮೀಜಾ' ಎಂಬ ಐತಿಹಾಸಿಕ ಸ್ಥಳದಲ್ಲಿರುವ ರಾಯಲ್ ಜಿಮ್ನಾಷಿಯಂ ಸಂಕೀರ್ಣದಲ್ಲಿ ಪುರಾತತ್ತ್ವಜ್ಞರು ಉತ್ಖನನ ನಡೆಸುತ್ತಿದ್ದರು. ಈ ವೇಳೆ ಅಲೆಕ್ಸಾಂಡರನ ಶಾಲೆಯ ಭಾಗವಾಗಿದ್ದ ಅಲಂಕಾರಿಕ ಮೊಸಾಯಿಕ್ ಟೈಲ್ಸ್‌ಗಳಿಂದ ಕಂಗೊಳಿಸುವ ಸುಂದರ ಸಭಾಂಗಣಗಳು ಪತ್ತೆಯಾಗಿವೆ.

ಕಳೆದ ಮೂರು ವರ್ಷಗಳಿಂದ 'ಲಾ ಬ್ರೂಜುಲಾ ವರ್ಡೆ' ಹಾಗೂ 'ಲೈವ್ ಸೈನ್ಸ್' ವರದಿಗಳ ಪ್ರಕಾರ ಈ ಪ್ರದೇಶದಲ್ಲಿ ನಿರಂತರ ಸಂಶೋಧನೆ ನಡೆಯುತ್ತಿದೆ. 30 ಎಕರೆ ವಿಸ್ತೀರ್ಣದ ಈ ಜಿಮ್ನಾಷಿಯಂ ಸಂಕೀರ್ಣದಲ್ಲಿ ಕುಸ್ತಿ ಪಟುಗಳ ತರಬೇತಿ ಅಖಾಡವಾದ ಪ್ಯಾಲೆಸ್ಟ್ರಾ, ಸ್ಟೇಡಿಯಂ ಮತ್ತು ಆರ್ಕೇಡ್‌ಗಳು, ಕ್ರೀಡಾ ತರಬೇತಿಯ ಸ್ಥಳಗಳು. ವಾತಾವರಣ ಎಷ್ಟೇ ಕೆಟ್ಟಿದ್ದರೂ ಅಥ್ಲೀಟ್‌ಗಳು ಓಡಲು ಬಳಸುತ್ತಿದ್ದ 200 ಮೀಟರ್ ಉದ್ದದ ಮುಚ್ಚಿದ ರನ್ನಿಂಗ್ ಟ್ರ್ಯಾಕ್ ಕ್ಸಿಸ್ಟಸ್ ಗಳು.

ಆದರೆ, ಇತ್ತೀಚಿನ ಸಂಶೋಧನೆಯು ಅಲೆಕ್ಸಾಂಡರ್ ಪಡೆದ ಶಿಕ್ಷಣದ ವೈಶಿಷ್ಟ್ಯಗಳನ್ನು ಸ್ಪಷ್ಟವಾಗಿ ಹೊರಹಾಕಿದೆ. ಕ್ರಿ.ಪೂ. 1 ನೇ ಶತಮಾನದಲ್ಲಿ ಪ್ರಾಚೀನ ಇತಿಹಾಸಕಾರ ಪ್ಲುಟಾರ್ಕ್ ತಮ್ಮ 'ದಿ ಲೈಫ್ ಆಫ್ ಅಲೆಕ್ಸಾಂಡರ್' ಕೃತಿಯಲ್ಲಿ ಬರೆದಂತೆ, ಅಲೆಕ್ಸಾಂಡರನ ತಂದೆ ರಾಜ ಫಿಲಿಪ್ II ತನ್ನ ಮಗ ಮತ್ತು ಮೆಸಿಡೋನಿಯಾದ ನಿಕಟವರ್ತಿ ರಾಜಮನೆತನದ ಮಕ್ಕಳಿಗಾಗಿ ಮೀಜಾ ಎಂಬಲ್ಲಿ ಈ ವಿಶಿಷ್ಟ ಶಾಲೆಯನ್ನು ನಿರ್ಮಿಸಿದ್ದನು.

ಬೋಧನಾ ಕೊಠಡಿಗಳು ಮತ್ತು ಅದ್ದೂರಿ ಔತಣಕೂಟದ ಹಾಲ್!

ಹೆಲೆನಿಕ್ ಸಂಸ್ಕೃತಿ ಸಚಿವಾಲಯದ ಪ್ರಾಚೀನ ವಸ್ತುಗಳ ವಿಭಾಗದ ಗೌರವ ನಿರ್ದೇಶಕಿ ಆಂಜೆಲಿಕಿ ಕೊಟ್ಟಾರಿಡಿ (Angeliki Kottaridi) ನೇತೃತ್ವದ ತಂಡವು ಈ ಕೆಳಗಿನ ಪ್ರಮುಖ ಸ್ಥಳಗಳನ್ನು ಗುರುತಿಸಿದೆ.

