Asianet Suvarna News

ಕಡಲತಡಿಯಿಂದ ಹಿಮಾಲಯದ ಮಂಜಿನವರೆಗೆ: ಆಟೋರಿಕ್ಷಾದಲ್ಲಿ ಕಾಶ್ಮೀರ ತಲುಪಿ ಮಂಗಳೂರಿನ ನಾಲ್ವರು ಸ್ನೇಹಿತರ ಸಾಹಸ!

Gowthami K — Tue, 27 Oct 2026 08:33:25 +0530

ವರದಿ: ವಜ್ರ ಗುಜರನ್ ಮಾಡೂರು

ಉಳ್ಳಾಲ : ಬದುಕಿಗೆ ಆಸರೆಯಾಗಿರುವ ಆಟೋ ಸಾವಿರಾರು ಕಿಲೋಮೀಟರ್ ದೂರದ ಕಾಶ್ಮೀರದತ್ತ ನಾಲ್ವರು ಸ್ನೇಹಿತರ ಕನಸನ್ನು ಹೊತ್ತು ಸಾಗುತ್ತಿದೆ. ಊರಿನ ರಸ್ತೆಗಳಲ್ಲಿ ಸಲೀಸಾಗಿ ಓಡುತ್ತಿದ್ದ ಇದು, ಇಂದು ಹಿಮಾಚ್ಛಾದಿತ ಪರ್ವತಗಳ ನಡುವೆ ಕೊರೆಯುವ ಚಳಿಯನ್ನು ಎದುರಿಸುತ್ತಿದೆ. 15 ಸಾವಿರ ಅಡಿ ಎತ್ತರದಲ್ಲಿ ಗೇರ್ ಜಾಮ್ ಆಗಿ ನಿಂತರೂ, ಈ ಆಟೋ ಹೊತ್ತೊಯ್ದ ಕನಸಿನ ಪಯಣ ಮಾತ್ರ ನಿಂತಿಲ್ಲ!.

ಈ ಸಾಹಸಕ್ಕೆ ಕೈಹಾಕಿರುವುದು ದ.ಕ. ಜಿಲ್ಲೆ ಉಳ್ಳಾಲ ತಾಲೂಕಿನ ದೇರಳಕಟ್ಟೆಯ ನಾಲ್ವರು ಯುವಕರು. ಸುಮಾರು ಆರೇ‍ಳು ವರ್ಷಗಳಿಂದ ಮನಸ್ಸಿನಲ್ಲಿದ್ದ ಕಾಶ್ಮೀರ ಪ್ರವಾಸದ ಕನಸಿಗೆ ಅ.10ರಂದು ಚಾಲನೆ ನೀಡಿದವರು ದೇರಳಕಟ್ಟೆಯ ಸಾದಿಕ್, ಹಜೀಮ್, ಹಸನ್ ಮತ್ತು ಹಫೀದ್. ಐಷಾರಾಮಿ ಕಾರುಗಳ ಬದಲಿಗೆ ಸಾಮಾನ್ಯ ಆಟೋರಿಕ್ಷಾವನ್ನೇ ಆಯ್ಕೆ ಮಾಡಿಕೊಂಡ ಈ ನಾಲ್ವರು ಸ್ನೇಹಿತರು, ತಮ್ಮ ಕನಸಿಗೆ ಅದನ್ನೇ ಸಾರಥಿಯನ್ನಾಗಿಸಿಕೊಂಡಿದ್ದಾರೆ.

ಈ ಹಿಂದೆ ನಾಲ್ವರೂ ಆಟೋರಿಕ್ಷಾ ಚಾಲನೆ ಹಾಗೂ ಅದಕ್ಕೆ ಸಂಬಂಧಿಸಿದ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದರು. ಪ್ರಸ್ತುತ ಸಾದಿಕ್ ವೈಫೈ ಟೆಕ್ನಿಷಿಯನ್, ಹಜೀಮ್ ವೆಲ್ಡಿಂಗ್ ಕ್ಷೇತ್ರದಲ್ಲಿ, ಹಸನ್ ಆಟೋ ಚಾಲಕರಾಗಿ ಹಾಗೂ ಹಫೀದ್ ಕ್ರಾಫ್ಟ್ ಅಂಗಡಿಯಲ್ಲಿ ಕೆಲಸ ಮಾಡುತ್ತಿದ್ದಾರೆ.

ಈ ಹಿಂದೆ ಆಟೋರಿಕ್ಷಾದಲ್ಲೇ ಮಡಿಕೇರಿ, ಚಿಕ್ಕಮಗಳೂರು ಸೇರಿದಂತೆ ಹಲವು ಪ್ರದೇಶಗಳಿಗೆ ಪ್ರಯಾಣಿಸಿದ್ದರು. ಕಾಶ್ಮೀರದವರೆಗೂ ಇದೇ ರೀತಿಯಲ್ಲಿ ತೆರಳಬೇಕೆಂಬ ಆಸೆ ಹಲವು ಬಾರಿ ಮೂಡಿದ್ದರೂ, ವಿವಿಧ ಕಾರಣಗಳಿಂದ ಯೋಜನೆ ಮುಂದೂಡಿಕೆಯಾಗುತ್ತಿತ್ತು.

ಸಾದಿಕ್ ಅವರ 2017ರ ಮಾದರಿಯ ಆಟೋರಿಕ್ಷಾವನ್ನು ಈ ಪ್ರಯಾಣಕ್ಕೆ ಸಿದ್ಧಪಡಿಸಲಾಗಿದೆ. ವಾಹನದ ತಾಂತ್ರಿಕ ಸ್ಥಿತಿ ಪರಿಶೀಲಿಸಿ, ದೀರ್ಘ ಪ್ರಯಾಣಕ್ಕೆ ಅಗತ್ಯ ಸಿದ್ಧತೆ ಮಾಡಿಕೊಂಡು ಯಾತ್ರೆ ಆರಂಭಿಸಿದ್ದಾರೆ.

1.5 ಲಕ್ಷ ರು. ಅಂದಾಜು ವೆಚ್ಚ:

ಪ್ರವಾಸಕ್ಕೆ ಸುಮಾರು 1.5 ಲಕ್ಷ ರು. ವೆಚ್ಚ ಅಂದಾಜು ಮಾಡಿಕೊಂಡು ಹೊರಟಿದ್ದ ಸ್ನೇಹಿತರಿಗೆ, ಈಗಾಗಲೇ ಒಂದು ಲಕ್ಷ ರು.ಗಿಂತ ಅಧಿಕ ಖರ್ಚಾಗಿದೆ. ಪ್ರಯಾಣ ಪೂರ್ಣಗೊಳ್ಳುವ ವೇಳೆಗೆ ಒಟ್ಟು ವೆಚ್ಚ ಎಷ್ಟಾಗಬಹುದು ಎಂಬುದನ್ನು ಕಾದು ನೋಡಬೇಕಿದೆ ಎಂದು ಹಫೀದ್ ತಿಳಿಸಿದ್ದಾರೆ.

ಮಹಾರಾಷ್ಟ್ರ, ಮಧ್ಯಪ್ರದೇಶ, ಉತ್ತರ ಪ್ರದೇಶ, ಹರಿಯಾಣ ಹಾಗೂ ದೆಹಲಿ ಮಾರ್ಗವಾಗಿ ಕಾಶ್ಮೀರ ತಲುಪಿದ್ದಾರೆ. ಮಧ್ಯಪ್ರದೇಶದಲ್ಲಿ ಆಟೋರಿಕ್ಷಾಕ್ಕೆ ಎಲ್‌ಪಿಜಿ ದೊರೆತಿದ್ದು, ನಂತರ ಪೆಟ್ರೋಲ್ ಬಳಸಿ ಪ್ರಯಾಣ ಮುಂದುವರಿಸಿದ್ದಾರೆ.

ಕಾಶ್ಮೀರದಲ್ಲಿ ನಾಲ್ಕು ದಿನಗಳ ಕಾಲ ತಂಗಿದ್ದ ಸ್ನೇಹಿತರು, ಲಡಾಖ್‌ನಲ್ಲಿ ಎರಡು ದಿನಗಳಿಂದ ಇದ್ದು ಅಲ್ಲಿಂದ ಮನಾಲಿಯತ್ತ ಪ್ರಯಾಣ ಬೆಳೆಸಿದ್ದಾರೆ. ಬಳಿಕ ರಾಜಸ್ಥಾನ ಮಾರ್ಗವಾಗಿ ಊರಿಗೆ ಮರಳುವ ಯೋಜನೆ ರೂಪಿಸಿದ್ದಾರೆ. ಆದರೆ ಹವಾಮಾನ ಮತ್ತು ವಾಹನದ ತಾಂತ್ರಿಕ ಸಮಸ್ಯೆಗಳಿಂದಾಗಿ ಪ್ರಯಾಣದ ಅವಧಿ ಹೆಚ್ಚಾಗುವ ಸಾಧ್ಯತೆಯಿದೆ. ಇನ್ನೂ ಕನಿಷ್ಠ 12 ದಿನಗಳು ಬೇಕಾಗಬಹುದು ಎಂದು ಅಂದಾಜಿಸಿದ್ದಾರೆ.

15 ಸಾವಿರ ಅಡಿ ಎತ್ತರದಲ್ಲಿ ಗೇರ್ ಜಾಮ್!

ಪ್ರವಾಸದ ವೇಳೆ ಎದುರಾದ ಅತಿ ದೊಡ್ಡ ಸವಾಲು ಆಟೋರಿಕ್ಷಾದ ಗೇರ್ ಜಾಮ್ ಸಮಸ್ಯೆ. ಲಡಾಖ್ ಪ್ರದೇಶದಲ್ಲಿ ಎತ್ತರದ ಪರ್ವತ ಮಾರ್ಗಗಳಲ್ಲಿ ಸಂಚರಿಸುವಾಗ ವಾಹನದ ಗೇರ್ ಜಾಮ್ ಆಗುವ ಸಮಸ್ಯೆ ಎದುರಾಗಿದೆ. ಸುಮಾರು 15 ಸಾವಿರ ಅಡಿ ಎತ್ತರದ ಪ್ರದೇಶದಲ್ಲಿ ವಾಹನದ ಗೇರ್ ಫ್ರೀಜ್ ಆಗಿದ್ದರಿಂದ ಮುಂದಕ್ಕೆ ಸಾಗಲು ತೊಂದರೆಯಾಗಿದೆ. ಈ ಸಮಸ್ಯೆಯಿಂದಾಗಿ ಒಂದು ದಿನದ ಪ್ರಯಾಣ ವ್ಯರ್ಥವಾಗಿದೆ. ಕೆಲವು ಪ್ರದೇಶಗಳಲ್ಲಿ ವಾಹನ ದುರಸ್ತಿ ಮಾಡಿಸಲು ಮೆಕ್ಯಾನಿಕ್‌ಗಳು ಸಿಗದಿರುವುದು ಮತ್ತಷ್ಟು ತೊಂದರೆ ಉಂಟುಮಾಡಿದೆ.

ಪ್ರಯಾಣದ ವೇಳೆ ತುರ್ತು ಪರಿಸ್ಥಿತಿಯನ್ನು ಎದುರಿಸಲು ಸುಮಾರು 20 ಲೀಟರ್ ಪೆಟ್ರೋಲ್ ಹೆಚ್ಚುವರಿಯಾಗಿ ಸಂಗ್ರಹಿಸಿಟ್ಟುಕೊಂಡಿದ್ದರು. ಆದರೂ, ಎತ್ತರದ ಪ್ರದೇಶಗಳಲ್ಲಿ ವಾಹನದ ತಾಂತ್ರಿಕ ಸಮಸ್ಯೆ ಎದುರಾದಾಗ ಸ್ಥಳೀಯವಾಗಿ ಅಗತ್ಯ ಸೌಲಭ್ಯಗಳು ಸಿಗದಿರುವುದು ಕಷ್ಟಕರವಾಗಿದೆ.

ಕಾಶ್ಮೀರದತ್ತ ಪ್ರಯಾಣಿಸುವಾಗ ಜಮ್ಮು ಪ್ರದೇಶದಲ್ಲಿ ರಾತ್ರಿ ತಂಗಲು ಕೊಠಡಿ ಸಿಗದೆ ಸ್ನೇಹಿತರು ಪರದಾಡುವಂತಾಯಿತು. ಅಂದು ಸುಮಾರು ಏಳು ಗಂಟೆಗಳ ಕಾಲ ಪ್ರಯಾಣಿಸಿ ತೀವ್ರ ಆಯಾಸಗೊಂಡಿದ್ದರೂ, ಮುಂದೆ ಸುಮಾರು 200 ಕಿ.ಮೀ. ಸಾಗಿದ ಬಳಿಕವಷ್ಟೇ ಕೊಠಡಿ ಸಿಗುವ ಪರಿಸ್ಥಿತಿ ಇತ್ತು. ಹೀಗಾಗಿ ಅನಿವಾರ್ಯವಾಗಿ ಪೆಟ್ರೋಲ್ ಪಂಪ್‌ನಲ್ಲೇ ರಾತ್ರಿ ಕಳೆಯಬೇಕಾಯಿತು.

ಸಾಮಾನ್ಯವಾಗಿ ಆರಂಭದ ದಿನಗಳಲ್ಲಿ ರಾತ್ರಿ 10 ಅಥವಾ 11 ಗಂಟೆಯವರೆಗೂ ಪ್ರಯಾಣಿಸಿ, ಬಳಿಕ ಹೋಟೆಲ್‌ಗಳಲ್ಲಿ ತಂಗುತ್ತಿದ್ದರು. ಆದರೆ ಈಗ ವಿಪರೀತ ಚಳಿ ಹಾಗೂ ಹವಾಮಾನ ವೈಪರೀತ್ಯದ ಕಾರಣ ಸಂಜೆ ಏಳು ಗಂಟೆಯೊಳಗೇ ಪ್ರಯಾಣ ನಿಲ್ಲಿಸಿ ಹೋಟೆಲ್‌ಗಳಲ್ಲಿ ತಂಗುವಂತಾಗಿದೆ.

ದಂಡದ ಕಹಿ ಅನುಭವ:

ಪ್ರವಾಸದ ಆರಂಭದಲ್ಲಿ ಮಹಾರಾಷ್ಟ್ರದಲ್ಲಿ ಪೊಲೀಸರು ಕೆಲವೊಂದು ವಿಚಾರಗಳಿಗೆ ಸಂಬಂಧಿಸಿದಂತೆ ತೊಂದರೆ ನೀಡಿದ್ದರು. ವಿವಿಧೆಡೆ ಸಂಚಾರ ನಿಯಮಗಳಿಗೆ ಸಂಬಂಧಿಸಿದಂತೆ ದಂಡವನ್ನೂ ಪಾವತಿಸಬೇಕಾಯಿತು.

ಆಟೋರಿಕ್ಷಾ ಆಗಿರುವುದರಿಂದ ಎಕ್ಸ್‌ಪ್ರೆಸ್‌ವೇಗಳಲ್ಲಿ ಸಂಚರಿಸುವ ಬದಲು ಸರ್ವಿಸ್ ರಸ್ತೆಗಳನ್ನು ಬಳಸಿಕೊಂಡು ಪ್ರಯಾಣಿಸುತ್ತಿದ್ದಾರೆ. ಇದರಿಂದ ಪ್ರಯಾಣದ ಅವಧಿ ಹೆಚ್ಚಾಗುತ್ತಿದ್ದರೂ, ವಾಹನಕ್ಕೆ ಅನುಕೂಲವಾಗುವ ಮಾರ್ಗವನ್ನೇ ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ.

ಯುವಕರು ಧೈರ್ಯದಿಂದ ಹೊಸ ಅನುಭವಗಳನ್ನು ಪಡೆಯಲು ಮುಂದೆ ಬರಬೇಕು. ಆದರೆ ಧೈರ್ಯದ ಜತೆಗೆ ಸೂಕ್ತ ಸಿದ್ಧತೆ, ವಾಹನದ ಸ್ಥಿತಿಯ ಪರಿಶೀಲನೆ ಹಾಗೂ ಸುರಕ್ಷತೆಗೆ ಆದ್ಯತೆ ನೀಡಬೇಕು. ಎದುರಾಗುವ ಪ್ರತಿಯೊಂದು ಸವಾಲೂ ನಮಗೆ ಹೊಸ ಅನುಭವ ನೀಡುತ್ತಿದೆ ಎಂದು ನಾಲ್ವರು ಸ್ನೇಹಿತರು ‘ಕನ್ನಡಪ್ರಭ’ ಜೊತೆ ಖುಷಿ ಹಂಚಿಕೊಂಡಿದ್ದಾರೆ

ಕೇರಳಕ್ಕೆ ಹೋದ್ರೆ ಈ ದ್ವೀಪ ತಪ್ಪಿಸಿಕೊಳ್ಳಬೇಡಿ: 'ಮುಳುಗುತ್ತಿರುವ ಐಲ್ಯಾಂಡ್‌'ನ ಸೌಂದರ್ಯವೇ ಬೇರೆ!

Govindaraj S — Mon, 26 Oct 2026 20:16:07 +0530

ಕೇರಳದ ಮನ್ರೋ ಐಲ್ಯಾಂಡ್ ಏಕೆ ‘ಮುಳುಗುತ್ತಿರುವ ದ್ವೀಪ’ ಎಂದು ಕರೆಯಲ್ಪಡುತ್ತದೆ? ಅಷ್ಟಮುಡಿ ಸರೋವರ, ಕಲ್ಲಡ ನದಿ, ಕಾಲುವೆಗಳು, ಬ್ಯಾಕ್‌ವಾಟರ್ಸ್, ಡಚ್ ಚರ್ಚ್ ಸೇರಿದಂತೆ ಇಲ್ಲಿನ ವಿಶೇಷತೆಗಳನ್ನು ತಿಳಿಯಿರಿ.

ಮನ್ರೋ ದ್ವೀಪವು ದಕ್ಷಿಣ ಭಾರತದ ಕೇರಳದ ಕೊಲ್ಲಂ ಜಿಲ್ಲೆಯಲ್ಲಿ ಅಷ್ಟಮುಡಿ ಸರೋವರ ಮತ್ತು ಕಲ್ಲಡ ನದಿಯ ಸಂಗಮದಲ್ಲಿರುವ ಒಂದು ಒಳನಾಡಿನ ದ್ವೀಪ ಸಮೂಹವಾಗಿದೆ. ಇದು ಸುಮಾರು 13.4 ಕಿಮೀ 2 ಒಟ್ಟು ವಿಸ್ತೀರ್ಣವನ್ನು ಹೊಂದಿರುವ ಎಂಟು ಸಣ್ಣ ದ್ವೀಪಗಳ ಗುಂಪಾಗಿದೆ.

ರಸ್ತೆ, ರೈಲು ಮತ್ತು ಒಳನಾಡಿನ ನೀರಿನ ಸಂಚಾರದ ಮೂಲಕ ಪ್ರವೇಶಿಸಬಹುದಾದ ಈ ದ್ವೀಪವು ಕೊಲ್ಲಂನಿಂದ ರಸ್ತೆಯ ಮೂಲಕ ಸುಮಾರು 25 ಕಿಲೋಮೀಟರ್, ಪರವೂರಿನಿಂದ ಉತ್ತರಕ್ಕೆ 38 ಕಿಲೋಮೀಟರ್ ಕುಂದರದಿಂದ ಪಶ್ಚಿಮಕ್ಕೆ 12 ಕಿ.ಮೀ (7.5 ಮೈಲಿ) ಮತ್ತು ಕರುಣಗಪಲ್ಲಿಯಿಂದ ಸುಮಾರು 25 ಕಿಲೋಮೀಟರ್ (16 ಮೈಲಿ) ದೂರದಲ್ಲಿದೆ. ಈ ದ್ವೀಪವನ್ನು ‘ಕೇರಳದ ಮುಳುಗುತ್ತಿರುವ ದ್ವೀಪ’ ಎಂದೂ ಕರೆಯಲಾಗುತ್ತದೆ.

ಈ ದ್ವೀಪ ಗ್ರಾಮವು ಒಂದು ಪ್ರವಾಸೋದ್ಯಮ ತಾಣವಾಗಿದ್ದು, ಇಲ್ಲಿ ತೆಂಗಿನ ನಾರು ಹಿಂಡಿ ತೆಗೆಯುವ ಪ್ರಕ್ರಿಯೆ, ತೆಂಗಿನ ನಾರು ನೇಯ್ಗೆ, ಮೀನುಗಾರಿಕೆ, ಸೀಗಡಿಗಳ ಆಹಾರ, ವಲಸೆ ಪಕ್ಷಿ ವೀಕ್ಷಣೆ, ಕಿರಿದಾದ ಕಾಲುವೆಗಳು ಮತ್ತು ಜಲಮಾರ್ಗಗಳು, ಸರೋವರದ ತೀರದಲ್ಲಿರುವ ತೆಂಗಿನ ತೋಟಗಳು, ಲಗೂನ್‌ಗಳು, ಮ್ಯಾಂಗ್ರೋವ್ ಸಸ್ಯಗಳು ಮತ್ತು ಪತ್ತುಪಾರಾದ ಸಣ್ಣ ದ್ವೀಪಗಳನ್ನು ನೋಡಬಹುದು.

