Asianet Suvarna News

ಗೋವಾ ಯಾಕೆ? ನಮ್ಮ ಪಕ್ಕದಲ್ಲೇ ಇದೆ 'ಆಂಧ್ರದ ಗೋವಾ'! ಬೆಂಗಳೂರು, ಕೋಲಾರದವರಿಗೆ ಕಡಿಮೆ ಬಜೆಟ್‌ಗೆ ಬೀಚ್ ಟ್ರಿಪ್‌!

Sathish Kumar KH — Mon, 05 Oct 2026 14:39:49 +0530

ಆಂಧ್ರಪ್ರದೇಶದ ಚೀರಾಲ್ ಬೀಚ್ ಅನ್ನು 'ಆಂಧ್ರದ ಗೋವಾ' ಎಂದು ಕರೆಯಲಾಗುತ್ತದೆ. ಇಲ್ಲಿ ಕಡಿಮೆ ಜನದಟ್ಟಣೆ, ವಾಟರ್ ಸ್ಪೋರ್ಟ್ಸ್, ತಾಜಾ ಸೀ ಫುಡ್, ಸುಂದರ ರೆಸಾರ್ಟ್‌ಗಳಿದ್ದು, ವೀಕೆಂಡ್ ಟ್ರಿಪ್‌ಗೆ ಹೇಳಿಮಾಡಿಸಿದ ಜಾಗವಾಗಿದೆ. ಕರ್ನಾಟಕದವರಿಗೂ ಈ ತಾಣ ಕಡಿಮೆ ಬಜೆಟ್ ಪ್ರವಾಸಿಗರಿಗೆ ಬೆಸ್ಟ್ ಆಯ್ಕೆಯಾಗಿದೆ.

ವಿಶಾಲವಾದ ಸಮುದ್ರ ತೀರ, ಬಂಗಾರದ ಬಣ್ಣದ ಮರಳು, ಅಲೆಗಳ ಸದ್ದು, ತಣ್ಣನೆಯ ಗಾಳಿ.. ಇವೆಲ್ಲವನ್ನೂ ಎಂಜಾಯ್ ಮಾಡಲು ಪ್ರತಿ ಬಾರಿ ಗೋವಾಗೇ ಹೋಗಬೇಕಿಲ್ಲ. ಆಂಧ್ರಪ್ರದೇಶದ ಬಾಪಟ್ಲ ಜಿಲ್ಲೆಯಲ್ಲಿರುವ ಚೀರಾಲ್ ಕರಾವಳಿ (ವಾಡರೇವು, ರಾಮಪುರಂ) ಪ್ರಕೃತಿ ಸೌಂದರ್ಯಕ್ಕೆ ಹೆಸರುವಾಸಿಯಾಗಿದೆ. ಗೋವಾದಷ್ಟೇ ಸುಂದರವಾದ ಹಾಗೂ ಪ್ರಶಾಂತವಾದ ವಾತಾವರಣ ಇರುವುದರಿಂದ ಪ್ರವಾಸಿಗರು ಇದನ್ನು ಪ್ರೀತಿಯಿಂದ 'ಆಂಧ್ರದ ಗೋವಾ' ಎಂದು ಕರೆಯುತ್ತಾರೆ. ಸಿಟಿ ಲೈಫ್‌ನ ಜಂಜಾಟದಿಂದ ರಿಲ್ಯಾಕ್ಸ್ ಆಗಲು ಫ್ಯಾಮಿಲಿ ಹಾಗೂ ಫ್ರೆಂಡ್ಸ್ ಜೊತೆ ವೀಕೆಂಡ್ ಟ್ರಿಪ್ ಹೋಗಲು ಇದು ಬೆಸ್ಟ್ ಜಾಗ.

ಗೋವಾ ಅಥವಾ ಬೇರೆ ಫೇಮಸ್ ಬೀಚ್‌ಗಳಿಗೆ ಹೋಲಿಸಿದರೆ ಚೀರಾಲ್ ಬೀಚ್‌ನಲ್ಲಿ ಜನದಟ್ಟಣೆ ಕಡಿಮೆ. ಇಲ್ಲಿನ ಮೃದುವಾದ, ಬಂಗಾರದ ಬಣ್ಣದ ಮರಳು ಪ್ರವಾಸಿಗರನ್ನು ಸಖತ್ ಅಟ್ರಾಕ್ಟ್ ಮಾಡುತ್ತದೆ. ಬೆಳಗಿನ ಸೂರ್ಯೋದಯ ಹಾಗೂ ಸಂಜೆಯ ಸೂರ್ಯಾಸ್ತದ ಸಮಯದಲ್ಲಿ ಆಕಾಶ ಕಿತ್ತಳೆ ಮತ್ತು ಗುಲಾಬಿ ಬಣ್ಣಕ್ಕೆ ತಿರುಗುವ ದೃಶ್ಯ ಫೋಟೋಗ್ರಫಿಗೆ ಹೇಳಿಮಾಡಿಸಿದಂತಿದೆ. ಸಮುದ್ರದ ತೀರದಲ್ಲಿ ನಿಂತು ಅಲೆಗಳ ಸದ್ದು ಕೇಳುತ್ತಾ ವಾಕ್ ಮಾಡಿದರೆ ಮನಸ್ಸಿಗೆ ಸಿಕ್ಕಾಪಟ್ಟೆ ರಿಲ್ಯಾಕ್ಸ್ ಸಿಗುತ್ತದೆ.

ಸಮುದ್ರ ತೀರದಲ್ಲಿ ಸುಮ್ಮನೆ ವಾಕ್ ಮಾಡುವುದರ ಜೊತೆಗೆ, ಸ್ವಲ್ಪ ಅಡ್ವೆಂಚರ್ ಇಷ್ಟಪಡುವವರಿಗಾಗಿ ಇಲ್ಲಿ ಹಲವು ವಾಟರ್ ಸ್ಪೋರ್ಟ್ಸ್ ಇವೆ. ಎಟಿವಿ ರೈಡ್, ಜೆಟ್ ಸ್ಕೀ, ಸ್ಪೀಡ್ ಬೋಟಿಂಗ್, ಬನಾನಾ ಬೋಟ್ ರೈಡ್ ಹಾಗೂ ಬೀಚ್ ವಾಲಿಬಾಲ್ ಇಲ್ಲಿನ ಪ್ರಮುಖ ಆಕರ್ಷಣೆಗಳು. ಇವುಗಳ ಬೆಲೆ 500 ರಿಂದ 800 ರೂಪಾಯಿಗಳವರೆಗೆ ಇರುತ್ತದೆ. ಪ್ಯಾರಾಮೋಟರಿಂಗ್ ಮೂಲಕ ಚೀರಾಲ್ ಬೀಚ್ ಅನ್ನು ಮೇಲಿನಿಂದ ನೋಡುವ ಅವಕಾಶವೂ ಇದೆ. ಬೆಳಿಗ್ಗೆ ಮತ್ತು ಸಂಜೆ ಕುದುರೆ ಸವಾರಿ ಹಾಗೂ ಒಂಟೆ ಸವಾರಿ ಮಾಡುತ್ತಾ ಎಂಜಾಯ್ ಮಾಡಬಹುದು.

ಪ್ರವಾಸಿಗರು ಉಳಿದುಕೊಳ್ಳಲು ಬೀಚ್ ಉದ್ದಕ್ಕೂ ಗೋವಾ ಸ್ಟೈಲ್‌ನ ಸುಂದರವಾದ ಪ್ರೈವೇಟ್ ರೆಸಾರ್ಟ್‌ಗಳು ಹಾಗೂ ಕಾಟೇಜ್‌ಗಳಿವೆ. "ಗೋಲ್ಡನ್ ಸ್ಯಾಂಡ್ಸ್ - ದಿ ಬೇ ರೆಸಾರ್ಟ್" ನಂತಹ ಬಜೆಟ್ ಹೋಟೆಲ್‌ಗಳಿಂದ ಹಿಡಿದು ಪ್ರೀಮಿಯಂ ಬೀಚ್ ರೆಸಾರ್ಟ್‌ಗಳವರೆಗೆ ಹಲವು ಆಯ್ಕೆಗಳಿವೆ. ರಾತ್ರಿ ಹೊತ್ತು ಸಮುದ್ರದ ಗಾಳಿ ಸವಿಯುತ್ತಾ ಓಪನ್ ಟಾಪ್ ಕ್ಯಾಂಪ್‌ಫೈರ್, ಮ್ಯೂಸಿಕ್ ನೈಟ್ಸ್ ಹಾಗೂ ಬೀಚ್ ಸೈಡ್ ಡಿನ್ನರ್ ಮೂಲಕ ಗೋವಾದ ನೈಟ್ ಲೈಫ್ ಫೀಲ್ ಅನ್ನು ಇಲ್ಲಿ ಎಂಜಾಯ್ ಮಾಡಬಹುದು.

ಕರಾವಳಿ ಪ್ರದೇಶವಾಗಿರುವುದರಿಂದ ಚೀರಾಲ್ ಬೀಚ್ ಸುತ್ತಮುತ್ತ ಸಿಗುವ ಫ್ರೆಶ್ ಸೀ ಫುಡ್ ಊಟದ ಪ್ರಿಯರನ್ನು ಸಖತ್ ಸೆಳೆಯುತ್ತದೆ. ಮೀನುಗಾರರು ಪ್ರತಿದಿನ ಹಿಡಿದು ತರುವ ತಾಜಾ ಮೀನು, ಸೀಗಡಿ ಹಾಗೂ ಏಡಿಗಳಿಗೆ ಆಂಧ್ರದ ಮಸಾಲೆ ಬೆರೆಸಿ ಮಾಡುವ ಅಡುಗೆಗಳು ಬೀಚ್ ಶ್ಯಾಕ್ ಹಾಗೂ ರೆಸಾರ್ಟ್‌ಗಳಲ್ಲಿ ಸಿಗುತ್ತವೆ. ಅದರಲ್ಲೂ ಫಿಶ್ ಫ್ರೈ, ಪ್ರಾನ್ಸ್ ಫ್ರೈ ಹಾಗೂ ಸ್ಪೈಸಿ ಏಡಿ ಕರಿ ಇಲ್ಲಿನ ಸ್ಪೆಷಲ್.

ರಾಮಪುರಂ ಬೀಚ್ ಹಾಗೂ ಕೈಮಗ್ಗದ ಶಾಪಿಂಗ್

ಚೀರಾಲ್ ಹತ್ತಿರವಿರುವ ವಾಡರೇವು ಬೀಚ್‌ನಲ್ಲಿ ಮೀನುಗಾರರ ಜೀವನಶೈಲಿ ಹಾಗೂ ಬೆಳಗಿನ ಜಾವ ನಡೆಯುವ ಮೀನು ಹರಾಜು ಪ್ರಕ್ರಿಯೆಯನ್ನು ಕಣ್ಣಾರೆ ನೋಡಬಹುದು. ರಾಮಪುರಂ ಬೀಚ್ ತೆಂಗಿನ ಮರಗಳ ಸಾಲು ಹಾಗೂ ಪ್ರಶಾಂತ ವಾತಾವರಣದಿಂದಾಗಿ ರಿಲ್ಯಾಕ್ಸ್ ಆಗಲು ಬೆಸ್ಟ್ ಜಾಗ. ಹಾಗೆಯೇ 'ಮಿನಿ ಬಾಂಬೆ' ಎಂದೇ ಫೇಮಸ್ ಆಗಿರುವ ಚೀರಾಲ್ ಟೌನ್‌ನಲ್ಲಿ ಜಗತ್ಪ್ರಸಿದ್ಧ ರೇಷ್ಮೆ, ಕಾಟನ್ ಸೀರೆಗಳು ಹಾಗೂ ಕೈಮಗ್ಗದ ಬಟ್ಟೆಗಳನ್ನು ಕಡಿಮೆ ಬೆಲೆಗೆ ಶಾಪಿಂಗ್ ಮಾಡಬಹುದು.

ಬೆಂಗಳೂರಿನಿಂದ: ಸುಮಾರು 450-500 ಕಿ.ಮೀ ದೂರದಲ್ಲಿದೆ. ರೈಲು ಮಾರ್ಗದಲ್ಲಿ ಬೆಂಗಳೂರಿನಿಂದ ಚಿರಾಲಕ್ಕೆ ನೇರ ಸಂಪರ್ಕವಿದ್ದು, ರಾತ್ರಿಯ ಪ್ರಯಾಣದ ಬಳಿಕ ಮರುದಿನ ಬೆಳಿಗ್ಗೆ ಚಿರಾಲ ತಲುಪಬಹುದು. ರಸ್ತೆ ಮಾರ್ಗವಾಗಿ ತೆರಳುವವರು ಗುಂಟೂರು-ವಿಜಯವಾಡ ಮಾರ್ಗವಾಗಿ 9-10 ಗಂಟೆಗಳಲ್ಲಿ ತಲುಪಬಹುದು.

ಬಳ್ಳಾರಿಯಿಂದ: ಸುಮಾರು 400-450 ಕಿ.ಮೀ ದೂರವಿದೆ. ಬಳ್ಳಾರಿಯಿಂದ ರಾಯಚೂರು-ಗುಂಟೂರು ಮಾರ್ಗವಾಗಿ ತೆರಳುವುದು ಸುಲಭ. ಸ್ವಂತ ವಾಹನದಲ್ಲಿ ತೆರಳಲು ಇದು ಅತ್ಯುತ್ತಮ ಮಾರ್ಗ.

ಕೋಲಾರದಿಂದ: ಸುಮಾರು 420 ಕಿ.ಮೀ ದೂರವಿದ್ದು, ಚಿತ್ತೂರು-ನೆಲ್ಲೂರು ಮಾರ್ಗವಾಗಿ ತೆರಳಿದರೆ ಹಿತಕರವಾದ ಪ್ರಯಾಣ ಮಾಡಬಹುದು.

ಅಕ್ಟೋಬರ್‌ನಿಂದ ಮಾರ್ಚ್ ತಿಂಗಳವರೆಗೆ ಇಲ್ಲಿನ ವಾತಾವರಣ ತುಂಬಾ ಆಹ್ಲಾದಕರವಾಗಿರುತ್ತದೆ. ಹಾಗಾಗಿ ಈ ಸಮಯದಲ್ಲಿ ಭೇಟಿ ನೀಡುವುದು ಬೆಸ್ಟ್. ಹೈದರಾಬಾದ್, ವಿಜಯವಾಡ ಹಾಗೂ ಗುಂಟೂರಿನಿಂದ ಸುಲಭವಾಗಿ ತಲುಪಬಹುದಾದ ಈ 'ಆಂಧ್ರದ ಗೋವಾ', ಕಡಿಮೆ ಬಜೆಟ್‌ನಲ್ಲಿ ಫ್ಯಾಮಿಲಿ ಜೊತೆ ಟ್ರಿಪ್ ಹೋಗಲು ಒಂದು ಪರ್ಫೆಕ್ಟ್ ಆಪ್ಷನ್.

ಬೆಂಗಳೂರು ಪಾಸ್‌ಪೋರ್ಟ್ ಅರ್ಜಿದಾರರೇ ಗಮನಿಸಿ: ಮಾರತಹಳ್ಳಿ ಪಾಸ್‌ಪೋರ್ಟ್ ಸೇವಾ ಕೇಂದ್ರ ವೈಟ್‌ಫೀಲ್ಡ್‌ಗೆ ಶಿಫ್ಟ್‌

Santosh Naik — Tue, 06 Oct 2026 17:28:22 +0530

ಬೆಂಗಳೂರು (ಅ.6): ಬೆಂಗಳೂರಿನ ಮಾರತಹಳ್ಳಿ ಹೊರವರ್ತುಲ ರಸ್ತೆಯ ದೇವರಬೀಸನಹಳ್ಳಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಜನಪ್ರಿಯ 'ಪಾಸ್‌ಪೋರ್ಟ್ ಸೇವಾ ಕೇಂದ್ರ' (PSK) ಈಗ ತನ್ನ ಸ್ಥಳವನ್ನು ಬದಲಾಯಿಸಿದೆ. ಅಕ್ಟೋಬರ್ 5 ರಿಂದ ಜಾರಿಗೆ ಬರುವಂತೆ ಈ ಕೇಂದ್ರವನ್ನು ವೈಟ್‌ಫೀಲ್ಡ್‌ನ ಹೊಸ ಕಟ್ಟಡಕ್ಕೆ ಸ್ಥಳಾಂತರಿಸಲಾಗಿದೆ ಎಂದು ಪ್ರಾದೇಶಿಕ ಪಾಸ್‌ಪೋರ್ಟ್ ಕಚೇರಿ (RPO) ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ. ಅಕ್ಟೋಬರ್ 5 ಅಥವಾ ಅದಕ್ಕೂ ನಂತರ ಮಾರತಹಳ್ಳಿ ಕೇಂದ್ರದಲ್ಲಿ ಅಪಾಯಿಂಟ್‌ಮೆಂಟ್ ಕಾಯ್ದಿರಿಸಿದ್ದ ಅರ್ಜಿದಾರರು ಇನ್ಮುಂದೆ ಹಳೆಯ ಕಚೇರಿಗೆ ತೆರಳಬಾರದು. ಬದಲಾಗಿ ತಮ್ಮ ಅರ್ಜಿ ರಶೀದಿಯಲ್ಲಿ ನಮೂದಿಸಲಾದ ಅದೇ ದಿನಾಂಕ ಹಾಗೂ ಸಮಯಕ್ಕೆ ವೈಟ್‌ಫೀಲ್ಡ್‌ನ ನೂತನ ಕೇಂದ್ರಕ್ಕೆ ಹಾಜರಾಗಬೇಕೆಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.

ವೈಟ್‌ಫೀಲ್ಡ್‌ನಲ್ಲಿರುವ ಹೊಸ ಕೇಂದ್ರದ ಪೂರ್ಣ ವಿಳಾಸ

ಹೊಸ ವಿಳಾಸ: ಪಾಸ್‌ಪೋರ್ಟ್ ಸೇವಾ ಕೇಂದ್ರ (PSK),ಜಿಎಂ ಟೆಕ್ ಪಾರ್ಕ್, ನಂ. 116 (ಅಥವಾ 1116), ರಸ್ತೆ ಸಂಖ್ಯೆ 3,ನಲ್ಲೂರುಹಳ್ಳಿ ಮೆಟ್ರೋ ನಿಲ್ದಾಣದ ಹತ್ತಿರ, ಇಪಿಐಪಿ ಝೋನ್ (EPIP Zone),ವೈಟ್‌ಫೀಲ್ಡ್, ಬೆಂಗಳೂರು – 560066.

ಈ ಹಿಂದೆ ಈ ಕೇಂದ್ರವು ಸಾಯಿ ಆರ್ಕೇಡ್, ಸರ್ವೆ ನಂ. 56/ಪಿ, ದೇವರಬೀಸನಹಳ್ಳಿ, ಮಾರತಹಳ್ಳಿ ಔಟರ್ ರಿಂಗ್ ರಸ್ತೆ, ಬೆಂಗಳೂರು - 560103 ವಿಳಾಸದಲ್ಲಿ ಕಾರ್ಯನಿರ್ವಹಿಸುತ್ತಿತ್ತು.ಆನ್‌ಲೈನ್ ಪೋರ್ಟಲ್‌ನಲ್ಲಿ ಹೊಸ ವಿಳಾಸವನ್ನು ಈಗಾಗಲೇ ನವೀಕರಿಸಲಾಗಿದ್ದು, ಅಕ್ಟೋಬರ್ 5 ರಿಂದ ವೈಟ್‌ಫೀಲ್ಡ್ ಕೇಂದ್ರದಲ್ಲೇ ಎಲ್ಲಾ ಕೆಲಸಗಳು ಅಧಿಕೃತವಾಗಿ ಆರಂಭಗೊಂಡಿವೆ.

ನಲ್ಲೂರುಹಳ್ಳಿ ಮೆಟ್ರೋ ನಿಲ್ದಾಣವೇ ಪ್ರಮುಖ ಲ್ಯಾಂಡ್‌ಮಾರ್ಕ್

ಸಾರ್ವಜನಿಕ ಸಾರಿಗೆಯನ್ನು ಬಳಸುವ ಅರ್ಜಿದಾರರಿಗೆ 'ನಲ್ಲೂರುಹಳ್ಳಿ ಮೆಟ್ರೋ ನಿಲ್ದಾಣ' (Nallurhalli Metro Station) ಪ್ರಮುಖ ಲ್ಯಾಂಡ್‌ಮಾರ್ಕ್‌. ನಮ್ಮ ಮೆಟ್ರೋದ ನೇರಳೆ ಮಾರ್ಗದಲ್ಲಿ ಈ ನಿಲ್ದಾಣ ಬರುತ್ತದೆ. ನಮ್ಮ ಮೆಟ್ರೋ (BMRCL) ಮಾಹಿತಿಯಂತೆ, ನಲ್ಲೂರುಹಳ್ಳಿ ಮೆಟ್ರೋ ನಿಲ್ದಾಣದಲ್ಲಿ ದ್ವಿಚಕ್ರ ವಾಹನ ಹಾಗೂ ಸೈಕಲ್‌ಗಳಿಗೆ ಸೂಕ್ತ ಪಾರ್ಕಿಂಗ್ ಸೌಲಭ್ಯವೂ ಇದೆ. ಮೆಟ್ರೋದಲ್ಲಿ ಪ್ರಯಾಣಿಸುವವರು ಈ ನಿಲ್ದಾಣದಲ್ಲಿ ಇಳಿದು, ಅಲ್ಲಿಂದ ಇಪಿಐಪಿ ಝೋನ್‌ನಲ್ಲಿರುವ ಜಿಎಂ ಟೆಕ್ ಪಾರ್ಕ್‌ಗೆ ತೆರಳಬಹುದು.

