Asianet Suvarna News

SIR: ಮತದಾರರ ಹೆಸರು ಡಿಲಿಟ್ ವದಂತಿ; ಮುಸ್ಲಿಂ ಸಮುದಾಯದ ಮತದಾರರಿಂದ ತಹಸೀಲ್ದಾರ್ ಕಚೇರಿಗೆ ಮುತ್ತಿಗೆ!

Ravi Janekal — Tue, 29 Sep 2026 10:30:49 +0530

ಕಂಪ್ಲಿ(ಸೆ.29) ಮತದಾರರ ಪಟ್ಟಿಯಿಂದ ತಮ್ಮ ಹೆಸರುಗಳನ್ನು ಕೈಬಿಡಲಾಗಿದೆ ಎಂಬ ವದಂತಿ ನಂಬಿದ 13, 9 ಹಾಗೂ 15ನೇ ವಾರ್ಡ್‌ಗಳ ಕೆಲ ಮತದಾರರು ಸೋಮವಾರ ಇಲ್ಲಿನ ತಹಸೀಲ್ದಾರ್ ಕಚೇರಿಗೆ ಏಕಾಏಕಿ ತೆರಳಿ ಅಧಿಕಾರಿಗಳನ್ನು ಪ್ರಶ್ನಿಸಿದ ಘಟನೆ ನಡೆಯಿತು.

ಮತದಾರರ ಪಟ್ಟಿಯಲ್ಲಿ ಹಲವು ಮತದಾರರ ಹೆಸರುಗಳನ್ನು ಉದ್ದೇಶಪೂರ್ವಕವಾಗಿ ಕೈಬಿಡಲಾಗುತ್ತಿದೆ ಎಂಬ ಮಾಹಿತಿ ಹರಡಿದ್ದರಿಂದ ಸಾರ್ವಜನಿಕರಲ್ಲಿ ಆತಂಕ ಉಂಟಾಗಿತ್ತು. ಈ ಹಿನ್ನೆಲೆಯಲ್ಲಿ ಕಚೇರಿಗೆ ಆಗಮಿಸಿದ ಕೆಲವರು ಅಧಿಕಾರಿಗಳ ಬಳಿ ಈ ಕುರಿತು ಸ್ಪಷ್ಟನೆ ನೀಡುವಂತೆ ಒತ್ತಾಯಿಸಿದರು.

ಒಬ್ಬ ಮತದಾರರ ಹೆಸರು ಮಾತ್ರ ಕೈಬಿಟ್ಟಿದ್ದು

ಇದರಿಂದ ಕೆಲಕಾಲ ಕಚೇರಿ ಆವರಣದಲ್ಲಿ ಗೊಂದಲದ ವಾತಾವರಣ ನಿರ್ಮಾಣವಾಯಿತು. ಈ ಸಂದರ್ಭದಲ್ಲಿ ತಹಸೀಲ್ದಾರ್ ಜೂಗಲ ಮಂಜುನಾಯಕ ಅವರು ಸಾರ್ವಜನಿಕರಿಗೆ ಮಾಹಿತಿ ನೀಡಿ, ಕರಡು ಮತದಾರರ ಪಟ್ಟಿ ಪ್ರಕಟಿಸಿದ ಬಳಿಕ ಮೃತಪಟ್ಟಿರುವ ಒಬ್ಬ ಮತದಾರರ ಹೆಸರನ್ನು ಮಾತ್ರ ನಿಯಮಾನುಸಾರ ಪಟ್ಟಿಯಿಂದ ತೆಗೆದುಹಾಕಲಾಗಿದೆ. ಯಾವುದೇ ಅರ್ಹ ಮತದಾರರ ಹೆಸರನ್ನು ಉದ್ದೇಶಪೂರ್ವಕವಾಗಿ ಕೈಬಿಟ್ಟಿಲ್ಲ ಎಂದು ಸ್ಪಷ್ಟಪಡಿಸಿದರು. ಮತದಾರರ ಪಟ್ಟಿಯಿಂದ ದೊಡ್ಡ ಸಂಖ್ಯೆಯಲ್ಲಿ ಮತದಾರರ ಹೆಸರುಗಳನ್ನು ತೆಗೆದುಹಾಕಲಾಗಿದೆ ಎಂಬುದು ಸುಳ್ಳು ವದಂತಿಯಾಗಿದೆ. ಇಂತಹ ಮಾಹಿತಿಯನ್ನು ನಂಬಿ ಸಾರ್ವಜನಿಕರು ಕಚೇರಿಗೆ ವಿಚಾರಿಸಲು ಆಗಮಿಸಿದ್ದು, ಅವರಿಗೆ ವಾಸ್ತವಾಂಶವನ್ನು ವಿವರಿಸಿ ಸೂಕ್ತ ಮಾಹಿತಿ ನೀಡಲಾಗಿದೆ ಎಂದು ತಿಳಿಸಿದರು.

ಅರ್ಹ ಮತದಾರರ ಹೆಸರುಗಳನ್ನು ಯಾವುದೇ ಕಾರಣಕ್ಕೂ ಪಟ್ಟಿಯಿಂದ ಕೈಬಿಡುವುದಿಲ್ಲ. ಅದೇ ರೀತಿ ಅನರ್ಹರನ್ನು ಮತದಾರರ ಪಟ್ಟಿಗೆ ಸೇರಿಸಲು ಅವಕಾಶ ನೀಡಲಾಗುವುದಿಲ್ಲ. ಮತದಾರರ ಪಟ್ಟಿಗೆ ಸಂಬಂಧಿಸಿದ ಯಾವುದೇ ಅನುಮಾನಗಳಿದ್ದಲ್ಲಿ ಸಾರ್ವಜನಿಕರು ನೇರವಾಗಿ ಸಂಬಂಧಪಟ್ಟ ಅಧಿಕಾರಿಗಳನ್ನು ಸಂಪರ್ಕಿಸಿ ಮಾಹಿತಿ ಪಡೆದುಕೊಳ್ಳಬೇಕು ಎಂದು ಹೇಳಿದರು.

ನೋಟಿಸ್‌ ಕುರಿತು ವದಂತಿ:

ಮುಸ್ಲಿಂ ಮತದಾರರು ಹೆಚ್ಚಿನ ಸಂಖ್ಯೆಯಲ್ಲಿರುವ ಪ್ರದೇಶಗಳಲ್ಲಿ ಬೂತ್‌ಮಟ್ಟದ ಅಧಿಕಾರಿಗಳು (ಬಿಎಲ್‌ಒ) 200ರಿಂದ 300 ಮಂದಿಗೆ ನೋಟಿಸ್ ನೀಡಲು ಮುಂದಾಗಿದ್ದಾರೆ ಎಂಬ ವದಂತಿ ಹರಡಿತ್ತು ಎನ್ನಲಾಗಿದೆ. ಅಲ್ಲದೆ, ಬಿಜೆಪಿ ಬಿಎಲ್‌ಎ-2ಗಳು ಕೂಡ ನಮೂನೆ-7ರ ಮೂಲಕ ಆಕ್ಷೇಪಣೆ ಸಲ್ಲಿಸಲು ಮುಂದಾಗಿದ್ದಾರೆ ಎಂಬ ಮಾಹಿತಿಯೂ ಸಾರ್ವಜನಿಕರಲ್ಲಿ ಹರಿದಾಡಿತ್ತು.ಈ ಹಿನ್ನೆಲೆಯಲ್ಲಿ ಕೆಲವರು ಯಾವುದೇ ಅಧಿಕೃತ ಮಾಹಿತಿ ಖಚಿತಪಡಿಸಿಕೊಳ್ಳದೆ ತಹಸೀಲ್ದಾರ್ ಕಚೇರಿಗೆ ಏಕಾಏಕಿ ಆಗಮಿಸಿ ಅಧಿಕಾರಿಗಳಿಂದ ಸ್ಪಷ್ಟನೆ ಕೇಳಿದರು ಎಂದು ತಿಳಿದುಬಂದಿದೆ.

ಮತದಾರರು ತಮ್ಮ ಹೆಸರು ಮತದಾರರ ಪಟ್ಟಿಯಲ್ಲಿ ಇರುವುದನ್ನು ಪರಿಶೀಲಿಸಿಕೊಳ್ಳಬೇಕು. ಪಟ್ಟಿಗೆ ಸಂಬಂಧಿಸಿದ ಯಾವುದೇ ಆಕ್ಷೇಪಣೆ ಅಥವಾ ಅನುಮಾನಗಳಿದ್ದರೆ ನಿಗದಿತ ನಿಯಮ ಹಾಗೂ ಪ್ರಕ್ರಿಯೆಯಂತೆ ಅರ್ಜಿ ಸಲ್ಲಿಸಬೇಕು. ವದಂತಿಗಳಿಗೆ ಕಿವಿಗೊಡದೆ ಅಧಿಕೃತ ಮಾಹಿತಿಯನ್ನು ಮಾತ್ರ ಪರಿಗಣಿಸಬೇಕು ಎಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ.

73 ವರ್ಷದಿಂದ ಸಾಗುವಳಿ ಮಾಡ್ತಿರೋ ಭೂಮಿಯಲ್ಲಿ ಸೋಲಾರ್ ಘಟಕ ಆರಂಭಕ್ಕೆ ರೈತರ ವಿರೋಧ

Kannadaprabha News — Thu, 22 Oct 2026 08:54:58 +0530

ಹೊಸಪೇಟೆ: ತಾಲೂಕಿನ ಡಣಾಪುರ ಬಳಿ ಸೋಲಾರ್ ವಿದ್ಯುತ್ ಘಟಕ ಸ್ಥಾಪನೆಗೆ ಕರ್ನಾಟಕ ರಾಜ್ಯ ರೈತ ಸಂಘ ತೀವ್ರ ವಿರೋಧ ವ್ಯಕ್ತಪಡಿಸಿ ತಹಸೀಲ್ದಾರ್‌ ಕಚೇರಿ ಮುಂದೆ ಪ್ರತಿಭಟನೆ ನಡೆಸಿ ತಹಸೀಲ್ದಾರ್ ಶೃತಿ ಎಂ. ಮಳ್ಳಪ್ಪಗೌಡ್ರು ಅವರಿಗೆ ಮನವಿ ಸಲ್ಲಿಸಿದರು.

ಸರ್ಕಾರದಿಂದ ಸಿಗದ ಹಕ್ಕುಪತ್ರ

ಪ್ರತಿಭಟನಾ ಸಭೆ ಉದ್ದೇಶಿಸಿ ಕರ್ನಾಟಕ ರಾಜ್ಯ ರೈತ ಸಂಘದ ರಾಜ್ಯ ಸಂಘಟನಾ ಕಾರ್ಯದರ್ಶಿ ಬಿ.ಗೋಣಿಬಸಪ್ಪ ಮಾತನಾಡಿ, ತಾಲೂಕಿನ ಮರಿಯಮ್ಮನಹಳ್ಳಿ ಹೋಬಳಿಯ ಡಣಾಯಕನಕೆರೆ ಕಂದಾಯ ಗ್ರಾಮದ ವ್ಯಾಪ್ತಿಯಲ್ಲಿ ಕಳೆದ 73 ವರ್ಷಗಳಿಂದ ಸಾಗುವಳಿ ಮಾಡುತ್ತಿರುವ ರೈತರಿಗೆ ಈವರೆಗೆ ಸರ್ಕಾರ ಹಕ್ಕು ಪತ್ರ ನೀಡಿಲ್ಲ.

1959 ರಲ್ಲಿ ತುಂಗಭದ್ರಾ ಜಲಾಶಯ ನಿರ್ಮಾಣ ಸಂದರ್ಭದಲ್ಲಿ ಮುಳುಗಡೆಯಾದ ಪ್ರದೇಶಗಳ ನಿರಾಶ್ರಿತರಿಗೆ ಸರ್ಕಾರ ಪುನರ್ವಸತಿಗಾಗಿ ಈ ಪ್ರದೇಶದಲ್ಲಿ ಭೂಮಿ ನೀಡಿದೆ. ಆದರೆ ಸರ್ಕಾರದಿಂದ ನೀಡಲಾದ ಜಮೀನುಗಳಿಗೆ ಈವರೆಗೆ ಹಕ್ಕು ಪತ್ರ ನೀಡಿಲ್ಲ. ಈ ಕುರಿತಂತೆ ಈ ಭಾಗದ ರೈತರು ಹಲವಾರು ವರ್ಷಗಳಿಂದ ಹೋರಾಟ ನಡೆಸುತ್ತಾ ಬಂದಿದ್ದಾರೆ.

ಸೋಲಾರ್ ಘಟಕ ಆರಂಭಕ್ಕೆ ಪರವಾನಿಗೆ ನೀಡದಂತೆ ಒತ್ತಾಯ

ತಹಸೀಲ್ದಾರ, ಜಿಲ್ಲಾಧಿಕಾರಿ ಸೇರಿದಂತೆ ಜನಪ್ರತಿನಿಧಿಗಳಿಗೆ ಸರ್ಕಾರಕ್ಕೆ ಮನವಿಪತ್ರ ಸಲ್ಲಿಸಿದರೂ ರೈತರು ಸಾಗುವಳಿ ಮಾಡುತ್ತಿರುವ ಜಮೀನುಗಳಿಗೆ ಹಕ್ಕುಪತ್ರ ನೀಡಿರುವುದಿಲ್ಲ. ಆದರೆ ಇದೇ ಸಂದರ್ಭದಲ್ಲಿ ಖಾಸಗಿ ಕಂಪನಿಯವರು ಸೋಲಾರ್ ವಿದ್ಯುತ್ ಘಟಕ ಸ್ಥಾಪನೆಗೆ ಪರವಾನಗಿ ಕೋರಿ ಅರ್ಜಿ ಸಲ್ಲಿಸಿದ್ದು. ಜಿಲ್ಲಾಡಳಿತ ಯಾವುದೇ ಕಾರಣಕ್ಕೂ ಪರವಾನಗಿ ನೀಡಬಾರದು ಎಂದು ಒತ್ತಾಯಿಸಿದರು.

ಹೆದ್ದಾರಿ ತಡೆದು ಪ್ರತಿಭಟನೆ ನಡೆಸುವ ಎಚ್ಚರಿಕೆ

ತುಂಗಭದ್ರಾ ನಿರಾಶ್ರಿತರ ಜಮೀನುಗಳಿಗೆ ಹಕ್ಕುಪತ್ರ ನೀಡುವಂತೆ ಒತ್ತಾಯಿಸಿ ತಾಲೂಕಿನ ಡಣಾಪುರ ಬಳಿ ರಾಜ್ಯ ರೈತ ಸಂಘದ ನೇತೃತ್ವದಲ್ಲಿ ಹೆದ್ದಾರಿ ಬಂದ್ ಮಾಡಿ ಪ್ರತಿಭಟನೆ ನಡೆಸಲಾಗುವುದು. ಈ ಸಂದರ್ಭದಲ್ಲಿ ರೈತರಿಗೆ ತೊಂದರೆ ಆದರೆ ಅದಕ್ಕೆ ಜಿಲ್ಲಾಡಳಿತ ಹಾಗೂ ಸರ್ಕಾರವೇ ನೇರ ಹೊಣೆಯಾಗಲಿದೆ ಎಂದು ಎಚ್ಚರಿಸಿದರು.

ಈ ಸಂದರ್ಭದಲ್ಲಿ ಕರ್ನಾಟಕ ರಾಜ್ಯ ರೈತ ಸಂಘದ ತಾಲೂಕಾಧ್ಯಕ್ಷ ಗಂಟೆ ಸೋಮಶೇಖರ್, ಯಮುನೂರ, ರಾಜಬಕ್ಷಿ, ಹುಚ್ಚುಸಾಬ್, ಕನಕರಾಯ, ಹುಲುಗಪ್ಪ, ಉಮೇಶ, ಮಾರೆಪ್ಪ, ರಮೇಶ, ದಾದಾಪೀರ್, ನಾಗರಾಜ, ರಾಮಪ್ಪ ಸೇರಿದಂತೆ ಮತ್ತಿತರರು ಭಾಗವಹಿಸಿದ್ದರು.

ಇದನ್ನೂ ಓದಿ: ಆಲಮಟ್ಟಿಯಿಂದ ನಿತ್ಯ 27,500 ಕ್ಯುಸೆಕ್ ನೀರು ಬಿಡುಗಡೆ: ಇದರ ಹಿಂದಿನ ರಹಸ್ಯವೇನು ?

ಕನ್ನಡ ರಾಜ್ಯೋತ್ಸವ: ಕರ್ನಾಟಕದ ಹಿರಿಮೆ-ಗರಿಮೆ ಹೆಚ್ಚಿಸುವ, ನಾವು ಭೇಟಿ ನೀಡಲೇಬೇಕಾದ 10 ಐತಿಹಾಸಿಕ ಸ್ಥಳಗಳು

Santosh Naik — Sat, 31 Oct 2026 10:49:15 +0530

ಬೆಂಗಳೂರು (ಅ.31): ಕನ್ನಡ ನಾಡು ಕೇವಲ ಸಾಹಿತ್ಯ, ಕಲೆಗೆ ಮಾತ್ರವಲ್ಲದೆ ವಿಶ್ವದಲ್ಲೇ ಅಪರೂಪವೆನಿಸುವ ಭವ್ಯ ವಾಸ್ತುಶಿಲ್ಪ ಮತ್ತು ಇತಿಹಾಸಕ್ಕೆ ಹೆಸರುವಾಸಿಯಾಗಿದೆ: ಕದಂಬರು, ಗಂಗರು, ಚಾಲುಕ್ಯರು, ರಾಷ್ಟ್ರಕೂಟರು, ಹೊಯ್ಸಳರು, ವಿಜಯನಗರ ಸಾಮ್ರಾಜ್ಯ ಹಾಗೂ ಮೈಸೂರು ಒಡೆಯರ ಆಳ್ವಿಕೆಯಲ್ಲಿ ನಿರ್ಮಾಣಗೊಂಡ ಹಲವು ಶಿಲ್ಪಕಲಾ ಕಾವ್ಯಗಳು ಇಂದಿಗೂ ನಮಗೆ ಹೆಮ್ಮೆಯ ಸಂಕೇತವಾಗಿ ನಿಂತಿವೆ. ಕನ್ನಡಿಗರಷ್ಟೇ ಅಲ್ಲದೆ ಜಗತ್ತಿನಾದ್ಯಂತ ಜನರು ವೀಕ್ಷಿಸಲೇಬೇಕಾದ ಕರ್ನಾಟಕದ Top-10 ಐತಿಹಾಸಿಕ ತಾಣಗಳ ವಿವರ ಇಲ್ಲಿದೆ. ದೀಪಾವಳಿಯ ರಜಾ ಕಾಲದಲ್ಲಿ ನೀವು ಭೇಟಿ ನೀಡಲೇಬೇಕಾದ 10 ಐತಿಹಾಸಿಕ ಸ್ಥಳಗಳು ಇಲ್ಲಿವೆ.

ಹಂಪಿ (Hampi - ವಿಜಯನಗರ)

ವಿಜಯನಗರ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ ಹಂಪಿ 'ಯುನೆಸ್ಕೋ' (UNESCO) ವಿಶ್ವ ಪರಂಪರೆಯ ತಾಣವಾಗಿದೆ. ತುಂಗಭದ್ರಾ ನದಿಯ ದಂಡೆಯಲ್ಲಿರುವ ಈ ತಾಣದಲ್ಲಿನ ಕಲ್ಲಿನ ರಥ, ವಿರೂಪಾಕ್ಷ ದೇವಾಲಯ, ವಿಜಯ ವಿಠ್ಠಲ ದೇವಾಲಯದ ಸಂಗೀತ ಕಂಬಗಳು ಹಾಗೂ ಉಗ್ರ ನರಸಿಂಹ ಮೂರ್ತಿಗಳು ವಿಜಯನಗರ ಶೈಲಿಯ ಸುಂದರ ವಾಸ್ತುಶಿಲ್ಪಕ್ಕೆ ಸಾಕ್ಷಿಯಾಗಿವೆ.

ಮೈಸೂರು ಅರಮನೆ (Mysore Palace - ಮೈಸೂರು)

ಮೈಸೂರು ಸಂಸ್ಥಾನದ ಯದುವಂಶದ ಒಡೆಯರ ವೈಭವವನ್ನು ಸಾರುವ ಮೈಸೂರು ಅರಮನೆ ಭಾರತದಲ್ಲೇ ಅತ್ಯಂತ ಹೆಚ್ಚು ಪ್ರವಾಸಿಗರು ಭೇಟಿ ನೀಡುವ ತಾಣಗಳಲ್ಲಿ ಒಂದಾಗಿದೆ. ಇಂಡೋ-ಸಾರ್ಸೆನಿಕ್ ಶೈಲಿಯಲ್ಲಿ ನಿರ್ಮಾಣಗೊಂಡಿರುವ ಈ ಅರಮನೆಯು ದಸರಾ ಮಹೋತ್ಸವದ ಸಮಯದಲ್ಲಿ ಲಕ್ಷಾಂತರ ದೀಪಗಳಿಂದ ಕಂಗೊಳಿಸುತ್ತದೆ.

ಬೇಲೂರು ಮತ್ತು ಹಳೇಬೀಡು (Belur & Halebidu - ಹಾಸನ)

ಹೊಯ್ಸಳ ರಾಜವಂಶದ ಕಲಾತ್ಮಕ ಶಿಲ್ಪಕಲೆಗೆ ಸಾಕ್ಷಿ ಪ್ರಜ್ಞೆಯಂತಿರುವ ಬೇಲೂರಿನ ಚನ್ನಕೇಶವ ದೇವಾಲಯ ಹಾಗೂ ಹಳೇಬೀಡಿನ ಹೊಯ್ಸಳೇಶ್ವರ ದೇವಾಲಯ ಇತ್ತೀಚೆಗೆ 'ಯುನೆಸ್ಕೋ' ವಿಶ್ವ ಪರಂಪರೆಯ ಪಟ್ಟಿಗೆ ಸೇರ್ಪಡೆಯಾಗಿವೆ. ನಕ್ಷತ್ರಾಕಾರದ ಜಗಲಿಗಳು ಹಾಗೂ ಕಲ್ಲಿನಲ್ಲಿ ಕೆತ್ತಲಾದ ಮದನಿಕೆ ವಿಗ್ರಹಗಳು ಪ್ರವಾಸಿಗರನ್ನು ಮೂಕವಿಸ್ಮಿತರನ್ನಾಗಿಸುತ್ತವೆ.

ಬಾದಾಮಿ, ಐಹೊಳೆ ಮತ್ತು ಪಟ್ಟದಕಲ್ಲು (Badami, Aihole & Pattadakal - ಬಾಗಲಕೋಟೆ)

ಬಾದಾಮಿ ಚಾಲುಕ್ಯರ ಸಾಮ್ರಾಜ್ಯದ ರಾಜಧಾನಿಯಾಗಿದ್ದ ಬಾದಾಮಿಯ ಗುಹಾಂತರ ದೇವಾಲಯಗಳು (Cave Temples) ವಿಶ್ವಪ್ರಸಿದ್ಧ. ಭಾರತೀಯ ದೇವಾಲಯ ವಾಸ್ತುಶಿಲ್ಪದ ತೊಟ್ಟಿಲು ಎಂದೇ ಕರೆಯಲ್ಪಡುವ ಐಹೊಳೆ ಹಾಗೂ ಯುನೆಸ್ಕೋ ಪಟ್ಟಿಯಲ್ಲಿರುವ ಪಟ್ಟದಕಲ್ಲಿನ ಮಲ್ಲಿಕಾರ್ಜುನ ಮತ್ತು ವಿರೂಪಾಕ್ಷ ದೇವಾಲಯಗಳು ಶಿಲ್ಪಕಲೆಯ ಅದ್ಭುತಗಳಾಗಿವೆ.