ಡಿಡಾಸ್ಕಾಲಿಯನ್ : ಇದು ಬೋಧನಾ ಪ್ರದೇಶವಾಗಿದ್ದು, ವಿದ್ಯಾರ್ಥಿಗಳು ಕಲ್ಲಿನ ಮೇಜುಗಳು ಹಾಗೂ ಕಂಚಿನ ಸ್ಟೈಲಸ್ (ಬರವಣಿಗೆಯ ಕಡ್ಡಿ) ಬಳಸಿ ಅಕ್ಷರ ಅಭ್ಯಾಸ ಮಾಡುತ್ತಿದ್ದರು.

ಔತಣಕೂಟ ಸಭಾಂಗಣಗಳು: ಬೋಧನಾ ಕೊಠಡಿಯ ಪಕ್ಕದಲ್ಲೇ ಅತ್ಯಂತ ಅದ್ದೂರಿಯಾದ ಎರಡು ಸಭಾಂಗಣಗಳು ಪತ್ತೆಯಾಗಿವೆ. ಇವು ಐಗೈನಲ್ಲಿರುವ ರಾಜ ಫಿಲಿಪ್ II ರ ಅರಮನೆಯ ವಿನ್ಯಾಸವನ್ನೇ ಹೋಲುವ ಮೊಸಾಯಿಕ್ ನೆಲಹಾಸನ್ನು ಹೊಂದಿವೆ.

"ಈ ಹೋಲಿಕೆಗಳು ಕಾಕತಾಳೀಯವಲ್ಲ. ರಾಜ ಫಿಲಿಪ್ II ತನ್ನ ಮಗ ಅಲೆಕ್ಸಾಂಡರ್ ಮತ್ತು ಮ್ಯಾಸಿಡೋನಿಯನ್ ಉನ್ನತ ಕುಲದ ಮಕ್ಕಳ ಶಿಕ್ಷಣಕ್ಕಾಗಿಯೇ ಈ ಸಂಕೀರ್ಣವನ್ನು ನಿರ್ಮಿಸಿದ್ದನು ಎಂಬುದಕ್ಕೆ ಇದು ದೃಢ ಸಾಕ್ಷಿಯಾಗಿದೆ," ಎಂದು ಕೊಟ್ಟಾರಿಡಿ ಸ್ಪಷ್ಟಪಡಿಸಿದ್ದಾರೆ.

ಕ್ರೀಡೆ, ತತ್ವಶಾಸ್ತ್ರ ಹಾಗೂ ರಾಜತಾಂತ್ರಿಕ ಸೌಜನ್ಯಗಳ ಕಲಿಕೆ

ಕ್ರಿಸ್ತಪೂರ್ವ 4 ನೇ ಶತಮಾನದಲ್ಲಿ ಮ್ಯಾಸಿಡೋನಿಯಾದ ಗಣ್ಯ ಶಿಕ್ಷಣ ಪದ್ಧತಿ ಹೇಗಿತ್ತು ಎಂಬುದಕ್ಕೆ ಈ ಶಾಲೆಯ ವಿನ್ಯಾಸವೇ ಉತ್ತಮ ಉದಾಹರಣೆ. ದೈಹಿಕ ಸಾಮರ್ಥ್ಯದ ತರಬೇತಿ (ಜಿಮ್ನಾಷಿಯಂ) ಮತ್ತು ಬೌದ್ಧಿಕ ಕಲಿಕೆ (ಡಿಡಾಸ್ಕಾಲಿಯನ್) ಎರಡನ್ನೂ ಒಂದೇ ಸೂರಿನಡಿ ತರಲಾಗಿತ್ತು.

ಸಭಾಂಗಣಗಳಲ್ಲಿ ಹಿಂದೆ ಒರಗುವ ಮಂಚಗಳನ್ನು ಬಳಸಲಾಗುತ್ತಿತ್ತು. ಇದು ಗಣ್ಯರ ಸಾಂಸ್ಕೃತಿಕ ಹಾಗೂ ಸಾಮಾಜಿಕ ಸಂಪ್ರದಾಯವಾದ 'ಸಿಂಪೋಸಿಯಾ' ನಡೆಸಲು ಅನುಕೂಲಕರವಾಗಿತ್ತು. ಅಂದರೆ, ಅರಿಸ್ಟಾಟಲ್‌ನ ತರ್ಕಶಾಸ್ತ್ರ ಹಾಗೂ ದೈಹಿಕ ಕಸರತ್ತಿನ ಜೊತೆಗೆ ರಾಜತಾಂತ್ರಿಕ ನಡವಳಿಕೆಯನ್ನು ಸಹ ಯುವ ಉದ್ಯಮಿ-ನಾಯಕರಿಗೆ ಇಲ್ಲಿ ಕಲಿಸಲಾಗುತ್ತಿತ್ತು.