ಹಳೆಯ ಅಪಾಯಿಂಟ್‌ಮೆಂಟ್ ರದ್ದುಗೊಳಿಸುವ ಅಗತ್ಯವಿಲ್ಲ

ಅಕ್ಟೋಬರ್ 5 ಅಥವಾ ನಂತರದ ದಿನಾಂಕಗಳಿಗೆ ಹಳೆಯ ಮಾರತಹಳ್ಳಿ ವಿಳಾಸದ ಹೆಸರಿನಲ್ಲಿ ಅಪಾಯಿಂಟ್‌‌ಮೆಂಟ್ ಪಡೆದಿರುವ ಅರ್ಜಿದಾರರು, ತಮ್ಮ ಸ್ಲಾಟ್‌ಗಳನ್ನು ರದ್ದುಗೊಳಿಸಿ ಮರು-ಬುಕಿಂಗ್ (Rebook) ಮಾಡುವ ಅಗತ್ಯವಿಲ್ಲ. ಅರ್ಜಿ ರಶೀದಿಯಲ್ಲಿರುವ ದಿನಾಂಕ ಮತ್ತು ಸಮಯವೇ ಸಿಂಧುವಾಗಿರುತ್ತದೆ. ಆದರೆ ಅರ್ಜಿದಾರರು ಗೊಂದಲಕ್ಕೊಳಗಾಗಿ ಹಳೆಯ ದೇವರಬೀಸನಹಳ್ಳಿಯ ಸಾಯಿ ಆರ್ಕೇಡ್ ಕಚೇರಿಗೆ ತೆರಳಿದರೆ ಅಪಾಯಿಂಟ್‌‌ಮೆಂಟ್ ಸಮಯ ಮಿಸ್ ಆಗುವ ಅಪಾಯವಿರುತ್ತದೆ, ಆದ್ದರಿಂದ ವಿಳಾಸದ ಬಗ್ಗೆ ಹೆಚ್ಚಿನ ಗಮನ ಹರಿಸಬೇಕಿದೆ.

ಪಾಸ್‌ಪೋರ್ಟ್ ಸೇವಾ ಕೇಂದ್ರದಲ್ಲಿ ಲಭ್ಯವಿರುವ ಸೇವೆಗಳು

ಸ್ಥಳ ಬದಲಾಗಿದೆಯೇ ಹೊರತು ಕೇಂದ್ರದಲ್ಲಿ ನೀಡಲಾಗುವ ಸೇವೆಗಳಲ್ಲಿ ಯಾವುದೇ ವ್ಯತ್ಯಾಸವಿರುವುದಿಲ್ಲ. ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ (MEA) ನಿಯಮಾವಳಿಗಳಂತೆ ಪಿಎಸ್‌ಕೆಗಳಲ್ಲಿ ಈ ಕೆಳಗಿನ ಸೇವೆಗಳು ಲಭ್ಯವಿರಲಿವೆ.

ಹೊಸ ಪಾಸ್‌ಪೋರ್ಟ್ ಹಾಗೂ ನವೀಕರಣ: ಹೊಸ ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಕೆ ಹಾಗೂ ಅವಧಿ ಮುಗಿದ ಪಾಸ್‌‌ಪೋರ್ಟ್‌ಗಳ ಮರು-ಚಾಲನೆ (Re-issue).

ಪೊಲೀಸ್ ಕ್ಲಿಯರೆನ್ಸ್ ಸರ್ಟಿಫಿಕೇಟ್ (PCC): ಪೋರ್ಟಲ್ ಮೂಲಕ ಪಿಸಿಆರ್‌‌ಗೆ ಅರ್ಜಿ ಸಲ್ಲಿಸಿದವರಿಗೂ ಸೇವೆಯ ಲಭ್ಯತೆ.

ಫೋಟೋ ಹಾಗೂ ಬಯೋಮೆಟ್ರಿಕ್ ಸಂಗ್ರಹ: ಅರ್ಜಿದಾರರು ಸ್ವತಃ ಅಗತ್ಯ ಮೂಲ ದಾಖಲೆಗಳು ಹಾಗೂ ಜೆರಾಕ್ಸ್ ಪ್ರತಿಗಳೊಂದಿಗೆ ಕೇಂದ್ರಕ್ಕೆ ಹಾಜರಾಗಬೇಕು. ಕೇಂದ್ರದಲ್ಲೇ ನೇರವಾಗಿ ಫೋಟೋ ಹಾಗೂ ಬೆರಳಚ್ಚು (Biometrics) ಪಡೆಯಲಾಗುತ್ತದೆ. (ಅರ್ಜಿದಾರರು ಪ್ರತ್ಯೇಕ ಫೋಟೋ ತರುವ ಅಗತ್ಯವಿಲ್ಲ, ಆದರೆ ಕೆಲವು ಅಪ್ರಾಪ್ತ ಬಾಲಕರ/ಮಕ್ಕಳ ಅರ್ಜಿಗಳಿಗೆ ಪ್ರತ್ಯೇಕ ನಿಯಮಗಳು ಅನ್ವಯಿಸುತ್ತವೆ).

ದಾಖಲೆಗಳ ಪರಿಶೀಲನೆ: ಮೂಲ ದಾಖಲೆಗಳ ಪರಿಶೀಲನೆ ಹಾಗೂ ಅರ್ಜಿ ಪ್ರಕ್ರಿಯೆಯ ಸ್ಥಳದಲ್ಲೇ ಪರಿಶೀಲನೆ.

ಆನ್‌ಲೈನ್ ಅಪಾಯಿಂಟ್‌ಮೆಂಟ್ ಕಡ್ಡಾಯ

ಯಾವುದೇ ಅರ್ಜಿದಾರರು ನೇರವಾಗಿ (Walk-in) ಕೇಂದ್ರಕ್ಕೆ ತೆರಳಿ ಸೇವೆ ಪಡೆಯಲು ಅವಕಾಶವಿಲ್ಲ. ಸಾರ್ವಜನಿಕರ ದಟ್ಟಣೆ ನಿಯಂತ್ರಿಸಲು ಅಪಾಯಿಂಟ್‌ಮೆಂಟ್ ಕಡ್ಡಾಯಗೊಳಿಸಲಾಗಿದೆ. ಅರ್ಜಿದಾರರು ಮೊದಲು ಆನ್‌ಲೈನ್ ಪೋರ್ಟಲ್‌ನಲ್ಲಿ ಅರ್ಜಿ ಸಲ್ಲಿಸಿ, ನಿಗದಿತ ಶುಲ್ಕ ಪಾವತಿಸಬೇಕು.ತದನಂತರ ತಮಗೆ ಅನುಕೂಲಕರವಾದ ದಿನಾಂಕದಂದು ಪಿಎಸ್‌ಕೆ ಸ್ಲಾಟ್ ಕಾಯ್ದಿರಿಸಬೇಕು. ಆ ಬಳಿಕ ನಿಗದಿತ ದಿನದಂದು ದಾಖಲೆಗಳೊಂದಿಗೆ ಕಚೇರಿಗೆ ಹಾಜರಾಗಬೇಕು.

ಬೆಂಗಳೂರು ಪ್ರಾದೇಶಿಕ ಪಾಸ್‌ಪೋರ್ಟ್ ಕಚೇರಿಯು (RPO Bengaluru) ರಾಜಧಾನಿ ಸೇರಿದಂತೆ ಕರ್ನಾಟಕದ ಹಲವು ಜಿಲ್ಲೆಗಳ ವ್ಯಾಪ್ತಿಯನ್ನು ಹೊಂದಿದೆ. ಅಪಾಯಿಂಟ್‌ಮೆಂಟ್, ಅರ್ಜಿ ಸ್ಥಿತಿ ಹಾಗೂ ಸೇವೆಗಳ ಕುರಿತು ಹೆಚ್ಚಿನ ಮಾಹಿತಿ ಅಥವಾ ಸ್ಪಷ್ಟೀಕರಣಕ್ಕಾಗಿ ಅರ್ಜಿದಾರರು ರಾಷ್ಟ್ರೀಯ ಕಾಲ್ ಸೆಂಟರ್ ಸಂಖ್ಯೆ 1800-258-1800 ಅನ್ನು ಸಂಪರ್ಕಿಸಬಹುದು ಅಥವಾ ಅಧಿಕೃತ ಪೋರ್ಟಲ್‌ಗೆ ಭೇಟಿ ನೀಡಬಹುದು. ನಿಮ್ಮ ರಶೀದಿಯಲ್ಲಿ ಹಳೆಯ ವಿಳಾಸವೇ ಮುದ್ರಿತವಾಗಿದ್ದರೂ, ಅಕ್ಟೋಬರ್ 5 ರ ನಂತರದ ಅಪಾಯಿಂಟ್‌ಮೆಂಟ್ ಹೊಂದಿರುವವರು ನೇರವಾಗಿ ವೈಟ್‌ಫೀಲ್ಡ್‌ನ ಜಿಎಂ ಟೆಕ್ ಪಾರ್ಕ್ ಕೇಂದ್ರಕ್ಕೇ ತೆರಳಬೇಕೆಂದು ರಾಯಭಾರ ಕಚೇರಿ ಪ್ರಕಟಣೆಯಲ್ಲಿ ಸ್ಪಷ್ಟಪಡಿಸಿದೆ.

ಟಿಪ್ಪು ನಿರ್ಮಿಸಿದ ಮಂಜರಾಬಾದ್ ಕೋಟೆ: ನಕ್ಷತ್ರಾಕೃತಿಯಲ್ಲಿ ಕಂಗೊಳಿಸುವ ಇತಿಹಾಸದ ಹೆಮ್ಮೆಯ ತಾಣ

Govindaraj S — Fri, 09 Oct 2026 21:10:00 +0530

ಪಶ್ಚಿಮ ಘಟ್ಟಗಳ ಹಸಿರು ಸಿರಿಯಲ್ಲಿ, ಮಂಜಿನ ಮುಸುಕಿನ ನಡುವೆ ಗಾಂಭೀರ್ಯದಿಂದ ತಲೆ ಎತ್ತಿ ನಿಂತಿರುವ ಮಂಜರಾಬಾದ್ ಕೋಟೆ ಕರ್ನಾಟಕದ ಐತಿಹಾಸಿಕ ಸ್ಮಾರಕಗಳಲ್ಲಿ ವಿಶಿಷ್ಟ ಸ್ಥಾನ ಪಡೆದಿದೆ. ಹಾಸನ ಜಿಲ್ಲೆಯ ಸಕಲೇಶಪುರ ಸಮೀಪದಲ್ಲಿರುವ ಈ ಕೋಟೆ ತನ್ನ ಅಪರೂಪದ ನಕ್ಷತ್ರಾಕಾರದ ವಿನ್ಯಾಸ, ವಾಸ್ತುಶಿಲ್ಪದ ವೈಶಿಷ್ಟ್ಯ ಮತ್ತು ಐತಿಹಾಸಿಕ ಮಹತ್ವದಿಂದ ಪ್ರವಾಸಿಗರನ್ನು ಆಕರ್ಷಿಸುತ್ತದೆ.

ಮೈಸೂರು ಸಂಸ್ಥಾನದ ಪ್ರಸಿದ್ಧ ದೊರೆ ಟಿಪ್ಪು ಸುಲ್ತಾನ್ ಆಳ್ವಿಕೆಯ ಅವಧಿಯಲ್ಲಿ, ಅಂದರೆ 1792ರಲ್ಲಿ ಈ ಕೋಟೆಯನ್ನು ನಿರ್ಮಿಸಲಾಯಿತು. ಬ್ರಿಟಿಷರ ಸೈನಿಕ ಚಟುವಟಿಕೆಗಳನ್ನು ಎದುರಿಸುವುದು ಹಾಗೂ ಮಲೆನಾಡಿನ ಆಯಕಟ್ಟಿನ ಪ್ರದೇಶದ ಮೇಲೆ ನಿಯಂತ್ರಣ ಸಾಧಿಸುವುದು ಕೋಟೆ ನಿರ್ಮಾಣದ ಪ್ರಮುಖ ಉದ್ದೇಶಗಳಾಗಿದ್ದವು. ಫ್ರೆಂಚ್ ವಾಸ್ತುಶಿಲ್ಪದ ಪ್ರಭಾವ ಹೊಂದಿದ್ದ ಈ ಕೋಟೆಯ ವಿನ್ಯಾಸವು ಅಂದಿನ ಸೈನಿಕ ತಂತ್ರಜ್ಞಾನ ಮತ್ತು ರಕ್ಷಣಾ ವ್ಯವಸ್ಥೆಯ ದ್ಯೋತಕವಾಗಿದೆ.

ಸಮುದ್ರಮಟ್ಟದಿಂದ ಸುಮಾರು 3,240 ಅಡಿ ಎತ್ತರದಲ್ಲಿರುವ ಈ ಕೋಟೆ, ಎಂಟು ಮೊನೆಗಳ ನಕ್ಷತ್ರವನ್ನು ಹೋಲುವ ವಿನ್ಯಾಸ ಹೊಂದಿದೆ. ಕೋಟೆಯ ಸುತ್ತಲೂ ನಿರ್ಮಿಸಿರುವ ಬಲಿಷ್ಠ ಗೋಡೆಗಳು, ರಕ್ಷಣಾ ಕಂದಕಗಳು ಹಾಗೂ ಆಯಕಟ್ಟಿನ ಪ್ರವೇಶ ಮಾರ್ಗಗಳು ಇದರ ಸೈನಿಕ ಮಹತ್ವವನ್ನು ಸಾರುತ್ತವೆ. ಮೇಲಿನಿಂದ ನೋಡಿದಾಗ ಕೋಟೆಯ ನಕ್ಷತ್ರಾಕಾರದ ವಿನ್ಯಾಸ ಸ್ಪಷ್ಟವಾಗಿ ಗೋಚರಿಸುತ್ತದೆ. ಈ ಅಪರೂಪದ ರಚನೆಯು ಮಂಜರಾಬಾದ್ ಕೋಟೆಯನ್ನು ಭಾರತದ ಗಮನಾರ್ಹ ಐತಿಹಾಸಿಕ ಕೋಟೆಗಳ ಸಾಲಿನಲ್ಲಿ ಗುರುತಿಸುವಂತೆ ಮಾಡಿದೆ.

ಮನಮೋಹಕ ಅನುಭವ

ಸಕಲೇಶಪುರದಿಂದ ಸುಮಾರು 6 ಕಿ.ಮೀ. ದೂರದಲ್ಲಿರುವ ಈ ಕೋಟೆಯನ್ನು ರಸ್ತೆ ಮೂಲಕ ತಲುಪಬಹುದು. ಮಳೆಗಾಲದಲ್ಲಿ ಸುತ್ತಮುತ್ತಲಿನ ಬೆಟ್ಟಗಳು ಹಸಿರಿನಿಂದ ಕಂಗೊಳಿಸಿದರೆ, ಚಳಿಗಾಲದಲ್ಲಿ ಮಂಜಿನ ಹೊದಿಕೆ ಪ್ರವಾಸಿಗರಿಗೆ ಮನಮೋಹಕ ಅನುಭವ ನೀಡುತ್ತದೆ. ಕೋಟೆಯ ಮೇಲ್ಭಾಗದಿಂದ ಪಶ್ಚಿಮ ಘಟ್ಟಗಳ ಸುಂದರ ದೃಶ್ಯಗಳನ್ನು ಕಣ್ತುಂಬಿಕೊಳ್ಳಬಹುದು.

ಇತಿಹಾಸ, ವಾಸ್ತುಶಿಲ್ಪ ಮತ್ತು ಪ್ರಕೃತಿಯ ಸೊಬಗು ಒಂದೇ ಕಡೆ ಸಂಗಮಿಸಿರುವ ಮಂಜರಾಬಾದ್ ಕೋಟೆ, ಕರ್ನಾಟಕದ ಸಾಂಸ್ಕೃತಿಕ ಪರಂಪರೆಯ ಅಮೂಲ್ಯ ಕೊಡುಗೆಯಾಗಿದೆ. ಭವಿಷ್ಯದ ಪೀಳಿಗೆಗಾಗಿ ಇಂತಹ ಐತಿಹಾಸಿಕ ಸ್ಮಾರಕಗಳನ್ನು ಸಂರಕ್ಷಿಸುವುದು ನಮ್ಮೆಲ್ಲರ ಜವಾಬ್ದಾರಿಯಾಗಿದೆ.

ಕೆಂಪು ಸೀರೆಯುಟ್ಟು, ಕಾವೇರಿ ನೀರಲ್ಲಿ ಪಟಪಟನೇ ಓಡಾಡಿ ಫೋಟೋಶೂಟ್‌ಗೆ ಫೋಸ್ ಕೊಟ್ಟ ಭಾವನಾ ರಾವ್! ಸೀಕ್ರೆಟ್ ಏನು?

Shriram Bhat — Fri, 02 Oct 2026 22:35:24 +0530

ನಟಿ ಭಾವನಾ ರಾವ್ ಅಂದರೆ ಮೊಟ್ಟಮೊದಲು ನೆನಪಿಗೆ ಬರೋದು ಕನ್ನಡದ ಸೂಪರ್ ಹಿಟ್ ಚಿತ್ರ, ಯೋಗರಾಜ್ ಭಟ್ ಅವರ ನಿರ್ದೇಶಣದ 'ಗಾಳಿಪಟ'.. ಹೌದು, ಆ ಚಿತ್ರದಲ್ಲಿ ಖ್ಯಾತ ಗಾಯಕ ರಾಜೇಶ್ ಕೃಷ್ಣನ್ ಜೋಡಿಯಾಗಿ 'ನಧೀಂ ಧೀಂ ತನಾ..' ಎಂದವರು ಇದೇ ಭಾವನಾ!

ನಟಿ ಭಾವನಾ ರಾವ್ ಕನ್ನಡ ಪ್ರೇಕ್ಷಕರಿಗೆ ಚಿರಪರಿಚಿತ.. ನಟಿ ಭಾವನಾ ರಾವ್ ಅಂದರೆ ಮೊಟ್ಟಮೊದಲು ನೆನಪಿಗೆ ಬರೋದು ಕನ್ನಡದ ಸೂಪರ್ ಹಿಟ್ ಚಿತ್ರ, ಯೋಗರಾಜ್ ಭಟ್ ಅವರ ನಿರ್ದೇಶನದ 'ಗಾಳಿಪಟ'..

ಹೌದು, ಆ ಚಿತ್ರದಲ್ಲಿ ಖ್ಯಾತ ಗಾಯಕ ರಾಜೇಶ್ ಕೃಷ್ಣನ್ ಜೋಡಿಯಾಗಿ 'ನಧೀಂ ಧೀಂ ತನಾ..' ಎಂದು ಭರತನಾಟ್ಯದ ಸ್ಟೈಲಿನಲ್ಲೂ ಕುಣಿದು ಕುಪ್ಪಳಿಸಿ ಕನ್ನಡ ಪ್ರೇಕ್ಷಕರ ಮನಸೂರೆಗೊಂಡಿದ್ದ ನಟಿ ಇದೇ ಭಾವನಾ ರಾವ್. ಕನ್ನಡ ಮಾತ್ರವಲ್ಲದೇ ತಮಿಳು ಹಾಗೂ ಹಿಂದಿಯಲ್ಲೂ ನಟಿಸಿ ಅಲ್ಲೂ ತಮ್ಮ ಛಾಪನ್ನು ಮೂಡಿಸಿದವರು ಈ ನಟಿ!

ಇತ್ತೀಚಿನ ಚಿತ್ರಗಳ ನಟನೆಯ ಬಳಿಕ, ನಟಿ ಭಾವನಾ ರಾವ್ ಅವರು ಇದೀಗ ರೆಡ್ ಸಾರಿಯುಟ್ಟು ಕೂರ್ಗ್‌ನ ಕಾವೇರಿ ನದಿಯ ಹರಿಯುತ್ತಿರುವ ನದಿಯಲ್ಲಿ ಫೋಟೋಶೂಟ್ ಮಾಡಿಸಿದ್ದಾರೆ. ಖ್ಯಾತ ಫೋಟೋಗ್ರಾಫರ್ 'ಸಂದೀಪ್' ಅವರು ಕ್ಲಿಕ್ಕಿಸಿರುವ ಈ ಫೋಟೋಶೂಟ್ ಬಹಳಷ್ಟು ಚೆಂದವಾಗಿ, ವಿಭಿನ್ನವಾಗಿದ್ದು ಅಪರೂಪದಲ್ಲಿ ಅಪರೂಪ ಎನ್ನುವಂತಿದೆ.

ಅದರಲ್ಲೀ ಆಲ್‌ಮೋಸ್ಟ್ ನ್ಯಾಚುರಲ್ ಎಂಬಷ್ಟು ಸಿಂಪಲ್ ಮೇಕ್‌ಅಪ್‌ನಲ್ಲಿ ಭಾವನಾರ ಈ ಫೋಟೋಶೂಟ್ ಮಾಡಲಾಗಿದೆ.

ಕೆಂಪು ಸೀರೆಯಲ್ಲಿ, ಕೂರ್ಗ್‌ನ ಪ್ರಕೃತಿ ಮಡಿಲಲ್ಲಿ ನಟಿ ಭಾವನಾ ರಾವ್ ಮಾಡಿರುವ ಫೋಟೋಶಾಟ್‌ ನೋಡಿದ್ರೆ 'ಅರೇ, ವಾವ್..' ಎನ್ನುವಂತಿದೆ.

'ಗಾಳಿಪಟ' ಚಿತ್ರದ ಬಳಿಕ, ತಮಿಳಿನಲ್ಲಿ ನಟಿಸಿ, ಆ ಬಳಿಕ ಹಿಂದಿಯ 'ಧಾರಾವಿ ಬ್ಯಾಂಕ್' (Dharavi Bank - 2022) ವೆಬ್ ಸರಣಿ ಹಾಗೂ ಬಾಲಿವುಡ್‌ನ 'ಬೈಪಾಸ್ ರೋಡ್' (Bypass Road - 2019) ಚಿತ್ರದಲ್ಲೂ ಬಣ್ಣ ಹಚ್ಚಿದ್ದಾರೆ ಭಾವನಾ.