ಗೋಲ್ ಗುಂಬಜ್ (Gol Gumbaz - ವಿಜಯಪುರ)

ಆದಿಲ್ ಶಾಹಿ ರಾಜವಂಶದ ಮೊಹಮ್ಮದ್ ಆದಿಲ್ ಶಾ ಸಮಾಧಿ ಸ್ಥಳವಾದ ವಿಜಯಪುರದ ಗೋಲ್ ಗುಂಬಜ್, ಜಗತ್ತಿನ ಎರಡನೇ ಅತಿ ದೊಡ್ಡ ಆಸರೆಯಿಲ್ಲದ ಗಮ್ಮಟ (Dome) ಹೊಂದಿದೆ. ಇಲ್ಲಿರುವ 'ಪಿಸುಮಾತಿನ ಗ್ಯಾಲರಿ'ಯಲ್ಲಿ (Whispering Gallery) ಸಣ್ಣ ಶಬ್ದ ಮಾಡಿದರೂ ಅದು ಏಳು ಬಾರಿ ಪ್ರತಿಧ್ವನಿಸುವುದು ಇದರ ವಿಶೇಷ.

ಶ್ರವಣಬೆಳಗೊಳ (Shravanabelagola - ಹಾಸನ)

ವಿಶ್ವದ ಅತ್ಯಂತ ಎತ್ತರದ ಏಕಶಿಲಾ ವಿಗ್ರಹಗಳಲ್ಲಿ ಒಂದಾದ ಗೊಮ್ಮಟೇಶ್ವರನ 57 ಅಡಿ ಎತ್ತರದ ಮೂರ್ತಿ ಶ್ರವಣಬೆಳಗೊಳದ ವಿಂಧ್ಯಗಿರಿ ಬೆಟ್ಟದಲ್ಲಿದೆ. ಗಂಗರ ದಂಡನಾಯಕ ಚಾವುಂಡರಾಯ ನಿರ್ಮಿಸಿದ ಈ ಜೈನ ಪುಣ್ಯಕ್ಷೇತ್ರದಲ್ಲಿ 12 ವರ್ಷಗಳಿಗೊಮ್ಮೆ ನಡೆಯುವ ಮಹಾಮಸ್ತಕಾಭಿಷೇಕ ಜಾಗತಿಕ ಗಮನ ಸೆಳೆಯುತ್ತದೆ.

ಚಿತ್ರದುರ್ಗದ ಕೋಟೆ (Chitradurga Fort - ಚಿತ್ರದುರ್ಗ)

'ಏಳು ಸುತ್ತಿನ ಕೋಟೆ' ಎಂದೇ ಖ್ಯಾತವಾಗಿರುವ ಚಿತ್ರದುರ್ಗದ ರಕ್ಷಣೆ ಮತ್ತು ಆಡಳಿತ ವೈಭವ ಭಾರತೀಯ ಕೋಟೆ ನಿರ್ಮಾಣ ಕಲೆಗೆ ಮಾದರಿಯಾಗಿದೆ. ಪಾಳೆಗಾರರ ಆಳ್ವಿಕೆ, ಒನಕೆ ಓಬವ್ವಳ ಶೌರ್ಯದ ಕಥೆಗಳು ಹಾಗೂ ಕೋಟೆಯ ಒಳಗಿರುವ ಹೈದರಾಲಿ ಗರಡಿ, ಎಣ್ಣೆ ಕೊಳಗಳು ಮತ್ತು ದೇವಾಲಯಗಳು ರೋಚಕ ಇತಿಹಾಸವನ್ನು ಬಿಚ್ಚಿಡುತ್ತವೆ.

ಬೀದರ್‌ ಕೋಟೆ (Bidar Fort - ಬೀದರ್‌)

ಬಹುಮನಿ ಸುಲ್ತಾನರ ರಾಜಧಾನಿಯಾಗಿದ್ದ ಬೀದರ್‌ ಕೋಟೆಯು ಪರ್ಷಿಯನ್ ಹಾಗೂ ಇಸ್ಲಾಮಿಕ್ ವಾಸ್ತುಶಿಲ್ಪದ ಅಪರೂಪದ ಸಮ್ಮಿಲನವಾಗಿದೆ. ರಂಗೀನ್ ಮಹಲ್, ತಖ್ತ್‌ ಮಹಲ್, ಮಹಮೂದ್ ಗವಾನ್ ಮದರಸಾ ಹಾಗೂ ಜಲ ನಿರ್ವಹಣೆಯ 'ಕರೇಜ್ ಸಿಸ್ಟಮ್' (Karez Water System) ಬೀದರ್‌ ಕೋಟೆಯ ವೈಶಿಷ್ಟ್ಯಗಳಾಗಿವೆ.

ಬನವಾಸಿ (Banavasi - ಉತ್ತರ ಕನ್ನಡ)

ಬನವಾಸಿಯು ಕನ್ನಡದ ಪ್ರಥಮ ರಾಜವಂಶವಾದ ಕದಂಬರ ರಾಜಧಾನಿಯಾಗಿತ್ತು. ವರದಾ ನದಿಯ ದಂಡೆಯಲ್ಲಿರುವ ಇಲ್ಲಿನ ಮಧುಕೇಶ್ವರ ದೇವಾಲಯವು ಪ್ರಾಚೀನ ಕನ್ನಡ ಕಲೆ ಮತ್ತು ಸಂಸ್ಕೃತಿಗೆ ದ್ಯೋತಕವಾಗಿದೆ.

ಶ್ರೀರಂಗಪಟ್ಟಣ (Srirangapatna - ಮಂಡ್ಯ)

ಕಾವೇರಿ ನದಿಯಿಂದ ಸುತ್ತುವರಿಯಲ್ಪಟ್ಟ ನಗರವಾದ ಶ್ರೀರಂಗಪಟ್ಟಣವು ವಿಜಯನಗರ ಮಂಡಲೇಶ್ವರ ಮತ್ತು ಮೈಸೂರು ಹುಲಿ ಟಿಪ್ಪು ಸುಲ್ತಾನ್‌ನ ರಾಜಧಾನಿಯಾಗಿತ್ತು. ರಂಗನಾಥಸ್ವಾಮಿ ದೇವಾಲಯ, ಟಿಪ್ಪುವಿನ ಬೇಸಿಗೆ ಅರಮನೆ (ದರಿಯಾ ದೌಲತ್ ಬಾಗ್), ಗುಂಬಜ್ ಹಾಗೂ ಐತಿಹಾಸಿಕ ಕೋಟೆಗಳು ಶ್ರೀರಂಗಪಟ್ಟಣದ ಪ್ರಮುಖ ಆಕರ್ಷಣೆಗಳಾಗಿವೆ.

ಬರಗಾಲದಲ್ಲಿ ಜೀವಸೆಲೆಯಾದ ಸಿಂಗಟಾಲೂರು ಏತ ನೀರಾವರಿ ಯೋಜನೆ; 10 ಕೆರೆಗಳಿಗೆ ನೀರು!

Kannadaprabha News — Sun, 18 Oct 2026 08:13:22 +0530

ಚಂದ್ರು ಕೊಂಚಿಗೇರಿ

ಕನ್ನಡಪ್ರಭ ವಾರ್ತೆ ಹೂವಿನಹಡಗಲಿ

ಬರಗಾಲದಂತಹ ಪರಿಸ್ಥಿತಿ ಎದುರಿಸುತ್ತಿರುವ ರೈತರಿಗೆ ಸಿಂಗಟಾಲೂರು ಏತ ನೀರಾವರಿ ಯೋಜನೆ ಆಸರೆಯಾಗಿದೆ. ಕೆರೆಗಳಿಗೆ ನೀರು ತುಂಬಿಸಲು ಅಧಿಕಾರಿಗಳು ಹರಸಾಹಸ ಪಡುತ್ತಿದ್ದಾರೆ.

ಮಳೆ ಇಲ್ಲದೇ ಒಣಗುತ್ತಿದ್ದ ಬೆಳೆಗಳಿಗೆ ಯೋಜನೆಯ ಅಚ್ಚುಕಟ್ಟು ಪ್ರದೇಶ ವ್ಯಾಪ್ತಿಯ ರೈತರು ನೀರುಣಿಸುವ ಕಾರ್ಯ ನಿರಂತರವಾಗಿದೆ. ಜತೆಗೆ ಕೆಲ ಕೆರೆ ಹೊರತು ಪಡಿಸಿ ಉಳಿದೆಲ್ಲ ಕೆರೆಯಂಗಳದಲ್ಲಿ ತುಂಭದ್ರೆಯ ನೀರು ತುಂಬಿಕೊಂಡಿದೆ. ಇದರಿಂದ ಜನ ಜಾನುವಾರುಗಳ ನೀರಿನ ದಾಹ ಇಂಗಿಸಿದೆ.

10 ಕೆರೆಗಳಿಗೆ ನೀರು ತುಂಬಿಸುವ ಯೋಜನೆ

ತಾಲೂಕಿನ ಮಾಗಳ ಬಳಿಯ 10 ಕೆರೆಗಳಿಗೆ ನೀರು ತುಂಬಿಸುವ ಯೋಜನೆಯಿಂದ ಅರಳಿಹಳ್ಳಿ, ಹಿರೇಹಡಗಲಿ, ಹಗರನೂರು, ಮಾನ್ಯರ ಮಸಲವಾಡ, ಕಗ್ಗಲಗಟ್ಟಿ ತಾಂಡಾ, ಮುದೇನೂರು, ದೇವಗೊಂಡನಹಳ್ಳಿ, ನಾಗತಿ ಬಸಾಪುರ ಸೇರಿದಂತೆ ಇತರೆ ಕೆರೆಗಳಲ್ಲಿ ಶೇ. 40 ರಿಂದ 50 ರಷ್ಟು ನೀರು ಸಂಗ್ರಹವಾಗಿದೆ.

ಶಾಕಾರ ಬಳಿ ಇರುವ ಕೆರೆಗಳಿಗೆ ನೀರು ತುಂಬಿಸುವ ಯೋಜನೆಯ ಜಾಕ್ವೆಲ್‌ನಿಂದ ದಾಸನಹಳ್ಳಿ, ಹ್ಯಾರಡ ಗ್ರಾಮದ ಹಳೆ ಮಲಿಯಮ್ಮನ ಕೆರೆ, ಹೊಸ ಮಲಿಯಮ್ಮನ ಕೆರೆಗಳಿಗೆ ನಿರಂತರ ನೀರು ಹರಿಸಲಾಗುತ್ತಿದೆ. ಸಂಪೂರ್ಣ ತುಂಬುವ ಹಂತಕ್ಕೆ ಬಂದಿಲ್ಲ, ಆದರೆ ಬಿಸಿಲಿನ ತಾಪದಲ್ಲಿ ನೀರಿನ ದಾಹ ತಣಿಸುವಷ್ಟು ಮಾತ್ರ ನೀರು ಸಂಗ್ರಹವಾಗಿದೆ.

ಉಳಿದಂತೆ ತಳಕಲ್ಲು, ಹಿರೇಮಲ್ಲನಕೆರೆ, ಬನ್ನಿಕಲ್ಲು ಕೆರೆಗಳಿಗೆ ನೀರು ತುಂಬಿಸಲು ಸಾಧ್ಯವಾಗಿಲ್ಲ. ಪೈಪ್‌ಲೈನ್‌ ದುರಸ್ತಿ, ಪಂಪ್‌ ಮೋಟಾರ್‌ ದುರಸ್ತಿ ಹೀಗೆ ಹತ್ತಾರು ಅಡೆತಡೆ ಎದುರಾಗಿವೆ. ಜತೆಗೆ ಪ್ರತಿಯೊಂದು ಕೆರೆಯ ಪೈಪ್‌ಲೈನ್‌ಗೆ ಅಳವಡಿಸಿದ ಎರ್‌ವಾಲ್‌ಗಳನ್ನು ಕಿತ್ತು ಹಾಕಿರುವ ರೈತರು, ಬರದಲ್ಲಿಯೂ ಕೆರೆಯ ನೀರಿಗೆ ಕನ್ನ ಹಾಕಿ ಹತ್ತಾರು ಪೈಪ್‌ ಅಳವಡಿಸಿ ತಮ್ಮ ಬೆಳೆಗಳಿಗೆ ನೀರುಣಿಸುತ್ತಿದ್ದಾರೆ. ಇದರಿಂದ ಕೆರೆಗಳಿಗೆ ನೀರು ಹರಿಸಲು ಸಿಕ್ಕಾಪಟ್ಟೆ ತೊಂದರೆ ಉಂಟಾಗುತ್ತಿದೆ. ಪೈಪ್‌ಲೈನ್‌ ನೀರು ಸಾಕಷ್ಟು ಕಡೆಗಳಲ್ಲಿ ಪೋಲಾಗುತ್ತಿದೆ. ಇದರಿಂದ ಕೆರೆಗಳಿಗೆ ನೀರು ಹರಿಸಲು ಸಾಧ್ಯವಾಗುತ್ತಿಲ್ಲ.

ಹೆಚ್ಚುವರಿ ಪಂಪ್‌ ಮೋಟಾರ್‌ ವ್ಯವಸ್ಥೆ ಕೊರತೆ

ಕೆರೆ ತುಂಬಿಸುವ ಯೋಜನೆಗಳಿಗೆ ಹೆಚ್ಚುವರಿ ಪಂಪ್‌ ಮೋಟಾರ್‌ ವ್ಯವಸ್ಥೆ ಇಲ್ಲ, ಪ್ರತ್ಯೇಕ ವಿದ್ಯುತ್‌ ಲೈನ್‌ಗಳಿಲ್ಲ, ಕಿತ್ತು ಹೋದ ಕಾಲುವೆ ದುರಸ್ತಿಗಳಿಗೆ ಅನುದಾನ ನೀಡಿಲ್ಲ, ಅನೇಕ ಕಡೆಗಳಲ್ಲಿ ಕೆರೆ ತುಂಬಿಸುವ ಯೋಜನೆಯ ಪೈಪ್‌ಲೈನ್‌ ಸಂಪೂರ್ಣ ಕಳಪೆಯಾಗಿದ್ದು ನೀರು ಪೂರೈಕೆ ವೇಳೆ ಕಿತ್ತು ಹೋಗುತ್ತಿವೆ. ಆ ಸಂದರ್ಭದಲ್ಲಿ ರೈತರ ಬೆಳೆಗಳು ಹಾನಿಯಾಗುತ್ತಿದೆ. ಇಂತಹ ಹತ್ತಾರು ಸಮಸ್ಯೆಗಳ ಮಧ್ಯೆ ಕೆರೆ ತುಂಬಿಸುವ ಯೋಜನೆ ಮತ್ತು ಸಿಂಗಟಾಲೂರು ಏತ ನೀರಾವರಿ ಯೋಜನೆ ನಲುಗಿ ಹೋಗಿದೆ.

ಕೆರೆ ತುಂಬಿಸುವ ಯೋಜನೆ ಪೈಪ್‌ಗಳ ಎರ್‌ವಾಲ್‌ ಕಿತ್ತು ಹಾಕಿ,ರೈತರು ಅಕ್ರಮವಾಗಿ ಪೈಪ್‌ಗಳನ್ನು ಜೋಡಿಸಿಕೊಂಡು ಬೆಳೆಗಳಿಗೆ ನೀರುಣಿಸುತ್ತಿದ್ದಾರೆ. ಇದರಿಂದ ಕೆರೆಗಳಿಗೆ ಹೋಗುವ ನೀರು ಮಾರ್ಗ ಮಧ್ಯೆದಲ್ಲೇ ಸಾಕಷ್ಟು ಪೋಲಾಗುತ್ತಿದೆ. ಸರ್ಕಾರದ ನಿರ್ದೇಶನದಂತೆ ಕೆರೆಗಳಿಗೆ ನೀರು ಹರಿಸುತ್ತಿದ್ದೇವೆ.

ಯು.ಎಚ್‌.ರಾಘವೇಂದ್ರ, ಎಇಇ, ಸಿಂಗಟಾಲೂರು ಏತ ನೀರಾವರಿ ಯೋಜನೆ ಹೂವಿನಹಡಗಲಿ.

ಬರದಲ್ಲಿ ಕೆರೆಗಳಿಗೆ ನೀರು ಹರಿಸಿದ್ದು, ಸುತ್ತಮುತ್ತಲಿನ ರೈತರ ಕೊಳವೆ ಬಾವಿಗಳಲ್ಲಿ, ಬತ್ತಿ ಹೋಗಿದ್ದ ಅಂತರ್ಜಲಕ್ಕೆ ಮರು ಜೀವ ಬಂದಿದೆ. ನೀರಿಗಾಗಿ ಅಲೆಯುತ್ತಿದ್ದ ಜನ ಜಾನುವಾರುಗಳಿಗೆ ಕೆರೆಯ ನೀರು ಆಸರೆಯಾಗಿದೆ. ಸರ್ಕಾರ ಕೆರೆ ತುಂಬಿಸುವ ಯೋಜನೆಗೆ ಹೆಚ್ಚು ಅನುದಾನ ನೀಡಿದರೆ ಕೆರೆಗಳಲ್ಲಿ ನಿರಂತರವಾಗಿ ನೀರು ಸಂಗ್ರಹವಾಗಲು ಸಾಧ್ಯ.

ಹರವಿ ಪ್ರಕಾಶ, ಹ್ಯಾರಡ ಗ್ರಾಮಸ್ಥರು

ಇದನ್ನೂ ಓದಿ: ಹೂವಿನಹಡಗಲಿ ಮೇವು-ನೀರಿಲ್ಲದೆ ಕಂಗಾಲಾದ ರೈತ: ಜಾನುವಾರು ಮಾರಾಟಕ್ಕೆ ಹೋದ್ರೂ ಖರೀದಿ ಮಾಡೋರೇ ಇಲ್ಲ

ಈ ಜಿಲ್ಲೆಯಲ್ಲಿ ಮಳೆಗಾಲದಲ್ಲೇ ಬೇಸಿಗೆಯ ಅನುಭವ: ಬಿಸಿಲಿನ ಝಳಕ್ಕೆ ಜನ, ಪ್ರವಾಸಿಗರು ಕಂಗಾಲು

Govindaraj S — Sun, 11 Oct 2026 20:24:14 +0530

ಹೊಸಪೇಟೆ (ಅ.11): ಮಳೆಗಾಲ ಇನ್ನೂ ಸಂಪೂರ್ಣವಾಗಿ ಮುಗಿದಿಲ್ಲ. ಆದರೆ ವಿಜಯನಗರ ಜಿಲ್ಲೆಯಲ್ಲಿ ವಿಪರೀತ ಬಿಸಿಲಿನ ಆರ್ಭಟ ಹೆಚ್ಚಾಗಿದೆ. ಮಳೆಗಾಲದಲ್ಲೇ ಬೇಸಿಗೆಯ ಅನುಭವವಾಗುತ್ತಿದೆ. ಬೆಳಗ್ಗೆಯಿಂದಲೇ ಬಿಸಿಲಿನ ತೀವ್ರತೆ ಕಾಣಿಸಿಕೊಳ್ಳುತ್ತಿದೆ. ಮಧ್ಯಾಹ್ನದ ವೇಳೆಗೆ ಬಿಸಿಲಿನ ಕಾವು ಮತ್ತಷ್ಟು ಏರಿಕೆಯಾಗುತ್ತಿದೆ. ಬಿಸಿಲಿನ ಝಳಕ್ಕೆ ಕಂಗಾಲಾಗಿದ್ದಾರೆ. ಜಿಲ್ಲೆಯ ಆರು ತಾಲೂಕುಗಳಲ್ಲೂ ಕಳೆದ ಕೆಲ ದಿನಗಳಿಂದ ಮಳೆಯ ಪ್ರಮಾಣ ಕಡಿಮೆಯಾಗಿದ್ದು, ಒಣಹವೆ ಮುಂದುವರಿದಿದೆ.

ಬೆಳಗ್ಗೆ ಹಾಗೂ ಸಂಜೆ ತುಸು ತಂಪಾದ ವಾತಾವರಣ ಕಂಡುಬಂದರೂ ಮಧ್ಯಾಹ್ನದ ವೇಳೆಯಲ್ಲಿ ಬಿಸಿಲಿನ ತಾಪ ಜನರನ್ನು ಹೈರಾಣಾಗಿಸಿದೆ. ಜಿಲ್ಲಾ ಕೇಂದ್ರ ಹೊಸಪೇಟೆಯಲ್ಲಿ ಬೆಳಗ್ಗೆಯಿಂದಲೇ ಬಿಸಿಲಿನ ತೀವ್ರತೆ ಕಾಣಿಸಿಕೊಳ್ಳುತ್ತಿದೆ. ನಗರದ ಪ್ರಮುಖ ರಸ್ತೆಗಳು, ಮಾರುಕಟ್ಟೆ ಪ್ರದೇಶ ಹಾಗೂ ಬಸ್ ನಿಲ್ದಾಣದ ಸೇರಿದಂತೆ ನಗರದ ಪ್ರಮುಖ ವೃತ್ತಗಳ ಸುತ್ತಮುತ್ತ ಮಧ್ಯಾಹ್ನದ ವೇಳೆ ಜನಸಂಚಾರ ಕಡಿಮೆಯಾಗುತ್ತಿರುವುದು ಕಂಡುಬರುತ್ತಿದೆ. ಜನ ಸಾಮಾನ್ಯರು, ಪಾದಚಾರಿಗಳು ಬಿಸಿಲಿನಿಂದ ರಕ್ಷಿಸಿಕೊಳ್ಳಲು ಟೋಪಿ, ಛತ್ರಿ ಹಾಗೂ ನೆರಳಿನ ಮೊರೆ ಹೋಗುತ್ತಿದ್ದಾರೆ.

ವಿಶ್ವವಿಖ್ಯಾತ ಹಂಪಿ ಪ್ರವಾಸಕ್ಕೂ ಬಿಸಿಲಿನ ಪರಿಣಾಮ ಕಂಡುಬರುತ್ತಿದೆ. ಹಂಪಿಯ ಸ್ಮಾರಕಗಳನ್ನು ವೀಕ್ಷಿಸಲು ದೇಶ-ವಿದೇಶದಿಂದ ಆಗಮಿಸುವ ಪ್ರವಾಸಿಗರು ರಜಾ ದಿನಗಳಲ್ಲಿ ಅಧಿಕ ಸಂಖ್ಯೆಯಲ್ಲಿ ಕಂಡು ಬರುತ್ತಿದ್ದರು. ಆದರೆ ಮಳೆಗಾಲದಲ್ಲೇ ವಿಪರೀತ ಬಿಸಿಲಿನ ತಾಪ ಹೆಚ್ಚಾಗಿರುವುದರಿಂದ ಭಾನುವಾರ ಹಂಪಿಯಲ್ಲಿ ಕಡಿಮೆ ಸಂಖ್ಯೆಯಲ್ಲಿ ಪ್ರವಾಸಿಗರು ಕಂಡು ಬಂದರು.