ಮನ್ರೋ ದ್ವೀಪದಲ್ಲಿರುವ ಡಚ್ ಚರ್ಚ್ ಕೇರಳದ ಪ್ರಾಚೀನ ಚರ್ಚ್‌ಗಳಲ್ಲಿ ಒಂದಾಗಿದೆ. ಇದನ್ನು 1878ರಲ್ಲಿ ಡಚ್ಚರು ನಿರ್ಮಿಸಿದರು. ಅಷ್ಟಮುಡಿ ಸರೋವರದ ರಮಣೀಯ ದಂಡೆಯಲ್ಲಿರುವ ಕೆಂಪು ಇಟ್ಟಿಗೆ ಚರ್ಚ್ ಡಚ್ - ಕೇರಳ ವಾಸ್ತುಶಿಲ್ಪದ ಮಿಶ್ರಣವಾಗಿದೆ.

Amazing Fact : ವರ್ಷದಲ್ಲಿ ಐದು ರಾತ್ರಿ ಕರೆಂಟ್ ಹಾಕಲ್ಲ ಇಲ್ಲಿನ ಜನ, ಮಾದರಿಯಾಗಿದೆ ಕಾರಣ

Roopa Hegde — Mon, 26 Oct 2026 14:47:31 +0530

ರಾತ್ರಿಯಾಗ್ತಿದ್ದಂತೆ ಎಲ್ಲ ಕಡೆ ದೀಪ ಬೆಳಗಲು ಶುರುವಾಗುತ್ತೆ. ಕತ್ತಲೆ ದೂರ ಮಾಡಲು ಮನೆ, ರಸ್ತೆಗಳಲ್ಲಿ ದೀಪ ಹಚ್ಚುತ್ತಾರೆ. ಆದ್ರೆ ಈಗ ನಾವು ಹೇಳ್ತಿರುವ ಊರಿನಲ್ಲಿ ಕತ್ತಲಾದ್ಮೇಲೆ ದೀಪ ಆರುತ್ತೆ. ವರ್ಷದಲ್ಲಿ ಆರು ದಿನ ಲೈಟ್‌ ಬಂದ್‌ ಮಾಡ್ತಾರೆ.

ದೀಪ ಆರಿಸಲು ಕಾರಣ ಏನು?

ಯುರೋಪ್ನ ಪೋರ್ಚುಗಲ್ ದೇಶದಲ್ಲಿರುವ ಒಂದು ಪುಟ್ಟ ದ್ವೀಪ ವರ್ಷಕ್ಕೊಮ್ಮೆ ಐದು ರಾತ್ರಿ ಸಂಪೂರ್ಣ ಕತ್ತಲಿನಲ್ಲಿ ಮುಳುಗುತ್ತದೆ. ಇಲ್ಲಿನ ಜನರು ವಿದ್ಯುತ್ ದೀಪಗಳನ್ನು ಆರಿಸುವುದು ವಿದ್ಯುತ್ ಉಳಿಸುವುದಕ್ಕಲ್ಲ, ಬದಲಿಗೆ ಸಮುದ್ರ ಪಕ್ಷಿಗಳನ್ನು ಸಾವಿನಿಂದ ರಕ್ಷಿಸುವುದಕ್ಕಾಗಿ. ಅಟ್ಲಾಂಟಿಕ್ ಮಹಾಸಾಗರದಲ್ಲಿರುವ ಅಜೋರ್ಸ್ ದ್ವೀಪಸಮೂಹದ ಅತ್ಯಂತ ಚಿಕ್ಕ ಮತ್ತು ಉತ್ತರದ ದ್ವೀಪವಾದ ಕೊರ್ವೋನಲ್ಲಿ ದೀಪ ಆರಿಸಲಾಗುತ್ತದೆ. ಇಲ್ಲಿ ಒಂದೇ ಒಂದು ಗ್ರಾಮವಿದ್ದು, ಸುಮಾರು 450 ಜನರು ವಾಸಿಸುತ್ತಿದ್ದಾರೆ. 2019ರಿಂದ ಪ್ರತಿ ಶರತ್ಕಾಲದಲ್ಲಿ ಐದು ರಾತ್ರಿ ದೀಪಗಳನ್ನು ಆರಿಸುವ ಮೂಲಕ ಇಲ್ಲಿನ ಜನರು ಕೋರಿ ಶಿಯರ್ವಾಟರ್ ಎಂಬ ಸಮುದ್ರ ಪಕ್ಷಿಗಳನ್ನು ರಕ್ಷಿಸುವ ಪ್ರಯತ್ನ ಮಾಡುತ್ತಿದ್ದಾರೆ.

1991ರಲ್ಲಿ ಏನು ನಡೆದಿತ್ತು?

ಈ ಸಮಸ್ಯೆ ಗಮನಕ್ಕೆ ಬಂದಿದ್ದು 1991ರಲ್ಲಿ. ಆಗ ದ್ವೀಪದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಎಳೆಯ ಶಿಯರ್ವಾಟರ್ ಪಕ್ಷಿಗಳು ಸಾವನ್ನಪ್ಪುತ್ತಿರುವುದನ್ನು ಸ್ಥಳೀಯರು ಗಮನಿಸಿದರು. ಈ ಪಕ್ಷಿಗಳು ಸಮುದ್ರದತ್ತ ತಮ್ಮ ಮೊದಲ ಹಾರಾಟ ನಡೆಸುವ ಮೊದಲು ಸುಮಾರು ಮೂರು ತಿಂಗಳು ಗೂಡಿನಲ್ಲೇ ಕಳೆಯುತ್ತವೆ. ನಂತರ ಸಮುದ್ರದತ್ತ ಹಾರುವಾಗ ನಕ್ಷತ್ರಗಳ ಬೆಳಕಿನ ಸಹಾಯದಿಂದ ದಿಕ್ಕು ಗುರುತಿಸುತ್ತವೆ.

ಆದರೆ ರಾತ್ರಿ ರಸ್ತೆಯಲ್ಲಿರುವ ವಿದ್ಯುತ್ ದೀಪಗಳ ಬೆಳಕಿನಿಂದ ಅವು ದಿಕ್ಕು ತಪ್ಪುತ್ತವೆ. ನಕ್ಷತ್ರಗಳ ಬೆಳಕನ್ನು ಗುರುತಿಸಲು ಸಾಧ್ಯವಾಗದೆ, ರಸ್ತೆಗಳು ಮತ್ತು ಕಟ್ಟಡಗಳಿಗೆ ಡಿಕ್ಕಿ ಹೊಡೆದು ನೆಲಕ್ಕೆ ಬೀಳುತ್ತವೆ. ಇದರಿಂದ ಅನೇಕ ಪಕ್ಷಿಗಳು ಗಾಯಗೊಂಡು ಸಾವನ್ನಪ್ಪುತ್ತಿದ್ದವು.

ಪಕ್ಷಿಗಳನ್ನು ಉಳಿಸಲು ದೀಪ ಆರಿಸಿದ್ರು

ಪಕ್ಷಿಗಳು ನೆಲಕ್ಕೆ ಬಿದ್ದಿರುವುದನ್ನು ಗಮನಿಸಿದ ಸ್ಥಳೀಯರು ರಾತ್ರಿ ಇಡೀ ಗ್ರಾಮದಲ್ಲಿ ಹುಡುಕಾಡಿ ಅವುಗಳನ್ನು ರಕ್ಷಿಸಲು ಆರಂಭಿಸಿದರು. ಈ ಪ್ರಯತ್ನ ಮುಂದೆ ದೊಡ್ಡ ಅಭಿಯಾನವಾಗಿ ಬೆಳೆಯಿತು. ದಿ ಗಾರ್ಡಿಯನ್ ವರದಿಯ ಪ್ರಕಾರ, 1995ರಲ್ಲಿ ಅಜೋರ್ಸ್ ಸರ್ಕಾರವು ಇತರ ದ್ವೀಪಗಳಿಗೂ ಈ ಪ್ರಯತ್ನವನ್ನು ವಿಸ್ತರಿಸಲು 'SOS ಕಗಾರೊ' ಎಂಬ ಅಭಿಯಾನವನ್ನು ಆರಂಭಿಸಿತು. ನಂತರ ಪೋರ್ಚುಗೀಸ್ ಸೊಸೈಟಿ ಫಾರ್ ದಿ ಸ್ಟಡಿ ಆಫ್ ಬರ್ಡ್ಸ್ (SPEA) ಕೂಡ ಈ ಯೋಜನೆಯಲ್ಲಿ ಕೈಜೋಡಿಸಿತು.

ಇಂದು ಕೊರ್ವೋ ದ್ವೀಪದಲ್ಲಿ ಪಕ್ಷಿಗಳ ಹಾರಾಟಕ್ಕೆ ಅಡ್ಡಿಯಾಗದಂತೆ, ನಿರ್ದಿಷ್ಟ ಐದು ರಾತ್ರಿಗಳಲ್ಲಿ ಸರ್ಕಾರಿ ಬೀದಿ ದೀಪಗಳನ್ನು ಸಂಪೂರ್ಣವಾಗಿ ಆರಿಸಲಾಗುತ್ತದೆ. ಇದರಿಂದ ಆಕಾಶದಲ್ಲಿ ನಕ್ಷತ್ರಗಳು ಸ್ಪಷ್ಟವಾಗಿ ಕಾಣಿಸುತ್ತವೆ. ಪಕ್ಷಿಗಳು ದಿಕ್ಕು ತಪ್ಪದೆ ಸಮುದ್ರದತ್ತ ಹಾರಲು ಇದು ನೆರವಾಗುತ್ತದೆ.

ಈ ಐದು ರಾತ್ರಿಗಳಲ್ಲಿ ಗ್ರಾಮಸ್ಥರು ರಾತ್ರಿ ಹೊತ್ತು ಬೀದಿಗಳಲ್ಲಿ ಸುತ್ತಾಡಿ ನೆಲಕ್ಕೆ ಬಿದ್ದಿರುವ ಪಕ್ಷಿಗಳನ್ನು ಹುಡುಕುತ್ತಾರೆ. ಸಿಕ್ಕ ಪಕ್ಷಿಗಳನ್ನು ರಟ್ಟಿನ ಪೆಟ್ಟಿಗೆಗಳಲ್ಲಿ ಇಟ್ಟು ರಾತ್ರಿ ಪೂರ್ತಿ ವಿಶ್ರಾಂತಿ ಪಡೆಯಲು ಬಿಡುತ್ತಾರೆ. ಮರುದಿನ ಅವುಗಳನ್ನು ಸಮುದ್ರದ ಬಳಿಯ ಬಂಡೆಯೊಂದರಿಂದ ಬಿಡಲಾಗುತ್ತದೆ. ಹೀಗೆ ಅವುಗಳಿಗೆ ಮತ್ತೆ ಸಮುದ್ರವನ್ನು ತಲುಪಿ ತಮ್ಮ ಸಹಜ ಜೀವನಕ್ಕೆ ಮರಳಲು ಅವಕಾಶ ಮಾಡಿಕೊಡಲಾಗುತ್ತದೆ.

ಮನುಷ್ಯರ ಒಂದು ಸಣ್ಣ ಪ್ರಯತ್ನ ನೂರಾರು ಪಕ್ಷಿಗಳ ಜೀವ ಉಳಿಸಬಲ್ಲದು ಎಂಬುದಕ್ಕೆ ಕೊರ್ವೋ ದ್ವೀಪದ ಈ ಕಾರ್ಯವೇ ಉದಾಹರಣೆ. ಪ್ರಕೃತಿಯನ್ನು ರಕ್ಷಿಸಲು ದೊಡ್ಡ ಯೋಜನೆಗಳೇ ಬೇಕಿಲ್ಲ, ಕಾಳಜಿ ಮತ್ತು ಒಗ್ಗಟ್ಟಿನ ಮನಸ್ಸಿದ್ದರೆ ಸಾಕು ಎಂಬುದನ್ನು ಇಲ್ಲಿನ ಜನರು ತೋರಿಸಿಕೊಟ್ಟಿದ್ದಾರೆ.

ಭಾರತದ 7 ಅತಿದೊಡ್ಡ ಏಕಶಿಲಾ ನಂದಿ ವಿಗ್ರಹಗಳು: ಚಾಮುಂಡಿ ಬೆಟ್ಟದ ನಂದಿ, ಬೆಂಗಳೂರಿನ ದೊಡ್ಡ ಬಸವಣ್ಣನ ಸ್ಥಾನವೆಷ್ಟು?

Sathish Kumar KH — Thu, 29 Oct 2026 14:59:28 +0530

ಹಿಂದೂ ಧರ್ಮ ಮತ್ತು ಶೈವ ಪರಂಪರೆಯಲ್ಲಿ ಪರಮಶಿವನ ವಾಹನವಾದ ನಂದಿಗೆ ಅಗ್ರಸ್ಥಾನವಿದೆ. ಭಾರತದ ಪುರಾತನ ದೇವಾಲಯ ವಾಸ್ತುಶಿಲ್ಪದಲ್ಲಿ ಏಕಶಿಲೆಯಲ್ಲೇ (Monolithic) ಕೆತ್ತಲಾದ ಬೃಹತ್ ನಂದಿ ವಿಗ್ರಹಗಳು ನಮ್ಮ ಕಲೆ ಮತ್ತು ಇಂಜಿನಿಯರಿಂಗ್ ಕೌಶಲ್ಯಕ್ಕೆ ಸಾಕ್ಷಿಯಾಗಿವೆ. ದೇಶದಲ್ಲಿರುವ ಇಂತಹ ಅತಿ ಎತ್ತರದ ಹಾಗೂ ಅತಿದೊಡ್ಡ 7 ನಂದಿ ವಿಗ್ರಹಗಳು ಯಾವುವು? ಈ ಪಟ್ಟಿಯಲ್ಲಿ ಕರ್ನಾಟಕದ ಪಾರುಪತ್ಯ ಎಷ್ಟು? ಬನ್ನಿ ತಿಳಿಯೋಣ.

ಭಾರತದ ಟಾಪ್ 7 ಅತಿದೊಡ್ಡ ನಂದಿ ವಿಗ್ರಹಗಳು:

1. ಲೇಪಾಕ್ಷಿ ನಂದಿ (ಅನಂತಪುರ, ಆಂಧ್ರಪ್ರದೇಶ)

ದೇಶದ ಅತಿ ದೊಡ್ಡ ಏಕಶಿಲಾ ನಂದಿ ಎಂಬ ಹೆಗ್ಗಳಿಕೆ ಲೇಪಾಕ್ಷಿಯ ವೀರಭದ್ರ ದೇವಾಲಯದ ಸಮೀಪವಿರುವ ನಂದಿಗಿದೆ. ಸುಮಾರು 15 ಅಡಿ ಎತ್ತರ ಹಾಗೂ 27 ಅಡಿ ಉದ್ದವಿರುವ ಈ ನಂದಿಯನ್ನು ಒಂದೇ ಗ್ರಾನೈಟ್ ಬಂಡೆಯಲ್ಲಿ ಅದ್ಭುತವಾಗಿ ಕೆತ್ತಲಾಗಿದೆ.

2. ಚಾಮುಂಡಿ ಬೆಟ್ಟದ ನಂದಿ (ಮೈಸೂರು, ಕರ್ನಾಟಕ)

ಮೈಸೂರಿನ ಚಾಮುಂಡಿ ಬೆಟ್ಟಕ್ಕೆ ಹೋಗುವ ಮಾರ್ಗದಲ್ಲಿರುವ ಈ ಕಪ್ಪು ಶಿಲೆಯ ನಂದಿ ವಿಗ್ರಹವು ಸುಮಾರು 16 ಅಡಿ ಎತ್ತರ ಮತ್ತು 24 ಅಡಿ ಉದ್ದವಿದೆ. ಇದನ್ನು 1664ರಲ್ಲಿ ಮೈಸೂರಿನ ಮಹಾರಾಜರಾಗಿದ್ದ ದೊಡ್ಡ ದೇವರಾಜ ಒಡೆಯರ್ ಕಾಲದಲ್ಲಿ ಕೆತ್ತಲಾಯಿತು.

3. ಬಸವನಗುಡಿ ದೊಡ್ಡ ಬಸವಣ್ಣ (ಬೆಂಗಳೂರು, ಕರ್ನಾಟಕ)

ಬೆಂಗಳೂರಿನ ಐತಿಹಾಸಿಕ ಬಸವನಗುಡಿಯ ‘ಬುಲ್ ಟೆಂಪಲ್’ನಲ್ಲಿರುವ ನಂದಿಯು ಭಾರತದ ಅತಿ ಭವ್ಯ ವಿಗ್ರಹಗಳಲ್ಲಿ ಒಂದು. ಇದು ಸುಮಾರು 15 ಅಡಿ ಎತ್ತರ ಹಾಗೂ 20 ಅಡಿ ಉದ್ದವಿದೆ.

4. ಬೃಹದೀಶ್ವರ ದೇವಾಲಯದ ನಂದಿ (ತಂಜಾವೂರು, ತಮಿಳುನಾಡು)

ಚೋಳರ ಕಾಲದ ವಾಸ್ತುಶಿಲ್ಪದ ಹೆಗ್ಗುರುತಾಗಿರುವ ತಂಜಾವೂರಿನ ಬೃಹದೀಶ್ವರ ದೇವಾಲಯದ ಮುಂಭಾಗವಿರುವ ನಂದಿಯು ಸುಮಾರು 13 ಅಡಿ ಎತ್ತರ ಹಾಗೂ 16 ಅಡಿ ಉದ್ದವಿದ್ದು, ಒಂದೇ ಶಿಲೆಯಲ್ಲಿ ನಿರ್ಮಾಣಗೊಂಡಿದೆ.

5. ಎದುರು ಬಸವಣ್ಣ (ಹಂಪಿ, ಕರ್ನಾಟಕ)

ವಿಜಯನಗರ ಸಾಮ್ರಾಜ್ಯದ ವೈಭವ ಸಾರುವ ಹಂಪಿಯ ವಿರೂಪಾಕ್ಷ ದೇವಾಲಯದ ಎದುರು, ಹಂಪಿ ಬಜಾರ್‌ನ ಕೊನೆಯಲ್ಲಿರುವ ಈ ನಂದಿ ವಿಗ್ರಹ ಅತ್ಯಂತ ಆಕರ್ಷಕವಾಗಿದೆ. ಎರಡು ಅಂತಸ್ತಿನ ಮಂಟಪದಲ್ಲಿರುವ ಈ ನಂದಿ ಪ್ರವಾಸಿಗರ ಪ್ರಮುಖ ಆಕರ್ಷಣೆ.

6. ಹೊಯ್ಸಳೇಶ್ವರ ದೇವಾಲಯದ ನಂದಿ (ಹಳೇಬೀಡು, ಕರ್ನಾಟಕ)

ಹಾಸನ ಜಿಲ್ಲೆಯ ಹಳೇಬೀಡಿನ ಹೊಯ್ಸಳೇಶ್ವರ ದೇವಾಲಯ ಸಂಕೀರ್ಣದಲ್ಲಿರುವ ಎರಡು ಬೃಹತ್ ನಂದಿ ವಿಗ್ರಹಗಳು ಹೊಯ್ಸಳ ಶೈಲಿಯ ಸೂಕ್ಷ್ಮ ಕೆತ್ತನೆಗೆ ವಿಶ್ವಪ್ರಸಿದ್ಧ. ಸುಮಾರು 14 ಅಡಿ ಎತ್ತರವಿರುವ ಈ ನಂದಿಯ ಆಭರಣ ಕೆತ್ತನೆಗಳು ಮನಸೂರೆಗೊಳ್ಳುತ್ತವೆ.

7. ರಾಮನಾಥಸ್ವಾಮಿ ದೇವಾಲಯದ ನಂದಿ (ರಾಮೇಶ್ವರಂ, ತಮಿಳುನಾಡು)

ಜ್ಯೋತಿರ್ಲಿಂಗ ಕ್ಷೇತ್ರವಾದ ರಾಮೇಶ್ವರಂನಲ್ಲಿರುವ ನಂದಿ ವಿಗ್ರಹವು ಸುಮಾರು 12 ಅಡಿ ಎತ್ತರ ಹಾಗೂ 22 ಅಡಿ ಉದ್ದವಿದ್ದು, ಅಪರೂಪದ ಕಲ್ಲಿನ ಕಲೆಯಾಗಿದೆ.