ಕನ್ನಡದಲ್ಲಿ ಭಾವನಾ ರಾವ್ ನಟಿಸಿರುವ ಸಿನಿಮಾಗಳು ಇವು:- ತುರ್ತು ನಿರ್ಗಮನ (Thurthu Nirgamana - 2022): ಹೇಮಂತ್ ಕುಮಾರ್ ಎಲ್ ನಿರ್ದೇಶನದ ಈ ಫ್ಯಾಂಟಸಿ ಡ್ರಾಮಾ ಚಿತ್ರ.

• ಹೊಂದಿಸಿ ಬರೆಯಿರಿ (Hondisi Bareyiri - 2023): ರಾಮೇನಹಳ್ಳಿ ಜಗನ್ನಾಥ್ ನಿರ್ದೇಶನದ ಈ ಫೀಲ್ ಗುಡ್ ಸಿನಿಮಾದಲ್ಲಿ ಇವರು 'ಭೂಮಿಕಾ' ಎಂಬ ಪ್ರಮುಖ ಪಾತ್ರವನ್ನು ನಿರ್ವಹಿಸಿದ್ದಾರೆ.

• ಗ್ರೇ ಗೇಮ್ಸ್ (Grey Games - 2024): ಗಂಗಾಧರ್ ಸಾಲಿಮಠ್ ನಿರ್ದೇಶನದ ಈ ಸಸ್ಪೆನ್ಸ್ ಥ್ರಿಲ್ಲರ್ ಮತ್ತು ಕೌಟುಂಬಿಕ ಚಿತ್ರದಲ್ಲಿ ನಟಿನೆ.

• ಲ್ಯಾಂಡ್‌ಲಾರ್ಡ್ (Landlord - 2026): ಇದು ಇತ್ತೀಚೆಗೆ ಬಿಡುಗಡೆಯಾದ ಗ್ರಾಮೀಣ ಹಿನ್ನೆಲೆಯ ಆಕ್ಷನ್ ಡ್ರಾಮಾ ಸಿನಿಮಾವಾಗಿದ್ದು, ಇದರಲ್ಲಿ ಭಾವನಾ ರಾವ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.

ಆದರೆ, ಈಗ ಭಾವನಾ ಇಷ್ಟು ವಿಭಿನ್ನವಾಗಿ, ಹರಿಯುವ ನದಿಯಲ್ಲಿ ಸಾಂಪ್ರದಾಯಿಕ ಸೀರೆಯ ಲುಕ್ಕಲ್ಲಿ ಈ ಫೋಟೋಶೂಟ್ ಮಾಡಿಸಿರುವ ಸೀಕ್ರೆಟ್ ಏನು? ಅದು ಸದ್ಯಕ್ಕೆ ಸಸ್ಪೆನ್ಸ್.. ಮುಂದೆ ಟೈಂ ಬಂದಾಗ ಅವರೂ ಹೇಳುತ್ತಾರೆ, ಅದನ್ನು ನಾವೂ ರಿವೀಲ್ ಮಾಡುತ್ತೇವೆ. ಅಲ್ಲಿಯವರೆಗೂ ಕಾಯುತ್ತಿರಿ..!

Paris of India: ನಮ್ಮ ದೇಶದ ಯಾವ ನಗರವನ್ನು 'ಮಿನಿ ಪ್ಯಾರಿಸ್' ಅಂತಾರೆ ಗೊತ್ತಾ?

Sathish Kumar KH — Tue, 06 Oct 2026 14:35:57 +0530

ಜೀವನದಲ್ಲಿ ಒಮ್ಮೆಯಾದರೂ ಪ್ಯಾರಿಸ್‌ಗೆ ಹೋಗಿ ಐಫೆಲ್ ಟವರ್ ನೋಡಬೇಕು ಅನ್ನೋ ಆಸೆ ತುಂಬಾ ಜನರಿಗೆ ಇರುತ್ತೆ. ಆದರೆ, ನಮ್ಮ ದೇಶದಲ್ಲೇ ಒಂದು 'ಮಿನಿ ಪ್ಯಾರಿಸ್' ಇದೆ ಅನ್ನೋದು ನಿಮಗೆ ಗೊತ್ತಾ? ಆ ಸುಂದರ ನಗರ ಯಾವುದು ಅಂತ ಇಲ್ಲಿ ತಿಳಿಯಿರಿ.

ಪ್ಯಾರಿಸ್ ಅಂದಾಕ್ಷಣ ಐಫೆಲ್ ಟವರ್, ಸುಂದರವಾದ ಕಟ್ಟಡಗಳು ಹಾಗೂ ಅಗಲವಾದ ರಸ್ತೆಗಳು ನಮ್ಮ ಕಣ್ಮುಂದೆ ಬರುತ್ತವೆ. ಪ್ರಪಂಚದ ಅತ್ಯಂತ ಸುಂದರ ನಗರಗಳಲ್ಲಿ ಪ್ಯಾರಿಸ್ ಕೂಡ ಒಂದು. ಆದರೆ, ಇದೆಲ್ಲವನ್ನೂ ನೋಡಲು ನೀವು ಪ್ಯಾರಿಸ್‌ಗೆ ಹೋಗಬೇಕಿಲ್ಲ. ನಮ್ಮ ದೇಶದಲ್ಲೇ ಇಂಥದ್ದೊಂದು ನಗರವಿದೆ. ರಾಜಸ್ಥಾನದ ರಾಜಧಾನಿ ಜೈಪುರವನ್ನು 'ಪ್ಯಾರಿಸ್ ಆಫ್ ಇಂಡಿಯಾ' ಅಂತ ಕರೆಯುತ್ತಾರೆ.

ಜೈಪುರ ನೋಡಲು ತುಂಬಾ ಸುಂದರವಾಗಿದೆ. ಇಲ್ಲಿ ಯಾರು ಬೇಕಾದರೂ ಇಷ್ಟಬಂದಂತೆ ಕಟ್ಟಡ ಕಟ್ಟುವಂತಿಲ್ಲ. ಒಂದು ಪಕ್ಕಾ ಮಾಸ್ಟರ್ ಪ್ಲಾನ್ ಪ್ರಕಾರ ಈ ನಗರವನ್ನು ಕಟ್ಟಿದ್ದಾರೆ. 18ನೇ ಶತಮಾನದಲ್ಲಿ ಮಹಾರಾಜ ಸವಾಯಿ ಜೈಸಿಂಗ್ II ಈ ನಗರವನ್ನು ವಿನ್ಯಾಸ ಮಾಡಿದರು. ಅಗಲವಾದ ರಸ್ತೆಗಳು, ಒಂದಕ್ಕೊಂದು ಸೇರುವ ಬೀದಿಗಳು ಹಾಗೂ ಸುಂದರವಾದ ಕಟ್ಟಡಗಳಿಂದ ಜೈಪುರ ಕಂಗೊಳಿಸುತ್ತದೆ.

ಜೈಪುರವನ್ನು ಪಿಂಕ್ ಸಿಟಿ ಅಂತ ಯಾಕೆ ಕರೆಯುತ್ತಾರೆ?

1876ರಲ್ಲಿ ವೇಲ್ಸ್ ಯುವರಾಜ ಆಲ್ಬರ್ಟ್ ಎಡ್ವರ್ಡ್ ಭೇಟಿ ನೀಡಿದಾಗ ಇಡೀ ನಗರಕ್ಕೆ ಗುಲಾಬಿ ಬಣ್ಣ ಬಳಿಯಲಾಗಿತ್ತು. ಅಂದಿನಿಂದ ಜನರು ಇದನ್ನು 'ಪಿಂಕ್ ಸಿಟಿ' ಅಂತಲೂ ಕರೆಯುತ್ತಾರೆ. ಜೈಪುರದ ಅಂದ ಕೇವಲ ಬಣ್ಣಕ್ಕೆ ಮಾತ್ರ ಸೀಮಿತವಾಗಿಲ್ಲ. ಇಲ್ಲಿನ ಅದ್ಭುತ ಕಟ್ಟಡಗಳು ನಗರದ ರಾಜಗಾಂಭೀರ್ಯವನ್ನು ಹೆಚ್ಚಿಸಿವೆ.

ಹವಾ ಮಹಲ್: ಜೈಪುರ ಅಂದಾಕ್ಷಣ ಟಕ್ ಅಂತ ನೆನಪಾಗುವುದೇ ಹವಾ ಮಹಲ್. ನೂರಾರು ಸಣ್ಣ ಕಿಟಕಿಗಳಿರುವ ಈ ಅರಮನೆಯಿಂದಲೇ ಅಂದು ರಾಜಮನೆತನದ ಮಹಿಳೆಯರು ಬೀದಿ ಉತ್ಸವಗಳನ್ನು ನೋಡುತ್ತಿದ್ದರು.

ಜೈಪುರ ಕೇವಲ ಕೋಟೆಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಇಲ್ಲಿನ ಹಳೆಯ ಬಜಾರ್‌ಗಳಲ್ಲಿ ಬಣ್ಣಬಣ್ಣದ ರಾಜಸ್ಥಾನಿ ಬಟ್ಟೆಗಳು, ಕರಕುಶಲ ವಸ್ತುಗಳು ಹಾಗೂ ಆಭರಣಗಳು ಪ್ರವಾಸಿಗರನ್ನು ಸೆಳೆಯುತ್ತವೆ. ರುಚಿಯಾದ ರಾಜಸ್ಥಾನಿ ಊಟ ಈ ಪ್ರವಾಸದ ಮಜಾವನ್ನು ಮತ್ತಷ್ಟು ಹೆಚ್ಚಿಸುತ್ತದೆ. ಇಲ್ಲಿಗೆ ಬರುವ ಪ್ರತಿಯೊಬ್ಬರಿಗೂ ಭಾರತದ ಇತಿಹಾಸ, ಸಂಸ್ಕೃತಿ ಹಾಗೂ ವಾಸ್ತುಶಿಲ್ಪ ಒಟ್ಟಿಗೆ ನೋಡಿದ ಅನುಭವವಾಗುತ್ತದೆ. ಪ್ಯಾರಿಸ್‌ಗೆ ಐಫೆಲ್ ಟವರ್ ಎಷ್ಟು ಫೇಮಸ್ಸೋ, ಜೈಪುರಕ್ಕೆ ಹವಾ ಮಹಲ್ ಅಷ್ಟೇ ಫೇಮಸ್.

ಪ್ರಕೃತಿ ಪ್ರಿಯರ ಸ್ವರ್ಗ.. ಚೀನಾದ ಈ ರಾಷ್ಟ್ರೀಯ ಉದ್ಯಾನವನಕ್ಕೆ ಪ್ರವಾಸಿಗರು ಮುಗಿಬೀಳೋದೇಕೆ?

Govindaraj S — Mon, 05 Oct 2026 20:43:57 +0530

ಝಾಂಗ್ಜಿಯಾಜಿ ರಾಷ್ಟ್ರೀಯ ಅರಣ್ಯ ಉದ್ಯಾನವನವು ಚೀನಾದಲ್ಲಿರುವ ಒಂದು ಜನಪ್ರಿಯ ರಾಷ್ಟ್ರೀಯ ಉದ್ಯಾನವನವಾಗಿದೆ. ಈ ಉದ್ಯಾನವನವು ಪ್ರಪಂಚದಾದ್ಯಂತದ ಪ್ರವಾಸಿಗರನ್ನು ಆಕರ್ಷಿಸಲು ಹೆಸರುವಾಸಿಯಾಗಿದೆ. ವಿಶಿಷ್ಟ ಭೌಗೋಳಿಕ ಮತ್ತು ಭೌಗೋಳಿಕ ವೈಶಿಷ್ಟ್ಯಗಳ ಜೊತೆಗೆ, ಈ ಉದ್ಯಾನವನವು ಡವ್ ಮರ ಮತ್ತು ಚೈನೀಸ್ ಚೆಸ್ಟ್ನಟ್ ಮರ ಸೇರಿದಂತೆ ಅಪಾರ ಸಂಖ್ಯೆಯ ಸಸ್ಯ ಮತ್ತು ಪ್ರಾಣಿಗಳಿಗೆ ನೆಲೆಯಾಗಿದೆ. ಈ ಉದ್ಯಾನವನವು ವಿಶಿಷ್ಟವಾದ ವುಲಿಂಗ್ಯುವಾನ್ ದೃಶ್ಯ ಪ್ರದೇಶದ ಭಾಗವಾಗಿದೆ.

ಚೀನಾ 1982 ರಲ್ಲಿ ಝಾಂಗ್ಜಿಯಾಜಿ ರಾಷ್ಟ್ರೀಯ ಅರಣ್ಯ ಉದ್ಯಾನವನವನ್ನು ಮೊದಲು ಗುರುತಿಸಿತು. ಈ ಉದ್ಯಾನವನವು 153.5 ಚದರ ಮೈಲುಗಳಷ್ಟು ವಿಸ್ತೀರ್ಣವನ್ನು ಹೊಂದಿರುವ ವುಲಿಂಗ್‌ಯುವಾನ್‌ನ ಅತ್ಯಂತ ಪ್ರಸಿದ್ಧ ಭಾಗವಾಗಿದೆ. ವುಲಿಂಗ್‌ಯುವಾನ್ ರಮಣೀಯ ಪ್ರದೇಶವನ್ನು 1992ರಲ್ಲಿ ಅಧಿಕೃತವಾಗಿ ಯುನೆಸ್ಕೋ ವಿಶ್ವ ಪರಂಪರೆಯ ತಾಣವೆಂದು ಪಟ್ಟಿ ಮಾಡಲಾಯಿತು.

ರಾಜ್ಯ-ಚಾಲಿತ ಮರದ ಫಾರ್ಮ್

2001ರಲ್ಲಿ, ಭೂ ಮತ್ತು ಸಂಪನ್ಮೂಲ ಸಚಿವಾಲಯವು ವುಲಿಂಗ್‌ಯುವಾನ್ ರಮಣೀಯ ಪ್ರದೇಶವನ್ನು ಜಾಂಗ್‌ಜಿಯಾಜಿ ಮರಳುಗಲ್ಲಿನ ಶಿಖರ ಅರಣ್ಯ ರಾಷ್ಟ್ರೀಯ ಜಿಯೋಪಾರ್ಕ್ ಎಂದು ಗುರುತಿಸಿತು. ಯುನೆಸ್ಕೋ 2004ರಲ್ಲಿ ಜಾಂಗ್‌ಜಿಯಾಜಿ ಜಿಯೋಪಾರ್ಕ್ ಅನ್ನು ಜಾಗತಿಕ ಜಿಯೋಪಾರ್ಕ್ ಎಂದು ಪಟ್ಟಿ ಮಾಡಿತು. ಇದನ್ನು ರಾಷ್ಟ್ರೀಯ ಅರಣ್ಯ ಉದ್ಯಾನವನವೆಂದು ಅನುಮೋದಿಸುವ ಮೊದಲು, ಜಾಂಗ್‌ಜಿಯಾಜಿ ರಾಷ್ಟ್ರೀಯ ಉದ್ಯಾನವನವು ರಾಜ್ಯ-ಚಾಲಿತ ಮರದ ಫಾರ್ಮ್ ಆಗಿತ್ತು.

ವೈವಿಧ್ಯಮಯ ಪರಿಸರ ವ್ಯವಸ್ಥೆ

ಜಾಂಗ್ಜಿಯಾಜಿ ರಾಷ್ಟ್ರೀಯ ಅರಣ್ಯ ಉದ್ಯಾನವನವು ಜಲಮೂಲಗಳು, ಬಂಡೆಗಳು, ಕಣಿವೆಗಳು ಮತ್ತು ಕಾಡುಗಳಂತಹ ವೈವಿಧ್ಯಮಯ ಪರಿಸರ ವ್ಯವಸ್ಥೆಗಳಿಂದ ಕೂಡಿದ ವಿಶಿಷ್ಟ ಆವಾಸಸ್ಥಾನಗಳನ್ನು ಹೊಂದಿದೆ, ಇದು ವಿವಿಧ ರೀತಿಯ ಪ್ರಾಣಿ ಮತ್ತು ಸಸ್ಯ ಪ್ರಭೇದಗಳನ್ನು ಬೆಂಬಲಿಸುತ್ತದೆ. ಈ ಪ್ರಾಣಿಗಳಲ್ಲಿ ಹಲವು ರೀತಿಯ ಪಕ್ಷಿಗಳು, ದೈತ್ಯ ಸಲಾಮಾಂಡರ್‌ಗಳು ಮತ್ತು ರೀಸಸ್ ಮಂಗಗಳು ಸೇರಿವೆ.

Travel: ದಸರಾ ಹಬ್ಬಕ್ಕೆ ಮಂಗಳೂರು KSRTCಯಿಂದ ವಿಶೇಷ ಕೊಡುಗೆ; 5 ಪ್ಯಾಕೇಜ್ ಘೋಷಣೆ

Kannadaprabha News — Sun, 04 Oct 2026 06:53:42 +0530

ಮಂಗಳೂರು: ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗ ದಸರಾ ಪ್ರಯುಕ್ತ ಮಂಗಳೂರಿನ ಸುತ್ತಮುತ್ತಲಿನ ದೇವಸ್ಥಾನಗಳ ದರ್ಶನಕ್ಕೆ ಹಾಗೂ ಮಂಗಳೂರು-ಮಡಿಕೇರಿ, ಮಂಗಳೂರು-ಕೊಲ್ಲೂರು, ಮಂಗಳೂರು-ಸಿಗಂದೂರು ವಿಶೇಷ ಪ್ಯಾಕೇಜ್ ಪ್ರವಾಸ ಕಾರ್ಯಾಚರಣೆಯನ್ನು 11ರಿಂದ 20ರ ವರೆಗೆ ಕಾರ್ಯಾಚರಿಸಲು ನಿರ್ಧರಿಸಿದೆ.

ಸಾರ್ವಜನಿಕ ಪ್ರಯಾಣಿಕರ ಅನುಕೂಲಕ್ಕಾಗಿ ಸದರಿ ಬಸ್‍ಗಳಿಗೆ ಮುಂಗಡ ಸೀಟ್ ಕಾಯ್ದಿರಿಸಲು (www.ksrtc.in) ಸೂಕ್ತ ವ್ಯವಸ್ಥೆಯನ್ನು ಮಾಡಲಾಗಿದ್ದು, ಬಸ್‍ಗಳ ಸದುಪಯೋಗವನ್ನು ಸಾರ್ವಜನಿಕ ಪ್ರಯಾಣಿಕರು ಪಡೆದುಕೊಳ್ಳಬಹುದು.

ಮಂಗಳೂರು ದಸರಾ ನವದುರ್ಗ ದರ್ಶನ ಪ್ಯಾಕೇಜ್:

ಬೆಳಗ್ಗೆ 8 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣದಿಂದ-ಮರೋಳಿ ಸೂರ್ಯ ನಾರಾಯಣ ದೇವಸ್ಥಾನ-ಬೋಳಾರ ಶ್ರೀ ಮಾರಿಯಮ್ಮ ದೇವಸ್ಥಾನ, ಶ್ರೀ ಮಂಗಳಾದೇವಿ ದೇವಸ್ಥಾನ- ಪೊಳಲಿ ಶ್ರೀರಾಜರಾಜೇಶ್ವರಿ ದೇವಸ್ಥಾನ-ಹೊಸನಾಡು ಕೊಡ್ಯಡ್ಕ ಶ್ರೀ ಅನ್ನಪೂರ್ಣೇಶ್ವರಿ ದೇವಸ್ಥಾನ (ಮಧ್ಯಾಹ್ನದ ಊಟ) - ಶ್ರೀ ಕಟೀಲು ದುರ್ಗಾಪರಮೆಶ್ವರಿ ದೇವಸ್ಥಾನ- ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಮೂಲ್ಕಿ- ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನ - ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ - ಶ್ರೀ ಉರ್ವ ಮಾರಿಯಮ್ಮ ದೇವಸ್ಥಾನ - ಕುದ್ರೋಳಿ ಗೋಕರ್ಣನಾಥ ದೇವಸ್ಥಾನ ನವದುರ್ಗಾ ದರ್ಶನ-ಮಂಗಳೂರು ಬಸ್ಸು ನಿಲ್ದಾಣ ರಾತ್ರಿ 8.30ಕ್ಕೆ ಮಂಗಳೂರು ಬಸ್‌ ನಿಲ್ದಾಣ ತಲುಪಲಿದೆ. ಪ್ರಯಾಣ ದರ ವಯಸ್ಕರಿಗೆ 500 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 400 ರು.

ತಲಕಾವೇರಿ-ಭಾಗಮಂಡಲ ಪ್ಯಾಕೇಜ್ ಪ್ರವಾಸ:

ಬೆಳಗ್ಗೆ 7 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣದಿಂದ ಹೊರಟು ಪುತ್ತೂರು ಮಹಾಲಿಂಗೇಶ್ವರ ದೇವಸ್ಥಾನ-ತಲಕಾವೇರಿ ದೇವಸ್ಥಾನ - ಶ್ರೀ ಭಗಂಡೇಶ್ವರ ಸ್ವಾಮಿ ದೇವಸ್ಥಾನ, ತ್ರಿವೇಣಿ ಸಂಗಮ, ಭಾಗಮಂಡಲ ಅಬ್ಬಿಪಾಲ್ಸ್-ರಾಜಾಸೀಟ್- ರಾತ್ರಿ 9.30ಕ್ಕೆ ಮಂಗಳೂರು ಬಸ್ಸು ನಿಲ್ದಾಣ ತಲುಪಲಿದೆ. ಪ್ರಯಾಣ ದರ ವಯಸ್ಕರಿಗೆ 600 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 500 ರು.

