Asianet Suvarna News

ನಮ್ಮ ಹೊಟ್ಟೆ ಮೇಲೆ ಹೊಡಿಬೇಡಿ; ಹೊರರಾಜ್ಯದ ಕ್ಷೌರಿಕ ಅಂಗಡಿಗೆ ಅವಕಾಶ ನೀಡದಂತೆ ಮನವಿ

Kannadaprabha News — Sat, 03 Oct 2026 07:36:33 +0530

ಕಾರವಾರ: ಸಿದ್ದಾಪುರ ತಾಲೂಕಿನ ಬಿಳಗಿಯಲ್ಲಿ ಮಡಿವಾಳ ಸಮಾಜದ ಶ್ರೀನಿವಾಸ ಪರಶುರಾಮ ಮಡಿವಾಳ ಅವರು ಹೊರರಾಜ್ಯದಿಂದ ಜನರನ್ನು ಕರೆಸಿ ನಮ್ಮ ಸಮಾಜದ ಪರಂಪರಾಗತ ವೃತ್ತಿಯಾದ ಕ್ಷೌರಿಕ ವೃತ್ತಿಯನ್ನು ಮಾಡಲು ತಯಾರಿ ನಡೆಸುತ್ತಿದ್ದಾರೆ. ಇದನ್ನು ತಹಸೀಲ್ದಾರರು ಕೂಡಲೇ ತಡೆಯಬೇಕೆಂದು ತಾಲೂಕು ಸವಿತಾ ಸಮಾಜದವರು ಆಗ್ರಹಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಗುರುವಾರ ಮಾತನಾಡಿದ ಸವಿತಾ ಸಮಾಜದ ಪ್ರಮುಖರಾದ ಗಣಪತಿ ಕಾನಗೋಡ ಅವರು, ನಮ್ಮ ಸವಿತಾ ಸಮಾಜಕ್ಕೆ ಯಾವುದೇ ರಾಜಕೀಯ ಬೆಂಬಲ ಇಲ್ಲ. ತಲೆತಲಾಂತರದಿಂದ ಕ್ಷೌರಿಕ ವೃತಿಯನ್ನು ನಡೆಸಿಕೊಂಡು ಜೀವನ ನಡೆಸುತ್ತ ಬರುತಿದ್ದೇವೆ. ಯಾವುದೇ ಜಾತಿ, ಮತ, ಧರ್ಮ ಎನ್ನುವುದನ್ನು ನೋಡದೇ ಸಮಾಜದ ಎಲ್ಲ ಜಾತಿಯವರ ಮನೆಗಳಲ್ಲಿ ನಡೆಯುವ ಶುಭ ಹಾಗೂ ಅಶುಭ ಕಾರ್ಯಕ್ರಮಗಳಿಗೆ ಮನೆಗೇ ತೆರಳಿ ನಮ್ಮ ಸೇವೆಯನ್ನು ನೀಡುತ್ತಿದ್ದೇವೆ. ಎಲ್ಲ ಸಮಾಜದವರೊಡನೆ ಮಾನವೀಯ ಸಂಬಂಧವನ್ನು ಇಟ್ಟುಕೊಂಡು ಮುಂದುವರಿಸಿಕೊಂಡು ಹೋಗುತಿದ್ದೇವೆ ಎಂದರು.

ಹೊರ ರಾಜ್ಯದವರಿಂದ ಕ್ಷೌರಿಕ ವೃತ್ತಿ

ತಾಲೂಕಿನಲ್ಲಿ ಇಲ್ಲಿಯವರೆಗೆ ಎಲ್ಲಿಯೂ ಕ್ಷೌರಿಕ ಸಮಾಜದವರನ್ನು ಬಿಟ್ಟರೆ ಬೇರಾವುದೇ ವ್ಯಕ್ತಿಗಳು ಕ್ಷೌರಿಕ ವೃತ್ತಿ ಮಾಡಿದ ದಾಖಲೆ ಇಲ್ಲ. ಆದರೆ ಬಿಳಗಿಯಲ್ಲಿ ಮಡಿವಾಳ ಸಮಾಜದ ಶ್ರೀನಿವಾಸ ಪರಶುರಾಮ ಮಡಿವಾಳ ಅವರು ಕ್ಷೌರಿಕ ಅಂಗಡಿಯನ್ನು ತೆರೆದು ಹೊರರಾಜ್ಯದಿಂದ ವ್ಯಕ್ತಿಗಳನ್ನು ಕರೆಸಿ ವೃತ್ತಿ ಮಾಡಲು ತಯಾರಿ ನಡೆಸುತ್ತಿರುವುದು ನಮ್ಮ ಗಮನಕ್ಕೆ ಬಂದಿದೆ ಎಂದರು.

ತಾಲೂಕು ಸವಿತಾ ಸಮಾಜ ಉಪಾಧ್ಯಕ್ಷ ಜಗದೀಶ, ಪ್ರಮುಖರಾದ ಸತೀಶ ಕೊಡಿಯಾ, ಆನಂದ, ವಿನಾಯಕ ಮಹಾಲೆ, ಚಂದ್ರ ಭಂಡಾರಿ, ಪ್ರಜ್ವಲ ಮಹಾಲೆ, ರಾಜೇಶ, ಶ್ರೀಕಾಂತ, ಶಿವರಾಮ, ಶಿವರಾಜ ಇತರರಿದ್ದರು.

ಈ ಕುರಿತು ತಾಲೂಕು ಸವಿತಾ ಸಮಾಜದವರು ಗುರುವಾರ ಮನವಿ ನೀಡಿದ್ದು, ಉಪ ತಹಸೀಲ್ದಾರ್ ಸಂತೋಷ ಭಂಡಾರಿ ಮನವಿ ಸ್ವೀಕರಿಸಿದರು.

ಮಂಗಳೂರು-ಮಡ್ಗಾಂವ್ ರೈಲು ವೇಳಾಪಟ್ಟಿ ದಿಡೀರ್ ಬದಲಾವಣೆ, ಸೇವೆಗಳು ಭಾಗಶಃ ರದ್ದು, ಇಲ್ಲಿದೆ ಮಾಹಿತಿ

Gowthami K — Mon, 05 Oct 2026 17:24:41 +0530

ಮಂಗಳೂರು: ಕೊಂಕಣ ರೈಲ್ವೆ ಮಾರ್ಗದಲ್ಲಿ ಕಡ್ಡಾಯ ಹಳಿ ನಿರ್ವಹಣಾ ಕಾಮಗಾರಿಗಳನ್ನು ಕೈಗೆತ್ತಿಕೊಳ್ಳುತ್ತಿರುವುದರಿಂದ ಈ ಮಾರ್ಗದಲ್ಲಿ ಸಂಚರಿಸುವ ಹಲವು ಪ್ರಮುಖ ರೈಲು ಸೇವೆಗಳಲ್ಲಿ ತಾತ್ಕಾಲಿಕ ಬದಲಾವಣೆ ಮಾಡಲಾಗಿದೆ. ಕೆಲವು ಪ್ಯಾಸೆಂಜರ್ ರೈಲು ಸೇವೆಗಳನ್ನು ಕಾರವಾರದವರೆಗೆ ಮಾತ್ರ ಸೀಮಿತಗೊಳಿಸಿ ಭಾಗಶಃ ರದ್ದುಗೊಳಿಸಲಾಗಿದ್ದರೆ, ಇನ್ನು ಕೆಲವು ರೈಲುಗಳ ಹೊರಡುವ ಸಮಯದಲ್ಲಿ ಮಾರ್ಪಾಡು ಮಾಡಲಾಗಿದೆ ಎಂದು ರೈಲ್ವೆ ಇಲಾಖೆ ಪ್ರಕಟಣೆಯಲ್ಲಿ ತಿಳಿಸಿದೆ.

ರೈಲು ಸೇವೆಗಳ ಭಾಗಶಃ ರದ್ದು

ಅಕ್ಟೋಬರ್ ತಿಂಗಳ ನಿರ್ದಿಷ್ಟ ದಿನಾಂಕಗಳಂದು ಮಂಗಳೂರು-ಮಡ್ಗಾಂವ್ ನಡುವಿನ ಪ್ಯಾಸೆಂಜರ್ ರೈಲು ಸೇವೆಯಲ್ಲಿ ಈ ಕೆಳಗಿನಂತೆ ವ್ಯತ್ಯಯ ಉಂಟಾಗಲಿದೆ:

ರೈಲು ಸಂಖ್ಯೆ 56616 (ಮಂಗಳೂರು ಸೆಂಟ್ರಲ್ - ಮಡ್ಗಾಂವ್ ಜಂಕ್ಷನ್ ಪ್ಯಾಸೆಂಜರ್): ಅಕ್ಟೋಬರ್ 8 ಮತ್ತು 15 ರಂದು ಮಂಗಳೂರು ಸೆಂಟ್ರಲ್‌ನಿಂದ ಹೊರಡುವ ಈ ರೈಲು ಮಡ್ಗಾಂವ್‌ವರೆಗೆ ತೆರಳುವ ಬದಲು ಕಾರವಾರ ರೈಲು ನಿಲ್ದಾಣದಲ್ಲಿಯೇ ತನ್ನ ಪ್ರಯಾಣವನ್ನು ಮುಕ್ತಾಯಗೊಳಿಸಲಿದೆ. ಅಂದರೆ, ಈ ದಿನಗಳಲ್ಲಿ ಕಾರವಾರ ಮತ್ತು ಮಡ್ಗಾಂವ್ ಜಂಕ್ಷನ್ ನಡುವೆ ಈ ರೈಲು ಸೇವೆ ಸಂಪೂರ್ಣವಾಗಿ ಇರುವುದಿಲ್ಲ.

ರೈಲು ಸಂಖ್ಯೆ 56615 (ಮಡ್ಗಾಂವ್ ಜಂಕ್ಷನ್ - ಮಂಗಳೂರು ಸೆಂಟ್ರಲ್ ಪ್ಯಾಸೆಂಜರ್): ಅಕ್ಟೋಬರ್ 8 ಮತ್ತು 15 ರಂದು ಮಧ್ಯಾಹ್ನ 2:15 ಕ್ಕೆ ಮಡ್ಗಾಂವ್ ಜಂಕ್ಷನ್‌ನಿಂದ ಹೊರಡಬೇಕಿದ್ದ ಈ ರೈಲು, ಮಡ್ಗಾಂವ್ ಬದಲಿಗೆ ಮಧ್ಯಾಹ್ನ 3:24 ಕ್ಕೆ ಕಾರವಾರ ನಿಲ್ದಾಣದಿಂದ ಮಂಗಳೂರಿಗೆ ತನ್ನ ಪ್ರಯಾಣವನ್ನು ಆರಂಭಿಸಲಿದೆ. ಈ ದಿನಗಳಂದು ಮಡ್ಗಾಂವ್ ಮತ್ತು ಕಾರವಾರ ನಡುವಿನ ಸೇವೆ ಲಭ್ಯವಿರುವುದಿಲ್ಲ.

ರೈಲು ಹೊರಡುವ ವೇಳಾಪಟ್ಟಿಯಲ್ಲಿ ಬದಲಾವಣೆ

ಹಳಿ ದುರಸ್ತಿ ಕಾಮಗಾರಿಯ ಹಿನ್ನೆಲೆಯಲ್ಲಿ ಮಡ್ಗಾಂವ್ - ಮಂಗಳೂರು ಸೆಂಟ್ರಲ್ ಪ್ಯಾಸೆಂಜರ್ (ರೈಲು ಸಂಖ್ಯೆ 56615) ರೈಲು ಕೆಳಗಿನ ದಿನಾಂಕಗಳಂದು ತಡವಾಗಿ ನಿರ್ಗಮಿಸಲಿದೆ:

1 ಗಂಟೆ 30 ನಿಮಿಷ ವಿಳಂಬ: ಅಕ್ಟೋಬರ್ 9, 11, 16 ಮತ್ತು 18 ರಂದು ಮಧ್ಯಾಹ್ನ 2:15 ಕ್ಕೆ ಮಡ್ಗಾಂವ್‌ನಿಂದ ಹೊರಡಬೇಕಿದ್ದ ಈ ರೈಲು 1 ಗಂಟೆ 30 ನಿಮಿಷ ತಡವಾಗಿ, ಅಂದರೆ ಮಧ್ಯಾಹ್ನ 3:45 ಕ್ಕೆ ಮಡ್ಗಾಂವ್‌ನಿಂದ ನಿರ್ಗಮಿಸಲಿದೆ.

2 ಗಂಟೆ 40 ನಿಮಿಷ ವಿಳಂಬ: ಅಕ್ಟೋಬರ್ 6, 13 ಮತ್ತು 20 ರಂದು ಮಧ್ಯಾಹ್ನ 2:15 ಕ್ಕೆ ನಿರ್ಗಮಿಸಬೇಕಿದ್ದ ಈ ರೈಲು ಬರೋಬ್ಬರಿ 2 ಗಂಟೆ 40 ನಿಮಿಷ ತಡವಾಗಿ, ಅಂದರೆ ಸಂಜೆ 4:55 ಕ್ಕೆ ತನ್ನ ಪ್ರಯಾಣ ಆರಂಭಿಸಲಿದೆ.

ಮಾರ್ಗ ಮಧ್ಯೆ ರೈಲು ಸಂಚಾರ ನಿಯಂತ್ರಣ

ರೈಲು ಸಂಖ್ಯೆ 22149 (ಎರ್ನಾಕುಲಂ ಜಂಕ್ಷನ್ - ಪುಣೆ ಜಂಕ್ಷನ್ ಬೈ-ವೀಕ್ಲಿ ಸೂಪರ್‌‌ಫಾಸ್ಟ್ ಎಕ್ಸ್‌ಪ್ರೆಸ್): ಅಕ್ಟೋಬರ್ 9 ಮತ್ತು 14 ರಂದು ಎರ್ನಾಕುಲಂನಿಂದ ಹೊರಡುವ ಈ ಸೂಪರ್‌ಫಾಸ್ಟ್ ಎಕ್ಸ್‌ಪ್ರೆಸ್ ರೈಲನ್ನು ಕೊಂಕಣ ಮಾರ್ಗಮಧ್ಯೆ 2 ಗಂಟೆ 20 ನಿಮಿಷಗಳ ಕಾಲ ನಿಯಂತ್ರಿಸಲಾಗುತ್ತದೆ (ವಿಳಂಬವಾಗಿ ಸಂಚರಿಸಲಿದೆ).

ರೈಲು ಪ್ರಯಾಣಿಕರು ತಮ್ಮ ಪ್ರಯಾಣವನ್ನು ಯೋಜಿಸುವ ಮೊದಲು ಕೊಂಕಣ ರೈಲ್ವೆಯ ಅಧಿಕೃತ ಮಾಹಿತಿ ಅಥವಾ ಎನ್‌ಟಿಇಎಸ್ (NTES) ಆ್ಯಪ್ ಮೂಲಕ ರೈಲುಗಳ ನಿಖರ ವೇಳಾಪಟ್ಟಿಯನ್ನು ಖಚಿತಪಡಿಸಿಕೊಳ್ಳಬೇಕಾಗಿ ರೈಲ್ವೆ ಅಧಿಕಾರಿಗಳು ಮನವಿ ಮಾಡಿದ್ದಾರೆ.

ರಾಜ್ಯದಲ್ಲಿ ಲೋಕಾಯುಕ್ತ ಭರ್ಜರಿ ಬೇಟೆ: ನಿಪ್ಪಾಣಿ ತಹಶೀಲ್ದಾರ್ ಮೇಲೆ ದಾಳಿ, ಕಾರವಾರ ತ್ಯಾಜ್ಯ ಘಟಕಕ್ಕೆ ಭೇಟಿ

Gowthami K — Wed, 30 Sep 2026 11:08:43 +0530

ಕಾರವಾರ/ಚಿಕ್ಕೋಡಿ: ರಾಜ್ಯದಲ್ಲಿ ಲೋಕಾಯುಕ್ತ ಪಡೆ ತನ್ನ ಕಟ್ಟುನಿಟ್ಟಿನ ಕ್ರಮಗಳನ್ನು ಮುಂದುವರಿಸಿದ್ದು, ಒಂದೆಡೆ ಉಪಲೋಕಾಯುಕ್ತರು ಸ್ಥಳೀಯ ಸಮಸ್ಯೆಗಳಿಗೆ ಸ್ಪಂದಿಸಿ ಅಧಿಕಾರಿಗಳಿಗೆ ಬಿಸಿ ಮುಟ್ಟಿಸಿದರೆ, ಇನ್ನೊಂದೆಡೆ ಅಕ್ರಮ ಆಸ್ತಿ ಗಳಿಕೆ ಆರೋಪದಡಿ ತಹಶೀಲ್ದಾರ್ ನಿವಾಸದ ಮೇಲೆ ದಾಳಿ ನಡೆಸಿ ಶಾಕ್ ನೀಡಿದ್ದಾರೆ.

ನಿಪ್ಪಾಣಿ ತಹಶೀಲ್ದಾರ್ ಸುರೇಶ ಮುಂಜೆ ಮನೆ, ಕಚೇರಿ ಮೇಲೆ ಲೋಕಾಯುಕ್ತ ದಾಳಿ

ಬೆಳಗಾವಿ ಜಿಲ್ಲೆಯಲ್ಲಿ ಲೋಕಾಯುಕ್ತ ಅಧಿಕಾರಿಗಳು ಭ್ರಷ್ಟ ಅಧಿಕಾರಿಗಳಿಗೆ ತೀವ್ರ ಚಾಟಿ ಬೀಸಿದ್ದಾರೆ. ಆದಾಯಕ್ಕಿಂತ ಹೆಚ್ಚು ಆಸ್ತಿ ಗಳಿಕೆ (ಅಕ್ರಮ ಆಸ್ತಿ ಗಳಿಕೆ) ಆರೋಪದ ಹಿನ್ನೆಲೆಯಲ್ಲಿ ನಿಪ್ಪಾಣಿ ತಹಶೀಲ್ದಾರ್ ಸುರೇಶ ಮುಂಜೆ ಅವರಿಗೆ ಬೆಳಿಗ್ಗೆಯೇ ಲೋಕಾಯುಕ್ತ ಪಡೆ ಶಾಕ್ ನೀಡಿದೆ.

ಬೆಳಗಾವಿ ಲೋಕಾಯುಕ್ತ ಎಸ್ಪಿ ಪ್ರಸನ್ನ ದೇಸಾಯಿ ಅವರ ಮಾರ್ಗದರ್ಶನ ಹಾಗೂ ನೇತೃತ್ವದಲ್ಲಿ ಅಧಿಕಾರಿಗಳ ತಂಡವು ನಿಪ್ಪಾಣಿ, ಅಥಣಿ ಹಾಗೂ ಮೂಡಲಗಿ ಸೇರಿದಂತೆ ವಿವಿಧ ಭಾಗಗಳಲ್ಲಿ ಏಕಕಾಲಕ್ಕೆ ದಾಳಿ ನಡೆಸಿ ದಾಖಲೆಗಳ ಪರಿಶೀಲನೆ ನಡೆಸಿದೆ.

ತಹಶೀಲ್ದಾರ್ ಸುರೇಶ ಮುಂಜೆ ಅವರ ಮನೆ ಮತ್ತು ನಿಪ್ಪಾಣಿ ಕಚೇರಿಯಷ್ಟೇ ಅಲ್ಲದೆ, ಮೂಡಲಗಿಯಲ್ಲಿರುವ ಅವರ ಪತ್ನಿ ಸ್ವಾತಿ ಅವರ ತವರು ಮನೆ (ಶಿವಬಸು ಬಾಳಪ್ಪ ಹಂದಿಗುಂದ ಅವರ ನಿವಾಸ) ಮೇಲೆಯೂ ಅಧಿಕಾರಿಗಳು ಪರಿಶೀಲನೆ ನಡೆಸಿದ್ದಾರೆ. ಇದಲ್ಲದೆ, ಸುರೇಶ ಮುಂಜೆ ಕುಟುಂಬಸ್ಥರು ಸಂಪರ್ಕ ಹೊಂದಿರುವ 'ಶ್ರೀ ನಾಗಲಿಂಗೇಶ್ವರ ಅರ್ಬನ್ ಕೋ-ಆಪರೇಟಿವ್ ಕ್ರೆಡಿಟ್ ಸೊಸೈಟಿ' ಮೇಲೆಯೂ ಲೋಕಾಯುಕ್ತ ತಂಡ ದಾಳಿ ನಡೆಸಿ, ಮಹತ್ವದ ಆಸ್ತಿ ಪಾಸ್ತಿ ದಾಖಲೆಗಳನ್ನು ವಶಕ್ಕೆ ಪಡೆದು ತನಿಖೆ ಮುಂದುವರಿಸಿದೆ.

ಕಾರವಾರ ಶಿರವಾಡ ಘನತ್ಯಾಜ್ಯ ಘಟಕಕ್ಕೆ ಉಪಲೋಕಾಯುಕ್ತ ಕೆ.ಎನ್. ಫಣೀಂದ್ರ ಮಿಂಚಿನ ಭೇಟಿ

ಬುಧವಾರ ಬೆಳಂಬೆಳಗ್ಗೆ ಉಪಲೋಕಾಯುಕ್ತ ನ್ಯಾಯಮೂರ್ತಿ ಕೆ.ಎನ್. ಫಣೀಂದ್ರ ಅವರು ಕಾರವಾರ ನಗರಸಭೆಯ ಅಧಿಕಾರಿಗಳಿಗೆ ದಿಢೀರ್ ಶಾಕ್ ನೀಡಿದರು. ಕಾರವಾರ ತಾಲೂಕಿನ ಶಿರವಾಡ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿರುವ ಘನತ್ಯಾಜ್ಯ ವಿಲೇವಾರಿ ಘಟಕಕ್ಕೆ ಪ್ರತ್ಯಕ್ಷವಾಗಿ ಭೇಟಿ ನೀಡಿ, ಸ್ಥಳ ಪರಿಶೀಲನೆ ನಡೆಸಿದರು. ಈ ಸಂದರ್ಭದಲ್ಲಿ ಜಿಲ್ಲಾಧಿಕಾರಿ ಲಕ್ಷ್ಮೀ ಪ್ರಿಯಾ, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (CEO) ದಿಲೀಶ್ ಸಸಿ ಹಾಗೂ ನಗರಸಭೆ ಆಯುಕ್ತ ಜಗದೀಶ್ ಹುಲಗಜ್ಜಿ ಉಪಸ್ಥಿತರಿದ್ದರು.

ಘಟಕದ ಬಳಿ ನೆರೆದಿದ್ದ ಸ್ಥಳೀಯರು, "ತ್ಯಾಜ್ಯ ವಿಲೇವಾರಿಯಿಂದಾಗಿ ಸುತ್ತಮುತ್ತಲಿನ ಮನೆಗಳ ಬಾವಿ ನೀರು ಕಲುಷಿತಗೊಂಡು ಕುಡಿಯಲು ಯೋಗ್ಯವಿಲ್ಲದಂತಾಗಿದೆ" ಎಂದು ಉಪಲೋಕಾಯುಕ್ತರ ಬಳಿ ತಮ್ಮ ಅಳಲು ತೋಡಿಕೊಂಡರು. ಸಾರ್ವಜನಿಕರ ದೂರುಗಳನ್ನು ತಾಳ್ಮೆಯಿಂದ ಆಲಿಸಿದ ಉಪಲೋಕಾಯುಕ್ತರು, ತಕ್ಷಣವೇ ಸ್ಪಂದಿಸಿ ಜಿಲ್ಲಾಧಿಕಾರಿಗಳ ನೇತೃತ್ವದಲ್ಲಿ ವಿಶೇಷ ಸಮಿತಿ ರಚಿಸಿ, ಸಂಪೂರ್ಣ ತನಿಖೆ ನಡೆಸಿ ಶೀಘ್ರವೇ ವರದಿ ಸಲ್ಲಿಸುವಂತೆ ಸ್ಥಳದಲ್ಲೇ ನಿರ್ದೇಶನ ನೀಡಿದರು.

ಲೋಕಾಯುಕ್ತ ಸಂಸ್ಥೆಗೆ ಹೆಚ್ಚಿನ ಅಧಿಕಾರ, ಸ್ವಾಯತ್ತತೆ ಅಗತ್ಯ: ಉಪಲೋಕಾಯುಕ್ತ

ಕಾರವಾರದಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡಿದ ಉಪಲೋಕಾಯುಕ್ತ ಕೆ.ಎನ್. ಫಣೀಂದ್ರ, ಲೋಕಾಯುಕ್ತ ಸಂಸ್ಥೆಯು ಎದುರಿಸುತ್ತಿರುವ ಸವಾಲುಗಳ ಕುರಿತು ಮುಕ್ತವಾಗಿ ಚರ್ಚಿಸಿದರು.

ಪ್ರಸ್ತುತ ಲೋಕಾಯುಕ್ತ ಕಾಯ್ದೆಯಡಿ ಅಪರಾಧಿಗಳಿಗೆ ಶಿಕ್ಷೆಯಾಗುವ ಪ್ರಮಾಣ ಕೇವಲ ಶೇ. 10 ರಿಂದ 15 ರಷ್ಟು ಮಾತ್ರ. ದೂರು ನೀಡುವಾಗ ತೋರುವ ಉತ್ಸಾಹವನ್ನು ದೂರುದಾರರು ಸಾಕ್ಷ್ಯ ನುಡಿಯುವಾಗ ತೋರುವುದಿಲ್ಲ. ಇದರಿಂದಾಗಿ ಪ್ರಕರಗಳು ದುರ್ಬಲಗೊಳ್ಳುತ್ತವೆ.