ಪಟ್ಟಿಯಲ್ಲಿ ಕರ್ನಾಟಕದ ಪಾರುಪತ್ಯ ಎಷ್ಟು?

ಭಾರತದ ಅಗ್ರ 7 ಅತಿದೊಡ್ಡ ನಂದಿ ವಿಗ್ರಹಗಳ ಪೈಕಿ ಬರೋಬ್ಬರಿ 4 ವಿಗ್ರಹಗಳು ನಮ್ಮ ಹೆಮ್ಮೆಯ ಕರ್ನಾಟಕದಲ್ಲೇ ಇವೆ! (ಮೈಸೂರು, ಬೆಂಗಳೂರು, ಹಂಪಿ, ಹಳೇಬೀಡು). ಇದು ಕನ್ನಡ ನಾಡಿನ ಕಲೆ, ಸಂಸ್ಕೃತಿ ಮತ್ತು ಹೊಯ್ಸಳ, ವಿಜಯನಗರ ಹಾಗೂ ಒಡೆಯರ್ ರಾಜಮನೆತನಗಳ ವಾಸ್ತುಶಿಲ್ಪ ಪ್ರೇಮಕ್ಕೆ ಹಿಡಿದ ಕೈಗನ್ನಡಿಯಾಗಿದೆ.

ಕರ್ನಾಟಕದ ಕಾಶ್ಮೀರ ಕೊಡಗಿಗೆ ಲಗ್ಗೆ ಇಟ್ಟ ರಾಡಿಸನ್: ಪ್ರವಾಸಿಗರಿಗಾಗಿ ಅತ್ಯಾಧುನಿಕ ' ರೆಸಾರ್ಟ್ ಆಂಡ್ ಸ್ಪಾ' ಆರಂಭ!

Gowthami K — Wed, 28 Oct 2026 15:27:19 +0530

ಮಂಜಿನ ನಗರಿ, ಕಾಫಿ ನಾಡು ಕೊಡಗಿಗೆ ಪ್ರತಿಷ್ಠಿತ 'ರಾಡಿಸನ್ ಹೋಟೆಲ್ ಗ್ರೂಪ್' ಲಗ್ಗೆ ಇಟ್ಟಿದೆ. 'ರಾಡಿಸನ್ ಇಂಡಿವಿಜುವಲ್ಸ್ ಪ್ರೀಮಿಯರ್' ಬ್ರಾಂಡ್‌ನ ಅಡಿಯಲ್ಲಿ 'ಪರ್ಪಲ್ ಪಾಮ್ಸ್ ರೆಸಾರ್ಟ್ ಆಂಡ್ ಸ್ಪಾ' ಎಂಬ ಅತ್ಯಂತ ಸುಂದರ ಹಾಗೂ ಐಷಾರಾಮಿ ರೆಸಾರ್ಟ್ ಅನ್ನು ಮಡಿಕೇರಿಯಲ್ಲಿ ಆರಂಭಿಸಿದೆ.

ಭಾರತದಲ್ಲಿ ತನ್ನ ಜಾಲವನ್ನು ವಿಸ್ತರಿಸುತ್ತಿರುವ ರಾಡಿಸನ್ ಹೋಟೆಲ್ ಗ್ರೂಪ್, ಪ್ರವಾಸಿಗರ ಹಾಟ್‌ಸ್ಪಾಟ್ ಆಗಿರುವ ಕೊಡಗಿನಲ್ಲಿ ಈ ಹೊಸ ರೆಸಾರ್ಟ್ ತೆರೆಯುವ ಮೂಲಕ ಕರ್ನಾಟಕದಲ್ಲಿ ತನ್ನ ಮಾರುಕಟ್ಟೆಯನ್ನು ಮತ್ತಷ್ಟು ಬಲಪಡಿಸಿಕೊಂಡಿದೆ.

ಮಡಿಕೇರಿ-ಮೈಸೂರು ಹೆದ್ದಾರಿಯಲ್ಲಿರುವ ಈ ರೆಸಾರ್ಟ್, ಪ್ರಕೃತಿಯ ಮಡಿಲಲ್ಲಿ ಕಾಲ ಕಳೆಯಲು ಬಯಸುವ ಪ್ರವಾಸಿಗರಿಗೆ ಹೇಳಿ ಮಾಡಿಸಿದಂತಿದೆ. ಬೆಂಗಳೂರು, ಮೈಸೂರು ಮತ್ತು ಮಂಗಳೂರಿನಿಂದ ಇಲ್ಲಿಗೆ ಸುಲಭವಾಗಿ ತಲುಪಬಹುದು. ಕಣ್ಣೂರು (100 ಕಿ.ಮೀ), ಮೈಸೂರು (101 ಕಿ.ಮೀ) ಮತ್ತು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ (261 ಕಿ.ಮೀ) ಉತ್ತಮ ಸಾರಿಗೆ ಸಂಪರ್ಕ ಹೊಂದಿದೆ. ಅಷ್ಟೇ ಅಲ್ಲದೆ, ಮಡಿಕೇರಿ ಕೋಟೆ, ಅಬ್ಬೆ ಫಾಲ್ಸ್, ಕೋಟೆಬೆಟ್ಟ ಮತ್ತು ನಾಗರಹೊಳೆ ರಾಷ್ಟ್ರೀಯ ಉದ್ಯಾನವನದಂತಹ ಪ್ರವಾಸಿ ತಾಣಗಳು ಇಲ್ಲಿಗೆ ಹತ್ತಿರದಲ್ಲಿವೆ.

ಈ ರೆಸಾರ್ಟ್‌ನಲ್ಲಿ ಒಟ್ಟು 78 ಅತ್ಯಾಧುನಿಕ ಕೊಠಡಿಗಳಿವೆ. ಪನೋರಮಾ ರೂಮ್ಸ್, ಕೋರ್ಟ್‌ಯಾರ್ಡ್ ರೂಮ್ಸ್ ಹಾಗೂ ಪೀಬೆರಿ ಸೂಟ್ಸ್ ಎಂಬ 3 ವಿಭಾಗಗಳಲ್ಲಿ ರೂಮ್‌ಗಳು ಲಭ್ಯವಿವೆ. ಪ್ರಕೃತಿಯ ಸೌಂದರ್ಯವನ್ನು ಸವಿಯಲು ಅನುಕೂಲವಾಗುವಂತೆ ಖಾಸಗಿ ಬಾಲ್ಕನಿ, ಗಾರ್ಡನ್ ವೀಕ್ಷಣೆ ಹಾಗೂ ಸಮಕಾಲೀನ ಒಳಾಂಗಣ ವಿನ್ಯಾಸವನ್ನು ಇವು ಹೊಂದಿವೆ.

ರೆಸಾರ್ಟ್‌ನಲ್ಲಿ ಅತಿಥಿಗಳಿಗಾಗಿ ಎರಡು ವಿಶೇಷ ಡೈನಿಂಗ್ ಆಯ್ಕೆಗಳಿವೆ. ಎಲಿಫೆಂಟ್ಸ್ ಮತ್ತು ಕಾಫಿಯು ಮಲ್ಟಿ-ಕ್ಯುಸಿನ್ ರೆಸ್ಟೋರೆಂಟ್ ಆಗಿದ್ದು, ಇಲ್ಲಿ ಕೊಡಗಿನ ಸ್ಥಳೀಯ ಖಾದ್ಯಗಳ ಜೊತೆಗೆ ಬಾರ್ಬೆಕ್ಯೂ ಮತ್ತು ಓಪನ್‌ ಏರ್‌ ಡೈನಿಂಗ್‌ ವ್ಯವಸ್ಥೆ ಇದೆ. ಬಂದೂಕ್ ಬಾರ್ ಕೊಡಗಿನ ಸಾಂಪ್ರದಾಯಿಕ ಸಂಸ್ಕೃತಿಯಿಂದ ಪ್ರೇರಿತವಾದ ಬಾರ್‌ ಆಗಿದ್ದು, ಇಲ್ಲಿ ಅತ್ಯುತ್ತಮ ದರ್ಜೆಯ ಪಾನೀಯಗಳು ಮತ್ತು ಕಾಕ್‌ಟೇಲ್‌ಗಳು ಲಭ್ಯವಿದೆ.

ಮದುವೆ, ಸಮಾರಂಭ ಹಾಗೂ ವಿಶ್ರಾಂತಿಗೆ ಹೇಳಿ ಮಾಡಿಸಿದ ಜಾಗ!

ಇಲ್ಲಿನ 139 ಚದರ ಮೀಟರ್ ವಿಸ್ತೀರ್ಣದ 'ಚೆರ್ರಿ ಹಾಲ್'ನಲ್ಲಿ ಮದುವೆ, ಕಾರ್ಪೊರೇಟ್ ಮೀಟಿಂಗ್ ಹಾಗೂ ಇತರ ಸಮಾರಂಭಗಳನ್ನು ಆಯೋಜಿಸಬಹುದು. 200ಕ್ಕೂ ಹೆಚ್ಚು ಅತಿಥಿಗಳು ಒಂದೆಡೆ ಸೇರಲು ಸ್ಥಳಾವಕಾಶವಿದ್ದು, ಜೊತೆಗೆ ದಣಿವಾರಿಸಿಕೊಳ್ಳಲು ಸ್ಪಾ, ಜಿಮ್ ಮತ್ತು ಸ್ವಿಮ್ಮಿಂಗ್ ಪೂಲ್ ಸೌಲಭ್ಯವೂ ಇದೆ.

ಈ ಬಗ್ಗೆ ವಿವರಗಳನ್ನು ಹಂಚಿಕೊಂಡಿರುವ ರಾಡಿಸನ್ ಹೋಟೆಲ್ ಗ್ರೂಪ್‌ನ (ದಕ್ಷಿಣ ಏಷ್ಯಾ) ಎಂಡಿ ನಿಖಿಲ್ ಶರ್ಮಾ, ಪ್ರವಾಸಿಗರ ನೆಚ್ಚಿನ ತಾಣವಾದ ಕೊಡಗಿಗೆ ರಾಡಿಸನ್ ಗ್ರೂಪ್ ಕಾಲಿಡುತ್ತಿರುವುದು ನಮ್ಮ ಮಾರುಕಟ್ಟೆ ವಿಸ್ತರಣೆಯ ಪ್ರಮುಖ ಹೆಜ್ಜೆಯಾಗಿದೆ. ಸ್ಥಳೀಯ ಸಂಸ್ಕೃತಿ ಮತ್ತು ಜಾಗತಿಕ ಗುಣಮಟ್ಟದ ಆತಿಥ್ಯವನ್ನು ನಾವು ಒಟ್ಟಿಗೆ ನೀಡಲಿದ್ದೇವೆ ಎಂದಿದ್ದಾರೆ.

ಎಸ್‌ಎಲ್‌ಎನ್‌ ಹೋಟೆಲ್ಸ್‌ನ ಪಾಲುದಾರರಾದ ನಾರಾಯಣ್ ಮತ್ತು ವಿಶಾಲಾಕ್ಷಿ ವಿಶ್ವನಾಥನ್, "ರಾಡಿಸನ್ ಜೊತೆಗಿನ ಪಾಲುದಾರಿಕೆಯೊಂದಿಗೆ ಕೂರ್ಗ್‌ನ ನೈಸರ್ಗಿಕ ಸೌಂದರ್ಯ ಮತ್ತು ಅತ್ಯುತ್ತಮ ಆತಿಥ್ಯವನ್ನು ಅತಿಥಿಗಳಿಗೆ ಒದಗಿಸಲು ನಾವು ಉತ್ಸುಕರಾಗಿದ್ದೇವೆ" ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.

ಭಾರತದಲ್ಲಿ 200ಕ್ಕೂ ಹೆಚ್ಚು ಹೋಟೆಲ್‌ಗಳನ್ನು ಹೊಂದಿರುವ ರಾಡಿಸನ್ ಹೋಟೆಲ್ ಗ್ರೂಪ್, ಇದೀಗ ಕರ್ನಾಟಕದ ಕೊಡಗಿನಲ್ಲಿ ತನ್ನ ಹೊಸ ಹೆಜ್ಜೆ ಇಡುವ ಮೂಲಕ ಪ್ರವಾಸೋದ್ಯಮಕ್ಕೆ ಹಾಗೂ ಆತಿಥ್ಯ ಕ್ಷೇತ್ರಕ್ಕೆ ಮತ್ತಷ್ಟು ಮೆರುಗು ನೀಡಿದೆ.

ಹಾಸನಾಂಬೆ ದರ್ಶನಕ್ಕೆ KSRTC ಭರ್ಜರಿ ಕೊಡುಗೆ: ಕೇವಲ ₹375 ರಿಂದ ಸ್ಪೆಷಲ್ ಪ್ಯಾಕೇಜ್ ಟೂರ್‌ ಆರಂಭ

Sathish Kumar KH — Mon, 26 Oct 2026 16:30:14 +0530

ಹಾಸನ (ಅ.26): ವರ್ಷಕ್ಕೊಮ್ಮೆ ಮಾತ್ರ ಬಾಗಿಲು ತೆರೆಯುವ ಹಾಸನದ ಅಧಿದೇವತೆ ಹಾಸನಾಂಬೆಯ ಭಕ್ತಾದಿಗಳಿಗೆ ಮತ್ತು ಪ್ರವಾಸಿಗರಿಗೆ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮವು (KSRTC) ಭರ್ಜರಿ ಸಿಹಿಸುದ್ದಿ ನೀಡಿದೆ. ಹಾಸನಾಂಬೆ ಜಾತ್ರಾ ಮಹೋತ್ಸವದ ಅಂಗವಾಗಿ ಸಾರ್ವಜನಿಕರ ಅನುಕೂಲಕ್ಕಾಗಿ "ಯಾತ್ರೆ ನಮ್ಮದು - ದಿವ್ಯಾನುಭವ ನಿಮ್ಮದು" ಎಂಬ ಧ್ಯೇಯವಾಕ್ಯದೊಂದಿಗೆ ‘ಶ್ರೀ ಹಾಸನಾಂಬ ಪ್ಯಾಕೇಜ್ ಟೂರ್’ ಅನ್ನು ಘೋಷಿಸಿದೆ.

ಅಕ್ಟೋಬರ್ 30 ರಿಂದ ನವೆಂಬರ್ 10 ರವರೆಗೆ ಈ ವಿಶೇಷ ಪ್ರವಾಸ ಪ್ಯಾಕೇಜ್ ಲಭ್ಯವಿರಲಿದ್ದು, ಹಾಸನ ಜಿಲ್ಲೆ ಹಾಗೂ ಸುತ್ತಮುತ್ತಲಿನ ಧಾರ್ಮಿಕ ಮತ್ತು ಪ್ರೇಕ್ಷಣೀಯ ಸ್ಥಳಗಳನ್ನು ಕಣ್ತುಂಬಿಕೊಳ್ಳಲು ಕೆಎಸ್‌ಆರ್‌ಟಿಸಿ ಒಟ್ಟು 8 ಪ್ರತ್ಯೇಕ ಮಾರ್ಗಗಳ ಟೂರ್ ಪ್ಯಾಕೇಜ್‌ಗಳನ್ನು ರೂಪಿಸಿದೆ.

ಪ್ರವಾಸದ ಪ್ರಮುಖ ಅಂಶಗಳು:

ಆರಂಭದ ಸ್ಥಳ: ನಗರ ಬಸ್ ನಿಲ್ದಾಣ, ಹಾಸನ.
ಹೊರಡುವ ಸಮಯ: ಪ್ರತಿದಿನ ಬೆಳಗ್ಗೆ 07:30 ರಿಂದ 08:00 ಗಂಟೆಗೆ.
ವಾಪಸ್ ಆಗಮನ: ಸಂಜೆ ಸುಮಾರು 7:00 ಗಂಟೆಗೆ.
ಟಿಕೆಟ್ ದರ: ಕನಿಷ್ಠ ₹375/- ರಿಂದ ಆರಂಭ.

8 ಪ್ಯಾಕೇಜ್ ಟೂರ್‌ಗಳ ಸಂಪೂರ್ಣ ವಿವರ ಮತ್ತು ದರ ಪಟ್ಟಿ:

ಪ್ಯಾಕೇಜ್ 1: ಹಾಸನಾಂಬೆ ವಿಶೇಷ ದರ್ಶನ ಪ್ಯಾಕೇಜ್

ಸ್ಥಳಗಳು: ಶ್ರೀ ಹಾಸನಾಂಬ ಹಾಗೂ ಸಿದ್ದೇಶ್ವರ ದೇವಾಲಯ ದರ್ಶನ, ದೇವಿಗೆರೆ ಕಲ್ಯಾಣಿ, ಕೆಂಚಮ್ಮನ ಹೊಸಕೋಟೆ ದೇವಾಲಯ.
ಸಮಯ & ದಿನ: ಬೆಳಗ್ಗೆ 08:00 (ಬುಧವಾರ, ಶುಕ್ರವಾರ ಮತ್ತು ಭಾನುವಾರ ಮಾತ್ರ).
ಒಟ್ಟು ಕಿ.ಮೀ: 90 ಕಿ.ಮೀ.
ಟಿಕೆಟ್ ದರ: ₹1400/- (ಇದರಲ್ಲಿ ₹1000 ಮೌಲ್ಯದ ಹಾಸನಾಂಬೆ ವಿಶೇಷ ದರ್ಶನ ಟಿಕೆಟ್ ಹಾಗೂ ₹400 ಬಸ್ ಪ್ರಯಾಣ ದರ ಒಳಗೊಂಡಿದೆ).

ಪ್ಯಾಕೇಜ್ 2: ವಾಟೇಹೊಳೆ - ಬೈರವೇಶ್ವರ ಪ್ರವಾಸ

ಸ್ಥಳಗಳು: ವಾಟೇಹೊಳೆ ಡ್ಯಾಂ, ಜನಾರ್ದನಸ್ವಾಮಿ ದೇವಸ್ಥಾನ, ಪಾಳ್ಯ, ಮುರಗಡಿ ಜಲಪಾತ, ಬೆಟ್ಟದ ಭೈರವೇಶ್ವರ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (184 ಕಿ.ಮೀ).
ಟಿಕೆಟ್ ದರ: ₹500/-.
ಪ್ಯಾಕೇಜ್ 3: ಮಂಜರಾಬಾದ್ ಕೋಟೆ - ಬಿಸಿಲೆ ಘಾಟ್ ವೀಕ್ಷಣೆ
ಸ್ಥಳಗಳು: ಮಂಜರಾಬಾದ್ ಕೋಟೆ, ಮೂಕನಮನೆ ಜಲಪಾತ, ಬಿಸಿಲೆ ಘಾಟ್ ವೀಕ್ಷಣಾ ಕೇಂದ್ರ.
ಸಮಯ: ಬೆಳಗ್ಗೆ 07:30 (192 ಕಿ.ಮೀ).
ಟಿಕೆಟ್ ದರ: ₹525/-.

ಪ್ಯಾಕೇಜ್ 4: ಬೇಲೂರು - ಹಳೇಬೀಡು ಐತಿಹಾಸಿಕ ತಾಣಗಳ ಯಾತ್ರೆ

ಸ್ಥಳಗಳು: ಬೇಲೂರು ಶ್ರೀ ಚನ್ನಕೇಶವ ದೇವಾಲಯ, ಯಾಗಚಿ ಜಲಸಾಹಸ ಕ್ರೀಡಾ ಕೇಂದ್ರ, ಶ್ರೀ ಪುಷ್ಪಗಿರಿ ಮಲ್ಲಿಕಾರ್ಜುನ ಸ್ವಾಮಿ ಬೆಟ್ಟ, ಹಳೇಬೀಡು ಹೊಯ್ಸಳೇಶ್ವರ ದೇವಾಲಯ, ಕೊಂಡಜ್ಜಿ ವರದರಾಜ ಸ್ವಾಮಿ ದೇವಾಲಯ.
ವಿಶೇಷತೆ: ಶ್ರೀ ಪುಷ್ಪಗಿರಿ ಮಲ್ಲಿಕಾರ್ಜುನ ಸ್ವಾಮಿ ದೇವಸ್ಥಾನದಲ್ಲಿ ದಾಸೋಹ (ಊಟ) ಲಭ್ಯ.
ಸಮಯ: ಬೆಳಗ್ಗೆ 07:30 (117 ಕಿ.ಮೀ).
ಟಿಕೆಟ್ ದರ: ₹375/-.