ಪತ್ತೆಯಾದ ಪ್ರಾಚೀನ ಬರವಣಿಗೆಯ ಪರಿಕರಗಳು

ಈ ಉತ್ಖನನದ ಸಮಯದಲ್ಲಿ ಮಡಿಕೆ ಚೂರುಗಳು, ಹಳೆಯ ನಾಣ್ಯಗಳು ಮತ್ತು 4 ಕಂಚಿನ ಬರವಣಿಗೆಯ ಸ್ಟೈಲಸ್‌ಗಳು ಪತ್ತೆಯಾಗಿವೆ. ಇವುಗಳನ್ನು ಸ್ವತಃ ಅಲೆಕ್ಸಾಂಡರ್ ಅಥವಾ ಆತನ ಸಹಪಾಠಿಗಳು ಬಳಸಿರಬಹುದು ಎಂದು ಊಹಿಸಲಾಗಿದೆ. ಜೊತೆಗೆ, ಏಥೆನ್ಸ್‌ನಿಂದ ತರಿಸಲಾದ ಅತ್ಯಂತ ಅಮೂಲ್ಯವಾದ ಪವಿತ್ರ ಆಲಿವ್ ಎಣ್ಣೆಯನ್ನು ಸಂಗ್ರಹಿಸಿಡುತ್ತಿದ್ದ ಪಾತ್ರೆಗಳ ಅವಶೇಷಗಳು ಸಹ ಸಿಕ್ಕಿವೆ.

ನೆಬ್ರಸ್ಕಾ ವಿಶ್ವವಿದ್ಯಾಲಯದ ಪ್ರಾಚೀನ ಮೆಡಿಟರೇನಿಯನ್ ಅಧ್ಯಯನದ ನಿರ್ದೇಶಕಿ ಜೀನ್ ರೀಮ್ಸ್ ಮಾತನಾಡಿ, ಲಭ್ಯವಿರುವ ಎಲ್ಲಾ ಆಧಾರಗಳು ಯುವ ಅಲೆಕ್ಸಾಂಡರ್ ಮತ್ತು ಆತನ ಸಹಪಾಠಿಗಳಿಗೆ ಬೋಧಿಸಲು ರಾಜ ಫಿಲಿಪ್, ಅರಿಸ್ಟಾಟಲ್‌ಗೆ ಒದಗಿಸಿಕೊಟ್ಟ ಶಾಲೆ ಇದೇ ಎಂಬುದನ್ನು ಬಲವಾಗಿ ಬೆಂಬಲಿಸುತ್ತವೆ. ಈ ಉತ್ಖನನವು ಕ್ರಿ.ಪೂ. 4 ನೇ ಶತಮಾನದ ಗಣ್ಯರ ಶಿಕ್ಷಣ ಪದ್ಧತಿಯ ಮೇಲೆ ಹೊಸ ಬೆಳಕು ಚೆಲ್ಲಲಿದೆ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.

'ನಿಮ್ಮಿಂದಲೇ ಭಾರತದಲ್ಲಿ ನನ್ನ ಕುಟುಂಬ ಬರದಿಂದ ಸಾಯುತ್ತಿದೆ'.. NVIDIA ಕಂಪನಿಗೆ ಭಾರತೀಯ ಯುವಕನ ಖಡಕ್ ಪ್ರಶ್ನೆ!

Chandrashekar GS — Tue, 29 Sep 2026 16:00:05 +0530

‘ನನ್ನ ಕುಟುಂಬ ಬರದಿಂದ ಸಾಯುತ್ತಿದೆ’ ಎಂದ ವಿದ್ಯಾರ್ಥಿ!

ನ್ಯೂಯಾರ್ಕ್‌ನಲ್ಲಿ ನಡೆದ Climate Week NYC ಕಾರ್ಯಕ್ರಮವೊಂದರಲ್ಲಿ ಭಾರತೀಯ ವಿದ್ಯಾರ್ಥಿಯೊಬ್ಬ Nvidia ಕಂಪನಿಯ ಹಿರಿಯ ಅಧಿಕಾರಿಯನ್ನು ನೇರವಾಗಿ ಪ್ರಶ್ನಿಸಿದ ಘಟನೆ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ. ಸೆಪ್ಟೆಂಬರ್ 23ರಂದು ನಡೆದ ಪ್ಯಾನೆಲ್ ಚರ್ಚೆಯಲ್ಲಿ Nvidiaಯ Sustainability ವಿಭಾಗದ ಮುಖ್ಯಸ್ಥ ಜೋಶ್ ಪಾರ್ಕರ್ ಭಾಗವಹಿಸಿದ್ದರು. ಈ ವೇಳೆ ಹವಾಮಾನ ಹೋರಾಟಗಾರರ ಗುಂಪು ಕಾರ್ಯಕ್ರಮಕ್ಕೆ ಅಡ್ಡಿಪಡಿಸಿ AI ಮತ್ತು ಡೇಟಾ ಸೆಂಟರ್‌ಗಳ ಪರಿಸರ ಪರಿಣಾಮದ ಬಗ್ಗೆ ಪ್ರಶ್ನೆಗಳನ್ನು ಎತ್ತಿತು.

‘ಇನ್ನೆಷ್ಟು ಜನ ಸಾಯಬೇಕು?’