ಅಧಿಕಾರಿಗಳು ತಪ್ಪು ಮಾಡಿದ್ದು ಕಣ್ಣೆದುರೇ ಕಂಡರೂ ಅವರನ್ನು ತಕ್ಷಣ ಸಸ್ಪೆಂಡ್ ಮಾಡುವ ಅಧಿಕಾರ ಲೋಕಾಯುಕ್ತಕ್ಕೆ ಇಲ್ಲ. ನಾವು ಸರ್ಕಾರಕ್ಕೆ ಕೇವಲ ಶಿಫಾರಸು ಮಾಡಬಹುದಷ್ಟೇ. ತಾತ್ಕಾಲಿಕವಾಗಿಯಾದರೂ ಅಮಾನತುಗೊಳಿಸುವ ಹಾಗೂ ಸ್ವತಂತ್ರವಾಗಿ ತನಿಖೆ ನಡೆಸುವ ಅಧಿಕಾರ ಸಿಗಬೇಕಿದೆ.

ಸಿಬ್ಬಂದಿ ಅಭಾವ ಮತ್ತು ತಿದ್ದುಪಡಿ ಪ್ರಸ್ತಾವನೆ ಲೋಕಾಯುಕ್ತದಲ್ಲಿ ಪ್ರಸ್ತುತ 300 ರಿಂದ 400 ಹುದ್ದೆಗಳ ಕೊರತೆಯಿದೆ. ಪ್ರಸ್ತುತ ಸಿಬ್ಬಂದಿಗಳನ್ನು ಪೊಲೀಸ್ ಇಲಾಖೆಯಿಂದಲೇ ನಿಯೋಜನೆ ಮೇಲೆ ಪಡೆಯಬೇಕಾಗಿದೆ. ಸ್ವತಂತ್ರವಾಗಿ ನೇಮಕಾತಿ ಮಾಡಿಕೊಳ್ಳಲು ಅವಕಾಶವಿಲ್ಲ. ಈ ವ್ಯವಸ್ಥೆಯಲ್ಲಿ ಬದಲಾವಣೆ ತರಲು ಕಾಯ್ದೆಗೆ ಸೂಕ್ತ ತಿದ್ದುಪಡಿ ತರುವಂತೆ ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಜೊತೆಗೆ ಶೇ. 50 ರಷ್ಟು ನಿವೃತ್ತ ಯೋಧರನ್ನು ನೇಮಿಸಿಕೊಂಡು ಕಾರ್ಯನಿರ್ವಹಿಸಿದರೆ ತನಿಖಾ ಸಂಸ್ಥೆ ಮತ್ತಷ್ಟು ಸಶಕ್ತವಾಗಲಿದೆ.

ರಾಜ್ಯದಲ್ಲಿ ಮುಂದಿನ 4 ದಿನ ಸಾಧಾರಣ ಮಳೆ ಸಾಧ್ಯತೆ: ಬಂಗಾಳಕೊಲ್ಲಿಯಲ್ಲಿ ವಾಯುಭಾರ ಕುಸಿತ, 6 ಜಿಲ್ಲೆಗಳಿಗೆ ಯೆಲ್ಲೋ ಅಲರ್ಟ್!

Santosh Naik — Sat, 26 Sep 2026 10:17:14 +0530

ಬೆಂಗಳೂರು (ಸೆ.26): ಬಂಗಾಳಕೊಲ್ಲಿಯಲ್ಲಿ ಉಂಟಾಗಿರುವ ವಾಯುಭಾರ ಕುಸಿತದ ಪರಿಣಾಮವಾಗಿ ಕರ್ನಾಟಕದಲ್ಲಿ ಮುಂದಿನ ನಾಲ್ಕು ದಿನಗಳ ಕಾಲ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ. ಈ ಪೈಕಿ ಕರಾವಳಿ ಹಾಗೂ ಮಲೆನಾಡು ಭಾಗದ 6 ಜಿಲ್ಲೆಗಳಿಗೆ ಇಂದಿನಿಂದ ಭಾರಿ ಮಳೆಯಾಗುವ ಮುನ್ನೆಚ್ಚರಿಕೆಯಾಗಿ 'ಯೆಲ್ಲೋ ಅಲರ್ಟ್' (Yellow Alert) ಘೋಷಿಸಲಾಗಿದೆ.

6 ಜಿಲ್ಲೆಗಳಿಗೆ ಭಾರಿ ಮಳೆ ಎಚ್ಚರಿಕೆ

ದಕ್ಷಿಣ ಕನ್ನಡ, ಉಡುಪಿ, ಉತ್ತರ ಕನ್ನಡ ಹಾಗೂ ಮಲೆನಾಡಿನ ಚಿಕ್ಕಮಗಳೂರು, ಕೊಡಗು ಮತ್ತು ಶಿವಮೊಗ್ಗ ಜಿಲ್ಲೆಗಳಲ್ಲಿ ಮುಂದಿನ ದಿನಗಳಲ್ಲಿ ಜೋರು ಮಳೆಯಾಗುವ ಸಾಧ್ಯತೆಯಿದೆ. ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ಮಂಡ್ಯ, ಮೈಸೂರು, ಹಾಸನ, ಕೋಲಾರ ಮತ್ತು ಚಿಕ್ಕಬಳ್ಳಾಪುರ ಜಿಲ್ಲೆಗಳಲ್ಲಿ ಸಾಧಾರಣ ಮಳೆಯಾಗಲಿದೆ. ತುಮಕೂರು, ಚಿತ್ರದುರ್ಗ, ದಾವಣಗೆರೆ, ಬಳ್ಳಾರಿ, ವಿಜಯನಗರ ಹಾಗೂ ಉತ್ತರ ಕರ್ನಾಟಕದ ಹಲವು ಜಿಲ್ಲೆಗಳಲ್ಲಿಯೂ ಮುಂದಿನ 4 ದಿನಗಳ ಕಾಲ ಮಳೆಯಾಗುವ ನಿರೀಕ್ಷೆಯಿದೆ.

ರಾಜಧಾನಿ ಬೆಂಗಳೂರಿನಲ್ಲಿ ಹೇಗಿರಲಿದೆ ಹವಾಮಾನ?

ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಮುಂದಿನ 2 ದಿನಗಳ ಕಾಲ ಮೋಡಕವಿದ ವಾತಾವರಣವಿರಲಿದ್ದು, ಜೊತೆಗೆ ಹಗುರದಿಂದ ಸಾಧಾರಣ ಮಳೆಯಾಗುವ ಸಾಧ್ಯತೆಯಿದೆ. ಕೆಲ ಪ್ರದೇಶಗಳಲ್ಲಿ ಗಂಟೆಗೆ 40 ಕಿ.ಮೀ ವೇಗದಲ್ಲಿ ಬಿರುಗಾಳಿ ಬೀಸುವ ಸಾಧ್ಯತೆಯಿದ್ದು, ಗರಿಷ್ಠ ತಾಪಮಾನ 29 ಡಿಗ್ರಿ ಸೆಲ್ಸಿಯಸ್ ಹಾಗೂ ಕನಿಷ್ಠ ತಾಪಮಾನ 20 ಡಿಗ್ರಿ ಸೆಲ್ಸಿಯಸ್ ಆಸುಪಾಸಿನಲ್ಲಿ ದಾಖಲಾಗಬಹುದು ಎಂದು ಇಲಾಖೆ ತಿಳಿಸಿದೆ.

ಕೇಣಿ ಹಳ್ಳದ ನೀರಿನಲ್ಲಿ ಸಮುದ್ರದ ಕೊಕ್ಕರಾ ಮೀನುಗಳ ಸುಗ್ಗಿ; ಗಾಳಕ್ಕೆ ರಾಶಿ ರಾಶಿ ಜಲಚರ

Kannadaprabha News — Sat, 03 Oct 2026 07:53:01 +0530

ರಾಘು ಕಾಕರಮಠ

ಅಂಕೋಲಾ: ಸಮುದ್ರದಲ್ಲಿ ಸಿಗಬೇಕಾದ ಕೊಕ್ಕರಾ ಮೀನುಗಳು ಹಳ್ಳದ ನೀರಿನಲ್ಲಿ ಭಾರಿ ಪ್ರಮಾಣದಲ್ಲಿ ಕಾಣಿಸಿಕೊಂಡು, ಗಾಳ ಹಾಕಿದ ಯುವಕರಿಗೆ ಒಂದರ ಹಿಂದೆ ಒಂದರಂತೆ ಸಿಕ್ಕಿರುವ ಅಪರೂಪದ ಘಟನೆ ಕೇಣಿಯಲ್ಲಿ ಕುತೂಹಲ ಮೂಡಿಸಿದೆ.

ಅಲಗೇರಿ ಕಂಡುಗದ್ದೆಯ ನಿವಾಸಿಗಳಾದ ಸಂದೇಶ್ ಗೌಡ, ಕೃಷ್ಣ ಗೌಡ, ಅಜಯ್ ಗೌಡ, ನಾಗರಾಜ ಗೌಡ ಹಾಗೂ ಮಂಜುನಾಥ್ ಗೌಡ ಅವರು ಕೇಣಿ ಹಳ್ಳಕ್ಕೆ ತೆರಳಿ ಎಂದಿನಂತೆ ಗಾಳ ಹಾಕಿ ಮೀನು ಹಿಡಿಯುತ್ತಿದ್ದರು. ಆದರೆ ಈ ಬಾರಿ ಗಾಳಕ್ಕೆ ಸಿಕ್ಕ ಮೀನುಗಳ ಪ್ರಮಾಣ ಕಂಡು ಅವರಿಗೇ ಅಚ್ಚರಿ ಎದುರಾಗಿದೆ. ಒಂದರ ಹಿಂದೆ ಒಂದರಂತೆ ಕೊಕ್ಕರಾ ಮೀನುಗಳು ಗಾಳಕ್ಕೆ ಬೀಳುತ್ತಿದ್ದಂತೆ ಮೀನು ಬೇಟೆಯ ಸಂಭ್ರಮ ಇಮ್ಮಡಿಗೊಂಡಿದೆ.

ಹಳ್ಳದಲ್ಲಿ ಕೊಕ್ಕರಾ ಮೀನು

ಸಾಮಾನ್ಯವಾಗಿ ಕೊಕ್ಕರಾ ಮೀನು ಸಮುದ್ರದಲ್ಲಿ ದೊರೆಯುತ್ತದೆ. ಕೇಣಿ ಹಳ್ಳವು ಸಮುದ್ರ ಸಂಗಮ ಪ್ರದೇಶದ ಅಂಚಿನಲ್ಲಿರುವುದರಿಂದ ಸಮುದ್ರದ ಏರಿನ ಸಂದರ್ಭದಲ್ಲಿ ನೀರಿನೊಂದಿಗೆ ಮೀನುಗಳು ಹಳ್ಳದ ಮೇಲ್ಭಾಗಕ್ಕೆ ಬಂದಿರಬಹುದು ಎಂಬುದು ಸ್ಥಳೀಯರ ಅಂದಾಜಾಗಿದೆ.

ಆದರೆ ನಿರೀಕ್ಷೆಗೂ ಮೀರಿ ಕೊಕ್ಕರಾ ಮೀನುಗಳು ದೊರೆತಿರುವುದು ವಿಶೇಷವಾಗಿದೆ. ಗಾಳ ಹಾಕಿದವರಿಗೆ ಒಂದೆರಡು ಮೀನುಗಳ ಬದಲು ನೂರಾರು ಮೀನುಗಳು ಸಿಕ್ಕಿರುವ ಸುದ್ದಿ ಹರಡುತ್ತಿದ್ದಂತೆ ಸುತ್ತಮುತ್ತಲಿನ ಜನರೂ ಕೇಣಿ ಹಳ್ಳದತ್ತ ಆಗಮಿಸಿ ಮೀನು ಬೇಟೆಯನ್ನು ವೀಕ್ಷಿಸಿದರು.

ಗಾಳಕ್ಕೆ ಸಿಕ್ಕ ಅಪಾರ ಪ್ರಮಾಣದ ಮೀನುಗಳು

ಸಾಮಾನ್ಯವಾಗಿ ಮೀನು ಹಿಡಿಯಲು ತೆರಳಿದಾಗ ಕೆಲವೇ ಮೀನುಗಳು ಸಿಗುವುದು ಸಹಜ. ಆದರೆ ಒಂದೇ ಬಾರಿಗೆ ಇಷ್ಟೊಂದು ಪ್ರಮಾಣದಲ್ಲಿ ಕೊಕ್ಕರಾ ಮೀನುಗಳು ಗಾಳಕ್ಕೆ ಸಿಕ್ಕಿರುವುದು ಅಪರೂಪ ಎಂದು ಸ್ಥಳೀಯರು ಹೇಳಿಕೊಂಡರು.

ಗಾಳಕ್ಕೆ ಸಿಕ್ಕ ನೂರಾರು ಕೊಕ್ಕರಾ ಮೀನುಗಳನ್ನು ಕಂಡು ಯುವಕರು ಸಂತಸ ವ್ಯಕ್ತಪಡಿಸಿದ್ದು, ಈ ಅಪರೂಪದ ಮೀನು ಬೇಟೆ ಇದೀಗ ಕೇಣಿ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶದಲ್ಲಿ ಚರ್ಚೆಗೆ ಗ್ರಾಸವಾಗಿದೆ ಎಂದು ಸುದೀಪ ಬಂಟ ತಿಳಿಸಿದ್ದಾರೆ.

ಕೊನೆಗೆ ಗಾಳಕ್ಕೆ ಸಿಕ್ಕ ಮೀನುಗಳನ್ನು ಸಂಗ್ರಹಿಸಿಕೊಂಡ ಯುವಕರು ಅವುಗಳನ್ನು ಮನೆಗೆ ಕೊಂಡೊಯ್ದರು. ಸಮುದ್ರದ ಮೀನು ಹಳ್ಳದ ನೀರಿನಲ್ಲಿ ಇಷ್ಟೊಂದು ಪ್ರಮಾಣದಲ್ಲಿ ಸಿಕ್ಕಿರುವ ಘಟನೆ ಸ್ಥಳೀಯರ ಕುತೂಹಲಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ: ಸಿದ್ದಾಪುರ: ನಮ್ಮ ಹೊಟ್ಟೆ ಮೇಲೆ ಹೊಡಿಬೇಡಿ; ಹೊರರಾಜ್ಯದ ಕ್ಷೌರಿಕ ಅಂಗಡಿಗೆ ಅವಕಾಶ ನೀಡದಂತೆ ಮನವಿ

Uttara Kannada: ತೆಲುಗು ಸಿನಿಮಾ ಶೂಟಿಂಗ್ ವೇಳೆ ಅವಘಡ; ಮುರಿದು ಬಿದ್ದ ಖರ್ವಾ-ಮೋಟೆ ತೂಗು ಸೇತುವೆ

Sumanth SN — Fri, 09 Oct 2026 09:49:43 +0530

ಕಾರವಾರ: ತೆಲುಗು ಸಿನಿಮಾ ಚಿತ್ರೀಕರಣದ ವೇಳೆ ಗ್ರಾಮಕ್ಕೆ ಸಂಪರ್ಕಿಸುವ ಸೇತುವೆ ತುಂಡಾದ ಘಟನೆ ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಖಾರ್ವ ನಾಥಗೇರಿ ಬಳಿಯ ಮೋಟೆ ಯಲ್ಲಿ ನಡೆದಿದೆ.

ಆಂಧ್ರದ ಆರ್.ಕೆ ದುಗ್ಗುಲ್ ಸ್ಟುಡಿಯೋಸ್ ತಂಡವು ತೆಲುಗು ಸಿನಿಮಾ ಚಿತ್ರೀಕರಣಕ್ಕಾಗಿ ಮೋಟೆ ತೂಗುಸೇತುವೆ ಮೇಲೆ ಭಾರೀ ಗಾತ್ರದ ಚಿತ್ರೀಕರಣದ ಪರಿಕರ ಹಾಗೂ ಟ್ರ್ಯಾಲಿಯನ್ನು ಯಾವುದೇ ಅನುಮತಿ ಇಲ್ಲದೇ ತೂಗು ಸೇತುವೆಯ ಮೇಲೆ ತಂದಿದ್ದಾರೆ. ಈ ವೇಳೆ ಸೇತುವೆಯ ಒಂದು ಭಾಗದ ಕಬ್ಬಿಣದ ಹಗ್ಗವು ತುಂಡಾಗಿ ಸೇತುವೆ ಪಕ್ಕದ ತೆಂಗಿನ ಮರದಕಡೆ ವಾಲಿದೆ, ಇದರಿಂದ ಸೇತುವೆ ತುಂಡಾಗಿ ನದಿಗೆ ಬೀಳುವುದು ತಪ್ಪಿದ್ದು, ದೊಡ್ಡ ಅವಘಡ ತಪ್ಪಿದೆ.

ಸೇತುವೆ ಮುಂಭಾಗದಲ್ಲಿ ಸೇತುವೆ ಶಿಥಿಲಾವಸ್ತೆಯಲ್ಲಿದ್ದು ಭಾರೀ ವಾಹನ, ವಸ್ತುಗಳನ್ನ ಕೊಂಡೊಯ್ಯದಂತೆ ನಾಮಫಲಕ ಅಳವಡಿಸಿದ್ದರೂ, ಯಾವುದೇ ಅನುಮತಿ ಸಹ ಪಡೆಯದೇ ಚಿತ್ರತಂಡ ಚಿತ್ರೀಕರಣ ಮಾಡಿದ್ದು ಇದರಿಂದಾಗಿ ಇದೀಗ ಖರ್ವಾ ಗ್ರಾಮದ ನಾಥಗೇರಿ -ಮೊಟೆ ಭಾಗದ ಸಂಪರ್ಕ ಕೊಂಡಿ ತಪ್ಪಿದಂತಾಗಿದೆ. ಪ್ರತಿ ಮಳೆಗಾಲದಲ್ಲಿ ಮುಖ್ಯ ಸಂಪರ್ಕ ಸೇತುವೆಯಾಗಿದ್ದ ಈ ಸೇತುವೆ ಚಿತ್ರೀಕರಣ ತಂಡದ ನಿರ್ಲಕ್ಷ ಕೆಲಸದಿಂದ ಊರಿನವರು ಸಂಪರ್ಕ ಕೊಂಡಿಯನ್ನ ಕಳೆದುಕೊಂಡಂತಾಗಿದೆ.

ಇನ್ನು ಸ್ಥಳಕ್ಕೆ ಗ್ರಾಮಪಂಚಾಯ್ತಿ ಪಿಡಿಓ ಗಿರೀಶ್ ನಾಯಕ ಹಾಗೂ ಇತರ ಅಧಿಕಾರಿಗಳು ಭೇಟಿನೀಡಿ ಪರಿಶೀಲನೆ ನಡೆಸಿದ್ದು ಪ್ರೊಡ್ಯುಸರ್ ಗೌತಮ್ ಎಂಬುವವರ ವಿರುದ್ಧ ಪ್ರಕರಣ ದಾಖಲಿಸಲು ಮುಂದಾಗಿದ್ದು, ಈ ವೇಳೆ ಸೇತುವೆಯ ವೆಚ್ಚ ಬರಿಸುವುದಾಗಿ ಚಿತ್ರತಂಡ ಮುಚ್ಚಳಿಕೆ ಬರೆದುಕೊಟ್ಟಿದೆ.

ಶ್ರೀಗಂಧ ಮರ ಕಡಿದ ನಾಲ್ವರ ಬಂಧನ

ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ಗೋಳಿಕಟ್ಟೆ ಗ್ರಾಮದಲ್ಲಿ ಅನಧಿಕೃತವಾಗಿ ಶ್ರೀಗಂಧದ ಮರಗಳನ್ನು ಕಡಿದಿರುವ ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರ ವಿರುದ್ಧ ಅರಣ್ಯ ಇಲಾಖೆ ಪ್ರಕರಣ ದಾಖಲಿಸಿ ಆರೋಪಿಗಳನ್ನು ಬಂಧಿಸಿದೆ.

ಅರಣ್ಯ ಪ್ರದೇಶದಲ್ಲಿ ಶ್ರೀಗಂಧದ ಮರಗಳನ್ನು ಕಡಿದ ಬಗ್ಗೆ ಖಚಿತ ಮಾಹಿತಿ ಮೇರೆಗೆ ದಾಳಿನಡಿಸಿದ ಅರಣ್ಯಾಧಿಕಾರಿಗಳ ತಂಡ ಸುಮಾರು 27 ಕೆ.ಜಿ ಶ್ರೀಗಂಧದ ಮರದ ತುಂಡನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಪ್ರಕರಣ ದಲ್ಲಿ ಆರೋಪಿಗಳಾದ ಸಂತೋಷ ಸಣ್ಣ ನಾಯ್ಕ (35), ನವೀನ ಚಂದ್ರಶೇಖರ ದೇವಡಿಗ (30), ಮಂಜುನಾಥ ಮಾದೇವ ಗೌಡ (39) ಹಾಗೂ ಜನಾರ್ಧನ ಗಣಪತಿ ಗೌಡ (29) ಎಂಬ ನಾಲ್ವರು ಆರೋಪಿಗಳನ್ನು ಬಂಧಿಸಲಾಗಿದೆ.

ಆರೋಪಿಗಳ ವಿರುದ್ಧ ಕರ್ನಾಟಕ ಅರಣ್ಯ ಕಾಯ್ದೆ ಹಾಗೂ ಭಾರತೀಯ ಅರಣ್ಯ ಕಾಯ್ದೆಯ ಅನ್ವಯ ಪ್ರಕರಣ ದಾಖಲಿಸಿ ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.

ಹಿಂದೂ ಧರ್ಮದಲ್ಲಿ ಕಸದಿಂದ ಪೂಜೆ ಮಾಡುವ ಏಕೈಕ ದೇವರು; ಕರ್ನಾಟಕದಲ್ಲಿಯೇ ಇದೆ ಪವಾಡದ ಊರು!

Sushma Hegde — Fri, 02 Oct 2026 11:49:51 +0530

ಸಾಮಾನ್ಯವಾಗಿ ಮನೆಯಲ್ಲಿ ಕಸ, ಹಳೆಯ ಬಟ್ಟೆ, ಮುರಿದ ವಸ್ತುಗಳು, ಬಳಕೆಯಾಗದ ಸಾಮಾನುಗಳು ಕಂಡರೆ ಅವುಗಳನ್ನು ಹೊರಗೆ ಹಾಕುತ್ತೇವೆ. ಆದರೆ ಉತ್ತರ ಕನ್ನಡದ ಕೆಲವು ಕರಾವಳಿ ಗ್ರಾಮಗಳಲ್ಲಿ ಇದೇ ತ್ಯಾಜ್ಯಕ್ಕೆ ವಿಶಿಷ್ಟ ಧಾರ್ಮಿಕ ನಂಬಿಕೆಯೊಂದು ಬೆಸೆದುಕೊಂಡಿದೆ. ಮನೆ ಹಾಗೂ ಸುತ್ತಮುತ್ತಲಿನ ಪ್ರದೇಶವನ್ನು ಸ್ವಚ್ಛಗೊಳಿಸಿ, ಸಂಗ್ರಹವಾದ ಕಸ ಮತ್ತು ಹಳೆಯ ವಸ್ತುಗಳನ್ನು ದೇವತೆಗೆ ಅರ್ಪಿಸುವ ಶತಮಾನಗಳಷ್ಟು ಹಳೆಯ ಆಚರಣೆ ಇಂದಿಗೂ ಮುಂದುವರಿದಿದೆ ಹೊನ್ನಾವರ ತಾಲೂಕಿನ ಕಾರ್ಕಿ ಗ್ರಾಮದಲ್ಲಿ ಇತ್ತೀಚೆಗೆ ನಡೆದ ಈ ಆಚರಣೆ ಇದೀಗ ಗಮನ ಸೆಳೆದಿದೆ. ರಾಷ್ಟ್ರೀಯ ಹೆದ್ದಾರಿ-66ರ ಸಮೀಪದ ದೇವಾಲಯವೊಂದರ ಬಳಿ ಗ್ರಾಮಸ್ಥರು ಒಟ್ಟುಗೂಡಿ ವಡಗಲಜ್ಜಿಗೆ ವಿವಿಧ ರೀತಿಯ ವಸ್ತುಗಳನ್ನು ಅರ್ಪಿಸಿದರು.