ಪ್ಯಾಕೇಜ್ 5: ಶ್ರವಣಬೆಳಗೊಳ - ನುಗ್ಗೇಹಳ್ಳಿ ಟೂರ್

ಸ್ಥಳಗಳು: ನುಗ್ಗೇಹಳ್ಳಿ ಶ್ರೀ ಲಕ್ಷ್ಮೀ ನರಸಿಂಹ ಸ್ವಾಮಿ ದೇವಾಲಯ, ಶ್ರವಣಬೆಳಗೊಳ, ವಿಂಧ್ಯಗಿರಿ ಬೆಟ್ಟ, ಚಂದ್ರಗಿರಿ ಬೆಟ್ಟ, ಬಿಸಿಲಿಸಿದ್ಧ ಪಾರ್ಕ್.
ವಿಶೇಷತೆ: ಶ್ರವಣಬೆಳಗೊಳ ಜೈನ ಮಠದಲ್ಲಿ ದಾಸೋಹ ವ್ಯವಸ್ಥೆ.
ಸಮಯ: ಬೆಳಗ್ಗೆ 07:30 (132 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 6: ಅರಸೀಕೆರೆ - ಜೇನುಕಲ್ಲು ಸಿದ್ಧೇಶ್ವರ ಬೆಟ್ಟ ಯಾತ್ರೆ

ಸ್ಥಳಗಳು: ಕೋರವಂಗಲ ಭೂವನೇಶ್ವರ ದೇವಾಲಯ, ಹಾರನಹಳ್ಳಿ ಕೇಶವ ಮತ್ತು ಸೋಮೇಶ್ವರ ದೇವಾಲಯ, ಮಾಲೇಕಲ್ಲು ತಿರುಪತಿ ದೇವಾಲಯ, ಜೇನುಕಲ್ಲು ಸಿದ್ದೇಶ್ವರ ಬೆಟ್ಟ, ಅರಸೀಕೆರೆ ಮಹಾತ್ಮ ಗಾಂಧಿ ಚಿತಾಭಸ್ಮ-ನರಸಿಂಹಸ್ವಾಮಿ ದೇವಾಲಯ, ಶಾಂತಿಗ್ರಾಮ, ಗೆಂಡೆಕಟ್ಟೆ ಫಾರೆಸ್ಟ್, ಹಾಸನ ವಸ್ತು ಸಂಗ್ರಹಾಲಯ.
ವಿಶೇಷತೆ: ಜೇನುಕಲ್ಲು ಸಿದ್ಧೇಶ್ವರ ಬೆಟ್ಟದಲ್ಲಿ ದಾಸೋಹ ಲಭ್ಯ.
ಸಮಯ: ಬೆಳಗ್ಗೆ 07:30 (134 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 7: ಗೋರೂರು ಡ್ಯಾಂ - ಶೆಟ್ಟಿಹಳ್ಳಿ ಚರ್ಚ್ ಪ್ರವಾಸ

ಸ್ಥಳಗಳು: ಹಾಲುವಾಗಿಲು ಕಟ್ಟೆ, ಮುಳುಗಡೆ ಖ್ಯಾತಿಯ ಶೆಟ್ಟಿಹಳ್ಳಿ ಚರ್ಚ್, ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ, ಕೋಣಾಪುರ-ಹೇಮಾವತಿ ಜಲಾಶಯ (ಗೋರೂರು), ಗೋರೂರು ಶ್ರೀ ಸುಬ್ರಹ್ಮಣ್ಯ ಸ್ವಾಮಿ ದೇವಾಲಯ, ರಾಮನಾಥಪುರ ರಾಮೇಶ್ವರ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (143 ಕಿ.ಮೀ).
ಟಿಕೆಟ್ ದರ: ₹400/-.

ಪ್ಯಾಕೇಜ್ 8: ಜಾವಗಲ್ - ಬಾಣಾವರ ಕೋಟೆ ಪರಂಪರೆ ಯಾತ್ರೆ

ಸ್ಥಳಗಳು: ಜಾವಗಲ್ ಶ್ರೀ ಲಕ್ಷ್ಮೀನರಸಿಂಹಸ್ವಾಮಿ ದೇವಾಲಯ, ಅರಕೆರೆ ಶ್ರೀ ಚನ್ನಕೇಶವ ದೇವಸ್ಥಾನ, ಬೆಟ್ಟದಪುರ ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ, ಬಾಣಾವರ ಕೋಟೆ, ಬೆಳಕಲ್ಲು ಶ್ರೀ ರಂಗನಾಥಸ್ವಾಮಿ ದೇವಸ್ಥಾನ.
ಸಮಯ: ಬೆಳಗ್ಗೆ 07:30 (181 ಕಿ.ಮೀ).
ಟಿಕೆಟ್ ದರ: ₹500/-.

ಗಮನಿಸಬೇಕಾದ ಮುಖ್ಯ ನಿಯಮಗಳು:

ಮಕ್ಕಳಿಗೆ ಪ್ರತ್ಯೇಕ ಪ್ರಯಾಣ ದರ ನಿಗದಿಪಡಿಸಲಾಗಿದೆ. ಊಟ ಮತ್ತು ಪ್ರವಾಸಿ ತಾಣಗಳ ಪ್ರವೇಶ ಶುಲ್ಕ (Entry Fee) ಪ್ರಯಾಣಿಕರೇ ಪ್ರತ್ಯೇಕವಾಗಿ ಭರಿಸಬೇಕು (ದಾಸೋಹ ಇರುವ ಸ್ಥಳಗಳನ್ನು ಹೊರತುಪಡಿಸಿ).

ಎಲ್ಲಾ ಬಸ್‌ಗಳು ಹಾಸನ ನಗರ ಬಸ್ ನಿಲ್ದಾಣದಿಂದಲೇ ಹೊರಟು ಸಂಜೆ ಅಲ್ಲೇ ಪ್ರವಾಸ ಮುಕ್ತಾಯಗೊಳಿಸಲಿವೆ.

ಮಾಹಿತಿ ಮತ್ತು ಮುಂಗಡ ಬುಕಿಂಗ್‌ಗಾಗಿ ಸಂಪರ್ಕಿಸಿ:

ಪ್ಯಾಕೇಜ್ ಪ್ರವಾಸದ ಹೆಚ್ಚಿನ ಮಾಹಿತಿ ಹಾಗೂ ಆಸನಗಳ ಕಾಯ್ದಿರಿಸುವಿಕೆಗಾಗಿ ಕೆಳಗಿನ ಸಹಾಯವಾಣಿ ಸಂಖ್ಯೆಗಳನ್ನು ಸಂಪರ್ಕಿಸಬಹುದು:
ಮೊಬೈಲ್ ಸಂಖ್ಯೆಗಳು: 7760990518, 7760990519, 7760990520, 7760990523
ಗ್ರಾಹಕ ಸೇವಾ ಸಂಖ್ಯೆ: 080 2625 2625
ಅಧಿಕೃತ ವೆಬ್‌ಸೈಟ್: www.ksrtc.in

ಓನರ್ ತಲೆಯಿಂದ ಬಿದ್ದ ವಿಗ್ ನೋಡಿ ಬಿದ್ದೂಬಿದ್ದೂ ನಕ್ಕ ಪಾಂಡಾ; ಅದಕ್ಕೂ ಮೊದಲು ಆ ಪ್ರಾಣಿ ಮಾಡಿದ್ದೇನು ನೋಡಿ!

Shriram Bhat — Sat, 24 Oct 2026 17:13:02 +0530

ಕೇರ್‌ಟೇಕರ್ ವಿಗ್ ಹಾರುತ್ತಿದ್ದಂತೆ ಜೋರಾಗಿ ನಕ್ಕ ಪಾಂಡಾ! ಈ ಮುದ್ದಾದ ವಿಡಿಯೊ ನೋಡಿದರೆ ನಿಮಗೂ ನಗು ತಡೆಯಲು ಸಾಧ್ಯವಿಲ್ಲ!

ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿದಿನವೂ ಒಂದಲ್ಲ ಒಂದು ತಮಾಷೆಯ ವಿಡಿಯೊ ವೈರಲ್ ಆಗುತ್ತಿರುತ್ತದೆ. ಕೆಲವೊಂದು ವಿಡಿಯೊಗಳು ಅಚ್ಚರಿ ಮೂಡಿಸಿದರೆ, ಇನ್ನು ಕೆಲವು ಮನಸ್ಸಿಗೆ ಖುಷಿ ನೀಡುತ್ತವೆ. ಇದೀಗ ಪಾಂಡಾ ಮತ್ತು ಅದರ ಆರೈಕೆದಾರರ ನಡುವಿನ ಮೋಜಿನ ಕ್ಷಣವೊಂದು ನೆಟ್ಟಿಗರ ಗಮನ ಸೆಳೆದಿದೆ. ಪಾಂಡಾಗೆ ನೃತ್ಯದ ಹೆಜ್ಜೆಗಳನ್ನು ಕಲಿಸಲು ಹೋದಾಗ ಆರೈಕೆದಾರರ ವಿಗ್ ಹಾರಿ ಹೋಗಿದ್ದು, ಇದನ್ನು ನೋಡಿದ ಪಾಂಡಾದ ಪ್ರತಿಕ್ರಿಯೆ ಎಲ್ಲರ ಮುಖದಲ್ಲೂ ನಗು ಮೂಡಿಸಿದೆ.

ವಿಗ್ ಹಾರಿದ್ದೇ ತಡ, ಪಾಂಡಾದ ಮೋಜಿನ ಪ್ರತಿಕ್ರಿಯೆ!

ಈ ವಿಡಿಯೊದಲ್ಲಿ ಆರೈಕೆದಾರರು ಪಾಂಡಾಗೆ ನೃತ್ಯದ ಕೆಲವು ಹೆಜ್ಜೆಗಳನ್ನು ಕಲಿಸಲು ಪ್ರಯತ್ನಿಸುತ್ತಿರುವುದನ್ನು ಕಾಣಬಹುದು. ಇದೇ ವೇಳೆ ಅನಿರೀಕ್ಷಿತವಾಗಿ ಅವರ ವಿಗ್ ತಲೆಯಿಂದ ಹಾರಿ ಹೋಗುತ್ತದೆ. ಈ ವಿಚಿತ್ರ ಸನ್ನಿವೇಶ ನಡೆದ ತಕ್ಷಣ ಪಾಂಡಾ ತಮಾಷೆಯ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತದೆ. ಅದರ ಚಲನವಲನ ಮತ್ತು ಉತ್ಸಾಹಭರಿತ ವರ್ತನೆ ದೃಶ್ಯವನ್ನು ಮತ್ತಷ್ಟು ಹಾಸ್ಯಮಯವಾಗಿಸಿದೆ.

ಪಾಂಡಾ ನಗುತ್ತಿರುವಂತೆ ಕಾಣುವ ಅದರ ಮುಖಭಾವ ಹಾಗೂ ಮೋಜಿನ ಚಲನೆಗಳು ವಿಡಿಯೊದ ಪ್ರಮುಖ ಆಕರ್ಷಣೆಯಾಗಿವೆ. ಈ ಅಪರೂಪದ ಕ್ಷಣವನ್ನು ಅಲ್ಲಿದ್ದವರು ಕ್ಯಾಮೆರಾದಲ್ಲಿ ಸೆರೆಹಿಡಿದಿದ್ದು, ಬಳಿಕ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಲು ಆರಂಭಿಸಿದೆ.

ನೆಟ್ಟಿಗರಿಂದ ತಮಾಷೆಯ ಕಾಮೆಂಟ್‌ಗಳ ಸುರಿಮಳೆ

ಈ ವಿಡಿಯೊ ನೋಡಿದ ಅನೇಕರು ತಮ್ಮ ನಗುವನ್ನು ತಡೆಯಲಾಗುತ್ತಿಲ್ಲ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಕೆಲವರು, ಆರೈಕೆದಾರರ ವಿಗ್ ಹಾರಿದ್ದನ್ನು ನೋಡಿ ಪಾಂಡಾಗೂ ನಗು ತಡೆಯಲು ಸಾಧ್ಯವಾಗಲಿಲ್ಲ ಎಂದು ತಮಾಷೆ ಮಾಡಿದ್ದಾರೆ. ಇನ್ನು ಕೆಲವರು ಪಾಂಡಾದ ಮುದ್ದಾದ ವರ್ತನೆ ಮತ್ತು ಆರೈಕೆದಾರರೊಂದಿಗಿನ ಅದರ ಆತ್ಮೀಯತೆಯನ್ನು ಮೆಚ್ಚಿಕೊಂಡಿದ್ದಾರೆ.

ಸಾಮಾನ್ಯವಾಗಿ ಪಾಂಡಾಗಳು ತಮ್ಮ ಮುದ್ದಾದ ನೋಟ, ಆಟವಾಡುವ ಸ್ವಭಾವ ಮತ್ತು ವಿಶಿಷ್ಟ ಚಲನವಲನಗಳಿಂದ ಜನರನ್ನು ಆಕರ್ಷಿಸುತ್ತವೆ. ಈ ವಿಡಿಯೊ ಕೂಡ ಅದಕ್ಕೆ ಮತ್ತೊಂದು ಉದಾಹರಣೆಯಾಗಿದೆ. ಸಣ್ಣದೊಂದು ಅನಿರೀಕ್ಷಿತ ಘಟನೆ ಹೇಗೆ ಎಲ್ಲರ ಮನಸ್ಸನ್ನೂ ಹಗುರಗೊಳಿಸಬಹುದು ಎಂಬುದನ್ನು ಈ ದೃಶ್ಯ ತೋರಿಸುತ್ತದೆ.

ಪ್ರಾಣಿಗಳ ಮುದ್ದಾದ ಕ್ಷಣಗಳು ಮನಸ್ಸಿಗೆ ಮುದ ನೀಡುತ್ತವೆ!

ದಿನನಿತ್ಯದ ಕೆಲಸ, ಒತ್ತಡ ಮತ್ತು ಜಂಜಾಟದ ನಡುವೆ ಇಂತಹ ಹಾಸ್ಯಮಯ ವಿಡಿಯೊಗಳನ್ನು ನೋಡುವುದು ಕೆಲವರಿಗೆ ಮನಸ್ಸಿಗೆ ನೆಮ್ಮದಿ ನೀಡಬಹುದು. ಪ್ರಾಣಿಗಳ ಆಟ, ಅವುಗಳ ಸಹಜ ವರ್ತನೆ ಮತ್ತು ಮನುಷ್ಯರೊಂದಿಗಿನ ಮೋಜಿನ ಕ್ಷಣಗಳು ಸಾಮಾಜಿಕ ಜಾಲತಾಣಗಳಲ್ಲಿ ಬೇಗನೆ ಜನಪ್ರಿಯವಾಗುತ್ತವೆ.

ಒಟ್ಟಿನಲ್ಲಿ, ಪಾಂಡಾಗೆ ನೃತ್ಯ ಕಲಿಸುವ ಸರಳ ಪ್ರಯತ್ನವೊಂದು ಅನಿರೀಕ್ಷಿತ ತಮಾಷೆಯ ಘಟನೆಯಾಗಿ ಬದಲಾಗಿದೆ. ಆರೈಕೆದಾರರ ವಿಗ್ ಹಾರಿದ ಕ್ಷಣದಿಂದ ಹಿಡಿದು ಪಾಂಡಾದ ಮುದ್ದಾದ ಪ್ರತಿಕ್ರಿಯೆಯವರೆಗೆ ಎಲ್ಲವೂ ವಿಡಿಯೊವನ್ನು ವಿಶೇಷವಾಗಿಸಿದೆ. ಹೀಗಾಗಿಯೇ ಈ ದೃಶ್ಯ ನೆಟ್ಟಿಗರ ಮುಖದಲ್ಲಿ ನಗು ಮೂಡಿಸುತ್ತಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಈ ವಿಡಿಯೋವನ್ನು (tv1indialive) ಇನ್‌ಸ್ಟಾಗ್ರಾಂನಲ್ಲಿ ನೀವು ನೋಡಬಹುದು

ಒಂದು ನೀರಿನ ಮಧ್ಯೆ, ಮತ್ತೊಂದು ಬೆಟ್ಟದ ಮೇಲೆ... ಈ 2 ಸುಂದರ ಅರಮನೆಗಳು ಎಲ್ಲಿವೆ ಗೊತ್ತಾ?

Govindaraj S — Mon, 26 Oct 2026 20:40:58 +0530

ರಾಜಸ್ಥಾನ ರಾಜ್ಯವು ನಮ್ಮ ಭಾರತದ ಐತಿಹಾಸಿಕ ಸ್ಥಳಗಳ ಕನ್ನಡಿಯಾಗಿದೆ. ಇಲ್ಲಿ ಅರಮನೆ, ಕೋಟೆಗಳಂತಹ ಅದ್ಭುತವಾದ ಸ್ಥಳಗಳನ್ನು ಪರಿಶೀಲಿಸಬಹುದು. ಜನರು ಹೆಚ್ಚಾಗಿ ರಾಜಸ್ಥಾನಿಯ ಶ್ರೀಮಂತ ಸಂಸ್ಕೃತಿ, ಬಾಯೂರಿಸುವ ಸ್ಥಳೀಯ ಖಾದ್ಯಗಳು, ಸಾಂಪ್ರದಾಯಿಕ ಉಡುಗೆ-ತೊಡುಗೆಗಳನ್ನು ಕಣ್ತುಂಬಿಕೊಳ್ಳಲು ಪ್ರವಾಸ ಯೋಜಿಸುತ್ತಾರೆ.

ಹೀಗೆ ರಾಜಸ್ಥಾನಕ್ಕೆ ಹೋದಾಗ ಅಲ್ಲಿನ ಅರಮನೆಗಳನ್ನು ನೋಡುವುದೇ ಪ್ರತಿಯೊಬ್ಬ ಪ್ರವಾಸಿಗನ ಕನಸಾಗಿರುತ್ತದೆ. ಏಕೆಂದರೆ ಇಲ್ಲಿನ ಅರಮನೆಗಳು, ಕೋಟೆಗಳು ತನ್ನ ವಿಶಿಷ್ಟವಾದ ವಾಸ್ತುಶಿಲ್ಪಗಳಿಂದ ಕಣ್ಣು ಕುಕ್ಕುವ ಸೌಂದರ್ಯವನ್ನು ಹೊಂದಿವೆ. ಹಾಗಾದರೆ ಆ ಪ್ಯಾಲೇಸ್‌ಗಳು ಯಾವುವು ಎಂಬುದರ ಬಗ್ಗೆ ಇಲ್ಲಿ ಮಾಹಿತಿ ನೀಡಲಾಗಿದೆ ಓದಿ.

ಲೇಕ್ ಪ್ಯಾಲೇಸ್, ಉದಯಪುರ

ಉದಯಪುರದ ಲೇಕ್‌ ಪ್ಯಾಲೇಸ್‌ ಅತ್ಯಂತ ಸುಂದರವಾದ ಅರಮನೆಗಳಲ್ಲಿ ಒಂದಾಗಿದೆ. ಈ ಅದ್ಭುತವನ್ನು ಮಹಾರಾಜ ಜಗತ್ ಸಿಂಗ್ IIರ ಆಳ್ವಿಕೆಯಲ್ಲಿ ನಿರ್ಮಿಸಲಾಯಿತು. ಸರೋವರದ ಮಧ್ಯೆ ನೆಲೆಸಿರುವ ಈ ಪ್ಯಾಲೇಸ್‌ ಅಂದಿನ ಎಂಜಿನಿಯರ್‌ ಕೈಚಳಕ್ಕೆ ಅತ್ಯುತ್ತಮ ಉದಾಹರಣೆ.

ಈ ಲೇಕ್ ಪ್ಯಾಲೇಸ್ ಅನ್ನು 1743-1746 ರಲ್ಲಿ ನಿರ್ಮಿಸಲಾಯಿತು. ಈ ಅರಮನೆಯನ್ನು ರಾಜಕುಟುಂಬಿಕರು ತಮ್ಮ ಬೇಸಿಗೆಯ ಅರಮನೆಯಾಗಿ ಬಳಸುತ್ತಿದ್ದರು. ಈ ಭವ್ಯವಾದ ಅರಮನೆಯ ಸಂಕೀರ್ಣವು ಪಿಚೋಲಾ ಸರೋವರದಲ್ಲಿರುವ ಜಗ್ನಿವಾಸ್ ದ್ವೀಪದಲ್ಲಿ ನಾಲ್ಕು ಎಕರೆ ಪ್ರದೇಶದಲ್ಲಿ ಹರಡಿದೆ.

ನೀಮ್ರಾನಾ ಕೋಟೆ ಅರಮನೆ, ಅಲ್ವಾರ್

ಅಲ್ವಾರ್‌ನ ಈ ನೀಮ್ರಾನಾ ಕೋಟೆಯು ರಾಜಸ್ಥಾನದ ಮತ್ತೊಂದು ಭವ್ಯವಾದ ಕೋಟೆಯಾಗಿದೆ. ಇದು ಒಂದು ಕಾಲದಲ್ಲಿ ತನ್ನ ವೈಭವದ ಕಾರಣ ಬಹಳ ಪ್ರಸಿದ್ಧವಾಗಿತ್ತು. 1467ರಲ್ಲಿ ರಾಜಾ ದೂಪ್ ರಾಜ್ ಅವರು ಈ ಅರಮನೆಯನ್ನು ನಿರ್ಮಿಸಿದರು.