ಮಂಗಳೂರು-ಕೊಲ್ಲೂರು ಪ್ಯಾಕೇಜ್ ಪ್ರವಾಸ:

ಬೆಳಗ್ಗೆ 8 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣ - ಉಚ್ಚಿಲ ಶ್ರೀ ಮಹಾಲಕ್ಷ್ಮೀ ದೇವಸ್ಥಾನ- ಕಾಪು ಮಾರಿಯಮ್ಮ ದೇವಸ್ಥಾನ- ಮಂದಾರ್ತಿ ದುರ್ಗಾಪರಮೇಶ್ವರಿ ದೇವಸ್ಥಾನ -ಕಮಲಶಿಲೆ ಶ್ರೀ ಬ್ರಾಹ್ಮೀದುರ್ಗಾಪರಮೇಶ್ವರಿ ದೇವಸ್ಥಾನ (ಮಧ್ಯಾಹ್ನದ ಊಟ) - ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನ-ಮಾರಣಕಟ್ಟೆ ಶ್ರೀ ಬ್ರಹ್ಮಲಿಂಗೇಶ್ವರ ದೇವಸ್ಥಾನ, ರಾತ್ರಿ 8 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣ ತಲುಪಲಿದೆ. ಪ್ರಯಾಣ ದರ ವಯಸ್ಕರಿಗೆ 600 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 500 ರು.

ಮಂಗಳೂರು-ಸಿಗಂದೂರು ಪ್ಯಾಕೇಜ್ ಪ್ರವಾಸ:

ಬೆಳಗ್ಗೆ 7 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣ–ಕುಂದಾಪುರ-ಸಿಗಂದೂರ ಶ್ರೀ ಚೌಡೇಶ್ವರಿದೇವಸ್ಥಾನ-ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಸ್ಥಾನ- ರಾತ್ರಿ 7.30 ಮಂಗಳೂರು ಬಸ್ಸು ನಿಲ್ದಾಣ. ಪ್ರಯಾಣ ದರ ವಯಸ್ಕರಿಗೆ 700 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 600 ರು.

ಮಂಗಳೂರು-ಶೃಂಗೇರಿ ಪ್ಯಾಕೇಜ್ ಪ್ರವಾಸ:

ಬೆಳಗ್ಗೆ 8 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣ- ಕೊಡ್ಯಡ್ಕ ಶ್ರೀ ಅನ್ನಪೂರ್ಣೇಶ್ವರಿ ದೇವಸ್ಥಾನ, ಶ್ರೀ ಶಾರದಾಂಬ ದೇವಸ್ಥಾನ, ಹರಿಹರಪುರ ಮಠ (ಮಧ್ಯಾಹ್ನದ ಊಟ) ಶ್ರೀ ಋಷ್ಯಶೃಂಗೇಶ್ವರ ದೇವಸ್ಥಾನ, ಕಿಗ್ಗ ಕ್ಷೇತ್ರ- ರಾತ್ರಿ 7.30 ಮಂಗಳೂರು ಬಸ್ಸು ನಿಲ್ದಾಣ. ಪ್ರಯಾಣ ದರ ವಯಸ್ಕರಿಗೆ 600 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 500 ರು.

ಹೆಚ್ಚಿನ ಮಾಹಿತಿಗೆ ಮಂಗಳೂರು-1ನೇ ಘಟಕ ವ್ಯವಸ್ಥಾಪಕರ ಮೊಬೈಲ್‌: 7760990713, ಮಂಗಳೂರು-3ನೇ ಘಟಕ ವ್ಯವಸ್ಥಾಪಕರ ಮೊಬೈಲ್‌- 7760990723, ಮಂಗಳೂರು ಮುಂಗಡ ಬುಕ್ಕಿಂಗ್ ಕೌಂಟರ್ :9663211553, ಮಂಗಳೂರು ಬಸ್ಸು ನಿಲ್ದಾಣ: 7760990720, ವಿಭಾಗೀಯ ಕಚೇರಿ: 7760990711, 9663266221 ಸಂಪರ್ಕಿಸಬಹುದು ಎಂದು ಮಂಗಳೂರು ಕೆಎಸ್‌ಆರ್‌ಟಿಸಿ ಹಿರಿಯ ವಿಭಾಗೀಯ ನಿಯಂತ್ರಣಾಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಈ ಕೋಟೆ ಕಂಡರೆ ಕಣ್ಣು ನಂಬುವುದಿಲ್ಲ: ಆಕಾಶದೇತ್ತರದ ಮೇಹರಾನ್‌ಗಢ್ ಇತಿಹಾಸವೇ ಅದ್ಭುತ!

Govindaraj S — Thu, 08 Oct 2026 21:08:40 +0530

ರಾಜಸ್ಥಾನದ ನೀಲಿ ನಗರ ಜೋಧ್‌ಪುರದ ಭವ್ಯತೆಯನ್ನು ಕಿರೀಟದಂತೆ ಅಲಂಕರಿಸಿರುವುದು ಈ ಮೇಹರಾನ್‌ಗಢ್ ಕೋಟೆ. ಸುಮಾರು 1459ರಲ್ಲಿ ರಾಥೋಡ್ ವಂಶದ ರಾವ್ ಜೋಧಾ ಕೋಟೆಯನ್ನು ನಿರ್ಮಿಸಿದರು. ಮಂಡೋರ್‌ನಿಂದ ರಾಜಧಾನಿಯನ್ನು ಹೆಚ್ಚು ಸುರಕ್ಷಿತವಾದ ಎತ್ತರದ ಪ್ರದೇಶಕ್ಕೆ ಸ್ಥಳಾಂತರಿಸುವ ಉದ್ದೇಶದಿಂದ ಈ ದುರ್ಗವನ್ನು ನಿರ್ಮಿಸಲಾಯಿತು.

ಬೃಹತ್ ಬಂಡೆಯ ಬೆಟ್ಟದ ಮೇಲೆ ನಿರ್ಮಾಣಗೊಂಡಿರುವ ಕೋಟೆ ಜೋಧ್‌ಪುರದ ಸಮತಟ್ಟಿನಿಂದ ಸುಮಾರು 120–125 ಮೀಟರ್ ಎತ್ತರದಲ್ಲಿ ಎದ್ದು ನಿಂತಿದೆ. ಕೋಟೆಯ ಗೋಡೆಗಳು ಕೆಲವೆಡೆ ಸುಮಾರು 120 ಅಡಿ ಎತ್ತರ ಹಾಗೂ 70 ಅಡಿ ದಪ್ಪವಾಗಿವೆ. ಸುಮಾರು 500 ವರ್ಷಗಳ ಕಾಲ ವಿವಿಧ ರಾಥೋಡ್ ಅರಸರು ಕೋಟೆಯನ್ನು ವಿಸ್ತರಿಸಿ, ಅರಮನೆಗಳು, ಕೋಟೆಗೋಡೆಗಳು ಮತ್ತು ರಕ್ಷಣಾ ವ್ಯವಸ್ಥೆಗಳನ್ನು ನಿರ್ಮಿಸಿದರು. ಹೀಗಾಗಿ ಇಲ್ಲಿ ವಿವಿಧ ಕಾಲಘಟ್ಟಗಳ ವಾಸ್ತುಶೈಲಿಗಳ ಅದ್ಭುತ ಸಂಯೋಜನೆಯನ್ನು ಕಾಣಬಹುದು.

ಕೋಟೆಯೊಳಗಿನ ಮೋತಿ ಮಹಲ್, ಫೂಲ್ ಮಹಲ್ ಮತ್ತು ಶೀಶ್ ಮಹಲ್ ರಾಜಮನೆತನದ ವೈಭವಕ್ಕೆ ಸಾಕ್ಷಿಯಾಗಿವೆ. ಸೂಕ್ಷ್ಮವಾಗಿ ಕೆತ್ತಲಾದ ಕಲ್ಲಿನ ಜಾಲರಿಗಳು, ಅಲಂಕೃತ ಕಿಟಕಿಗಳು, ವಿಶಾಲ ಅಂಗಳಗಳು ಹಾಗೂ ಭವ್ಯ ಸಭಾಂಗಣಗಳು ರಾಜಪೂತ ವಾಸ್ತುಶಿಲ್ಪದ ಸೌಂದರ್ಯವನ್ನು ತೆರೆದಿಡುತ್ತವೆ. ಕೋಟೆಯ ವಸ್ತುಸಂಗ್ರಹಾಲಯದಲ್ಲಿ 17ನೇ, 18ನೇ ಮತ್ತು 19ನೇ ಶತಮಾನಗಳ ಚಿಕಣಿ ಚಿತ್ರಗಳು, ಶಸ್ತ್ರಾಸ್ತ್ರಗಳು, ರಕ್ಷಾಕವಚಗಳು, ಜವಳಿ, ಪೀಠೋಪಕರಣಗಳು ಮತ್ತು ರಾಜಮನೆತನದ ಬಳಕೆಯ ವಸ್ತುಗಳನ್ನು ಸಂರಕ್ಷಿಸಲಾಗಿದೆ.

ಇತಿಹಾಸದ ಮೂಕ ಸಾಕ್ಷಿ

ಕೋಟೆಯ ಇತಿಹಾಸದಲ್ಲಿ ಯುದ್ಧಗಳಿಗೂ ಮಹತ್ವವಿದೆ. ಅದರ ದ್ವಾರಗಳ ಮೇಲೆ ನಡೆದ ದಾಳಿಗಳ ಗುರುತುಗಳು ಇಂದಿಗೂ ಇತಿಹಾಸದ ಮೂಕ ಸಾಕ್ಷಿಗಳಾಗಿ ಉಳಿದಿವೆ. ಜೈಪೋಲ್ ಸೇರಿದಂತೆ ಹಲವು ದ್ವಾರಗಳು ರಾಜರ ವಿಜಯಗಳನ್ನು ಸ್ಮರಿಸುತ್ತವೆ. 1459ರಿಂದ ಆರಂಭವಾದ ಮೇಹರಾನ್‌ಗಢ್, ಐದು ಶತಮಾನಗಳ ರಾಜಪೂತ ಇತಿಹಾಸ, ಶೌರ್ಯ, ಕಲೆ ಮತ್ತು ವಾಸ್ತುಶಿಲ್ಪವನ್ನು ಒಂದೇ ತಾಣದಲ್ಲಿ ಕಟ್ಟಿಕೊಡುವ ಅಪೂರ್ವ ಪರಂಪರೆಯ ಕೋಟೆಯಾಗಿದೆ.

Space Toys: ಗಗನಯಾತ್ರಿಗಳು ಬಾಹ್ಯಾಕಾಶಕ್ಕೆ ಆಟಿಕೆ ಸಾಮಾನುಗಳನ್ನು ಒಯ್ಯುವುದು ಯಾಕೆ? ಭಾರೀ ಸೀಕ್ರೆಟ್ ಇದರಲ್ಲಿದೆ!

Shriram Bhat — Wed, 07 Oct 2026 18:17:42 +0530

ಬಾಹ್ಯಾಕಾಶಕ್ಕೆ ಗಗನಯಾತ್ರಿಗಳು ಆಟಿಕೆಗಳನ್ನು ಒಯ್ಯುವುದು ಯಾಕೆ ಗೊತ್ತಾ? Why Astronauts Take Plush Toys Like Pikachu To Space?

ಇತ್ತೀಚೆಗೆ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ (ISS) ತೇಲಾಡುತ್ತಿರುವ ಮುದ್ದಾದ 'ಪಿಕಾಚು' ಆಟಿಕೆಯ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿತ್ತು. ಯುರೋಪಿಯನ್ ಸ್ಪೇಸ್ ಏಜೆನ್ಸಿ (ESA) ಹಂಚಿಕೊಂಡಿದ್ದ ಈ ವಿಡಿಯೋ ಬಾಹ್ಯಾಕಾಶ ಪ್ರೇಮಿಗಳು ಹಾಗೂ 'ಪೋಕ್ಮನ್' ಅಭಿಮಾನಿಗಳನ್ನು ಫುಲ್ ಖುಷಿಪಡಿಸಿತ್ತು. ಆದರೆ, ಇದೊಂದು ಕೇವಲ ವೈರಲ್ ವಿಡಿಯೋ ಮಾತ್ರವಲ್ಲ. ಈ ಹಳದಿ ಬಣ್ಣದ ಪೋಕ್ಮನ್ ಆಟಿಕೆ, ಬಾಹ್ಯಾಕಾಶ ಯಾನದಲ್ಲಿ ದಶಕಗಳಿಂದ ನಡೆದುಕೊಂಡು ಬಂದಿರುವ ಒಂದು ವಿಶೇಷ ಸಂಪ್ರದಾಯದ ಭಾಗವಾಗಿದೆ.

ಗಗನಯಾತ್ರಿಗಳ ಆಟಿಕೆಗಳು

ಇತ್ತೀಚೆಗಷ್ಟೇ ಬಾಹ್ಯಾಕಾಶ ನಿಲ್ದಾಣ ತಲುಪಿದ ಭಾರತದ ಗಗನಯಾತ್ರಿ ಶುಭಾಂಶು ಶುಕ್ಲಾ ಸೇರಿದಂತೆ ಹಲವು ಗಗನಯಾತ್ರಿಗಳು, ತಮ್ಮ ಪ್ರಯಾಣದ ವೇಳೆ ಇಂಥ ಆಟಿಕೆಗಳನ್ನು ಜೊತೆಯಲ್ಲಿ ಕೊಂಡೊಯ್ಯುತ್ತಾರೆ. 1985ರಲ್ಲಿ ಸ್ಪೇಸ್ ಶಟಲ್ ಡಿಸ್ಕವರಿಯ 'STS-51D' ಮಿಷನ್ ಮೂಲಕ ಮೊದಲ ಬಾರಿಗೆ ಆಟಿಕೆಗಳನ್ನು ಬಾಹ್ಯಾಕಾಶಕ್ಕೆ ಒಯ್ಯಲಾಯಿತು. ಆ ದಿನಗಳಲ್ಲಿ ಗಗನಯಾತ್ರಿಗಳು ಸ್ಲಿಂಕಿ (Slinky), ಯೋ-ಯೋ (Yo-Yo), ಪ್ಯಾಡಲ್ ಬಾಲ್ (paddle ball) ಹಾಗೂ ಒಂದು ಟಾಯ್ ಕಾರ್ ಅನ್ನು ತಮ್ಮ ಜೊತೆ ತೆಗೆದುಕೊಂಡು ಹೋಗಿದ್ದರು.

ಆಟಿಕೆಗಳನ್ನೇ ಯಾಕೆ ಒಯ್ಯುತ್ತಾರೆ?

ನೋಡಲು ಇವು ಕೇವಲ ಆಟಿಕೆಗಳಂತೆ ಕಂಡರೂ, ಇವು 'ಜೀರೋ-ಗ್ರಾವಿಟಿ ಇಂಡಿಕೇಟರ್' (ಶೂನ್ಯ ಗುರುತ್ವಾಕರ್ಷಣೆ ಸೂಚಕ) ಗಳಾಗಿ ಕೆಲಸ ಮಾಡುತ್ತವೆ. ನೌಕೆಯು ಭೂಮಿಯ ಗುರುತ್ವಾಕರ್ಷಣೆಯಿಂದ ಹೊರಬಂದು ಶೂನ್ಯ ಗುರುತ್ವಾಕರ್ಷಣೆಯ ಸ್ಥಿತಿಯನ್ನು ತಲುಪಿದೆಯಾ ಎಂಬುದನ್ನು ಇವು ಸೂಚಿಸುತ್ತವೆ. "ಬಾಹ್ಯಾಕಾಶ ನೌಕೆ ಹಾಗೂ ಅದರೊಳಗಿರುವ ಯಾತ್ರಿಕರು ಭೂಮಿಯ ಗುರುತ್ವಾಕರ್ಷಣೆಯಿಂದ ಹೊರಬಂದು, ತೂಕರಹಿತ ಸ್ಥಿತಿಯನ್ನು ತಲುಪಿದ್ದಾರೆಯೇ ಎಂಬುದನ್ನು ವಿಡಿಯೋ ಮೂಲಕ ಸುಲಭವಾಗಿ ಗುರುತಿಸಲು ಈ ಸಣ್ಣ ಪ್ಲಶ್ (ಮೃದುವಾದ) ಆಟಿಕೆಗಳು ಸಹಾಯ ಮಾಡುತ್ತವೆ" ಎಂದು ನಾಸಾ ವಿವರಿಸಿದೆ. ನೌಕೆಯೊಳಗೆ ಈ ಆಟಿಕೆಗಳು ತೇಲಲು ಶುರುಮಾಡಿದ ತಕ್ಷಣ, ತಾವು ಬಾಹ್ಯಾಕಾಶವನ್ನು ತಲುಪಿದ್ದೇವೆ ಎಂದು ಗಗನಯಾತ್ರಿಗಳು ಖಚಿತಪಡಿಸಿಕೊಳ್ಳುತ್ತಾರೆ.

ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಪೋಸ್ಟ್ ವೀಕ್ಷಿಸಿ

ESA - ಯುರೋಪಿಯನ್ ಸ್ಪೇಸ್ ಏಜೆನ್ಸಿ (@europeanspaceagency) ಹಂಚಿಕೊಂಡ ಪೋಸ್ಟ್

5 ಪ್ರಸಿದ್ಧ ಪ್ಲಶ್ ಆಟಿಕೆಗಳು

1. ಇಎಸ್‌ಎ (ESA) ಕಳುಹಿಸಿದ 'ಪಿಕಾಚು'

2026ರ ಅಕ್ಟೋಬರ್ 4 ರಿಂದ 10ರವರೆಗೆ ನಡೆದ 'ವರ್ಲ್ಡ್ ಸ್ಪೇಸ್ ವೀಕ್' ಆಚರಣೆಯ ಭಾಗವಾಗಿ ಯುರೋಪಿಯನ್ ಸ್ಪೇಸ್ ಏಜೆನ್ಸಿ ಹಾಗೂ ದ ಪೋಕ್ಮನ್ ಕಂಪನಿ ಇಂಟರ್ನ್ಯಾಷನಲ್ ಜಂಟಿಯಾಗಿ ಪಿಕಾಚುವನ್ನು ಬಾಹ್ಯಾಕಾಶ ನಿಲ್ದಾಣಕ್ಕೆ ಕಳುಹಿಸಿದ್ದವು. ಯುರೋಪಿಯನ್ ಸ್ಪೇಸ್ ಏಜೆನ್ಸಿಯ ಗಗನಯಾತ್ರಿ ಸೋಫಿ ಅಡೆನೋಟ್ ಅವರ ಮಿಷನ್‌ನ ಭಾಗವಾಗಿದ್ದ ಈ ಆಟಿಕೆ, ಏಪ್ರಿಲ್ 11 ರಿಂದ ಜೂನ್ 17ರವರೆಗೆ ಬರೋಬ್ಬರಿ 67 ದಿನಗಳ ಕಾಲ ಕಕ್ಷೆಯಲ್ಲಿತ್ತು.

#WATCH | "Namaskar from space! I am thrilled to be here with my fellow astronauts. What a ride it was," says Indian astronaut Group Captain Subhanshu, who is piloting #AxiomMission4, as he gives details about his journey into space.

Carrying a soft toy Swan, he says, in Indian culture, the Swan is a symbol of wisdom.

Video source: Axiom Space/ YouTube

— ANI (@ANI) June 26, 2025

2. ಶುಭಾಂಶು ಶುಕ್ಲಾ ಅವರ 'ಜಾಯ್'

2025ರ ತಮ್ಮ ಮಿಷನ್ ವೇಳೆ, ಬಾಹ್ಯಾಕಾಶದಿಂದ ನಡೆಸಿದ ಲೈವ್ ವೆಬ್‌ಕಾಸ್ಟ್‌ನಲ್ಲಿ ಭಾರತೀಯ ಗಗನಯಾತ್ರಿ ಶುಭಾಂಶು ಶುಕ್ಲಾ 'ಜಾಯ್' ಎಂಬ ಆಟಿಕೆಯನ್ನು ಜಗತ್ತಿಗೆ ಪರಿಚಯಿಸಿದರು. ಇದು ಹಂಸದ ಆಕಾರದ ಮುದ್ದಾದ ಆಟಿಕೆಯಾಗಿತ್ತು.

3. 'ಸ್ನೂಪಿ'ಯ ಪಯಣ

'ಪೀನಟ್ಸ್' ಕಾಮಿಕ್ ಸರಣಿಯ ಜನಪ್ರಿಯ ಪಾತ್ರವಾದ ಸ್ನೂಪಿಗೆ ಬಾಹ್ಯಾಕಾಶ ಯಾನದಲ್ಲಿ ದೊಡ್ಡ ಇತಿಹಾಸವೇ ಇದೆ. 2019ರಲ್ಲಿ ಸ್ನೂಪಿ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಪ್ರಯಾಣ ಬೆಳೆಸಿತ್ತು.

4. 'ಬೇಬಿ ಯೋಡಾ' ಟ್ರಿಪ್

2020ರಲ್ಲಿ ಅಮೆರಿಕ ಹಾಗೂ ಜಪಾನ್‌ನ ಗಗನಯಾತ್ರಿಗಳು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಹಾರಿದಾಗ, ತಮ್ಮ ಜೊತೆ 'ಬೇಬಿ ಯೋಡಾ' ಪ್ಲಶ್ ಆಟಿಕೆಯನ್ನು ಕೊಂಡೊಯ್ದಿದ್ದರು. ಮಿಷನ್‌ನ ಲೈವ್ ಸ್ಟ್ರೀಮ್‌ಗಳಲ್ಲಿ ಬೇಬಿ ಯೋಡಾ ಸೀಟಿನಲ್ಲಿ ಕೂರಲು ಪ್ರಯತ್ನಿಸುತ್ತಿದ್ದ ತಮಾಷೆಯ ದೃಶ್ಯಗಳು ವೀಕ್ಷಕರ ಗಮನ ಸೆಳೆದಿದ್ದವು.