ಮನೆ ಸ್ವಚ್ಛಗೊಳಿಸಿ ಕಸವನ್ನೇ ದೇವರಿಗೆ ಅರ್ಪಣೆ

ವಡಗಲಜ್ಜಿ ಆಚರಣೆಯ ಪ್ರಮುಖ ಉದ್ದೇಶ ಮನೆ ಹಾಗೂ ಪರಿಸರವನ್ನು ಸ್ವಚ್ಛಗೊಳಿಸುವುದಾಗಿದೆ ಎಂದು ಸ್ಥಳೀಯರು ನಂಬುತ್ತಾರೆ. ಮನೆಗಳಲ್ಲಿ ವರ್ಷಗಳಿಂದ ಬಳಕೆಯಾಗದೆ ಬಿದ್ದಿರುವ ವಸ್ತುಗಳು, ಹಳೆಯ ಬಟ್ಟೆಗಳು, ಚೀಲಗಳು, ಪೊರಕೆಗಳು ಸೇರಿದಂತೆ ಹಲವು ಸಾಮಗ್ರಿಗಳನ್ನು ಹೊರತೆಗೆದು ದೇವಿಗೆ ಹರಕೆಯಾಗಿ ಅರ್ಪಿಸಲಾಗುತ್ತದೆ. ಮಹಿಳೆಯರು ಕುಂಕುಮ, ಅರಿಶಿನ ಹಚ್ಚಿಕೊಂಡು, ಹಸಿರು ಬಳೆಗಳನ್ನು ಧರಿಸಿ ಸೀರೆ, ತೆಂಗಿನಕಾಯಿ ಸೇರಿದಂತೆ ವಿವಿಧ ಪೂಜಾ ಸಾಮಗ್ರಿಗಳನ್ನು ದೇವಿಗೆ ಸಮರ್ಪಿಸುತ್ತಾರೆ. ಅಡುಗೆ ಪದಾರ್ಥಗಳನ್ನು ನೈವೇದ್ಯವಾಗಿಯೂ ನೀಡಲಾಗುತ್ತದೆ. ಕೆಲವು ಕಡೆ ಕೋಳಿ ಮತ್ತು ಉಪ್ಪನ್ನೂ ಅರ್ಪಿಸುವ ಪದ್ಧತಿ ಇದೆ. ಇದರ ಜೊತೆಗೆ ಮನೆಯಲ್ಲಿರುವ ಬಳಕೆಯಾಗದ ವಸ್ತುಗಳನ್ನೂ ದೇವಿಯ ಮುಂದೆ ರಾಶಿ ಹಾಕಲಾಗುತ್ತದೆ.

‘ತ್ಯಾಜ್ಯದ ಜತೆಗೆ ರೋಗವನ್ನೂ ತೆಗೆದುಕೊಂಡು ಹೋಗುತ್ತಾಳೆ’

ವಡಗಲಜ್ಜಿ ಊರಿನಿಂದ ಊರಿಗೆ ಸಂಚರಿಸುವ ದೇವತೆ ಎಂಬ ನಂಬಿಕೆ ಸ್ಥಳೀಯರಲ್ಲಿದೆ. ಜನರು ಮನೆಯಿಂದ ಹೊರತೆಗೆದ ತ್ಯಾಜ್ಯ ಮತ್ತು ಹಳೆಯ ವಸ್ತುಗಳನ್ನು ದೇವಿಗೆ ಅರ್ಪಿಸಿದರೆ, ಅವುಗಳ ಜತೆಗೆ ರೋಗ-ರುಜಿನಗಳನ್ನೂ ದೇವತೆ ಊರಿನಿಂದ ದೂರ ಕೊಂಡೊಯ್ಯುತ್ತಾಳೆ ಎಂಬ ನಂಬಿಕೆ ಇದೆ. ವಡಗಲಜ್ಜಿ ಅಥವಾ ವಡಗಲಮ್ಮ ಸೆಪ್ಟೆಂಬರ್ 5ರಂದು ಕಾರ್ಕಿಗೆ ಆಗಮಿಸಿದ್ದು, ಮಹಾಲಯ ಅಮಾವಾಸ್ಯೆಯವರೆಗೆ ಅಲ್ಲಿದ್ದು ಬಳಿಕ ಹೆದ್ದಾರಿಯಲ್ಲಿರುವ ಮತ್ತೊಂದು ಗ್ರಾಮಕ್ಕೆ ಕರೆದೊಯ್ಯಲಾಗುತ್ತದೆ ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.

‘ವಡಗು’ ಎಂದರೆ ಗುಡಿಸುವುದು!

ಈ ಆಚರಣೆಯ ಹೆಸರಿನ ಹಿಂದೆಯೂ ಕುತೂಹಲಕಾರಿ ಅರ್ಥವಿದೆ. ಉತ್ತರ ಕನ್ನಡದ ಸ್ಥಳೀಯ ಕನ್ನಡ ಬಳಕೆಯಲ್ಲಿ ‘ವಡಗು’ ಎಂದರೆ ಗುಡಿಸುವುದು ಎಂಬ ಅರ್ಥವಿದೆ. ಹೀಗಾಗಿ ಮನೆ ಮತ್ತು ಸುತ್ತಮುತ್ತಲಿನ ಪ್ರದೇಶವನ್ನು ಗುಡಿಸಿ ಸ್ವಚ್ಛಗೊಳಿಸುವ ಆಚರಣೆಯೊಂದಿಗೆ ವಡಗಲಜ್ಜಿ ಹೆಸರೂ ಬೆಸೆದುಕೊಂಡಿದೆ ಎಂದು ಸ್ಥಳೀಯರು ಹೇಳುತ್ತಾರೆ.

ಧಾರ್ಮಿಕ ನಂಬಿಕೆಯ ಜತೆಗೆ ಆರೋಗ್ಯದ ಕಾಳಜಿಯೂ?

ವಡಗಲಜ್ಜಿ ಆಚರಣೆಯ ಹಿಂದೆ ಕೇವಲ ಧಾರ್ಮಿಕ ನಂಬಿಕೆಯಷ್ಟೇ ಅಲ್ಲ, ಪ್ರಾಯೋಗಿಕ ಕಾರಣವೂ ಇರಬಹುದು ಎಂಬ ಅಭಿಪ್ರಾಯ ಸ್ಥಳೀಯರಲ್ಲಿ ಇದೆ. ಮನೆಗಳಲ್ಲಿ ವರ್ಷಗಟ್ಟಲೆ ಬಳಕೆಯಾಗದೆ ಬಿದ್ದಿರುವ ವಸ್ತುಗಳು ಹಾಗೂ ತ್ಯಾಜ್ಯವನ್ನು ಹಾಗೆಯೇ ಸಂಗ್ರಹಿಸಿಟ್ಟುಕೊಳ್ಳುವುದರಿಂದ ಆರೋಗ್ಯದ ಮೇಲೆ ಪರಿಣಾಮ ಬೀರುವ ಸಾಧ್ಯತೆ ಇದೆ. ಹೀಗಾಗಿ ಮಳೆಗಾಲದ ಬಳಿಕ ಮನೆ ಮತ್ತು ಪರಿಸರವನ್ನು ಸ್ವಚ್ಛಗೊಳಿಸಿ, ಹಳೆಯ ವಸ್ತುಗಳನ್ನು ಹೊರಹಾಕುವ ಪದ್ಧತಿ ಕ್ರಮೇಣ ಧಾರ್ಮಿಕ ಆಚರಣೆಯ ರೂಪ ಪಡೆದಿರಬಹುದು ಎಂದು ಗಣಪತಿ ಭಟ್ ಅಭಿಪ್ರಾಯಪಟ್ಟಿದ್ದಾರೆ.

ಹಿಂದೆ ಉತ್ತರ ಕನ್ನಡದ ಕೆಲವು ಭಾಗಗಳಲ್ಲಿ ಮಳೆಗಾಲದ ಬಳಿಕ ವಿವಿಧ ಜ್ವರಗಳು, ಕಾಲರಾ ಹಾಗೂ ಹೊಟ್ಟೆಗೆ ಸಂಬಂಧಿಸಿದ ಕಾಯಿಲೆಗಳು ಕಾಣಿಸಿಕೊಳ್ಳುತ್ತಿದ್ದವು ಎಂದು ಸ್ಥಳೀಯರು ಹೇಳುತ್ತಾರೆ. ಇಂತಹ ರೋಗಗಳಿಂದ ರಕ್ಷಣೆ ಪಡೆಯಲು ವಡಗಲಮ್ಮನಿಗೆ ಹರಕೆ ಸಲ್ಲಿಸುವ ಪದ್ಧತಿ ಬೆಳೆದಿರಬಹುದು ಎಂಬುದು ಸ್ಥಳೀಯ ನಂಬಿಕೆ.

ಹಳೆಯ ಪೊರಕೆಯಿಂದ ಎಲೆಕ್ಟ್ರಾನಿಕ್ ವಸ್ತುಗಳವರೆಗೆ!

ವಡಗಲಜ್ಜಿಗೆ ಅರ್ಪಿಸಲಾಗುವ ವಸ್ತುಗಳ ಪಟ್ಟಿಯೂ ಸಾಕಷ್ಟು ಕುತೂಹಲಕಾರಿಯಾಗಿದೆ. ಹಳೆಯ ಪೊರಕೆ, ಹರಿದ ಬಟ್ಟೆ, ಚೀಲ, ಕೊಡೆ, ಕೃಷಿ ಉಪಕರಣಗಳು ಸೇರಿದಂತೆ ಮನೆಯಲ್ಲಿ ಬಳಕೆಯಾಗದ ಹಲವು ವಸ್ತುಗಳನ್ನು ದೇವಿಗೆ ಅರ್ಪಿಸಲಾಗುತ್ತದೆ. ಕಾಲ ಬದಲಾಗುತ್ತಿದ್ದಂತೆ ಈ ಪಟ್ಟಿಗೆ ಎಲೆಕ್ಟ್ರಾನಿಕ್ ವಸ್ತುಗಳೂ ಸೇರ್ಪಡೆಯಾಗಿವೆ. ಹೀಗಾಗಿ ಹಿಂದಿನ ಕಾಲದ ವಸ್ತುಗಳ ಜತೆಗೆ ಆಧುನಿಕ ಕಾಲದ ಬಳಕೆಯಾಗದ ಸಾಮಾನುಗಳೂ ವಡಗಲಜ್ಜಿಯ ಮುಂದೆ ಕಾಣಿಸಿಕೊಳ್ಳುತ್ತವೆ.

ಮಧ್ಯರಾತ್ರಿ ದೇವಿಯ ಮೆರವಣಿಗೆ

ವಡಗಲಜ್ಜಿಯನ್ನು ಊರಿಗೆ ಬರಮಾಡಿಕೊಳ್ಳುವ ಸಂದರ್ಭದಲ್ಲೂ ವಿಶೇಷ ಆಚರಣೆ ನಡೆಯುತ್ತದೆ. ಸದ್ದು-ಗದ್ದಲ, ವಾದ್ಯಗಳೊಂದಿಗೆ ದೇವಿಯ ಮೆರವಣಿಗೆ ನಡೆಯುತ್ತದೆ. ನಿಗದಿತ ಅವಧಿಯಲ್ಲಿ ಗ್ರಾಮಸ್ಥರು ದೇವಿಗೆ ಪೂಜೆ ಸಲ್ಲಿಸಿ ಕಾಣಿಕೆಗಳನ್ನು ಅರ್ಪಿಸುತ್ತಾರೆ. ಆಚರಣೆಯ ಕೊನೆಯ ದಿನ ಮತ್ತಷ್ಟು ವಿಶೇಷವಾಗಿರುತ್ತದೆ. ಜಾತಿ, ಧರ್ಮ, ವರ್ಗದ ಭೇದವಿಲ್ಲದೆ ಗ್ರಾಮಸ್ಥರು ದೇವಿಯನ್ನು ಹೊತ್ತುಕೊಂಡು ಘೋಷಣೆಗಳನ್ನು ಕೂಗುತ್ತಾ, ಪೂಜಾ ಸಾಮಗ್ರಿ ಮತ್ತು ಸಂಗ್ರಹಿಸಿದ ತ್ಯಾಜ್ಯವನ್ನು ಜತೆಗಿಟ್ಟುಕೊಂಡು ಮಧ್ಯರಾತ್ರಿಯಲ್ಲಿ ಹೆದ್ದಾರಿಯಲ್ಲಿರುವ ನೆರೆಯ ಗ್ರಾಮಕ್ಕೆ ತೆರಳುತ್ತಾರೆ. ಬಳಿಕ ದೇವಿಯನ್ನು ಅಲ್ಲಿನ ಗ್ರಾಮಸ್ಥರಿಗೆ ಹಸ್ತಾಂತರಿಸಲಾಗುತ್ತದೆ.

ಊರೂರು ಸಾಗಿದಂತೆ ಹೆಚ್ಚಾಗುತ್ತದೆ ತ್ಯಾಜ್ಯದ ರಾಶಿ

ಅಂಕೋಲಾದ ಇತಿಹಾಸಕಾರ ಶ್ಯಾಮಸುಂದರ ಗೌಡ ಅವರ ಪ್ರಕಾರ, ವಡಗಲಜ್ಜಿ ಸಂಚರಿಸಲು ಎರಡು ಪ್ರಮುಖ ಮಾರ್ಗಗಳಿವೆ. ಒಂದು ಮಾರ್ಗ ಮಂಜುಗಿನಿ ಮತ್ತು ಗೋಕರ್ಣದ ಮೂಲಕ ಅಂಕೋಲಾ ಕಡೆಗೆ ಸಾಗುತ್ತದೆ. ಈ ಮಾರ್ಗದಲ್ಲಿ ಗ್ರಾಮಸ್ಥರು ದೇವಿಗೆ ಅರ್ಪಿಸುವ ವಸ್ತುಗಳನ್ನು ಸಂಗ್ರಹಿಸಿ ಮುಂದಿನ ಗ್ರಾಮಕ್ಕೆ ಕೊಂಡೊಯ್ಯುತ್ತಾರೆ. ಹಿಂದೆ ಈ ವಸ್ತುಗಳನ್ನು ಭುಜದ ಮೇಲೆ ಹೊತ್ತು ಸಾಗಿಸಲಾಗುತ್ತಿತ್ತು. ಈಗ ವಾಹನಗಳ ಮೂಲಕ ಸಾಗಿಸಲಾಗುತ್ತಿದೆ. ಹೊನ್ನಾವರ ಮತ್ತು ಕುಮಟಾ ಭಾಗಗಳಲ್ಲಿ ಈ ದೇವಿಯನ್ನು ವಡಗಲಮ್ಮ ಅಥವಾ ವಡಗಲಜ್ಜಿ ಎಂದು ಕರೆಯಲಾಗುತ್ತದೆ.

ಅಂಕೋಲಾದಲ್ಲಿ ಇದೇ ದೇವಿಗೆ ‘ಮಾರಿಹೋರ್’ ಎಂಬ ಹೆಸರಿದೆ. ‘ಮಾರಿ’ ಎಂದರೆ ರೋಗ ಮತ್ತು ‘ಹೊರೆ’ ಎಂದರೆ ಹೊರೆ ಅಥವಾ ಮೂಟೆ. ಅಂದರೆ ರೋಗದ ಹೊರೆಯನ್ನು ಹೊತ್ತುಕೊಂಡು ಹೋಗುವ ದೇವತೆ ಎಂಬ ಅರ್ಥವನ್ನು ಇದು ಸೂಚಿಸುತ್ತದೆ.

ಅಂತರ್ಜಾತಿ ವಿವಾಹವಾಗಿ 3 ವರ್ಷವಾದರೂ ಸಿಕ್ಕಿಲ್ಲ ಪ್ರೋತ್ಸಾಹಧನ; ಸಮಾಜ ಕಲ್ಯಾಣ ಇಲಾಖೆಯ ಚಕ್ರವ್ಯೂಹ

Kannadaprabha News — Wed, 07 Oct 2026 09:49:51 +0530

ರಾಘು ಕಾಕರಮಠ

ಕನ್ನಡಪ್ರಭ ವಾರ್ತೆ ಅಂಕೋಲಾ: ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡದ ಅಂತರ್ಜಾತಿ ವಿವಾಹಕ್ಕೆ ಪ್ರೋತ್ಸಾಹ ನೀಡಿ ಸಾಮಾಜಿಕ ಸಾಮರಸ್ಯಕ್ಕೆ ಉತ್ತೇಜನ ನೀಡುವ ಉದ್ದೇಶದಿಂದ ಸರ್ಕಾರ ಜಾರಿಗೆ ತಂದಿರುವ ಪ್ರೋತ್ಸಾಹಧನ ಯೋಜನೆಯೇ ಈಗ ಫಲಾನುಭವಿಗಳ ಪಾಲಿಗೆ ಕಾಯುವಿಕೆಯ ಯೋಜನೆಯಾಗಿ ಪರಿಣಮಿಸಿದೆಯೇ ಎಂಬ ಪ್ರಶ್ನೆ ಮೂಡಿದೆ.

ಅಂತರ್ಜಾತಿ ವಿವಾಹವಾದವರಿಗೆ ಸರ್ಕಾರದಿಂದ ಸಿಗುವ ಪ್ರೋತ್ಸಾಹಧನಕ್ಕಾಗಿ ಅರ್ಜಿ ಸಲ್ಲಿಸಿ ಎರಡ್ಮೂರು ವರ್ಷ ಕಳೆದರೂ ಹಣ ಕೈ ಸೇರದಿರುವುದು ದಂಪತಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಿ, ಅಗತ್ಯ ದಾಖಲೆಗಳನ್ನು ನೀಡಿ, ಇಲಾಖೆಯ ಅನುದಾನಕ್ಕಾಗಿ ಕಾಯುತ್ತಿರುವ ದಂಪತಿಗಳು ಇದೀಗ ಸಮಾಜ ಕಲ್ಯಾಣ ಇಲಾಖೆಯ ಕಚೇರಿಯತ್ತ ಪದೇ ಪದೇ ಅಲೆಯುವಂತಾಗಿದೆ.

ಅಂತರ್ಜಾತಿ ವಿವಾಹಗಳನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ವಿವಾಹಿತ ವಧು- ವರರಿಗೆ ಸರ್ಕಾರ ಪ್ರೋತ್ಸಾಹಧನ ನೀಡುತ್ತಿದೆ. ಈ ಯೋಜನೆಯಡಿ ಅರ್ಹ ದಂಪತಿಗಳು ಸಮಾಜ ಕಲ್ಯಾಣ ಇಲಾಖೆಗೆ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸುತ್ತಾರೆ. ಆದರೆ, ಅರ್ಜಿ ಸಲ್ಲಿಸಿದ ಬಳಿಕವೂ ಸಕಾಲದಲ್ಲಿ ಹಣ ಬಿಡುಗಡೆಯಾಗದಿರುವುದರಿಂದ ಸರ್ಕಾರದ ಪ್ರೋತ್ಸಾಹ ಯಾವಾಗ ಕೈ ಸೇರುತ್ತದೆ? ಎಂಬ ನಿರೀಕ್ಷೆಯಲ್ಲೇ ದಿನದೂಡಬೇಕಾಗಿದೆ.

ದಂಪತಿಗಳಿಂದ ಇಲಾಖೆಯ ಸುತ್ತಾಟ

ಹಿಂದೆ ಪ್ರೋತ್ಸಾಹಧನಕ್ಕಾಗಿ ಅರ್ಜಿ ಸಲ್ಲಿಸಿದವರಿಗೆ ಅದೇ ವರ್ಷದಲ್ಲಿ ಹಣ ಬಿಡುಗಡೆಯಾಗುತ್ತಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ಪರಿಸ್ಥಿತಿ ಬದಲಾಗಿದ್ದು, ಅರ್ಜಿ ಸಲ್ಲಿಸಿ ಎರಡು- ಮೂರು ವರ್ಷ ಕಳೆದರೂ ಅನುದಾನ ದೊರೆಯದಿರುವ ಪ್ರಕರಣಗಳು ಕಂಡುಬರುತ್ತಿವೆ. ಮದುವೆಯಾಗಿ ಹೊಸ ಬದುಕು ಆರಂಭಿಸಿರುವ ದಂಪತಿಗಳು ಸರ್ಕಾರದ ಪ್ರೋತ್ಸಾಹಧನಕ್ಕಾಗಿ ಕಾಯಬೇಕಾಗಿದೆ. ಹಣ ಬಿಡುಗಡೆಯಾಗದ ಹಿನ್ನೆಲೆ ಅರ್ಜಿಯ ಸ್ಥಿತಿಗತಿ ತಿಳಿದುಕೊಳ್ಳಲು ಇಲಾಖೆಯ ಕಚೇರಿಗೆ ತೆರಳಿ ವಿಚಾರಿಸುವುದು ಅನಿವಾರ್ಯವಾಗಿದೆ.

ಅನುದಾನ ಕೊರತೆಯೇ?

ಈ ಹಿಂದೆ ಅರ್ಜಿ ಸಲ್ಲಿಸಿದವರಿಗೆ ನಿಗದಿತ ಅವಧಿಯಲ್ಲೇ ಪ್ರೋತ್ಸಾಹಧನ ದೊರೆಯುತ್ತಿತ್ತು. ಆದರೆ, ಇದೀಗ ಎರಡ್ಮೂರು ವರ್ಷಗಳಾದರೂ ಹಣ ಬಿಡುಗಡೆಯಾಗದಿರುವುದರಿಂದ ಅರ್ಜಿ ಸಲ್ಲಿಸಿರುವ ದಂಪತಿಗಳಲ್ಲಿ ಅಸಮಾಧಾನ ಹೆಚ್ಚಾಗಿದೆ.

ಸರ್ಕಾರ ಅಂತರ್ಜಾತಿ ವಿವಾಹವನ್ನು ಉತ್ತೇಜಿಸುವುದಾಗಿ ಹೇಳುತ್ತಿರುವಾಗ, ಪ್ರೋತ್ಸಾಹಧನಕ್ಕಾಗಿ ಅರ್ಜಿ ಸಲ್ಲಿಸಿದವರಿಗೆ ಸಕಾಲದಲ್ಲಿ ಹಣ ಬಿಡುಗಡೆ ಮಾಡಬೇಕು ಎಂಬುದು ಫಲಾನುಭವಿಗಳ ಒತ್ತಾಯವಾಗಿದೆ.

ಎಷ್ಟು ಪ್ರೋತ್ಸಾಹಧನ?

ಪರಿಶಿಷ್ಟ ಜಾತಿಯ ಅಥವಾ ಪರಿಶಿಷ್ಟ ಪಂಗಡದ ವ್ಯಕ್ತಿಯನ್ನು ಇತರ ಜಾತಿಯ ವ್ಯಕ್ತಿ ವಿವಾಹವಾದ ಸಂದರ್ಭದಲ್ಲಿ ಅರ್ಹ ದಂಪತಿಗಳಿಗೆ ಸರ್ಕಾರ ಪ್ರೋತ್ಸಾಹಧನ ನೀಡುತ್ತದೆ. ಪರಿಶಿಷ್ಟ ಜಾತಿಯ ವರನಾದಲ್ಲಿ ₹2.50 ಲಕ್ಷ ಹಾಗೂ ಪರಿಶಿಷ್ಟ ಜಾತಿಯ ವಧುವಾದಲ್ಲಿ ₹3.50 ಲಕ್ಷ ಪ್ರೋತ್ಸಾಹಧನ ನೀಡಲಾಗುತ್ತದೆ.

ಅಂತರ್ಜಾತಿ ವಿವಾಹದ ಪ್ರೋತ್ಸಾಹಧನಕ್ಕೆ ಅನುದಾನ ಬಿಡುಗಡೆಯಾದಾಗ ಸ್ವೀಕೃತವಾದ ಅರ್ಜಿಗಳ ಮೊದಲ ಆದ್ಯತೆ ಮೇರೆಗೆ ಹಣ ನೀಡಲಾಗುತ್ತಿದೆ. ಅನುದಾನ ಬಿಡುಗಡೆಗೊಳಿಸುವಂತೆ ಇಲಾಖೆಗೆ ವರದಿ ಸಲ್ಲಿಸಿ ಮನವಿ ಮಾಡಲಾಗಿದೆ. ಅಂತರ್ಜಾತಿ ವಿವಾಹವನ್ನು ಉತ್ತೇಜಿಸುವ ಉದ್ದೇಶದಿಂದ ಬೀದಿನಾಟಕ, ಕಾರ್ಯಾಗಾರ ಸೇರಿದಂತೆ ವಿವಿಧ ಚಟುವಟಿಕೆಗಳನ್ನು ಆಯೋಜಿಸಲಾಗುತ್ತಿದೆ.

ಭಾರತಿ ಆಚಾರಿ, ಸಹಾಯಕ ನಿರ್ದೇಶಕರು, ಸಮಾಜ ಕಲ್ಯಾಣ ಇಲಾಖೆ, ಅಂಕೋಲಾ

6 ಅರ್ಜಿ ಸ್ವೀಕಾರ

ಅಂಕೋಲಾ ತಾಲೂಕಿನಲ್ಲಿ 2024- 25ರಲ್ಲಿ ಪ್ರೋತ್ಸಾಹಧನಕ್ಕಾಗಿನ 6 ಅರ್ಜಿ ಸ್ವೀಕಾರವಾಗಿದ್ದವು. ಅದರಲ್ಲಿ ನಾಲ್ವರು ಫಲಾನುಭವಿಗಳಿಗೆ ಹಣ ಮಂಜೂರಾಗಿದ್ದು, 2 ಬಾಕಿ ಇದೆ. ಇನ್ನು 2025- 26ರಲ್ಲಿ 1 ಹಾಗೂ 2026- 27ರಲ್ಲಿ 3 ಫನಾಭವಿಗಳು ಅಜಿ ಸಲ್ಲಿಸಿದ್ದರು. ಹೀಗೆ ಒಟ್ಟು 6 ಫಲಾನುಭವಿಗಳಿಗೆ ಹಣ ಬಂದಿಲ್ಲ.

ಇದನ್ನೂ ಓದಿ: ಮಂಗಳೂರು: ಪಡೀಲು-ಸುಬ್ರಹ್ಮಣ್ಯ: 9 ನಿಲ್ದಾಣ, 20 ತಿಂಗಳಲ್ಲಿ 16.38 ಲಕ್ಷ ರೈಲು ಪ್ರಯಾಣಿಕರು!