ಕಡಿಮೆ ಸಂಖ್ಯೆಯಲ್ಲಿ ಪ್ರವಾಸಿಗರು

ಸಾಮಾನ್ಯವಾಗಿ ಮಾರ್ಚ್, ಏಪ್ರಿಲ್ ತಿಂಗಳಲ್ಲಿ ಕಾಣಿಸಿಕೊಳ್ಳುವಂತಹ ಬಿಸಿಲಿನ ಅನುಭವ ಅಕ್ಟೋಬರ್‌ ತಿಂಗಳಲ್ಲಿ ಕಂಡು ಬರುತ್ತಿರುವುದರಿಂದ ಸಾರ್ವಜನಿಕರಲ್ಲಿ ಅಚ್ಚರಿ ಮೂಡಿಸಿದೆ ಅಕ್ಟೋಬರ್‌ನಲ್ಲಿ ಶಾಲೆಗಳಿಗೆ ರಜೆ ಇರುವುದರಿಂದ ಪ್ರವಾಸಿಗರು ಹಂಪಿಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕಂಡು ಬರಬೇಕಾಗಿತ್ತು. ಭಾನುವಾರ ಸೇರಿದಂತೆ ರಜಾ ದಿನಗಳಲ್ಲಿ ಹಂಪಿಯಲ್ಲಿ ಪ್ರವಾಸಿಗರು ಯಾವಾಗಲೂ ಹೆಚ್ಚಿನ ಸಂಖ್ಯೆಯಲ್ಲಿ ಕಂಡು ಬರುತ್ತಿದ್ದರು. ಆದರೆ ಭಾನುವಾರ ವಿಪರೀತ ಬಿಸಿಲಿನ ಕಾರಣ ಹಂಪಿಯಲ್ಲಿ ಪ್ರವಾಸಿಗರು ಕಡಿಮೆ ಸಂಖ್ಯೆಯಲ್ಲಿ ಕಂಡು ಬಂದರು.

ಹಂಪಿಯಲ್ಲಿ ಹೆಚ್ಚಿನ ಸಂಖ್ಯೆಯ ಪ್ರವಾಸಿಗರು ಬಿಸಿಲಿನ ತಾಪ ತಾಳಲಾರದೆ ತೆಲೆಗೆ ಟೋಪಿ ಧರಿಸಿಕೊಂಡು, ಕೆಲವರು ಛತ್ರಿ ಹಿಡಿದು ಸ್ಮಾರಕಗಳನ್ನು ವೀಕ್ಷಿಸಿದರು. ಪ್ರವಾಸಿಗರ ಸಂಖ್ಯೆ ಕಡಿಮೆ ಕಾರಣ ಪ್ರವಾಸಿ ಮಾರ್ಗದರ್ಶಿಗಳು ಸಹ ಖಾಲಿಯಾಗಿ ಸ್ಮಾರಕಗಳ ಬಳಿ ಕುಳಿತುಕೊಂಡಿದ್ದರು. ಮಳೆಗಾಲದ ಅಂತಿಮ ಹಂತದಲ್ಲೂ ಮಳೆಯ ಕೊರತೆ ಎದುರಾಗಿದ್ದು, ರೈತರು ಮಳೆಯನ್ನೇ ನಂಬಿ ಕೃಷಿ ಚಟುವಟಿಕೆಗಳ ಮೇಲೆ ಅವಲಂಭಿತರಾಗಿದ್ದರು.

ಮಳೆ ಬಾರದೇ ವಿಪರೀತ ಬಿಸಿಲು ಇರುವದರಿಂದ ಜನರು ಪರದಾಡುತ್ತಿದ್ದಾರೆ. ಅಕ್ಟೊಬರ್, ನವಂಬರ್ ತಿಂಗಳಲ್ಲಿಯಾದರೂ ಉತ್ತಮ ಮಳೆ ಬರಬಹುದೇ ಎಂದು ನಿರೀಕ್ಷೆಯಲ್ಲಿ ರೈತರು ಇದ್ದಾರೆ. ಹೊಸಪೇಟೆ, ಕೂಡ್ಲಿಗಿ, ಕೊಟ್ಟೂರು, ಹಗರಿಬೊಮ್ಮನಹಳ್ಳಿ ಹಾಗೂ ಹಡಗಲಿ, ಹರಪನಹಳ್ಳಿ ತಾಲೂಕುಗಳಲ್ಲಿ ಬಿಸಿಲಿನ ತೀವ್ರತೆ ಮತ್ತು ಮಳೆಯ ಕೊರತೆಯ ಪರಿಸ್ಥಿತಿ ಹೀಗೇ ಮುಂದುವರಿದರೆ ಕೃಷಿ ಹಾಗೂ ಗ್ರಾಮೀಣ ಜನಜೀವನದ ಮೇಲೂ ಭೀಕರ ಪರಿಣಾಮ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.

ರಾಜ್ಯದಲ್ಲಿ ಮರೆಯಾದ ಲಾಳಗೊಂಡ ಸಮುದಾಯದ ಇತಿಹಾಸ: ಬಯಲಾಟದ ಮೂಲಕ ಸಂಶೋಧನೆಗೆ ಹಂಪಿ ವಿವಿಗೆ ಮನವಿ

Sathish Kumar KH — Tue, 03 Nov 2026 07:45:06 +0530

ಬಳ್ಳಾರಿ (ನ.03): ಲಾಳಗೊಂಡ ಸಮುದಾಯದ ಐತಿಹಾಸಿಕ ಹಿನ್ನೆಲೆ, ಸಾಂಸ್ಕೃತಿಕ ಪರಂಪರೆ ಹಾಗೂ ಪೂರ್ವಜರ ಜೀವನಗಾಥೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವ ನಿಟ್ಟಿನಲ್ಲಿ ಕುರುಗೋಡು ನೀಲಮ್ಮ, ಲಾಳಗೊಂಡೇಶ್ವರ ಹಾಗೂ ಬೊಮ್ಮಗೊಂಡೇಶ್ವರರ ಕಥಾವಸ್ತುವನ್ನು ಆಧರಿಸಿ ಬಯಲಾಟಗಳನ್ನು ಪ್ರದರ್ಶಿಸುವ ಮೂಲಕ ಸಮುದಾಯದ ಇತಿಹಾಸವನ್ನು ಸಂರಕ್ಷಿಸಬೇಕು ಎಂದು ಹಂಪಿ ಕನ್ನಡ ವಿಶ್ವವಿದ್ಯಾಲಯದ ನಿವೃತ್ತ ಪ್ರಾಧ್ಯಾಪಕ ಡಾ.ಕೆ.ಎಂ.ಮೇತ್ರಿ ಹೇಳಿದರು.

ಗ್ರಾಮದ ಮಹಾಂತೇಶ ಕಲ್ಯಾಣ ಮಂಟಪದಲ್ಲಿ ನಡೆದ ಲಾಳಗೊಂಡ ಸಮಾಜದ ಸಂಘದ ಉದ್ಘಾಟನೆ, ಲಾಂಛನ ಹಾಗೂ ಕಿರುಹೊತ್ತಿಗೆ ಬಿಡುಗಡೆ ಸಮಾರಂಭದಲ್ಲಿ ಉಪನ್ಯಾಸ ನೀಡಿ ಮಾತನಾಡಿದರು.

ಟಿಪ್ಪು ಸುಲ್ತಾನ ಹಾಗೂ ಆನೆಗುಂದಿ ಅರಸರ ಕಾಲಘಟ್ಟದಲ್ಲಿ ಸುರಕ್ಷತೆಯ ದೃಷ್ಟಿಯಿಂದ ಕುರುಗೋಡಿನ ನೀಲಮ್ಮ ತಮ್ಮ ಸಮುದಾಯದವರೊಂದಿಗೆ ದಾವಣಗೆರೆ ಕಡೆಗೆ ಪ್ರಯಾಣ ಬೆಳೆಸಿದ ಐತಿಹಾಸಿಕ ಕಥನಗಳಿವೆ. ಕುರುಗೋಡು, ಸಿಂಧಿಗೇರಿ ಸೇರಿದಂತೆ ರಾಜ್ಯದ ವಿವಿಧೆಡೆ ನೀಲಮ್ಮನ ಹೆಸರಿನಲ್ಲಿ ಸುಮಾರು 800 ಮಠಗಳಿವೆ. ಮಹಿಳೆಯೊಬ್ಬರ ಹೆಸರಿನಲ್ಲಿ ಇಷ್ಟೊಂದು ಸಂಖ್ಯೆಯ ಮಠಗಳು ಇರುವುದು ವಿಶೇಷವಾಗಿದೆ ಎಂದು ವಿವರಿಸಿದರು.

ಕೇದಾರಮಠದ ಚರಿತ್ರೆಯಲ್ಲಿಯೂ ಲಾಳಗೊಂಡೇಶ್ವರರ ಉಲ್ಲೇಖ

ಕೇದಾರಮಠದ ಚರಿತ್ರೆಯಲ್ಲಿಯೂ ಲಾಳಗೊಂಡೇಶ್ವರರ ಉಲ್ಲೇಖವಿದ್ದು, ಅವರು ತಮ್ಮ ಸಮುದಾಯದ ಜನರನ್ನು ದಕ್ಷಿಣ ಭಾರತಕ್ಕೆ ಕರೆತಂದರು ಎಂಬ ಐತಿಹಾಸಿಕ ಕಥನ ಪ್ರಚಲಿತದಲ್ಲಿದೆ. ಇಂತಹ ಐತಿಹಾಸಿಕ ಸಂಗತಿಗಳನ್ನು ಕೇವಲ ದಾಖಲೆಗಳಿಗೆ ಸೀಮಿತಗೊಳಿಸದೆ, ಬಯಲಾಟದಂತಹ ಜನಪದ ಕಲಾ ಪ್ರಕಾರಗಳ ಮೂಲಕ ಜನಸಾಮಾನ್ಯರಿಗೆ ತಲುಪಿಸಬೇಕು. ಇದರಿಂದ ಸಮುದಾಯದ ಕಳೆದುಹೋಗುತ್ತಿರುವ ಸಾಂಸ್ಕೃತಿಕ ಸ್ಮೃತಿ ಹಾಗೂ ಚರಿತ್ರೆಯನ್ನು ಉಳಿಸಿ ಬೆಳೆಸಲು ಸಾಧ್ಯವಾಗುತ್ತದೆ ಎಂದು ಸಲಹೆ ನೀಡಿದರು.

ರಾಯಚೂರು ಜಿಲ್ಲೆಯ ಮಿಟ್ಟೆ ಮಲ್ಕಾಪುರದ ಶಾಂತಾಶ್ರಮದ ಪೀಠಾಧಿಪತಿ ಶ್ರೀ ನಿಜಾನಂದ ಮಹಾಸ್ವಾಮೀಜಿ ಮಾತನಾಡಿ, ಲಾಳಗೊಂಡ ಸಮುದಾಯದ ಇತಿಹಾಸವನ್ನು ಸಮಗ್ರವಾಗಿ ಸಂಶೋಧಿಸಿ ದಾಖಲಿಸುವ ಕಾರ್ಯವಾಗಬೇಕು. ಸಂಶೋಧಕರು ಸಮುದಾಯದ ಚರಿತ್ರೆಯನ್ನು ಸಂಗ್ರಹಿಸಿ ಲಿಖಿತ ರೂಪದಲ್ಲಿ ನೀಡಿದರೆ, ಅದನ್ನು ಪುಸ್ತಕ ರೂಪದಲ್ಲಿ ಪ್ರಕಟಿಸಲು ಸಹಕರಿಸಲಾಗುವುದು ಎಂದರು.

ಇತಿಹಾಸಕಾರರಾದ ಡಾ.ಎಂ.ಆರ್.ಪಂಪನಗೌಡ ಹಾಗೂ ಸುರೇಶಗೌಡ ಪಾಟೀಲ್ ಗೋನಾಳ ಅವರು ಲಾಳಗೊಂಡ ಸಮುದಾಯದ ಐತಿಹಾಸಿಕ ಹಿನ್ನೆಲೆ, ಪರಂಪರೆ ಮತ್ತು ಸಾಧನೆಗಳ ಕುರಿತು ಉಪನ್ಯಾಸ ನೀಡಿದರು.

ರಾಮಸಾಗರ ಗ್ರಾಮ ಘಟಕದ ಅಧ್ಯಕ್ಷ ಗೆಣಕಿಹಾಳ ಬಸವರಾಜ ಅಧ್ಯಕ್ಷತೆ ವಹಿಸಿದ್ದರು. ಲಾಳಗೊಂಡ ಸಮಾಜದ ರಾಜ್ಯಾಧ್ಯಕ್ಷ ಅರವಿ ಬಸವನಗೌಡ, ತಾಲೂಕು ಅಧ್ಯಕ್ಷ ಜಿ.ಅಮರೇಗೌಡ, ಜಿ.ಚಂದ್ರಶೇಖರಗೌಡ, ಬಿ.ಶರಣಪ್ಪ, ಜಿ.ಸಂಗಮೇಶ, ಎಸ್.ಭೀಮನಗೌಡ ನಾಗರಾಜ್, ಜಿ.ರವಿಶಂಕರ್, ಎಚ್.ಶಿವಶಂಕರಗೌಡ ಸೇರಿದಂತೆ ರಾಯಚೂರು, ಕೊಪ್ಪಳ, ಗದಗ ಹಾಗೂ ಬಳ್ಳಾರಿ ಜಿಲ್ಲೆಗಳ ಲಾಳಗೊಂಡ ಸಮಾಜದ ಮುಖಂಡರು, ಸಮುದಾಯದ ಸದಸ್ಯರು ಪಾಲ್ಗೊಂಡಿದ್ದರು.

Gandhi Jayanti 2026: ದೆಹಲಿ ರಾಜಘಾಟ್‌ನಲ್ಲಿ ಸಮಾಧಿ ಇದ್ದರೆ, ಕರ್ನಾಟಕದ ಈ ಊರಲ್ಲಿದೆ ಮಹಾತ್ಮನ ಚಿತಾಭಸ್ಮ!

Ravi Janekal — Fri, 02 Oct 2026 08:30:40 +0530

ಭೀಮಣ್ಣ ಗಜಾಪುರ ಕೂಡ್ಲಿಗಿ

ಕೂಡ್ಲಿಗಿ ಪಟ್ಟಣದಲ್ಲಿ ಗಾಂಧೀಜಿ ಚಿತಾಭಸ್ಮ, ಹುತಾತ್ಮರ ಸ್ಮಾರಕವಿರುವುದು ಬಹುತೇಕ ಜನರಿಗೆ ಚಿರಪರಿಚಿತವಾಗಿದೆ. ಚಿತಾಭಸ್ಮವಿರುವ ಸ್ಮಾರಕ ಸ್ಥಾಪಿಸಿ 5 ದಶಕ ಕಳೆದರೂ ಅನಾಥವಾಗಿತ್ತು. ಆದರೆ ಸ್ಥಳೀಯ ಗಾಂಧಿವಾದಿಗಳು, ಪ್ರಮುಖರು, ಸಂಘ, ಸಂಸ್ಥೆಯವರ ಹೋರಾಟದ ಫಲವಾಗಿ ಗಾಂಧೀಜಿಯವರ ಚಿತಾಭಸ್ಮವಿರುವ ಸ್ಮಾರಕವನ್ನು ಕಾಪಾಡಿಕೊಂಡು ಬಂದಿದ್ದಾರೆ.

ಇದು ಬರೀ ಗಾಂಧೀಜಿ ಚಿತಾಭಸ್ಮ ಸ್ಮಾರಕವಷ್ಟೇ ಅಲ್ಲ, 1857 ರಿಂದ 1947ರವರೆಗೆ ಸ್ವಾತಂತ್ರ್ಯಕ್ಕೋಸ್ಕರ ಹುತಾತ್ಮರನ್ನು ನೆನೆಯುವ ರಾಷ್ಟ್ರೀಯ ಹುತಾತ್ಮರ ಸ್ಮಾರಕ ಇದಾಗಿದೆ ಎಂಬುದು ಬಹುತೇಕರಿಗೆ ಗೊತ್ತಿಲ್ಲ, ಈ ಅಪರೂಪದ ಸ್ಮಾರಕ ಪ್ರವಾಸಿ ತಾಣವಾಗದೇ ಇರುವುದು ಮಾತ್ರ ವಿಪರ್ಯಾಸ.

ದೆಹಲಿ ರಾಜ್‌ಘಾಟ್‌ನಲ್ಲಿ ಸಮಾಧಿ ಇದ್ದರೆ ಕೂಡ್ಲಿಗಿಯಲ್ಲಿ ಗಾಂಧೀಜಿಯ ಚಿತಾಭಸ್ಮ

ಹುತಾತ್ಮರ ಸ್ಮಾರಕದ ಹಿನ್ನೆಲೆ:ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕ ನಂತರ ಗಾಂಧೀಜಿ ಹುತಾತ್ಮರಾದಾಗ ಅವರ ಚಿತಾಭಸ್ಮವನ್ನು ದೇಶದ ನಾನಾ ಭಾಗಗಳಿಗೆ ಕೊಂಡೊಯ್ದು ನದಿಗಳಿಗೆ ಅರ್ಪಿಸುವ ಮೂಲಕ ಧನ್ಯತಾಭಾವ ಮೆರೆದಿದ್ದರು. ದೆಹಲಿ ರಾಜ್ ಘಾಟ್ ನಲ್ಲಿ ಗಾಂಧೀಜಿ ಸಮಾಧಿ ಮಾತ್ರ ನೋಡಬಹುದು ಆದರೆ ಕೂಡ್ಲಿಗಿಯಲ್ಲಿ ಗಾಂಧೀಜಿಯವರ ಚಿತಾಭಸ್ಮ ಗಂಧದ ಪೆಟ್ಟಿಗೆಯಲ್ಲಿ ಭದ್ರವಾಗಿದೆ. ಕೂಡ್ಲಿಗಿಯಲ್ಲಿ ಅಂದು ಶಿಕ್ಷಕರಾಗಿದ್ದ ಅಪ್ಪಟ ಗಾಂಧಿವಾದಿ ಬಿಂಧು ಮಾಧವ ವಿದ್ಯಾರ್ಥಿಗಳ ಜತೆಗೂಡಿ ಗಾಂಧೀಜಿಯವರ ಚಿತಾಭಸ್ಮವನ್ನು ದೆಹಲಿಯ ರಾಜಘಾಟ್ ನಿಂದ ಬಳ್ಳಾರಿಗೆ ತಂದು ಅಲ್ಲಿಯ ಮಲ್ಲಸಜ್ಜನ ವ್ಯಾಯಾಮ ಶಾಲೆಯಲ್ಲಿ ಸಾರ್ವಜನಿಕರ ದರ್ಶನಕ್ಕೆ ಇಡಲಾಗಿತ್ತು.

ಕೂಡ್ಲಿಗಿಯಲ್ಲಿದೆ ಗಾಂಧೀಜಿ ಚಿತಾಭಸ್ಮವಿರುವ ಹುತಾತ್ಮರ ರಾಷ್ಟ್ರೀಯ ಸ್ಮಾರಕ

ಅಲ್ಲಿಂದ ಬಿಂಧು ಮಾಧವ ಮಾಸ್ಟರ್ ನೇತೃತ್ವದಲ್ಲಿ ಕೂಡ್ಲಿಗಿಗೆ ತಂದು ಗುಡೇಕೋಟೆ ರಸ್ತೆಯ ಪಕ್ಕದ ಹೈಸ್ಕೂಲ್ ಮೈದಾನದ ಬದಿಯಲ್ಲಿ ತಾತ್ಕಾಲಿಕ ಕಟ್ಟೆ ನಿರ್ಮಿಸಿ ಇಡಲಾಯಿತು. ಚಿತಾಭಸ್ಮವನ್ನು ಅಂದಿನ ಹೈದರಾಬಾದ್ ಕಾಂಗ್ರೆಸ್ ಅಧ್ಯಕ್ಷರಾಗಿದ್ದ ರಮಾನಂದ ತೀರ್ಥರ ಹಾಗೂ ಸಂಸದರಾಗಿದ್ದ ಟೇಕೂರು ಸುಬ್ರಹ್ಮಣ್ಯಂ ಸಮ್ಮುಖದಲ್ಲಿ 1948 ರಲ್ಲಿ ಇಡಲಾಗಿತ್ತು. ಆ ನಂತರ ಮುಖ್ಯಮಂತ್ರಿಯಾಗಿದ್ದ ಕೆಂಗಲ್ ಹನುಮಂತಯ್ಯ ಕೂಡ್ಲಿಗಿಗೆ ಭೇಟಿ ನೀಡಿ ಗಾಂಧೀಜಿ ಚಿತಾಭಸ್ಮವಿರುವ ಹುತಾತ್ಮರ ಸ್ಮಾರಕ ವೀಕ್ಷಿಸಿ ಅನುದಾನ ಬಿಡುಗಡೆ ಮಾಡಿ ಅಮೃತ ಶಿಲೆಯ ಮಂಟಪ ಕೂಡ್ಲಿಗಿಯಲ್ಲಿ ನಿರ್ಮಿಸಿದ್ದರು.

ಮೊದಲೆಲ್ಲ ಈ ಸ್ಮಾರಕ ಹಂದಿ ನಾಯಿ ವಾಸಿಸುವ ಸ್ಥಳವಾಗಿತ್ತು. ಸ್ಥಳೀಯ ದೇಶಪ್ರೇಮಿಗಳ ಹೋರಾಟದ ಫಲವಾಗಿ ಹಾಗೂ ಕೂಡ್ಲಿಗಿ ಶಾಸಕರಾಗಿದ್ದ ಎನ್.ವೈ. ಗೋಪಾಲಕೖಷ್ಣ ಇಚ್ಛಾಶಕ್ತಿಯ ಫಲವಾಗಿ ಗಾಂಧೀಜಿ ಚಿತಾಭಸ್ಮವಿರುವ ಹುತಾತ್ಮರ ಸ್ಮಾರಕ ಅಭಿವೃದ್ಧಿಯಾಗುತ್ತಾ ಬಂದಿದೆ. ಇಂದು ಈ ಸ್ಮಾರಕ ಅಭಿವೃದ್ಧಿಯಾಗುವ ಮೂಲಕ ಪ್ರವಾಸಿಗರನ್ನು ಆಕರ್ಷಿಸುವಂತಾಗಿದೆ. ಕೂಡ್ಲಿಗಿಯ ಗಾಂಧಿ ಸ್ಮಾರಕ ಸಮಿತಿ ಹಾಗೂ ಕೂಡ್ಲಿಗಿಯ ಪ್ರಗತಿಪರ ಸಂಘಟನೆಗಳ ನಿರಂತರ ಹೋರಾಟದ ಫಲವೂ ಹೌದು.