The #Exp42 crew is ready to go! Their 'Zero-G Indicator' may look familiar, #Olaf from #Frozen riding to outer space. http://t.co/9YyJ1SjYhD

— Doug Wheelock (@Astro_Wheels) November 23, 2014

5. 'ಓಲಾಫ್' ಎಂಬ ಲಕ್ಕಿ ಚಾರ್ಮ್

2014ರಲ್ಲಿ ನಡೆದ 'Soyuz TMA-15M' ಮಿಷನ್ ಮೂಲಕ ಓಲಾಫ್ ಬಾಹ್ಯಾಕಾಶವನ್ನು ತಲುಪಿತ್ತು. ರಷ್ಯಾದ ಗಗನಯಾತ್ರಿ ಆಂಟನ್ ಶ್ಕಾಪ್ಲೆರೊವ್, ತಮ್ಮ 8 ವರ್ಷದ ಮಗಳ ಲಕ್ಕಿ ಚಾರ್ಮ್ (ಅದೃಷ್ಟದ ಸಂಕೇತ) ಆಗಿ ಈ ಆಟಿಕೆಯನ್ನು ತಮ್ಮ ಜೊತೆ ಕೊಂಡೊಯ್ದಿದ್ದರು.

ನೀವು ಎತ್ತ ಸಾಗಿದರೂ ನಿಮ್ಮನ್ನೇ ಹಿಂಬಾಲಿಸುತ್ತವೆ ಪಾದಗಳು.. ಮೈಸೂರು ಅರಮನೆಯಲ್ಲಿದೆ ವಿಸ್ಮಯಕಾರಿ ಪೇಂಟಿಂಗ್!

Ashwini HR — Thu, 08 Oct 2026 17:00:15 +0530

ಭವ್ಯ ವಾಸ್ತುಶಿಲ್ಪ ಮತ್ತು ರಾಜವೈಭವದ ಪ್ರತೀಕವಾಗಿರುವ ಮೈಸೂರಿನ ಅಂಬಾವಿಲಾಸ ಅರಮನೆ ಕೇವಲ ಚಿನ್ನದ ಸಿಂಹಾಸನಕ್ಕಷ್ಟೇ ಅಲ್ಲ, ಕಲಾತ್ಮಕ ವಿಸ್ಮಯಗಳಿಗೂ ಜಗತ್ಪ್ರಸಿದ್ಧ. ಅರಮನೆಯ Art Galleryಯಲ್ಲಿ ಮೈಸೂರು ಒಡೆಯರ್ ಸಂಸ್ಥಾನದ ಗತವೈಭವವನ್ನು ಸಾರುವ ನೂರಾರು ಅಪರೂಪದ ತೈಲವರ್ಣ ಚಿತ್ರಗಳಿವೆ. ಆದರೆ, ಇವುಗಳಲ್ಲಿ ಒಂದು ವರ್ಣಚಿತ್ರ ಮಾತ್ರ ಪ್ರವಾಸಿಗರನ್ನು ಬೆರಗುಗೊಳಿಸಿ ಮೂಕವಿಸ್ಮಿತರನ್ನಾಗಿಸುತ್ತದೆ.

ಏನಿದು ರಹಸ್ಯ?

ಅಂದಹಾಗೆ ಈ ವರ್ಣಚಿತ್ರವನ್ನು ಸಾಮಾನ್ಯವಾಗಿ ನೋಡಿದಾಗ ಸುಂದರವಾಗಿಯೇ ಕಾಣುತ್ತದೆ. ಆದರೆ ಇದರ ಮುಂದೆ ನಿಂತು ಎಡದಿಂದ ಬಲಕ್ಕೆ ಅಥವಾ ಬಲದಿಂದ ಎಡಕ್ಕೆ ಹೆಜ್ಜೆ ಹಾಕಿದರೆ ಅಲ್ಲಿ ಅಸಲಿ ಮ್ಯಾಜಿಕ್ ಆರಂಭವಾಗುತ್ತದೆ! ನೀವು ಕೊಠಡಿಯ ಯಾವ ಮೂಲೆಗೆ ಹೋದರೂ, ಚಿತ್ರದಲ್ಲಿರುವ ರಾಜರ ಕಾಲುಗಳು ನಿಮ್ಮ ಕಡೆಗೇ ತಿರುಗಿ ನಿಮ್ಮನ್ನೇ ದಿಟ್ಟಿಸುತ್ತಿರುವಂತೆ ಭಾಸವಾಗುತ್ತದೆ. ಪ್ರವಾಸಿಗರು ಎತ್ತ ಸಾಗಿದರೂ ಅವರ ಪಾದಗಳು ವೀಕ್ಷಕರನ್ನು ಹಿಂಬಾಲಿಸುವ ಈ ಅದ್ಭುತ ಆಪ್ಟಿಕಲ್ ಇಲ್ಯೂಷನ್ (Optical Illusion) ಎಲ್ಲರ ಹುಬ್ಬೇರಿಸುತ್ತದೆ.

ಶತಮಾನಗಳ ಹಿಂದಿನ ಅದ್ಭುತ 3D ಕಲೆ

ಯಾವುದೇ ಆಧುನಿಕ ತಂತ್ರಜ್ಞಾನ, ಕಂಪ್ಯೂಟರ್‌ಗಳಿಲ್ಲದ ಆ ಕಾಲದಲ್ಲೇ ಕಲಾವಿದ ಈ ಚಿತ್ರವನ್ನು ಬಿಡಿಸಿದ ಕೌಶಲ್ಯ ನಿಜಕ್ಕೂ ಅದ್ಭುತ. ಚಿತ್ರಕಲೆಯಲ್ಲಿ ಬೆಳಕು-ನೆರಳಿನ ಸಂಯೋಜನೆ ಹಾಗೂ ಮೂರು ಆಯಾಮಗಳ ತತ್ವವನ್ನು (Perspective technique) ಅಷ್ಟು ನಿಖರವಾಗಿ ಬಳಸಲಾಗಿದೆ. ವ್ಯಕ್ತಿಯೊಬ್ಬನ ಕಣ್ಣುಗಳು ನಮ್ಮನ್ನು ಹಿಂಬಾಲಿಸುವ ಚಿತ್ರಗಳನ್ನು ಹಲವೆಡೆ ಕಾಣಬಹುದು. ಆದರೆ, ವ್ಯಕ್ತಿಯ ಪಾದಗಳೇ ನಮ್ಮ ಚಲನೆಗೆ ತಕ್ಕಂತೆ ತಿರುಗುವಂತೆ ಚಿತ್ರಿಸಿರುವುದು ಜಗತ್ತಿನಲ್ಲೇ ಅಪರೂಪದ ಕಲಾ ಚಾತುರ್ಯವಾಗಿದೆ.

ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ವೈರಲ್

ಇತ್ತೀಚೆಗೆ 'poovan_asymptote' ಎಂಬ ಇನ್‌ಸ್ಟಾಗ್ರಾಮ್ ಬಳಕೆದಾರರು ಅರಮನೆಯ ಈ ವಿಸ್ಮಯಕಾರಿ ಪೇಂಟಿಂಗ್‌ನ ವಿಡಿಯೋ ತುಣುಕನ್ನು ಹಂಚಿಕೊಂಡಿದ್ದು, ಸೋಶಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದೆ. ಈ ಕಲಾ ನೈಪುಣ್ಯತೆಯನ್ನು ಕಣ್ತುಂಬಿಕೊಂಡ ನೆಟ್ಟಿಗರು 'ಅದ್ಭುತ', 'ನಂಬಲು ಅಸಾಧ್ಯ' ಎಂದು ಕಮೆಂಟ್‌ಗಳ ಮೂಲಕ ಮೆಚ್ಚುಗೆಯ ಸುರಿಮಳೆಗರೆಯುತ್ತಿದ್ದಾರೆ.

ಮೈಸೂರು ಸಂಸ್ಥಾನ ಕಲೆಗೆ ನೀಡಿದ ರಾಜಾಶ್ರಯ ಮತ್ತು ಭಾರತೀಯ ಕಲಾವಿದರ ಅಪ್ರತಿಮ ಪ್ರತಿಭೆಗೆ ಈ ಚಿತ್ರ ಸಾಕ್ಷಿಯಾಗಿ ನಿಂತಿದೆ. ಮುಂದಿನ ಬಾರಿ ಮೈಸೂರು ಅರಮನೆಗೆ ಹೋದಾಗ ಈ ವಿಸ್ಮಯವನ್ನು ಕಣ್ತುಂಬಿಕೊಳ್ಳುವುದನ್ನು ಮರೆಯದಿರಿ.

'ಮೊನಾಲಿಸಾ' ಚಿತ್ರವನ್ನೇ ಮೀರಿಸಿದ ಕಲಾ ಕೌಶಲ್ಯ

ಲಿಯೊನಾರ್ಡೊ ಡಾ ವಿಂಚಿಯ ವಿಶ್ವವಿಖ್ಯಾತ 'ಮೊನಾಲಿಸಾ' ಪೇಂಟಿಂಗ್‌ನಲ್ಲಿ ಕಣ್ಣುಗಳು ನಮ್ಮನ್ನು ಹಿಂಬಾಲಿಸುತ್ತವೆ ಎಂಬುದು ಜಗತ್ತಿಗೆ ಗೊತ್ತು (Mona Lisa Effect). ಆದರೆ, ಮೈಸೂರು ಅರಮನೆಯ ಈ ಚಿತ್ರದಲ್ಲಿ ಕಣ್ಣುಗಳ ಜೊತೆಗೆ ವ್ಯಕ್ತಿಯ ಪಾದಗಳೇ (Feet) ವೀಕ್ಷಕರ ದಿಕ್ಕಿಗೆ ತಿರುಗುವುದು ಮೊನಾಲಿಸಾ ಚಿತ್ರಕ್ಕಿಂತಲೂ ಒಂದು ಹೆಜ್ಜೆ ಮುಂದುವರಿದ ಕಲಾ ಚಾತುರ್ಯವಾಗಿದೆ ಎಂದು ಕಲಾಪ್ರಿಯರು ಬಣ್ಣಿಸುತ್ತಿದ್ದಾರೆ.

ಅರಮನೆಯಲ್ಲಿ ಈ ಪೇಂಟಿಂಗ್ ಎಲ್ಲಿದೆ?

ಅರಮನೆಗೆ ಭೇಟಿ ನೀಡುವ ಪ್ರವಾಸಿಗರು ಈ ವಿಸ್ಮಯಕಾರಿ ಕಲಾಕೃತಿಯನ್ನು ಸುಲಭವಾಗಿ ವೀಕ್ಷಿಸಬಹುದಾಗಿದೆ. ಮೈಸೂರು ಅರಮನೆಯ ಅತ್ಯಂತ ಆಕರ್ಷಕವಾದ 'ಚಿತ್ರಶಾಲೆ' (Portrait Gallery) ಹಾಗೂ ಕಲ್ಯಾಣ ಮಂಟಪದ ವಿಭಾಗದಲ್ಲಿ ದೇಶರಾಜ ಅರಸ್ ದಂಪತಿಯ ಈ ಅಪರೂಪದ ತೈಲವರ್ಣ ಚಿತ್ರವನ್ನು ಸಂರಕ್ಷಿಸಿಡಲಾಗಿದೆ.

ಚಿತ್ರದಲ್ಲಿರುವ ಅರಸರು ಯಾರು?

ಚಿತ್ರದಲ್ಲಿರುವ ದೇಶರಾಜ ಅರಸ್ ಅವರು ಮೈಸೂರು ಒಡೆಯರ್ ಸಂಸ್ಥಾನಕ್ಕೆ ಅತ್ಯಂತ ಆಪ್ತರಾಗಿದ್ದ ಪ್ರಭಾವಿ ಸರದಾರರು ಹಾಗೂ ರಾಜವಂಶಸ್ಥರು. ರಾಜಮನೆತನದ ಆಡಳಿತ ಮತ್ತು ಇತಿಹಾಸದಲ್ಲಿ ಇವರಿಗೂ ಅತ್ಯುನ್ನತ ಗೌರವದ ಸ್ಥಾನವಿತ್ತು.

ಪ್ರವಾಸಿಗರಿಗೆ ಕೌತುಕದ ಅನುಭವ

ನೀವು ಮುಂದಿನ ಬಾರಿ ಅರಮನೆಗೆ ಹೋದಾಗ ಈ ಚಿತ್ರದ ಎದುರು ನಿಂತು ಕನಿಷ್ಠ 10 ಹೆಜ್ಜೆ ಎಡಕ್ಕೆ ಮತ್ತು 10 ಹೆಜ್ಜೆ ಬಲಕ್ಕೆ ನಡೆದಾಡಿ ನೋಡಿ, ಆಗ ಅವರ ಪಾದಗಳು ನಿಮ್ಮನ್ನೇ ಹಿಂಬಾಲಿಸುವ ಈ ಅದ್ಭುತ ಆಪ್ಟಿಕಲ್ ಇಲ್ಯೂಷನ್ ಅನ್ನು ಸ್ವತಃ ಕಣ್ಣಾರೆ ಕಂಡು ರೋಮಾಂಚನ ಅನುಭವಿಸಬಹುದು.

ಇಲ್ಲಿದೆ ನೋಡಿ ವಿಡಿಯೋ

View this post on Instagram

A post shared by Pavan & Pooja (@poovan_asymptote)

ಮಂಗಳೂರು ಕೆಎಸ್‌ಆರ್‌ಟಿಸಿ ದಸರಾ ವಿಶೇಷ ಪ್ರವಾಸ ಪ್ಯಾಕೇಜ್‌ ಘೋಷಣೆ, ಅಕ್ಟೋಬರ್ 11 ರಿಂದ 20, ಈ ದೇವಸ್ಥಾನ ಸುತ್ತಿ

Gowthami K — Fri, 02 Oct 2026 18:11:45 +0530

ಮಂಗಳೂರು: ಕೆಎಸ್‌ಆರ್‌ಟಿಸಿ ಮಂಗಳೂರು ವಿಭಾಗ ದಸರಾ ಪ್ರಯುಕ್ತ ಮಂಗಳೂರಿನ ಸುತ್ತಮುತ್ತಲಿನ ದೇವಸ್ಥಾನಗಳ ದರ್ಶನಕ್ಕೆ ಹಾಗೂ ಮಂಗಳೂರು-ಮಡಿಕೇರಿ, ಮಂಗಳೂರು-ಕೊಲ್ಲೂರು, ಮಂಗಳೂರು-ಸಿಗಂದೂರು ವಿಶೇಷ ಪ್ಯಾಕೇಜ್ ಪ್ರವಾಸ ಕಾರ್ಯಾಚರಣೆಯನ್ನು ಅಕ್ಟೋಬರ್ 11 ರಿಂದ ಅಕ್ಟೋಬರ್ 20 ರ ವರೆಗೆ ಕಾರ್ಯಾಚರಿಸಲು ನಿರ್ಧರಿಸಿದೆ.

ಪ್ಯಾಕೇಜ್ ಪ್ರವಾಸದ ಮಾರ್ಗ, ವೇಳೆ ಮತ್ತು ಪ್ರಯಾಣ ದರ:

ಮಂಗಳೂರು ದಸರಾ ನವದುರ್ಗ ದರ್ಶನ ಪ್ಯಾಕೇಜ್:

ಬೆಳಗ್ಗೆ 8 ಗಂಟೆಗೆ ಮಂಗಳೂರು ಬಸ್ಸು ನಿಲ್ದಾಣದಿಂದ-ಮರೋಳಿ ಸೂರ್ಯ ನಾರಾಯಣ ದೇವಸ್ಥಾನ-ಬೋಳಾರ ಶ್ರೀ ಮಾರಿಯಮ್ಮ ದೇವಸ್ಥಾನ, ಶ್ರೀ ಮಂಗಳಾದೇವಿ ದೇವಸ್ಥಾನ- ಪೊಳಲಿ ಶ್ರೀರಾಜರಾಜೇಶ್ವರಿ ದೇವಸ್ಥಾನ-ಹೊಸನಾಡು ಕೊಡ್ಯಡ್ಕ ಶ್ರೀ ಅನ್ನಪೂರ್ಣೇಶ್ವರಿ ದೇವಸ್ಥಾನ (ಮಧ್ಯಾಹ್ನದ ಊಟ) - ಶ್ರೀ ಕಟೀಲು ದುರ್ಗಾಪರಮೆಶ್ವರಿ ದೇವಸ್ಥಾನ- ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ ಮೂಲ್ಕಿ- ಸಸಿಹಿತ್ಲು ಶ್ರೀ ಭಗವತಿ ದೇವಸ್ಥಾನ - ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ - ಶ್ರೀ ಉರ್ವ ಮಾರಿಯಮ್ಮ ದೇವಸ್ಥಾನ - ಕುದ್ರೋಳಿ ಗೋಕರ್ಣನಾಥ ದೇವಸ್ಥಾನ ನವದುರ್ಗಾ ದರ್ಶನ– ಮಂಗಳೂರು ಬಸ್ಸು ನಿಲ್ದಾಣ ರಾತ್ರಿ 8.30ಕ್ಕೆ ಮಂಗಳೂರು ಬಸ್‌ ನಿಲ್ದಾಣ ತಲುಪಲಿದೆ. ಪ್ರಯಾಣ ದರ ವಯಸ್ಕರಿಗೆ 500 ರು., ಮಕ್ಕಳಿಗೆ (6 ವರ್ಷದಿಂದ 12 ವರ್ಷದವರಿಗೆ) 400 ರು.

ಮಂಗಳೂರು-ತಲಕಾವೇರಿ-ಭಾಗಮಂಡಲ ಪ್ಯಾಕೇಜ್ ಪ್ರವಾಸ:

ಮಂಗಳೂರು-ಕೊಲ್ಲೂರು ಪ್ಯಾಕೇಜ್ ಪ್ರವಾಸ:

ಮಂಗಳೂರು-ಸಿಗಂದೂರು ಪ್ಯಾಕೇಜ್ ಪ್ರವಾಸ:

ಮಂಗಳೂರು-ಶೃಂಗೇರಿ ಪ್ಯಾಕೇಜ್ ಪ್ರವಾಸ:

ದಸರಾ ರಜೆಗೆ ಗೋವಾ ಟ್ರಿಪ್ ಪ್ಲಾನ್ ಮಾಡಿದ್ದೀರಾ? ಬೆಂಗಳೂರಿನಿಂದ ಗೋವಾ ಪ್ರಯಾಣದ ಸಂಪೂರ್ಣ ಮಾಹಿತಿ ಇಲ್ಲಿದೆ!

Sathish Kumar KH — Mon, 05 Oct 2026 16:42:45 +0530

ದಸರಾ ಹಬ್ಬದ ರಜಾ ದಿನಗಳು ಹತ್ತಿರ ಬರುತ್ತಿವೆ. ಅನೇಕರು ಈ ಸಾಲು ರಜೆಯನ್ನು ಬಳಸಿಕೊಂಡು ಪ್ರವಾಸಕ್ಕೆ ಹೋಗಲು ಯೋಜನೆ ಹಾಕುತ್ತಿದ್ದಾರೆ. ಕರ್ನಾಟಕದ ಪ್ರವಾಸಿಗರ ಮೊದಲ ಆಯ್ಕೆ ಎಂದೇ ಖ್ಯಾತವಾಗಿರುವ 'ಗೋವಾ'ಕ್ಕೆ ಬೆಂಗಳೂರಿನಿಂದ ತೆರಳಲು ಇದೀಗ ಸುವರ್ಣಾವಕಾಶ.

ಬೆಂಗಳೂರಿನಿಂದ ಗೋವಾಕ್ಕೆ ಎಷ್ಟು ದೂರ?

ಬೆಂಗಳೂರಿನಿಂದ ಗೋವಾಕ್ಕೆ ಸುಮಾರು 550 ರಿಂದ 600 ಕಿ.ಮೀ ದೂರವಿದೆ. ನೀವು ತೆರಳುವ ಮಾರ್ಗವನ್ನು ಅವಲಂಬಿಸಿ ಸಮಯ ಬದಲಾಗುತ್ತದೆ:

ರಸ್ತೆ ಮಾರ್ಗ (ಬಸ್/ಕಾರು): ಸುಮಾರು 10 ರಿಂದ 12 ಗಂಟೆಗಳ ಪ್ರಯಾಣ. ತುಮಕೂರು-ಚಿತ್ರದುರ್ಗ-ಹುಬ್ಬಳ್ಳಿ-ಅಂಕೋಲಾ ಮಾರ್ಗವಾಗಿ ಹೋದರೆ ರಸ್ತೆಗಳು ಉತ್ತಮವಾಗಿವೆ.

ರೈಲು ಮಾರ್ಗ: ದಕ್ಷಿಣ ಪಶ್ಚಿಮ ರೈಲ್ವೆ ಮೂಲಕ ಬೆಂಗಳೂರಿನಿಂದ ಗೋವಾಕ್ಕೆ (ಮಡಗಾಂವ್/ವಾಸ್ಕೋ) ನೇರ ರೈಲುಗಳಿವೆ. ಇದು ಸುಮಾರು 15-18 ಗಂಟೆಗಳ ಕಾಲಾವಧಿ ತೆಗೆದುಕೊಳ್ಳುತ್ತದೆ, ಆದರೆ ಪ್ರಯಾಣ ಅತ್ಯಂತ ಸುಂದರವಾಗಿರಲಿದೆ.

ವಿಮಾನಯಾನ: ಬೆಂಗಳೂರಿನಿಂದ ಗೋವಾಕ್ಕೆ ಕೇವಲ 1 ಗಂಟೆಯ ವಿಮಾನ ಪ್ರಯಾಣ ಲಭ್ಯವಿದೆ.

ಗೋವಾಕ್ಕೆ ಹೋಗಲು ಸೂಕ್ತ ಸಮಯ ಯಾವುದು?

ಅಕ್ಟೋಬರ್ ತಿಂಗಳು ಗೋವಾ ಭೇಟಿಗೆ ಅತ್ಯುತ್ತಮ ಸಮಯ. ಮುಂಗಾರು ಮಳೆ ನಿಂತು ಚಳಿಗಾಲ ಆರಂಭವಾಗುವ ಈ ಹೊತ್ತಿನಲ್ಲಿ ವಾತಾವರಣ ಬಹಳ ಹಿತವಾಗಿರುತ್ತದೆ. ಇನ್ನು ಡಿಸೆಂಬರ್ ಹಾಗೂ ಜನವರಿ ತಿಂಗಳಲ್ಲಿ ಅತಿಹೆಚ್ಚಿನ ಜನರು ಗೋವಾ ಪ್ರವಾಸ ಮಾಡುತ್ತಾರೆ.