ಹೊನ್ನಾವರದಲ್ಲಿ ಅರಣ್ಯ ಒತ್ತುವರಿದಾರರಿಗೆ ಬಿಗ್ ಶಾಕ್: ಒಂದೇ ದಿನ 10ಕ್ಕೂ ಹೆಚ್ಚು ಅಕ್ರಮ ಜಾಗ ತೆರವು

Santosh Naik — Thu, 08 Oct 2026 16:08:47 +0530

ಹೊನ್ನಾವರ (ಅ.8): ಹೊನ್ನಾವರ ತಾಲೂಕಿನಲ್ಲಿ ಅರಣ್ಯ ಭೂಮಿ ಒತ್ತುವರಿ ವಿರುದ್ಧ ಸಮರ ಸಾರಿರುವ ಅರಣ್ಯ ಇಲಾಖೆಯು ಬುಧವಾರ ತನ್ನ ಕಾರ್ಯಾಚರಣೆಯನ್ನು ತೀವ್ರಗೊಳಿಸಿದ್ದು, ಒಂದೇ ದಿನದಲ್ಲಿ 10ಕ್ಕೂ ಹೆಚ್ಚು ಒತ್ತುವರಿ ಪ್ರದೇಶಗಳನ್ನು ತೆರವುಗೊಳಿಸಿದೆ.

ತಾಲೂಕಿನ ಹೇರಾವಳಿ ಗ್ರಾಮದ ವಿವಿಧ ಭಾಗಗಳಲ್ಲಿ ಇಲಾಖೆಯ ಸಿಬ್ಬಂದಿ ಏಕಾಏಕಿ ಕಾರ್ಯಾಚರಣೆ ನಡೆಸಿ, ಯಾವುದೇ ವ್ಯಕ್ತಿಗಳು ವಾಸವಿರದಿದ್ದ ಶೆಡ್‌ಗಳನ್ನು ಸಂಪೂರ್ಣವಾಗಿ ತೆರವುಗೊಳಿಸಿದ್ದಾರೆ. ಈ ವೇಳೆ ಅರಣ್ಯ ಭೂಮಿಯಲ್ಲಿ ಅಕ್ರಮವಾಗಿ ಬೆಳೆಯಲಾಗಿದ್ದ ಅಡಿಕೆ, ಬಾಳೆ, ತೆಂಗು ಸೇರಿದಂತೆ ವಿವಿಧ ಬೆಳೆಗಳು ಹಾಗೂ ಗಿಡಗಳನ್ನು ಅಧಿಕಾರಿಗಳು ನಾಶಪಡಿಸಿದ್ದಾರೆ. ಅಲ್ಲದೆ, ಹೇರಾವಳಿಯ ಹಚಲಮಕ್ಕಿ ಮಜರೆಯಲ್ಲಿ ಕಲ್ಲಿನಿಂದ ನಿರ್ಮಿಸಲಾಗಿದ್ದ ಏಕತಲದ (ಒಂದು ಮಹಡಿಯ) ದನದ ಕೊಟ್ಟಿಗೆಯನ್ನು ಜೆಸಿಬಿ (ಎರ್ತ್ ಮೂವರ್) ಯಂತ್ರ ಬಳಸಿ ಧ್ವಂಸಗೊಳಿಸಲಾಗಿದೆ.

ಸಂತ್ರಸ್ತರ ಆಕ್ರೋಶ ಮತ್ತು ಅಧಿಕಾರಿಗಳ ವಿರುದ್ಧ ಆರೋಪ

ಇನ್ನೊಂದೆಡೆ, ದನದ ಕೊಟ್ಟಿಗೆ ಕಳೆದುಕೊಂಡ ಮಾಲೀಕರು ಅರಣ್ಯ ಇಲಾಖೆಯ ಈ ದಿಢೀರ್ ಕ್ರಮಕ್ಕೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. "ಈ ಜಾಗವು 1978ಕ್ಕಿಂತ ಮುಂಚೆಯೇ ಅರಣ್ಯ ಹಕ್ಕು ಕಾಯ್ದೆಯಡಿ ಮಂಜೂರಾದ ಜಮೀನಿನಲ್ಲಿತ್ತು. ಜಾಗವನ್ನು ತೆರವುಗೊಳಿಸುವ ಮುನ್ನ ಸರ್ವೇ (ಅಳತೆ) ನಡೆಸುವಂತೆ ನಾವು ಅಧಿಕಾರಿಗಳಿಗೆ ಮನವಿ ಮಾಡಿಕೊಂಡಿದ್ದೆವು. ಆದರೆ ಅಧಿಕಾರಿಗಳು ನಮ್ಮ ಮನವಿಗೆ ಯಾವುದೇ ಸ್ಪಂದನೆ ನೀಡದೆ ಏಕಾಏಕಿ ಜಮೀನಿಗೆ ನುಗ್ಗಿ ಧ್ವಂಸ ಮಾಡಿದ್ದಾರೆ" ಎಂದು ಸಂತ್ರಸ್ತರು ಆರೋಪಿಸಿದ್ದಾರೆ.

ಅಲ್ಲದೆ, ಒಣಗಿಸಲು ಇಡಲಾಗಿದ್ದ ಸುಮಾರು 25,000 ರೂಪಾಯಿ ಮೌಲ್ಯದ ಅಡಿಕೆ, ಮೇವು ಹಾಗೂ ಇತರ ಸಾಮಗ್ರಿಗಳು ಈ ಕಾರ್ಯಾಚರಣೆಯ ವೇಳೆ ಸಂಪೂರ್ಣವಾಗಿ ಹಾನಿಗೊಳಗಾಗಿವೆ ಎಂದು ಸಂತ್ರಸ್ತರು ಅಳಲು ತೋಡಿಕೊಂಡಿದ್ದಾರೆ.

"ಒತ್ತುವರಿ ವಿರುದ್ಧ ದಾಳಿ ಮುಂದುವರಿಯಲಿದೆ" - DCF ಯೋಗೇಶ್ ಸಿ.ಕೆ

ಕಾರ್ಯಾಚರಣೆಯ ನೇತೃತ್ವ ವಹಿಸಿದ್ದ ಉಪ ಅರಣ್ಯ ಸಂರಕ್ಷಣಾಧಿಕಾರಿ (DCF) ಯೋಗೇಶ್ ಸಿ.ಕೆ. ಮಾತನಾಡಿ, 'ತಾಲೂಕಿನಲ್ಲಿ ದಿನದಿಂದ ದಿನಕ್ಕೆ ಅರಣ್ಯ ಭೂಮಿ ಒತ್ತುವರಿ ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಇದನ್ನು ತಡೆಯಲು ತೆರವು ಕಾರ್ಯಾಚರಣೆಯನ್ನು ನಿರಂತರವಾಗಿ ಮುಂದುವರಿಸಲಾಗುವುದು. ಅರಣ್ಯ ಭೂಮಿಯನ್ನು ಅಕ್ರಮವಾಗಿ ವಶಪಡಿಸಿಕೊಂಡಿರುವ ಪ್ರತಿಯೊಬ್ಬ ಒತ್ತುವರಿದಾರರ ವಿರುದ್ಧ ನಿರ್ದಾಕ್ಷಿಣ್ಯವಾಗಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು' ಎಂದು ಎಚ್ಚರಿಸಿದ್ದಾರೆ.

"ಆದಾಗ್ಯೂ, ಜೀವನೋಪಾಯಕ್ಕಾಗಿ ಅರಣ್ಯ ಭೂಮಿಯನ್ನೇ ನೆಚ್ಚಿಕೊಂಡಿದ್ದು, ವಾಸಿಸಲು ಪರ್ಯಾಯ ಮನೆ ಅಥವಾ ಕುಟುಂಬದ ಹೆಸರಿನಲ್ಲಿ ಸ್ವಂತ ಜಮೀನು ಇಲ್ಲದ ಬಡವರನ್ನು ಈ ಕಾರ್ಯಾಚರಣೆಯಿಂದ ವಿನಾಯಿತಿ ನೀಡಲಾಗುವುದು. ಅವರನ್ನು ಹೊರತುಪಡಿಸಿ ಉಳಿದ ಯಾವುದೇ ಒತ್ತುವರಿದಾರರನ್ನು ಬಿಡುವುದಿಲ್ಲ" ಎಂದು ಡಿಸಿಎಫ್ ಸ್ಪಷ್ಟಪಡಿಸಿದ್ದಾರೆ.

ಈ ತೆರವು ಕಾರ್ಯಾಚರಣೆಯ ಸಂದರ್ಭದಲ್ಲಿ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ (ACF) ವಿಜಯಕುಮಾರ್ ಕಾಳಪ್ಪನವರ್, ವಲಯ ಅರಣ್ಯಾಧಿಕಾರಿ (RFO) ಪ್ರಮೋದ್ ನಾಯಕ್ ಹಾಗೂ ಇಲಾಖೆಯ ಸಿಬ್ಬಂದಿಗಳು ಸ್ಥಳದಲ್ಲಿದ್ದು ಕಾರ್ಯಾಚರಣೆ ನಡೆಸಿದರು.

ಹಳಿಯಾಳದ ಬಾಯಾರಿಕೆ ತೀರಿಸಿದ ಪ್ರಾಜೆಕ್ಟ್ ನನ್ನೀರ್; ಬತ್ತಿದ 3 ಜಲಮೂಲಗಳಿಗೆ ಜೀವಕಳೆ

Kannadaprabha News — Fri, 02 Oct 2026 08:20:35 +0530

ಕಾರವಾರ: ಜಲಮೂಲಗಳ ಅಭಿವೃದ್ಧಿಗೆ ಶ್ರಮಿಸುತ್ತಿರುವ ಎಎಂಎಂ ಪ್ರತಿಷ್ಠಾನ ತನ್ನ ಪ್ರಾಜೆಕ್ಟ್ ನನ್ನೀರ್ ಯೋಜನೆಯ ಮೂಲಕ ಹಳಿಯಾಳದ ಮೂರು ಜಲಮೂಲಗಳನ್ನು ಪುನರುಜ್ಜೀವನ ಮಾಡಿದೆ.

ಕುಂಬಾರಕೆರೆ, ಅಲ್ಲೋಳಿ ಹೊಂಡ, ಹನುಮಂತ ಹೊಂಡ

ಹಳಿಯಾಳ ತಾಲೂಕಿನ ಮೂರು ಪ್ರಮುಖ ಜಲಮೂಲಗಳಾದ ತೇರಗಾಂವ ಗ್ರಾಮದ ಕುಂಬಾರಕೆರೆ, ಅಲ್ಲೋಳಿ ಹೊಂಡ ಮತ್ತು ಹನುಮಂತ ಹೊಂಡವನ್ನು ಅಭಿವೃದ್ಧಿಪಡಿಸಿ ಜಲ ಭದ್ರತೆಗೆ ಬಲ ತಂದುಕೊಟ್ಟಿದೆ ಹಾಗೂ ಸ್ಥಳೀಯ ಸಮುದಾಯಗಳಿಗೆ ಸುಸ್ಥಿರವಾದ ಜೀವನೋಪಾಯಕ್ಕೆ ನೆರವು ಒದಗಿಸಿದೆ ಎಂದು ಇಐಡಿ ಪ್ಯಾರಿ ಇಂಡಿಯಾ ಲಿಮಿಟೆಡ್ ಕಂಪನಿಯ ಸಿಇಒ ಹಾಗೂ ಪ್ರಾಜೆಕ್ಟ್ ನನ್ನೀರ್‌ನ ಅಧ್ಯಕ್ಷ ಮುತ್ತು ಮುರುಗಪ್ಪನ್ ಹೇಳಿದ್ದಾರೆ.

ಅಂದಾಜು 243 ಕುಟುಂಬಗಳಿಗೆ ಪ್ರಯೋಜನ

ನೈಋತ್ಯ ಮುಂಗಾರಿನ ಅವಧಿಯಲ್ಲಿ ವಾರ್ಷಿಕ 1,500 ಮಿಮೀಗಿಂತ ಹೆಚ್ಚು ಮಳೆ ಸುರಿದರೂ ಹಳಿಯಾಳ ತಾಲೂಕು ಆ ನೀರನ್ನು ಉಳಿಸಿಕೊಳ್ಳುವಲ್ಲಿ ಸವಾಲು ಎದುರಿಸುತ್ತಿದೆ. ಸುರಿದ ನೀರು ಅಂತರ್ಜಲ ಸೇರುವಂತೆ ಮಾಡುವಲ್ಲಿನ ಸೀಮಿತ ಸಾಮರ್ಥ್ಯ, ಸುರಿದ ನೀರು ಹರಿದುಹೋಗುವ ಕಾರಣಗಳಿಂದಾಗಿ ಹಳಿಯಾಳವು ಕಾಲಕಾಲಕ್ಕೆ ನೀರಿನ ಕೊರತೆ ಎದುರಿಸುತ್ತದೆ. ಈ ಹಿನ್ನೆಲೆಯಲ್ಲಿ ಯೋಜನೆ ರೂಪಿಸಲಾಗಿತ್ತು ಎಂದು ಅವರು ಪ್ರಕಟಣೆಯಲ್ಲಿ ವಿವರಿಸಿದ್ದಾರೆ. ಇದರಿಂದಾಗಿ ಅಂದಾಜು 243 ಕುಟುಂಬಗಳಿಗೆ ಪ್ರಯೋಜನ ಆಗಲಿದೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: Chikkaballapura: ರಾಷ್ಟ್ರಮಟ್ಟದಲ್ಲಿ ಚಿಕ್ಕಬಳ್ಳಾಪುರ ಜಿಲ್ಲೆಯ ಸಾಧನೆ; 1,242 ಹಳ್ಳಿಗಳಲ್ಲಿ ಸದ್ದಿಲ್ಲದೆ ನಡೆಯಿತು ಕ್ರಾಂತಿ!

ಒಟ್ಟಾರೆಯಾಗಿ ಈ ಕ್ರಮಗಳಿಂದಾಗಿ ಕೃಷಿ ಉದ್ದೇಶಗಳು ಹಾಗೂ ನಿತ್ಯದ ಅಗತ್ಯಗಳಿಗೆ ನೀರಿನ ಲಭ್ಯತೆ ಸುಧಾರಣೆ ಕಂಡು, 370ಕ್ಕೂ ಹೆಚ್ಚು ಕುಟುಂಬಗಳಿಗೆ ಅನುಕೂಲ ಆಗಲಿದೆ ಎಂದು ಪಿಶುನಾಥ ದೇವೇಂದ್ರ ಮಿರಾಶಿ ಹಾಗೂ ನಾಗಪ್ಪ ಶಾಂತಪ್ಪ ಕಕ್ಕೇರಿ ಸಂತಸ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ಯಲ್ಲಾಪುರದ 5 ಆಯುಷ್ಮಾನ್ ಆರೋಗ್ಯ ಕೇಂದ್ರ ಮುಚ್ಚಲು ಆದೇಶ: ಸ್ಥಳೀಯರಿಂದ ವಿರೋಧ ವ್ಯಕ್ತ

ಮುಂದಿನ 3 ಗಂಟೆಗಳಲ್ಲಿ ರಾಜ್ಯದ 5 ಜಿಲ್ಲೆಗಳಿಗೆ ಮಳೆ ಅಲರ್ಟ್: ಗುಡುಗು, ಬಿರುಗಾಳಿ ಸಹಿತ ಮಳೆಯಾಗುವ ಸಾಧ್ಯತೆ

Santosh Naik — Tue, 06 Oct 2026 18:05:18 +0530

ಬೆಂಗಳೂರು (ಅ.6): ರಾಜ್ಯದ ಹಲವು ಭಾಗಗಳಲ್ಲಿ ಹವಾಮಾನ ವೈಪರೀತ್ಯ ಉಂಟಾಗಿದ್ದು, ಮುಂದಿನ 3 ಗಂಟೆಗಳ ಅವಧಿಯಲ್ಲಿ ರಾಜ್ಯದ ಐದು ಪ್ರಮುಖ ಜಿಲ್ಲೆಗಳಲ್ಲಿ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಹವಾಮಾನ ಇಲಾಖೆಯ ಮಾಹಿತಿಯಂತೆ ಬೆಂಗಳೂರು ನಗರ, ಬೆಂಗಳೂರು ಗ್ರಾಮಾಂತರ, ತುಮಕೂರು, ಧಾರವಾಡ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳಲ್ಲಿ ವಾತಾವರಣ ಬದಲಾಗಲಿದ್ದು, ಪ್ರತ್ಯೇಕ ಸ್ಥಳಗಳಲ್ಲಿ ಗುಡುಗು, ಸಿಡಿಲು ಸಹಿತ ಹಗುರದಿಂದ ಸಾಧಾರಣ ಮಳೆಯಾಗುವ ನಿರೀಕ್ಷೆಯಿದೆ.

ಬೀಸಲಿದೆ ಬಲವಾದ ಬಿರುಗಾಳಿ, ವಿದ್ಯುತ್ ವ್ಯತ್ಯಯ ಸಾಧ್ಯತೆ

ಮಳೆಯ ಜೊತೆಗೆ ವಾತಾವರಣದಲ್ಲಿ ಭಾರಿ ಗಾಳಿಯ ಒತ್ತಡ ಸೃಷ್ಟಿಯಾಗಲಿದ್ದು, ಗಂಟೆಗೆ 30 ರಿಂದ 40 ಕಿಲೋಮೀಟರ್ ವೇಗದಲ್ಲಿ ಬಿರುಗಾಳಿ ಬೀಸುವ ಸಾಧ್ಯತೆಯಿದೆ. ಭಾರಿ ಮಳೆಯಿಂದಾಗಿ ನಗರ ಹಾಗೂ ಗ್ರಾಮಾಂತರ ಪ್ರದೇಶಗಳ ತಗ್ಗು ಪ್ರದೇಶಗಳಲ್ಲಿ ನೀರು ನಿಂತು ವಾಹನ ಸಂಚಾರಕ್ಕೆ ಅಡಚಣೆ ಉಂಟಾಗಬಹುದು. ಗಾಳಿ ಮತ್ತು ಸಿಡಿಲಿನ ಆರ್ಭಟಕ್ಕೆ ಮರದ ಕೊಂಬೆಗಳು ಮುರಿದು ವಿದ್ಯುತ್ ತಂತಿಗಳ ಮೇಲೆ ಬೀಳುವ ಸಾಧ್ಯತೆಯಿರುವುದರಿಂದ ಕೆಲವೆಡೆ ವಿದ್ಯುತ್ ಪೂರೈಕೆಯಲ್ಲಿ ವ್ಯತ್ಯಯವಾಗಬಹುದು.ಬಿರುಗಾಳಿಯ ರಭಸಕ್ಕೆ ಹಳೆಯ ಅಥವಾ ದುರ್ಬಲ ಮರದ ಕೊಂಬೆಗಳು ಮುರಿದು ಬೀಳುವ ಅಪಾಯವಿದೆ.

ಸಾರ್ವಜನಿಕರಿಗೆ ಮುನ್ನೆಚ್ಚರಿಕಾ ಸೂಚನೆಗಳು

ಮಳೆ ಹಾಗೂ ಸಿಡಿಲ ಆರ್ಭಟದ ಹಿನ್ನೆಲೆಯಲ್ಲಿ ಸಾರ್ವಜನಿಕರು ಹಾಗೂ ವಾಹನ ಸವಾರರು ಜಾಗರೂಕರಾಗಿರಲು ಹವಾಮಾನ ಇಲಾಖೆ ಹಾಗೂ ಸ್ಥಳೀಯ ಆಡಳಿತ ಕೆಲ ಪ್ರಮುಖ ಮುನ್ನೆಚ್ಚರಿಕೆಗಳನ್ನು ನೀಡಿದೆ.ಮಳೆ ಹಾಗೂ ಗುಡುಗು ಸಿಡಿಲು ಇರುವ ಸಮಯದಲ್ಲಿ ವಿದ್ಯುತ್ ಕಂಬಗಳು, ಟ್ರಾನ್ಸ್‌ಫಾರ್ಮರ್‌ಗಳು ಮತ್ತು ವಿದ್ಯುತ್ ಉಪಕರಣಗಳಿಂದ ಸುರಕ್ಷಿತ ಅಂತರ ಕಾಯ್ದುಕೊಳ್ಳಿ.ರಸ್ತೆಗಳಲ್ಲಿ ನೀರು ನಿಂತಿರುವ ತಗ್ಗು ಪ್ರದೇಶಗಳು ಹಾಗೂ ಮ್ಯಾನ್‌ಹೋಲ್‌ಗಳ ಬಳಿ ಸಂಚರಿಸುವಾಗ ಹೆಚ್ಚಿನ ಎಚ್ಚರಿಕೆ ವಹಿಸಿ. ಬಿರುಗಾಳಿ ಬೀಸುವಾಗ ದೊಡ್ಡ ಮರಗಳ ಕೆಳಗೆ ಅಥವಾ ದುರ್ಬಲ ಕಟ್ಟಡಗಳ ಆಸರೆಯಲ್ಲಿ ನಿಲ್ಲಬಾರದು.

ಧಾರಾಕಾರ ಮಳೆಯಾಗುವ ಸಾಧ್ಯತೆ ಇರುವುದರಿಂದ ತುರ್ತು ಕೆಲಸಗಳಿದ್ದರೆ ಮಾತ್ರ ಸಾರ್ವಜನಿಕರು ಹೊರಬರಲು ಹಾಗೂ ಪ್ರಯಾಣದ ವೇಳೆ ಹೆಚ್ಚಿನ ಜಾಗ್ರತೆ ವಹಿಸಲು ಕೋರಲಾಗಿದೆ.

Bantwal: ವಿದ್ಯುತ್ ಅವಘಡದಲ್ಲಿ ಮೃತಪಟ್ಟ ಕೃಷ್ಣ ಕುಲಾಲ್ ಕುಟುಂಬಕ್ಕೆ ₹5 ಲಕ್ಷ ಪರಿಹಾರ

Kannadaprabha News — Sun, 04 Oct 2026 07:00:28 +0530

ಉತ್ತರ ಕನ್ನಡ: ಬಂಟ್ವಾಳ ವಿಧಾನಸಭಾ ಕ್ಷೇತ್ರದ ಬಿ.ಮೂಡ ಗ್ರಾಮದ ಮೊಡಂಕಾಪು ರಾಜೀವ ಪಲ್ಕೆಯ ನಿವಾಸಿ ಕೃಷ್ಣ ಕುಲಾಲ್ ಅವರು ವಿದ್ಯುತ್ ಅವಘಡದಲ್ಲಿ ಮೃತಪಟ್ಟ ಹಿನ್ನೆಲೆಯಲ್ಲಿ, ಅವರ ಕುಟುಂಬಕ್ಕೆ ಎ.ಎಂ.ಆರ್. ಸಂಸ್ಥೆಯ ವತಿಯಿಂದ 5 ಲಕ್ಷ ರು. ಪರಿಹಾರ ಧನವನ್ನು ಹಸ್ತಾಂತರಿಸಲಾಯಿತು.

ಹೆಚ್.ಟಿ. ವಿದ್ಯುತ್ ತಂತಿ ತಗುಲಿ ಸಂಭವಿಸಿದ ದುರ್ಘಟ

ಶಂಭೂರಿನ ಎ.ಎಂ.ಆರ್. ಸಂಸ್ಥೆಯಿಂದ ಪಲ್ಲಮಜಲು ಗ್ರಿಡ್‌ಗೆ ವಿದ್ಯುತ್ ಸರಬರಾಜು ಮಾಡುವ ಹೆಚ್.ಟಿ. ವಿದ್ಯುತ್ ತಂತಿ ತಗುಲಿ ಸಂಭವಿಸಿದ ದುರ್ಘಟನೆಯಲ್ಲಿ ಕೃಷ್ಣ ಕುಲಾಲ್ ಅವರು ಮೃತಪಟ್ಟಿದ್ದರು. ಈ ಹಿನ್ನೆಲೆಯಲ್ಲಿ ಎ.ಎಂ.ಆರ್. ಸಂಸ್ಥೆಯ ವತಿಯಿಂದ ನೀಡಲಾದ ₹5 ಲಕ್ಷ ಪರಿಹಾರ ಧನವನ್ನು ಸಂಸದ ಕ್ಯಾಪ್ಟನ್ ಬ್ರಿಜೇಶ್ ಚೌಟ ಹಾಗೂ ಬಂಟ್ವಾಳ ಶಾಸಕ ರಾಜೇಶ್ ನಾಯ್ಕ್ ಉಳಿಪ್ಪಾಡಿಗುತ್ತು ಅವರ ಮೂಲಕ ಮೃತರ ಕುಟುಂಬಕ್ಕೆ ಹಸ್ತಾಂತರಿಸಲಾಯಿತು.

ಇದನ್ನೂ ಓದಿ: Hassan: 23 ಕೋಟಿ ವೆಚ್ಚದ ಹೊಸ ಸೇತುವೆ ಆರಂಭದಲ್ಲೇ ಕಳಪೆ ಕಾಮಗಾರಿ; ಕಂಬಗಳಲ್ಲಿ ಬಿರುಕು

ಈ ಸಂದರ್ಭದಲ್ಲಿ ಗೋವಿಂದ ಪ್ರಭು, ಸುಲೋಚನಾ ಜಿ. ಕೆ. ಭಟ್, ಹರಿಕೃಷ್ಣ ಬಂಟ್ವಾಳ್, ಮಚ್ಚೇಂದ್ರ ಸಾಲ್ಯಾನ್, ಕೇಶವ ದೈಪಲ, ಸುದರ್ಶನ್ ಬಜ, ಚೆನ್ನಪ್ಪ ಕೋಟ್ಯಾನ್, ದೇವಪ್ಪ ಪೂಜಾರಿ, ಮಾಧವ ಮಾವೆ, ದಿನೇಶ್ ಅಮ್ಟೂರು ಸೇರಿದಂತೆ ಪ್ರಮುಖರು ಉಪಸ್ಥಿತರಿದ್ದರು.