ಪ್ರತಿಭಟನೆಯ ವೇಳೆ ಭಾರತೀಯ ವಿದ್ಯಾರ್ಥಿಯೊಬ್ಬರು ಪಾರ್ಕರ್ ಅವರನ್ನು ನೇರವಾಗಿ ಉದ್ದೇಶಿಸಿ ಆಕ್ರೋಶ ವ್ಯಕ್ತಪಡಿಸಿದರು. ‘ನನ್ನ ಕುಟುಂಬ ಭಾರತದಲ್ಲಿ ಬರದಿಂದ ಸಾಯುತ್ತಿದೆ. ಇದಕ್ಕೆ ನೀವು ಕಾರಣ’ ಎಂದು ಆರೋಪಿಸಿದ ಅವರು, ‘ಇನ್ನೆಷ್ಟು ಜನ ಸಾಯಬೇಕು?’ ಎಂದು ಪ್ರಶ್ನಿಸಿದರು.

ಅಲ್ಲದೆ, ಕಂಪನಿ ಸುಸ್ಥಿರತೆ ಬಗ್ಗೆ ಮಾತನಾಡುತ್ತಿದ್ದರೂ ದೊಡ್ಡ ಪ್ರಮಾಣದ ಕಾರ್ಬನ್ ಹೊರಸೂಸುವಿಕೆ ನಡೆಯುತ್ತಿದೆ ಎಂದು ವಿದ್ಯಾರ್ಥಿ ಆರೋಪಿಸಿದರು. ಅವರ ಮಾತುಗಳ ಬಳಿಕ ಭದ್ರತಾ ಸಿಬ್ಬಂದಿ ಅವರನ್ನು ಸ್ಥಳದಿಂದ ಹೊರಗೆ ಕರೆದೊಯ್ದರು.

AIಗೆ ಇಷ್ಟೊಂದು ನೀರು ಏಕೆ ಬೇಕು?

AI ತಂತ್ರಜ್ಞಾನ ವೇಗವಾಗಿ ಬೆಳೆಯುತ್ತಿರುವಂತೆ ದೊಡ್ಡ ದೊಡ್ಡ ಡೇಟಾ ಸೆಂಟರ್‌ಗಳ ಅಗತ್ಯವೂ ಹೆಚ್ಚುತ್ತಿದೆ. ಸಾವಿರಾರು ಸರ್ವರ್‌ಗಳು ನಿರಂತರವಾಗಿ ಕಾರ್ಯನಿರ್ವಹಿಸುವುದರಿಂದ ಅವು ಹೆಚ್ಚಿನ ಪ್ರಮಾಣದಲ್ಲಿ ಶಾಖವನ್ನು ಉತ್ಪಾದಿಸುತ್ತವೆ.

ಡೇಟಾ ಸೆಂಟರ್‌ಗಳಲ್ಲಿ ನೀರಿನ ಬಳಕೆ

ಈ ಸರ್ವರ್‌ಗಳನ್ನು ತಂಪಾಗಿಡಲು ಕೆಲವು ಡೇಟಾ ಸೆಂಟರ್‌ಗಳಲ್ಲಿ ನೀರನ್ನು ಆಧರಿಸಿದ cooling ವ್ಯವಸ್ಥೆಗಳನ್ನು ಬಳಸಲಾಗುತ್ತದೆ. ಭಾರತದಲ್ಲಿ ಡೇಟಾ ಸೆಂಟರ್‌ಗಳ ವಿಸ್ತರಣೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ನೀರಿನ ಕೊರತೆ ಇರುವ ಪ್ರದೇಶಗಳಲ್ಲಿ ಇಂತಹ ಮೂಲಸೌಕರ್ಯಗಳ ಪರಿಣಾಮದ ಬಗ್ಗೆ ಪರಿಸರ ತಜ್ಞರು ಮತ್ತು ನೀತಿ ವಿಶ್ಲೇಷಕರು ಪ್ರಶ್ನೆಗಳನ್ನು ಎತ್ತುತ್ತಿದ್ದಾರೆ.

AI ಅಭಿವೃದ್ಧಿ ವಿರುದ್ಧ ಪರಿಸರ ಕಾಳಜಿ?

AI ಅಭಿವೃದ್ಧಿಯಿಂದ ಆರೋಗ್ಯ, ಶಿಕ್ಷಣ, ಸಂಶೋಧನೆ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಹೊಸ ಅವಕಾಶಗಳು ಸೃಷ್ಟಿಯಾಗುತ್ತಿವೆ. ಆದರೆ ಅದರ ಹಿಂದೆ ಬೇಕಾಗುವ ವಿದ್ಯುತ್, ನೀರು ಮತ್ತು ಡೇಟಾ ಸೆಂಟರ್ ಮೂಲಸೌಕರ್ಯದ ಪರಿಸರ ಪರಿಣಾಮದ ಬಗ್ಗೆ ಚರ್ಚೆಯೂ ಹೆಚ್ಚಾಗಿದೆ.