ಎತ್ತರದ ಬೆಟ್ಟದ ಮೇಲೆ ನೆಲೆಗೊಂಡಿರುವ ಈ ಅರಮನೆಯು ಅಲ್ವಾರ್ ನಗರದ ಭವ್ಯವಾದ ವಿಹಂಗಮ ನೋಟಗಳನ್ನು ನೀಡುತ್ತದೆ. ಪ್ರಸ್ತುತ ಇದು ಪಾರಂಪರಿಕ ಹೋಟೆಲ್‌ ಆಗಿ ಪರಿವರ್ತಿಸಲಾಗಿದೆ. ಹೌದು, ಇದು ದೇಶದ ಅತ್ಯಂತ ಹಳೆಯ ಹೆರಿಟೇಜ್ ರೆಸಾರ್ಟ್ ಹೋಟೆಲ್‌ಗಳಲ್ಲಿ ಒಂದಾಗಿದೆ.

ಕೇವಲ 1 ಡಾಲರ್‌ನಲ್ಲಿ ಬೆಂಗಳೂರಿನಿಂದ ವಿಯೆಟ್ನಾಂ ಪ್ರವಾಸ! ಆಫರ್ ಪಡೆಯುವುದು ಹೇಗೆ?

Kannadaprabha News — Thu, 29 Oct 2026 07:08:18 +0530

ಬೆಂಗಳೂರು: ಭಾರತ-ವಿಯೆಟ್ನಾಂ ನಡುವೆ ವಿಮಾನದಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಗೆ ವಿಯಟ್ ಜೆಟ್ ವಿಮಾನ ಸಂಸ್ಥೆ ನವೆಂಬರ್ 1, 2026 ಅಕ್ಟೋಬರ್ 31, 2027ರ ನಡುವೆ ಪ್ರಯಾಣಿಸುವ ಪ್ರಯಾಣಿಕರಿಗಾಗಿ ಕೇವಲ 1 ಡಾಲರ್ (ತೆರಿಗೆಗಳು ಮತ್ತು ಶುಲ್ಕಗಳನ್ನು ಹೊರತುಪಡಿಸಿ) ಬೆಲೆಯಲ್ಲಿ ಮುಂಗಡ ಟೆಕೆಟ್ ಕಾಯ್ದಿರಿಸುವ ಅವಕಾಶ ನೀಡಿದೆ.

ಭಾರತದ 10 ವಿಮಾನ ನಿಲ್ದಾಣಗಳಿಗೆ ತನ್ನ ವಿಮಾನಗಳನ್ನು ಆರಂಭಿಸಿದ್ದು, ಪ್ರಯಾಣಿಕರನ್ನು ಆಕರ್ಷಿಸಲು ಪ್ರೊಮೋಷನಲ್ ಪ್ರೈಸ್ ಆಗಿ ಈ ದರ ನೀಡುತ್ತಿದೆ.

ಹೋ ಚಿ ಮಿನ್ಹ್ ನಗರಕ್ಕೆ ನೇರ ವಿಮಾನಯಾನ

ಸೀಮಿತ ಅವಧಿಗೆ ಕೊಡುಗೆ ನೀಡುತ್ತಿರುವ ವಿಯೆಟ್ ಜೆಟ್ ಸಂಸ್ಥೆ ಹನೋಯ್-ತೈನಾನ್ ಮಾರ್ಗವನ್ನು ಹೊಸದಾಗಿ ಪ್ರಾರಂಭಿಸಿದೆ. ಅಲ್ಲದೆ ಹೋ ಚಿ ಮಿನ್ಹ್ ಸಿಟಿ ಮತ್ತು ಚಿಯಾಂಗ್ ಮಾಯ್ ನಡುವೆ ತನ್ನ ನೇರ ವಿಮಾನಗಳನ್ನು ಪುನರಾರಂಭಿಸಿದೆ. ಅಲ್ಲದೆ, ಏಷ್ಯಾದಲ್ಲಿ ತನ್ನ ಜಾಲವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶ ಹೊಂದಿದೆ.

ನವೆಂಬರ್ 1, 2026 ಮತ್ತು ಅಕ್ಟೋಬರ್ 31, 2027

ಭಾರತೀಯ ಪ್ರಯಾಣಿಕರು ಅ.26ರಿಂದ ನವೆಂಬರ್ 1, 2026 (IST) ರಂದು 21:30 ರವರೆಗೆ www.vietjetair.com ಅಥವಾ ವಿಯೆಟ್ ಜೆಟ್ ಏರ್ ಮೊಬೈಲ್ ಅಪ್ಲಿಕೇಶನ್ ಮೂಲಕ ದರಗಳನ್ನು ಬುಕ್ ಮಾಡಬಹುದು. ಈ ಕೊಡುಗೆ ದೆಹಲಿ, ಮುಂಬೈ, ಅಹಮದಾಬಾದ್, ಹೈದರಾಬಾದ್ ಮತ್ತು ಬೆಂಗಳೂರಿನಿಂದ ವಿಯೆಟ್ನಾಂನ ಅತಿದೊಡ್ಡ ನಗರಗಳಾದ ಹನೋಯ್ ಮತ್ತು ಹೋ ಚಿ ಮಿನ್ಹ್ ನಗರಕ್ಕೆ ಸಂಪರ್ಕಿಸುವ ವಿಮಾನಗಳಿಗೆ ನವೆಂಬರ್ 1, 2026 ಮತ್ತು ಅಕ್ಟೋಬರ್ 31, 2027 ರ ನಡುವೆ ಪ್ರಯಾಣಿಸಲು ಮಾತ್ರ ಅನ್ವಯಿಸುತ್ತದೆ (ಬ್ಲಾಕ್‌ಔಟ್ ದಿನಾಂಕಗಳು ಅನ್ವಯಿಸುತ್ತವೆ).

ವಿಯೆಟ್ನಾಂನ ದೇಶೀಯ ಮತ್ತು ವಿಯೆಟ್ ಜೆಟ್ ನೆಟ್‌ವರ್ಕ್‌ನಾದ್ಯಂತ ಇತರ ಅಂತರರಾಷ್ಟ್ರೀಯ ಮಾರ್ಗಗಳಲ್ಲಿಯೂ ಲಭ್ಯವಿದೆ ಎಂದು ಸಂಸ್ಥೆ ತಿಳಿಸಿದೆ.

ಕೌಂಟರ್‌ನಲ್ಲಿ ಮಾಡುವ ರೈಲು ಟಿಕೆಟ್‌ಗೂ ವಿಮೆ ಸೌಲಭ್ಯ ಇಂದಿನಿಂದ ಲಭ್ಯ

Mahmad Rafik — Tue, 27 Oct 2026 09:27:17 +0530

ರೈಲು ನಿಲ್ದಾಣಗಳ ಕೌಂಟರ್‌ಗಳಲ್ಲಿ ಖರೀದಿ ಮಾಡಿದ ಎಲ್ಲಾ ಟಿಕೆಟ್‌ಗಳಿಗೆ ವಿಮೆ ಕಲ್ಪಿಸುವ ನಿಯಮ ಅ.27ರಿಂದಲೇ ಜಾರಿಗೆ ಬರಲಿದೆ. ಈ ಹಿಂದೆ ಇದು ಐಆರ್‌ಸಿಟಿಸಿ ಮೂಲಕ ಆನ್‌ಲೈನ್‌ನಲ್ಲಿ ಟಿಕೆಟ್‌ ಬುಕ್‌ ಮಾಡುವ ಪ್ರಯಾಣಿಕರಿಗೆ ಮಾತ್ರ ಲಭ್ಯವಿತ್ತು.

ದುಬೈನಲ್ಲಿ ವಿಶ್ವದ ಮೊದಲ 24 ಕ್ಯಾರೆಟ್ ಚಿನ್ನದ ರಸ್ತೆ ಈ ವರ್ಷದ ಅಂತ್ಯಕ್ಕೆ ಅನಾವರಣ, ಚಿನ್ನದ ಮೇಲೆ ನೀವು ಇಲ್ಲಿ ನಡೆಯಬಹುದು!

Santosh Naik — Mon, 26 Oct 2026 19:48:33 +0530

ದುಬೈ (ಅ.26): ತನ್ನ ಭವ್ಯವಾದ ಕಟ್ಟಡಗಳು ಹಾಗೂ ಸ್ವರ್ಣಮಯ ಪ್ರವಾಸೋದ್ಯಮಕ್ಕೆ ಜಗತ್ಪ್ರಸಿದ್ಧಿಯಾಗಿರುವ ದುಬೈ, ಇದೀಗ ಮತ್ತೊಂದು ಅಪರೂಪದ ಕೌತುಕಕ್ಕೆ ವೇದಿಕೆ ಸಜ್ಜುಗೊಳಿಸಿದೆ. ಈ ಬಾರಿ ದುಬೈಗೆ ಭೇಟಿ ನೀಡುವ ಪ್ರವಾಸಿಗರು ನಿಜವಾದ ಚಿನ್ನದ ಮೇಲೆಯೇ ಹೆಜ್ಜೆ ಹಾಕಿ ನಡೆಯುವ ಅಪರೂಪದ ಅನುಭವ ಪಡೆಯಲಿದ್ದಾರೆ! 'ದುಬೈ ಗೋಲ್ಡ್ ಡಿಸ್ಟ್ರಿಕ್ಟ್' (Dubai Gold District) 2026 ರ ವರ್ಷಾಂತ್ಯದೊಳಗೆ ವಿಶ್ವದ ಮೊದಲ ಹಾಗೂ ಅತಿ ಉದ್ದದ 24-ಕ್ಯಾರೆಟ್ (24-Karat) 'ಚಿನ್ನದ ಕಾಲುದಾರಿ'ಯನ್ನು (Gold Walkway) ಸಾರ್ವಜನಿಕರಿಗೆ ಅನಾವರಣಗೊಳಿಸಲು ಸಿದ್ಧತೆ ನಡೆಸಿದೆ.

ದುಬೈ ಗೋಲ್ಡ್ ಡಿಸ್ಟ್ರಿಕ್ಟ್‌ನ ವಾಣಿಜ್ಯ ವಿಭಾಗದ ಹಿರಿಯ ನಿರ್ದೇಶಕ ರಶೀದ್ ಅಲ್ ಹರ್ಮೂದಿ ಅವರ ಪ್ರಕಾರ, ಮುಂದಿನ ಎರಡು ತಿಂಗಳ ಒಳಗಾಗಿ ಈ ಅಭೂತಪೂರ್ವ ಆಕರ್ಷಣೆ ಸಾರ್ವಜನಿಕರ ವೀಕ್ಷಣೆಗೆ ಹಾಗೂ ನಡಿಗೆಗೆ ಮುಕ್ತವಾಗಲಿದೆ.

ಪ್ರಸಿದ್ಧ ಸ್ವರ್ಣ ಮಾರುಕಟ್ಟೆಗಳು (Gold Souks) ಹಾಗೂ ಆಭರಣ ವ್ಯಾಪಾರಕ್ಕೆ ಜಾಗತಿಕ ಕೇಂದ್ರವಾಗಿರುವ ದುಬೈ, ಈ ನೂತನ ಕಾಲುದಾರಿಯ ಮೂಲಕ ಪ್ರವಾಸಿಗರಿಗೆ ಚಿನ್ನವನ್ನು ಖರೀದಿಸುವುದಷ್ಟೇ ಅಲ್ಲದೆ, ಅದನ್ನು ನೇರವಾಗಿ ಅನುಭವಿಸುವ ಹೊಸ ಅವಕಾಶವನ್ನು ಒದಗಿಸುತ್ತಿದೆ. ಪ್ರಸ್ತುತ ಈ ಚಿನ್ನದ ಹಾದಿಯ ನಿಖರವಾದ ಉದ್ದ, ನಿರ್ಮಾಣ ವೆಚ್ಚ ಹಾಗೂ ಉದ್ಘಾಟನೆಯ ದಿನಾಂಕವನ್ನು ರಹಸ್ಯವಾಗಿಡಲಾಗಿದೆ.

ಚಿಲ್ಲರೆ ಮತ್ತು ಪ್ರವಾಸೋದ್ಯಮ ವೃದ್ಧಿಗೆ ದುಬೈ ಮೆಗಾ ಪ್ಲಾನ್

ಈ ಪ್ರಸ್ತಾವಿತ 'ಗೋಲ್ಡನ್ ವಾಕ್‌ವೇ' ದುಬೈ ಗೋಲ್ಡ್ ಡಿಸ್ಟ್ರಿಕ್ಟ್‌ನ ಬೃಹತ್ ಯೋಜನೆಯ ಒಂದು ಭಾಗವಾಗಿದೆ. ದುಬೈನ ಪ್ರತಿಷ್ಠಿತ 'ದೇರಾ' (Deira) ಪ್ರದೇಶದಲ್ಲಿರುವ ಈ ಡಿಸ್ಟ್ರಿಕ್ಟ್ ಅನ್ನು 2026 ರ ಜನವರಿಯಲ್ಲಿ ಉದ್ಘಾಟಿಸಲಾಯಿತು. ಇದು ಚಿನ್ನದ ಚಿಲ್ಲರೆ ವ್ಯಾಪಾರ, ಜ್ಯುವೆಲ್ಲರಿ, ಬುಲಿಯನ್, ಸಗಟು ವ್ಯಾಪಾರ ಹಾಗೂ ಹೂಡಿಕೆಯನ್ನು ಒಂದೇ ಸೂರಿನಡಿ ತರುವ ಬೃಹತ್ ಕೇಂದ್ರವಾಗಿದೆ.

ದುಬೈ ಮೀಡಿಯಾ ಆಫೀಸ್ ನೀಡಿರುವ ಮಾಹಿತಿಯಂತೆ, ಈ ಪ್ರದೇಶದಲ್ಲಿ ಚಿನ್ನ, ಆಭರಣ, ಸುಗಂಧ ದ್ರವ್ಯ, ಸೌಂದರ್ಯವರ್ಧಕಗಳು ಹಾಗೂ ಲೈಫ್‌ಸ್ಟೈಲ್ ವಿಭಾಗದ ಬರೋಬ್ಬರಿ 1,000 ಕ್ಕೂ ಹೆಚ್ಚು ಚಿಲ್ಲರೆ ಮಳಿಗೆಗಳಿವೆ. ಮಧ್ಯಪ್ರಾಚ್ಯದಲ್ಲೇ ಅತಿ ದೊಡ್ಡದಾದ ಚಿನ್ನ ಮತ್ತು ಆಭರಣ ಪ್ರದರ್ಶನವನ್ನು ಆಯೋಜಿಸಲು ರಶೀದ್ ಅಲ್ ಹರ್ಮೂದಿ ಯೋಜಿಸುತ್ತಿದ್ದಾರೆ.

ಇಲ್ಲಿನ ಶೇಕಡಾ 20 ರಷ್ಟು ಸಗಟು ಚಿನ್ನದ ವ್ಯಾಪಾರ ಕಚೇರಿಗಳು ಮತ್ತು ಶೇಕಡಾ 15 ರಷ್ಟು ಹೊಸ ಆಭರಣ, ವಜ್ರ ಹಾಗೂ ಐಷಾರಾಮಿ ವಾಚ್ ಮಳಿಗೆಗಳು 2026 ರ ಆರಂಭದಿಂದೀಚೆಗೆ ಭಾರಿ ಪ್ರಗತಿ ಕಂಡಿವೆ. ಮುಂಬರುವ ವರ್ಷದಲ್ಲಿ ಇನ್ನು ಶೇ. 10 ರಿಂದ 20 ರಷ್ಟು ಕಂಪನಿಗಳು ಇಲ್ಲಿಗೆ ತಮ್ಮ ವಹಿವಾಟನ್ನು ಸ್ಥಳಾಂತರಿಸುವ ನಿರೀಕ್ಷೆಯಿದೆ.

16.5 ಕೆಜಿ ತೂಕದ ಚಿನ್ನದ ಜುಮುಕಿಗೆ ಗಿನ್ನೆಸ್ ದಾಖಲೆಯ ಹೆಗ್ಗಳಿಕೆ!

ಚಿನ್ನದ ಕಾಲುದಾರಿಯ ಪ್ರಕಟಣೆಯ ಬೆನ್ನಲ್ಲೇ ದುಬೈನಲ್ಲಿ ಮತ್ತೊಂದು ಐತಿಹಾಸಿಕ ಸಾಧನೆ ದಾಖಲಾಗಿದೆ. ಭಾರತೀಯ ಮೂಲದ ಪ್ರಸಿದ್ಧ 'ಜೋಯಾಲುಕ್ಕಾಸ್ ಜ್ಯುವೆಲ್ಲರಿ' (Joyalukkas Jewellery) ಸಂಸ್ಥೆ ಸಿದ್ಧಪಡಿಸಿದ ಸಾಂಪ್ರದಾಯಿಕ ಭಾರತೀಯ ವಿನ್ಯಾಸದ 'ಜುಮುಕಿ' (Jhumka) ಕಿವಿಯೋಲೆಗಳಿಗೆ ಎರಡೆರಡು 'ಗಿನ್ನೆಸ್ ವಿಶ್ವ ದಾಖಲೆಗಳು' (Guinness World Records) ಲಭಿಸಿವೆ.

22-ಕ್ಯಾರೆಟ್ ಶುದ್ಧ ಚಿನ್ನದಿಂದ ಕೈಯಲ್ಲೇ ತಯಾರಿಸಲಾದ ಈ ಜೋಡಿ ಜುಮುಕಿಗಳ ತೂಕ ಬರೋಬ್ಬರಿ 16.514 ಕಿಲೋಗ್ರಾಂ! ನವಿಲಿನ ಸೌಂದರ್ಯ, ಗಾಂಭೀರ್ಯ ಮತ್ತು ಕೃಪೆಯಿಂದ ಪ್ರೇರಿತಗೊಂಡು ತಯಾರಿಸಲಾದ ಈ ಜುಮುಕಿಗೆ 'ಮಯೂರ ಸಹಸ್ರ' ಎಂದು ಹೆಸರಿಡಲಾಗಿದೆ. ಇದು ಜಗತ್ತಿನ ಅತಿ ತೂಕದ (Heaviest) ಹಾಗೂ ಅತಿ ದೊಡ್ಡ (Largest) ಕಿವಿಯೋಲೆ ಜೋಡಿ ಎನ್ನುವ ವಿಶ್ವ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ.

2026 ರ ಅಕ್ಟೋಬರ್ 24 ರಂದು ಯುಎಇ ಆರ್ಥಿಕ ಮತ್ತು ಪ್ರವಾಸೋದ್ಯಮ ಸಚಿವ ಅಬ್ದುಲ್ಲಾ ಬಿನ್ ತೌಕ್ ಅಲ್ ಮರ್ರಿ ಅವರ ಉಪಸ್ಥಿತಿಯಲ್ಲಿ ಈ ಬೃಹತ್ ಜುಮುಕಿಯನ್ನು ಅನಾವರಣಗೊಳಿಸಲಾಯಿತು. ಈ ಅಪರೂಪದ ಆಭರಣವನ್ನು ಮಾರಾಟಕ್ಕಿಡದೆ, ಪ್ರವಾಸಿಗರ ವೀಕ್ಷಣೆಗಾಗಿ ದುಬೈನಲ್ಲಿ ಖಾಯಂ ಆಗಿ ಪ್ರದರ್ಶನಕ್ಕಿಡಲಾಗುವುದು ಎಂದು ಸಂಸ್ಥೆ ತಿಳಿಸಿದೆ.

ಒಟ್ಟಾರೆಯಾಗಿ, 24 ಕ್ಯಾರೆಟ್ ಚಿನ್ನದ ನಡಿಗೆ ಹಾದಿ, ಗಿನ್ನೆಸ್ ದಾಖಲೆಯ ಬೃಹತ್ ಜುಮುಕಿ ಹಾಗೂ ಬೃಹತ್ ವ್ಯಾಪಾರ ಪ್ರದರ್ಶನಗಳ ಮೂಲಕ ದುಬೈ ಗೋಲ್ಡ್ ಡಿಸ್ಟ್ರಿಕ್ಟ್ ಜಾಗತಿಕ ಹೂಡಿಕೆದಾರರು ಮತ್ತು ಪ್ರವಾಸಿಗರನ್ನು ತನ್ನತ್ತ ಸೆಳೆಯಲು ಸಂಪೂರ್ಣವಾಗಿ ಸಜ್ಜಾಗಿದೆ.