ಇದನ್ನೂ ಓದಿ: Travel: ದಸರಾ ಹಬ್ಬಕ್ಕೆ ಮಂಗಳೂರು KSRTCಯಿಂದ ವಿಶೇಷ ಕೊಡುಗೆ; 5 ಪ್ಯಾಕೇಜ್ ಘೋಷಣೆ

ಯಲ್ಲಾಪುರದ 5 ಆಯುಷ್ಮಾನ್ ಆರೋಗ್ಯ ಕೇಂದ್ರ ಮುಚ್ಚಲು ಆದೇಶ: ಸ್ಥಳೀಯರಿಂದ ವಿರೋಧ ವ್ಯಕ್ತ

Kannadaprabha News — Fri, 02 Oct 2026 07:49:37 +0530

ಶಂಕರ ಭಟ್ಟ ತಾರೀಮಕ್ಕಿ

ಕಾರವಾರ: ಯಲ್ಲಾಪುರ ಪಟ್ಟಣದಲ್ಲಿರುವ 5 ಆಯುಷ್ಮಾನ್‌ ಆರೋಗ್ಯ ಕೇಂದ್ರಗಳನ್ನು ಮುಚ್ಚುವಂತೆ ಸರ್ಕಾರ ಆದೇಶ ಹೊರಡಿಸಿದೆ.

ಕಳೆದ ಆರೇಳು ವರ್ಷಗಳ ಹಿಂದೆ ರಾಜ್ಯ ಸರ್ಕಾರ ಗ್ರಾಮೀಣ ಪ್ರದೇಶಗಳಲ್ಲಿ ಜನರಿಗೆ ಅನುಕೂಲವಾಗಲೆಂದು ಆಯುಷ್ಮಾನ್ ಆರೋಗ್ಯ ಕೇಂದ್ರವನ್ನು ಮಾಡಲು ಮುಂದಾಗಿತ್ತು. ಕೆಲವು ಕಡೆ ಆಯುಷ್ಮಾನ್‌ ಆರೋಗ್ಯ ಕೇಂದ್ರಗಳು ಪ್ರಾರಂಭವಾಗಿವೆ. ಅದೇ ರೀತಿ ಆಯುಷ್ಮಾನ್ ಆರೋಗ್ಯ ಕೇಂದ್ರವನ್ನು ಪಟ್ಟಣದಲ್ಲೂ ಪ್ರಾರಂಭಿಸಲಾಗಿತ್ತು.

ಸರ್ಕಾರಿ ಆಸ್ಪತ್ರೆಗಳ ವ್ಯವಸ್ಥೆ

ನಿಜವಾಗಿಯೂ ಪಟ್ಟಣದಲ್ಲಿ ಹತ್ತಾರು ಖಾಸಗಿ ಆಸ್ಪತ್ರೆಗಳು ಮತ್ತು ಸರ್ಕಾರಿ ಆಸ್ಪತ್ರೆಗಳ ವ್ಯವಸ್ಥೆ ಅತ್ಯಂತ ಉತ್ತಮವಾಗಿದೆ. ಸರ್ಕಾರಕ್ಕೆ ಈಗ ತಾನು ಮಾಡಿದ ತಪ್ಪಿನ ಅರಿವಾಗಿ, ತಕ್ಷಣದಿಂದ ಪಟ್ಟಣದಲ್ಲಿರುವ ಎಲ್ಲ ಆಯುಷ್ಮಾನ್‌ ಆರೋಗ್ಯ ಕೇಂದ್ರವನ್ನು ಮುಚ್ಚಲು ಆದೇಶಿಸಿದೆ ಎಂದು ಹೇಳಲಾಗುತ್ತಿದೆ.

ತಾಲೂಕಿಗೊಂದು ಇರುವ ಸರ್ಕಾರಿ ಆಸ್ಪತ್ರೆ ಅಲ್ಲದೇ ಹೋಬಳಿ ಮಟ್ಟದಲ್ಲೂ ಉತ್ತಮ ಸರ್ಕಾರಿ ಆಸ್ಪತ್ರೆಗಳಿವೆ. ಆದರೆ ವೈದ್ಯರ ತೀವ್ರ ಕೊರತೆ ಇದೆ. ಇದ್ದ ವೈದ್ಯರೇ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿರುವುದು ಸಾಮಾನ್ಯವಾಗಿದೆ. ಯಲ್ಲಾಪುರ ಪಟ್ಟಣದಲ್ಲಿ ೫ ಇಂತಹ ಆಯುಷ್ಮಾನ್ ಆರೋಗ್ಯ ಕೇಂದ್ರಗಳಿವೆ.

ಸರ್ಕಾರದ ತೀರ್ಮಾನಕ್ಕೆ ಕಾರಣ ಏನು?

ಸರ್ಕಾರಕ್ಕೆ ಕಟ್ಟಡ ಬಾಡಿಗೆ, ವೈದ್ಯರೂ ಸೇರಿ ಸಿಬ್ಬಂದಿಗಳ ವೆಚ್ಚ ಅನಗತ್ಯ ಹೊರೆಯಾಗುತ್ತಿದೆ. ಇದನ್ನು ಗಮನಿಸಿಯೇ ಸರ್ಕಾರ ಈ ಕ್ರಮ ಕೈಗೊಂಡಿದೆ ಎನ್ನಲಾಗುತ್ತಿದೆ. ಲಭ್ಯವಾದ ಮಾಹಿತಿಯಂತೆ ಜಿಲ್ಲೆಯ ಪಟ್ಟಣಗಳಲ್ಲಿ 50-60 ಇಂತಹ ಆಯುಷ್ಮಾನ್ ಆರೋಗ್ಯ ಕೇಂದ್ರಗಳಿವೆ. ಅವುಗಳನ್ನು ಮುಚ್ಚಲು ಸರ್ಕಾರ ತೀರ್ಮಾನಿಸಿರುವುದು ತಿಳಿದುಬಂದಿದೆ.

ಕೆಲ ರಾಜಕೀಯ ಹಿತಾಸಕ್ತರು ವಿರೋಧಕ್ಕಾಗಿ ಇಂತಹ ಆಯುಷ್ಮಾನ್ ಕೇಂದ್ರ ಮುಚ್ಚುವುದಕ್ಕೆ ವಿರೋಧಿಸುತ್ತಿದ್ದಾರೆ. ಸ್ಥಳೀಯ ಆಸ್ಪತ್ರೆಯ ಅಕ್ಕಪಕ್ಕದವರನ್ನು ಕೇಳಿದರೆ "ಈ ಆಸ್ಪತ್ರೆಗೆ ನಾವ್ಯಾರೂ ಹೋಗುವುದಿಲ್ಲ. ಜನರೂ ಬರುವುದಿಲ್ಲ. ಡಾಕ್ಟರ್ ಮಾತ್ರ ಬರುತ್ತಾರೆ, ಹೋಗುತ್ತಾರೆ ಎನ್ನುತ್ತಾರೆ.

ಆರೋಗ್ಯ ಕೇಂದ್ರ ಮುಚ್ಚದಂತೆ ಸ್ಥಳೀಯರ ಮನವಿ

ನಮಗೆ ರವೀಂದ್ರ ನಗರದ ಆಯುಷ್ಮಾನ್ ಆರೋಗ್ಯ ಕೇಂದ್ರ ಮುಚ್ಚಬಾರದೆಂದು ಸ್ಥಳೀಯರು ಮನವಿ ಸಲ್ಲಿಸಿದ್ದಾರೆ. ಇದನ್ನು ನಾವು ಸರ್ಕಾರಕ್ಕೆ ಕಳಿಸಬಹುದೇ ವಿನಃ ಯಾವುದೇ ಕ್ರಮ ಕೈಗೊಳ್ಳುವುದು ನಮ್ಮ ವ್ಯಾಪ್ತಿಯಲ್ಲಿ ಇಲ್ಲ. ಸರ್ಕಾರದ ನಿರ್ದೇಶನದಂತೆ ನಾವು ಕಾರ್ಯ ನಿರ್ವಹಿಸಬೇಕಾಗುತ್ತದೆ ಎಂದು ತಾಲೂಕು ವೈದ್ಯಾಧಿಕಾರಿ ಡಾ. ನರೇಂದ್ರ ಪವಾರ ತಿಳಿಸಿದ್ದಾರೆ.

ಇದನ್ನೂ ಓದಿ: ಮಂಗಳೂರು ರೈಲ್ವೆಯಲ್ಲಿ ದೊಡ್ಡ ಬದಲಾವಣೆ: ಆದರೆ ಒಂದು ವಿಚಾರ ಜನರ ಆತಂಕಕ್ಕೆ ಕಾರಣವಾಯ್ತು!

ಅರ್ಚಕರ ಅಣ್ಣ-ತಮ್ಮಂದಿರ ವೈಷಮ್ಯಕ್ಕೆ ಗಣಪನಿಗೆ ಎದುರಾಯ್ತು ಪೂಜಾ ವಿಘ್ನ: ನವರಾತ್ರಿ ಉತ್ಸವದಲ್ಲೇ ಇಡಗುಂಜಿಯಲ್ಲಿ ಅರ್ಚಕರಿಂದ ಧರಣಿ, ಬಹಿಷ್ಕಾರ!

Santosh Naik — Mon, 12 Oct 2026 16:51:08 +0530

ಕಾರವಾರ/ಹೊನ್ನಾವರ (ಅ.12): ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಜಗತ್ಪ್ರಸಿದ್ಧ ಹಾಗೂ ಪೌರಾಣಿಕ ಹಿನ್ನೆಲೆಯ 'ಇಡಗುಂಜಿ ಶ್ರೀ ಮಹಾಗಣಪತಿ' ದೇವಸ್ಥಾನದಲ್ಲಿ (Idagunji Mahaganapati Temple) ಅರ್ಚಕರ ಕುಟುಂಬದವರ ಆಂತರಿಕ ಆಸ್ತಿ ಮತ್ತು ಆದಾಯದ ವೈಷಮ್ಯದಿಂದಾಗಿ ಪವಿತ್ರ ನವರಾತ್ರಿ ಉತ್ಸವದ ವೇಳೆಯಲ್ಲೇ ದೇವರಿಗೆ ಪೂಜಾ ವಿಘ್ನ ಎದುರಾಗಿದೆ. ಅರ್ಚಕರ ನಡುವಿನ ಕಿತ್ತಾಟ ಹಾಗೂ ಪೂಜಾ ಬಹಿಷ್ಕಾರದಿಂದಾಗಿ, ನವರಾತ್ರಿಯ ಶುಭ ಸಂದರ್ಭದಲ್ಲಿ ಮಹಾಗಣಪತಿ ದೇವರ ಪೂಜೆ ಮಾಡಿಸಲು ಸಾಲಿನಲ್ಲಿ ನಿಂತಿದ್ದ ಸಾವಿರಾರು ಭಕ್ತಾದಿಗಳು ಅರ್ಚಕರಿಲ್ಲದೇ ಕೇವಲ ಗಣಪನ ದರ್ಶನ ಪಡೆದು ನಿರಾಶೆಯಿಂದ ವಾಪಸಾಗುವಂತಾಗಿದೆ.

ಕಳೆದ ನೂರಾರು ವರ್ಷಗಳಿಂದ ಆನುವಂಶಿಕವಾಗಿ ಇಡಗುಂಜಿ ಗಣಪತಿಗೆ ಪೂಜೆ ನೆರವೇರಿಸಿಕೊಂಡು ಬಂದಿರುವ ಅರ್ಚಕರ ಕುಟುಂಬದಲ್ಲೇ ಈಗ ಬಿರುಕು ಮೂಡಿದ್ದು, ಕಮಿಷನ್ ಹಣ ಹಾಗೂ ಪ್ರತಿಷ್ಠೆಯ ಜಗಳವು ದೇವಸ್ಥಾನದ ಇತಿಹಾಸದಲ್ಲೇ ಮೊದಲ ಬಾರಿಗೆ ಪೂಜೆ ಸ್ಥಗಿತಗೊಳ್ಳುವ ಹಂತಕ್ಕೆ ತಲುಪಿದೆ.

ಸುಪ್ರೀಂ ಕೋರ್ಟ್ ಅಂಗಳದಲ್ಲಿದೆ ದೇವಸ್ಥಾನದ ವ್ಯಾಜ್ಯ

ಕಳೆದ 10 ವರ್ಷಗಳ ಹಿಂದೆ ದೇವಸ್ಥಾನದ ಆನುವಂಶಿಕ ಅರ್ಚಕರು ಮತ್ತು ದೇವಾಲಯದ ಟ್ರಸ್ಟಿಗಳ (Trustees) ನಡುವೆ ಆರಂಭವಾದ ಹಕ್ಕು ಮತ್ತು ಆದಾಯದ ವಿವಾದವು ಪ್ರಸ್ತುತ ದೇಶದ ಸರ್ವೋಚ್ಚ ನ್ಯಾಯಾಲಯದ ಅಂಗಳದಲ್ಲಿದೆ. ಪ್ರಕರಣದ ವಿಚಾರಣೆ ಕಾಯ್ದಿರಿಸಿರುವ ಸುಪ್ರೀಂ ಕೋರ್ಟ್, ಮಧ್ಯಂತರ ವ್ಯವಸ್ಥೆಯಾಗಿ ಉತ್ತರ ಕನ್ನಡ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರನ್ನು 'ಆಡಳಿತಾಧಿಕಾರಿ' (Administrator) ಹಾಗೂ 'ಸುಪ್ರೀಂ ಕೋರ್ಟ್ ರಿಸೀವರ್' ಆಗಿ ನೇಮಕ ಮಾಡಿತ್ತು.

ದೇವಾಲಯದ ನಿತ್ಯ ಪೂಜೆಯ ಜವಾಬ್ದಾರಿಯನ್ನು ಆನುವಂಶಿಕ ಅರ್ಚಕರಾದ ದಿವಂಗತ ಶಿವರಾಮ್ ಭಟ್, ಲಕ್ಷ್ಮೀನಾರಾಯಣ ಭಟ್ ಹಾಗೂ ಪರಮೇಶ್ವರ ಭಟ್ ಅವರ ಕುಟುಂಬಗಳಿಗೆ ವಹಿಸಲಾಗಿತ್ತು. ದೇವಸ್ಥಾನಕ್ಕೆ ಬರುವ ಪೂಜಾ ಕಮಿಷನ್, ವಿಶೇಷ ಸೇವೆಗಳ ಕಮಿಷನ್ ಹಾಗೂ ಭಕ್ತರು ನೀಡುವ 'ತಟ್ಟೆಕಾಸಿನ' ಹಣವನ್ನು ರಿಸೀವರ್ ಆಗಿರುವ ಜಿಲ್ಲಾ ನ್ಯಾಯಾಧೀಶರಿಂದ ಅರ್ಚಕರಿಗೆ ನೀಡಲಾಗುತ್ತಿತ್ತು. ಈ ಮೂರು ಕುಟುಂಬಗಳು ತಿಂಗಳ ಪಾಳಿಯಂತೆ ಗಣಪನಿಗೆ ಪೂಜೆ ನೆರವೇರಿಸಿಕೊಂಡು ಬರುತ್ತಿದ್ದವು.

ಅಣ್ಣ-ತಮ್ಮಂದಿರ ವೈಷಮ್ಯದಿಂದ ಪೂಜೆ ಬಹಿಷ್ಕಾರ!

ಆದರೆ, ದಿವಂಗತ ಶಿವರಾಮ್ ಭಟ್ ಅವರ ಎಂಟು ಜನ ಮಕ್ಕಳ ಪೈಕಿ ಮಂಜುನಾಥ ಭಟ್ ಹಾಗೂ ನರಸಿಂಹ ಭಟ್ ಎಂಬಿಬ್ಬರು, "ದೇವಸ್ಥಾನದಿಂದ ಬರುವ ಆದಾಯದ ಪಾಲು ಎಂಟೂ ಜನ ಸಹೋದರರಿಗೆ ಹಂಚಿಕೆಯಾಗಬಾರದು. ಬದಲಿಗೆ ನಮ್ಮಿಬ್ಬರಿಗೆ ಮಾತ್ರವೇ ಪೂರ್ಣ ಹಣ ಸಂದಾಯವಾಗಬೇಕು" ಎಂದು ಪಟ್ಟುಹಿಡಿದು ಹೊನ್ನಾವರ ಸಿವಿಲ್ ನ್ಯಾಯಾಲಯದಲ್ಲಿ ಪ್ರತ್ಯೇಕ ದಾವೆ ಹೂಡಿದ್ದರು.

ಈ ನ್ಯಾಯಾಂಗ ವ್ಯಾಜ್ಯ ಇತ್ಯರ್ಥವಾಗುವವರೆಗೆ ಶಿವರಾಮ್ ಭಟ್ ಅವರ ಎಂಟು ಜನ ಮಕ್ಕಳಿಗೂ ಪೂಜಾ ಕಮಿಷನ್ ಹಣ ನೀಡದಂತೆ ತಡೆಹಿಡಿಯಲಾಗಿದೆ. ಇದರಿಂದ ಅಸಮಾಧಾನಗೊಂಡ ಶಿವರಾಮ್ ಭಟ್ ಅವರ ಮಕ್ಕಳು ಗಣಪತಿಯ ಪೂಜೆಯನ್ನೇ ಬಹಿಷ್ಕರಿಸಿದ್ದಾರೆ. "ನ್ಯಾಯಾಲಯದಲ್ಲಿ ಕೇಸು ಹಾಕಿರುವ ಮಂಜುನಾಥ ಭಟ್ ಮತ್ತು ನರಸಿಂಹ ಭಟ್ ತಾವು ಪೂಜೆಗೆ ಬರುವುದಿಲ್ಲ. ಇತ್ತ ಉಳಿದ ಆರು ಜನ ಸಹೋದರರಿಗೂ ಸುಸೂತ್ರವಾಗಿ ಪೂಜೆ ನೆರವೇರಿಸಲು ಬಿಡುತ್ತಿಲ್ಲ" ಎಂದು ಕುಟುಂಬದ ಇತರ ಸದಸ್ಯರು ಗಂಭೀರ ಆರೋಪ ಮಾಡಿದ್ದಾರೆ.

ಭಕ್ತರ ತೀವ್ರ ಆಕ್ರೋಶ

ಅರ್ಚಕರ ಈ ಸ್ವಾರ್ಥದ ಕಿತ್ತಾಟದಿಂದಾಗಿ ದೇಶ, ವಿದೇಶ ಹಾಗೂ ನೆರೆರಾಜ್ಯಗಳಿಂದ ಸಾವಿರಾರು ಕಿಲೋಮೀಟರ್ ಪ್ರಯಾಣಿಸಿ ಧಾರ್ಮಿಕ ಕ್ಷೇತ್ರಕ್ಕೆ ಆಗಮಿಸಿದ ಭಕ್ತರು ಪರದಾಡುವಂತಾಗಿದೆ. ದೇವಸ್ಥಾನಕ್ಕೆ ತಂದಿದ್ದ ಹಣ್ಣು-ಕಾಯಿಗಳನ್ನು ದೇವರಿಗೆ ಅರ್ಪಿಸಲಾಗದೆ, ಕಾಯಿ ಒಡೆದು ಕೊಡುವವರಿಲ್ಲದೆ ಅರ್ಚಕರಿಲ್ಲದ ಗೂಡಿನಂತಾಗಿರುವ ಗರ್ಭಗುಡಿಯ ಹೊರಗಿನಿಂದಲೇ ಬರಿಗಣ್ಣಿನಲ್ಲಿ ದೇವರನ್ನು ನೋಡಿ ಕೈಮುಗಿದು ಹಿಂತಿರುಗುತ್ತಿದ್ದಾರೆ.

ಪ್ರತಿಕ್ರಿಯಿಸಿರುವ ಸ್ಥಳೀಯ ಭಕ್ತರಾದ ದೀಪಕ್ ಶೆಣೈ ಹಾಗೂ ಸಂತೋಷ್, "ಇಡಗುಂಜಿಯ ಅತಿ ಅಪರೂಪದ ದ್ವಿಭುಜ ಗಣಪತಿಗೆ ಸಾವಿರಾರು ವರ್ಷಗಳ ಪೌರಾಣಿಕ ಇತಿಹಾಸವಿದೆ. ಇದು ಅರ್ಚಕರ ಸ್ವಂತ ಮನೆಯ ದೇವಾಲಯವಲ್ಲ, ಇಡೀ ದೇಶದ ಸಾರ್ವಜನಿಕರ ಪವಿತ್ರ ಕ್ಷೇತ್ರ. ಕೇವಲ ಹಣ, ತಟ್ಟೆಕಾಸು ಮತ್ತು ಕಮಿಷನ್‌ಗಾಗಿ ದೇವರನ್ನೇ ಪೂಜೆಯಿಲ್ಲದೆ ಇಡುವ ಇಂತಹ ಅರ್ಚಕರು ನಮಗೆ ಬೇಕಿಲ್ಲ. ತಕ್ಷಣವೇ ಆಡಳಿತಾಧಿಕಾರಿಯಾಗಿರುವ ಜಿಲ್ಲಾ ನ್ಯಾಯಾಧೀಶರು ಪರ್ಯಾಯ ಅರ್ಚಕರನ್ನು ನೇಮಿಸಿ ಕ್ಷೇತ್ರಕ್ಕಾಗುತ್ತಿರುವ ಅಪಮಾನವನ್ನು ತಡೆಯಬೇಕು" ಎಂದು ಕಟುವಾಗಿ ಆಗ್ರಹಿಸಿದ್ದಾರೆ. ಪುಣ್ಯಕ್ಷೇತ್ರದಲ್ಲಿ ಅರ್ಚಕರ ಕೌಟುಂಬಿಕ ಕಲಹ ಬೀದಿಗೆ ಬಿದ್ದು ಪೂಜಾ ಬಹಿಷ್ಕಾರದವರೆಗೆ ತಲುಪಿರುವುದು ನಿಜಕ್ಕೂ ಧಾರ್ಮಿಕ ಲೋಕಕ್ಕಾದ ಭಾರಿ ಹಿನ್ನಡೆಯಾಗಿದೆ.

ಕಾರವಾರ ಬೀಚ್‌ನಲ್ಲಿ ಸಮುದ್ರದಿಂದ ನೆಲದ ಮೇಲೆ ಬಂದ ಹಡಗು! ನೀರು-ನೆಲದಲ್ಲೂ ಚಲಿಸುವ ನೌಕೆ ಕಂಡು ದಂಗಾದ ಜನ!

Sathish Kumar KH — Thu, 08 Oct 2026 14:17:45 +0530

ಕಾರವಾರದ ರವೀಂದ್ರನಾಥ ಟ್ಯಾಗೋರ್ ಕಡಲತೀರದಲ್ಲಿ ಭಾರತೀಯ ಕರಾವಳಿ ಕಾವಲು ಪಡೆಯ ಎರಡು ಅತ್ಯಾಧುನಿಕ ಹೋವರ್‌ಕ್ರಾಫ್ಟ್ ನೌಕೆಗಳು ಲಂಗರು ಹಾಕಿವೆ. ನೆಲ ಮತ್ತು ಜಲ ಎರಡರಲ್ಲೂ ಚಲಿಸಬಲ್ಲ ಈ ಉಭಯಚರ ನೌಕೆಗಳನ್ನು ನೋಡಲು ಪ್ರವಾಸಿಗರು ಮುಗಿಬಿದ್ದಿದ್ದಾರೆ.

ಉತ್ತರ ಕನ್ನಡ ಜಿಲ್ಲೆಯ ಪ್ರಸಿದ್ಧ ಪ್ರವಾಸಿ ತಾಣವಾದ ಕಾರವಾರದ ರವೀಂದ್ರನಾಥ ಟ್ಯಾಗೋರ್ ಕಡಲತೀರದಲ್ಲಿ ಬುಧವಾರ ಅತ್ಯಂತ ಅಪರೂಪದ ಹಾಗೂ ಕಣ್ಮನ ಸೆಳೆಯುವ ದೃಶ್ಯವೊಂದು ಕಂಡುಬಂದಿದೆ. ಭಾರತೀಯ ಕರಾವಳಿ ಕಾವಲು ಪಡೆಯ (Indian Coast Guard) ಎರಡು ಅತ್ಯಾಧುನಿಕ 'ಹೋವರ್‌ಕ್ರಾಫ್ಟ್' (Hovercraft) ನೌಕೆಗಳು ಕಡಲತೀರಕ್ಕೆ ಆಗಮಿಸಿ ಲಂಗರು ಹಾಕಿವೆ.

ಅಲೆಗಳ ಮೇಲೆ ತೇಲುತ್ತಾ, ಕ್ಷಣಾರ್ಧದಲ್ಲೇ ತೀರದ ಒಣ ಮರಳಿನ ಮೇಲೂ ಲೀಲಾಜಾಲವಾಗಿ ನುಗ್ಗಿ ಬಂದ ಈ ವಿಶೇಷ ನೌಕೆಗಳನ್ನು ನೋಡಲು ನೂರಾರು ಸಂಖ್ಯೆಯಲ್ಲಿ ಸ್ಥಳೀಯರು ಹಾಗೂ ಪ್ರವಾಸಿಗರು ಜಮಾಯಿಸಿದ್ದರು.