ಯಾವುದೇ ರಾಷ್ಟ್ರೀಯ ಹಬ್ಬ ಬರಲಿ, ಗಾಂಧಿ ಜಯಂತಿ ಹಾಗೂ ಹುತಾತ್ಮರ ದಿನಾಚರಣೆಯಂದು ಈ ಸ್ಮಾರಕಕ್ಕೆ ಪೂಜೆ ಸಲ್ಲಿಸಿ ಹುತಾತ್ಮರನ್ನು ನೆನೆಯುತ್ತಾರೆ. ಅ. 2 ಹಾಗೂ ಆ.15 ಸೇರಿದಂತೆ ರಾಷ್ಟ್ರೀಯ ಹಬ್ಬಗಳಲ್ಲಿ ಹಬ್ಬದ ರೀತಿಯಲ್ಲಿ ಇಲ್ಲಿಯ ಜನತೆ ವಿದ್ಯಾರ್ಥಿಗಳು ಈ ಸ್ಮಾರಕದ ಬಳಿ ಸೇರಿ ಹುತಾತ್ಮಕರಿಗೆ ನಮನ ಸಲ್ಲಿಸುತ್ತಾರೆ. ಕೂಡ್ಲಿಗಿಯಲ್ಲಿ ಯಾವುದೇ ಜನಪರ ಹೋರಾಟ ನಡೆಯಲಿ ಮೊದಲು ಈ ಸ್ಮಾರಕದಿಂದಲೇ ಪ್ರಾರಂಭವಾಗುತ್ತದೆ. ಕೂಡ್ಲಿಗಿ ಪಟ್ಟಣಕ್ಕೆ ಯಾವುದೇ ಮುಖಂಡರು ಬರಲಿ ಮೊದಲು ಈ ಸ್ಮಾರಕಕ್ಕೆ ಬಂದು ಹುತಾತ್ಮರನ್ನು ನೆನೆದು ಮುಂದಿನ ಕಾರ್ಯಗಳಿಗೆ ಹೋಗುತ್ತಾರೆ.

ಕೂಡ್ಲಿಗಿ ಪಟ್ಟಣದಲ್ಲಿರುವ ಗಾಂಧೀಜಿ ಚಿತಾಭಸ್ಮವಿರುವ ಹುತಾತ್ಮರ ಸ್ಮಾರಕ ಈಗಾಗಲೇ ರಾಷ್ಟ್ರೀಯ ಸ್ಮಾರಕವೆಂದು ಘೋಷಣೆಯಾಗಿದ್ದು, ಇತ್ತೀಚಿನವರೆಗೂ ಅಭಿವೖದ್ಧಿ ಮರೀಚಿಕೆಯಾಗಿತ್ತು. ಈಗ ಹಂತ ಹಂತವಾಗಿ ಅಭಿವೃದ್ಧಿಯಾಗುತ್ತಿದೆ. ಈ ತಾಣ ಪ್ರವಾಸಿತಾಣವಾಗಿ ರೂಪುಗೊಳ್ಳಬೇಕಿದೆ. ಇಂದಿನ ಯುವಕರಿಗೆ ದೇಶಭಕ್ತಿಯ ತಾಣವಾಗಿ ಈ ಸ್ಮಾರಕ ಅಭಿವೃದ್ಧಿಪಡಿಸಬೇಕಿದೆ ಎಂದು ಗಾಂಧಿ ಸ್ಮಾರಕ ಸಮಿತಿ ಸದಸ್ಯ ನಾಗರಾಜಪ್ಪ ತಿಳಿಸಿದ್ದಾರೆ.

ಈರುಳ್ಳಿ ಬೆಳೆದ ರೈತರಿಗೆ ಸಿಕ್ಕಿದ್ದು ಬರೀ ಕಣ್ಣೀರು: ಬರಗಾಲದಲ್ಲಿಯೂ ಬೆಳೆದ ಉಳ್ಳಾಗಡ್ಡಿ ಹಾಳು ಮಾಡಿದ ಮಳೆ!

Sathish Kumar KH — Wed, 30 Sep 2026 19:41:46 +0530

ವಿಜಯನಗರ ಜಿಲ್ಲೆಯ ಹೂವಿನಹಡಗಲಿ ತಾಲೂಕಿನಲ್ಲಿ ಸುರಿದ ಭಾರಿ ಮಳೆಯಿಂದಾಗಿ ಕಟಾವಿಗೆ ಬಂದಿದ್ದ ನೂರಾರು ಎಕರೆ ಈರುಳ್ಳಿ ಬೆಳೆ ಜಲಾವೃತವಾಗಿದೆ. ಆರಂಭದಲ್ಲಿ ಮಳೆಯಿಲ್ಲದೆ ಕಷ್ಟಪಟ್ಟಿದ್ದ ರೈತರು, ಇದೀಗ ಅತಿಯಾದ ಮಳೆಯಿಂದ ಬೆಳೆ ಕೊಳೆಯುವ ಆತಂಕದಲ್ಲಿದ್ದಾರೆ.

ವಿಜಯನಗರ (ಸೆ.30): ಅನ್ನದಾತನ ಬದುಕು ಅಕ್ಷರಶಃ ತ್ರಿಶಂಕು ಸ್ಥಿತಿಯಲ್ಲಿದೆ. ಮಳೆ ಬಾರದಿದ್ದರೆ ಬೆಳೆ ಒಣಗಿ ಹೋಗುವ ಭೀತಿ, ಮಳೆ ಬಂದರೆ ಕೊಳೆತು ಹೋಗುವ ಆತಂಕ. ಇದೇ ಪರಿಸ್ಥಿತಿ ಇದೀಗ ವಿಜಯನಗರ ಜಿಲ್ಲೆಯ ಹೂವಿನಹಡಗಲಿ ತಾಲೂಕಿನ ರೈತರಿಗೆ ಎದುರಾಗಿದೆ. ಭಾರಿ ಮಳೆಗೆ ಈರುಳ್ಳಿ ಬೆಳೆ ನೀರುಪಾಲಾಗಿದ್ದು, ರೈತರು ಕಣ್ಣೀರು ಹಾಕುವಂತಾಗಿದೆ.

ಹೂವಿನಹಡಗಲಿ ತಾಲೂಕಿನ ಉತ್ತಂಗಿ ಗ್ರಾಮದಲ್ಲಿ ಈರುಳ್ಳಿ ಬೆಳೆದ ರೈತರ ಪಾಡು ಹೇಳತೀರದಾಗಿದೆ. ಆರಂಭದಲ್ಲಿ ಮುಂಗಾರು ಕೈಕೊಟ್ಟಿದ್ದರಿಂದ ಮಳೆಯಿಲ್ಲದೆ ಈರುಳ್ಳಿ ಬೆಳೆ ಒಣಗಲಾರಂಭಿಸಿತ್ತು. ಸಾಲ ಶೂಲ ಮಾಡಿ ಬೋರ್‌ವೆಲ್, ಟ್ಯಾಂಕರ್ ಮೂಲಕ ನೀರುಣಿಸಿ, ಕಷ್ಟಪಟ್ಟು ರೈತರು ಬೆಳೆಯನ್ನು ಉಳಿಸಿಕೊಂಡಿದ್ದರು. ಆದರೆ, 'ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ' ಎಂಬಂತೆ, ಕಟಾವಿಗೆ ಬಂದಿದ್ದ ಬೆಳೆ ಈಗ ವರುಣನ ಅಬ್ಬರಕ್ಕೆ ಕೊಚ್ಚಿ ಹೋಗುತ್ತಿದೆ.

ಕಳೆದೊಂದು ವಾರದಿಂದ ಬಿಡದ ಮಳೆ!

ಕಳೆದೊಂದು ವಾರದಿಂದ ಹೂವಿನಹಡಗಲಿ ಭಾಗದಲ್ಲಿ ನಿರಂತರವಾಗಿ ಮಳೆಯಾಗುತ್ತಿದ್ದು, ಈರುಳ್ಳಿ ಬೆಳೆಗಾರರು ದಿಕ್ಕು ತೋಚದಂತಾಗಿದ್ದಾರೆ. ಅದರಲ್ಲೂ ಇಂದು (ಸೋಮವಾರ) ಬೆಳಗಿನ ಜಾವ ಉತ್ತಂಗಿ ಗ್ರಾಮದಲ್ಲಿ ಸುರಿದ ಭಾರಿ ಮಳೆಯಿಂದಾಗಿ ನೂರಾರು ಎಕರೆ ಈರುಳ್ಳಿ ಬೆಳೆ ಜಲಾವೃತವಾಗಿದೆ.

ಭೂಮಿಯೊಳಗೆಯೇ ಈರುಳ್ಳಿ ಕೊಳೆಯುವ ಹಂತಕ್ಕೆ ತಲುಪಿದ್ದು, ಮಳೆಯಿಂದಾಗಿ ಬೆಳೆಗೆ ತೀವ್ರ ಹಾನಿಯಾಗುವ ಆತಂಕ ಎದುರಾಗಿದೆ. ಸಾವಿರಾರು ರೂಪಾಯಿ ಬಂಡವಾಳ ಹಾಕಿ, ಹಗಲಿರುಳು ಕಷ್ಟಪಟ್ಟು ಬೆಳೆದ ಬೆಳೆ ಕಣ್ಣೆದುರೇ ಮಳೆಪಾಲಾಗುತ್ತಿರುವುದನ್ನು ಕಂಡು ರೈತರು ಕಂಗಾಲಾಗಿದ್ದಾರೆ.

ಪರಿಹಾರಕ್ಕಾಗಿ ರೈತರ ಆಗ್ರಹ:

'ಮೊದಲು ಮಳೆಯಿಲ್ಲದೆ ನಮ್ಮ ಬೆಳೆ ಹಾಳಾಗುವ ಹಂತಕ್ಕೆ ತಲುಪಿತ್ತು. ಈಗ ಬೆಳೆ ಕಟಾವಿಗೆ ಬಂದಿರುವ ಹೊತ್ತಿನಲ್ಲೇ ಭಾರಿ ಮಳೆ ಸುರಿದು, ಬೆಳೆ ಭೂಮಿಯಲ್ಲೇ ಕೊಳೆಯುತ್ತಿದೆ. ಮಳೆ ಬಂದ್ರೂ ಕಷ್ಟ, ಬಾರದಿದ್ರೂ ಕಷ್ಟ ಎಂಬಂತಾಗಿದೆ ನಮ್ಮ ಬದುಕು. ಸರ್ಕಾರ ಕೂಡಲೇ ಎಚ್ಚೆತ್ತುಕೊಂಡು ಬೆಳೆ ಹಾನಿ ಸಮೀಕ್ಷೆ ನಡೆಸಬೇಕು' ಎಂದು ಉತ್ತಂಗಿ ಗ್ರಾಮದ ರೈತರು ತಮ್ಮ ಅಳಲು ತೋಡಿಕೊಂಡಿದ್ದಾರೆ.

ಸಂಬಂಧಪಟ್ಟ ಕಂದಾಯ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳು ತಕ್ಷಣವೇ ಜಮೀನುಗಳಿಗೆ ಭೇಟಿ ನೀಡಿ, ಮಳೆಯಿಂದಾಗಿರುವ ಬೆಳೆ ಹಾನಿಯ ವರದಿಯನ್ನು ಸಿದ್ಧಪಡಿಸಿ, ಸರ್ಕಾರದಿಂದ ಸೂಕ್ತ ಪರಿಹಾರ ಒದಗಿಸಿಕೊಡಬೇಕು ಎಂದು ಸ್ಥಳೀಯ ರೈತರು ಒಕ್ಕೊರಲಿನಿಂದ ಆಗ್ರಹಿಸಿದ್ದಾರೆ.

ಕಾಂಗ್ರೆಸ್‌ಗೆ ಬೆಂಬಲ ನೀಡಿದ 3 ಬಿಜೆಪಿ ಕೌನ್ಸಿಲರ್‌ಗಳನ್ನು ಅನರ್ಹಗೊಳಿಸಿದ ಜಿಲ್ಲಾಧಿಕಾರಿ!

Sathish Kumar KH — Thu, 08 Oct 2026 12:43:39 +0530

ವಿಜಯನಗರ (ಅ.08): ಪುರಸಭೆ ಅಧ್ಯಕ್ಷ ಚುನಾವಣೆಯಲ್ಲಿ ಪಕ್ಷದ ಆದೇಶ (ವಿಪ್) ಧಿಕ್ಕರಿಸಿ ಗೈರುಹಾಜರಾಗಿದ್ದ ವಿಜಯನಗರ ಜಿಲ್ಲೆಯ ಹಗರಿಬೊಮ್ಮನಹಳ್ಳಿ ಪುರಸಭೆಯ ಮೂವರು ಬಿಜೆಪಿ ಸದಸ್ಯರಿಗೆ ಭಾರಿ ಮುಖಭಂಗವಾಗಿದೆ. ಪಕ್ಷದ ನಿರ್ದೇಶನ ಉಲ್ಲಂಘಿಸಿದ ಹಿನ್ನೆಲೆಯಲ್ಲಿ ಈ ಮೂವರು ಸದಸ್ಯರನ್ನು ಅನರ್ಹಗೊಳಿಸಿ ವಿಜಯನಗರ ಜಿಲ್ಲಾಧಿಕಾರಿಗಳ ನ್ಯಾಯಾಲಯ ಮಹತ್ವದ ಆದೇಶ ಹೊರಡಿಸಿದೆ.

ಅನರ್ಹಗೊಂಡ ಸದಸ್ಯರು ಯಾರು?

ಹಗರಿಬೊಮ್ಮನಹಳ್ಳಿ ಪುರಸಭೆಯ ಬಿಜೆಪಿ ಸದಸ್ಯರಾದ ಈರಣ್ಣ, ಮಲ್ಲೇಶ್ವರಿ ಹಾಗೂ ಚನ್ನಮ್ಮ ಸದಸ್ಯತ್ವ ಕಳೆದುಕೊಂಡ ಜನಪ್ರತಿನಿಧಿಗಳು. ಈ ಮೂವರು ಸದಸ್ಯರನ್ನು ‘ಕರ್ನಾಟಕ ಸ್ಥಳೀಯ ಸಂಸ್ಥೆಗಳ (ಪಕ್ಷಾಂತರ ನಿಷೇಧ) ಅಧಿನಿಯಮ 1987’ ರ ನಿಯಮ 3 ರ ಅನ್ವಯ ಅನರ್ಹಗೊಳಿಸಲಾಗಿದೆ ಎಂದು ಜಿಲ್ಲಾಧಿಕಾರಿಗಳು ತಮ್ಮ ಆದೇಶದಲ್ಲಿ ತಿಳಿಸಿದ್ದಾರೆ.

ಘಟನೆಯ ಹಿನ್ನೆಲೆ ಏನು?

ಕಳೆದ ಏಪ್ರಿಲ್ 30 ರಂದು ಹಗರಿಬೊಮ್ಮನಹಳ್ಳಿ ಪುರಸಭೆ ಸಭಾಂಗಣದಲ್ಲಿ ಅಧ್ಯಕ್ಷ ಸ್ಥಾನಕ್ಕೆ ಚುನಾವಣೆ ನಡೆದಿತ್ತು. ಈ ಚುನಾವಣೆಯಲ್ಲಿ ಬಿಜೆಪಿ ಅಭ್ಯರ್ಥಿಗೆ ಮತ ಚಲಾಯಿಸುವಂತೆ ಪಕ್ಷದ ಸಚೇತಕರು (Whip) ಸ್ಪಷ್ಟ ಆದೇಶ ನೀಡಿದ್ದರು. ಆದರೆ, ಪಕ್ಷದ ನಿರ್ದೇಶನವನ್ನು ಸ್ಪಷ್ಟವಾಗಿ ಉಲ್ಲಂಘಿಸಿದ ಈರಣ್ಣ, ಮಲ್ಲೇಶ್ವರಿ ಹಾಗೂ ಚನ್ನಮ್ಮ ಅವರು ಚುನಾವಣಾ ಪ್ರಕ್ರಿಯೆಗೆ ಉದ್ದೇಶಪೂರ್ವಕವಾಗಿ ಗೈರುಹಾಜರಾಗಿದ್ದರು.

ಕಾಂಗ್ರೆಸ್ ಮಡಿಲಿಗೆ ಒಲಿದಿದ್ದ ಅಧ್ಯಕ್ಷ ಪಟ್ಟ:

ಬಿಜೆಪಿಯ ಮೂವರು ಸದಸ್ಯರು ಗೈರಾಗಿದ್ದರಿಂದ ಚುನಾವಣಾ ಕಣದಲ್ಲಿ ಲೆಕ್ಕಾಚಾರಗಳು ಸಂಪೂರ್ಣ ಉಲ್ಟಾ ಆಗಿದ್ದವು. ಅಧ್ಯಕ್ಷ ಸ್ಥಾನಕ್ಕೆ ಕಾಂಗ್ರೆಸ್‌ನಿಂದ ಸ್ಪರ್ಧಿಸಿದ್ದ 8ನೇ ವಾರ್ಡ್ ಸದಸ್ಯೆ ಕೆ. ರೇಷ್ಮಾ ಸಿಕಂದರ್ 13 ಮತಗಳನ್ನು ಪಡೆದು ಜಯಭೇರಿ ಬಾರಿಸಿದ್ದರು. ಇತ್ತ ಬಿಜೆಪಿಯಿಂದ ಕಣಕ್ಕಿಳಿದಿದ್ದ 13ನೇ ವಾರ್ಡ್ ಸದಸ್ಯ ಬಣಕಾರ ಸುರೇಶ್ ಅವರು ಕೇವಲ 9 ಮತಗಳನ್ನು ಪಡೆದು ಪರಾಭವಗೊಂಡಿದ್ದರು.

ಜಿಲ್ಲಾಧಿಕಾರಿಗೆ ದೂರು ನೀಡಿದ್ದ ಬಿಜೆಪಿ ಜಿಲ್ಲಾಧ್ಯಕ್ಷ:

ಪಕ್ಷಕ್ಕೆ ದ್ರೋಹ ಬಗೆದು ಕಾಂಗ್ರೆಸ್‌ ಅಭ್ಯರ್ಥಿಯ ಗೆಲುವಿಗೆ ಪರೋಕ್ಷವಾಗಿ ಕಾರಣರಾದ ಈ ಮೂವರು ಸದಸ್ಯರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಒತ್ತಾಯಿಸಿ, ಬಿಜೆಪಿ ಜಿಲ್ಲಾಧ್ಯಕ್ಷ ಸಂಜೀವರೆಡ್ಡಿ ಅವರು ಮೇ 15 ರಂದು ವಿಜಯನಗರ ಜಿಲ್ಲಾಧಿಕಾರಿಗಳಿಗೆ ಪಕ್ಷಾಂತರ ನಿಷೇಧ ಕಾಯ್ದೆಯಡಿ ದೂರು ಸಲ್ಲಿಸಿದ್ದರು. ಅರ್ಜಿಯ ಸುದೀರ್ಘ ವಿಚಾರಣೆ ನಡೆಸಿದ ಜಿಲ್ಲಾಧಿಕಾರಿಗಳ ನ್ಯಾಯಾಲಯ, ವಿಪ್ ಉಲ್ಲಂಘನೆ ಸಾಬೀತಾದ ಹಿನ್ನೆಲೆಯಲ್ಲಿ ಮೂವರ ಸದಸ್ಯತ್ವವನ್ನು ರದ್ದುಗೊಳಿಸಿ ತೀರ್ಪು ಪ್ರಕಟಿಸಿದೆ.

ಈ ಆದೇಶವು ಸ್ಥಳೀಯ ರಾಜಕೀಯ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದ್ದು, ಪಕ್ಷದ ನಿರ್ಧಾರ ಧಿಕ್ಕರಿಸುವ ಬಂಡಾಯ ಜನಪ್ರತಿನಿಧಿಗಳಿಗೆ ಪ್ರಬಲ ಎಚ್ಚರಿಕೆಯ ಸಂದೇಶ ರವಾನಿಸಿದೆ.

ಮೇವು-ನೀರಿಲ್ಲದೆ ಕಂಗಾಲಾದ ರೈತ: ಜಾನುವಾರು ಮಾರಾಟಕ್ಕೆ ಹೋದ್ರೂ ಖರೀದಿ ಮಾಡೋರೇ ಇಲ್ಲ

Kannadaprabha News — Wed, 14 Oct 2026 12:52:42 +0530

ಚಂದ್ರು ಕೊಂಚಿಗೇರಿ

ಹೂವಿನಹಡಗಲಿ: ಕೃಷಿ ಬದುಕಿನೊಂದಿಗೆ ಅವಿನಾಭಾವ ಸಂಬಂಧ ಹೊಂದಿರುವ ಎತ್ತು, ಉಪ ಜೀವನಕ್ಕೆ ಆಸರೆಯಾಗಿದ್ದ ಆಕಳು-ಕರು, ಎಮ್ಮೆಗಳನ್ನು ಬರದ ಹೊಡೆತಕ್ಕೆ ಮೇವು, ನೀರಿಲ್ಲದೆ ರೈತ ಕಣ್ಣೀರಿಡುತ್ತಾ ಮಾರಾಟಕ್ಕೆ ಮುಂದಾಗಿದ್ದು, ಮಾರುಕಟ್ಟೆಯಲ್ಲಿ ಸೂಕ್ತ ಬೆಲೆಗೆ ಅವುಗಳನ್ನು ಕೇಳುವವರೇ ಇಲ್ಲ. ತೀರಾ ಕಡಿಮೆ ಬೆಲೆಗೆ ಮಾರಾಟ ಮಾಡಿ ಮನೆಯತ್ತ ಹೆಜ್ಜೆ ಇಡುತ್ತಿದ್ದಾನೆ.

ತಾಲೂಕಿನ ಮುಂಗಾರು, ಹಿಂಗಾರು ಮಳೆ ಇಲ್ಲದೇ ಭೂತಾಯಿ ನೀರಿಗಾಗಿ ಬಾಯ್ದೆರೆದುಕೊಂಡಿದ್ದಾಳೆ. ಉಪ ಜೀವನಕ್ಕಾಗಿ ಸಾಕಿರುವ ಜಾನುವಾರುಗಳಿಗೆ ಅಡವಿಯಲ್ಲಿ ಹಿಡಿ ಮೇವಿಲ್ಲ, ಕೆರೆ-ಕಟ್ಟೆಗಳಲ್ಲಿ ಹನಿ ನೀರಿಲ್ಲದೆ ಖಾಲಿಯಾಗಿವೆ. ಎತ್ತು, ದನ-ಕರುಗಳ ಗೋಳಾಟ ನೋಡಲಾಗದೇ ಭಾರವಾದ ಮನಸ್ಸಿನಿಂದ, ದನದ ಸಂತೆಗೆ ಜಾನುವಾರು ತಂದು ಮಾರಾಟಕ್ಕೆ ಮುಂದಾಗಬೇಕಾದ ಪರಿಸ್ಥಿತಿ ಎದುರಾಗಿದೆ.

50 ಸಾವಿರದಿಂದ ₹ 80 ಸಾವಿರ ವರೆಗೂ ದರ ಕುಸಿತ

ತಾಲೂಕಿನಲ್ಲಿ ಸರಾಸರಿ 6 ತಿಂಗಳಲ್ಲಿ 520 ಎತ್ತು, 1000 ಹೋರಿ, 1800 ಆಕಳು, 100 ಕೋಣ, 750 ಎಮ್ಮೆಗಳು ಮಾರಾಟವಾಗಿವೆ. ₹ 90 ಸಾವಿರದಿಂದ ₹ 1 ಲಕ್ಷದ ವರೆಗೂ ಮಾರಾಟವಾಗುತ್ತಿದ್ದ ಹಾಲು ಕೊಡುವ ಆಕಳು ಕೇವಲ ₹ 45 ಸಾವಿರದಿಂದ ₹ 75 ಸಾವಿರಕ್ಕೆ ಮಾರಾಟವಾಗುತ್ತಿವೆ. ಜೋಡಿ ಎತ್ತು ಉಳುಮೆ ಮೇಳೆ ₹ 1.50 ಲಕ್ಷದಿಂದ ₹ 2 ಲಕ್ಷದ ವರೆಗೂ ಮಾರಾಟವಾದರೆ ಇದೀಗ ₹ 80 ಸಾವಿರದಿಂದ ₹ 1 ಲಕ್ಷಕ್ಕೆ ಮಾರಾಟವಾಗುತ್ತಿವೆ. ಹೋರಿಗಳು ₹ 60000ರಿಂದ ₹ 80000 ವರೆಗೂ ಮಾರಾಟವಾಗುತ್ತಿವೆ. ಒಟ್ಟಾರೆ ₹ 50 ಸಾವಿರದಿಂದ ₹ 80 ಸಾವಿರ ವರೆಗೂ ದರ ಕುಸಿತವಾಗಿದೆ.