ಈ ಪ್ರತಿಭಟನಾಕಾರರ ಮುಖ್ಯ ಪ್ರಶ್ನೆಯೂ ಇದೇ ಆಗಿತ್ತು. ತಂತ್ರಜ್ಞಾನ ಬೆಳೆಯಬೇಕು, ಆದರೆ ಅದರ ಬೆಲೆ ಪರಿಸರ ಮತ್ತು ನೀರಿನ ರೂಪದಲ್ಲಿ ಜನರು ಕಟ್ಟಬೇಕೇ ಎಂಬ ಪ್ರಶ್ನೆಯನ್ನು ಅವರು ಮುಂದಿಟ್ಟಿದ್ದಾರೆ.

ವೈರಲ್ ಆದ ವಿದ್ಯಾರ್ಥಿಯ ಮಾತು

ವಿದ್ಯಾರ್ಥಿಯ ಭಾವನಾತ್ಮಕ ಮಾತುಗಳ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೇಗವಾಗಿ ಹರಡಿದೆ. ಕೆಲವರು ವಿದ್ಯಾರ್ಥಿಗಳ ಧೈರ್ಯವನ್ನು ಮೆಚ್ಚಿದರೆ, ಮತ್ತೊಂದೆಡೆ AI ಮೂಲಸೌಕರ್ಯ ಮತ್ತು ನೀರಿನ ಬಳಕೆಯ ನಿಜವಾದ ಪ್ರಮಾಣ ಹಾಗೂ ಅದರ ಸ್ಥಳೀಯ ಪರಿಣಾಮಗಳ ಬಗ್ಗೆ ವಾಸ್ತವಾಧಾರಿತ ಚರ್ಚೆ ಅಗತ್ಯ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ.

ಒಟ್ಟಿನಲ್ಲಿ, ಈ ಘಟನೆ AI ಕೇವಲ ತಂತ್ರಜ್ಞಾನದ ವಿಷಯವಲ್ಲ; ನೀರು, ವಿದ್ಯುತ್, ಪರಿಸರ ಮತ್ತು ಜನರ ಜೀವನದ ಮೇಲಿನ ಅದರ ಪರಿಣಾಮದ ಬಗ್ಗೆಯೂ ಪ್ರಶ್ನೆ ಕೇಳಬೇಕಾಗಿದೆ ಎಂಬ ಚರ್ಚೆಯನ್ನು ಮತ್ತೊಮ್ಮೆ ಮುನ್ನೆಲೆಗೆ ತಂದಿದೆ.

ಆಸ್ಟ್ರೇಲಿಯಾದಿಂದ ಅಮೆರಿಕಕ್ಕೆ ಸಾಗಿಸುತ್ತಿದ್ದಾಗ ಚೀನಾ ಪಾಲಾದ F-35 ಯುದ್ಧವಿಮಾನದ ಬಿಡಿಭಾಗ! ದಾರಿ ತಪ್ಪಿದ್ದೆಲ್ಲಿ?

Gowthami K — Fri, 25 Sep 2026 14:16:46 +0530

ವಾಷಿಂಗ್ಟನ್: ಆಸ್ಟ್ರೇಲಿಯಾದಿಂದ ಅಮೆರಿಕಕ್ಕೆ ರವಾನೆಯಾಗುತ್ತಿದ್ದ ಅಮೆರಿಕದ ಅತ್ಯಾಧುನಿಕ ಶಕ್ತಿಶಾಲಿ ಯುದ್ಧವಿಮಾನ ಎಫ್‌-35ರ ಬಿಡಿಭಾಗಗಳು ಮಾರ್ಗಮಧ್ಯೆ ಅನಿರೀಕ್ಷಿತವಾಗಿ ಚೀನಾದ ಕೈಗೆ ತಲುಪಿವೆ ಎಂದು ಬ್ಲೂಮ್‌ಬರ್ಗ್ ವರದಿ ಮಾಡಿದೆ. ಈ ಬೆನ್ನಲ್ಲೇ ಅಮೆರಿಕ ತೀವ್ರ ಕಳವಳ ವ್ಯಕ್ತಪಡಿಸಿದ್ದು, ರಕ್ಷಣಾ ಇಲಾಖೆಯ ಮುಖ್ಯ ಕಚೇರಿ ಪೆಂಟಗನ್ ಉನ್ನತ ಮಟ್ಟದ ತನಿಖೆ ಆರಂಭಿಸಿದೆ.