ಗೋವಾದಿಂದ ಕಾರವಾರಕ್ಕೆ ಪ್ರಯಾಣ:

ಕರಾವಳಿ ಭದ್ರತಾ ಗಸ್ತು ಕಾರ್ಯಕ್ಕಾಗಿ ಗೋವಾದಿಂದ ಹೊರಟಿದ್ದ ಈ ಎರಡು ಹೋವರ್‌ಕ್ರಾಫ್ಟ್‌ ನೌಕೆಗಳು, ಸಿಬ್ಬಂದಿಯ ವಿಶ್ರಾಂತಿಗಾಗಿ ಕಾರವಾರದ ಟ್ಯಾಗೋರ್ ಬೀಚ್‌ನಲ್ಲಿ ತಾತ್ಕಾಲಿಕವಾಗಿ ಲಂಗರು ಹಾಕಿವೆ ಎಂದು ತಿಳಿದುಬಂದಿದೆ. ಬೀಚ್‌ನ ಮರಳಿನ ದಂಡೆಯ ಮೇಲೆಯೇ ಹಡಗುಗಳು ಲ್ಯಾಂಡ್ ಆಗಿರುವುದನ್ನು ಕಂಡ ಕಡಲ ಪ್ರಿಯರು ಕುತೂಹಲದಿಂದ ವೀಕ್ಷಿಸಿ ಮೊಬೈಲ್‌ಗಳಲ್ಲಿ ಫೋಟೋ, ವಿಡಿಯೋ ಸೆರೆಹಿಡಿದು ಸಂಭ್ರಮಿಸಿದರು.

ಏನಿದರ ವಿಶೇಷತೆ?

ಸಾಮಾನ್ಯ ಹಡಗುಗಳಿಗಿಂತ ಹೋವರ್‌ಕ್ರಾಫ್ಟ್‌ಗಳು ಸಂಪೂರ್ಣ ಭಿನ್ನ ಹಾಗೂ ಶಕ್ತಿಶಾಲಿ:

ನೆಲ-ಜಲವೆನ್ನದೆ ಸಂಚಾರ: ಇದು ಕೇವಲ ಸಮುದ್ರದ ನೀರಿನ ಮೇಲೆ ಮಾತ್ರವಲ್ಲದೆ ಒಣ ಭೂಮಿ, ಮರಳು ದಂಡೆ ಮತ್ತು ಕೆಸರಿನ ಮೇಲೂ ಸಮಾನ ವೇಗದಲ್ಲಿ ಚಲಿಸಬಲ್ಲ ಉಭಯಚರ (Amphibious) ನೌಕೆಯಾಗಿದೆ.

ಆಳವಿಲ್ಲದ ಜಾಗದಲ್ಲೂ ಗಸ್ತು: ಸಾಂಪ್ರದಾಯಿಕ ದೊಡ್ಡ ಹಡಗುಗಳಿಗೆ ತೀರದ ಆಳವಿಲ್ಲದ ಪ್ರದೇಶಗಳಲ್ಲಿ ಚಲಿಸಲು ಸಾಧ್ಯವಾಗುವುದಿಲ್ಲ. ಆದರೆ ಹೋವರ್‌ಕ್ರಾಫ್ಟ್ ಯಾವುದೇ ಅಡೆತಡೆಗಳಿಲ್ಲದೆ ಗಾಳಿಯ ಒತ್ತಡದ (Air cushion) ಮೂಲಕ ತೇಲುತ್ತಾ ಅತ್ಯಂತ ಆಳವಿಲ್ಲದ ಜಾಗಗಳಲ್ಲೂ ಮಿಂಚಿನ ವೇಗದಲ್ಲಿ ನುಗ್ಗಬಲ್ಲದು.

ಕರಾವಳಿ ಭದ್ರತೆಯ ಪ್ರಮುಖ ಅಸ್ತ್ರ:

ದೇಶದ ಸಮುದ್ರ ತೀರಗಳಲ್ಲಿ ಕಳ್ಳಸಾಗಣೆ, ನುಸುಳುವಿಕೆ ತಡೆಯುವುದು ಮತ್ತು ನಿರಂತರ ಕಣ್ಗಾವಲು ಇಡಲು ಈ ನೌಕೆಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಅಷ್ಟೇ ಅಲ್ಲದೆ, ಪ್ರಕೃತಿ ವಿಕೋಪದ ಸಂದರ್ಭದಲ್ಲಿ ಸಮುದ್ರದಲ್ಲಿ ಸಂಕಷ್ಟಕ್ಕೆ ಸಿಲುಕುವ ಮೀನುಗಾರರನ್ನು ರಕ್ಷಿಸಲು (Search and Rescue Operation) ಹಾಗೂ ರಕ್ಷಣಾ ಸಾಮಗ್ರಿಗಳನ್ನು ತೀರಕ್ಕೆ ತ್ವರಿತವಾಗಿ ತಲುಪಿಸಲು ಈ ಹೋವರ್‌ಕ್ರಾಫ್ಟ್‌ಗಳು ಕರಾವಳಿ ಕಾವಲು ಪಡೆಗೆ ಬ್ರಹ್ಮಾಸ್ತ್ರದಂತಿವೆ.

ಕಾರವಾರ ತೀರದಲ್ಲಿ ಲಂಗರು ಹಾಕಿರುವ ಈ ರಕ್ಷಣಾ ನೌಕೆಗಳು ಸಾರ್ವಜನಿಕರಲ್ಲಿ ದೇಶದ ಕರಾವಳಿ ರಕ್ಷಣಾ ವ್ಯವಸ್ಥೆಯ ಬಗೆಗೆ ಹೆಮ್ಮೆ ಮೂಡಿಸಿವೆ. ಈ ಹಡಗುಗಳು ಸಮುದ್ರ ಹಾಗೂ ಭೂಮಿಯ ಮೇಲೆ ಸಂಚಾರ ಮಾಡುವ ಮೂಲಕ ಎಂತಹದೇ ಸ್ಥಳದಲ್ಲಿ ರಕ್ಷಣಾ ಕಾರ್ಯಾಚರಣೆಯನ್ನು ಸುಲಭವಾಗಿ ಮಾಡಲಿವೆ.

ಬೇಡ್ತಿಯ ದಿಕ್ಕು ಬದಲಿಸಿದರೆ ಕಾದಿದೆ ಅಪಾಯ, ಪರಿಸರ ನಾಶ ಮಾಡಿ ಸಾಧಿಸುವುದೇನು?

Kannadaprabha News — Sat, 26 Sep 2026 10:36:48 +0530

-ಮಹಾಬಲ ಹೊನ್ನೆಮಡಿಕೆ, ಬೆಂಗಳೂರು.

ಉತ್ತರ ಕನ್ನಡ ಜಿಲ್ಲೆಯ ಭೌಗೋಳಿಕ, ನೈಸರ್ಗಿಕ ಸಂಪನ್ಮೂಲವನ್ನು ಬರಿದು ಮಾಡುವ ಮತ್ತೊಂದು ಯೋಜನೆ ಈಗ ಮುನ್ನೆಲೆಗೆ ಬರುತ್ತಿದೆ. ಜಿಲ್ಲೆಯನ್ನು ಬರಡು ಮಾಡುವ ಅವೈಜ್ಞಾನಿಕ ಯೋಜನೆಯಿದು. ಅದುವೆ, ವರದಾ-ಬೇಡ್ತಿ ಹಾಗೂ ವರದಾ-ಧರ್ಮ-ಬೇಡ್ತಿ ನದಿ ಜೋಡಣೆ ಯೋಜನೆ.

ನಿತ್ಯ ಹರಿದ್ವರ್ಣದ ಕಾಡುಗಳ ಮಧ್ಯೆ ಪಶ್ಚಿಮಾಭಿಮುಖವಾಗಿ ಹರಿದು ಅರೇಬಿಯನ್ ಸಮುದ್ರ ಸೇರುವ ಬೇಡ್ತಿ ನದಿಯನ್ನು ತುಂಗಭದ್ರಾ ನದಿಯ ಉಪನದಿಯಾದ ವರದಾ ನದಿಯೊಂದಿಗೆ ಸಂಪರ್ಕಿಸುವ ಯೋಜನೆಯಿದು. ಅಲ್ಲಿಂದ, ಕೃಷ್ಣಾ ನದಿ ಸೇರಿ, ಮುಂದಕ್ಕೆ ಬಂಗಾಳಕೊಲ್ಲಿಗೆ ಈ ನೀರು ಸೇರುತ್ತದೆ. ಅಂದರೆ, ಉತ್ತರ ಕನ್ನಡ ಜಿಲ್ಲೆಯ ಶಿರಸಿ-ಯಲ್ಲಾಪುರ ಪ್ರದೇಶದಿಂದ ಶುಷ್ಕ ರಾಯಚೂರು, ಹಾವೇರಿ, ಗದಗ, ಶಿವಮೊಗ್ಗ, ಕೊಪ್ಪಳ ಸೇರಿ ಉತ್ತರ ಕರ್ನಾಟಕದ 6 ಜಿಲ್ಲೆಗಳ ಜನರಿಗೆ ಕುಡಿಯುವ ನೀರು ಮತ್ತು ಅಂದಾಜು 1 ಲಕ್ಷ 6 ಸಾವಿರ ಹೆಕ್ಟೇರ್‌ ಕೃಷಿ ಭೂಮಿಗೆ ನೀರಾವರಿ ಸೌಲಭ್ಯ ಕಲ್ಪಿಸುವ ಉದ್ದೇಶಿತ ಯೋಜನೆಯಿದು.

ವರದಾ-ಬೇಡ್ತಿ ನದಿ ಜೋಡಣೆಯಿಂದ ಸುಮಾರು 10 ಟಿಎಂಸಿ ಹಾಗೂ ವರದಾ-ಧರ್ಮ-ಬೇಡ್ತಿ ನದಿ ಜೋಡಣೆಯಿಂದ ಸುಮಾರು 8 ಟಿಎಂಸಿಯಷ್ಟು ನೀರು ಸಿಗಲಿದೆ ಎಂಬುದು ಅಂದಾಜು. ಇನ್ನು, ತುಂಗಭದ್ರಾ ಜಲಾಶಯದಲ್ಲಿ ಹೂಳು ತುಂಬಿದ್ದು, ಅಲ್ಲಿ ಗರಿಷ್ಠ ಸಾಮರ್ಥ್ಯದಷ್ಟು ಸಂಗ್ರಹ ಸಾಧ್ಯವಿಲ್ಲ ಎಂಬುದನ್ನು ರಾಷ್ಟ್ರೀಯ ಜಲ ಅಭಿವೃದ್ಧಿ ಸಂಸ್ಥೆ ತನ್ನ ಅಧ್ಯಯನ ವರದಿಯಲ್ಲಿ ತಿಳಿಸಿದೆ. ಹೀಗಾಗಿ, ಗದಗ ಜಿಲ್ಲೆ ಶಿರಹಟ್ಟಿ ತಾಲೂಕಿನ ಹೀರೆವದತ್ತಿಯಲ್ಲಿ ಬೃಹತ್‌ ಆಣೆಕಟ್ಟು ಕಟ್ಟಿ, ಅಲ್ಲಿ ಬೇಡ್ತಿ ನದಿಯ ನೀರನ್ನು ಸಂಗ್ರಹಿಸಲಾಗುತ್ತದೆ. ಜೊತೆಗೆ, ಶಿರಸಿಯ ಮೆಣಸಗೋಡದಲ್ಲಿ ಪಟ್ಟಣಹಳ್ಳ ನದಿಗೆ ಎರಡನೇ ಆಣೆಕಟ್ಟು ನಿರ್ಮಿಸಲಾಗುತ್ತದೆ. ಬಳಿಕ, ಸುರಂಗ ಮಾರ್ಗದ ಮೂಲಕ ಈ ಎರಡೂ ಆಣೆಕಟ್ಟುಗಳಿಂದ ವರದಾ ನದಿಗೆ ನೀರನ್ನು ಕೊಂಡೊಯ್ಯಲು ಉದ್ದೇಶಿಸಲಾಗಿದೆ. ನೀರು ಇಲ್ಲಿಂದ ಕೆಂಗ್ರೆ ತಲುಪಿ, ನಂತರ, 7 ಕಿ.ಮೀ. ದೂರ ಸುರಂಗದ ಮೂಲಕ ಹಕ್ಕಲುಮನೆಗೆ ಹೋಗಿ, ಅಲ್ಲಿ ವರದಾ ನದಿಯನ್ನು ಸೇರುತ್ತದೆ.

ದಟ್ಟ ಕಾನನದ ನಡುವೆ ಹರಿದು ಅರಬ್ಬಿ ಸಮುದ್ರ ಸೇರುವ ಬೇಡ್ತಿ ನದಿ ಹುಟ್ಟುವುದು ಧಾರವಾಡ ಜಿಲ್ಲೆಯಲ್ಲಿ, ಧಾರವಾಡದ ದಕ್ಷಿಣಕ್ಕೆ, ಸೋಮೇಶ್ವರ ದೇವಸ್ಥಾನದ ಬಳಿ ಶಾಲ್ಮಲಾ ಎಂಬಲ್ಲಿ. ಅಲ್ಲಿಂದ ಪಶ್ಚಿಮಾಭಿಮುಖವಾಗಿ ಹರಿದು, ಗೋಕರ್ಣದಿಂದ ಸುಮಾರು 4 ಕಿ.ಮೀ. ದೂರದಲ್ಲಿ ಗಂಗಾ ದೇವಸ್ಥಾನದ ಬಳಿ, ಅರೇಬಿಯನ್‌ ಸಮುದ್ರವನ್ನು ಸೇರುತ್ತದೆ. ಈ ನದಿಯ ಬಹುಪಾಲು ಹರಿವು ಇರುವುದು ಉತ್ತರ ಕನ್ನಡ ಜಿಲ್ಲೆಯಲ್ಲಿ.

152 ಕಿ.ಮೀ. ಉದ್ದ ಹರಿಯುವ ಈ ನದಿ, 4 ಸಾವಿರ ಕಿ.ಮೀ. ನಷ್ಟು ಜಲಾನಯನ ಪ್ರದೇಶವನ್ನು ಹೊಂದಿದೆ. ಹರಿವಿನ ನಡುವೆ ಯಲ್ಲಾಪುರ ಬಳಿಯ ಮಾಗೋಡು ಎಂಬಲ್ಲಿ, 600 ಅಡಿ ಎತ್ತರದಿಂದ ಧುಮ್ಮಿಕ್ಕುತ್ತಾ, ಸುಂದರ ಜಲಪಾತವನ್ನು ಕೂಡ ಸೃಷ್ಟಿ ಮಾಡುತ್ತದೆ. ಜಲಪಾತದ ನಂತರ, ಉಪನದಿಯಾದ ಸೋಂದಾ ಕೂಡ ಈ ನದಿಯನ್ನು ಸೇರಿಕೊಳ್ಳುತ್ತದೆ.

ಅವೈಜ್ಞಾನಿಕ ಯೋಜನೆಯಿದು

ಈ ಯೋಜನೆಯನ್ನು ಜಿಲ್ಲೆಯ ಜನ ಮೊದಲಿನಿಂದಲೂ ವಿರೋಧಿಸುತ್ತಲೇ ಬಂದಿದ್ದಾರೆ. ಇದೊಂದು ಶುದ್ಧ ಅವೈಜ್ಞಾನಿಕ ಯೋಜನೆ ಎಂಬುದೇ ಪರಸರವಾದಿಗಳ ವಾದ.
ಈ ಯೋಜನೆ ಜಾರಿಯಾಗಲು ಪಶ್ಚಿಮಕ್ಕೆ ಹರಿಯುವ ನದಿಯನ್ನು ಪೂರ್ವಕ್ಕೆ ಹರಿಯುವಂತೆ ಮರು ನಿರ್ದೇಶಿಸಬೇಕು. ಈ ಎರಡೂ ನದಿಗಳು ಮಳೆಯಾಶ್ರಿತ ನದಿಗಳಾಗಿದ್ದು, ಬೇಸಿಗೆಯ ಆರಂಭದಲ್ಲೇ ಒಣಗಲು ಪ್ರಾರಂಭಿಸುತ್ತವೆ. ನದಿಗಳು ವರ್ಷ ಪೂರ್ತಿ ಹರಿಯುವುದಿಲ್ಲ. ಅಲ್ಲದೆ, ವಾರ್ಷಿಕ ಮಳೆಯ ಶೇ.70-80ರಷ್ಟು ಮಳೆ, ಕೇವಲ ಮೂರು ತಿಂಗಳ (ಜುಲೈ- ಸೆಪ್ಟೆಂಬರ್) ಮಳೆಗಾಲದಲ್ಲೇ ಬೀಳುತ್ತದೆ. ಉಳಿದ ಒಂಬತ್ತು ತಿಂಗಳ ಅವಧಿಯಲ್ಲಿ ನದಿಯಲ್ಲಿ ನೀರಿನ ಅಪಾರ ಕೊರತೆ ಕಂಡು ಬರುತ್ತಿದೆ. ಇಂತಹ ಪರಿಸ್ಥಿತಿಯಲ್ಲಿ ‘ಹೆಚ್ಚುವರಿ ನೀರು ಲಭ್ಯವಿದೆ’ ಎಂಬ ಊಹೆ ವಾಸ್ತವಿಕತೆಗೆ ದೂರವಾದದ್ದು.
ಯೋಜನೆಯ ಸುರಂಗ ಹಾಗೂ ಬ್ಯಾರೇಜ್ ನಿರ್ಮಾಣಕ್ಕಾಗಿ ಪಶ್ಚಿಮ ಘಟ್ಟಗಳ ದಟ್ಟವಾದ ಅರಣ್ಯವನ್ನು ಕಡಿಯಬೇಕಾಗುತ್ತದೆ, ಗುಡ್ಡ ಕತ್ತರಿಸಬೇಕಾಗುತ್ತದೆ. ಕಾಡಿನ ನಾಶದಿಂದಾಗಿ ಮಳೆ ನೀರು ಭೂಮಿಯಲ್ಲಿ ಇಂಗದೆ ನೇರವಾಗಿ ಹರಿದು ಹೋಗುವುದರಿಂದ ಅಂತರ್ಜಲ ಮರುಪೂರಣ ಪ್ರಕ್ರಿಯೆಗೆ ಧಕ್ಕೆಯಾಗುತ್ತದೆ. ಇದರಿಂದಾಗಿ, ಶಿರಸಿ-ಯಲ್ಲಾಪುರ ಭಾಗದಲ್ಲಿ ಬೇಸಿಗೆಯ ದಿನಗಳಲ್ಲಿ ತೀವ್ರ ಅಂತರ್ಜಲ ಕುಸಿತ ಉಂಟಾಗಬಹುದು.
ನದಿಯ ಸ್ವಾಭಾವಿಕ ಹರಿವು ಕಡಿತಗೊಂಡಾಗ, ಕರಾವಳಿ ಮತ್ತು ನದಿಮುಖಜ ಭಾಗಗಳಲ್ಲಿ ಸಮುದ್ರದ ಉಪ್ಪು ನೀರು ಭೂಮಿಯ ಒಳಗಿನ ಸಿಹಿನೀರಿನ ಜಲಾಗಾರಗಳಿಗೆ ನುಗ್ಗುತ್ತದೆ. ಇದು ನದಿಯ ಕೆಳಭಾಗದ ಮತ್ತು ಕರಾವಳಿ ತೀರದ ಬಾವಿಗಳ ಅಂತರ್ಜಲವನ್ನು ಉಪ್ಪಾಗಿಸಿ, ಕುಡಿಯುವ ನೀರಿಗೆ ತತ್ವಾರ ಉಂಟುಮಾಡುವ ಅಪಾಯವಿರುತ್ತದೆ.
ವ್ಯಾಪಕ ಅರಣ್ಯನಾಶದಿಂದ ಮಾನವ-ವನ್ಯಜೀವಿ ಸಂಘರ್ಷ ಹೆಚ್ಚಾಗಿ, ಕಾಡುಪ್ರಾಣಿಗಳು ಕೃಷಿ ಭೂಮಿ ಮತ್ತು ವಾಸಸ್ಥಾನಗಳಿಗೆ ಪ್ರವೇಶಿಸುವ ಘಟನೆಗಳು ಇನ್ನಷ್ಟು ಹೆಚ್ಚಾಗಬಹುದು.
ನೀರಿನ ಲಭ್ಯತೆಯನ್ನು ನಿರ್ಣಯಿಸದೆ, ಬೇಡ್ತಿ-ಅಘನಾಶಿನಿ ಮತ್ತು ವರದಾ ನದಿಗಳ ಪರಸ್ಪರ ಸಂಪರ್ಕದ ಕುರಿತು ರಾಷ್ಟ್ರೀಯ ಜಲ ಅಭಿವೃದ್ಧಿ ಸಂಸ್ಥೆಯ ಅಧ್ಯಯನ ವರದಿಯನ್ನು ಉಲ್ಲೇಖಿಸದೆ, ನೀರಾವರಿ ಇಲಾಖೆಯಿಂದ ಡಿಪಿಆರ್‌ ರಚಿಸಲಾಗಿದ್ದು, ಈ ಡಿಪಿಆರ್‌ ನಿಖರವಾಗಿಲ್ಲ.
ಅಂತಾರಾಷ್ಟ್ರೀಯ ಪ್ರಕೃತಿ ಸಂರಕ್ಷಣಾ ಒಕ್ಕೂಟ, ಬೇಡ್ತಿ ಕಣಿವೆಯನ್ನು ಸಕ್ರಿಯ ಜೀವವೈವಿಧ್ಯ ವಲಯವೆಂದು ಗುರುತಿಸಿದೆ. ಕಿರಿದಾದ ಕಮರಿಗಳು, ರಭಸದ ಹೊಳೆಗಳು, ಜಲಪಾತಗಳು ಈ ಕಣಿವೆ ಪ್ರದೇಶದಲ್ಲಿವೆ. ಮೇಲಾಗಿ, ಪಶ್ಚಿಮಘಟ್ಟಗಳ ನಿತ್ಯ ಹರಿದ್ವರ್ಣದಿಂದ ದಟ್ಟವಾದ, ಅರಣ್ಯದಿಂದ ಆವೃತವಾದ ಪರ್ವತಮಯ ಸುಂದರವಾದ ವಲಯವಿದು.
ಯೋಜನೆ ಜಾರಿಯಿಂದ ಜಿಲ್ಲೆಯ ಸುಮಾರು 1 ಸಾವಿರ ಹೆಕ್ಟೇರ್ ಪ್ರದೇಶ ಮುಳುಗಡೆಯಾಗಲಿದ್ದು, 787 ಹೆಕ್ಟೇರ್ ಅರಣ್ಯ ಭೂಮಿ, 130 ಹೆಕ್ಟೇರ್ ಕೃಷಿಯೋಗ್ಯ ಭೂಮಿ ಮತ್ತು 88 ಹೆಕ್ಟೇರ್ ಕೃಷಿಯೇತರ ಭೂಮಿ, 967 ಜನಸಂಖ್ಯೆ ಹೊಂದಿರುವ ಒಂದು ಹಳ್ಳಿ, 2 ಸಾವಿರದಷ್ಟು ವಿವಿಧ ಬಗೆಯ ಹೂ ಬಿಡುವ ಸಸ್ಯಗಳು, 420 ಜಾತಿಯ ಪಕ್ಷಿಗಳು ಮತ್ತು ಪ್ರಾಣಿಗಳ ಉಳಿವಿಗೆ ಇದು ಸಂಚಕಾರ ತರಲಿದೆ.
ಬೇಡ್ತಿ ಮತ್ತು ಅಘನಾಶಿನಿ ನದಿಗಳ ಕಣಿವೆ ಪ್ರದೇಶಗಳಲ್ಲಿ ವಾಸಿಸುವ ಲಕ್ಷಾಂತರ ರೈತರು, ಮೀನುಗಾರರು, ಅರಣ್ಯಾಧಾರಿತ ಸಮುದಾಯಗಳು ಹಾಗೂ ಪರಂಪರೆಯ ಸಮುದಾಯಗಳಾದ ಗೌಳಿ, ಸಿದ್ದಿ, ಒಕ್ಕಲಿಗ, ಕುಣಬಿ ಮತ್ತು ಹಾಲಕ್ಕಿ ಸಮುದಾಯಗಳ ಜೀವನೋಪಾಯ ಹಾನಿಗೊಳಗಾಗುತ್ತದೆ.
ಪಶ್ಚಿಮಘಟ್ಟಗಳ ಈ ವಲಯ, ನೈಋತ್ಯ ಮಾನ್ಸೂನ್‌ ಮಾರುತಗಳನ್ನು ತಡೆ ಹಿಡಿದು, ಮುಂಗಾರು ಮಳೆ ಸುರಿಸುವಲ್ಲಿ ತನ್ನದೇ ಆದ ಕೊಡುಗೆ ನೀಡುತ್ತಿದ್ದು, ಈ ಜಲಚಕ್ರಕ್ಕೆ ಅಡ್ಡಿಯಾಗಲಿದೆ.
ಉತ್ತರ ಕನ್ನಡ ಜಿಲ್ಲೆಯಲ್ಲಿ ಈಗಾಗಲೇ ಮಳೆಗಾಲದಲ್ಲಿ ಭೂಕುಸಿತಗಳು ಹೆಚ್ಚಾಗಿ ಸಂಭವಿಸುತ್ತಿದ್ದು, ಈ ಯೋಜನೆಗಳ ಅನುಷ್ಠಾನದಿಂದ ಈ ಬಗೆಯ ಭೂಕುಸಿತಗಳ ಪ್ರಮಾಣ ಮತ್ತು ತೀವ್ರತೆ ಮತ್ತಷ್ಟು ಹೆಚ್ಚಲಿದೆ.
ಕರ್ನಾಟಕ ಸರ್ಕಾರ 2012ರ ಮೇ 22ರಂದು ಹೊರಡಿಸಿದ ಗೆಜೆಟ್ ಅಧಿಸೂಚನೆ ಹಾಗೂ 1980ರ ಅರಣ್ಯ ಸಂರಕ್ಷಣಾ ಕಾಯ್ದೆ ಮತ್ತು 1972ರ ವನ್ಯಜೀವಿ ಸಂರಕ್ಷಣಾ ಕಾಯ್ದೆ ಅಡಿಯಲ್ಲಿ ಬೇಡ್ತಿ ಹಾಗೂ ‘ಶಾಲ್ಮಲಾ ನದಿ ತೀರದ ಪರಿಸರ ವ್ಯವಸ್ಥೆ’ಗಳು ಸಂರಕ್ಷಣಾ ಮೀಸಲು ಪ್ರದೇಶವಾಗಿವೆ. ಸಂರಕ್ಷಿತ ಅರಣ್ಯಗಳ ಸುತ್ತಲಿನ ಒಂದು ಕಿ.ಮೀ. ವ್ಯಾಪ್ತಿಯ ಪ್ರದೇಶ ಹಾಗೂ ನದಿ ಇಕ್ಕೆಲಗಳ 100 ಮೀಟರ್ ವ್ಯಾಪ್ತಿಯ ನದಿತೀರದ ಕಾಡುಗಳನ್ನು ಪರಿಸರ ಸೂಕ್ಷ್ಮ ವಲಯವಾಗಿ ನಿರ್ವಹಿಸಲು ಸುಪ್ರೀಂಕೋರ್ಟ್‌ ನಿರ್ದೇಶನವೇ ಇದೆ.
ಇಷ್ಟೆಲ್ಲಾ ದುಷ್ಪರಿಣಾಮಗಳ ನಡುವೆಯೂ ರಾಜಕಾರಣಕ್ಕಾಗಿ, ರಾಜಕಾರಣಿಗಳು ಈ ಯೋಜನೆಯ ಜಾರಿಗೆ ಮುಂದಾಗುತ್ತಿರುವುದು ವಿಷಾದನೀಯ.