ಈ ಬರಗಾಲದಲ್ಲಿ ಜಾನುವಾರು, ಎತ್ತುಗಳ ಸಾಕುವುದು ಕಷ್ಟಕರ

ಹಿಂಗಾರು ಬಿತ್ತನೆ ಇಲ್ಲ, ಎತ್ತುಗಳನ್ನು ಖರೀದಿಸಿ ಏನು ಮಾಡಬೇಕು, ಭೂಮಿಯಲ್ಲಿ ಕೆಲಸವಿಲ್ಲ, ಅವುಗಳಿಗೆ ಮುಂದಿನ ಮುಂಗಾರು ಮಳೆ ಬರುವ ವರೆಗೂ ಮೇವು ಸಂಗ್ರಹಿಸಬೇಕು, ನೀರಿನ ವ್ಯವಸ್ಥೆ ಮಾಡಬೇಕಿದೆ. ಬದುಕಿನ ನಿರ್ವಹಣೆಗೆ ಕೂಲಿ ಬದುಕು ಮಾಡಿ ಜಾನುವಾರು, ಎತ್ತುಗಳ ಸಾಕುವುದು ಕಷ್ಟಕರವಾಗಿದೆ ಎನ್ನುತ್ತಾರೆ ರೈತರು.

ಬರ ಬಂದಿರುವ ಹಿನ್ನೆಲೆಯಲ್ಲಿ ಕಸಾಯಿಖಾನೆ ಮಾಲೀಕರು ಇದನ್ನೇ ಬಂಡವಾಳ ಮಾಡಿಕೊಂಡು, ಕಡಿಮೆ ದರದಲ್ಲಿ ಆಕಳು, ಕರು ಎತ್ತು ಎಮ್ಮೆಗಳನ್ನು ಖರೀದಿ ಮಾಡುತ್ತಿದ್ದಾರೆ. ಆದರಿಂದ ಸರ್ಕಾರ ಆಕಳು ಕರು, ಎತ್ತು, ಎಮ್ಮೆಗಳಿಗೆ ಮೇವಿನ ಬ್ಯಾಂಕ್‌ನಿಂದ ಮೇವು ಸರಬರಾಜು, ಕುಡಿಯುವ ನೀರಿನ ವ್ಯವಸ್ಥೆ ಮಾಡಿದಾಗ, ರೈತರು ಜಾನುವಾರು ಮಾರಾಟ ಮಾಡದೇ ಉಳಿಸಿಕೊಳ್ಳಲು ಸಾಧ್ಯ ಎಂಬ ಮಾತು ಕೇಳಿ ಬರುತ್ತಿದೆ.

ರೈತರ ಉಪ ಜೀವನಕ್ಕಿರುವ ಹಸು, ಎಮ್ಮೆಗಳಿಗೆ ಮೇವಿನ ಕೊರತೆಯಿಂದ, ದನದ ಸಂತೆಯಲ್ಲಿ ಮಾರಾಟ ಮಾಡುತ್ತಿದ್ದಾರೆ. ಆದರೆ, ರೈತರ ನಿರೀಕ್ಷಿತ ದರ ಸಿಗುತ್ತಿಲ್ಲ. ಖರೀದಿದಾರರ ಸಂಖ್ಯೆಯೇ ಕಡಿಮೆ ಇದೆ.

ತಿಮ್ಮಪ್ಪ ನಾಯಕ, ಕಾರ್ಯದರ್ಶಿ, ಎಪಿಎಂಸಿ, ಹೂವಿನಹಡಗಲಿ

ಕಡಿಮೆ ಬೆಲೆಗೆ ಕೇಳ್ತಾರೆ ಸರ್ ಎಂದ ಸರ್

ಮಳೆ ಇಲ್ಲದೇ ಬರ ಎದುರಾಗಿದ್ದು ಆಕಳು, ಎತ್ತು ಸಾಕಾಣೆ ಕಷ್ಟವಾಗುತ್ತಿದೆ. ಮೇವು-ನೀರಿನ ಸಮಸ್ಯೆ ಇದೆ. ಅವುಗಳ ಗೋಳಾಟ ನೋಡಲಾಗದೇ ಮನಸ್ಸು ಭಾರ ಮಾಡಿಕೊಂಡು ಮಾರಾಟಕ್ಕೆ ಮುಂದಾಗಿದ್ದೇವೆ. ಆದರೆ, ಬಾಳ ಕಡಿಮೆ ಬೆಲೆ ಕೇಳುತ್ತಿದ್ದಾರೆ ಎಂದು ರೈರ ನಿಂಗಪ್ಪ ಬಿದರಹಳ್ಳಿ ಅಳಲು ತೋಡಿಕೊಂಡರು.

ಇದನ್ನೂ ಓದಿ: ಗ್ರಾಮಸ್ಥರು ಮದುವೆ ನಂತರ ನಡೆಯುವ ಬೀಗರ ಊಟ ನಿಷೇಧಿಸಲು ಗ್ರಾಮಸ್ಥರಿಂದ ಒಮ್ಮತದ ನಿರ್ಧಾರ; ಮಹತ್ವದ ಹೆಜ್ಜೆ

European Rollers: 10 ಸಾವಿರ ಕಿ.ಮೀ. ದೂರದಿಂದ ಗುಡೇಕೋಟೆಗೆ ರೋಲರ್ಸ್!

Kannadaprabha News — Sun, 18 Oct 2026 06:52:23 +0530

ಭೀಮಣ್ಣ ಗಜಾಪುರ

ಕೂಡ್ಲಿಗಿ (ವಿಜಯನಗರ) (ಅ.17)

ಪ್ರತಿ ವರ್ಷ ಬೆರಳೆಣಿಕೆಯಷ್ಟು ತಾತ್ಕಾಲಿಕ ಅತಿಥಿಗಳಾಗಿ ಬರುವ ಯುರೋಪಿಯನ್ ರೋಲರ್ ಪಕ್ಷಿಗಳು ಈ ಬಾರಿ ತಂಡೋಪ ತಂಡವಾಗಿ 10 ಸಾವಿರ ಕಿ.ಮೀ. ದೂರ ಹಾರಿಕೊಂಡು ಕೂಡ್ಲಿಗಿ ತಾಲೂಕಿನ ಗುಡೇಕೋಟೆಗೂ ಬಂದಿವೆ.ಮೊದಲು ಗುಜರಾತ್‌ಗೆ ಕಾಲಿಡುವ ಯುರೋಪಿಯನ್ ರೋಲರ್ ನಂತರ ದೇಶದ ಮೂಲೆ ಮೂಲೆಗಳಿಗೆ ಬರುತ್ತವೆ. ಯುರೋಪಿಯನ್ ರೋಲರ್ (Coracias garrulus) ಎಂಬುದು ದೂರ ಪ್ರಯಾಣ ಬೆಳೆಸುವ ಒಂದು ಅಪೂರ್ವ ವಲಸೆ ಹಕ್ಕಿಯಾಗಿದೆ. ಭಾರತದಲ್ಲಿ ಈ ಪ್ರಬೇಧದ ಹಕ್ಕಿಯನ್ನು ನೀಲಕಂಠ ಎಂದು ಕರೆಯಲಾಗುತ್ತಿದ್ದು, ಇದು ಕರ್ನಾಟಕದ ರಾಜ್ಯ ಪಕ್ಷಿಯಾಗಿದೆ ಎಂಬುದು ಮತ್ತೊಂದು ವಿಶೇಷ.

ರೋಲರ್ ಹಕ್ಕಿಯ ವಲಸೆ ಮಾರ್ಗ, ಸಮಯ:

ಪಶ್ಚಿಮ ಯುರೋಪ್, ಮಧ್ಯ ಏಷ್ಯಾ, ರಷ್ಯಾ ಹಾಗೂ ಪೂರ್ವದ ಕಾಶ್ಮೀರ ಮತ್ತು ವಾಯುವ್ಯ ಚೀನಾದವರೆಗೆ ಸಂತಾನೋತ್ಪತ್ತಿ ವಲಯ ಹರಡಿದೆ.

ಚಳಿಗಾಲದ ನೆಲೆ:

ಸೆನೆಗಲ್‌ನಿಂದ ಕ್ಯಾಮರೂನ್, ಪೂರ್ವ ಆಫ್ರಿಕಾ (ಕೀನ್ಯಾ) ಮತ್ತು ದಕ್ಷಿಣ ಆಫ್ರಿಕಾ (ದಕ್ಷಿಣ ಆಫ್ರಿಕಾ ದೇಶ, ಅಂಗೋಲಾ ಮತ್ತು ಬೋಟ್ಸ್ವಾನಾ) ಸೇರಿದಂತೆ ಉಪ-ಸಹಾರನ್ ಆಫ್ರಿಕಾ ಭಾಗಗಳಲ್ಲಿ ಇವು ಚಳಿಗಾಲ ಕಳೆಯುತ್ತವೆ. ಕೀಟ (ಜೀರುಂಡೆಗಳು, ಮಿಡತೆಗಳು), ಸಣ್ಣ ಸರಿಸೃಪ ಅಥವಾ ಕಪ್ಪೆಯನ್ನು ಆಹಾರವಾಗಿ ಸೇವನೆ ಮಾಡುತ್ತದೆ. ನವೆಂಬರ್‌ ವರೆಗೆ ಇದ್ದು, ಬಳಿಕ ಅವು ತಮ್ಮ ತಾಯಿ ನಾಡಿಗೆ ಪ್ರಯಾಣ ಬೆಳೆಸುತ್ತವೆ.

ಬರ್ಡ್‌ಲೈಫ್ ಸೌತ್ ಆಫ್ರಿಕಾದಂತಹ ಸಂಸ್ಥೆಗಳು ಹೇರಾ ಮತ್ತು ರೋರಿ ಎಂಬ ಹಕ್ಕಿಗಳಿಗೆ ಟ್ಯಾಗ್ ಅಳವಡಿಸಿ ಅವುಗಳ 10,000 ಕಿಮೀ ಪ್ರಯಾಣ ಯಶಸ್ವಿಯಾಗಿ ಪತ್ತೆ ಹಚ್ಚಿವೆ.

Huvina Hadagali: ಅಬಕಾರಿ ಇಲಾಖೆಗೆ ತಟ್ಟಿದ ಬರದ ಬಿಸಿ: ಮದ್ಯ ಮಾರಾಟದಲ್ಲಿ ಕುಸಿತ

Kannadaprabha News — Thu, 15 Oct 2026 07:24:31 +0530

ಚಂದ್ರು ಕೊಂಚಿಗೇರಿ

ಹೂವಿನಹಡಗಲಿ: ಬಹುತೇಕ ಕ್ಷೇತ್ರಗಳ ಅಭಿವೃದ್ಧಿಗೆ ಕೃಷಿಯೇ ಮೂಲಾಧಾರವಾಗಿದೆ. ಮುಂಗಾರು ಮಳೆ ಇಲ್ಲದೇ ಬರಛಾಯೆ ಆವರಿಸಿದ್ದು, ಅಬಕಾರಿ ಇಲಾಖೆಯೂ ಹೊರತಾಗಿಲ್ಲ. ಬರದ ಬರೆ ತಟ್ಟಿರುವ ಪರಿಣಾಮ ಸರ್ಕಾರಕ್ಕೆ ಅಬಕಾರಿ ಸುಂಕ ಭಾರಿ ಪ್ರಮಾಣದಲ್ಲಿ ಕುಸಿತ ಕಂಡಿದೆ.

ತಾಲೂಕಿನಲ್ಲಿ 22 ವಿವಿಧ ರೀತಿಯ ಮದ್ಯದ ಅಂಗಡಿಗಳಿವೆ. 10 ಸಿಎಲ್‌-2 (ಚಿಲ್ಲರೆ ಮದ್ಯ ಮಾರಾಟ), 5 ಎಂಎಸ್‌ಐಎಲ್‌, 3 ಸಿಎಲ್‌-9 (ಬಾರ್‌ ಮತ್ತು ರೆಸ್ಟೋರೆಂಟ್‌), 1 ಸಿಎಲ್‌-4 (ಕ್ಲಬ್‌), 3 ಸಿಎಲ್‌-7 (ಲಾಡ್ಜ್‌ ಮತ್ತು ಬೋರ್ಡಿಂಗ್‌) ಮದ್ಯದ ಅಂಗಡಿಗಳಿವೆ.

ಈ ಎಲ್ಲ ಮದ್ಯದ ಅಂಗಡಿಗಳಲ್ಲಿ ಮಾರಾಟದ ಆಧಾರದ ಮೇಲೆ ಪ್ರತಿ ತಿಂಗಳು, ಅಬಕಾರಿ ಇಲಾಖೆಯಿಂದ ಎತ್ತುವಳಿ ಹೆಚ್ಚು ಮಾಡಲಾಗುತ್ತಿದೆ. ಅದರಂತೆ ಕಳೆದ ಮೂರು ತಿಂಗಳ ಅವಧಿಯಲ್ಲಿ ಜುಲೈ ತಿಂಗಳಲ್ಲಿ 16911 ಬಾಕ್ಸ್‌ ಮಾರಾಟದ ಗುರಿ ಇತ್ತು. 15186 ಸಾಧನೆಯಾಗಿತ್ತು, 1725 ಬಾಕ್ಸ್‌ ಹೆಚ್ಚುವರಿ ಉಳಿದಿದೆ. ಆಗಷ್ಟ್‌ನಲ್ಲಿ 14036 ಬಾಕ್ಸ್‌ ಮಾರಾಟ ಗುರಿ ಇತ್ತು, 12843 ಸಾಧನೆ, 1192 ಹೆಚ್ಚುವರಿ ಉಳಿದಿದೆ. ಸೆಪ್ಟೆಂಬರ್‌ನಲ್ಲಿ 14498 ಬಾಕ್ಸ್‌ ಮಾರಾಟದ ಗುರಿ ನಿಗಧಿಯಾಗಿತ್ತು. ಇದರಲ್ಲಿ 14457 ಸಾಧನೆಯಾಗಿದ್ದು, 41 ಬಾಕ್ಸ್‌ ಹೆಚ್ಚುವರಿ ಉಳಿದಿತ್ತು.

ಒಟ್ಟಾರೆ 45445 ಬಾಕ್ಸ್‌ ಮಾರಾಟದ ಗುರಿ ಇದ್ದು, 42487 ಬಾಕ್ಸ್‌ ಮಾರಾಟದ ಸಾಧನೆಯಾಗಿದೆ. 2959 ಬಾಕ್ಸ್‌ ಹೆಚ್ಚುಯಾಗಿ ಉಳಿದಿದೆ. ಪ್ರತಿ ತಿಂಗಳು ₹7.42 ಕೋಟಿ ಸುಂಕ ಸಂಗ್ರಹದ ಗುರಿ ಇತ್ತು.ಒಟ್ಟಾರೆ 3 ತಿಂಗಳಲ್ಲಿ ಅಬಕಾರಿ ಇಲಾಖೆಗೆ ₹22,26,80,500 ಸುಂಕ ಸಂಗ್ರಹಕ್ಕೆ ಸರ್ಕಾರ ಗುರಿ ನಿಗದಿ ಮಾಡಿತ್ತು. ಇದರಲ್ಲಿ ₹20,81,86,300 ಅಬಕಾರಿ ಸುಂಕ ಸಂಗ್ರಹವಾಗಿದೆ. ₹ 2 ಕೋಟಿಗೂ ಅಧಿಕ ಸುಂಕ ಸರ್ಕಾರಕ್ಕೆ ಖೋತಾ ಆಗಿದೆ.

ಸಕಾಲದಲ್ಲಿ ಕೂಲಿ ಪಾವತಿಯಾಗಿಲ್ಲ

ಮಳೆ ಇಲ್ಲದ ಬರ ಬಿದ್ದ ಪರಿಣಾಮ ರೈತರು ಸೇರಿದಂತೆ ಕೂಲಿ ಕಾರ್ಮಿಕರ ಕೈಯಲ್ಲಿ ಹಣದ ಹರಿವು ಕಡಿಮೆಯಾಗಿದೆ. ಉದ್ಯೋಗ ಹುಡುಕಿಕೊಂಡು ಹಳ್ಳಿಗಳು ಮತ್ತು ತಾಂಡಾದಲ್ಲಿ ಕೂಲಿ ಕಾರ್ಮಿಕರು ಗುಳೆ ಹೋಗಿದ್ದಾರೆ. ತಾಲೂಕಿನ 26 ಗ್ರಾಪಂ ವ್ಯಾಪ್ತಿಯಲ್ಲಿನ ಹಳ್ಳಿ ಕೂಲಿ ಕಾರ್ಮಿಕರಿಗೆ, ವಿಬಿ ಜಿ ರಾಮ್‌ ಜಿ ಕೆಲಸ ನೀಡಿದ್ದರೂ, ಸಕಾಲದಲ್ಲಿ ಕೂಲಿ ಪಾವತಿಯಾಗಿಲ್ಲ, ಜತೆಗೆ ಮಾಸಾಶನವೂ ಬರುತ್ತಿಲ್ಲ, ಇತ್ತ ಗೃಹ ಲಕ್ಷ್ಮೀ ಹಣವೂ ಬಂದಿಲ್ಲ, ಜನರ ಬಳಿ ಹಣ ಇಲ್ಲ ಆದ್ದರಿಂದ ಮದ್ಯಪಾನ ಪ್ರಿಯರ ಸಂಖ್ಯೆ ಕಡಿಮೆಯಾಗಿದೆ. ಈ ಎಲ್ಲ ಕಾರಣಗಳಿಗಾಗಿಯೇ ಅಬಕಾರಿ ಸುಂಕ ಸಂಗ್ರಹಕ್ಕೂ ಕೊಕ್ಕೆ ಬಿದ್ದಿದೆ ಎಂಬ ಮಾತು ಕೇಳಿ ಬರುತ್ತಿದೆ.

ತಾಲೂಕಿನಲ್ಲಿ 22 ವಿವಿಧ ರೀತಿಯ ಮದ್ಯದ ಅಂಗಡಿಗಳಿವೆ, ಪ್ರತಿ ತಿಂಗಳು ಗುರಿ ನಿಗದಿ ಹೆಚ್ಚಾಗುತ್ತಿದೆ, ₹22.26 ಕೋಟಿ ಗುರಿ ನಿಗದಿ ಇತ್ತು. ₹20.81 ಕೋಟಿ ಸಾಧನೆಯಾಗಿದೆ. ಈಗ ಬರ ಬಂದಿರುವ ಕಾರಣ ಸಾಕಷ್ಟು ಕೂಲಿ ಕಾರ್ಮಿಕರು ಗುಳೆ ಹೋಗಿದ್ದಾರೆ. ಜತೆಗೆ ಹಣ ಹರಿವೂ ಅಷ್ಟಾಗಿ ಇಲ್ಲ ಇದರಿಂದ ಸಾಧನೆ ಕಡಿಮೆಯಾಗಿದೆ ಎಂದು ಹೂವಿನಹಡಗಲಿ ಅಬಕಾರಿ ಇಲಾಖೆ ನಿರೀಕ್ಷಕ ಸಿದ್ದೇಶ ನಾಯ್ಕ ತಿಳಿಸಿದ್ದಾರೆ.

ದುಡಿಯುವ ಕೈಗೆ ಕೆಲಸ ಇಲ್ಲದ ಕಾರಣ ಕೂಲಿ ಹಣವೂ, ಇತ್ತ ಮಾಸಾಶನ ಹಣ ಬರುತ್ತಿಲ್ಲ, ಕೈಯಲ್ಲಿ ಹಣವಿಲ್ಲ ಆದರಿಂದ ಮದ್ಯಪಾನ ಕಡಿಮೆ ಮಾಡಿದ್ದೇವೆ ಎಂದು ಹೆಸರು ಹೇಳಲು ಇಚ್ಛಿಸದ ಮದ್ಯಪಾನ ಪ್ರಿಯ ತಿಳಿಸಿದ್ದಾರೆ.

ಇದನ್ನೂ ಓದಿ: ಮೇವು-ನೀರಿಲ್ಲದೆ ಕಂಗಾಲಾದ ರೈತ: ಜಾನುವಾರು ಮಾರಾಟಕ್ಕೆ ಹೋದ್ರೂ ಖರೀದಿ ಮಾಡೋರೇ ಇಲ್ಲ

ಕೊಟ್ಟೂರು ಪಟ್ಟಣಕ್ಕೆ ವರ್ತುಲ ರಸ್ತೆ ಭಾಗ್ಯ: ಆಕ್ಷೇಪಣೆ ಸಲ್ಲಿಕೆ ಪ್ರಕ್ರಿಯೆ ಪೂರ್ಣ, ಟ್ರಾಫಿಕ್ ಕಿರಿಕಿರಿಗೆ ಮುಕ್ತಿ!

Sathish Kumar KH — Fri, 09 Oct 2026 08:37:10 +0530

ವರದಿ- ಜಿ.ಸೋಮಶೇಖರ ಕೊಟ್ಟೂರು

ಸಂಚಾರ ದಟ್ಟಣೆ ನಿಯಂತ್ರಿಸುವ ಹಿನ್ನೆಲೆ ಕೊಟ್ಟೂರು ಪಟ್ಟಣದಲ್ಲಿ ವರ್ತುಲ ರಸ್ತೆ ನಿರ್ಮಾಣಕ್ಕೆ ಸರ್ಕಾರ ಮುಂದಾಗಿದ್ದು, ನಗರಾಭಿವೃದ್ಧಿ ಇಲಾಖೆ ಮೂಲಕ ಸಾರ್ವಜನಿಕರ ಆಕ್ಷೇಪಣೆ ಸ್ವೀಕರಿಸುವ ಮಹತ್ವದ ಕಾರ್ಯ ಮುಕ್ತಾಯಗೊಳಿಸಿದ್ದರಿಂದ ಪಟ್ಟಣದ ಜನತೆಗೆ ಇನ್ನೂ ಕೆಲವೇ ವರ್ಷಗಳಲ್ಲಿ ವರ್ತುಲ ರಸ್ತೆ ಒದಗಿಸಿ ಕೊಡುತ್ತಿರುವುದು ಜನರಲ್ಲಿ ಹೊಸ ಬಗೆಯ ಭರವಸೆ ಮೂಡಿಸಿದೆ.