ವರದಿ ಪ್ರಕಾರ, ಆಸ್ಟ್ರೇಲಿಯಾದಿಂದ ರಿಪೇರಿಗಾಗಿ ಅಮೆರಿಕಕ್ಕೆ ರವಾನೆಯಾಗುತ್ತಿದ್ದ ಎಫ್-35 ವಿಮಾನದ ಕಾಕ್‌ಪಿಟ್ ಕ್ಯಾನೋಪಿ ಮತ್ತು ಆಯುಧಗಳನ್ನಿಡುವ ಬಾಗಿಲು ಹೊಂದಿದ್ದ ಹಡಗು ಮಾರ್ಗ ಬದಲಿಸಿ ಅನಿರೀಕ್ಷಿತವಾಗಿ ಹಾಂಕಾಂಗ್ ತಲುಪಿದೆ. ಈ ರಹಸ್ಯ ಭಾಗಗಳು ಹಾಂಕಾಂಗ್‌ಗೆ ಹೇಗೆ ತಲುಪಿದವು ಎಂಬ ಬಗ್ಗೆ ತನಿಖೆ ನಡೆಯುತ್ತಿದ್ದು, ಘಟನೆಯು ಅಮೆರಿಕ ಸಂಸತ್ತಿನಲ್ಲೂ ತೀವ್ರ ಚರ್ಚೆಗೆ ಗ್ರಾಸವಾಗಿದೆ. ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆಗಾಗಿ ವಾಷಿಂಗ್ಟನ್‌ಗೆ ಆಗಮಿಸಿದ ಸಂದರ್ಭದಲ್ಲೇ ಈ ಘಟನೆ ಬೆಳಕಿಗೆ ಬಂದಿದೆ.

ದಾರಿ ತಪ್ಪಿದ ಸಾಗಣೆ

‘ಬ್ಲೂಮ್‌ಬರ್ಗ್’ ವರದಿಯ ಪ್ರಕಾರ, ಆಸ್ಟ್ರೇಲಿಯಾ ವಾಯುಪಡೆಯಲ್ಲಿದ್ದ F-35 ಜೆಟ್‌ನ ಕೆಲ ಪ್ರಮುಖ ಭಾಗಗಳನ್ನು ದುರಸ್ತಿ ಅಥವಾ ವಿಲೇವಾರಿಗಾಗಿ ಅಮೆರಿಕದ ತಯಾರಿಕಾ ಘಟಕಕ್ಕೆ ಕಳುಹಿಸಲಾಗುತ್ತಿತ್ತು. ಆದರೆ, ಹಡಗಿನ ಮೂಲಕ ಸಾಗಣೆಯಾಗುತ್ತಿದ್ದ ಈ ಸರಕು ತಿಂಗಳುಗಳ ಹಿಂದೆಯೇ ಅನಿರೀಕ್ಷಿತವಾಗಿ ಬೇರೆಡೆಗೆ ತಿರುಗಿಸಲ್ಪಟ್ಟು, ಚೀನಾದ ಸಂಪೂರ್ಣ ಆಡಳಿತಕ್ಕೊಳಪಟ್ಟ ಹಾಂಗ್ ಕಾಂಗ್ ತಲುಪಿದೆ.

ಈ ಸರಕಿನಲ್ಲಿ ಕಾಕ್‌ಪಿಟ್ ಮೇಲಾವರಣ ಮತ್ತು ಶಸ್ತ್ರಾಸ್ತ್ರಗಳ ಬೇ ಬಾಗಿಲುಗಳು ಸೇರಿದ್ದವು ಎನ್ನಲಾಗಿದೆ. F-35 ನಂತಹ ಸುಧಾರಿತ ಐದನೇ ತಲೆಮಾರಿನ ಜೆಟ್‌ಗಳಲ್ಲಿ ಶತ್ರುಗಳ ರಾಡಾರ್‌ಗೆ ಸಿಗದಂತೆ ಆಯುಧಗಳನ್ನು ಅಡಗಿಸಿಡಲು ಬಳಸಲಾಗುವ ಶಸ್ತ್ರಾಸ್ತ್ರಗಳ ಬೇ ಬಾಗಿಲುಗಳ ತಂತ್ರಜ್ಞಾನವು ಅತ್ಯಂತ ವಿಶೇಷವಾದದ್ದು.