ಅಕ್ಟೋಬರ್ ಮಧ್ಯಭಾಗ: ದಸರಾ ರಜೆ ಸಮಯದಲ್ಲಿ ಹವಾಮಾನವು ಪ್ರವಾಸಕ್ಕೆ ಪೂರಕವಾಗಿರುತ್ತದೆ.

ಆಫೀಸ್ ರಶ್‌ನಿಂದ ದೂರವಿರಲು: ಅಕ್ಟೋಬರ್ 10ರಿಂದ 20ರ ನಡುವಿನ ದಿನಗಳು ಪ್ರವಾಸಕ್ಕೆ ಬಹಳ ಸೂಕ್ತ, ಏಕೆಂದರೆ ಈ ಅವಧಿಯಲ್ಲಿ ಬೀಚ್‌ಗಳಲ್ಲಿ ಜನಸಂದಣಿ ಅತಿಯಾಗಿರುವುದಿಲ್ಲ, ಹೋಟೆಲ್ ದರಗಳು ಕೂಡ ಕೈಗೆಟುಕುವ ಬೆಲೆಯಲ್ಲಿ ಸಿಗುತ್ತವೆ.

ಪ್ರವಾಸಿಗರಿಗೆ ಕೆಲವು ಸಲಹೆಗಳು:

ಆನ್‌ಲೈನ್ ಬುಕಿಂಗ್: ದಸರಾ ರಜೆಯಾದ್ದರಿಂದ ಹೋಟೆಲ್ ಮತ್ತು ವಾಹನಗಳ ದರ ಹೆಚ್ಚಿರಬಹುದು, ಆದ್ದರಿಂದ ಕನಿಷ್ಠ 15 ದಿನಗಳ ಮುಂಚಿತವಾಗಿ ಬುಕ್ ಮಾಡಿಕೊಳ್ಳಿ.

ಬೀಚ್ ಆಯ್ಕೆ: ನೀವು ಕುಟುಂಬದೊಂದಿಗೆ ಹೋಗುತ್ತಿದ್ದರೆ ದಕ್ಷಿಣ ಗೋವಾದ (South Goa) ಶಾಂತಿಯುತ ಬೀಚ್‌ಗಳನ್ನು ಆಯ್ಕೆ ಮಾಡಿಕೊಳ್ಳಿ. ಯುವಕರು ಸಾಹಸ ಕ್ರೀಡೆ ಬಯಸುವವರಾದರೆ ಉತ್ತರ ಗೋವಾ (North Goa) ಉತ್ತಮ.

ಸಾರಿಗೆ: ಗೋವಾ ತಲುಪಿದ ಮೇಲೆ ಅಲ್ಲಿ ಓಡಾಡಲು ದ್ವಿಚಕ್ರ ವಾಹನಗಳನ್ನು ಬಾಡಿಗೆಗೆ ಪಡೆಯುವುದು (Scooter Rental) ಅತಿ ಅಗ್ಗ ಮತ್ತು ಅನುಕೂಲ.

ದಸರಾ ರಜೆಯ ಈ ಸುಂದರ ಕ್ಷಣಗಳನ್ನು ಗೋವಾದ ಕಡಲತೀರದಲ್ಲಿ ಆನಂದಿಸಲು ಈಗಲೇ ನಿಮ್ಮ ಪ್ಲಾನ್ ರೆಡಿ ಮಾಡಿಕೊಳ್ಳಿ!

ಈ ಭೂ'ಸ್ವರ್ಗ'ಕ್ಕೆ ಹೋಗಿದ್ದೀರಾ? ಇಲ್ಲ ಅಂದ್ರೆ ನೀವೂ ಪಕ್ಕಾ 'ಜೀರೋ'ನೇ ಆಗೋದ್ ಬಿಡಿ, ನೋ ಡೌಟ್!

Shriram Bhat — Sat, 03 Oct 2026 21:41:13 +0530

ಅರುಣಾಚಲ ಪ್ರದೇಶದ ಪ್ರವಾಸಿ ತಾಣಗಳ ಪಟ್ಟಿಯಲ್ಲಿ ಪ್ರಕೃತಿಯ ಸೊಬಗು, ಶಾಂತ ವಾತಾವರಣ ಹಾಗೂ ವಿಶಿಷ್ಟ ಸಂಸ್ಕೃತಿಯ ಅನುಭವವನ್ನು ಒಂದೇ ಕಡೆ ಪಡೆಯಬೇಕು ಎಂದರೆ ಜಿರೋ ಕಣಿವೆ ಮನಸ್ಸಿಗೆ ಬರುವ ತಾಣ.

ಹಸಿರು ಬೆಟ್ಟಗಳ ನಡುವೆ, ಸಮುದ್ರಮಟ್ಟದಿಂದ ಸುಮಾರು 1,500 ಮೀಟರ್ ಎತ್ತರದಲ್ಲಿ ಹರಡಿಕೊಂಡಿರುವ ಈ ಕಣಿವೆ, ನಗರ ಜೀವನದ ಗದ್ದಲದಿಂದ ದೂರವಾಗಿ ಒಂದಿಷ್ಟು ನೆಮ್ಮದಿಯ ಸಮಯ ಕಳೆಯಲು ಬಯಸುವವರಿಗೆ ವಿಭಿನ್ನ ಅನುಭವ ನೀಡುತ್ತದೆ. ಮಂಜಿನಿಂದ ಆವೃತವಾಗಿರುವ ಬೆಟ್ಟಗಳು, ಕಣ್ಣು ಹಾಯಿಸಿದಷ್ಟೂ ಕಾಣಿಸುವ ಹಸಿರು ಅಕ್ಕಿ ಗದ್ದೆಗಳು ಹಾಗೂ ಸಾಲಾಗಿ ನಿಂತಿರುವ ಪೈನ್ ಮರಗಳು ಜಿರೋದ ಸೌಂದರ್ಯವನ್ನು ಮತ್ತಷ್ಟು ಹೆಚ್ಚಿಸುತ್ತವೆ.

ಅರುಣಾಚಲ ಪ್ರದೇಶದ ಲೋವರ್ ಸುಬನ್ಸಿರಿ ಜಿಲ್ಲೆಯಲ್ಲಿ ಜಿರೋ ಪಟ್ಟಣ ಮತ್ತು ಅದರ ಸುತ್ತಮುತ್ತಲಿನ ಗ್ರಾಮಗಳು ಹರಡಿಕೊಂಡಿವೆ. ಪ್ರವಾಸಿಗರಿಗೆ ಇಲ್ಲಿನ ಪ್ರಕೃತಿ ಎಷ್ಟು ಆಕರ್ಷಕವೋ, ಅಪಟಾನಿ ಜನಾಂಗದ ಜೀವನಶೈಲಿಯೂ ಅಷ್ಟೇ ಕುತೂಹಲ ಮೂಡಿಸುತ್ತದೆ. ಪ್ರಕೃತಿಯೊಂದಿಗೆ ಹೊಂದಾಣಿಕೆ ಮಾಡಿಕೊಂಡು ಬದುಕುವ ಇಲ್ಲಿನ ಜನರ ಜೀವನ ಪದ್ಧತಿ ಜಿರೋ ಪ್ರವಾಸದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದೆ.

ಜಿರೋ ಕಣಿವೆಯ ವಿಶೇಷತೆ ಕೇವಲ ಅದರ ಹಸಿರು ಸೌಂದರ್ಯಕ್ಕೆ ಸೀಮಿತವಾಗಿಲ್ಲ. ಇಲ್ಲಿನ ಕೃಷಿ ಪರಂಪರೆಯೂ ಗಮನ ಸೆಳೆಯುತ್ತದೆ. ಅಪಟಾನಿ ಸಮುದಾಯವು ತೇವಭೂಮಿ ಕೃಷಿಯ ವಿಶಿಷ್ಟ ವಿಧಾನವನ್ನು ಅನುಸರಿಸುತ್ತಿದ್ದು, ಒಂದೇ ಕೃಷಿ ವ್ಯವಸ್ಥೆಯಲ್ಲಿ ಅಕ್ಕಿ ಬೆಳೆ ಮತ್ತು ಮೀನು ಸಾಕಣೆಯನ್ನು ಸಂಯೋಜಿಸಿರುವುದು ವಿಶೇಷ.

ನೀರನ್ನು ಮಿತವಾಗಿ ಬಳಸುವುದು, ಸ್ಥಳೀಯ ಸಂಪನ್ಮೂಲಗಳನ್ನು ಸಂರಕ್ಷಿಸುವುದು ಹಾಗೂ ಪರಿಸರಕ್ಕೆ ಹಾನಿಯಾಗದ ರೀತಿಯಲ್ಲಿ ಕೃಷಿ ನಡೆಸುವುದು ಇಲ್ಲಿನ ಸಾಂಪ್ರದಾಯಿಕ ಪದ್ಧತಿಯ ಪ್ರಮುಖ ಅಂಶಗಳಾಗಿವೆ.

ಪ್ರವಾಸದ ಜೊತೆಗೆ ಸ್ಥಳೀಯ ಸಂಸ್ಕೃತಿಯನ್ನು ತಿಳಿದುಕೊಳ್ಳಲು ಬಯಸುವವರಿಗೆ ಜಿರೋ ಮತ್ತೊಂದು ವಿಭಿನ್ನ ಲೋಕದ ಬಾಗಿಲು ತೆರೆಯುತ್ತದೆ. ಅಪಟಾನಿ ಸಮುದಾಯದ ಸಾಂಪ್ರದಾಯಿಕ ಮನೆಗಳು, ಹಬ್ಬ-ಹರಿದಿನಗಳು, ಜನಪದ ಕಲೆ, ಸಂಗೀತ ಹಾಗೂ ಪ್ರಕೃತಿಯೊಂದಿಗೆ ಬೆಸೆದುಕೊಂಡಿರುವ ಜೀವನಶೈಲಿ ಪ್ರವಾಸಿಗರಿಗೆ ಹೊಸ ಅನುಭವ ನೀಡುತ್ತವೆ. ಅದರಲ್ಲೂ ಜಿರೋ ಸಂಗೀತೋತ್ಸವ ಯುವ ಪ್ರವಾಸಿಗರಲ್ಲಿ ಈ ಪ್ರದೇಶದ ಜನಪ್ರಿಯತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಜಿರೋದ ಸಾಂಸ್ಕೃತಿಕ ಮತ್ತು ನೈಸರ್ಗಿಕ ಮಹತ್ವಕ್ಕೆ ಮತ್ತೊಂದು ಪ್ರಮುಖ ಮಾನ್ಯತೆಯೂ ಇದೆ. 2012ರಲ್ಲಿ ಜಿರೋ ಕಣಿವೆಯ ಸಾಂಸ್ಕೃತಿಕ ಭೂದೃಶ್ಯವನ್ನು ಯುನೆಸ್ಕೋದ ವಿಶ್ವ ಪಾರಂಪರಿಕ ತಾಣಗಳ ತಾತ್ಕಾಲಿಕ ಪಟ್ಟಿಗೆ ಸೇರಿಸಲಾಯಿತು. ಅಪಟಾನಿ ಸಮುದಾಯದ ಸುಸ್ಥಿರ ಕೃಷಿ ಪದ್ಧತಿ ಮತ್ತು ಸಾಂಸ್ಕೃತಿಕ ಪರಂಪರೆಯ ಮಹತ್ವವನ್ನು ಇದು ಜಗತ್ತಿನ ಗಮನಕ್ಕೆ ತಂದಿದೆ.

ಬೆಳಗಿನ ಹೊತ್ತಿನಲ್ಲಿ ಮಂಜಿನ ಪರದೆ ನಿಧಾನವಾಗಿ ಸರಿಯುತ್ತಿದ್ದಂತೆ ಕಣ್ಣೆದುರಿಗೆ ತೆರೆದುಕೊಳ್ಳುವ ಹಸಿರು ಗದ್ದೆಗಳು, ದೂರದಲ್ಲಿ ಕಾಣಿಸುವ ನೀಲಿ ಬೆಟ್ಟಗಳು ಮತ್ತು ಪೈನ್ ಕಾಡುಗಳು ಜಿರೋ ಕಣಿವೆಯ ಸೌಂದರ್ಯವನ್ನು ಮತ್ತಷ್ಟು ಮನಮೋಹಕವಾಗಿಸುತ್ತವೆ. ಹೀಗಾಗಿ ಜಿರೋ ಕೇವಲ ಒಂದು ಪ್ರವಾಸಿ ತಾಣವಲ್ಲ; ಪ್ರಕೃತಿ ಮತ್ತು ಮನುಷ್ಯರ ನಡುವಿನ ಸುಂದರ ಸಂಬಂಧವನ್ನು ಹತ್ತಿರದಿಂದ ಅನುಭವಿಸುವ ಅವಕಾಶ ನೀಡುವ ಸ್ಥಳ. ಬ್ಯುಸಿ ಜೀವನಕ್ಕೆ ಸ್ವಲ್ಪ ವಿರಾಮ ನೀಡಿ, ಪ್ರಕೃತಿಯ ಮಡಿಲಲ್ಲಿ ನೆಮ್ಮದಿಯ ಕ್ಷಣಗಳನ್ನು ಕಳೆಯಲು ಬಯಸುವವರಿಗೆ ಜಿರೋ ಕಣಿವೆ ಖಂಡಿತವಾಗಿಯೂ ವಿಭಿನ್ನ ಅನುಭವ ನೀಡುವ ತಾಣವಾಗಿದೆ.

ವಿಮಾನ ಪ್ರಯಾಣಿಕರಿಗೆ ಕಾದಿದೆ ಶಾಕ್! ಇಂದಿನಿಂದ ಇಂಡಿಗೋ ಟಿಕೆಟ್ ದರ ಭಾರಿ ಏರಿಕೆ: ₹10,000ದವರೆಗೆ ಇಂಧನ ಸರ್ಚಾರ್ಜ್

Gowthami K — Tue, 06 Oct 2026 11:07:39 +0530

ನವದೆಹಲಿ: ಭಾರತದ ಅತಿದೊಡ್ಡ ವಿಮಾನಯಾನ ಸಂಸ್ಥೆಯಾದ ಇಂಡಿಗೋ ಮಂಗಳವಾರದಿಂದ ಪ್ರಯಾಣಿಕರಿಗೆ ಇಂಧನ ಶುಲ್ಕವನ್ನು ವಿಧಿಸಲು ಮುಂದಾಗಿದೆ ಇದರಿಂದ ಟಿಕೆಟ್‌ ದರದಲ್ಲಿ ಏರಿಕೆಯಾಗಲಿದೆ. ವಿಮಾನ ಇಂಧನ ಬೆಲೆಯಲ್ಲಿನ ಹೆಚ್ಚಳದ ವೆಚ್ಚ ಭರಿಸುವ ಉದ್ದೇಶದಿಂದ, ವಿಮಾನದ ಮಾರ್ಗ ಹಾಗೂ ವಲಯವನ್ನಾಧರಿಸಿ 375 ರು.ನಿಂದ 10000 ರು.ವರೆಗೆ ಇಂಧನ ಸರ್‌ಚಾರ್ಜ್‌ ವಿಧಿಸಲು ಕಂಪನಿ ನಿರ್ಧರಿಸಿದೆ. ಈ ಪರಿಷ್ಕೃತ ಶುಲ್ಕಗಳು ಅಕ್ಟೋಬರ್ 6 ರಿಂದ ಜಾರಿಗೆ ಬರಲಿದ್ದು, ಮುಂಬರುವ ದಿನಗಳಲ್ಲಿ ವಿಮಾನ ಪ್ರಯಾಣಿಕರಿಗೆ ದರ ಏರಿಕೆಯ ಬಿಸಿ ತಟ್ಟಲಿದೆ.

ಎಷ್ಟೆಷ್ಟು ಏರಿಕೆ?:

ದೇಶೀಯ ವಿಮಾನಗಳಿಗಾದರೆ, 500 ಕಿ.ಮೀ.ಗಿಂತ ಕಡಿಮೆ ದೂರದ ಪ್ರಯಾಣಕ್ಕೆ ಟಿಕೆಟ್‌ ದರಕ್ಕೆ ಇನ್ನು 425 ರು. ಹೆಚ್ಚು ಪಾವತಿಸಬೇಕಾಗುವುದು. 501-1 ಸಾವಿರ ಕಿ.ಮೀ. ಒಳಗಿನದ್ದಕ್ಕೆ 600 ರು., 1001-1500 ಕಿ.ಮೀ.ಗೆ 900 ರು., 1501-2000 ಕಿ.ಮೀ.ಗೆ 1150 ರು., 2 ಸಾವಿರ ಕಿ.ಮೀ.ಗಿಂತ ದೂರವಾದರೆ 1300 ರು. ಇಂಧನ ಶುಲ್ಕ ವಿಧಿಸಲಾಗುವುದು.

ಅಂತಾರಾಷ್ಟ್ರೀಯ ವಿಮಾನಗಳಲ್ಲಿ, 500 ಕಿ.ಮೀ.ಗಿಂತ ಕಡಿಮೆ ದೂರದಲ್ಲಿರುವ ಸಾರ್ಕ್‌ ರಾಷ್ಟ್ರಗಳಿಗೆ ಹೆಚ್ಚುವರಿ 500 ರು. ಹಾಗೂ ಅದಕ್ಕಿಂತ ಹೆಚ್ಚು ದೂರವಿದ್ದೆ 1 ಸಾವಿರ ರು.. ಬೆಲೆ ತೆರಬೇಕಾಗುವುದು. ಆಗ್ನೇಯ ಏಷ್ಯಾ, ಮಧ್ಯಪ್ರಾಚ್ಯ ಮತ್ತು ಗಲ್ಫ್‌ ಸಹಕಾರ ಮಂಡಳಿ ಹಾಗೂ ಉತ್ತರ ಮತ್ತು ಪೂರ್ವ ಏಷ್ಯಾ ರಾಷ್ಟ್ರಗಳಿಗೆ 5500 ರು., ಆಫ್ರಿಕಾಗೆ 6 ಸಾವಿರ ರು., ಯುರೋಪ್‌ಗೆ 10 ಸಾವಿರ ರು. ಇಂಧನ ಶುಲ್ಕವಿರಲಿದೆ.

ಕಳೆದ ಕೆಲವು ತಿಂಗಳುಗಳಿಂದ ವಿಮಾನಯಾನ ಟರ್ಬೈನ್ ಇಂಧನ (ATF) ಬೆಲೆಯಲ್ಲಿ ನಿರಂತರ ಏರಿಕೆ ಕಂಡುಬಂದಿದೆ. ತಿಂಗಳಿನಿಂದ ತಿಂಗಳಿಗೆ ಇಂಧನದ ದರ ಶೇಕಡಾ 14 ಕ್ಕಿಂತಲೂ ಅಧಿಕ ಪ್ರಮಾಣದಲ್ಲಿ ಹೆಚ್ಚಾಗಿದ್ದು, ಪ್ರಸ್ತುತ ಎಟಿಎಫ್ ಬೆಲೆಯು ಕಳೆದ ಒಂದು ದಶಕದಲ್ಲೇ ಅತ್ಯಂತ ಗರಿಷ್ಠ ಮಟ್ಟಕ್ಕೆ ತಲುಪಿದೆ.

ಏರ್ ಇಂಡಿಯಾ, ಇಂಡಿಗೋ, ಆಕಾಶ ಸೇರಿದಂತೆ ವಿಮಾನಯಾನ ಸಂಸ್ಥೆಗಳು ಮಾರ್ಚ್‌ನಲ್ಲಿ ಇಂಧನ ಶುಲ್ಕವನ್ನು ವಿಧಿಸಿದ್ದವು. ಆದರೆ, ದರಗಳು ಸ್ಥಿರಗೊಂಡಿದ್ದರಿಂದ ಜುಲೈ ಸುಮಾರಿಗೆ ಶುಲ್ಕ ಕಡಿಮೆ ಮಾಡಿದ್ದವು. ಇದೀಗ ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಮತ್ತೆ ತೀವ್ರಗೊಂಡಿರುವುದರಿಂದ, ಕಚ್ಚಾ ತೈಲ, ಎಲ್‌ಎನ್‌ಜಿ ಮತ್ತು ವಿಮಾನ ಇಂಧನ ದರಗಳಲ್ಲಿ ಏರಿಕೆ ಆಗಿದೆ.

ಆರ್ಥಿಕ ಪರಿಸ್ಥಿತಿ ಮತ್ತು ನಿರ್ವಹಣಾ ವೆಚ್ಚಗಳನ್ನು ಸಮತೋಲನದಲ್ಲಿಡಲು, ಅನಿವಾರ್ಯವಾಗಿ ದೇಶೀಯ ಮತ್ತು ಅಂತರರಾಷ್ಟ್ರೀಯ ಮಾರ್ಗಗಳಲ್ಲಿ ಇಂಧನ ಸರ್ಚಾರ್ಜ್ ಅನ್ನು ಪರಿಷ್ಕರಿಸಲಾಗಿದೆ ಎಂದು ಸಂಸ್ಥೆ ಸ್ಪಷ್ಟಪಡಿಸಿದೆ.

ಈ ದಿನಕ್ಕಾಗಿ ನಾನು 21 ವರ್ಷ ಕಾದಿದ್ದೆ: ಅಪ್ಪ-ಅಮ್ಮನಿಗೆ ಮಗಳು ನೀಡಿದ ಸರ್ಪ್ರೈಸ್ ವಿಡಿಯೋ ವೈರಲ್!