ದಿನದಿಂದ ದಿನಕ್ಕೆ ಕೊಟ್ಟೂರು ಪಟ್ಟಣದಲ್ಲಿ ವಾಹನಗಳ ಸಂಚಾರ ಮತ್ತು ಜನದಟ್ಟನೆ ಹೆಚ್ಚಿಸಿಕೊಂಡಿರುವ ಕಾರಣಕ್ಕೆ ಟ್ರಾಫಿಕ್‌ ಜಾಮ್‌ ಆಗುತ್ತಿದ್ದು, ಇದರಿಂದ ಶಾಲಾ ಕಾಲೇಜು ವಿದ್ಯಾರ್ಥಿಗಳು ಮತ್ತು ಸಾರ್ವಜನಿಕರು ತೊಂದರೆ ಅನುಭವಿಸುವಂತಾಗುತ್ತಿದ್ದರು. ಕೊಟ್ಟೂರೇಶ್ವರ ಜಾತ್ರಾ ಮಹೋತ್ಸವ ಮತ್ತು ಕಾರ್ತಿಕ ಮಹೋತ್ಸವಗಳಲ್ಲಿ ಸಂಚಾರದ ಒತ್ತಡ ಮತ್ತಷ್ಟು ಹೆಚ್ಚಾಗಲಿದ್ದು, ಈ ಕಾರಣಕ್ಕೆ ಪಟ್ಟಣದಲ್ಲಿ ರಿಂಗ್‌ ರೋಡ್‌ ನಿರ್ಮಾಣ ಮಾಡಬೇಕು ಎಂದು ಹಲವು ಬಾರಿ ಮನವಿ ಸಲ್ಲಿಸುತ್ತಲೇ ಬಂದಿದ್ದರು.

ಕೊಟ್ಟೂರು ಜೊತೆಗೆ 4 ನಾಲ್ಕು ತಾಲೂಕುಗಳು ಆಯ್ಕೆ

ಇದೀಗ ಸರ್ಕಾರ ನಗರ ಮತ್ತು ಪಪಂ ವ್ಯಾಪ್ತಿಯಲ್ಲಿ ವರ್ತುಲ ನಿರ್ಮಾಣದ ಮಹತ್ವದ ಕಾರ್ಯ ಯೋಜನೆ ರೂಪಿಸಿ ಕೊಟ್ಟೂರು ಸೇರಿದಂತೆ ಕೂಡ್ಲಿಗಿ, ಹಗರಿಬೊಮ್ಮನಹಳ್ಳಿ, ಹೂವಿನಹಡಗಲಿ ಮತ್ತು ಕಮಲಾಪುರ ಪಟ್ಟಣಗಳನ್ನು ಆಯ್ಕೆ ಮಾಡಿಕೊಂಡು ವರ್ತುಲ ರಸ್ತೆ ನಿರ್ಮಾಣದ ರೂಪರೇಷ ತಯಾರಿಸುವಂತೆ ನಗರಾಭಿವೃದ್ಧಿ ಪ್ರಾಧಿಕಾರ ಮತ್ತು ಗ್ರಾಮಾಂತರ ಯೋಜನಾ ಆಯುಕ್ತಾಲಯಗಳಿಗೆ ಸೂಚಿಸಿರುವ ಹಿನ್ನೆಲೆ ನಗರಾಭಿವೃದ್ಧಿ ಇಲಾಖೆ ಈ ಸಂಬಂಧ ಇಲ್ಲಿನ ಜನತೆಯ ಆಕ್ಷೇಪಣೆ ಸಲ್ಲಿಸಲು ಸಮಯ ನಿಗದಿಗೊಳಿಸಿತ್ತು. ಈ ಅವಧಿ ಈಗಾಗಲೇ ಮುಕ್ತಾಯಗೊಂಡಿರುವುದರಿಂದ ಈ ಯೋಜನೆ ಶೀಘ್ರ ಕಾರ್ಯ ರೂಪ ಪಡೆಯುತ್ತದೆ ಎಂಬ ಆಶಾ ಭಾವನೆ ಜನತೆ ಹೊಂದಿದ್ದಾರೆ.

ಪಪಂ ವ್ಯಾಪ್ತಿಯಿಂದ ವರ್ತುಲ ರಸ್ತೆ ಬ್ರೀಡ್ ಪ್ಲಾನ್ ತಯಾರುಗೊಂಡಿದ್ದು, ಯಾವ ಯಾವ ಪ್ರದೇಶದ ಮೂಲಕ ಹಾದು ಹೋಗುತ್ತದೆ ಎಂಬ ವಿವರ ಸಾರ್ವಜನಿಕವಾಗಿ ಪ್ರಕಟಿಸಿದೆ. ಜತೆಗೆ ಯಾವ ಮಾರ್ಗದಲ್ಲಿ ರಿಂಗ್ ರೋಡ್ ನಿರ್ಮಾಣವಾಗುತ್ತದೆ ಎಂಬ ಪರಿಚಯ ವಿವರಿಸಿದೆ.

ಯಾವುದಕ್ಕೆಲ್ಲಾ ಅನುಕೂಲ

ವೇಗವಾಗಿ ಅಭಿವೃದ್ಧಿಗೊಳ್ಳುತ್ತಿರುವ ಕೊಟ್ಟೂರು ಪಟ್ಟಣದಲ್ಲಿ ವರ್ತುಲ ರಸ್ತೆ ನಿರ್ಮಾಣಗೊಂಡರೆ ಪಟ್ಟಣದ ಒಳಪ್ರದೇಶದ ವಾಹನಗಳ ಸಂಚಾರ ದಟ್ಟನೆ ತಗ್ಗಲಿದೆ. ಅದಲ್ಲದೇ ಹೊರ ಭಾಗದ ವಾಹನ ಸಂಚಾರ ಪರ್ಯಾಯ ಮಾರ್ಗದ ಮೂಲಕ ತಿರುಗಿಸಿ ಅನುವು ಮಾಡಿಕೊಡಲಾಗುತ್ತದೆ.

ಈಗಾಗಲೇ ಸರ್ಕಾರದ ಸೂಚಿಯಂತೆ ನಗರಾಭಿವೃದ್ಧಿ ಇಲಾಖೆ ಹೊರಡಿಸಿದ ಆಕ್ಷೇಪಣೆ ಸಲ್ಲಿಸುವ ಪ್ರಕ್ರಿಯೆಗೆ ಪಪಂ ಕಾರ್ಯಾಲಯದಲ್ಲಿ ಅವಕಾಶ ಕಲ್ಪಿಸಿಕೊಡಲಾಗಿತ್ತು. ಇದರ ಕಾಲಾವಧಿ ಇದೀಗ ಮುಕ್ತಾಯಗೊಂಡಿದ್ದು, ಯೋಜನೆಯ ಸಂಪೂರ್ಣ ಮಾಹಿತಿ ಮತ್ತು ಗ್ರಿಡ್ ಯೋಜನೆಯ ಮತ್ತಷ್ಟು ವಿವರ ಪಡೆದುಕೊಳ್ಳಲು ಪ್ರತಿಯೊಬ್ಬರಿಗೂ ಪಪಂ ಕಾರ್ಯಾಲಯ ಅವಕಾಶ ಕಲ್ಪಿಸಿ ಕೊಟ್ಟಿದೆ.

ಕೊಟ್ಟೂರು ಪಟ್ಟಣದಲ್ಲಿ ವರ್ತುಲ ರಸ್ತೆ ನಿರ್ಮಾಣ ಮಾಡುವ ಉದ್ದೇಶವಿರಿಸಿಕೊಂಡು ನಗರಾಭಿವೃದ್ಧಿ ಇಲಾಖೆ ಯೋಜನೆ ರೂಪಿಸಿ ಅಂದಾಜು ನಕ್ಷೆ ಪ್ರಕಟಿಸಿದೆ. ಇದರಿಂದ ಪಟ್ಟಣದ ಜನತೆಗೆ ಸಮಸ್ಯೆಗಳು ಇದ್ದರೆ ಅದಕ್ಕೆ ಆಕ್ಷೇಪಣೆ ಸಲ್ಲಿಸುವ ಕಾರಣಕ್ಕಾಗಿ ಸಾರ್ವಜನಿಕರ ಗಮನಕ್ಕೆ ತಂದು ಪ್ರಕಟಿಸಿದ್ದೇವೆ ಎಂದು ಕೊಟ್ಟೂರು ಪಪಂ ಮುಖ್ಯಾಧಿಕಾರಿ ಎ.ನಸುರುಲ್ಲಾ ತಿಳಿಸಿದ್ದಾರೆ.

ಕೊಟ್ಟೂರು ಜನತೆಯ ಬಹು ದಿನದ ಬೇಡಿಕೆಯಾಗಿದ್ದ ವರ್ತುಲ ರಸ್ತೆ ನಿರ್ಮಾಣ ಕಾರ್ಯ ಇದೀಗ ಕಾರ್ಯರೂಪ ಪಡೆಯುವತ್ತ ಮುಂದಾಗಿರುವುದು ಸಂತೋಷದ ಸಂಗತಿ. ಪದೇ ಪದೇ ಪಟ್ಟಣದ ರಸ್ತೆಗಳಲ್ಲಿ ಉಂಟಾಗುತ್ತಿದ್ದ ಟ್ರಾಫಿಕ್ ಸಮಸ್ಯೆ ಮತ್ತು ವಾಹನಗಳ ಸಂಚಾರದ ದಟ್ಟನೆ ಈ ರಸ್ತೆಯ ಮೂಲಕ ಕಡಿಮೆಯಾಗಲಿದೆ ಎಂದು ಕೊಟ್ಟೂರು ವಾಹನ ಮಾಲೀಕ ಮಲ್ಲಿಕಾರ್ಜುನ ತಿಳಿಸಿದ್ದಾರೆ.

ಹೊಸಪೇಟೆಯಲ್ಲಿ ಭೀಕರ ರೈಲು ಅಪಘಾತ ಅಣುಕು ಪ್ರದರ್ಶನ; ಭರದಿಂದ ಸಾಗಿದ ರಕ್ಷಣಾ ಕಾರ್ಯಾಚರಣೆ ಪ್ರತ್ಯಕ್ಷಿಕೆ!

Sathish Kumar KH — Wed, 30 Sep 2026 13:20:25 +0530

ವಿಜಯನಗರದ ಹೊಸಪೇಟೆ ರೈಲ್ವೇ ನಿಲ್ದಾಣದಲ್ಲಿ ರೈಲು ಅಪಘಾತದ ರಕ್ಷಣಾ ಕಾರ್ಯಾಚರಣೆ ಅಣುಕು ಪ್ರದರ್ಶನ ನಡೆಯಿತು. ಎನ್‌ಡಿಆರ್‌ಎಫ್, ರೈಲ್ವೇ ಇಲಾಖೆ, ಅಗ್ನಿಶಾಮಕ ದಳ ಮತ್ತು ಪೊಲೀಸರ ಜಂಟಿ ಸಹಯೋಗದಲ್ಲಿ ಗಾಯಾಳುಗಳ ರಕ್ಷಣೆ ಹಾಗೂ ಪ್ರಥಮ ಚಿಕಿತ್ಸೆಯ ಪ್ರಾತ್ಯಕ್ಷಿಕೆ ನಡೆಸಲಾಯಿತು.

ವಿಜಯನಗರ (ಸೆ.30): ರೈಲು ಅಪಘಾತದಂತಹ ತುರ್ತು ವಿಪತ್ತುಗಳು ಸಂಭವಿಸಿದಾಗ ಜೀವಹಾನಿ ತಡೆಯಲು ಮತ್ತು ಗಾಯಾಳುಗಳನ್ನು ತ್ವರಿತವಾಗಿ ರಕ್ಷಿಸುವ ನಿಟ್ಟಿನಲ್ಲಿ ಹೊಸಪೇಟೆ ರೈಲ್ವೇ ನಿಲ್ದಾಣದಲ್ಲಿ ಸೋಮವಾರ ಬೃಹತ್ 'ರಕ್ಷಣಾ ಕಾರ್ಯಾಚರಣೆ ಅಣುಕು ಪ್ರದರ್ಶನ' (Mock Drill) ಯಶಸ್ವಿಯಾಗಿ ನಡೆಯಿತು.

ನೈಋತ್ಯ ರೈಲ್ವೇಯ ಹುಬ್ಬಳ್ಳಿ ವಿಭಾಗ, ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪಡೆ (NDRF) ಹಾಗೂ ಕೈಗಾ ಘಟಕದ ಜಂಟಿ ಸಹಯೋಗದಲ್ಲಿ ಈ ತುರ್ತು ರಕ್ಷಣಾ ಹಾಗೂ ಪರಿಹಾರ ಕಾರ್ಯಾಚರಣೆಗಳ ಕುರಿತ ಪ್ರಾತ್ಯಕ್ಷಿಕೆಯನ್ನು ಹಮ್ಮಿಕೊಳ್ಳಲಾಗಿತ್ತು.

ಕಾರ್ಯಾಚರಣೆ ಹೇಗಿತ್ತು?

ರೈಲ್ವೇ ಅಪಘಾತ ಸಂಭವಿಸಿದ ತಕ್ಷಣ ರಕ್ಷಣಾ ಪಡೆಗಳು ಹೇಗೆ ಕಾರ್ಯೋನ್ಮುಖವಾಗಬೇಕು ಎಂಬುದನ್ನು ಇಲ್ಲಿ ಅಚ್ಚುಕಟ್ಟಾಗಿ ಪ್ರದರ್ಶಿಸಲಾಯಿತು. ಅಪಘಾತಕ್ಕೀಡಾದ ರೈಲಿನ ಬೋಗಿಗಳಲ್ಲಿ ಸಿಲುಕಿರುವ ಪ್ರಯಾಣಿಕರನ್ನು ಹಾಗೂ ಗಾಯಾಳುಗಳನ್ನು ಸುರಕ್ಷಿತವಾಗಿ ಹೊರತೆಗೆಯುವುದು, ಸ್ಥಳದಲ್ಲಿಯೇ ಅವರಿಗೆ ಪ್ರಥಮ ಚಿಕಿತ್ಸೆ ಒದಗಿಸುವುದು ಮತ್ತು ತುರ್ತು ವಾಹನಗಳ (ಆಂಬ್ಯುಲೆನ್ಸ್) ಮೂಲಕ ತ್ವರಿತವಾಗಿ ಆಸ್ಪತ್ರೆಗೆ ಸ್ಥಳಾಂತರಿಸುವ ಸಂಪೂರ್ಣ ಪ್ರಕ್ರಿಯೆಯನ್ನು ಸಿಬ್ಬಂದಿ ಮಾಡಿ ತೋರಿಸಿದರು.

ಯಾವುದೇ ವಿಪತ್ತು ಸಂಭವಿಸಿದಾಗ ಇಲಾಖೆಗಳ ನಡುವಿನ ಸಮನ್ವಯತೆ ಅತ್ಯಂತ ಮುಖ್ಯವಾಗಿರುತ್ತದೆ. ಇದನ್ನು ಸಾಬೀತುಪಡಿಸುವ ನಿಟ್ಟಿನಲ್ಲಿ ನಡೆದ ಈ ಅಣುಕು ಪ್ರದರ್ಶನದಲ್ಲಿ ರೈಲ್ವೇ ಪೊಲೀಸರು (RPF), ಗೃಹ ರಕ್ಷಕ ದಳದ ಸಿಬ್ಬಂದಿ (Home Guards), ಅಗ್ನಿಶಾಮಕ ದಳ ಹಾಗೂ ಹೊಸಪೇಟೆ ಸ್ಥಳೀಯ ಪೊಲೀಸರು ಸಕ್ರಿಯವಾಗಿ ಪಾಲ್ಗೊಂಡಿದ್ದರು.

ತುರ್ತು ಸೇವೆಗಳ ನಿರ್ವಹಣೆ, ವಿಪತ್ತು ನಿರ್ವಹಣಾ ಸಾಧನಗಳ ಬಳಕೆ ಹಾಗೂ ರಕ್ಷಣಾ ತಂಡಗಳ ಸನ್ನದ್ಧತೆಯನ್ನು ಪರಿಶೀಲಿಸಲು ಈ ಅಣುಕು ಪ್ರದರ್ಶನ ಅತ್ಯಂತ ಸಹಕಾರಿಯಾಯಿತು. ರೈಲ್ವೇ ನಿಲ್ದಾಣದ ಬಳಿ ನಡೆದ ಈ ಕಾರ್ಯಾಚರಣೆಯನ್ನು ಸ್ಥಳೀಯರು ಮತ್ತು ಪ್ರಯಾಣಿಕರು ಕುತೂಹಲದಿಂದ ವೀಕ್ಷಿಸಿದರು.

Vijayanagara: ಹಂಪಿಯ ಸ್ಮಾರಕಗಳತ್ತ ಯುನೆಸ್ಕೋ ತಂಡ: ಈ ದಿಢೀರ್ ಭೇಟಿಯ ಉದ್ದೇಶವೇನು?

Kannadaprabha News — Tue, 27 Oct 2026 18:06:27 +0530

ಹೊಸಪೇಟೆ: ಯುನೆಸ್ಕೋ ತಜ್ಞರ ತಂಡವು ಸೋಮವಾರ ಬೆಳಗ್ಗೆ ಹಂಪಿಯ ವಿರುಪಾಕ್ಷೇಶ್ವರಸ್ವಾಮಿ ದೇವಸ್ಥಾನಕ್ಕೆ ಭೇಟಿ ನೀಡಿ ದೇವಸ್ಥಾನದ ಆವರಣದಲ್ಲಿರುವ ಎಲ್ಲಾ ದೇವಸ್ಥಾನಗಳಿಗೆ ತೆರಳಿ ದರ್ಶನ ಪಡೆದುಕೊಂಡಿತು.

ವಿರೂಪಾಕ್ಷೇಶ್ವರಸ್ವಾಮಿ ದೇವಸ್ಥಾನದಲ್ಲಿ ದೇವರ ದರ್ಶನಕ್ಕೆ ತೆರಳಿದಾಗ ದೇವಸ್ಥಾನ ಆಡಳಿತ ಮಂಡಳಿಯವರು ವಿಶೇಷ ಪೂಜೆ ಸಲ್ಲಿಸಿ, ಯುನೆಸ್ಕೋ ತಂಡದ ಮುಖ್ಯಸ್ಥರಿಗೆ ಶಾಲು, ಹೂವಿನಹಾರ, ಹಣ್ಣು ಪ್ರಸಾದ ನೀಡಿ ಸನ್ಮಾನಿಸಿ ಗೌರವಿಸಿದರು.

ವಿರೂಪಾಕ್ಷೇಶ್ವರ, ಪಂಪಾದೇವಿ, ಶ್ರೀ ಕೃಷ್ಣ ದೇವಸ್ಥಾನ, ಭುವನೇಶ್ವರಿ ದೇಗುಲ ದರ್ಶನ

ವಿರೂಪಾಕ್ಷೇಶ್ವರ ದೇವರ ದರ್ಶನದ ನಂತರ ಪಂಪಾದೇವಿ ಮತ್ತು ಭುವನೇಶ್ವರಿ ದರ್ಶನ ಪಡೆದುಕೊಂಡು ದೇವಸ್ಥಾನದ ಮಹಿಮೆ, ಮತ್ತು ದೇವರ ಶಕ್ತಿ ರೂಪದ ಬಗ್ಗೆ ಮತ್ತು ಭಕ್ತರು ಎಲ್ಲೆಲ್ಲಿಂದ ದೇವಸ್ಥಾನಕ್ಕೆ ಬರಲಾಗುತ್ತದೆ ಎನ್ನುವ ಮಾಹಿತಿಯನ್ನು ಅಧಿಕಾರಿಗಳಿಂದ ಪಡೆದುಕೊಂಡರು.

ವಿರೂಪಾಕ್ಷೇಶ್ವರಸ್ವಾಮಿಯ ದೇವಸ್ಥಾನದಲ್ಲಿರುವ ರಾಜಗೋಪುರ ಸೇರಿದಂತೆ ವಿವಿಧ ಗೋಪುರಗಳ ಬಗ್ಗೆ ಮಾಹಿತಿ ಪಡೆದುಕೊಂಡರು. ದೇವಸ್ಥಾನದಲ್ಲಿ ಭಕ್ತರಿಗೆ ಯಾವ ರೀತಿ ವ್ಯವಸ್ಥೆ ಕಲ್ಪಿಸಲಾಗಿದೆ. ಭಕ್ತರಿಗೆ ಮತ್ತು ಪ್ರವಾಸಿಗರಿಗೆ ಇನ್ನೂ ಏನೇನು ಸೌಲಭ್ಯಗಳು ಅಗತ್ಯ ಇವೆ ಎನ್ನುವ ಮಾಹಿತಿ ಪಡೆದುಕೊಂಡರು.

ಎದುರು ಬಸವಣ್ಣ, ಸಾಲು ಮಂಟಪ, ಮಹಾನವಮಿ ದಿಬ್ಬ ಸೇರಿ ಸ್ಮಾರಕಗಳ ವೀಕ್ಷಣೆ

ನಂತರ ಎದುರು ಬಸವಣ್ಣ ಮಂಟಪದ ಬಳಿ ತೆರಳಿ ಎದುರು ಬಸವಣ್ಣ ಮಂಟಪ ಹಾಗೂ ಬಸವಣ್ಣ ಮೂರ್ತಿ ಸೇರಿದಂತೆ ಎರಡು ಬದಿಯಲ್ಲಿರುವ ಸಾಲು ಮಂಟಪಗಳ ಸ್ಥಿತಿಗತಿಯ ಬಗ್ಗೆ ಮಾಹಿತಿ ಪಡೆದುಕೊಂಡರು.

ಎದುರು ಬಸವಣ್ಣ ಮಂಟಪದ ಹಿಂದೆ ಅಚ್ಚುತದೇವರಾಯ ಬಜಾರ್‌ಗೆ ತೆರಳುವ ಮೆಟ್ಟಲು ಮೇಲೆ ಹತ್ತಿ ವಿರೂಪಾಕ್ಷೇಶ್ವರ ಬಜಾರ್‌ ಈ ಹಿಂದೆ ಹೇಗಿತ್ತು. ದೇವಸ್ಥಾನದ ಎರಡು ಬದಿಯಲ್ಲಿ ಮಹಡಿಯ ಸಾಲು ಮಂಟಪಗಳನ್ನು ವೀಕ್ಷಿಸಿದರು.

ಕೆಲ ವರ್ಷಗಳ ಹಿಂದೆ ಸಾಲು ಮಂಟಪಗಳು ವ್ಯಾಪಾರ ಕೇಂದ್ರಗಳಾಗಿದ್ದವು. ಅಂಗಡಿಗಳನ್ನು ತೆರವುಗೊಳಿಸಿ, ಈಗ ಸಾಲು ಮಂಟಪಗಳ ಯಥಾಸ್ಥಿತಿಯನ್ನು ಕಾಪಾಡಿಕೊಳ್ಳಲಾಗಿದೆ ಎನ್ನುವ ಮಾಹಿತಿಯನ್ನು ಯುನೆಸ್ಕೋ ತಂಡಕ್ಕೆ ಅಧಿಕಾರಿಗಳು ವಿವರಿಸಿದರು.