ಜೋಯಿಡಾದ ದಟ್ಟ ಕಾಡಿನಲ್ಲಿದೆ ಈ ಅಪರೂಪದ ಬಂಗಲೆ; ರವಿ ಬೆಳಗೆರೆ, ಮಾಳಗಾಂವಕರ್ ನೆನಪುಗಳ ತಾಣ ‘ಬರ್ಬೂಸಾ’

Sushma Hegde — Mon, 05 Oct 2026 13:01:22 +0530

ದಟ್ಟ ಕಾಡು, ಸುತ್ತಲೂ ಹಸಿರು, ಕಣ್ಣಿಗೆ ಬೀಳುವ ವನ್ಯಜೀವಿಗಳು, ಮನೆಯೊಳಗೆ ತುಂಬಿಕೊಳ್ಳುವ ನೈಸರ್ಗಿಕ ಬೆಳಕು... ಉತ್ತರ ಕನ್ನಡದ ಜೋಯಿಡಾ ತಾಲೂಕಿನ ಜಗಲಪೇಟೆ ಸಮೀಪ ಇರುವ ‘ಬರ್ಬೂಸಾ’ ಬಂಗಲೆ ಹೀಗೊಂದು ವಿಶಿಷ್ಟ ಅನುಭವ ನೀಡುತ್ತದೆ. ಆದರೆ ಇದು ಕೇವಲ ಕಾಡಿನ ನಡುವೆ ಇರುವ ಸುಂದರ ಬಂಗಲೆಯಲ್ಲ. ಕನ್ನಡದ ಖ್ಯಾತ ಲೇಖಕ ರವಿ ಬೆಳಗೆರೆ ಹಾಗೂ ಇಂಗ್ಲಿಷ್-ಮರಾಠಿ ಸಾಹಿತ್ಯ ಲೋಕದ ಪ್ರಮುಖ ಲೇಖಕ, ಭಾರತೀಯ ಸೇನೆಯ ನಿವೃತ್ತ ಕರ್ನಲ್ ಮನೋಹರ್ ಮಾಳ್ಗಾಂವಕರ್ ಅವರ ನೆನಪುಗಳನ್ನು ಹೊತ್ತಿರುವ ಸಾಹಿತ್ಯದ ತಾಣವೂ ಹೌದು. ವರ್ಷಗಳ ಕಾಲ ಈ ಬಂಗಲೆಯ ಮೌನದಲ್ಲಿ ಪುಸ್ತಕಗಳು, ಬರಹಗಳು ಮತ್ತು ಸಾಹಿತ್ಯದ ಚರ್ಚೆಗಳು ನಡೆದಿವೆ. ಹೀಗಾಗಿ ‘ಬರ್ಬೂಸಾ’ ಇಂದು ಜೋಯಿಡಾದ ಕಾಡಿನ ನಡುವೆ ನಿಂತಿರುವ ಒಂದು ಕಟ್ಟಡಕ್ಕಿಂತಲೂ ಹೆಚ್ಚಾಗಿ, ಇಬ್ಬರು ಲೇಖಕರ ಬದುಕಿನ ಪ್ರಮುಖ ಅಧ್ಯಾಯಗಳಿಗೆ ಸಾಕ್ಷಿಯಾಗಿರುವ ಜಾಗವಾಗಿ ಗುರುತಿಸಿಕೊಂಡಿದೆ.

‘ಬರ್ಬೂಸಾ’ ಎಂಬ ಹೆಸರಿನ ಅರ್ಥವೇನು?

‘ಬರ್ಬೂಸಾ’ ಎನ್ನುವುದು ಫ್ರೆಂಚ್ ಮೂಲದ ಪದ. ಒಂದೇ ತಳಿಯ ಮರಗಳು ಸಾಂದ್ರವಾಗಿ ಬೆಳೆದಿರುವ ಕಾಡನ್ನು ಸೂಚಿಸಲು ಈ ಪದವನ್ನು ಬಳಸಲಾಗುತ್ತದೆ ಎನ್ನಲಾಗುತ್ತದೆ. ಈ ಬಂಗಲೆಯ ಸುತ್ತಮುತ್ತ ‘ಮತ್ತಿ’ ಮರಗಳು ಹೆಚ್ಚಿನ ಸಂಖ್ಯೆಯಲ್ಲಿರುವುದರಿಂದ ಬಂಗಲೆಗೆ ‘ಬರ್ಬೂಸಾ’ ಎಂಬ ಹೆಸರು ಬಂದಿರಬಹುದು. ಕಾಡಿನ ಮಧ್ಯೆ ಎತ್ತರದ ಟೇಬಲ್‌ಟಾಪ್‌ ಜಾಗದಲ್ಲಿ ನಿರ್ಮಿಸಿರುವ ಈ ಮನೆ, ಪ್ರಕೃತಿಯೊಂದಿಗೆ ಬೆರೆತುಹೋಗುವಂತೆ ಕಾಣುತ್ತದೆ.

ಫ್ರೆಂಚ್-ಬ್ರಿಟಿಷ್ ಶೈಲಿಯ ವಾಸ್ತುಶಿಲ್ಪ

ಬರ್ಬೂಸಾ ಬಂಗಲೆಯ ಮತ್ತೊಂದು ವಿಶೇಷತೆ ಅದರ ವಾಸ್ತುಶಿಲ್ಪ. ಫ್ರೆಂಚ್ ಹಾಗೂ ಬ್ರಿಟಿಷ್ ಶೈಲಿಯ ವಿನ್ಯಾಸಗಳನ್ನು ಸಂಯೋಜಿಸಿ ಈ ಮನೆಯನ್ನು ನಿರ್ಮಿಸಲಾಗಿದೆ. ಮನೆಯೊಳಗೆ ನೈಸರ್ಗಿಕ ಬೆಳಕು ಹೇರಳವಾಗಿ ಪ್ರವೇಶಿಸುವಂತೆ ವಿಶೇಷ ವಿನ್ಯಾಸ ಮಾಡಲಾಗಿದೆ. ಬಾಗಿಲುಗಳನ್ನು ಮುಚ್ಚಿದ್ದರೂ ಮೇಲ್ಭಾಗದಿಂದ ಬರುವ ಬೆಳಕು ಪ್ರತಿಫಲಿಸಿ ಮನೆಯ ಒಳಭಾಗವನ್ನು ಬೆಳಗಿಸುತ್ತದೆ. ಕಿಟಕಿ ಅಥವಾ ಕರ್ಟನ್ ಸರಿಸಿದರೆ ಎದುರಿಗೆ ಕಾಣುವುದು ದಟ್ಟ ಕಾಡು. ಮನೆಯ ಸುತ್ತಮುತ್ತ ಕಾಡುಕೋಣ, ಜಿಂಕೆ ಸೇರಿದಂತೆ ವಿವಿಧ ವನ್ಯಜೀವಿಗಳು ಕಾಣಿಸಿಕೊಳ್ಳುವುದು ಇಲ್ಲಿನ ಸಹಜ ದೃಶ್ಯವಾಗಿದೆ. ಮನೆಯ ಬಾಗಿಲುಗಳು ಮತ್ತು ಚೌಕಟ್ಟುಗಳಿಗೆ ಉತ್ತಮ ಗುಣಮಟ್ಟದ ತೇಗದ ಮರ ಬಳಸಲಾಗಿದೆ. ಹಲವು ವರ್ಷಗಳು ಕಳೆದರೂ ನಿರ್ಮಾಣದ ಗುಣಮಟ್ಟ ಎದ್ದು ಕಾಣುವಂತಿದೆ.

ಮಾಳಗಾಂವಕರ್ ದಂಪತಿಯ ಕನಸಿನ ಮನೆ

ಬರ್ಬೂಸಾ ಬಂಗಲೆಯೊಂದಿಗೆ ಮನೋಹರ್ ಮಾಳಗಾಂವಕರ್ ಹಾಗೂ ಅವರ ಪತ್ನಿ ಮನೋರಮಾ ಅವರ ಭಾವನಾತ್ಮಕ ನಂಟು ಇತ್ತು. ಮನೆಯ ನಿರ್ಮಾಣದ ಸಂದರ್ಭದಲ್ಲಿ ಬಳಸಿದ ಕಲ್ಲುಗಳನ್ನು ಆಯ್ಕೆ ಮಾಡಿ ಸೂಕ್ತ ಜಾಗದಲ್ಲಿ ಜೋಡಿಸುವ ಕೆಲಸದಲ್ಲೂ ಮನೋರಮಾ ಅವರು ಆಸಕ್ತಿಯಿಂದ ತೊಡಗಿಸಿಕೊಂಡಿದ್ದರು ಎನ್ನಲಾಗುತ್ತದೆ. ಪತ್ನಿ ನಿಧನರಾದ ನಂತರವೂ ಮಾಳ್ಗಾಂವಕರ್ ಅವರು ಅವರ ನೆನಪುಗಳನ್ನು ಮನೆಯೊಳಗೆ ಹಾಗೆಯೇ ಉಳಿಸಿಕೊಂಡಿದ್ದರು. ಅವರ ಕಾಟ್ ಮತ್ತು ಹಾಸಿಗೆಯನ್ನು ಬದಲಾಯಿಸದೆ ಕಾಪಾಡಿಕೊಂಡಿದ್ದರು. ಹೊಸ ಚಾದರ ಅಥವಾ ಬೆಡ್‌ಶೀಟ್‌ ಮನೆಗೆ ತಂದಾಗ ಪತ್ನಿಯ ಕಾಟ್‌ಗೂ ಅದೇ ರೀತಿಯ ಚಾದರ ತರುತ್ತಿದ್ದರು ಎಂಬುದು ಅವರ ಭಾವನಾತ್ಮಕ ಬಂಧವನ್ನು ತೋರಿಸುತ್ತದೆ.

ಆರ್ಮಿ ಶಿಸ್ತಿನ ಮಾಳ್ಗಾಂವಕರ್

ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದ ಮಾಳ್ಗಾಂವಕರ್ ಅತ್ಯಂತ ಶಿಸ್ತಿನ ವ್ಯಕ್ತಿಯಾಗಿದ್ದರು. ಅಪಾಯಿಂಟ್‌ಮೆಂಟ್ ಇಲ್ಲದೆ ಮನೆಗೆ ಬಂದ ಉನ್ನತ ಅಧಿಕಾರಿಗಳನ್ನೂ ಅವರು ಭೇಟಿಯಾಗುತ್ತಿರಲಿಲ್ಲ ಎನ್ನಲಾಗುತ್ತದೆ. ಬರ್ಬೂಸಾ ಅವರ ಪಾಲಿಗೆ ಕೇವಲ ವಿಶ್ರಾಂತಿಯ ಸ್ಥಳವಾಗಿರದೆ, ಬರವಣಿಗೆ ಮತ್ತು ವೈಯಕ್ತಿಕ ಬದುಕಿನೊಂದಿಗೆ ಬೆಸೆದುಕೊಂಡ ನೆಲೆ ಆಗಿತ್ತು.

ಮಾಳ್ಗಾಂವಕರ್ ಬಳಿಕ ಬರ್ಬೂಸಾಗೆ ಬಂದ ರವಿ ಬೆಳಗೆರೆ

ಮಾಳ್ಗಾಂವಕರ್ ಅವರ ನಿಧನದ ಬಳಿಕ ಬರ್ಬೂಸಾ ಬಂಗಲೆಯನ್ನು ಕನ್ನಡದ ಖ್ಯಾತ ಲೇಖಕ ರವಿ ಬೆಳಗೆರೆ ಖರೀದಿಸಿದರು. ಜೋಯಿಡಾದ ಕಾಡಿನ ಮೌನ ಅವರಿಗೆ ಬರವಣಿಗೆಗೆ ವಿಶೇಷ ವಾತಾವರಣ ನೀಡಿತ್ತು. ಬೆಂಗಳೂರಿನ ಗದ್ದಲದಿಂದ ದೂರವಾಗಿ ಈ ಕಾಡಿನ ನಡುವೆ ಕುಳಿತು ಓದು, ಸಂಶೋಧನೆ ಮತ್ತು ಬರವಣಿಗೆಯಲ್ಲಿ ಅವರು ತೊಡಗಿಸಿಕೊಳ್ಳುತ್ತಿದ್ದರು. ರವಿ ಬೆಳಗೆರೆ ಅವರು ಬರವಣಿಗೆಗೆ ಕುಳಿತಾಗ ಸಮಯದ ಪರಿವೆಯೇ ಇರುತ್ತಿರಲಿಲ್ಲ ಎನ್ನಲಾಗುತ್ತದೆ. ಒಂದು ಪುಸ್ತಕ ಬರೆಯಲು ಅಪಾರ ಪ್ರಮಾಣದ ದಾಖಲೆಗಳನ್ನು ಓದಿ, ಮಾಹಿತಿ ಸಂಗ್ರಹಿಸಿ ನಂತರ ಬರೆಯುತ್ತಿದ್ದರು. ಕೆಲವೊಮ್ಮೆ ಬೆಂಗಳೂರಿನಿಂದ ಕೇವಲ ಕೆಲ ಗಂಟೆಗಳ ಕಾಲ ಬರ್ಬೂಸಾದಲ್ಲಿ ಕುಳಿತು ಬರೆಯಲು ಅಥವಾ ಕಾಫಿ ಕುಡಿಯಲು ಜೋಯಿಡಾಗೆ ಬರುತ್ತಿದ್ದರು ಎಂಬುದು ಈ ಜಾಗದೊಂದಿಗೆ ಅವರಿಗಿದ್ದ ವಿಶೇಷ ನಂಟನ್ನು ತೋರಿಸುತ್ತದೆ.

ಮಾಳ್ಗಾಂವಕರ್ ಕುರ್ಚಿಗೆ ಬೆಳಗೆರೆ ನೀಡಿದ್ದ ಗೌರವ

ಬರ್ಬೂಸಾದಲ್ಲಿದ್ದ ಮಾಳ್ಗಾಂವಕರ್ ಅವರ ಬರವಣಿಗೆಯ ಕುರ್ಚಿಗೂ ರವಿ ಬೆಳಗೆರೆ ವಿಶೇಷ ಗೌರವ ನೀಡುತ್ತಿದ್ದರು ಎನ್ನಲಾಗುತ್ತದೆ. ಮಾಳ್ಗಾಂವಕರ್ ಅವರು ಜಗತ್ತು ಗೌರವಿಸುವ ಸಾಹಿತಿ ಎಂಬ ಕಾರಣಕ್ಕೆ, ಅವರ ಕುರ್ಚಿಯಲ್ಲಿ ತಾವು ಕುಳಿತುಕೊಳ್ಳಲು ಅರ್ಹರಲ್ಲ ಎಂದು ಬೆಳಗೆರೆ ಭಾವಿಸುತ್ತಿದ್ದರು ಎನ್ನಲಾಗಿದೆ. ಇದು ಹಿರಿಯ ಲೇಖಕರ ಮೇಲಿದ್ದ ಅವರ ಗೌರವವನ್ನು ತೋರಿಸುವ ಅಪರೂಪದ ಸಂಗತಿಯಾಗಿದೆ.

ಕತ್ತಿಗಳು, ಅಪರೂಪದ ಪುಸ್ತಕಗಳ ಸಂಗ್ರಹ

ಬರ್ಬೂಸಾ ಬಂಗಲೆಯ ಮತ್ತೊಂದು ಆಕರ್ಷಣೆ ಅದರಲ್ಲಿರುವ ಅಪರೂಪದ ವಸ್ತುಗಳ ಸಂಗ್ರಹ. ಮರಾಠರ ಅಥವಾ ಶಿವಾಜಿ ಮಹಾರಾಜರ ಕಾಲಕ್ಕೆ ಸೇರಿದವು ಎಂದು ಹೇಳಲಾಗುವ ಹಳೆಯ ಕತ್ತಿಗಳು ಹಾಗೂ ಆಯುಧಗಳನ್ನು ಇಲ್ಲಿ ಸಂರಕ್ಷಿಸಲಾಗಿದೆ. ಜತೆಗೆ ಅಪರೂಪದ ಪುಸ್ತಕಗಳು, ಹಳೆಯ ಗ್ರಂಥಗಳು ಮತ್ತು ಖ್ಯಾತ ಸಾಹಿತಿಗಳ ಹಸ್ತಾಕ್ಷರ ಹೊಂದಿರುವ ಪುಸ್ತಕಗಳೂ ಇದ್ದವು ಎನ್ನಲಾಗುತ್ತದೆ. ಇವು ಬರ್ಬೂಸಾವನ್ನು ಕೇವಲ ವಾಸದ ಮನೆಯಾಗಿ ಅಲ್ಲದೆ, ಇತಿಹಾಸ ಮತ್ತು ಸಾಹಿತ್ಯದ ನೆನಪುಗಳನ್ನು ಹೊತ್ತಿರುವ ತಾಣವನ್ನಾಗಿ ಮಾಡಿವೆ.

ಊರುಂಟು ಜನರಿಲ್ಲ, ಉತ್ತರ ಕನ್ನಡದ 40 ಗ್ರಾಮಗಳಲ್ಲಿ ಬದುಕಿನ ಕುರುಹೇ ಇಲ್ಲ!

Ganesh Mabla Gowda — Fri, 25 Sep 2026 19:10:24 +0530

ಉತ್ತರ ಕನ್ನಡ: ಜಿಲ್ಲೆಯಿಂದ ಆಘಾತಕಾರಿ ಸುದ್ದಿಯೊಂದು ಹೊರಬಿದ್ದಿದ್ದು, ಇಡೀ ರಾಜ್ಯವನ್ನೇ ದಿಗಿಲು ಹುಟ್ಟಿಸುವಂತೆ ಇದೆ. ಒಂದು ಕಾಲದಲ್ಲಿ ಮಕ್ಕಳು, ಯುವಕರು, ಹಿರಿಯರು ಹಾಗೂ ಸಾಕು ಪ್ರಾಣಿಗಳ ಸದ್ದಿನಿಂದ ಕೂಡಿರುತ್ತಿದ್ದ ಗ್ರಾಮಗಳು ಇಂದು ನೀರವ ಮೌನಕ್ಕೆ ಆವರಿಸಿವೆ. ಒಂದು ಎರಡು ಗ್ರಾಮಗಳಲ್ಲ ಬರೋಬ್ಬರಿ 40ಕ್ಕೂ ಹೆಚ್ಚುಗ್ರಾಮಗಳು!

ಏನಾಯ್ತು ಗ್ರಾಮಗಳಿಗೆ?

ಹೌದು, ಸುಮಾರು 40 ಗ್ರಾಮಗಳು 0% ಜನಸಂಖ್ಯೆ ಹೊಂದಿದೆ. ಅಂದರೆ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಡೆಡ್ ವಿಲೇಜ್ ಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿದೆ. ಇದು ದೊಡ್ಡ ಆತಂಕವನ್ನು ಸೃಷ್ಟಿಸಿದೆ. ಹಾಯಾಗಿದ್ದ ಊರುಗಳಲ್ಲಿನ ಜನ ಎಲ್ಲಿಗೆ ಹೋದರು? ಅವರಿಗೆಲ್ಲ ಏನಾಯಿತು? ಮತ್ತೆ ಅವರು ಬರುತ್ತಾರಾ? ಈ ಎಲ್ಲಾ ಪ್ರಶ್ನೆಗಳಿಗೆ ಉತ್ತರ ಮೌನ. ಅಲ್ಲಿ ಉತ್ತರವೇ ಇಲ್ಲ. ಹಾಗಾದರೆ ಈ ಗ್ರಾಮದ ನಿವಾಸಿಗಳು ಎಲ್ಲಿಗೆ ಹೋದರು? ಭೀಕರ ಬರದ ಹಿನ್ನೆಲೆಯಲ್ಲಿ ಊರು ಬಿಟ್ಟು ವಲಸೆ ಹೋದರಾ? ಅಥವಾ ಅಭಿವೃದ್ಧಿ ಕುಂಟಿತ ಅರಣ್ಯ ಆವರಿಸಿದ ಹಳ್ಳಿ ಬಿಟ್ಟು ಪಟ್ಟಣ ಸೇರಿದರಾ? ಅಥವಾ ಮಹಾ ಪ್ರವಾಹ ಬಂದು ಕೊಚ್ಚಿ ಹೋದರಾ ಅನ್ನೋದು ಸದ್ಯದ ಪ್ರಶ್ನೆ.

ವಿಚಾರ ಹೇಗೆ ಗೊತ್ತಾಯ್ತು?

ಜಿಲ್ಲಾ ಪಂಚಾಯತ್ ಅಧಿಕಾರಿಗಳು ನಡೆಸಿದ ಸಮೀಕ್ಷೆಯಲ್ಲಿ ಆಘಾತಕಾರಿ ಮಾಹಿತಿ ಹೊರಬಿದ್ದಿದೆ. ಈ ಮೊದಲು ಜನ ವಾಸ್ತವ್ಯಿದ್ದ 40 ಗ್ರಾಮಗಳು ಈಗ ಖಾಲಿ ಖಾಲಿ ಆಗಿವೆ. ಜನ ವಾಸವಿದ್ದ ಮನೆಗಳು ಈಗ ಇತಿಹಾಸ ನೆನಪಿಸುವ ಪಳೆಯುಳಿಕೆಗಳಷ್ಟೇ ನೆನಪುಗಳಾಗಿವೆ. ಜಾನುವಾರುಗಳು ಇಲ್ಲ, ಸಾಕು ಪ್ರಾಣಿಗಳಿಲ್ಲದ ಊರಿನಲ್ಲಿ ಈಗ ಭೀಕರ ಮೌನ ಆವರಿಸಿದೆ. ಅದೊಂದು ನಿರ್ವಾತ ಹಳ್ಳಿಯಾಗಿ ಮಾರ್ಪಟ್ಟಿದೆ.

ಮೂಢನಂಬಿಕೆಗೆ ಊರು ಬಿಟ್ಟರಂತೆ..

ಕೆಲವು ಸಂಬಂಧಿಕರು, ಪಕ್ಕದ ಊರಿನ ಜನರು ಹೇಳುವ ಮಾಹಿತಿ ಪ್ರಕಾರ.. ಅದೆಷ್ಟೋ ಮಂದಿ ಮೂಢನಂಬಿಕೆಗೆ ಹೆದರಿ ಊರು ಬಿಟ್ಟಿದ್ದಾರಂತೆ. ಸಾಮಾನ್ಯವಾಗಿ ಉತ್ತರ ಕನ್ನಡ ಜಿಲ್ಲೆಯಲ್ಲಿರುವ ಬಹುತೇಕ ಊರುಗಳು ದಟ್ಟ ಕಾಡಿನ ಮಧ್ಯೆ ಇವೆ. ಕೆಲವೊಂದಿಷ್ಟು ಕುಗ್ರಾಮಗಳಲ್ಲಿಯೇ, ಕುಗ್ರಾಮವಾಗಿ ಉಳಿದುಕೊಂಡಿದ್ದವು. ನೆಗೆಟಿವ್ ಎನರ್ಜಿಗಳಿಗೆ ಹೆದರಿ ಊರು ಬಿಟ್ಟಿದ್ದಾರೆ ಎಂಬ ಮಾತುಗಳು ಕೇಳಬರುತ್ತಿವೆ.

ಎಲ್ಲೆಲ್ಲಿ ಜಾಸ್ತಿ?