ಆಸ್ಟ್ರೇಲಿಯಾ ರಕ್ಷಣಾ ಸಚಿವರ ಸ್ಪಷ್ಟನೆ

ಮಂಗಳವಾರ ಮಾಧ್ಯಮಗಳೊಂದಿಗೆ ಮಾತನಾಡಿದ ಆಸ್ಟ್ರೇಲಿಯಾದ ರಕ್ಷಣಾ ಸಚಿವ ರಿಚರ್ಡ್ ಮಾರ್ಲೆಸ್, F-35 ಜೆಟ್‌ನ ಭಾಗಗಳು ಹಾಂಗ್ ಕಾಂಗ್ ತಲುಪಿರುವುದನ್ನು ದೃಢಪಡಿಸಿದರು. ಆದರೆ, ಸಾರ್ವಜನಿಕ ಕಳವಳವನ್ನು ಶಮನಗೊಳಿಸಲು ಯತ್ನಿಸಿದ ಅವರು, "ನಾವು ಈ ವಿಷಯದಲ್ಲಿ ಯುನೈಟೆಡ್ ಸ್ಟೇಟ್ಸ್ ಮತ್ತು ಜೆಟ್‌ನ ಪ್ರಮುಖ ಗುತ್ತಿಗೆದಾರ ಸಂಸ್ಥೆಯಾದ ಲಾಕ್‌ಹೀಡ್ ಮಾರ್ಟಿನ್ (Lockheed Martin) ಜೊತೆ ನಿಕಟವಾಗಿ ಕೆಲಸ ಮಾಡುತ್ತಿದ್ದೇವೆ. ನನ್ನ ತಿಳುವಳಿಕೆಯ ಪ್ರಕಾರ, ಇವು ಅತ್ಯಂತ ಸೂಕ್ಷ್ಮ ತಂತ್ರಜ್ಞಾನ ಒಳಗೊಂಡ ಭಾಗಗಳಲ್ಲ. ಆದರೆ ಈ ಸನ್ನಿವೆಶ ಹೇಗೆ ಸೃಷ್ಟಿಯಾಗಿದೆ ಎಂಬುದನ್ನು ಅಮೆರಿಕ ಮತ್ತು ಲಾಕ್‌ಹೀಡ್ ನಿರ್ವಹಿಸುತ್ತಿವೆ ಎಂದು ಹೇಳಿದರು.

F-35 ಜಂಟಿ ಕಾರ್ಯಕ್ರಮ ಕಚೇರಿಯು ತನ್ನ ಪ್ರಕಟಣೆಯಲ್ಲಿ, ಈ ಘಟಕಗಳನ್ನು ಸುರಕ್ಷಿತವಾಗಿ ಹಿಂಪಡೆಯಲು, ಘಟನೆಯ ಸಮಗ್ರ ತನಿಖೆ ನಡೆಸಲು ಹಾಗೂ ಭವಿಷ್ಯದಲ್ಲಿ ಇಂತಹ ಭದ್ರತಾ ಲೋಪಗಳು ಮರುಕಳಿಸದಂತೆ ಕಠಿಣ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಲು ನಾವು ಯುಎಸ್ ಅಧಿಕಾರಿಗಳು ಹಾಗೂ ಉದ್ಯಮ ಪಾಲುದಾರರೊಂದಿಗೆ ಸಕ್ರಿಯವಾಗಿ ಶ್ರಮಿಸುತ್ತಿದ್ದೇವೆ ಎಂದು ತಿಳಿಸಿದೆ.

ರಾಜತಾಂತ್ರಿಕ ಬಿಕ್ಕಟ್ಟು ಮತ್ತು ಸಂಸತ್ತಿನ ಆತಂಕ

ಈ ಘಟನೆಯು ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ದ್ವಿಪಕ್ಷೀಯ ಮಾತುಕತೆಗಾಗಿ ವಾಷಿಂಗ್ಟನ್‌ಗೆ ಆಗಮಿಸಿದ ಸಂದರ್ಭದಲ್ಲೇ ಬೆಳಕಿಗೆ ಬಂದಿರುವುದು ರಾಜತಾಂತ್ರಿಕವಾಗಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ. ಈ ಕುರಿತು ಮಾಧ್ಯಮಗಳು ಲಾಕ್‌ಹೀಡ್ ಮಾರ್ಟಿನ್ ಸಂಸ್ಥೆಯನ್ನು ಸಂಪರ್ಕಿಸಿದಾಗ ತಕ್ಷಣಕ್ಕೆ ಯಾವುದೇ ಪ್ರತಿಕ್ರಿಯೆ ಸಿಕ್ಕಿಲ್ಲ. ಇತ್ತ ಚೀನಾದ ವಿದೇಶಾಂಗ ಸಚಿವಾಲಯವು ತಮಗೆ ಈ ವಿಷಯದ ಬಗ್ಗೆ ಮಾಹಿತಿಯೇ ಇಲ್ಲ ಎಂದು ಹೇಳಿದ್ದರೆ, ಹಾಂಗ್ ಕಾಂಗ್ ಸರ್ಕಾರ ನಿರ್ದಿಷ್ಟ ಸಾಗಣೆ ಪ್ರಕರಣಗಳ ಬಗ್ಗೆ ಪ್ರತಿಕ್ರಿಯೆ ನೀಡುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.

ಅಮೆರಿಕದ ಅತ್ಯುನ್ನತ ವರ್ಗೀಕೃತ ತಂತ್ರಜ್ಞಾನ ಚೀನಾದ ಕೈಸೇರಿರಬಹುದು ಎಂಬ ಆತಂಕದ ಮೇಲೆ ಅಮೆರಿಕದ ಸಂಸತ್ತು ಕೂಡ ತನಿಖೆಗೆ ಆದೇಶಿಸಿದೆ ಎಂದು ವರದಿಯಾಗಿದೆ. 1997 ರಲ್ಲಿ ಬ್ರಿಟಿಷ್ ಆಳ್ವಿಕೆಯಿಂದ ಮುಕ್ತವಾದ ಹಾಂಗ್ ಕಾಂಗ್ ಮೇಲೆ ಬೀಜಿಂಗ್ ಸಂಪೂರ್ಣ ನಿಯಂತ್ರಣ ಹೊಂದಿದ್ದು, ಅಲ್ಲಿಯ ರಕ್ಷಣೆ ಮತ್ತು ರಾಜತಾಂತ್ರಿಕತೆಯನ್ನು ಚೀನಾವೇ ನಿರ್ವಹಿಸುತ್ತದೆ.