ನಂತರ ಶ್ರೀಕೃಷ್ಣ ಬಜಾರ್‌ ಗೆ ತೆರಳಿ ಕೃಷ್ಣ ದೇವಸ್ಥಾನದ ಮುಂದಿರುವ ಬಜಾರ್‌ ಮತ್ತು ಸಾಲುಮಂಟಪಗಳ ಬಗ್ಗೆ ಮಾಹಿತಿ ಪಡೆದುಕೊಂಡರು. ನಂತರ ಬಾಲ ಕೃಷ್ಣ ದೇವಸ್ಥಾನಕ್ಕೆ ತೆರಳಿ ದೇವಸ್ಥಾನದ ಗೋಪುರ, ಗೋಪುರದಲ್ಲಿರು ಚಿತ್ರಗಳ ಇಟ್ಟಿಗೆಗಳು ಮಳೆಗೆ ಕರಗುತ್ತಿರುವ ಬಗ್ಗೆ ಮಾಹಿತಿ ಪಡೆದುಕೊಂಡರು. ಯುನೆಸ್ಕೋ ತಂಡದವರು ತಮ್ಮ ಮೊಬೈಲ್ ನಲ್ಲಿ ಫೋಟೋ ತೆಗೆದುಕೊಂಡರು. ನಂತರ ಬಾಲ ಕೃಷ್ಣ ದೇವಸ್ಥಾನಕ್ಕೆ ತೆರಳಿ ದೇವರ ವಿಗ್ರಹ ಇಲ್ಲದಿದ್ದರೂ ದೇವರ ಗರ್ಭಗುಡಿಯೊಳೆಗೆ ತೆರಳಿದಾಗ ಗರ್ಭಗುಡಿ ಭಾರೀ ಕತ್ತಲು ಆವರಿಸಿತ್ತು. ಯುನೆಸ್ಕೋ ತಂಡದವರು ಮತ್ತು ಅಧಿಕಾರಿಗಳು ಮೊಬೈಲ್‌ ಬೆಳಕು ಹಾಕಿಕೊಂಡು ದೇವಸ್ಥಾನ ವೀಕ್ಷಿಸಿದ್ದು ವಿಶೇಷವಾಗಿತ್ತು.

ಹಂಪಿಯ ಸ್ಮಾರಕಗಳ ರಕ್ಷಣೆಗೆ ನಿತ್ಯವೂ ಕಾಳಜಿ ವಹಿಸುತ್ತಿರುವ ಕೇಂದ್ರ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ ಸಿಬ್ಬಂದಿಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿ, ಸಿಬ್ಬಂದ್ದಿಯೊಂದಿಗೆ ಯುನೆಸ್ಕೋ ತಂಡದವವರು ಫೋಟೋ ತೆಗೆಸಿಕೊಂಡರು.

ನಂತರ ಉಗ್ರ ನರಸಿಂಹ, ಬಡವಿಲಿಂಗ ಮಂಟಪಗಳನ್ನು ದೂರದಿಂದಲೇ ವೀಕ್ಷಿಸಿ, ವಾಹನಗಳ ಪಾರ್ಕಿಂಗ್‌ ಪ್ರದೇಶಕ್ಕೆ ಭೇಟಿ ನೀಡಿ ಪಾರ್ಕಿಂಗ್‌ ಪ್ರದೇಶದಲ್ಲಿ ಪ್ರವಾಸೋಧ್ಯಮ ಇಲಾಖೆಯಿಂದ ನಿರ್ಮಾಣವಾಗಿರುವ ಹೋಟಲ್‌ಗಳು, ಶೌಚಾಲಯಗಳ ನೂತನ ಕಟ್ಟಡದ ಬಗ್ಗೆ ಮಾಹಿತಿ ಪಡೆದುಕೊಂರು.

ಹಂಪಿಯಲ್ಲಿ ನಿರ್ಮಾಣವಾಗಿರುವ ನೂತನ ರಸ್ತೆಯನ್ನು ವೀಕ್ಷಿಸಿ, ಇದೇ ರಸ್ತೆಯಲ್ಲಿ ಬರುವ ಹಿರಿಯ ಛತ್ರವನ್ನು ವೀಕ್ಷಿಸಿದರು. ನಂತರ ಮಹಾನವಮಿ ದಿಬ್ಬಕ್ಕೆ ತೆರಳಿ, ಸುಮಾರು ಒಂದು ಗಂಟೆಗಳ ಕಾಲ ದಿಬ್ಬದ ಕೆಳಭಾಗದಲ್ಲಿರುವ ಕಲ್ಲಿನ ಬಾಗಿಲುಗಳನ್ನು ವೀಕ್ಷಿಸಿ, ಅದರ ಬಗ್ಗೆ ಮಾಹಿತಿ ಪಡೆದುಕೊಂಡರು. ಮಹಾನವಮಿ ದಿಬ್ಬವನ್ನು ಹತ್ತಿ ಮೇಲಿನಿಂದ ಹಂಪಿಯ ನೋಟವನ್ನು ವೀಕ್ಷಿಸಿ, ತಮ್ಮ ಮೊಬೈಲ್‌ನಲ್ಲಿ ಫೋಟೋ ತೆಗೆದುಕೊಂಡರು.

ನಂತರ ವಿಜಯನಗರ ಸಾಮ್ರಾಜ್ಯದಲ್ಲಿ ನೀರಾವರಿ ವ್ಯವಸ್ಥೆ ಹೇಗಿತ್ತು ಎನ್ನುವುದಕ್ಕೆ ಕಲ್ಲಿನ ಕಾಲುವೆಗಳ ಮೂಲಕ ನೀರಾವರಿ ವ್ಯವಸ್ಥೆಯನ್ನು ವೀಕ್ಷಿಸಿ ಆಶ್ಚರ್ಯವ್ಯಕ್ತಪಡಿಸಿದರು. ಯುನೆಸ್ಕೋ ತಂಡದವರು ಹಂಪಿಯ ಸ್ಮಾರಕಗಳನ್ನು ವೀಕ್ಷಿಸಿ ಭೋಜನ ವಿರಾಮದ ನಂತರ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದರು.

ಯುನೆಸ್ಕೋ ತಂಡದ ಅಂತರರಾಷ್ಟ್ರೀಯ ಪಾರಂಪರಿಕ ಪರಿಣಿತ ಕಿನ್ಯಾದ ಜಾರ್ಜ್‌ ಅಬುಂಗ್‌, ಜಪಾನ್‌ನ ಇಚಿಡಾ ಶಿಮೋಡಾ, ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ ಹೆಚ್ಚುವರಿ ಮಹಾನಿರ್ದೇಶಕ ಜಾನ್ವಿಜ್‌ ಶರ್ಮಾ ಸೇರಿದಂತೆ ಆರು ಜನರ ತಂಡದ ಸದಸ್ಯರು, ಜಿಲ್ಲಾಧಿಕಾರಿ ಕವಿತಾ ಎಸ್‌. ಮನ್ನಿಕೇರಿ ಸೇರಿದಂತೆ ವಿವಿಧ ಇಲಾಖೆಗಳ ಅಧಿಕಾರಿಗಳು ಭಾಗವಹಿಸಿದ್ದರು.

ಮಾಜಿ ಸಿಎಂ ಸಿದ್ದರಾಮಯ್ಯ ಹೆಸರಿಗೆ ಮಸಿ ಬಳಿಯುವ ಕೆಲಸ ನಡೆಯುತ್ತಿದೆ: ಬಿ.ಶ್ರೀರಾಮುಲು

Kannadaprabha News — Thu, 15 Oct 2026 12:31:45 +0530

ಹೊಸಪೇಟೆ: ಮಾಜಿ ಸಿಎಂ ಸಿದ್ದರಾಮಯ್ಯ ಯಾವುದೇ ತಪ್ಪು ಆಗದಂತೆ ರಾಜಕೀಯ ಮಾಡಿಕೊಂಡು ಬಂದ ಹಿಂದುಳಿದ ವರ್ಗದ ದೊಡ್ಡ ನಾಯಕ. ಅವರ ವೈಯಕ್ತಿಕ ಜೀವನಕ್ಕೆ ಕಪ್ಪು ಚುಕ್ಕೆ ತರಲು ಯತ್ನ ನಡೆಯುತ್ತಿದೆ ಎಂದು ಮಾಜಿ ಸಚಿವ ಬಿ. ಶ್ರೀರಾಮುಲು ಹೇಳಿದರು.

ಅವರು ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿ, ಈ ಹಿಂದೆ ರಮೇಶ್ ಜಾರಕಿಹೊಳಿ ವಿಡಿಯೋ ಪ್ರಕರಣ ನಡೆದಿತ್ತು. ಕಾಂಗ್ರೆಸ್ ಮುಖಂಡ ರಾಜಣ್ಣ ವಿರುದ್ಧವೂ ಷಡ್ಯಂತ್ರ ನಡೆದಿತ್ತು.ಇದಕ್ಕೂ ಮೊದಲು ಅನೇಕ ಜನರಿಗೆ ಇದೇ ರೀತಿ ಮಾಡಿದ್ದಾರೆ. ರಿಯಲ್ ಎಸ್ಟೇಟ್‌ ರೀತಿ ಈಗ ಸಿಡಿ ಫ್ಯಾಕ್ಟರಿ ಕೆಲಸ ಮಾಡುತ್ತಿದ್ದಾರೆ. ಈಗ ಸಿದ್ದರಾಮಯ್ಯ ಪಾಳೆ ಬಂದಿದೆ. ಸಿದ್ದರಾಮಯ್ಯ ತೇಜೋವಧೆ ಮಾಡಲು ತಂತ್ರಗಾರಿಕೆ ನಡೆಸಲಾಗುತ್ತಿದೆ ಎಂದು ಆರೋಪಿಸಿದರು.

ಯಾವ ವಿಡಿಯೋ ಇರಲು ಸಾಧ್ಯವಿಲ್ಲ

ಸಿದ್ದರಾಮಯ್ಯ ರಾಜ್ಯ ರಾಜಕಾರಣದ ಮಾಸ್ ಲೀಡರ್. ಸಿದ್ದರಾಮಯ್ಯ ಅವರನ್ನು ಕುಗ್ಗಿಸುವ ಪ್ರಯತ್ನ ನಡೆಯುತ್ತಿದೆ. ಸಿದ್ದರಾಮಯ್ಯ ಹೆಸರಿಗೆ ಮಸಿ ಬಳಿಯುವ ಕೆಲಸ ನಡೆಯುತ್ತಿದೆ. ಸಿದ್ದರಾಮಯ್ಯ ಅವರದ್ದು ಎನ್ನಲಾಗುವ ಯಾವ ವಿಡಿಯೋ ಇರಲು ಸಾಧ್ಯವಿಲ್ಲ. ಅದೇನಿದ್ದರೂ ತಂತ್ರಜ್ಞಾನ ಬಳಸಿ ಸೃಷ್ಟಿಸಿದ ವಿಡಿಯೊ ಇರಬಹುದು. ಅದನ್ನು ಇಟ್ಟುಕೊಂಡು ಅಧಿಕಾರ ಹಸ್ತಾಂತರಿಸಿದ ನಂತರವೂ ಬೆದರಿಸಲಾಗುತ್ತಿದೆ ಎಂದು ಹೇಳಿದರು.

ವೈಯಕ್ತಿಕ ಜೀವನದೊಳಗೆ ಇಣುಕಿ ನೋಡುವ ಪ್ರಯತ್ನ

ರಾಜಕಾರಣದಲ್ಲಿ ನಾನಾ ವರ್ಗದ ಜನರನ್ನು ಭೇಟಿ ಮಾಡಬೇಕಿರುತ್ತದೆ. ವೈಯಕ್ತಿಕ ಜೀವನದೊಳಗೆ ಇಣುಕಿ ನೋಡುವ ಪ್ರಯತ್ನ ಯಾರೂ ಮಾಡಬಾರದು. ಸಿದ್ದರಾಮಯ್ಯ ಅವರ ಹೆಸರಿಗೆ ಕಳಂಕ ತರುವ ಕೆಲಸ ಆಗುತ್ತಿದೆ. ಅದೇ ವೀಡಿಯೋ ಇಟ್ಟುಕೊಂಡು ಅವರನ್ನ ಮುಖ್ಯಮಂತ್ರಿ ಸ್ಥಾನದಿಂದ ಕೆಳಗಿಳಿಸಲಾಗಿದೆ ಎಂದು ಹೇಳಿದರು.

ಕಬ್ಬು ಬೆಳೆಗಾರರ ಬೇಡಿಕೆ ಕುರಿತಂತೆ ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಮಾತುಕತೆ ನಡೆಸುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಕೇಂದ್ರ ಸರ್ಕಾರ ಒಂದು ತೀರ್ಮಾನಕ್ಕೆ ಬರಲಿದೆ. ರಾಜ್ಯ ಸರ್ಕಾರ ಸಹ ನಿರ್ಧಾರಕ್ಕೆ ಬರಬೇಕು ಎಂದು ಹೇಳಿದರು.

ಹೊಸಪೇಟೆ ನಿಲ್ದಾಣದ ಕಸದ ತೊಟ್ಟಿ ಮೇಲಿದೆ ಹೃದಯಸ್ಪರ್ಶಿ ಸಾಲುಗಳು! ವಿಡಿಯೋಗೆ 20 ಲಕ್ಷ ವ್ಯೂವ್

Mahmad Rafik — Tue, 13 Oct 2026 14:45:14 +0530

ಹೊಸಪೇಟೆ: ಪ್ರೀತಿಯ ವ್ಯೂಹದಲ್ಲಿ ಸಿಲುಕಿದೋರು ಕವಿಗಳು ಆಗ್ತಾರೆ ಎಂಬ ಮಾತಿದೆ. ಅದೇ ಪ್ರೀತಿಯಲ್ಲಿ ಮೋಸ ಹೋದವರು ದೊಡ್ಡ ದೊಡ್ಡ ಜ್ಞಾನಿಯಾಗಿ ಬದಲಾಗುತ್ತಾರೆ ಎಂಬ ಮಾತುಗಳಿವೆ. ಪ್ರೀತಿಗೆ ಸಂಬಂಧಿಸಿದ ಸಾಲುಗಳು ಅಥವಾ ಪುಟ್ಟ ಕವನಗಳು ಹೆಚ್ಚ ಗಮನ ಸೆಳೆಯುತ್ತವೆ. ಅದರಲ್ಲೂ ಆಟೋ ಹಿಂಬದಿ ಬರಹಗಳಂತೂ ವಿಶೇಷ ಅರ್ಥದ ಜೊತೆ ಎಲ್ಲರನ್ನು ಆಕರ್ಷಿಸುತ್ತವೆ. ಇತ್ತೀಚೆಗೆ ಜನರು ತಮ್ಮ ಬೈಕ್, ಕಾರ್ ಮೇಲೆಯೂ ಪ್ರೀತಗೆ ಸಂಬಂಧಿಸಿದ ಸುಂದರ ಸಾಲುಗಳನ್ನು ಬರೆಸಿಕೊಳ್ಳುತ್ತಾರೆ. ಆದ್ರೆ ಹೊಸಪೇಟೆಯಲ್ಲಿ ಅನಾಮಿಕ ಕವಿಯೋರ್ವ, ಕೆಲವು ಸುಂದರವಾದ ಸಾಲುಗಳನ್ನು ರೈಲ್ವೆ ನಿಲ್ದಾಣದ ಡಸ್ಟ್‌ಬಿನ್ (ಕಸದ ತೊಟ್ಟಿ) ಮೇಲೆ ಬರೆದಿದ್ದಾರೆ.

ಹೊಸಪೇಟೆ ರೈಲು ನಿಲ್ದಾಣಕ್ಕೆ (Hosapete Railway Station) ಬಂದಿದ್ದ ಯುವತಿ, ಡಸ್ಟ್‌ಬಿನ್ ಮೇಲಿನ ಸಾಲುಗಳನ್ನು ಗಮನಿಸಿ ವಿಡಿಯೋ ಮಾಡಿದ್ದಾರೆ. ಈ ವಿಡಿಯೋದಲ್ಲಿ ಆ ಸಾಲುಗಳು ಏನು ಎಂಬುದನ್ನು ಸಹ ಓದಿ ಹೇಳಿದ್ದಾರೆ. ಸದ್ಯ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ (Social Media) ವೈರಲ್ ಆಗುತ್ತಿದೆ. ಹಾಗೆಯೇ ವಿಡಿಯೋ ಜೊತೆಗೆ ಯುವತಿ ಸುಂದರ ಶೀರ್ಷಿಕೆಯನ್ನು ಬರೆದುಕೊಂಡಿದ್ದಾರೆ.

ಯುವತಿ ಪೋಸ್ಟ್

ಹೊಸಪೇಟೆ ರೈಲ್ವೆ ಸ್ಟೇಷನ್‌ನ ಒಂದು ವಿಭಿನ್ನ ಪ್ರೇಮ ಕಥೆ. ರೈಲ್ವೆ ಸ್ಟೇಷನ್‌ನ ಡಸ್ಟ್‌ಬಿನ್ ಮೇಲೂ ಪ್ರೀತಿಯ ಕವಿತೆ ಬರೆದಿದ್ದಾನೆ ಒಬ್ಬ ಪ್ರೇಮಿ. ಕೆಲವರಿಗೆ ಪ್ರೀತಿ ಹೃದಯದಲ್ಲಿ ಉಳಿಯುತ್ತದೆ, ಇನ್ನು ಕೆಲವರಿಗೆ ನೆನಪಾಗಿ ಉಳಿಯುತ್ತದೆ. ಆದರೆ ಕೆಲವರ ಪ್ರೀತಿ ಮಾತ್ರ ಪದಗಳಾಗಿ ಎಲ್ಲೋ ಒಂದು ಕಡೆ ಕಾಣಿಸಿಕೊಳ್ಳುತ್ತದೆ. ಪ್ರೀತಿ ಸಿಕ್ಕವರಿಗೆ ಜೀವನ ಸುಂದರ. ಪ್ರೀತಿ ಕಳೆದುಕೊಂಡವರಿಗೆ ಪ್ರತಿಯೊಂದು ಜಾಗವೂ ಒಂದು ನೆನಪು!

ಡಸ್ಟ್‌ಬಿನ್ ಮೇಲೆ ಬರೆದ ಕವನ ಈ ರೀತಿಯಾಗಿದೆ

ಪ್ರೀತಿಯ ಕೋಗಿಲೆ ಕೂಗಿದಾಗ

ಹೃದಯದ ರಾಗ ಹಾಡಿದಾಗ

ಉದಯಿಸಿತು ಪ್ರೀತಿಯ ಅನುರಾಗ

ಬಯಸಿಯ ನಿನ್ನ ಮನದಲ್ಲೊಂದು ಜಾಗ

ಕವಿತೆಯನ್ನು ನೋಡಿ ಯುವತಿ ಹೇಳಿದ್ದೇನು?

ಈ ವಿಡಿಯೋವನ್ನು priyaprathu_official ಹೆಸರಿನ ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳಲಾಗಿದೆ. ಇಲ್ಲಿಯವರೆಗೆ ಈ ವಿಡಿಯೋಗೆ 2 ಮಿಲಿಯನ್‌ಗೂ ಅಧಿಕ ವ್ಯೂವ್ ಮತ್ತು ನೂರಾರು ಕಮೆಂಟ್‌ಗಳು ಬಂದಿವೆ. ಪ್ರೀತಿಗೆ ಕಣ್ಣಿಲ್ಲ ಅಂತ ಕೇಳಿದ್ದೆ. ಆದ್ರೆ ಇಲ್ಲೊಬ್ಬ ಪ್ರೇಮಿ ಡಸ್ಟ್‌ಬಿನ್ ಮೇಲೆ ಕವನ ಬರೆದಿದ್ದಾರೆ. ಹೊಸಪೇಟೆ ರೈಲು ನಿಲ್ದಾಣದಲ್ಲ ನಿಂತಾಗ ಡಸ್ಟ್‌ಬಿನ್ ಮೇಲಿನ ಸಾಲುಗಳು ಕಾಣಿಸಿತು. ನೋಡಿದಾಗ ಅದು ಕವಿತೆಯಾಗಿತ್ತು. ನೀವೇನಾದ್ರೂ ಹೊಸಪೇಟೆ ಜಂಕ್ಷನ್‌ಗೆ ಬಂದ್ರೆ ಈ ಸಾಲುಗಳನ್ನು ನೋಡಿ ಎಂದು ವ್ಲಾಗರ್ ಪ್ರಿಯಾ ಹೇಳಿದ್ದಾರೆ.

ಯಾರು ಈ ಸಾಲುಗಳನ್ನು ಬರೆದಿದ್ದು?

ಈ ವಿಡಿಯೋಗೆ ತಮಾಷೆಯಾಗಿ ಹಲವರು ಪ್ರತಿಕ್ರಿಯಿಸಿದ್ದಾರೆ. ಆ ಸಾಲುಗಳನ್ನು ನಾನೇ ಬರದಿದ್ದು. ಸುಮ್ಮನೇ ಕುಳಿತು ಬೇಜಾರು ಆಗಿತ್ತು. ಆ ಸಂದರ್ಭದಲ್ಲಿ ಬರೆದೆ ಎಂದು its_king_vk18 ಎಂಬ ಇನ್‌ಸ್ಟಾಗ್ರಾಂ ಖಾತೆಯಿಂದ ಕಮೆಂಟ್ ಬಂದಿದೆ. ಒಂದಿಷ್ಟು ಜನರು ನಿಮಗಾಗಿಯೇ ಈ ಸಾಲು ಬರೆದೆ ಅಂದ್ರೆ, ಒಂದಿಷ್ಟು ಜನರು ನಿಮಗೆ ಬೇರೆ ಎಲ್ಲಿಯೂ ಜಾಗ ಸಿಗಿಲಿಲ್ಲವೇ ಎಂದು ಪ್ರಶ್ನೆ ಮಾಡಿದ್ದಾರೆ.

ಇದನ್ನೂ ಓದಿ: ಕಲಬುರಗಿ ವೈರಲ್ ವಿಡಿಯೋ: 300 ವರ್ಷದ ಹಳೆ ಮನೆಯಲ್ಲಿರುವ ಅಜ್ಜಿ ಬಚ್ಚಿಟ್ಟಿದ್ದ ಪೆಟ್ಟಿಗೆ ಓಪನ್ ಮಾಡಿದ ಮೊಮ್ಮಗ

View this post on Instagram

A post shared by PRIYA (@priyaprathu_official)

64.50 ಎಕರೆ ಜಮೀನು ಲೀಸ್‌ ನೀಡಿದ್ದರಿಂದ ನನ್ನ ಕನಸು ನೂಚ್ಚುನೂರು: ಆನಂದ್ ಸಿಂಗ್‌

Kannadaprabha News — Mon, 19 Oct 2026 07:17:03 +0530

ಹೊಸಪೇಟೆ: ನಗರಸಭೆಯಿಂದ ಕೇವಲ 5 ಕಿಮೀ ವ್ಯಾಪ್ತಿಯೊಳಗೆ ಆರ್‌ಬಿಎಸ್‌ಎಸ್‌ಎನ್ ಗಣಿ ಕಂಪನಿಗೆ 64.50 ಎಕರೆ ಜಮೀನನ್ನು 30 ವರ್ಷಗಳ ಕಾಲ ಮತ್ತೆ ಲೀಜ್‌ಗೆ ನೀಡಿ ರಾಜ್ಯ ಸಂಪುಟ ಸಭೆ ಅಂಗೀಕಾರ ಮಾಡಿದ್ದರಿಂದ ಸಕ್ಕರೆ ಕಾರ್ಖಾನೆ ನಿರ್ಮಾಣದ ನನ್ನ ಕನಸು ನುಚ್ಚುನೂರಾಗಿದೆ ಎಂದು ಮಾಜಿ ಸಚಿವ ಆನಂದ ಸಿಂಗ್‌ ಹೇಳಿದರು.