Sathish Kumar KH — Fri, 09 Oct 2026 13:07:55 +0530

ವಿಮಾನ ಪ್ರಯಾಣ ಅನ್ನೋದು ಹಲವರಿಗೆ ಸಾಮಾನ್ಯ ವಿಷಯ. ಆದ್ರೆ, ಎಲ್ಲರಿಗೂ ಇದು ಸುಲಭವಾಗಿ ಸಿಗಲ್ಲ, ಅದರಲ್ಲೂ ಸಾಮಾನ್ಯ ವರ್ಗದ ಜನರಿಗೆ ಇದೊಂದು ದೊಡ್ಡ ಕನಸು. ಇದೀಗ, ತನ್ನ ಅಪ್ಪ-ಅಮ್ಮನನ್ನು ಮೊದಲ ಬಾರಿಗೆ ವಿಮಾನದಲ್ಲಿ ಕರೆದೊಯ್ಯಲು ಬರೋಬ್ಬರಿ 21 ವರ್ಷ ಕಾದ ಯುವತಿಯೊಬ್ಬಳ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗ್ತಿದೆ. ನಿಧಿ ಸಿಂಗ್ ಅನ್ನೋ ಯುವತಿ ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಹೃದಯಸ್ಪರ್ಶಿ ವಿಡಿಯೋ ಹಂಚಿಕೊಂಡಿದ್ದಾರೆ.

ಜೀವನದಲ್ಲಿ ಕೆಲವು ಘಟನೆಗಳು ಆಕಸ್ಮಿಕವಾಗಿ ನಡೆದುಹೋಗ್ತವೆ. ಆದ್ರೆ, ಇನ್ನು ಕೆಲವು ಕನಸುಗಳು ನನಸಾಗಲು ವರ್ಷಗಳೇ ಬೇಕಾಗುತ್ತೆ. ನಿಧಿ ಸಿಂಗ್ ಕೂಡ ತನ್ನ ಪೋಷಕರ ಜೊತೆ ಇಂಥದ್ದೇ ಒಂದು ಸುಂದರ ಜರ್ನಿ ಮಾಡಿದ್ದಾರೆ.

ಈ ದಿನಕ್ಕಾಗಿ ನಾನು 21 ವರ್ಷ ಕಾದಿದ್ದೆ

'ಈ ದಿನಕ್ಕಾಗಿ ನಾನು 21 ವರ್ಷ ಕಾದಿದ್ದೆ' ಅನ್ನೋ ಕ್ಯಾಪ್ಷನ್ ಜೊತೆ ನಿಧಿ ಈ ವಿಡಿಯೋ ಪೋಸ್ಟ್ ಮಾಡಿದ್ದಾರೆ. ನಾವು ಬೆಳೆಯುವಾಗ ಅಪ್ಪ-ಅಮ್ಮ ಹೇಗೆ ನಮ್ಮ ಕೈಹಿಡಿದು ನಡೆಯೋದನ್ನ ಕಲಿಸಿದ್ರು ಅನ್ನೋದನ್ನ ಅವರು ನೆನಪಿಸಿಕೊಂಡಿದ್ದಾರೆ. 'ಅಂದು ಅವರು ನಮಗೆ ನಡೆಯೋದನ್ನ ಕಲಿಸಿದ್ರು, ಇಂದು ಅವ್ರನ್ನ ಹಾರುವಂತೆ ಮಾಡೋದು ನಮ್ಮ ಕರ್ತವ್ಯ' ಅಂತ ಅವರು ಬರೆದುಕೊಂಡಿದ್ದಾರೆ.

ನಿಧಿ ಅವರ ಈ ಪೋಸ್ಟ್‌ಗೆ ನೆಟ್ಟಿಗರು ಭರ್ಜರಿ ಕಮೆಂಟ್ಸ್ ಮಾಡ್ತಿದ್ದಾರೆ. 'ಇದೊಂದು ಹೆಮ್ಮೆಯ ಕ್ಷಣ' ಅಂತ ಒಬ್ಬರು ಕಮೆಂಟ್ ಮಾಡಿದ್ದಾರೆ.

ಇನ್‌ಸ್ಟಾಗ್ರಾಮ್‌ನಲ್ಲಿ ಈ ಪೋಸ್ಟ್ ವೀಕ್ಷಿಸಿ

View this post on Instagram

A post shared by Nidhi Singh (@nidhithiside)

'ಎಲ್ಲರ ಜೀವನದಲ್ಲೂ ಇಂಥದ್ದೊಂದು ಅದ್ಭುತ ಕ್ಷಣ ಬರಲಿ ಅಂತ ನಾನು ಆಶಿಸ್ತೀನಿ' ಅಂತ ಮತ್ತೊಬ್ಬರು ಹಾರೈಸಿದ್ದಾರೆ. 'ತುಂಬಾ ಭಾವುಕ ಕ್ಷಣವಿದು' ಅಂತ ಹಲವರು ಹೇಳಿದ್ದಾರೆ. ಅಪ್ಪ-ಅಮ್ಮನ ಖುಷಿಗಾಗಿ ವರ್ಷಗಟ್ಟಲೆ ಕಷ್ಟಪಟ್ಟು ಕನಸು ನನಸು ಮಾಡಿದ ನಿಧಿ ಸಿಂಗ್ ಅವರ ಈ ವಿಡಿಯೋ, ಈಗ ಹಲವರ ಕಣ್ಣಂಚು ಒದ್ದೆಯಾಗುವಂತೆ ಮಾಡಿದೆ.

28 ವರ್ಷ, 29 ದೇಶ, 50,000 ಕಿ.ಮೀ.! ಕೊನೆಯ ಹಂತದಲ್ಲಿ ಸಮುದ್ರವನ್ನೇ ಈಜಿ ತಾಯಿಯ ಮನೆ ತಲುಪಿದ ವ್ಯಕ್ತಿ!

Chandrashekar GS — Wed, 07 Oct 2026 16:28:05 +0530

28 ವರ್ಷಗಳ ನಡಿಗೆ, 50,000 ಕಿ.ಮೀ ಪಯಣ! ಕೊನೆಗೂ ಬ್ರಿಟನ್ ತಲುಪಿದ ಕಾರ್ಲ್ ಬುಶ್ಬಿ

ಪ್ರಪಂಚ ಸುತ್ತಿ ಕಾಲ್ನಡಿಗೆಯಲ್ಲೇ ಮನೆಗೆ ಮರಳಬೇಕು ಎಂಬ ಕನಸನ್ನು ನನಸು ಮಾಡಲು ಹೊರಟಿದ್ದ ಬ್ರಿಟನ್‌ನ ಕಾರ್ಲ್ ಬುಶ್ಬಿ ಇದೀಗ ಬರೋಬ್ಬರಿ 28 ವರ್ಷಗಳ ಬಳಿಕ ತಾಯ್ನಾಡಿಗೆ ಕಾಲಿಟ್ಟಿದ್ದಾರೆ. 1998ರಲ್ಲಿ ಚಿಲಿಯ ಪಂಟಾ ಅರೆನಾಸ್‌ನಿಂದ ಆರಂಭವಾದ ಅವರ ಸಾಹಸಮಯ ಪಯಣ ಈಗ ಅಂತಿಮ ಹಂತ ತಲುಪಿದೆ.

29ನೇ ವಯಸ್ಸಿನಲ್ಲಿ ಆರಂಭವಾದ ವಿಶ್ವ ಪರ್ಯಟನೆ

ಕಾರ್ಲ್ ಬುಶ್ಬಿ ಮಾಜಿ ಬ್ರಿಟಿಷ್ ಪ್ಯಾರಾಟ್ರೂಪರ್. ಸೇನೆಯಲ್ಲಿದ್ದಾಗಲೇ ಪ್ರಪಂಚವನ್ನು ಕಾಲ್ನಡಿಗೆಯಲ್ಲಿ ಸುತ್ತುವ ಆಲೋಚನೆ ಅವರಿಗೆ ಬಂದಿತ್ತು. 1998ರ ನವೆಂಬರ್ 1ರಂದು ಚಿಲಿಯಿಂದ ಅವರು ತಮ್ಮ ಪ್ರಯಾಣ ಆರಂಭಿಸಿದರು.

ಈ ಸಾಹಸಕ್ಕೆ ಅವರು ‘Goliath Expedition’ ಎಂದು ಹೆಸರಿಟ್ಟರು. ಪ್ರಯಾಣದ ಆರಂಭದಲ್ಲಿ ಅವರ ಮುಂದೆ ಇದ್ದ ಗುರಿ ಸುಮಾರು 50,000 ಕಿ.ಮೀ. ದೂರವನ್ನು ಕ್ರಮಿಸಿ ಇಂಗ್ಲೆಂಡ್‌ನ ಹಲ್‌ನಲ್ಲಿರುವ ತಮ್ಮ ತಾಯಿಯ ಮನೆ ತಲುಪುವುದಾಗಿತ್ತು.

ಎರಡು ಕಠಿಣ ನಿಯಮಗಳು

ಬುಶ್ಬಿ ತಮ್ಮ ಪ್ರಯಾಣಕ್ಕೆ ಎರಡು ನಿಯಮಗಳನ್ನು ಹಾಕಿಕೊಂಡಿದ್ದರು. ಮೊದಲನೆಯದು, ಪ್ರಯಾಣವನ್ನು ಮುಂದುವರಿಸಲು ಯಾವುದೇ ಸಾರಿಗೆ ವ್ಯವಸ್ಥೆ ಬಳಸಬಾರದು. ಎರಡನೆಯದು, ಬ್ರಿಟನ್‌ಗೆ ಕಾಲಿಡುವುದು ಪ್ರಯಾಣ ಸಂಪೂರ್ಣಗೊಂಡ ಬಳಿಕ ಕಾಲ್ನಡಿಗೆಯಲ್ಲೇ ಆಗಬೇಕು.

ಈ ನಿಯಮಗಳನ್ನು ಪಾಲಿಸುವುದರಿಂದ ಅವರ ಪಯಣ ಹಲವು ವರ್ಷಗಳ ಕಾಲ ಮುಂದುವರಿಯಿತು. ವೀಸಾ ಸಮಸ್ಯೆಗಳು, ಆರ್ಥಿಕ ಬಿಕ್ಕಟ್ಟು, ಕೋವಿಡ್-19 ಸಾಂಕ್ರಾಮಿಕ ಮತ್ತು ವಿವಿಧ ದೇಶಗಳ ಗಡಿ ನಿಯಮಗಳು ಕೂಡ ಅವರ ವೇಗಕ್ಕೆ ಅಡ್ಡಿಯಾದವು.

ಅಪಾಯಕಾರಿ ಪ್ರದೇಶಗಳನ್ನೂ ದಾಟಿದ ಸಾಹಸಿ

ಕಾರ್ಲ್ ದಕ್ಷಿಣ ಅಮೆರಿಕಾದ ಹಲವು ದೇಶಗಳ ಮೂಲಕ ನಡೆದು, ಕೊಲಂಬಿಯಾ ಮತ್ತು ಪನಾಮಾ ನಡುವಿನ ಅಪಾಯಕಾರಿ ಡೇರಿಯನ್ ಗ್ಯಾಪ್ ಪ್ರದೇಶವನ್ನೂ ದಾಟಿದರು. ಬಳಿಕ ಉತ್ತರ ಅಮೆರಿಕಾದತ್ತ ಸಾಗಿದರು.

2006ರಲ್ಲಿ ಅಲಾಸ್ಕಾ ಮತ್ತು ರಷ್ಯಾ ನಡುವಿನ ಬೇರಿಂಗ್ ಜಲಸಂಧಿಯನ್ನು ಹಿಮದ ಮೇಲೆ ಕಾಲ್ನಡಿಗೆಯಲ್ಲಿ ದಾಟಿದ ಅಪರೂಪದ ಸಾಧನೆಯನ್ನೂ ಮಾಡಿದ್ದಾರೆ. ನಂತರ ಸೈಬೀರಿಯಾ, ಮಂಗೋಲಿಯಾ, ಚೀನಾ ಸೇರಿದಂತೆ ಏಷ್ಯಾದ ಹಲವು ಭಾಗಗಳನ್ನು ದಾಟಿ ಯುರೋಪ್ ತಲುಪಿದರು. 2024ರಲ್ಲಿ ಕ್ಯಾಸ್ಪಿಯನ್ ಸಮುದ್ರದ ಭಾಗವನ್ನು ಈಜುವ ಮೂಲಕ ದಾಟಿದರು.

ಕೊನೆಗೂ ಬ್ರಿಟನ್ ನೆಲಕ್ಕೆ ಕಾಲಿಟ್ಟ ಕಾರ್ಲ್

ಇತ್ತೀಚೆಗೆ ಫ್ರಾನ್ಸ್‌ನಿಂದ ಇಂಗ್ಲಿಷ್ ಚಾನೆಲ್‌ನ್ನು ಈಜಿಕೊಂಡು ದಾಟಿ ದಕ್ಷಿಣ ಇಂಗ್ಲೆಂಡ್‌ನ ಡೋವರ್ ಸಮೀಪದ ಶೇಕ್ಸ್‌ಪಿಯರ್ ಬೀಚ್‌ಗೆ ಕಾರ್ಲ್ ಬುಶ್ಬಿ ತಲುಪಿದ್ದಾರೆ. ಅಲ್ಲಿ ಕುಟುಂಬಸ್ಥರು ಮತ್ತು ಸ್ನೇಹಿತರು ಅವರನ್ನು ಸ್ವಾಗತಿಸಿದರು.

ಕಾರ್ಲ್ ಅವರ ಸುಮಾರು 50,000 ಕಿ.ಮೀ ಸಾಹಸ ಇನ್ನೂ ಸಂಪೂರ್ಣ ಮುಗಿದಿಲ್ಲ. ಅವರು ಹಲ್‌ನಲ್ಲಿರುವ ತಮ್ಮ ತಾಯಿಯ ಮನೆ ತಲುಪಬೇಕಿದೆ. ಈ ಅಂತಿಮ ಹಂತವನ್ನು ಪೂರ್ಣಗೊಳಿಸಿದರೆ, 28 ವರ್ಷಗಳ ಹಿಂದೆ ಆರಂಭಿಸಿದ ಅವರ ಐತಿಹಾಸಿಕ ಪಯಣಕ್ಕೆ ಅಧಿಕೃತ ತೆರೆ ಬೀಳಲಿದೆ.

ನಾನು ಸಾವಿಗೆ ಅಂಜಲ್ಲ, ಉದ್ದೇಶಪೂರ್ವಕ ವಿಮಾನಪತನಕ್ಕೆ ಯತ್ನಿಸಿದ್ದೆ: ಫ್ಲೈ ದುಬೈ ಉಗ್ರ ಪೈಲಟ್

Gowthami K — Mon, 05 Oct 2026 08:17:14 +0530

ರಿಯಾದ್‌: ‘ಇಸ್ರೇಲ್‌ಗೆ ಹೋಗುತ್ತಿದ್ದ ವಿಮಾನವನ್ನು ಉದ್ದೇಶಪೂರ್ವಕವಾಗಿ ಪತನ ಮಾಡಲು ಪ್ರಯತ್ನಿಸಿದ್ದೆ, ನಾನು ಸಾವಿಗೆ ಅಂಜುವುದಿಲ್ಲ’ ಎಂದು ಫ್ಲೈದುಬೈನ ಒಮಾನಿ ಪೈಲೆಟ್‌ ಹಮಾಮ್‌ ಅಲ್‌ ಹಮಾಮಿ ಸೌದಿ ಅರೇಬಿಯಾ ಪೊಲೀಸರ ವಿಚಾರಣೆ ವೇಳೆ ಹೇಳಿಕೊಂಡಿದ್ದಾನೆ ಎಂದು ‘ವಾಲ್‌ ಸ್ಟ್ರೀಟ್‌ ಜರ್ನಲ್’ ವರದಿ ಮಾಡಿದೆ.

ಪ್ರಯಾಣಿಕರ ನೆರವಿನಿಂದ ವಿಮಾನವು ಸೌದಿ ಅರೇಬಿಯಾದಲ್ಲಿ ಸುರಕ್ಷಿತವಾಗಿ ಇಳಿದ ಬಳಿಕ ಆರೋಪಿ ಹಮಾಮಿಯನ್ನು ವಶಕ್ಕೆ ಪಡೆದಿದ್ದ ಸೌದಿ ಅರೇಬಿಯಾದ ಅಧಿಕಾರಿಗಳು ಪ್ರಾಥಮಿಕ ವಿಚಾರಣೆ ನಡೆಸಿದ್ದಾರೆ. ಆಗ ವಿಮಾನವನ್ನು ಪತನಗೊಳಿಸುವ ತನ್ನ ಉದ್ದೇಶ ಬಹಿರಂಗಪಡಿಸಿದ್ದಾನೆ ಎಂದು ವರದಿ ಹೇಳಿದೆ.

ದುಬೈನಿಂದ ಇಸ್ರೇಲ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ ಪೈಲಟ್‌ ಆಗಿದ್ದ ಹಮಾಮಿ ಭಾರತೀಯ ಮೂಲದ ಸಹ ಪೈಲಟ್‌ ಸ್ಮಿತ್‌ ಮಚ್ಚಾರ್ ಮೇಲೆ ಕಿರು ಕೊಡಲಿಯಿಂದ ಹಲ್ಲೆ ನಡೆಸಿದ್ದ. ನಂತರ ವಿಮಾನವನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಉದ್ದೇಶಿಸಿದ್ದ. ಆದರೆ, ಗಂಭೀರ ಗಾಯಗೊಂಡ ಸ್ಥಿತಿಯಲ್ಲೂ ಸ್ಮಿತ್‌ ತೋರಿದ ಪ್ರತಿರೋಧ ಹಾಗೂ ಪ್ರಯಾಣಿಕರ ಸಕಾಲಿಕ ಮಧ್ಯಪ್ರವೇಶದಿಂದಾಗಿ ಭಾರೀ ದುಷ್ಕೃತ್ಯವೊಂದು ತಪ್ಪಿತ್ತು ಹಾಗೂ ವಿಮಾನದಲ್ಲಿದ್ದ 180 ಮಂದಿ ಜೀವ ಉಳಿದಿದೆ. ಈ ಕುರಿತ ತನಿಖೆ ಮುಂದುವರಿದಿದೆ.

ವರದಿಗಳ ಪ್ರಕಾರ ಬಂಧಿತ ಹಮಾಮಿ ಪೈಲಟ್‌ ಆಗುವ ಕುರಿತು ತೀವ್ರ ಹುಚ್ಚು ಇತ್ತು. 2022ರಲ್ಲಿ ಆತ ಸಾಮಾಜಿಕ ಜಾಲತಾಣದಲ್ಲಿ ಹಾಕಿದ್ದ ಪೋಸ್ಟ್‌ನಲ್ಲಿ ಈ ವಿಚಾರ ಹಂಚಿಕೊಂಡಿದ್ದ. ಏಕಾಂಗಿಯಾಗಿ ಮೊದಲ ಬಾರಿ ವಿಮಾನ ಹಾರಿಸಿದ ಹಾಗೂ ಪ್ರಯಾಣಿಕರಿದ್ದ ವಿಮಾನವನ್ನು ಮೊದಲ ಬಾರಿ ಲ್ಯಾಂಡ್‌ ಮಾಡುವ ಅನುಭವವನ್ನು ಆತ ಮರೆಯಲಾಗದ ಅನುಭವ ಎಂದು ಬರೆದುಕೊಂಡಿದ್ದ. ಪೈಲಟ್‌ ಆಗುವ ಕುರಿತು ತೀವ್ರ ಆಸಕ್ತಿ ಹೊಂದಿದ್ದರೂ ಆತ ಹೇಗೆ ಮೂಲಭೂತವಾದದತ್ತ ತಿರುಗಿದ ಎಂಬ ಕುರಿತು ಇದೀಗ ಕುತೂಹಲ ಮೂಡಿದೆ.

ಉಗ್ರ ಸಹ-ಪೈಲಟ್‌ ರಕ್ಷಣೆಗೆ ವಿಮಾನದ ಸಿಬ್ಬಂದಿ ಯತ್ನ!

‘ಫ್ಲೈದುಬೈ ವಿಮಾನವನ್ನು ಅಪಹರಿಸಲು ಯತ್ನಿಸಿದ್ದ ಒಮಾನಿ ಸಹ-ಪೈಲಟ್‌ ಹಮಾಮ್‌ ಅಲ್‌ ಹಮಾಮಿಯನ್ನು ಹಿಡಿದು ಆತನ ಕೈಗಳನ್ನು ಹಿಂದಕ್ಕೆ ಕಟ್ಟಿದ್ದೆವು. ಆದರೆ ವಿಮಾನದ ಸಿಬ್ಬಂದಿ ಆತನನ್ನು ಬಿಟ್ಟುಬಿಡುವಂತೆ ನಮ್ಮನ್ನು ಒತ್ತಾಯಿಸುತ್ತಿದ್ದರು’ ಎಂಬ ಆಘಾತಕಾರಿ ಮಾಹಿತಿಯನ್ನು ಘಟನೆ ವೇಳೆ ಹಾಜರಿದ್ದ ಪ್ರಯಾಣಿಕರು ತಿಳಿಸಿದ್ದಾರೆ. ಇದು ವಿಮಾನದ ಸಿಬ್ಬಂದಿ ಮೇಲೆಯೇ ಸಂಶಯ ಮೂಡುವಂತೆ ಮಾಡಿದೆ. ಶಂಕಿತ ಉಗ್ರ ಸಹ-ಪೈಲಟ್‌ನನ್ನು ಹಿಡಿಯಲು ಸಹಾಯ ಮಾಡಿದ ಇಬ್ಬರು ಪ್ರಯಾಣಿಕರು ಸಂದರ್ಶನವೊಂದರಲ್ಲಿ ಈ ವಿಷಯ ತಿಳಿಸಿದ್ದಾರೆ.