ಮಾನ್ ಸಾಗರ್ ಸರೋವರದಲ್ಲಿ ತೇಲುವ ಜೈಪುರದ ನಿಗೂಢ ಅರಮನೆ, ‘ಜಲ್ ಮಹಲ್’ ಸೌಂದರ್ಯವೇ ಅದ್ಭುತ

Gowthami K — Wed, 28 Oct 2026 17:17:48 +0530

ರಾಜಸ್ಥಾನದ ಜೈಪುರದಲ್ಲಿರುವ ಜಲ್ ಮಹಲ್ ಮಾನ್ ಸಾಗರ್ ಸರೋವರದ ಮಧ್ಯದಲ್ಲಿರುವ ಒಂದು ಐತಿಹಾಸಿಕ ಅರಮನೆಯಾಗಿದೆ. ಐದು ಅಂತಸ್ತುಗಳ ಈ ಕಟ್ಟಡದ ನಾಲ್ಕು ಅಂತಸ್ತುಗಳು ನೀರಿನೊಳಗೆ ಮುಳುಗಿರುವುದು ಇದರ ಅತ್ಯಂತ ವಿಶಿಷ್ಟ ಆಕರ್ಷಣೆಯಾಗಿದೆ. ಇದು ಇತಿಹಾಸ, ವಾಸ್ತುಶಿಲ್ಪ ಮತ್ತು ಪ್ರಕೃತಿಯ ಅಪೂರ್ವ ಸಂಗಮವಾಗಿದೆ.

ರಾಜಸ್ಥಾನದ ರಾಜಧಾನಿ ಜೈಪುರದ ಪ್ರಮುಖ ಪ್ರವಾಸಿ ಆಕರ್ಷಣೆಗಳಲ್ಲಿ ಜಲ್ ಮಹಲ್ ವಿಶಿಷ್ಟ ಸ್ಥಾನ ಪಡೆದಿದೆ. ಮಾನ್ ಸಾಗರ್ ಸರೋವರದ ಮಧ್ಯಭಾಗದಲ್ಲಿ ನೆಲೆಗೊಂಡಿರುವ ಈ ಅರಮನೆಯು ತನ್ನ ಅಪರೂಪದ ವಾಸ್ತುಶಿಲ್ಪ, ಐತಿಹಾಸಿಕ ಹಿನ್ನೆಲೆ ಹಾಗೂ ನೈಸರ್ಗಿಕ ಸೌಂದರ್ಯದಿಂದ ದೇಶ- ವಿದೇಶಗಳ ಪ್ರವಾಸಿಗರನ್ನು ಆಕರ್ಷಿಸುತ್ತದೆ. ‘ಜಲ್ ಮಹಲ್’ ಎಂದರೆ ನೀರಿನ ಅರಮನೆ ಎಂದರ್ಥ. ನೀರಿನ ನಡುವೆ ತೇಲುತ್ತಿರುವಂತೆ ಕಾಣುವ ಈ ಕಟ್ಟಡವು ರಾಜಸ್ಥಾನದ ರಾಜಮನೆತನದ ವೈಭವಕ್ಕೆ ಸಾಕ್ಷಿಯಾಗಿದೆ.

ಜಲ್ ಮಹಲ್‌ 18ನೇ ಶತಮಾನದಲ್ಲಿ ಆಮೇರ್‌ನ ಮಹಾರಾಜ ಎರಡನೇ ಸವಾಯಿ ಜೈ ಸಿಂಗ್ ಕಾಲದಲ್ಲಿ ನಿರ್ಮಾಣವಾಗಿದೆ. ಅರಮನೆಯು ರಾಜಮನೆತನದ ವಿಶ್ರಾಂತಿ ತಾಣವಾಗಿ ಹಾಗೂ ಬೇಟೆಯ ಪ್ರವಾಸಗಳ ಸಂದರ್ಭದಲ್ಲಿ ತಂಗುವ ಸ್ಥಳವಾಗಿ ಬಳಕೆಯಾಗುತ್ತಿತ್ತು ಎಂದು ಹೇಳಲಾಗುತ್ತದೆ. ಜೈಪುರದ ಐತಿಹಾಸಿಕ ಪರಂಪರೆಯಲ್ಲಿ ಈ ಅರಮನೆಗೆ ಮಹತ್ವದ ಸ್ಥಾನವಿದೆ.

ಕೆಂಪು ಮರಳುಗಲ್ಲಿನಿಂದ ನಿರ್ಮಿಸಲಾದ ಜಲ್ ಮಹಲ್ ಐದು ಅಂತಸ್ತುಗಳನ್ನು ಹೊಂದಿದೆ. ಸರೋವರದಲ್ಲಿ ನೀರಿನ ಮಟ್ಟ ಹೆಚ್ಚಿರುವ ಸಂದರ್ಭದಲ್ಲಿ ಮೇಲಿನ ಒಂದು ಅಂತಸ್ತು ಮಾತ್ರ ನೀರಿನ ಮೇಲ್ಭಾಗದಲ್ಲಿ ಕಾಣಿಸಿಕೊಂಡರೆ, ಉಳಿದ ನಾಲ್ಕು ಅಂತಸ್ತುಗಳು ನೀರಿನೊಳಗೆ ಮುಳುಗಿರುತ್ತವೆ. ಇದೇ ಇದರ ಅತ್ಯಂತ ವಿಶಿಷ್ಟ ಆಕರ್ಷಣೆ. ರಾಜಪೂತ ವಾಸ್ತುಶಿಲ್ಪದ ಪ್ರಭಾವವನ್ನು ಹೊಂದಿರುವ ಅರಮನೆಯ ವಿನ್ಯಾಸವು ಆ ಕಾಲದ ನಿರ್ಮಾಣ ಕೌಶಲಕ್ಕೆ ಸಾಕ್ಷಿಯಾಗಿದೆ.

ಅರಮನೆಯ ಸುತ್ತಲಿನ ಮಾನ್ ಸಾಗರ್ ಸರೋವರ ಮತ್ತು ಹಿನ್ನೆಲೆಯಲ್ಲಿರುವ ಅರಾವಳಿ ಬೆಟ್ಟಗಳು ಮನಮೋಹಕ ದೃಶ್ಯವನ್ನು ಸೃಷ್ಟಿಸುತ್ತವೆ. ವಿಶೇಷವಾಗಿ ಸೂರ್ಯೋದಯ ಮತ್ತು ಸೂರ್ಯಾಸ್ತದ ಸಮಯದಲ್ಲಿ ಅರಮನೆಯ ಪ್ರತಿಬಿಂಬವು ಸರೋವರದ ನೀರಿನಲ್ಲಿ ಮೂಡಿಸುವ ದೃಶ್ಯ ಪ್ರವಾಸಿಗರನ್ನು ಮಂತ್ರಮುಗ್ಧಗೊಳಿಸುತ್ತದೆ. ಸರೋವರವು ವಿವಿಧ ಜಲಚರ ಪಕ್ಷಿಗಳಿಗೂ ಆಶ್ರಯ ಒದಗಿಸುತ್ತದೆ.

ಜೈಪುರಕ್ಕೆ ಭೇಟಿ ನೀಡುವ ಪ್ರವಾಸಿಗರು ಜಲ್ ಮಹಲ್ ಅನ್ನು ವೀಕ್ಷಿಸಲು ಹೆಚ್ಚಿನ ಆಸಕ್ತಿ ತೋರುತ್ತಾರೆ. ಅರಮನೆಯ ಒಳಭಾಗಕ್ಕೆ ಸಾರ್ವಜನಿಕರ ಪ್ರವೇಶ ಸಾಮಾನ್ಯವಾಗಿ ನಿರ್ಬಂಧಿತವಾಗಿದ್ದು, ಪ್ರವಾಸಿಗರು ಸರೋವರದ ದಡದಿಂದಲೇ ಅದರ ಸೌಂದರ್ಯವನ್ನು ಆಸ್ವಾದಿಸಬಹುದು.

ಒಟ್ಟಾರೆಯಾಗಿ, ಇತಿಹಾಸ, ವಾಸ್ತುಶಿಲ್ಪ ಮತ್ತು ಪ್ರಕೃತಿಯ ಅಪೂರ್ವ ಸಂಗಮವಾಗಿರುವ ಜಲ್ ಮಹಲ್ ರಾಜಸ್ಥಾನದ ಸಾಂಸ್ಕೃತಿಕ ಪರಂಪರೆಯ ಅಮೂಲ್ಯ ಸಂಕೇತವಾಗಿದೆ. ನೀರಿನ ನಡುವೆ ಗಾಂಭೀರ್ಯದಿಂದ ಕಂಗೊಳಿಸುವ ಈ ಅರಮನೆಯು ಭಾರತದ ಐತಿಹಾಸಿಕ ಸ್ಮಾರಕಗಳ ವೈವಿಧ್ಯಕ್ಕೆ ಮತ್ತೊಂದು ಸುಂದರ ಉದಾಹರಣೆಯಾಗಿದೆ.

ತಿರುಪತಿ ತಿರುಮಲದಲ್ಲಿ ತೀವ್ರ ನೀರಿನ ಅಭಾವ, ಕರ್ನಾಟಕ ಭವನದ ಬುಕ್ಕಿಂಗ್ ನಿಲ್ಲಿಸಿದ ಸರ್ಕಾರ!

Gowthami K — Thu, 29 Oct 2026 14:53:34 +0530

ಬೆಂಗಳೂರು: ಪ್ರಸಿದ್ಧ ಯಾತ್ರಾ ಸ್ಥಳವಾದ ಆಂಧ್ರಪ್ರದೇಶದ ತಿರುಮಲದಲ್ಲಿ ತೀವ್ರ ನೀರಿನ ಬಿಕ್ಕಟ್ಟು ತಲೆದೋರಿದ್ದು, ಇದರ ಬಿಸಿ ಈಗ ಶ್ರೀ ವೆಂಕಟೇಶ್ವರ ಸ್ವಾಮಿಯ ದರ್ಶನಕ್ಕೆ ತೆರಳುವ ಕರ್ನಾಟಕದ ಯಾತ್ರಿಕರಿಗೂ ತಟ್ಟಿದೆ. ತಿರುಮಲದಲ್ಲಿರುವ ಸರ್ಕಾರಿ ಸ್ವಾಮ್ಯದ 'ಕರ್ನಾಟಕ ಭವನ'ದಲ್ಲಿ ಕೊಠಡಿಗಳು ಹಾಗೂ ವಸತಿ ನಿಲಯಗಳ ಬುಕಿಂಗ್‌ಗಾಗಿ ನೀಡಲಾಗುತ್ತಿದ್ದ ಅಧಿಕೃತ ಶಿಫಾರಸು ಪತ್ರಗಳನ್ನು ತಾತ್ಕಾಲಿಕವಾಗಿ ತಡೆಹಿಡಿಯಲು ಕರ್ನಾಟಕ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ.

ಜಲಾಶಯಗಳಲ್ಲಿ ಸಾರ್ವಕಾಲಿಕ ಕನಿಷ್ಠ ಮಟ್ಟಕ್ಕೆ ಕುಸಿದ ನೀರು

ಕಳೆದ ಆರು ತಿಂಗಳುಗಳಿಂದ ಸೂಕ್ತ ಮಳೆಯಾಗದ ಹಿನ್ನೆಲೆಯಲ್ಲಿ ತಿರುಮಲ ಬೆಟ್ಟದ ಸುತ್ತಮುತ್ತಲಿನ ಕುಡಿಯುವ ನೀರಿನ ಜಲಾಶಯಗಳು ಬತ್ತಿ ಹೋಗಿದೆ. ಕ್ಷೇತ್ರಕ್ಕೆ ಪ್ರಮುಖ ನೀರಿನ ಆಸರೆಯಾಗಿದ್ದ ಕಲ್ಯಾಣಿ, ಪಾಪವಿನಾಶನಂ, ಗೋಗರ್ಭಂ, ಕುಮಾರಧಾರ, ಪಶುಪುಧಾರ ಮತ್ತು ಆಕಾಶ ಗಂಗೆಯಂತಹ ಪ್ರಮುಖ ಜಲಾಶಯಗಳು ಹಾಗೂ ಪುಷ್ಕರಿಣಿಗಳಲ್ಲಿ ನೀರಿನ ಮಟ್ಟ ಸಾರ್ವಕಾಲಿಕ ಕನಿಷ್ಠ ಮಟ್ಟಕ್ಕೆ ಕುಸಿದಿದೆ. ಇಡೀ ಪರ್ಯಾಯ ದ್ವೀಪ ಪ್ರದೇಶದಲ್ಲಿ ಬರ ಆವರಿಸಿದ್ದು, ನೀರಿನ ಮಟ್ಟ ವೇಗವಾಗಿ ಕ್ಷೀಣಿಸುತ್ತಿರುವುದು ಆಡಳಿತ ಮಂಡಳಿಗೆ ದೊಡ್ಡ ತಲೆನೋವಾಗಿದೆ.

ಟ್ಯಾಂಕರ್ ನೀರೇ ಆಸರೆ

ಈ ಕುರಿತು ಪ್ರತಿಕ್ರಿಯಿಸಿರುವ ಮುಜರಾಯಿ ಸಚಿವ ಕೆ.ಎಸ್. ಬಸವಂತಪ್ಪ ಅವರು, ಕಳೆದ ಕೆಲವು ವಾರಗಳಿಂದ ತಿರುಮಲದಲ್ಲಿ ತೀವ್ರ ನೀರಿನ ಕೊರತೆ ಎದುರಾಗಿದೆ. ಪರಿಸ್ಥಿತಿ ಗಂಭೀರವಾಗಿರುವುದರಿಂದ ಕರ್ನಾಟಕ ಭವನಕ್ಕೆ ನೀರು ಪೂರೈಸಲು ಸದ್ಯಕ್ಕೆ ಖಾಸಗಿ ನೀರಿನ ಟ್ಯಾಂಕರ್‌ಗಳನ್ನೇ ಸಂಪೂರ್ಣವಾಗಿ ಅವಲಂಬಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ ಎಂದು ತಿಳಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ, ಮುಜರಾಯಿ ಇಲಾಖೆಯು ಸಚಿವರ ಕಚೇರಿಯಿಂದ ನೀಡಲಾಗುತ್ತಿದ್ದ ಎಲ್ಲ ರೀತಿಯ ವಸತಿ ಶಿಫಾರಸು ಪತ್ರಗಳ ವಿತರಣೆಯನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ನಿಲ್ಲಿಸಲಾಗಿದೆ.

ಕರ್ನಾಟಕ ಭವನದ ಪ್ರಸ್ತುತ ಸ್ಥಿತಿಗತಿ

ತಿರುಮಲದಲ್ಲಿರುವ ಪ್ರಮುಖ ಮತ್ತು ಅತಿ ದೊಡ್ಡ ಯಾತ್ರಿ ವಸತಿ ಸಂಕೀರ್ಣಗಳಲ್ಲಿ ಒಂದಾಗಿರುವ ಕರ್ನಾಟಕ ಭವನವು ಒಟ್ಟು ಐದು ಬ್ಲಾಕ್‌ಗಳಲ್ಲಿ 350 ಕೊಠಡಿಗಳು, 12 ವಸತಿ ನಿಲಯಗಳು ಹಾಗೂ ಒಂದು ಬೃಹತ್ ಕಲ್ಯಾಣ ಮಂಟಪವನ್ನು ಹೊಂದಿದೆ.

ಪ್ರಸ್ತುತ ನೀರಿನ ಅಭಾವದಿಂದಾಗಿ ಎದುರಾಗಿರುವ ಪ್ರಮುಖ ಬದಲಾವಣೆಗಳೆಂದರೆ, ಕಷ್ಟಪಟ್ಟು ನಾಲ್ಕು ನೀರಿನ ಟ್ಯಾಂಕರ್‌ಗಳನ್ನು ವ್ಯವಸ್ಥೆಗೊಳಿಸಿ ಭವನದ ದೈನಂದಿನ ಅಗತ್ಯಗಳನ್ನು ನಿರ್ವಹಿಸಲಾಗುತ್ತಿದೆ. ಸ್ಥಳದಲ್ಲೇ ನೀಡಲಾಗುತ್ತಿದ್ದ ಆಫ್‌ಲೈನ್ ಕೊಠಡಿ ಬುಕಿಂಗ್‌ಗಳನ್ನು ಕೂಡ ಸಂಪೂರ್ಣವಾಗಿ ರದ್ದುಗೊಳಿಸಲಾಗಿದೆ. ಮೂರು ತಿಂಗಳ ಮುಂಚಿತವಾಗಿಯೇ ಮುಂಗಡವಾಗಿ ಆನ್‌ಲೈನ್ ಕಾಯ್ದಿರಿಸಿದ ಭಕ್ತರಿಗೆ ಮಾತ್ರ ಸದ್ಯ ಕೊಠಡಿಗಳನ್ನು ನೀಡಲಾಗುತ್ತಿದ್ದು, ಅವರಿಗೆ ಕೇವಲ ಶೌಚ ಹಾಗೂ ನೈರ್ಮಲ್ಯಕ್ಕೆ ಅಗತ್ಯವಿರುವಷ್ಟು ಮಾತ್ರ ನೀರು ಸರಬರಾಜು ಮಾಡಲಾಗುತ್ತಿದೆ. ಆನ್‌ಲೈನ್ ಬುಕ್ಕಿಂಗ್ ಕೂಡ ನಿಲ್ಲಿಸಲಾಗಿದೆ

ಸೀಮಿತ ನೀರು ಪೂರೈಕೆಗೆ TTD ಸೂಚನೆ

ತಿರುಮಲಕ್ಕೆ ಪ್ರತಿದಿನ ಅಂದಾಜು 20 ರಿಂದ 25 ಮಿಲಿಯನ್ ಲೀಟರ್ ನೀರು ಅಗತ್ಯವಿದೆ. ಇತ್ತೀಚೆಗೆ ಮುಕ್ತಾಯಗೊಂಡ ಬ್ರಹ್ಮೋತ್ಸವದ ನಂತರ, ತಿರುಮಲ ತಿರುಪತಿ ದೇವಸ್ಥಾನಂ ಆಡಳಿತ ಮಂಡಳಿಯು ನೀರನ್ನು ಕೇವಲ ಕುಡಿಯುವ ಉದ್ದೇಶಗಳಿಗೆ ಆದ್ಯತೆಯ ಮೇಲೆ ಬಳಸುವಂತೆ ಮತ್ತು ದಿನಕ್ಕೆ ಕೇವಲ ಬೆಳಿಗ್ಗೆ 2 ಗಂಟೆ ಹಾಗೂ ಸಂಜೆ 2 ಗಂಟೆಗಳ ಕಾಲ ಮಾತ್ರ ನೀರು ಪೂರೈಸುವಂತೆ ಎಲ್ಲ ವಸತಿ ನಿಲಯಗಳಿಗೆ ಸ್ಪಷ್ಟ ನಿರ್ದೇಶನ ನೀಡಿದೆ.

ತಿರುಮಲದಲ್ಲಿರುವ 7,000ಕ್ಕೂ ಹೆಚ್ಚು ಕುಟೀರಗಳು, ಅತಿಥಿ ಗೃಹಗಳು ಹಾಗೂ ಸಾರ್ವಜನಿಕ ಶೌಚಾಲಯ ಸಂಕೀರ್ಣಗಳ ಮೇಲೆ ಈ ನೀರಿನ ಬಿಕ್ಕಟ್ಟು ಗಂಭೀರ ಪರಿಣಾಮ ಬೀರಿದ್ದು, ಮಳೆಯಾಗುವವರೆಗೆ ಭಕ್ತಾದಿಗಳು ಪರಿಸ್ಥಿತಿಯನ್ನು ಅರ್ಥೈಸಿಕೊಂಡು ಸಹಕರಿಸಬೇಕಾಗಿ ಇಲಾಖೆ ಮನವಿ ಮಾಡಿದೆ.

ಮಂಗಳೂರು- ಯುಎಇಯ ರಾಸ್ ಅಲ್ ಖೈಮಾ ಹೊಸ ಏರ್ ಇಂಡಿಯಾ ನೇರ ವಿಮಾನ ಸೇವೆ ಆರಂಭ, ಸಮಯ ಹೀಗಿದೆ....

Gowthami K — Tue, 27 Oct 2026 09:10:09 +0530

ಮಂಗಳೂರು: ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಸೋಮವಾರದಿಂದ ಮಂಗಳೂರು ಮತ್ತು ಯುಎಇಯ ರಾಸ್ ಅಲ್ ಖೈಮಾ ನಡುವೆ ನೇರ ವಿಮಾನ ಸೇವೆ ಆರಂಭಿಸಿದೆ. ಕರಾವಳಿ ನಗರದಿಂದ ಆರಂಭಗೊಂಡಿರುವ ಹೊಸ ಅಂತಾರಾಷ್ಟ್ರೀಯ ವಿಮಾನ ಸಂಪರ್ಕ ಇದಾಗಿದೆ.