ಜಿಲ್ಲೆಯ ಜೊಯಿಡಾ, ದಾಂಡೇಲಿ, ಹಳಿಯಾಳ ಮತ್ತು ಮುಂಡಗೋಡ ತಾಲೂಕಿನಲ್ಲಿ ಅತೀ ಹೆಚ್ಚು ಗ್ರಾಮಗಳು ಖಾಲಿಯಾಗಿವೆ. ಜೋಯಿಡಾ ತಾಲೂಕಿನ ಬಾಡಗುಂದ ಎಂಬಲ್ಲಿ ಸುಮಾರು 15 ಕುಟುಂಬಗಳು ಮೂಢನಂಬಿಕೆಯಿಂದ ಗ್ರಾಮವನ್ನೇ ಬಿಟ್ಟು ಹೋಗಿದ್ದಾರಂತೆ. ಹಳಿಯಾಳ ತಾಲೂಕಿನ ಚೆನ್ನಾಪುರ, ಬಬಲಿಕೊಪ್ಪ, ಹರವಳ್ಳಿ, ಮಾವಿನಕೊಪ್ಪ, ಬೆಗೂರು, ಮಂಡಕಿ, ವಿಂಚೊಳ್ಳಿ, ಚಿಮನಳ್ಳಿ, ಮಾಲವಾಡ, ಮಲವಡಿ, ಮಾಚಾಪುರ, ಚಿನಗಿನಕೊಪ್ಪ, ಅಂಬಡಗ, ಅಟ್ಲೆ ಗ್ರಾಮಗಳ ಜನ ಅಭಿವೃದ್ಧಿ ಶೂನ್ಯ ಹಳ್ಳಿ ಬಿಟ್ಟು ಪಟ್ಟಣ ಸೇರಿದ್ದಾರೆ ಎನ್ನಲಾಗಿದೆ.

ಇನ್ನು, ಮುಂಡಗೋಡ ತಾಲೂಕಿನ ಬಂಕಾಸಾಳಿ, ಬೇಚಾರಕ, ಇಂಗಳಿಕಿ, ಹುಡೆಲಕೊಪ್ಪದ ಜನ ಬರದ ಹಿನ್ನೆಲೆಯಲ್ಲಿ ಊರುಬಿಟ್ಟಿದ್ದಾರೆ ಎಂದು ಹೇಳಲಾಗಿದೆ. ಇನ್ನು ಕೆಲವರು ವರ್ಷದ ಆರು ತಿಂಗಳು ಪಟ್ಟಣಕ್ಕೆ ದುಡಿಯಲು ಹೋಗಿ ಮಳೆಗಾಲದ ಸಂದರ್ಭದಲ್ಲಿ ಹಳ್ಳಿಗಳಿಗೆ ಮರಳುವರು ಇದ್ದಾರೆ ಎಂದು ಹೇಳಲಾಗುತ್ತಿದೆ. ಗ್ರಾಮಸ್ಥರು ಗ್ರಾಮಬಿಟ್ಟು ವಲಸೆಹೋಗುತ್ತಿರುವ ವಿಚಾರವನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸಿ ವಲಸೆಗೆ ನಿಖರ ಕಾರಣ ಕಂಡುಕೊಂಡು ಸಮಸ್ಯೆ ಬಗೆಹರಿಸಬೇಕಿದೆ.

ಉತ್ತರ ಕನ್ನಡದ ಶ್ರೀಕ್ಷೇತ್ರ ಬಂಗಾರಮಕ್ಕಿಗೆ ಭೇಟಿ ನೀಡಿದ ಟೀಮ್‌ ಇಂಡಿಯಾ ಪ್ಲೇಯರ್‌ ಸ್ಮೃತಿ ಮಂಧಾನ

Santosh Naik — Fri, 02 Oct 2026 19:41:38 +0530

ಹೊನ್ನಾವರ (ಅ.2): ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ಉಪನಾಯಕಿ, ಸ್ಟಾರ್ ಆರಂಭಿಕ ಆಟಗಾರ್ತಿ ಹಾಗೂ ಮಹಿಳಾ ಪ್ರೀಮಿಯರ್ ಲೀಗ್ (WPL) ಇತಿಹಾಸದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವನ್ನು ಎರಡು ಬಾರಿ (2024 ಮತ್ತು 2026) ಚಾಂಪಿಯನ್ ಪಟ್ಟಕ್ಕೇರಿಸಿದ ಯಶಸ್ವಿ ನಾಯಕಿ ಸ್ಮೃತಿ ಮಂಧಾನ ಅವರು ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲ್ಲೂಕಿನ ಪ್ರಸಿದ್ಧ ಪುಣ್ಯಕ್ಷೇತ್ರ ಶ್ರೀಕ್ಷೇತ್ರ ಬಂಗಾರಮಕ್ಕಿಗೆ (ಹೇಮಾಪುರ) ಭೇಟಿ ನೀಡಿದ್ದಾರೆ.

ಕ್ಷೇತ್ರಕ್ಕೆ ಆಗಮಿಸಿದ ಸ್ಮೃತಿ ಮಂಧಾನ ಅವರು ಶ್ರೀ ವೀರಾಂಜನೇಯ ಸ್ವಾಮಿ ದೇವರ ದರ್ಶನ ಪಡೆದು ವಿಶೇಷ ಪೂಜೆ ಸಲ್ಲಿಸಿದರು. ಬಳಿಕ ಕ್ಷೇತ್ರದ ಧರ್ಮದರ್ಶಿಗಳು ಹಾಗೂ ಪೀಠಾಧಿಪತಿಗಳಾದ ಪರಮಪೂಜ್ಯ ಶ್ರೀ ಮಾರುತಿ ಗುರೂಜಿ ಅವರನ್ನು ಭೇಟಿಯಾಗಿ ಆಶೀರ್ವಾದ ಪಡೆದುಕೊಂಡರು. ಈ ಸಂದರ್ಭದಲ್ಲಿ ಪೂಜ್ಯ ಗುರೂಜಿಯವರು ಸ್ಮೃತಿ ಮಂಧಾನ ಅವರಿಗೆ ಆಂಜನೇಯ ಸ್ವಾಮಿಯ ಭಾವಚಿತ್ರ ನೀಡಿ, ಶಾಲು ಹೊದಿಸಿ ಗೌರವಿಸಿ ಆಶೀರ್ವದಿಸಿದರು.

ಶರಾವತಿ ನದಿ ತೀರದ ಪುಣ್ಯಕ್ಷೇತ್ರ ಬಂಗಾರಮಕ್ಕಿ

ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲ್ಲೂಕಿನ ಗೇರುಸೊಪ್ಪೆ ಸಮೀಪವಿರುವ ಶ್ರೀಕ್ಷೇತ್ರ ಬಂಗಾರಮಕ್ಕಿಯು ಶರಾವತಿ ನದಿಯ ಬಲದಂಡೆಯಲ್ಲಿದ್ದು, ಪಶ್ಚಿಮ ಘಟ್ಟಗಳ ನಿತ್ಯಹರಿದ್ವರ್ಣ ಕಾಡುಗಳು ಮತ್ತು ನೈಸರ್ಗಿಕ ಸೌಂದರ್ಯದ ನಡುವೆ ಮೈದಳೆದು ನಿಂತಿದೆ. ದಿವಂಗತ ವೇದ ಬ್ರಹ್ಮ ಶ್ರೀ ಗಣೇಶ ಭಟ್ ಅವರು ಶ್ರೀಧರ ಸ್ವಾಮಿಗಳ ದಿವ್ಯ ಮಾರ್ಗದರ್ಶನದಲ್ಲಿ ಸ್ಥಾಪಿಸಿದ ಈ ಧಾರ್ಮಿಕ ಕ್ಷೇತ್ರದಲ್ಲಿ ಶ್ರೀ ವೀರಾಂಜನೇಯ ಸ್ವಾಮಿ ಪ್ರಮುಖ ಆರಾಧ್ಯ ದೈವವಾಗಿದೆ.

ಪ್ರತಿದಿನ ತ್ರಿಕಾಲ ಪೂಜೆ ನಡೆಯುವ ಈ ಕ್ಷೇತ್ರದಲ್ಲಿ ಶುಕ್ರವಾರ ಮತ್ತು ಸೋಮವಾರದಂದು 'ಹೇಳಿಕೆ ಸೇವೆ'ಯ ವಿಶೇಷ ದರ್ಶನವಿರುತ್ತದೆ. ಯುಗಾದಿ ವಸಂತೋತ್ಸವ, ಹನುಮ ಜಯಂತಿ ಬ್ರಹ್ಮರಥೋತ್ಸವ, ರಾಮೋತ್ಸವ, ಶರನ್ನವರಾತ್ರಿ ಯಕ್ಷಗಾನ ಹಾಗೂ ಕಾರ್ತಿಕ ದೀಪೋತ್ಸವಗಳು ಕ್ಷೇತ್ರದ ಪ್ರಮುಖ ಉತ್ಸವಗಳಾಗಿದ್ದು, ಸಾವಿರಾರು ಭಕ್ತರು ಆಗಮಿಸುತ್ತಾರೆ. ಪ್ರಸ್ತುತ ಪರಮಪೂಜ್ಯ ಶ್ರೀ ಶ್ರೀ ಶ್ರೀ ಮಾರುತಿ ಗುರೂಜಿ ಅವರು ಪೀಠಾಧಿಪತಿಗಳಾಗಿ ಕ್ಷೇತ್ರದ ಧಾರ್ಮಿಕ ಹಾಗೂ ಸಾಮಾಜಿಕ ಕಾರ್ಯಗಳನ್ನು ಮುನ್ನಡೆಸುತ್ತಿದ್ದಾರೆ.

ವಿಶ್ವದ ಶ್ರೇಷ್ಠ ಬ್ಯಾಟರ್, ಆರ್‌ಸಿಬಿ ಹಿರಿಮೆಯ ಸ್ಮೃತಿ

ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅನೇಕ ವಿಶ್ವ ದಾಖಲೆಗಳನ್ನು ಬರೆದಿರುವ ಸ್ಮೃತಿ ಮಂಧಾನ ಪ್ರಸ್ತುತ ಜಾಗತಿಕ ಕ್ರಿಕೆಟ್‌ನ ಅತ್ಯುತ್ತಮ ಬ್ಯಾಟರ್‌‌ಗಳಲ್ಲಿ ಒಬ್ಬರೆನಿಸಿದ್ದಾರೆ. ಮೈದಾನದಲ್ಲಿ ಸ್ಫೋಟಕ ಆಟದ ಮೂಲಕ ಕೋಟ್ಯಂತರ ಕನ್ನಡಿಗರು ಹಾಗೂ ಭಾರತೀಯರ ಮನಗೆದ್ದಿರುವ ಅವರು, ಬಿಡುವಿನ ವೇಳೆಯಲ್ಲಿ ಶರಾವತಿ ತೀರದ ಈ ಪವಿತ್ರ ಧಾರ್ಮಿಕ ಕ್ಷೇತ್ರಕ್ಕೆ ಭೇಟಿ ನೀಡಿ ದೇವರ ಕೃಪೆಗೆ ಪಾತ್ರರಾಗಿದ್ದಾರೆ.

Bengaluru Karwar Vande Bharat Express: ವಂದೇ ಭಾರತ್ ಮಾರ್ಗ, ಕರಾವಳಿಯಲ್ಲಿ ಭುಗಿಲೆದ್ದ ಹೊಸ ವಿವಾದ!

Gowthami K — Mon, 05 Oct 2026 10:07:09 +0530

ಕಾರವಾರ / ಮಂಗಳೂರು: ಬೆಂಗಳೂರಿನ ಯಶವಂತಪುರ ಮತ್ತು ಗೋವಾದ ಮಡಗಾಂವ್ ನಡುವೆ ಕರಾವಳಿ ಕರ್ನಾಟಕದ ಮೂಲಕ ಪ್ರಸ್ತಾವಿತ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಸಂಪರ್ಕದ ಮಾರ್ಗದ ಕುರಿತು ಉತ್ತರ ಕನ್ನಡ ಮತ್ತು ದಕ್ಷಿಣ ಕನ್ನಡ ಜಿಲ್ಲೆಗಳ ಪ್ರಯಾಣಿಕರ ನಡುವೆ ತೀವ್ರ ಚರ್ಚೆ ಹಾಗೂ ಭಿನ್ನಾಭಿಪ್ರಾಯಗಳು ವ್ಯಕ್ತವಾಗಿವೆ. ಈ ರೈಲನ್ನು ಮಂಗಳೂರು ಸೆಂಟ್ರಲ್ ನಿಲ್ದಾಣಕ್ಕೆ ತೆಗೆದುಕೊಂಡು ಹೋಗಿ ಮಾರ್ಗ ಬದಲಾಯಿಸಬೇಕೆಂಬ ದಕ್ಷಿಣ ಕನ್ನಡದ ಪ್ರಯಾಣಿಕರ ಬೇಡಿಕೆಗೆ ಉತ್ತರ ಕನ್ನಡ ಮತ್ತು ಉಡುಪಿ ಭಾಗದ ರೈಲ್ವೇ ಬಳಕೆದಾರರು ಕಠಿಣ ವಿರೋಧ ವ್ಯಕ್ತಪಡಿಸಿದ್ದಾರೆ.

ಮಂಗಳೂರು ಸೆಂಟ್ರಲ್ ವರ್ಸಸ್ ಮಂಗಳೂರು ಜಂಕ್ಷನ್

ದಕ್ಷಿಣ ಕನ್ನಡದ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿರುವ ಅಭಿಯಾನಗಳಲ್ಲಿ, ಬೆಂಗಳೂರು-ಕಾರವಾರ-ಮಡಗಾಂವ್ ರೈಲು ಮಂಗಳೂರು ನಗರಕ್ಕೆ ಸಮರ್ಪಕವಾಗಿ ಸೇವೆ ಸಲ್ಲಿಸಬೇಕಾದರೆ ಮಂಗಳೂರು ಜಂಕ್ಷನ್‌ ಜೊತೆಗೆ ಮಂಗಳೂರು ಸೆಂಟ್ರಲ್ ನಿಲ್ದಾಣಕ್ಕೂ ಬರಬೇಕು ಎಂದು ಆಗ್ರಹಿಸಲಾಗುತ್ತಿದೆ. ಆದರೆ, ಸುರತ್ಕಲ್, ಉಡುಪಿ, ಕುಂದಾಪುರ ಮತ್ತು ಕಾರವಾರದ ರೈಲ್ವೆ ಗ್ರಾಹಕರ ಹಿತರಕ್ಷಣಾ ಸಮಿತಿಗಳು ಈ ಪ್ರಸ್ತಾಪವನ್ನು ಸಂಪೂರ್ಣವಾಗಿ ತಿರಸ್ಕರಿಸಿವೆ. ರೈಲನ್ನು ಮಂಗಳೂರು ಸೆಂಟ್ರಲ್‌ಗೆ ತೆಗೆದುಕೊಂಡು ಹೋಗಿ ಇಂಜಿನ್ ದಿಕ್ಕು ಬದಲಿಸಿ ಮರಳಿ ತರುವುದರಿಂದ ಉಡುಪಿ ಮತ್ತು ಉತ್ತರ ಕನ್ನಡ ಜಿಲ್ಲೆಗಳಿಗೆ ಪ್ರಯಾಣಿಸುವ ಸಾರ್ವಜನಿಕರಿಗೆ ಸುಮಾರು 2 ಗಂಟೆಗಳಷ್ಟು ಹೆಚ್ಚುವರಿ ಪ್ರಯಾಣದ ಸಮಯ ವ್ಯರ್ಥವಾಗುತ್ತದೆ ಎಂದು ಅವರು ವಾದಿಸಿದ್ದಾರೆ.

ಕರಾವಳಿ ಅಂದರೆ ಬರೀ ಮಂಗಳೂರಷ್ಟೇ ಅಲ್ಲ: ಉತ್ತರ ಕನ್ನಡ ಸಮಿತಿ ವಾದ

ಈ ಕುರಿತು ಪ್ರತಿಕ್ರಿಯಿಸಿರುವ ಉತ್ತರ ಕನ್ನಡ ರೈಲು ಸೇವಾ ಸಮಿತಿಯ ಪ್ರಮುಖರಾದ ರಾಜೀವ್ ಗಾಂವ್ಕರ್, ಕರಾವಳಿ ಕರ್ನಾಟಕ ಎಂದರೆ ಬರೀ ಮಂಗಳೂರು ನಗರವೊಂದೇ ಅಲ್ಲ. ಸುಮಾರು 300 ಕಿಲೋಮೀಟರ್ ಉದ್ದದ ಕರಾವಳಿ ತೀರದಲ್ಲಿ ಹಲವು ಪ್ರಮುಖ ಪಟ್ಟಣಗಳು, ಶಿಕ್ಷಣ ಸಂಸ್ಥೆಗಳು, ಕೈಗಾರಿಕಾ ವಲಯಗಳು ಹಾಗೂ ಪ್ರವಾಸಿ ತಾಣಗಳಿವೆ ಎಂದು ನೆನಪಿಸಿದ್ದಾರೆ.

ಬಂಟ್ವಾಳ, ಫರಂಗಿಪೇಟೆ, ಪಡೀಲ್, ಜೋಕಟ್ಟೆ ಮತ್ತು ಮಂಗಳೂರು ಉತ್ತರ ಭಾಗದ ಸುರತ್ಕಲ್ ನಿಲ್ದಾಣಗಳು ಈಗಾಗಲೇ ಮಂಗಳೂರು ಮಹಾನಗರಕ್ಕೆ ಅತ್ಯುತ್ತಮ ರೈಲು ಸಂಪರ್ಕ ಒದಗಿಸುತ್ತಿವೆ. ಪ್ರಯಾಣಿಕರು ಬಂಟ್ವಾಳ ಅಥವಾ ಮಂಗಳೂರು ಜಂಕ್ಷನ್‌ನಲ್ಲಿ ಇಳಿದು ಕೆಲವೇ ನಿಮಿಷಗಳಲ್ಲಿ ನಗರ ಪ್ರವೇಶಿಸಬಹುದು. ಹೀಗಿರುವಾಗ ರೈಲನ್ನು ಸೆಂಟ್ರಲ್ ನಿಲ್ದಾಣಕ್ಕೆ ತೆಗೆದುಕೊಂಡು ಹೋಗಿ ಪ್ರಯಾಣದ ಸಮಯವನ್ನು ಹದಗೆಡಿಸುವುದು ಸೂಕ್ತವಲ್ಲ ಎಂದು ಗಾಂವ್ಕರ್ ಅಭಿಪ್ರಾಯಪಟ್ಟಿದ್ದಾರೆ.

ವಿಸ್ತರಿತ ವಂದೇ ಭಾರತ್ ಸೇವೆ: ವೇಳಾಪಟ್ಟಿ ಮತ್ತು ಮಾರ್ಗ ವಿವರ

ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರು ಸೆಪ್ಟೆಂಬರ್ 29 ರಂದು ಘೋಷಿಸಿದಂತೆ, ಪ್ರಸ್ತುತ ಚಾಲ್ತಿಯಲ್ಲಿರುವ ಮಂಗಳೂರು ಸೆಂಟ್ರಲ್-ಮಡ್ಗಾಂವ್ ವಂದೇ ಭಾರತ್ ಸೇವೆಯನ್ನು ಮಂಗಳೂರು ಜಂಕ್ಷನ್ ಮೂಲಕ ಬೆಂಗಳೂರಿನ ಯಶವಂತಪುರಕ್ಕೆ ವಿಸ್ತರಿಸಲಾಗುತ್ತಿದೆ. ಈ ನೂತನ ಸೇವೆಯು ಯಶವಂತಪುರ-ಮಡ್ಗಾಂವ್-ಯಶವಂತಪುರ ವಂದೇ ಭಾರತ್ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ 26655/26656) ಎಂಬ ಹೆಸರಿನಲ್ಲಿ ಕಾರ್ಯಾಚರಣೆ ನಡೆಸಲಿದೆ.

ಪ್ರಸ್ತಾವಿತ ಸಂಭಾವ್ಯ ವೇಳಾಪಟ್ಟಿ:

ರೈಲು ಸಂಖ್ಯೆ 26655 (ಯಶವಂತಪುರ - ಮಡಗಾಂವ್): ಬೆಳಿಗ್ಗೆ 6:05 ಕ್ಕೆ ಯಶವಂತಪುರದಿಂದ ಹೊರಟು, ಸಂಜೆ 7:15 ಕ್ಕೆ ಮಡಗಾಂವ್ ತಲುಪಲಿದೆ.

ರೈಲು ಸಂಖ್ಯೆ 26656 (ಮಡಗಾಂವ್ - ಯಶವಂತಪುರ): ಬೆಳಿಗ್ಗೆ 5:30 ಕ್ಕೆ ಮಡಗಾಂವ್‌ನಿಂದ ಹೊರಟು, ಸಂಜೆ 6:40 ಕ್ಕೆ ಯಶವಂತಪುರ ತಲುಪಲಿದೆ.

ನಿಲ್ದಾಣಗಳ ಪಟ್ಟಿ:

ಯಶವಂತಪುರ, ಶ್ರವಣಬೆಳಗೊಳ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್, ಕಬಕ ಪುತ್ತೂರು, ಮಂಗಳೂರು ಜಂಕ್ಷನ್, ಉಡುಪಿ, ಕುಂದಾಪುರ, ಬೈಂದೂರು, ಮುರ್ಡೇಶ್ವರ, ಗೋಕರ್ಣ ರೋಡ್, ಕಾರವಾರ ಮತ್ತು ಮಡಗಾಂವ್ (ಗೋವಾ).

ಪ್ರಾಯೋಗಿಕ ಸಂಚಾರ ಯಶಸ್ವಿ: ಪ್ರಯಾಣಿಕರ ನಿರೀಕ್ಷೆಗಳೇನು?

ಸೆಪ್ಟೆಂಬರ್ 10 ರಂದು 16 ಕೋಚ್‌ಗಳ ವಂದೇ ಭಾರತ್ ರೈಲಿನೊಂದಿಗೆ ಯಶವಂತಪುರ ಮತ್ತು ಮಂಗಳೂರು ಜಂಕ್ಷನ್ ನಡುವೆ ಪ್ರಾಯೋಗಿಕ ಸಂಚಾರ (Trial Run) ನಡೆಸಲಾಗಿತ್ತು. ಈ ವೇಳೆ ಹೋಗುವಾಗ 7 ಗಂಟೆ 05 ನಿಮಿಷ ಹಾಗೂ ಹಿಂತಿರುಗುವಾಗ 6 ಗಂಟೆ 49 ನಿಮಿಷಗಳಲ್ಲಿ ಈ ಹಾದಿಯನ್ನು ಕ್ರಮಿಸಿತ್ತು.

ಸದ್ಯ ಪ್ರಸ್ತಾವಿತ ಒಟ್ಟು ಪ್ರಯಾಣದ ಅವಧಿ 13 ಗಂಟೆಗಳಾಗಿದ್ದು, ರೈಲ್ವೆ ಇಲಾಖೆಯು ತಾಂತ್ರಿಕ ಸುಧಾರಣೆಗಳ ಮೂಲಕ ಇದನ್ನು ಕನಿಷ್ಠ 11 ಗಂಟೆಗಳಿಗೆ ಇಳಿಸಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.

ಉದ್ಯಮಿಗಳು ಮತ್ತು ಸಂಘಟನೆಗಳ ಪ್ರಮುಖ ಬೇಡಿಕೆಗಳು:

ಮಂಗಳೂರಿನಿಂದ ಬೆಳಿಗ್ಗೆ ಬೇಗನೆ ಹೊರಟು, ರಾತ್ರಿ ಬೆಂಗಳೂರಿನಿಂದ ಹಿಂತಿರುಗುವ ವೇಳಾಪಟ್ಟಿ ನಿಗದಿಪಡಿಸಬೇಕು. ಮಂಗಳೂರಿನ ವರ್ತಕರು ಮತ್ತು ಸಾರ್ವಜನಿಕರು ಉದ್ಯೋಗ ಹಾಗೂ ಅಧಿಕೃತ ಕೆಲಸಗಳಿಗೆ ಬೆಂಗಳೂರಿಗೆ ತೆರಳಿ, ಮಧ್ಯಾಹ್ನದ ವೇಳೆಗೆ ಕೆಲಸ ಮುಗಿಸಿ ರಾತ್ರಿ ರೈಲಿನಲ್ಲಿ ಹಿಂತಿರುಗಲು ಅನುಕೂಲವಾಗುವಂತೆ ಬೆಳಗಿನ ಸಮಯ ಸೂಕ್ತ ಎಂದು ಕೆನರಾ ವಾಣಿಜ್ಯ ಮತ್ತು ಕೈಗಾರಿಕಾ ಮಂಡಳಿ (KCCI) ಅಧ್ಯಕ್ಷ ಪಿ.ಬಿ. ಅಹ್ಮದ್ ಮುದಸ್ಸರ್ ತಿಳಿಸಿದ್ದಾರೆ.

ಪಶ್ಚಿಮ ಕರಾವಳಿ ರೈಲ್ವೆ ಸಮಿತಿ ಅಭಿಪ್ರಾಯ: ಮಂಗಳೂರು ಸೆಂಟ್ರಲ್-ತಿರುವನಂತಪುರಂ ವಂದೇ ಭಾರತ್‌ ಮಾದರಿಯಲ್ಲೇ, ಈ ರೈಲು ಕೂಡ ಬೆಳಿಗ್ಗೆ 6:00 ಗಂಟೆಗೆ ಮಂಗಳೂರಿನಿಂದ ಹೊರಡುವಂತೆ ವೇಳಾಪಟ್ಟಿ ರೂಪಿಸಿದರೆ ಇತರೆ ರೈಲುಗಳ ಸಂಚಾರಕ್ಕೂ ಅಡಚಣೆಯಾಗುವುದಿಲ್ಲ ಎಂದು ಸಮಿತಿಯ ಅಧ್ಯಕ್ಷ ಜಿ. ಹನುಮಂತ ಕಾಮತ್ ಸಲಹೆ ನೀಡಿದ್ದಾರೆ.