F-35 ಜೆಟ್‌ನ ಪ್ರಾಮುಖ್ಯತೆ ಮತ್ತು ಚೀನಾದ ಸೈಬರ್ ಗೂಢಚಾರಿಕೆ

ಮೊದಲ F-35 ಲೈಟ್ನಿಂಗ್ ಸ್ಟ್ರೈಕ್ ಫೈಟರ್ ಸುಮಾರು 20 ವರ್ಷಗಳ ಹಿಂದೆ ಟೆಕ್ಸಾಸ್‌ನಲ್ಲಿ ತಯಾರಾಯಿತು. ಕಾಂಗ್ರೆಷನಲ್ ರಿಸರ್ಚ್ ಸರ್ವೀಸ್ ಪ್ರಕಾರ, ಇದುವರೆಗೆ 1,200 ಕ್ಕೂ ಹೆಚ್ಚು ಜೆಟ್‌ಗಳನ್ನು ಉತ್ಪಾದಿಸಲಾಗಿದ್ದು, ಜಗತ್ತಿನ 19 ದೇಶಗಳು ಇದನ್ನು ಬಳಸಿದೆ.

F-35 ಅತ್ಯಾಧುನಿಕ ಐದನೇ ತಲೆಮಾರಿನ ಯುದ್ಧವಿಮಾನವಾಗಿದ್ದು, ಶತ್ರು ರಾಡಾರ್‌ಗಳಿಂದ ತಪ್ಪಿಸಿಕೊಳ್ಳುವ ರಹಸ್ಯ ಲೇಪನಗಳು, ಸುಧಾರಿತ ಸಂವೇದಕಗಳು ಮತ್ತು ನೆಟ್‌ವರ್ಕಿಂಗ್ ಸಾಮರ್ಥ್ಯವನ್ನು ಹೊಂದಿದೆ.

ಪೆಂಟಗನ್‌ಗೆ ಸಲಹೆ ನೀಡುವ ರಕ್ಷಣಾ ವಿಜ್ಞಾನ ಮಂಡಳಿಯ 2013 ರ ವರದಿಯ ಪ್ರಕಾರ, ಚೀನಾದ ಹ್ಯಾಕರ್‌ಗಳು ಸೈಬರ್ ದಾಳಿಗಳ ಮೂಲಕ ಜಂಟಿ ಸ್ಟ್ರೈಕ್ ಫೈಟರ್ ಸೇರಿದಂತೆ ಪೆಂಟಗನ್‌ನ ಡಜನ್‌ಗಟ್ಟಲೆ ಕಾರ್ಯಕ್ರಮಗಳ ಈ ಹಿಂದೆ ರಹಸ್ಯ ಡೇಟಾವನ್ನು ಕದ್ದಿದ್ದರು.

ಫೌಂಡೇಶನ್ ಫಾರ್ ಡಿಫೆನ್ಸ್ ಆಫ್ ಡೆಮಾಕ್ರಸೀಸ್ ಸಂಸ್ಥೆಯ ಹಿರಿಯ ನಿರ್ದೇಶಕ ಬ್ರಾಡ್ಲಿ ಬೌಮನ್ ಪ್ರಕಾರ, F-35 ಅಮೆರಿಕದ ಅತ್ಯುತ್ತಮ ಮತ್ತು ಅತ್ಯಂತ ಮುಂದುವರಿದ ಫೈಟರ್ ಜೆಟ್. ವರ್ಷಗಳ ಹಿಂದೆ ಕದ್ದಿರಬಹುದಾದ ರಹಸ್ಯಗಳ ಪ್ರಭಾವವನ್ನು ಕಡಿಮೆ ಮಾಡಲು ಅಮೆರಿಕ ತನ್ನ ಮಿಲಿಟರಿ ವ್ಯವಸ್ಥೆಗಳನ್ನು ನಿರಂತರವಾಗಿ ಸುಧಾರಿಸುತ್ತಾ ಬಂದಿದೆ. ಪ್ರಸ್ತುತ ಪೆಂಟಗನ್‌ನ ತನಿಖೆಯು ದಾರಿ ತಪ್ಪಿದ ಈ ಬಿಡಿಭಾಗಗಳು ಹಾಂಗ್ ಕಾಂಗ್‌ಗೆ ಹೇಗೆ ತಲುಪಿದವು ಎಂಬುದರ ಮೂಲವನ್ನು ಪತ್ತೆಹಚ್ಚುವುದು ಮತ್ತು ಆ ಸರಕನ್ನು ತಕ್ಷಣವೇ ಹಿಂಪಡೆಯುವುದರ ಮೇಲೆ ದೃಷ್ಠಿ ಇಟ್ಟಿದೆ.