2026ರ ಚಳಿಗಾಲದ ವಿಮಾನ ವೇಳಾಪಟ್ಟಿ ಜಾರಿಯಾದ ಎರಡನೇ ದಿನವಾದ ಸೋಮವಾರ ಈ ಸೇವೆಗೆ ಚಾಲನೆ ನೀಡಲಾಗಿದೆ. ಕೈಗಾರಿಕಾ ಚಟುವಟಿಕೆಗಳಿಗೆ ಹೆಸರುವಾಸಿಯಾಗಿರುವ ರಾಸ್ ಅಲ್ ಖೈಮಾ, ಮಂಗಳೂರಿನಿಂದ ಸಂಪರ್ಕ ಕಲ್ಪಿಸಲಾದ ಹೊಸ ಅಂತಾರಾಷ್ಟ್ರೀಯ ತಾಣವಾಗಿದೆ. ಶಾರ್ಜಾ ಮತ್ತು ದುಬೈಗೆ ಸಮೀಪದಲ್ಲಿರುವುದರಿಂದ ಈ ಸೇವೆ ಪ್ರಯಾಣಿಕರಿಗೆ ಹೆಚ್ಚಿನ ಅನುಕೂಲ ಒದಗಿಸಲಿದೆ.

ಹೊಸ ಮಾರ್ಗದ ಮೊದಲ ಮಂಗಳೂರು-ರಾಸ್ ಅಲ್ ಖೈಮಾ ವಿಮಾನ IX 871 ಒಟ್ಟು 146 ಪ್ರಯಾಣಿಕರೊಂದಿಗೆ ಮಂಗಳೂರಿನಿಂದ ನಿರ್ಗಮಿಸಿತು. ರಾಸ್ ಅಲ್ ಖೈಮಾದಿಂದ ಮಂಗಳೂರಿಗೆ ಆಗಮಿಸಿದ IX 872 ವಿಮಾನದಲ್ಲಿ 36 ಪ್ರಯಾಣಿಕರಿದ್ದರು.

ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ 2026ರ ಚಳಿಗಾಲದ ವೇಳಾಪಟ್ಟಿಯಲ್ಲಿ ವಾರಕ್ಕೆ ಒಟ್ಟು 58 ಅಂತಾರಾಷ್ಟ್ರೀಯ ವಿಮಾನಗಳ ಹಾರಾಟ ನಿಗದಿಯಾಗಿದೆ. ಇವುಗಳಲ್ಲಿ 38 ವಿಮಾನಗಳು ಯುಎಇಯ ದುಬೈಗೆ 20, ಅಬುಧಾಬಿಗೆ 16 ಹಾಗೂ ರಾಸ್ ಅಲ್ ಖೈಮಾಗೆ 2 ವಿಮಾನಗಳಂತೆ ಕಾರ್ಯಾಚರಣೆ ನಡೆಸಲಿವೆ. ಉಳಿದ ವಿಮಾನಗಳು ಮಧ್ಯಪ್ರಾಚ್ಯದ ಇತರ ಪ್ರಮುಖ ತಾಣಗಳಿಗೆ ಸಂಪರ್ಕ ಕಲ್ಪಿಸಲಿವೆ.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಈ ಮಾರ್ಗದಲ್ಲಿ ಪ್ರತಿ ಸೋಮವಾರ ಮತ್ತು ಶನಿವಾರ ವಿಮಾನ ಸೇವೆ ಒದಗಿಸಲಿದೆ. ಮಂಗಳೂರಿನಿಂದ ಬೆಳಿಗ್ಗೆ 9.30ಕ್ಕೆ IX 871 ವಿಮಾನ ಹೊರಡಲಿದ್ದು, ರಾಸ್ ಅಲ್ ಖೈಮಾದಿಂದ IX 872 ವಿಮಾನ ಸಂಜೆ 6.25ಕ್ಕೆ ಮಂಗಳೂರು ತಲುಪಲಿದೆ.

ರದ್ದಾದ ವಿಮಾನ ಟಿಕೆಟ್‌ ದರ ಜಿಎಸ್ಟಿ ಸಮೇತ ಪಾವತಿಸಿದರೆ ಕ್ಲೈಮ್‌ಗೆ ಅವಕಾಶ

ಒಂದು ವೇಳೆ ರದ್ದಾದ ವಿಮಾನ ಪ್ರಯಾಣದ ಟಿಕೆಟ್‌ ಅನ್ನು ಏರ್‌ಲೈನ್ಸ್‌ ಸಂಸ್ಥೆಯು ಜಿಎಸ್ಟಿ ಸಮೇತ ಪ್ರಯಾಣಿಕರಿಗೆ ಮರುಪಾವತಿಸಿದರೆ ಜಿಎಸ್ಟಿ ರೀಫಂಡ್‌ ಅನ್ನು ಕ್ಲೈಮ್‌ ಮಾಡಬಹುದಾಗಿದೆ. ಆದರೆ, ಇದನ್ನು ಸಾಬೀತುಪಡಿಸಲು ಸೂಕ್ತ ದಾಖಲೆಗಳಿರಬೇಕು ಎಂದು ಜಿಎಸ್ಟಿ ಮೇಲ್ಮನವಿ ನ್ಯಾಯಮಂಡಳಿ (ಜಿಎಸ್‌ಟಿಎಟಿ) ತಿಳಿಸಿದೆ.

ಸಿಂಗಾಪುರ ಏರ್‌ಲೈನ್ಸ್‌ ಲಿ. ಮತ್ತು ಸಿಜಿಎಸ್‌ಟಿ ಆ್ಯಂಡ್‌ ಸಿಇಯ ಕೊಚ್ಚಿ ಕಮಿಷನರ್‌ ನಡುವಿನ ಪ್ರಕರಣದಲ್ಲಿ ಜಿಎಸ್ಟಿ ಮೇಲ್ಮನವಿ ನ್ಯಾಯಮಂಡಳಿಯ ಎರ್ನಾಕುಲಂ ಬ್ರ್ಯಾಂಚ್‌ ಈ ನಿರ್ಧಾರ ತೆಗೆದುಕೊಂಡಿದೆ. ಸಿಂಗಾಪುರ ಏರ್‌ಲೈನ್ಸ್‌ ಕಂಪನಿ ರದ್ದಾದ ಪ್ರಯಾಣದ ಟಿಕೆಟ್‌ ದರವನ್ನು ಪ್ರಯಾಣಿಕರಿಗೆ ನೇರವಾಗಿ ಪಾವತಿಸಿದೆ. ಇಲ್ಲಿ ತೆರಿಗೆಯನ್ನು ಇನ್ನೊಬ್ಬರ ಮೇಲೆ ಹೊರಿಸಿಲ್ಲ ಎಂದು ಟ್ರಿಬ್ಯೂನಲ್‌ ಹೇಳಿದೆ.

ಈ ಹಿನ್ನೆಲೆಯಲ್ಲಿ ನ್ಯಾಯಮಂಡಳಿಯು ಕಂದಾಯ ಇಲಾಖೆಗೆ ಏರ್‌ಲೈನ್ಸ್‌ ಸಂಸ್ಥೆಯ ಜಿಎಸ್‌ಟಿ ಕ್ಲೈಮ್‌ ಪ್ರಕ್ರಿಯೆಯನ್ನು ಎರಡು ವಾರಗಳಲ್ಲಿ ಪೂರ್ಣಗೊಳಿಸಬೇಕು ಮತ್ತು ಬಡ್ಡಿ ಸಮೇತ ಪಾವತಿಸಬೇಕು ಎಂದು ಹೇಳಿದೆ.

2019 ಮತ್ತು ಮಾರ್ಚ್‌ 2021ರ ನಡುವಿನ ಸುಮಾರು 45.92 ಲಕ್ಷ ಮೌಲ್ಯದ ಎಂಟು ಜಿಎಸ್ಟಿ ರಿಫಂಡ್‌ ಕ್ಲೈಮ್‌ಗಳ ವಿಚಾರವಾಗಿ ಕೋರ್ಟ್ ನ್ಯಾಯಮಂಡಳಿ ಈ ತೀರ್ಪು ನೀಡಿದೆ. ಕೋವಿಡ್‌ ಸಂದರ್ಭದಲ್ಲಿ ಏರ್‌ಲೈನ್ಸ್ ಸಂಸ್ಥೆಯು ರದ್ದಾದ ಪ್ರಯಾಣದ ಟಿಕೆಟ್‌ ದರವನ್ನು ಜಿಎಸ್ಟಿ ಸಮೇತ ಮರುಪಾವತಿ ಮಾಡಿತ್ತು.

9 ವರ್ಷಗಳ ಮುಂಬೈ ಬದುಕು ಬಿಟ್ಟು ಬೆಂಗಳೂರಿಗೆ ಸ್ಟ್ಯಾಂಡಪ್ ಕಾಮಿಡಿಯನ್ ಶಿಫ್ಟ್! ಕನ್ನಡ ನೆಲವೇಕೆಂದು ಬಿಚ್ಚಿಟ್ರು ಕಾರಣ

Gowthami K — Mon, 26 Oct 2026 12:43:55 +0530

ಮುಂಬೈ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ? ಅಲ್ಲಿನ ಅಪರಿಮಿತ ಅವಕಾಶಗಳು, ರಾತ್ರಿ ಜೀವನ, ನಿರಂತರ ಓಟದ ಬದುಕು ಪ್ರತಿಯೊಬ್ಬರನ್ನು ತಕ್ಷಣವೇ ಆಕರ್ಷಿಸುತ್ತದೆ. ಆದರೆ, ಕಾಲಕ್ರಮೇಣ ಅದೇ ನಗರದ ಸಂಚಾರ ದಟ್ಟಣೆ, ಧೂಳು, ಹಾಗೂ ಕಾಂಕ್ರೀಟ್ ಕಾಡಿನ ನಡುವೆ ನೆಮ್ಮದಿಯ ಜೀವನ ನಡೆಸುವುದು ದೊಡ್ಡ ಸವಾಲಾಗಿ ಪರಿಣಮಿಸುತ್ತದೆ. ಖ್ಯಾತ ಸ್ಟ್ಯಾಂಡಪ್ ಕಾಮಿಡಿಯನ್ ಅಭಿಜಿತ್ ಗಂಗೂಲಿ ಅವರಿಗೂ ಮುಂಬೈನಲ್ಲಿ ಅನುಭವಿಸಿದ್ದು ಇದೇ ರೀತಿಯ ಸ್ಥಿತಿ. ಸುಮಾರು ಒಂಬತ್ತು ವರ್ಷಗಳ ಕಾಲ ಮುಂಬೈನಲ್ಲಿ ವಾಸಿಸಿದ ನಂತರ, ಅವರು ತಮ್ಮ ಕುಟುಂಬದೊಂದಿಗೆ ಬೆಂಗಳೂರಿಗೆ ಸ್ಥಳಾಂತರಗೊಳ್ಳುವ ನಿರ್ಧಾರ ಕೈಗೊಂಡಿದ್ದಾರೆ.

ಮುಂಬೈ ಮೇಲೆ ಒಲವು ಕಡಿಮೆಯಾಗಲು ಕಾರಣವೇನು?

ದೆಹಲಿಯಿಂದ ಮುಂಬೈಗೆ ಬಂದ ಆರಂಭದಲ್ಲಿ ಅಭಿಜಿತ್ ಅವರಿಗೆ ಈ ನಗರ ಎಂದರೆ ಅಪಾರ ಪ್ರೀತಿ ಇತ್ತು. ಆದರೆ, ಕಳೆದ ಕೆಲವು ವರ್ಷಗಳಲ್ಲಿ, ವಿಶೇಷವಾಗಿ ಕೋವಿಡ್-19 ಲಾಕ್‌ಡೌನ್ ನಂತರದ ದಿನಗಳಲ್ಲಿ, ನಗರದ ವಾತಾವರಣ ಸಂಪೂರ್ಣವಾಗಿ ಬದಲಾಯಿತು. ಮುಂಬೈನಲ್ಲಿ ಎಲ್ಲೆಂದರಲ್ಲಿ ನಡೆಯುತ್ತಿರುವ ನಿರಂತರ ನಿರ್ಮಾಣ ಕಾರ್ಯಗಳು, ತಡೆರಹಿತ ಶಬ್ದ ಮಾಲಿನ್ಯ ಹಾಗೂ ಜಾಗದ ಕೊರತೆ ಅವರನ್ನು ಬೇಸರಗೊಳಿಸಿತು. ಕೇವಲ ವೃತ್ತಿಜೀವನ ಮತ್ತು ಬೆಳೆಯುವ ಅವಕಾಶಗಳನ್ನು ಮಾತ್ರವಲ್ಲದೆ, ಕುಟುಂಬಕ್ಕೆ ಸೂಕ್ತ ವಾತಾವರಣ ನೀಡುವುದು ಮುಖ್ಯ ಎಂಬ ಭಾವನೆ ಅವರಲ್ಲಿ ಮೂಡಿತು.

ಮಗುವಿನ ಆಗಮನ ಮತ್ತು ಬದಲಾದ ಆದ್ಯತೆಗಳು

ಅಭಿಜಿತ್ ಅವರ ಜೀವನದಲ್ಲಾದ ಅತ್ಯಂತ ಪ್ರಮುಖ ಬದಲಾವಣೆ ಎಂದರೆ ಅವರ ಮಗುವಿನ ಆಗಮನ. ಮಗುವಿನ ಭವಿಷ್ಯ ಮತ್ತು ಉತ್ತಮ ಶೈಕ್ಷಣಿಕ ವಾತಾವರಣದ ಬಗ್ಗೆ ಯೋಚಿಸಲು ಪ್ರಾರಂಭಿಸಿದಾಗ, ಮುಂಬೈನ ಸಣ್ಣ ಆವಾಸಸ್ಥಾನಗಳು ಅವರಿಗೆ ಕಿರಿಕಿರಿಯುಂಟುಮಾಡಿದವು. ವಿಶಾಲವಾದ ಆಟದ ಮೈದಾನಗಳು, ಹಸಿರಿನಿಂದ ಕೂಡಿದ ನೆರೆಹೊರೆ ಹಾಗೂ ಉತ್ತಮ ಶಾಲೆಗಳುಳ್ಳ ನಗರದ ಅಗತ್ಯ ಅವರಿಗೆ ಬೇಕೆನಿಸಿದೆ. ಯೌವನದಲ್ಲಿ ವೃತ್ತಿಜೀವನದ ದೃಷ್ಟಿಯಿಂದ ಉತ್ತಮವೆನಿಸುವ ನಗರ, ಮಗುವನ್ನು ಬೆಳೆಸುವಾಗ ಅಷ್ಟಾಗಿ ಸೂಕ್ತವಲ್ಲ ಎಂಬ ಸತ್ಯ ಅವರಿಗೆ ಅರಿವಾಯಿತು.

ದೆಹಲಿ NCR ಬಿಟ್ಟು ಬೆಂಗಳೂರು ಆಯ್ಕೆ ಮಾಡಿದ್ದೇಕೆ?

ಕಲಾವಿದರಿಗೆ ಮುಂಬೈ ಬಿಟ್ಟರೆ ಪ್ರಮುಖ ಪ್ರದರ್ಶನ ನೀಡಲು ದೆಹಲಿ, ಬೆಂಗಳೂರು, ಪುಣೆ ಮತ್ತು ಹೈದರಾಬಾದ್ ಪ್ರಮುಖ ಕೇಂದ್ರಗಳಾಗಿವೆ. ದೆಹಲಿಗೆ ಹಿಂತಿರುಗುವ ಅವಕಾಶವಿದ್ದರೂ, ಅಲ್ಲಿನ ವಿಪರೀತ ವಾಯುಮಾಲಿನ್ಯದ ಕಾರಣದಿಂದ ಅಭಿಜಿತ್ ಅದನ್ನು ನಿರಾಕರಿಸಿದರು. ಕೊನೆಗೆ ಅವರ ಆಯ್ಕೆ ಬೆಂಗಳೂರಾಯಿತು. ಬೆಂಗಳೂರಿನಲ್ಲಿಯೂ ಸಂಚಾರ ಸಮಸ್ಯೆಗಳಿದ್ದರೂ, ನಗರದಲ್ಲಿ ಇಂದಿಗೂ ಉಳಿದುಕೊಂಡಿರುವ ಹಸಿರು ಸಿರಿ, ಉದ್ಯಾನವನಗಳು ಮತ್ತು ವಿಶಾಲವಾದ ಕಂಟೋನ್ಮೆಂಟ್ ಪ್ರದೇಶಗಳು ಅವರಿಗೆ ನೆಮ್ಮದಿ ನೀಡಿದವು.

ಬೆಂಗಳೂರಿನ ವೈಶಿಷ್ಟ್ಯಗಳು ಹಾಗೂ ಹೊಸ ಅಧ್ಯಾಯ

ಮುಂಬೈಗೆ ಹೋಲಿಸಿದರೆ ಬೆಂಗಳೂರಿನಲ್ಲಿ ಕಡಿಮೆ ಬಾಡಿಗೆ ವೆಚ್ಚದಲ್ಲಿ ಉತ್ತಮ ಮತ್ತು ವಿಸ್ತಾರವಾದ ಮನೆಗಳು ಲಭ್ಯವಿರುವುದು ಅಭಿಜಿತ್ ಅವರಿಗೆ ಪ್ರಮುಖ ಆಕರ್ಷಣೆಯಾಯಿತು. ಮುಂಬೈನ ದುಬಾರಿ ರಿಯಲ್ ಎಸ್ಟೇಟ್ ಮಾರುಕಟ್ಟೆಯಿಂದ ಬಂದವರಿಗೆ ಬೆಂಗಳೂರು ಹೆಚ್ಚು ಅನುಕೂಲಕರವಾಗಿ ಕಾಣಿಸಿತು.

ತಮ್ಮ ಸ್ಥಳಾಂತರವನ್ನು ಇನ್ನಷ್ಟು ಆಸಕ್ತಿದಾಯಕವಾಗಿಸಲು, ಅಭಿಜಿತ್ ಗಂಗೂಲಿ ಅವರು ಪ್ರಸ್ತುತ ಕನ್ನಡ ಭಾಷೆಯನ್ನು ಕಲಿಯಲು ಕ್ಲಾಸ್‌ಗೆ ಸೇರಿಕೊಂಡಿದ್ದಾರೆ. ಇದು ಕೇವಲ ನಗರದ ಬದಲಾವಣೆಯಲ್ಲ, ಬದಲಿಗೆ ಸ್ಥಳೀಯ ಸಂಸ್ಕೃತಿಗೆ ಹೊಂದಿಕೊಳ್ಳುವ ಅವರ ಪ್ರಾಮಾಣಿಕ ಪ್ರಯತ್ನವಾಗಿದೆ. ಮುಂಬೈನ ವೇಗದ ಬದುಕಿನಿಂದ ಹೊರಬಂದು, ಕುಟುಂಬಕ್ಕಾಗಿ ಶಾಂತಿಯುತ ಹಾಗೂ ಹಸಿರಿನಿಂದ ಕೂಡಿದ ಜೀವನವನ್ನು ಕಂಡುಕೊಳ್ಳಲು ಅವರು ಬೆಂಗಳೂರನ್ನು ತಮ್ಮ ಹೊಸ ನೆಲೆಯಾಗಿ ಸ್ವೀಕರಿಸಿದ್ದಾರೆ.

ವಾಹನದಲ್ಲಿ ಪ್ರೇಮದ ಊರಿಗೆ ಹೋಗುವಂತಿಲ್ಲ, ನಿಷೇಧ ಹೇರಿದ ಹಾಸನ ಜಿಲ್ಲಾಧಿಕಾರಿ!

Santosh Naik — Wed, 28 Oct 2026 16:27:15 +0530

ಹಾಸನ (ಅ.28): ಒಂದೇ ಒಂದು ಹಿಟ್ ಸಿನಿಮಾ ಇಡೀ ಊರಿನ ಅಥವಾ ಅಜ್ಞಾತ ತಾಣದ ಭವಿಷ್ಯವನ್ನೇ ಬದಲಾಯಿಸಿಬಿಡಬಹುದು ಎಂಬುದಕ್ಕೆ ಹಾಸನ ತಾಲೂಕಿನ ಸಾಲಗಾಮೆ ಹೋಬಳಿಯಲ್ಲಿರುವ ಪ್ರಶಾಂತ ಬೆಟ್ಟ 'ಸೀಗೆಗುಡ್ಡ' ಹಾಗೂ ಐತಿಹಾಸಿಕ 'ಶ್ರೀ ಮಳೆ ಮಲ್ಲೇಶ್ವರ ದೇವಸ್ಥಾನ'ವೇ ಸಾಕ್ಷಿ. ಇತ್ತೀಚೆಗೆ ಸದ್ದು ಮಾಡಿದ 'ಪ್ರೇಮದ ಊರಲಿ' ಕನ್ನಡ ಚಿತ್ರದ ಪ್ರಮುಖ ಸನ್ನಿವೇಶಗಳು ಇಲ್ಲಿ ಚಿತ್ರೀಕರಣಗೊಂಡ ನಂತರ, ಈ ತಾಣ ರಾತ್ರೋರಾತ್ರಿ ಕರ್ನಾಟಕದ ಹಾಟ್ ಟೂರಿಸ್ಟ್ ಸ್ಪಾಟ್ ಆಗಿ ಮಾರ್ಪಟ್ಟಿದೆ.