‘ಅವರು (ಸಿಬ್ಬಂದಿ) ಭಯೋತ್ಪಾದಕನನ್ನು ಬಿಟ್ಟುಬಿಡುವಂತೆ ಹಾಗೂ ಆತನ ಕೈಗೆ ಕಟ್ಟಿದ್ದ ಹಗ್ಗ ಬಿಚ್ಚುವಂತೆ ನಮ್ಮನ್ನು ಕೇಳುತ್ತಿದ್ದರು. ಏಕೆ ಎಂದು ನಮಗೆ ತಿಳಿದಿರಲಿಲ್ಲ, ತಕ್ಷಣವೇ ನಮಗೆ ಅವರ ಮೇಲೆ ಸಂಶಯ ಉಂಟಾಯಿತು. ‘ನೀವು ದೇವರಲ್ಲ. ನೀವು ಅವನನ್ನು ಕೊಲ್ಲಲು ಸಾಧ್ಯವಿಲ್ಲ’ ಎಂದು ನಮಗೆ ಹೇಳುತ್ತಿದ್ದರು. ಆಗ ನಾವು, ‘ನಮಗೆ ಅವನನ್ನು ಕೊಲ್ಲುವ ಉದ್ದೇಶವಿಲ್ಲ. ಆದರೆ ಅವನು ನಮ್ಮನ್ನೆಲ್ಲ ಕೊಲ್ಲದಂತೆ ತಡೆಯುವುದು ಮಾತ್ರ ನಮಗೆ ಬೇಕಿತ್ತು’ ಎಂದೆ’ ಎಂದು ಉಗ್ರನನ್ನು ಹಿಡಿಯಲು ಸಹಾಯ ಮಾಡಿದ ತ್ಜ್ವಿಕಾ ಮಾನೆಸ್ ತಿಳಿಸಿದ್ದಾರೆ. ಬಳಿಕ ಪೊಲೀಸರಿಗೆ ತಾವು ಪೈಲಟ್‌ನನ್ನು ಹಸ್ತಾಂತರಿಸಿದೆವು ಎಂದು ಅವರು ಹೇಳಿದ್ದಾರೆ.

ನಮ್ಮ ಮೆಟ್ರೋ ಗುಲಾಬಿ ಮಾರ್ಗ: ಕಾಳೇನ ಅಗ್ರಹಾರ-ತಾವರೆಕೆರೆ ಸುರಕ್ಷತಾ ತಪಾಸಣೆ ಪೂರ್ಣ, ಶೀಘ್ರ ರೈಲು ಸಂಚಾರ ಆರಂಭ!

Sathish Kumar KH — Thu, 08 Oct 2026 15:18:10 +0530

ಬೆಂಗಳೂರಿನ ನಮ್ಮ ಮೆಟ್ರೋ ಗುಲಾಬಿ ಮಾರ್ಗದ ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ ಎತ್ತರಿಸಿದ ಮಾರ್ಗದಲ್ಲಿ 3 ದಿನಗಳ ಸಿಎಂಆರ್‌ಎಸ್ ಸುರಕ್ಷತಾ ತಪಾಸಣೆ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ಈ ಮಾರ್ಗವು ಸಾರ್ವಜನಿಕ ಬಳಕೆಗೆ ಮುಕ್ತವಾದರೆ, ನಮ್ಮ ಮೆಟ್ರೋದ ಒಟ್ಟು ಕಾರ್ಯಾಚರಣಾ ಜಾಲವು 100 ಕಿ.ಮೀ ಗಡಿ ದಾಟಲಿದೆ.

ಬೆಂಗಳೂರು (ಅ.08): ಬನ್ನೇರುಘಟ್ಟ ರಸ್ತೆ ಹಾಗೂ ದಕ್ಷಿಣ ಬೆಂಗಳೂರಿನ ಜನತೆಯ ಬಹುನಿರೀಕ್ಷಿತ 'ನಮ್ಮ ಮೆಟ್ರೋ' ಗುಲಾಬಿ ಮಾರ್ಗದ (Pink Line) ವಾಣಿಜ್ಯ ಸಂಚಾರ ಆರಂಭಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ 7.5 ಕಿಲೋಮೀಟರ್ ಉದ್ದದ ಎತ್ತರಿಸಿದ (Elevated) ಮಾರ್ಗದಲ್ಲಿ ಮೆಟ್ರೋ ರೈಲ್ವೆ ಸುರಕ್ಷತಾ ಆಯುಕ್ತರು (CMRS) ನಡೆಸುತ್ತಿದ್ದ ಮೂರು ದಿನಗಳ ಮಹತ್ವದ ಶಾಸನಬದ್ಧ ಸುರಕ್ಷತಾ ತಪಾಸಣೆ ಯಶಸ್ವಿಯಾಗಿ ಪೂರ್ಣಗೊಂಡಿದೆ ಎಂದು ಬೆಂಗಳೂರು ಮೆಟ್ರೋ ರೈಲು ನಿಗಮ (BMRCL) ಪ್ರಕಟಣೆಯಲ್ಲಿ ತಿಳಿಸಿದೆ.

ದಕ್ಷಿಣ ವಲಯದ ಸಿಎಂಆರ್‌ಎಸ್ ಆಯುಕ್ತರಾದ ಶ್ರೀ ವಿ. ವೆಂಕಟಸುಬ್ರಮಣಿಯನ್ ಅವರ ನೇತೃತ್ವದ ತಜ್ಞರ ತಂಡವು ಅಕ್ಟೋಬರ್ 6 ರಿಂದ 8 ರವರೆಗೆ ಸತತ ಮೂರು ದಿನಗಳ ಕಾಲ ಮಾರ್ಗದುದ್ದಕ್ಕೂ ಸಾಲು ಸಾಲು ಪರೀಕ್ಷೆಗಳನ್ನು ನಡೆಸಿದೆ.

ಅಕ್ಟೋಬರ್ 6: ಮುಖ್ಯ ಮಾರ್ಗ ಹಾಗೂ ಅದಕ್ಕೆ ಸಂಬಂಧಿಸಿದ ಸಿವಿಲ್ ಮೂಲಸೌಕರ್ಯಗಳನ್ನು ಮೋಟಾರ್ ಟ್ರಾಲಿ ಮೂಲಕ ಕೂಲಂಕಷವಾಗಿ ಪರಿಶೀಲಿಸಲಾಯಿತು.

ಅಕ್ಟೋಬರ್ 7: ಕೊತ್ತನೂರು ಡಿಪೋದಲ್ಲಿರುವ ಸೌಲಭ್ಯಗಳನ್ನು ತಪಾಸಣೆ ಮಾಡಿದ್ದಲ್ಲದೆ, ಮುಖ್ಯ ಮಾರ್ಗದಲ್ಲಿ ಮೆಟ್ರೋ ರೈಲುಗಳ ಪ್ರಾಯೋಗಿಕ ಸಂಚಾರ (Train trials and testing) ನಡೆಸಿ ವೇಗ ಮತ್ತು ನಿಯಂತ್ರಣವನ್ನು ಪರಿಶೀಲಿಸಲಾಯಿತು.

ಅಕ್ಟೋಬರ್ 8: ಬೈಯಪ್ಪನಹಳ್ಳಿಯಲ್ಲಿರುವ ಅತ್ಯಾಧುನಿಕ ಕಾರ್ಯಾಚರಣೆ ನಿಯಂತ್ರಣ ಕೇಂದ್ರಕ್ಕೆ (OCC) ಭೇಟಿ ನೀಡಿ ಸಿಗ್ನಲಿಂಗ್ ಹಾಗೂ ಟ್ರಾಫಿಕ್ ಕಂಟ್ರೋಲ್ ವ್ಯವಸ್ಥೆಯನ್ನು ಪರೀಕ್ಷಿಸುವ ಮೂಲಕ ತಪಾಸಣೆಯನ್ನು ಪೂರ್ಣಗೊಳಿಸಲಾಯಿತು.

ಈ ಎತ್ತರಿಸಿದ ಮಾರ್ಗವು ಒಟ್ಟು 6 ಮೆಟ್ರೋ ನಿಲ್ದಾಣಗಳನ್ನು ಒಳಗೊಂಡಿದೆ:

ಕಾಳೇನ ಅಗ್ರಹಾರ (Kalena Agrahara)
ಹುಳಿಮಾವು (Hulimavu)
ಐಐಎಂಬಿ (IIMB)
ಜೆ.ಪಿ. ನಗರ 4ನೇ ಹಂತ (JP Nagar 4th Phase)
ಜಯದೇವ ಆಸ್ಪತ್ರೆ (Jayadeva Hospital - ಇಂಟರ್‌ಚೇಂಜ್ ನಿಲ್ದಾಣ)
ತಾವರೆಕೆರೆ (Tavarekere)

ಬಿಎಂಆರ್‌ಸಿಎಲ್ ಈಗಾಗಲೇ ಆಗಸ್ಟ್‌ನಲ್ಲಿ ಆರ್‌ಡಿಎಸ್ಒ (RDSO) ಸಂಸ್ಥೆಯಿಂದ ವೇಗ ಪ್ರಮಾಣಪತ್ರವನ್ನು ಪಡೆದುಕೊಂಡಿದೆ. ಇದಾದ ಬಳಿಕ ರೈಲ್ವೆ ಮಂಡಳಿಯಿಂದ ಮೆಟ್ರೋ ಬೋಗಿಗಳಿಗೆ ತಾತ್ಕಾಲಿಕ ಅನುಮೋದನೆ ಮತ್ತು ಸ್ವತಂತ್ರ ಸುರಕ್ಷತಾ ಮೌಲ್ಯಮಾಪಕರಿಂದ (ISA) ಸಿಗ್ನಲಿಂಗ್ ವ್ಯವಸ್ಥೆಗೆ ಸುರಕ್ಷತಾ ಪ್ರಮಾಣೀಕರಣ ದೊರೆತಿದೆ. ಈಗ ಸಿಎಂಆರ್‌ಎಸ್ ಪರಿಶೀಲನಾ ವರದಿ ಕೈಸೇರಲಿದ್ದು, ಅವರು ನೀಡುವ ಅಂತಿಮ ಷರತ್ತುಗಳನ್ನು ಪಾಲಿಸಿದ ಬಳಿಕ ಸಾರ್ವಜನಿಕ ಸೇವೆಗೆ ಅಧಿಕೃತ ಹಸಿರು ನಿಶಾನೆ ದೊರೆಯಲಿದೆ.

ಈ 7.5 ಕಿ.ಮೀ ಮಾರ್ಗವು ಸಾರ್ವಜನಿಕ ಬಳಕೆಗೆ ಮುಕ್ತವಾದ ಬೆನ್ನಲ್ಲೇ, ನಮ್ಮ ಮೆಟ್ರೋದ ಒಟ್ಟು ಕಾರ್ಯಾಚರಣಾ ಜಾಲವು ಪ್ರಸ್ತುತ ಇರುವ 96.10 ಕಿ.ಮೀ ನಿಂದ ಬರೋಬ್ಬರಿ 103.60 ಕಿ.ಮೀಗೆ ವಿಸ್ತರಣೆಯಾಗಲಿದೆ. ಇದರೊಂದಿಗೆ ದೇಶದಲ್ಲೇ 100 ಕಿ.ಮೀಗೂ ಹೆಚ್ಚು ವಿಸ್ತಾರವಾದ ಮೆಟ್ರೋ ಹೊಂದಿದ ನಗರಗಳ ಸಾಲಿಗೆ ಬೆಂಗಳೂರು ಸೇರ್ಪಡೆಯಾಗಲಿದೆ. ಬನ್ನೇರುಘಟ್ಟ ರಸ್ತೆಯ ಭೀಕರ ಟ್ರಾಫಿಕ್ ಕಿರಿಕಿರಿಯಿಂದ ಕಂಗಾಲಾಗಿದ್ದ ವಾಹನ ಸವಾರರಿಗೆ ಹಾಗೂ ಐಟಿ ಉದ್ಯೋಗಿಗಳಿಗೆ ಈ ಮಾರ್ಗ ದೊಡ್ಡ ವರದಾನವಾಗಲಿದೆ.

Gadaikallu Trek: ಮಂಜಿನ ಮುಸುಕಿನಲ್ಲಿ ಗಡಾಯಿಕಲ್ಲು ಟ್ರೆಕ್ಕಿಂಗ್: ಕರ್ನಾಟಕದ ಅದ್ಭುತ ತಾಣವಿದು!

Govindaraj S — Sat, 03 Oct 2026 20:06:59 +0530

ಸಾಹಸ ಪ್ರಿಯರಿಗೆ ಹೇಳಿ ಮಾಡಿಸಿದ ತಾಣ ಗಡಾಯಿಕಲ್ಲು ಅಥವಾ ಜಮಾಲಾಬಾದ್ ಕೋಟೆ. ಮಳೆಗಾಲದಲ್ಲಿ ಹಸಿರಿನಿಂದ ಕಂಗೊಳಿಸುವ ಈ ಐತಿಹಾಸಿಕ ತಾಣದ ಟ್ರೆಕ್ಕಿಂಗ್ ಅನುಭವವೇ ರೋಮಾಂಚಕ.

ಮೈಸೂರು ದಸರಾಗೆ ವಿಶೇಷ ರೈಲುಗಳ ವ್ಯವಸ್ಥೆ, ಸ್ಪೆಷಲ್ 8 ಟ್ರೈನ್‌ಗಳ ಟೈಮಿಂಗ್ಸ್ ಲಿಸ್ಟ್

Ganesh Mabla Gowda — Tue, 06 Oct 2026 18:31:41 +0530

ಮೈಸೂರು: ನಾಡ ಹಬ್ಬ ದಸರಾ ಇನ್ನೇನು ಶುರುವಾಗಲಿದೆ. ಈಗಾಲೇ ಸಾಂಸ್ಕೃತಿಕ ನಗರಿ ಜಗಮಗಿಸುತ್ತಿದ್ದು ನಿಧಾನಕ್ಕೆ ಜನದಟ್ಟಣೆ ಹೆಚ್ಚಾಗುತ್ತಿದೆ. ಲಕ್ಷಾಂತರ ಜನರು ಒಟ್ಟಿಗೆ ಸೇರುತ್ತಾರೆ. ಹೀಗಾಗಿ ಮೈಸೂರು ದಸರಾಗೆ ಹೋಗಬೇಕು ಅಂದುಕೊಂಡವರಿಗೆ ರೈಲ್ವೇ ಇಲಾಖೆ ಗುಡ್‌ನ್ಯೂಸ್ ನೀಡಿದೆ.

ಕೆಎಸ್‌ಆರ್ ಬೆಂಗಳೂರು–ಅಶೋಕಪುರಂ

ಪ್ರಯಾಣಿಕರ ದಟ್ಟಣೆ ನಿಯಂತ್ರಿಸಲು ನೈರುತ್ಯ ರೈಲ್ವೆ ವಿಶೇಷ ರೈಲುಗಳ ವ್ಯವಸ್ಥೆಯನ್ನ ಮಾಡಿದೆ. ಬೆಂಗಳೂರು–ಮೈಸೂರು–ಚಾಮರಾಜನಗರ ಮಾರ್ಗದಲ್ಲಿ ವಿಶೇಷ ರೈಲುಗಳು ಸಂಚಾರ ಮಾಡಲಿವೆ. ಕೆಎಸ್‌ಆರ್ ಬೆಂಗಳೂರು–ಅಶೋಕಪುರಂ ನಡುವೆ 3 ಟ್ರಿಪ್ ವಿಶೇಷ ರೈಲು ಪ್ರಯಾಣಿಸಲಿದೆ. ಅಕ್ಟೋಬರ್ 19 ರಿಂದ 21ರವರೆಗೆ ವಿಶೇಷ ರೈಲು ಸಂಚಾರ ನಡೆಯಲಿದೆ.

ಟ್ರೈನ್ ನಂಬರ್ 06285: ಕೆಎಸ್‌ಆರ್ ಬೆಂಗಳೂರಿನಿಂದ 12:15ಕ್ಕೆ ಹೊರಟು, ಅದೇ ದಿನ ಅಶೋಕಪುರಂಗೆ 15:40ಕ್ ಆಗಮನ
ಟ್ರೈನ್ ನಂಬರ್ 06286: ಅಶೋಕಪುರಂನಿಂದ 16:10ಕ್ಕೆ ಹೊರಟು ಅದೇ ದಿನ ಕೆಎಸ್‌ಆರ್ ಬೆಂಗಳೂರಿಗೆ 20:00ಕ್ಕೆ ತಲುಪಲಿದೆ

ಪ್ರತಿ ದಿಕ್ಕಿನಲ್ಲಿ ಮೂರು ಸಂಚಾರಗಳು ಇರಲಿವೆ, 8 ಮೆಮು ಬೋಗಿಗಳು ಇರಲಿವೆ. ಕೆಂಗೇರಿ, ಬಿಡದಿ, ರಾಮನಗರ, ಚನ್ನಪಟ್ಟಣ, ಮದ್ದೂರು, ಮಂಡ್ಯ, ಯಲಿಯೂರು, ಬ್ಯಾಡರಹಳ್ಳಿ, ಪಾಂಡವಪುರ, ಶ್ರೀರಂಗಪಟ್ಟಣ, ನಾಗನಹಳ್ಳಿ, ಮೈಸೂರು ಮತ್ತು ಚಾಮರಾಜಪುರಂದಲ್ಲಿ ನಿಲುಗಡೆ ಮಾಡಲಿವೆ.

ಇನ್ನು.. ಕೆಎಸ್‌ಆರ್ ಬೆಂಗಳೂರು–ಮೈಸೂರು ನಡುವೆ 6 ಟ್ರಿಪ್ ವಿಶೇಷ ರೈಲು ನಿಯೋಜನೆಗೊಂಡಿದೆ. ಅಕ್ಟೋಬರ್ 16ರಿಂದ 21ರವರೆಗೆ ರಾತ್ರಿ ವಿಶೇಷ ರೈಲು ಸೇವೆ ಇರಲಿದೆ. ಮೈಸೂರು–ಕೆಎಸ್‌ಆರ್ ಬೆಂಗಳೂರು ನಡುವೆ 6 ಟ್ರಿಪ್ ಇರಲಿದೆ.

ಟ್ರೈನ್ ನಂಬರ್ 06297: ಮೈಸೂರಿನಿಂದ 23:15ಕ್ಕೆ ಹೊರಟು, ಕೆಎಸ್‌ಆರ್ ಬೆಂಗಳೂರಿಗೆ ಮರುದಿನ 02:50ಕ್ಕೆ ತಲುಪಲಿದೆ.
ಟ್ರೈನ್ ನಂಬರ್ 06298: ಕೆಎಸ್‌ಆರ್ ಬೆಂಗಳೂರಿನಿಂದ 03:15ಕ್ಕೆ ಹೊರಟು, ಅದೇ ದಿನ ಮೈಸೂರಿಗೆ 06:30ಕ್ಕೆ ತಲುಪಲಿದೆ.

ಪ್ರತಿ ದಿಕ್ಕಿನಲ್ಲಿ ಆರು ಸಂಚಾರಗಳು ಇರುತ್ತವೆ. 19 ಬೋಗಿಗಳು ಇರಲಿವೆ. ಶ್ರೀರಂಗಪಟ್ಟಣ, ಪಾಂಡವಪುರ, ಬ್ಯಾಡರಹಳ್ಳಿ, ಮಂಡ್ಯ, ಮದ್ದೂರು, ಚನ್ನಪಟ್ಟಣ, ರಾಮನಗರ, ಬಿಡದಿ ಮತ್ತು ಕೆಂಗೇರಿಯಲ್ಲಿ ನಿಲುಗಡೆ ಆಗಿದೆ.

ಅದೇ ರೀತಿ.. ಮೈಸೂರು–ಚಾಮರಾಜನಗರ ನಡುವೆ 2 ವಿಶೇಷ ರೈಲು ಸೇವೆ ಇರಲಿದೆ. ದಸರಾ ಪ್ರಯಾಣಿಕರ ದಟ್ಟಣೆ ನಿಭಾಯಿಸಲು ರೈಲ್ವೆ ಇಲಾಖೆ ಹೆಚ್ಚುವರಿ ರೈಲುಗಳ ವ್ಯವಸ್ಥೆ ಮಾಡಿಕೊಂಡಿದೆ. ಎಲ್ಲಾ ವಿಶೇಷ ರೈಲುಗಳು ಕಾಯ್ದಿರಿಸದ ರೈಲುಗಳಾಗಿ ಸಂಚಾರ ಮಾಡಲಿವೆ.

ಟ್ರೈನ್ ನಂಬರ್ 06289: ಅಕ್ಟೋಬರ್ 21ರಂದು ಮೈಸೂರಿನಿಂದ 00:10ಕ್ಕೆ ಹೊರಟು ಅದೇ ದಿನ ಚಾಮರಾಜನಗರಕ್ಕೆ 02:00ಕ್ಕೆ ಬರಲಿದೆ.
ಟ್ರೈನ್ ನಂಬರ್‍‌ 06290: ಅಕ್ಟೋಬರ್ 21ರಂದು ಚಾಮರಾಜನಗರದಿಂದ 02:30ಕ್ಕೆ ಹೊರಟು ಅದೇ ದಿನ ಮೈಸೂರಿಗೆ 04:15ಕ್ಕೆ ತಲುಪಲಿದೆ.
ಟ್ರೈನ್ ನಂಬರ್ 06293: ಅಕ್ಟೋಬರ್ 21ರಂದು ಮೈಸೂರಿನಿಂದ 21:30ಕ್ಕೆ ಹೊರಟು, ಅದೇ ದಿನ ಚಾಮರಾಜನಗರಕ್ಕೆ 23:20ಕ್ಕೆ ತಲುಪಲಿದೆ.
ಟ್ರೈನ್ ನಂಬರ್ 06294: ಅಕ್ಟೋಬರ್ 21ರಂದು ಚಾಮರಾಜನಗರದಿಂದ 23:50ಕ್ಕೆ ಹೊರಟು, ಅಕ್ಟೋಬರ್ 22ರಂದು 01:50ಕ್ಕೆ ಮೈಸೂರಿಗೆ ತಲುಪಲಿದೆ.