64.50 ಎಕರೆ ಜಮೀನು ಲೀಸ್‌

ನಗರದಲ್ಲಿ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ನಾನು ಶಾಸಕನಾಗಿದ್ದಾಗಲೇ ಆರ್‌ಬಿಎಸ್‌ಎಸ್‌ಎನ್ ಮತ್ತೆ ಲೀಸ್‌ ಕೇಳಲು ನನ್ನ ಬಳಿ ಬಂದಿತ್ತು. ಆಗ ನಾನು ಆಗುವುದಿಲ್ಲ ಎಂದು ಹೇಳಿದ್ದೆ. ನಂತರ ನಡೆದ ಚುನಾವಣೆಯಲ್ಲಿ ನಾನು ಸೋತು ಗವಿಯಪ್ಪ ಶಾಸಕರಾದ ನಂತರ ಮೊದಲ ಬಾರಿ ಸಚಿವ ಸಂಪುಟಕ್ಕೆ 64.50 ಎಕರೆ ಜಮೀನು ಲೀಸ್‌ ವಿಷಯ ಬಂದಿತು. ಆಗ ನಾನು ಶಾಸಕ ಗವಿಯಪ್ಪ ಮತ್ತು ಜಿಲ್ಲಾ ಉಸ್ತುವಾರಿ ಸಚಿವ ಮತ್ತು ಮುಖ್ಯಮಂತ್ರಿಗಳ ಗಮನಕ್ಕೂ ತಂದಿದ್ದೆ. ಈ ಕುರಿತು ಮರು ಪರಿಶೀಲನೆ ಮಾಡಿ ಎಂದು ಕೇಳಿಕೊಂಡಿದ್ದೇನೆ ಎಂದರು.

ವಿಜಯನಗರ ಸಾಮ್ರಾಜ್ಯದ ಹೆಸರು ಉಳಿಯಲು ಹೊಸಪೇಟೆಯನ್ನು ನೂತನ ವಿಜಯನಗರ ಜಿಲ್ಲೆಯನ್ನಾಗಿ ಮಾಡಬೇಕು ಎಂದು ಕನಸು ಕಂಡಿದ್ದೆ, ವಿಜಯನಗರ ಜಿಲ್ಲೆ ಮಾಡುವಾಗಲೂ ಹೋರಾಟಗಾರರು ಅನೇಕ ಹೋರಾಟ ಮಾಡಿದ್ದರು. ನನ್ನ ಅಧಿಕಾರವಧಿಯಲ್ಲಿ ವಿಜಯನಗರ ಜಿಲ್ಲೆ ಆಗಲೇಬೇಕು ಎಂದು ಹಠ ಹಿಡಿದ ಕಾರಣ ವಿಜಯನಗರ ಜಿಲ್ಲೆ ರಚನೆಯಾಯಿತು. ಜಿಲ್ಲೆ ರಚನೆಯಾದಾಗಲೇ ಸಕ್ಕರೆ ಕಾರ್ಖಾನೆ ಪ್ರಾರಂಭಿಸಲೇಬೇಕು ಎಂದುಕೊಂಡಿದ್ದೆ. ಈ ಹಿಂದೆ ಬಿಜೆಪಿ ಸರ್ಕಾರದ ಅವಧಿಯಲ್ಲಿ 80 ಎಕರೆ ಸಕ್ಕರೆ ಕಾರ್ಖಾನೆಗಾಗಿ ಜಮೀನು ಕಾಯ್ದಿರಿಸಲಾಗಿತ್ತು.

ಸಕ್ಕರೆ ಕಾರ್ಖಾನೆ ಪ್ರಾರಂಭದ ಕನಸು

ಈ 80 ಎಕರೆ ಜತೆಗೆ ಆರ್‌ಬಿಎಸ್‌ಎಸ್‌ಎನ್‌ ಅವರಿಗೆ ನೀಡಲಾಗಿದ್ದ 64.50 ಎಕರೆ ಜಮೀನು ಲೀಸ್‌ ಮುಗಿದ ಮೇಲೆ ಈ ಎರಡು ಜಮೀನು ಸೇರಿಸಿ ಸಕ್ಕರೆ ಕಾರ್ಖಾನೆ ಪ್ರಾರಂಭಿಸಲು ಕನಸು ಕಟ್ಟಿಕೊಳ್ಳಲಾಗಿತ್ತು. ಆದರೆ ಆರ್‌ಬಿಎಸ್‌ಎಸ್‌ಎನ್‌ಗೆ ಮತ್ತೆ 30 ವರ್ಷಗಳ ಜಮೀನನ್ನು ಲೀಸ್‌ ನೀಡಿರುವುದರಿಂದ ಸಕ್ಕರೆ ಕಾರ್ಖಾನೆಗಾಗಿ ಕಂಡಿದ್ದ ನನ್ನ ಕನಸು ನುಚ್ಚುನೂರಾಯಿತು ಎಂದು ಬೇಸರ ವ್ಯಕ್ತಪಡಿಸಿದರು.

ಕಾರಿಗನೂರು ಬಳಿ ಸಕ್ಕರೆ ಕಾರ್ಖಾನೆಗೆ ಸೂಕ್ತ ಪ್ರದೇಶವಾಗಿತ್ತು. ಈ ಪ್ರದೇಶವೂ ಈಗ ಕೈತಪ್ಪಿ ಹೋಗಿದೆ. ಇದರಿಂದ ಹೊಸಪೇಟೆಯಲ್ಲಿ ಸಕ್ಕರೆ ಕಾರ್ಖಾನೆ ಪ್ರಾರಂಭಿಸುವುದು ಅಷ್ಟು ಸುಲಭವಲ್ಲ. ಆದರೆ ಶಾಸಕ ಗವಿಯಪ್ಪ ಕಾಳಘಟ್ಟ ಬಳಿ ಸಕ್ಕರೆ ಕಾರ್ಖಾನೆಗೆ ಜಮೀನು ಗುರುತಿಸಿದ್ದಾರೆ ಎಂದು ಹೇಳುತ್ತಿದ್ದಾರೆ. ಕಾಳಘಟ್ಟ ಪ್ರದೇಶವು ಹಂಪಿ ಅಭಿವೃದ್ಧಿ ಪ್ರಾಧಿಕಾರದ ವ್ಯಾಪ್ತಿಯಲ್ಲಿ ಬಂದರೆ ಕಷ್ಟ. ಹಂಪಿ ಪ್ರಾಧಿಕಾರದವರು ಸಕ್ಕರೆ ಕಾರ್ಖಾನೆಗೆ ಪರವಾನಗಿ ನೀಡುತ್ತಾರೋ ನೋಡಬೇಕು. ಆದರೆ ಸಕ್ಕರೆ ಕಾರ್ಖಾನೆಯ ಬಗ್ಗೆ ಸ್ಥಳೀಯ ರೈತರು ಉಪವಾಸ ಸತ್ಯಾಗ್ರಹ ನಡೆಸಿದಾಗ ಶಾಸಕ ಗವಿಯಪ್ಪ ನ. 10ರಂದು ರೈತರಿಗೆ ಒಂದು ಒಳ್ಳೆ ಸುದ್ದಿ ನೀಡುತ್ತೇನೆ ಎಂದು ಹೇಳಿರುವುದನ್ನು ನಾನು ಸ್ವಾಗತಿಸುತ್ತೇನೆ. ಅಂದಿನ ಸಭೆಗೆ ನನಗೂ ಆಹ್ವಾನ ಬಂದರೆ ಖಂಡಿತವಾಗಿಯೂ ಹೋಗುತ್ತೇನೆ. ಆ ದಿನಕ್ಕಾಗಿ ನಾನು ಕಾಯುತ್ತೇನೆ ಎಂದು ಹೇಳಿದರು.

ಸಕ್ಕರೆ ಕಾರ್ಖಾನೆ ಪ್ರಾರಂಭಿಸುವಿರಾ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ಸಕ್ಕರೆ ಕಾರ್ಖಾನೆ ಪ್ರಾರಂಭಿಸಲು ಸುಮಾರು ₹200-300 ಕೋಟಿ ಹಣ ಬೇಕು, ಅಷ್ಟೊಂದು ಹಣ ನನ್ನ ಬಳಿ ಇಲ್ಲ. ಸ್ಥಳೀಯ ಶಾಸಕರು ಶ್ರೀಮಂತರು ಅವರನ್ನು ಕೇಳಿ ಎಂದು ನಗುತ್ತಾ ಉತ್ತರಿಸಿದರು.

ರಾಣಿ ಸಂಯುಕ್ತಾಗೆ ಬಿಜೆಪಿ ಟಿಕೆಟ್‌?

ಮುಂದಿನ ವಿಧಾನಸಭಾ ಚುನಾವಣೆಯಲ್ಲಿ ಹಾಲಿ ಶಾಸಕ ಗವಿಯಪ್ಪ ಅವರಿಗೆ ಕಾಂಗ್ರೆಸ್‌ ಟಿಕೆಟ್‌ ಸಿಕ್ಕರೆ, ರಾಣಿ ಸಂಯುಕ್ತಾ ಅವರಿಗೆ ಮತ್ತೆ ಅನ್ಯಾಯವಾಗಬಹುದು ಎಂದು ಆನಂದ್‌ ಸಿಂಗ್‌ ಹೇಳಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಹಿಂದೆ ರಾಣಿ ಸಂಯುಕ್ತಾ 15 ವರ್ಷ ಬಿಜೆಪಿಯಲ್ಲಿ ಪಕ್ಷಕ್ಕಾಗಿ ದುಡಿದ್ದಾರೆ. ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯಿಂದ ನಾನು ಸ್ಪರ್ಧಿಸಲ್ಲ ಎಂದು ಹೇಳಿದಾಗ ಸಿದ್ಧಾರ್ಥ ಸಿಂಗ್‌ ಅವರಿಗೆ ಬಿಜೆಪಿ ಟಿಕೆಟ್‌ ನೀಡಿದ್ದರು. ಸಿದ್ಧಾರ್ಥ ಸಿಂಗ್‌ ಅವರಿಗೆ ಬಿಜೆಪಿ ಟಿಕೆಟ್ ಸಿಕ್ಕಾಗ ರಾಣಿ ಸಂಯುಕ್ತಾ ಕಾಂಗ್ರೆಸ್‌ಗೆ ಹೋಗಿದ್ದರು. ಕಾಂಗ್ರೆಸ್‌ನಲ್ಲಿಯೂ ಅವರಿಗೆ ಅನ್ಯಾಯವಾಗಿ ಮತ್ತೆ ಬಿಜೆಪಿಗೆ ಬಂದರೆ ಬಿಜೆಪಿ ಟಿಕೆಟ್‌ ಕೊಡಿಸಲು ಪ್ರಾಮಾಣಿಕ ಪ್ರಯತ್ನಿಸುವೆ. ಒಂದು ವೇಳೆ ರಾಣಿ ಸಂಯುಕ್ತಾ ಕಾಂಗ್ರೆಸ್‌ನಿಂದ ಸ್ಪರ್ಧೆ ಮಾಡಿದರೆ ನಾನು ಅವರ ವಿರುದ್ಧ ಸ್ಪರ್ಧೆ ಮಾಡುವೆ ಎಂದರು.

ಬರಗಾಲಕ್ಕೂ ಜಗ್ಗದ ಛಲ: 10 ಎಕರೆ ಜಮೀನಿನಲ್ಲಿ 100 ಕ್ವಿಂಟಲ್ ಶೇಂಗಾ ಬೆಳೆದು ₹7 ಲಕ್ಷ ಲಾಭ ಗಳಿಸಿದ ಕೂಡ್ಲಿಗಿ ಯುವ ರೈತ!

Gowthami K — Wed, 28 Oct 2026 07:39:47 +0530

ವರದಿ: ಭೀಮಣ್ಣ ಗಜಾಪುರ

ಕೂಡ್ಲಿಗಿ: ಈ ವರ್ಷ ಇಡೀ ರಾಜ್ಯಕ್ಕೆ ಬರ ಆವರಿಸಿ ಬಿತ್ತನೆ ಬೀಜ, ರಸಗೊಬ್ಬರ, ಬಿತ್ತಿದ ಕೂಲಿಯೂ ಸಹ ಸಿಗದೇ ರೈತರು ಕೈಸುಟ್ಟುಕೊಂಡಿದ್ದರೆ, ಇಲ್ಲಿಯ ಯುವ ರೈತನೊಬ್ಬ ತನ್ನ 10 ಎಕರೆ ಭೂಮಿಯಲ್ಲಿ 3 ಲಕ್ಷ ಖರ್ಜು ಮಾಡಿ 100 ಕ್ವಿಂಟಲ್ ಶೇಂಗಾ ಬೆಳೆದಿದ್ದು ಅಂದಾಜು 7 ಲಕ್ಷ ಲಾಭ ಪಡೆದು ಬರಗಾಲಕ್ಕೆ ಸೆಡ್ಡು ಹೊಡೆದಿದ್ದಾನೆ.

ತಾಲೂಕು ಕಾನಾಹೊಸಹಳ್ಳಿ ಹೋಬಳಿಯ ಬಯಲು ತುಂಬರಗುದ್ದಿ ಗ್ರಾಮದ ಕೆಂಚಪ್ಪರ ವೀರೇಶ್ ಎನ್ನುವ ಯುವ ರೈತ ಛಲವೊಂದಿದ್ದರೆ ಏನು ಬೇಕಾದರೂ ಸಾಧಿಸಬಹುದು ಎನ್ನುವುದನ್ನು ಸಾಧಿಸಿ ತೋರಿಸಿದ್ದಾನೆ.

ನೀರು ಎಲ್ಲಿಂದ?

ಈ ಬಾರಿ ಕೂಡ್ಲಿಗಿ ಸೇರಿದಂತೆ ರಾಜ್ಯದ ಬಹುತೇಕ ಕಡೆ ಎರಡೂ (ಮುಂಗಾರು, ಹಿಂಗಾರು) ಮಳೆ ಸರಿಯಾಗಿ ಬಿದ್ದಿಲ್ಲ, ಇಂತಹದಲ್ಲಿ ಬೆಳೆ ಬೆಳೆಯುವುದು ಕನಸಿನ ಮಾತು ಎಂದು ತಿಳಿದ ವೀರೇಶ್ 3 ಕೊಳವೆಬಾವಿ ಕೊರೆಯಿಸಿದ್ದಾನೆ. ನೀರು ಚೆನ್ನಾಗಿ ಬಂದಿರುವುದರಿಂದ ತನ್ನ 10 ಎಕರೆ ಭೂಮಿಗೆ ಕೊಳವೆ ಬಾವಿಗಳಿಂದ ನೀರುಣಿಸಿ ಶೇಂಗಾ ಬೆಳೆದಿದ್ದಾನೆ. ಒಂದು ಶೇಂಗಾ ಗಿಡದಲ್ಲಿ 40 ರಿಂದ 80 ಗಟ್ಟಿ ಶೇಂಗಾ ಕಾಯಿ ಬಿಟ್ಟಿರುವುದು ರೈತ ವಲಯದಲ್ಲಿ ಅಚ್ಚರಿ ಮೂಡಿಸಿದೆ.

ಈಗ ಶೇಂಗಾ ಬೇರ್ಪಡಿಸುವ ಕಾರ್ಯ ಬರದಿಂದ ನಡೆಯುತ್ತಿದೆ. ಸುತ್ತಮುತ್ತಲಿನ ಗ್ರಾಮಗಳ ಜನತೆ ಇಲ್ಲಿನ ಶೇಂಗಾ ಬಳ್ಳಿಯಲ್ಲಿ ಗೊಂಚಲು ಗೊಂಚಲು ಕಾಯಿ ನೋಡಲು ಬರುತ್ತಿದ್ದಾರೆ. ಕೆಲ ಬಳ್ಳಿಗಳಲ್ಲಿ ಮಾತ್ರ 40 ರಿಂದ 50 ಇರಲು ಸಾಧ್ಯ, ಆದರೆ ಇಡೀ ಜಮೀನು ತುಂಬಾ 40 ರಿಂದ 80 ಶೇಂಗಾಕಾಯಿ ಒಂದೇ ಬಳ್ಳಿಯಲ್ಲಿ ಇರುವುದನ್ನು ನೋಡುವುದೇ ಸೋಜಿಗ.

ಶೇಂಗಾ ಕಾಯಿ ಹೆಚ್ಚು ಬಿಡಲು ಜಮೀನಿಗೆ ಎಡೆಕುಂಟೆ ಹೊಡೆಯುವ ಸಂದರ್ಭದಲ್ಲಿ 2 ಬಾರಿ 25 ಚೀಲದಂತೆ 50 ಚೀಲ ಜಿಪ್ಸ್ಂ ಹಾಕಿದ್ದೇನೆ. ಹೀಗಾಗಿ ಹೆಚ್ಚು ಕಾಯಿ ಕಟ್ಟಲು ಸಾಧ್ಯವಾಗಿದೆ. 100 ಕ್ವಿಂಟಲ್ ಶೇಂಗಾ ಆಗಬಹುದು, ಈಗ ಕ್ವಿಂಟಲ್ ಗೆ ₹9 ಸಾವಿರಕ್ಕೂ ಹೆಚ್ಚು ದರ ಇರುವುದರಿಂದ ₹10 ಲಕ್ಷ ಆಗಬಹುದು.

-ಕೆಂಚಪ್ಪರ ವೀರೇಶ್. ಬಯಲು ತುಂಬರಗುದ್ದಿಯ ರೈತ

ನಮ್ಮೂರಿನ ಯುವಕ ಕೆಂಚಪ್ಪರ ವೀರೇಶ್ 10 ಎಕರೆಯಲ್ಲಿ ಬೆಳೆದ ಶೇಂಗಾ ನೋಡಿದರೆ ಎಲ್ಲರಿಗೂ ಆಶ್ಚರ್ಯವಾಗಿದೆ. ಒಂದು ಬಳ್ಳಿಯಲ್ಲಿ ಅರವತ್ತರಿಂದ ಎಂಬತ್ತು ಶೇಂಗಾಕಾಯಿ ಇರುವುದು ಅಚ್ಚರಿ ಮೂಡಿಸಿದೆ.

-ಚಂದ್ರು. ಬಯಲು ತುಂಬರಗುದ್ದಿಯ ರೈತ, ಕಮ್ಯುನಿಷ್ಟ್ ಪಕ್ಷದ ಯುವ ಮುಖಂಡ

ವಿಜಯನಗರ: ಮರಿಯಮ್ಮನಹಳ್ಳಿಯ ಲಕ್ಷ್ಮೀನಾರಾಯಣಸ್ವಾಮಿ ದೇವಸ್ಥಾನದ ಹುಂಡಿ ಎಣಿಕೆ ಪೂರ್ಣ; ಕಾಣಿಕೆ ಎಷ್ಟಿತ್ತು?

Sathish Kumar KH — Thu, 01 Oct 2026 11:21:24 +0530

ವಿಜಯನಗರ ಜಿಲ್ಲೆಯ ಹೊಸಪೇಟೆ ಬಳಿಯಿರುವ ಮರಿಯಮ್ಮನಹಳ್ಳಿಯ ಐತಿಹಾಸಿಕ ಲಕ್ಷ್ಮೀನಾರಾಯಣಸ್ವಾಮಿ ಮತ್ತು ಆಂಜನೇಯಸ್ವಾಮಿ ದೇವಸ್ಥಾನದ ಹುಂಡಿ ಎಣಿಕೆಯಲ್ಲಿ ಲಕ್ಷ ಲಕ್ಷ ರೂಪಾಯಿ ಸಂಗ್ರಹವಾಗಿದೆ. ಪೂರ್ಣ ವಿವರ ಇಲ್ಲಿದೆ.

ವಿಜಯನಗರ ಜಿಲ್ಲೆಯ ಐತಿಹಾಸಿಕ ಮರಿಯಮ್ಮನಹಳ್ಳಿಯ ಶ್ರೀ ಲಕ್ಷ್ಮೀನಾರಾಯಣಸ್ವಾಮಿ ಹಾಗೂ ಆಂಜನೇಯಸ್ವಾಮಿ ದೇವಸ್ಥಾನದ ಹುಂಡಿ ಎಣಿಕೆ ಕಾರ್ಯ ಇತ್ತೀಚೆಗೆ ಯಶಸ್ವಿಯಾಗಿ ನೆರವೇರಿದೆ. ದೇವಸ್ಥಾನದ ಎರಡು ಹುಂಡಿಗಳನ್ನು ತೆರೆದು ಪರಿಶೀಲಿಸಿದಾಗ ಭಕ್ತರು ಸಮರ್ಪಿಸಿದ ಬರೋಬ್ಬರಿ ₹5,68,530 ನಗದು ಹಣ ಸಂಗ್ರಹವಾಗಿದೆ.

ದೇವಸ್ಥಾನದ ಆಡಳಿತಾಧಿಕಾರಿ ಆಂಜನೇಯಲು, ತಹಶೀಲ್ದಾರ್ ಶೃತಿ ಎಂ. ಮಲ್ಲಪ್ಪಗೌಡರ್ ಸೇರಿದಂತೆ ಮುಜರಾಯಿ ಇಲಾಖೆಯ ಹಿರಿಯ ಅಧಿಕಾರಿಗಳ ಸಮ್ಮುಖದಲ್ಲಿ ಈ ಎಣಿಕೆ ಕಾರ್ಯ ನಡೆಯಿತು. ದೇವಸ್ಥಾನದ ಸಿಬ್ಬಂದಿ ಮತ್ತು ಸ್ಥಳೀಯ ಭಕ್ತರ ಸಮ್ಮುಖದಲ್ಲಿ ಸಂಪೂರ್ಣ ಪಾರದರ್ಶಕವಾಗಿ ಹಣದ ಲೆಕ್ಕಾಚಾರ ಮಾಡಲಾಯಿತು.

ಹುಂಡಿಯಲ್ಲಿ ನಗದು ಹಣದ ಜೊತೆಗೆ ಭಕ್ತರು ಬರೆದಿದ್ದ ಕೋರಿಕೆಯ ಚೀಟಿಗಳು (ಹರಕೆಗಳು) ಸಹ ಪತ್ತೆಯಾಗಿವೆ. ವಿಶೇಷವೆಂದರೆ, ಈ ಬಾರಿ ಹುಂಡಿಯಲ್ಲಿ ಯಾವುದೇ ಚಿನ್ನ ಅಥವಾ ಬೆಳ್ಳಿಯ ಆಭರಣಗಳು ಕಂಡುಬಂದಿಲ್ಲ. ಅಲ್ಲದೆ, ನಿಷೇಧಿತ ನಾಣ್ಯಗಳು ಅಥವಾ ಹಳೆಯ ಕರೆನ್ಸಿಗಳು ಸಹ ಪತ್ತೆಯಾಗಿಲ್ಲ.

ಸಂಗ್ರಹವಾದ ಈ ಮೊತ್ತವನ್ನು ದೇವಸ್ಥಾನದ ಮುಂದಿನ ಅಭಿವೃದ್ಧಿ ಕಾಮಗಾರಿಗಳಿಗೆ ಮತ್ತು ನಿರ್ವಹಣಾ ವೆಚ್ಚಗಳಿಗೆ ಬಳಸಲಾಗುವುದು ಎಂದು ಮುಜರಾಯಿ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ. ಐತಿಹಾಸಿಕ ದೇವಸ್ಥಾನವಾಗಿರುವ ಕಾರಣ, ಇಲ್ಲಿಗೆ ಬರುವ ಭಕ್ತಾದಿಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಭಕ್ತರು ಅರ್ಪಿಸಿದ ಈ ಕಾಣಿಕೆ ದೇವಸ್ಥಾನದ ಮೂಲಸೌಕರ್ಯ ಅಭಿವೃದ್ಧಿಗೆ ಸಹಕಾರಿಯಾಗಲಿದೆ.