ಸಿನಿಮಾದಲ್ಲಿನ ರಮಣೀಯ ದೃಶ್ಯಗಳಿಗೆ ಮಾರುಹೋದ ಜನಸಾಗರವೇ ಹರಿದುಬರುತ್ತಿದ್ದು, ಕಿರಿದಾದ ಬೆಟ್ಟದ ರಸ್ತೆಯಲ್ಲಿ ಕಿಲೋಮೀಟರ್‌ಗಟ್ಟಲೆ ಭಾರಿ ಟ್ರಾಫಿಕ್ ಜಾಮ್ ಉಂಟಾಗುತ್ತಿದೆ. ಪ್ರವಾಸಿಗರ ಸಂಖ್ಯೆ ನಿರೀಕ್ಷೆಗೂ ಮೀರಿ ಹೆಚ್ಚಾದ ಹಿನ್ನೆಲೆಯಲ್ಲಿ ಹಾಗೂ ರಸ್ತೆ ಅಪಾಯಕಾರಿಯಾಗಿರುವುದರಿಂದ, ಹಾಸನ ಜಿಲ್ಲಾಧಿಕಾರಿ ಕೆ.ಎಸ್. ಲತಾಕುಮಾರಿ ಅವರು ಸೀಗೆಗುಡ್ಡ ಮಳೆ ಮಲ್ಲೇಶ್ವರ ದೇವಸ್ಥಾನದ ರಸ್ತೆಯಲ್ಲಿ ಖಾಸಗಿ ಹಾಗೂ ಪ್ರವಾಸಿ ವಾಹನಗಳ ಸಂಚಾರವನ್ನು ನವೆಂಬರ್ 11 ರವರೆಗೆ ಸಂಪೂರ್ಣವಾಗಿ ನಿಷೇಧಿಸಿ ಆದೇಶ ಹೊರಡಿಸಿದ್ದಾರೆ.

ದಿನಕ್ಕೆ 50 ಬರುತ್ತಿದ್ದ ಜಾಗಕ್ಕೆ ಇದೀಗ 5,000 ಜನರ ಲಗ್ಗೆ!

'ಪ್ರೇಮದ ಊರಲಿ' ಸಿನಿಮಾ ತೆರೆಕಾಣುವ ಮುನ್ನ ಹಾಸನದ ಸೀಗೆಗುಡ್ಡ ಹಾಗೂ ಮಳೆ ಮಲ್ಲೇಶ್ವರ ಸ್ವಾಮಿ ಸನ್ನಿಧಿ ಕೇವಲ ಬೆರಳೆಣಿಕೆಯಷ್ಟು ಸ್ಥಳೀಯ ಭಕ್ತರಿಗೆ ಮಾತ್ರ ಸೀಮಿತವಾಗಿತ್ತು. ಪ್ರತಿದಿನ ಸರಾಸರಿ 50 ಜನರಷ್ಟೇ ಇಲ್ಲಿಗೆ ಭೇಟಿ ನೀಡುತ್ತಿದ್ದರು. ಆದರೆ ಸಿನಿಮಾ ಬಿಡುಗಡೆಯಾಗಿ ಸೂಪರ್ ಹಿಟ್ ಆಗುತ್ತಿದ್ದಂತೆ, ಚಿತ್ರದಲ್ಲಿ ಅದ್ಭುತವಾಗಿ ಚಿತ್ರಿತಗೊಂಡ ಸೀಗೆಗುಡ್ಡದ ನೈಸರ್ಗಿಕ ಸೌಂದರ್ಯಕ್ಕೆ ಸಿನಿರಸಿಕರು ಸಂಪೂರ್ಣವಾಗಿ ಮಾರುಹೋಗಿದ್ದಾರೆ.

ಪ್ರಸ್ತುತ ಪ್ರತಿದಿನ ಬರೋಬ್ಬರಿ 5,000 ಕ್ಕೂ ಹೆಚ್ಚು ಪ್ರವಾಸಿಗರು ಮತ್ತು ಯುವಜನತೆ ಸೀಗೆಗುಡ್ಡಕ್ಕೆ ವಾಹನಗಳಲ್ಲಿ ಲಗ್ಗೆ ಇಡುತ್ತಿದ್ದಾರೆ. ದೇವಸ್ಥಾನದ ಬಳಿ ನಿಂತು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವುದು ಹಾಗೂ ಸಿನಿಮಾದ ಹಿಟ್ ಹಾಡುಗಳಿಗೆ ಬೆಟ್ಟದ ಹಿನ್ನೆಲೆಯಲ್ಲಿ ಇನ್‌ಸ್ಟಾಗ್ರಾಮ್ ರೀಲ್ಸ್ (Instagram Reels) ಮಾಡುತ್ತಾ ಡ್ಯಾನ್ಸ್ ಮಾಡುವುದು ಸಾಮಾನ್ಯ ದೃಶ್ಯವಾಗಿದೆ. ಇದು ಸ್ಥಳೀಯ ಸಣ್ಣಪುಟ್ಟ ವ್ಯಾಪಾರಿಗಳ ಮುಖದಲ್ಲಿ ಮಂದಹಾಸ ಮೂಡಿಸಿದೆಯಾದರೂ, ಸಂಚಾರ ನಿರ್ವಹಣೆ ಭಾರಿ ಸವಾಲಾಗಿ ಪರಿಣಮಿಸಿದೆ.

ವಾಹನ ಸಂಚಾರ ನಿಷೇಧಕ್ಕೆ 3 ಪ್ರಮುಖ ಕಾರಣಗಳು

ಜಿಲ್ಲಾಡಳಿತವು ಈ ಕಠಿಣ ನಿರ್ಧಾರ ಕೈಗೊಳ್ಳಲು ಪ್ರಮುಖ ಕಾರಣಗಳೂ ಇವೆ. ಮಳೆ ಮಲ್ಲೇಶ್ವರ ಬೆಟ್ಟಕ್ಕೆ ತೆರಳುವ ರಸ್ತೆಯು ಅತ್ಯಂತ ಕಿರಿದಾಗಿದ್ದು, ಕಡಿದಾದ ಇಳಿಜಾರಿನಿಂದ ಕೂಡಿದೆ. ಜೊತೆಗೆ ರಸ್ತೆಯ ಬದಿಯಲ್ಲಿ ತಡೆಗೋಡೆ ಇಲ್ಲದಿರುವುದರಿಂದ ವಾಹನ ಸಂಚಾರಕ್ಕೆ ತೀವ್ರ ಅಪಾಯಕಾರಿಯಾಗಿದೆ. ಪ್ರಸಿದ್ಧ ಹಾಸನಾಂಬೆ ಮತ್ತು ಶ್ರೀ ಸಿದ್ದೇಶ್ವರಸ್ವಾಮಿ ದೇವಾಲಯದ ಜಾತ್ರಾ ಮಹೋತ್ಸವದ ಹಿನ್ನೆಲೆಯಲ್ಲಿ ಜಿಲ್ಲೆಗೆ ಲಕ್ಷಾಂತರ ಭಕ್ತರು ಆಗಮಿಸುತ್ತಿದ್ದಾರೆ. ಈ ವೇಳೆ ಯಾವುದೇ ಅಹಿತಕರ ಘಟನೆ ಅಥವಾ ಭೀಕರ ಅಪಘಾತಗಳು ಸಂಭವಿಸದಂತೆ ಮುಂಜಾಗೃತಾ ಕ್ರಮ ವಹಿಸಲಾಗಿದೆ. ಪೊಲೀಸ್ ಇಲಾಖೆ ಹಾಗೂ ಅರಣ್ಯ ಇಲಾಖೆಯ ಉನ್ನತ ಮಟ್ಟದ ಶಿಫಾರಸಿನ ಮೇರೆಗೆ ಸುರಕ್ಷತೆಯ ದೃಷ್ಟಿಯಿಂದ ಈ ತಡೆ ಹೇರಲಾಗಿದೆ.

ನವೆಂಬರ್ 11 ರವರೆಗೆ ನಿಷೇಧಿತ ಮಾರ್ಗಗಳು & ಭಕ್ತರಿಗೆ ಸೂಚನೆ

ಮೋಟಾರು ವಾಹನ ಕಾಯ್ದೆ 1988 ರ ಸೆಕ್ಷನ್ 115 ಹಾಗೂ 1989 ರ ನಿಯಮ 221ಎ(5) ರ ಅಡಿಯಲ್ಲಿ ಹೊರಡಿಸಲಾಗಿರುವ ಈ ಆದೇಶವು ಅಕ್ಟೋಬರ್ 25 ರಿಂದ ನವೆಂಬರ್ 11 ರವರೆಗೆ ಜಾರಿಯಲ್ಲಿರಲಿದೆ.

ಸಂಚಾರ ನಿಷೇಧಿಸಲಾದ ಪ್ರಮುಖ ಮಾರ್ಗಗಳು

ಬೇಲೂರು ಮಾರ್ಗ: ಕಲ್ಕೆರೆ ಗ್ರಾಮದಿಂದ ವೀರಾಪುರ ಗ್ರಾಮಕ್ಕೆ ತೆರಳುವ ರಸ್ತೆ.
ಹಳೇಬೀಡು ಮಾರ್ಗ: ಸೀಗೆ ಮತ್ತು ವೀರಾಪುರ ಗ್ರಾಮದ ರಸ್ತೆ.
ಗೋಳೇನಹಳ್ಳಿ ಮಾರ್ಗ: ಗೋಳೇನಹಳ್ಳಿ ಮಾರ್ಗವಾಗಿ ಸೀಗೆಗುಡ್ಡಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ.

ವಾಹನ ಸಂಚಾರವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆಯಾದರೂ, ಸೀಗೆಗುಡ್ಡದ ಶ್ರೀ ಮಳೆ ಮಲ್ಲೇಶ್ವರ ಸ್ವಾಮಿಯ ದರ್ಶನ ಪಡೆಯಲು ಬಯಸುವ ಭಕ್ತಾದಿಗಳು ಹಾಗೂ ಪ್ರವಾಸಿಗರಿಗೆ ಕಾಲ್ನಡಿಗೆಯಲ್ಲಿ (By Walk) ತೆರಳಲು ಮಾತ್ರ ಮುಕ್ತ ಅವಕಾಶ ಕಲ್ಪಿಸಲಾಗಿದೆ. ಸಾರ್ವಜನಿಕರು ಜಿಲ್ಲಾಡಳಿತದ ಈ ಸುರಕ್ಷತಾ ಆದೇಶಕ್ಕೆ ಸಹಕರಿಸಬೇಕಾಗಿ ಜಿಲ್ಲಾಧಿಕಾರಿಗಳು ವಿನಂತಿಸಿದ್ದಾರೆ.

ತಂಗಿಯ ಕನಸಿನ ಕ್ಷಣಕ್ಕೆ ಸಾಕ್ಷಿಯಾಗಲು 14,000 ಕಿ.ಮೀ. ಪ್ರಯಾಣಿಸಿದ ಅಣ್ಣ! ನೋಡಿದ ತಕ್ಷಣ ಆಕೆಯ ಕಣ್ಣಲ್ಲಿ ಆನಂದಭಾಷ್ಪ!

Chandrashekar GS — Tue, 27 Oct 2026 15:00:48 +0530

14,000 ಕಿ.ಮೀ. ಪ್ರಯಾಣಿಸಿ ತಂಗಿಯ ಪದವಿ ಪ್ರದಾನ ಸಮಾರಂಭಕ್ಕೆ ಬಂದ ಅಣ್ಣ; ಭಾವುಕ ಕ್ಷಣದ ವಿಡಿಯೋ ವೈರಲ್!

ಸಹೋದರ-ಸಹೋದರಿಯರ ನಡುವಿನ ಪ್ರೀತಿ ಯಾವಾಗಲೂ ಮಾತುಗಳಲ್ಲಿ ವ್ಯಕ್ತವಾಗಬೇಕೆಂದಿಲ್ಲ. ಕೆಲವೊಮ್ಮೆ ಒಂದು ಅಪ್ಪುಗೆ, ಅನಿರೀಕ್ಷಿತ ಭೇಟಿ ಅಥವಾ ಸಣ್ಣ ಸರ್ಪ್ರೈಸ್‌ ಕೂಡ ಮನಸ್ಸನ್ನು ಮುಟ್ಟುತ್ತದೆ. ಇದೀಗ ಇಂತಹದ್ದೇ ಒಂದು ಭಾವನಾತ್ಮಕ ಕ್ಷಣ ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯುತ್ತಿದೆ. ತಂಗಿಯ ಪದವಿ ಪ್ರದಾನ ಸಮಾರಂಭದಲ್ಲಿ ಭಾಗಿಯಾಗಲು ಅಣ್ಣ ಬರೋಬ್ಬರಿ 14,000 ಕಿಲೋಮೀಟರ್ ಪ್ರಯಾಣಿಸಿ ಬಂದಿರುವುದು ಈ ವಿಡಿಯೋದ ವಿಶೇಷ.

ತಂಗಿಗೆ ಸರ್ಪ್ರೈಸ್ ನೀಡಲು ಅಣ್ಣನ ವಿಶೇಷ ಪ್ರಯಾಣ

ಅಮೆರಿಕ, ಕೆನಡಾ ಅಥವಾ ಬೇರೆ ದೇಶದಿಂದ ದೂರದಲ್ಲಿರುವ ಕುಟುಂಬದ ಸದಸ್ಯರು ವಿಶೇಷ ಸಂದರ್ಭಗಳಲ್ಲಿ ಮನೆಗೆ ಬಂದಾಗ ಸಂತೋಷ ಸಹಜ. ಆದರೆ, ತಂಗಿಯ ಜೀವನದ ಮಹತ್ವದ ದಿನವನ್ನು ಮರೆಯದೆ, ಆಕೆಗೆ ತಿಳಿಯದಂತೆ ಸರ್ಪ್ರೈಸ್ ನೀಡಲು ಅಣ್ಣ ಇಷ್ಟು ದೂರ ಪ್ರಯಾಣಿಸಿರುವುದು ಹಲವರ ಗಮನ ಸೆಳೆದಿದೆ.

ವೈರಲ್ ವಿಡಿಯೊ ಕುರಿತ ವರದಿಯ ಪ್ರಕಾರ, ತರುಣ್ ಎಂಬ ವ್ಯಕ್ತಿ ತಮ್ಮ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಈ ಕ್ಷಣವನ್ನು ಹಂಚಿಕೊಂಡಿದ್ದಾರೆ. ತಂಗಿಯ ಪದವಿ ಪ್ರದಾನ ಸಮಾರಂಭಕ್ಕೆ ಹಾಜರಾಗಲು ಅವರು 14,000 ಕಿಲೋಮೀಟರ್ ಪ್ರಯಾಣಿಸಿದ್ದರು. ಈ ಅನಿರೀಕ್ಷಿತ ಭೇಟಿಯನ್ನು ಕಂಡ ತಂಗಿಯ ಪ್ರತಿಕ್ರಿಯೆಯೇ ವಿಡಿಯೋದ ಪ್ರಮುಖ ಆಕರ್ಷಣೆಯಾಗಿದೆ.

ಅಣ್ಣನನ್ನು ಕಂಡ ಕ್ಷಣ ತಂಗಿಯ ಕಣ್ಣಲ್ಲಿ ಆನಂದಭಾಷ್ಪ!

ತಂಗಿಗೆ ಅಣ್ಣ ಬರುತ್ತಿರುವುದು ಮೊದಲೇ ತಿಳಿದಿರಲಿಲ್ಲ. ಹೀಗಾಗಿ ಆಕೆಯ ಪಾಲಿಗೆ ಇದು ಮರೆಯಲಾಗದ ಕ್ಷಣವಾಗಿತ್ತು. ಅಣ್ಣನನ್ನು ಕಂಡ ತಕ್ಷಣ ಆಕೆಯ ಭಾವನೆಗಳು ಹೊರಹೊಮ್ಮಿದ್ದು, ಇಬ್ಬರೂ ಆತ್ಮೀಯವಾಗಿ ಅಪ್ಪಿಕೊಂಡಿದ್ದಾರೆ. ಈ ದೃಶ್ಯ ಕುಟುಂಬದವರಿಗೂ ಸಂತೋಷ ತಂದಿದೆ.

ಪದವಿ ಪ್ರದಾನ ಸಮಾರಂಭ ಎನ್ನುವುದು ವಿದ್ಯಾರ್ಥಿಯ ಜೀವನದಲ್ಲಿ ಮಹತ್ವದ ಮೈಲಿಗಲ್ಲು. ಹಲವು ವರ್ಷಗಳ ಪರಿಶ್ರಮದ ನಂತರ ಸಿಗುವ ಈ ಸಾಧನೆಯ ಕ್ಷಣದಲ್ಲಿ ಪ್ರೀತಿಪಾತ್ರರು ಜೊತೆಯಲ್ಲಿದ್ದರೆ ಅದರ ಖುಷಿಯೇ ಬೇರೆ. ತಂಗಿಯ ಸಾಧನೆಯ ಸಂಭ್ರಮಕ್ಕೆ ಅಣ್ಣನ ಅನಿರೀಕ್ಷಿತ ಆಗಮನ ಮತ್ತಷ್ಟು ವಿಶೇಷತೆಯನ್ನು ನೀಡಿದೆ.

ಸರ್ಪ್ರೈಸ್ ಹಾಳಾಗುವ ಹಂತಕ್ಕೆ ಬಂದಿತ್ತೇ?

ಈ ಘಟನೆಯಲ್ಲಿ ಒಂದು ತಮಾಷೆಯ ಸಂಗತಿಯೂ ಇದೆ. ತರುಣ್ ಹಂಚಿಕೊಂಡ ಮಾಹಿತಿಯ ಪ್ರಕಾರ, ಅತ್ತೆ ತಂಗಿಗೆ ಅಣ್ಣ ಬಂದಿದ್ದಾನೆಯೇ ಎಂದು ಸುಮಾರು ಒಂದು ಗಂಟೆ ಮೊದಲೇ ಕೇಳಿದ್ದರಂತೆ. ಇದರಿಂದ ಸರ್ಪ್ರೈಸ್ ಬಹಿರಂಗವಾಗುವ ಸಾಧ್ಯತೆ ಇತ್ತು. ಆದರೂ ಅಣ್ಣ-ತಂಗಿಯರ ಭೇಟಿಯ ಕ್ಷಣ ಭಾವನಾತ್ಮಕವಾಗಿಯೇ ಮೂಡಿಬಂದಿದೆ ಎಂದು ವರದಿ ತಿಳಿಸಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆ

ವಿಡಿಯೊ ನೋಡಿದ ಅನೇಕರು ಸಹೋದರ-ಸಹೋದರಿಯರ ಬಾಂಧವ್ಯವನ್ನು ಮೆಚ್ಚಿಕೊಂಡಿದ್ದಾರೆ. ಇಂತಹ ಸಂದರ್ಭಗಳು ದೂರದಲ್ಲಿದ್ದರೂ ಕುಟುಂಬದ ಮೇಲಿನ ಪ್ರೀತಿ ಕಡಿಮೆಯಾಗುವುದಿಲ್ಲ ಎಂಬುದನ್ನು ನೆನಪಿಸುತ್ತವೆ. ಪದವಿ ಪ್ರದಾನ ಸಮಾರಂಭದ ನೆನಪಿನ ಜೊತೆಗೆ ಅಣ್ಣನ ಈ ಭೇಟಿಯೂ ತಂಗಿಗೆ ಬಹುಕಾಲ ನೆನಪಿನಲ್ಲಿ ಉಳಿಯುವ ಸಾಧ್ಯತೆಯಿದೆ.

ಒಟ್ಟಿನಲ್ಲಿ, 14,000 ಕಿಲೋಮೀಟರ್ ಪ್ರಯಾಣದ ಈ ಕಥೆ ಕೇವಲ ಸರ್ಪ್ರೈಸ್ ಭೇಟಿಯಲ್ಲ; ಕುಟುಂಬದ ಸಂತೋಷದಲ್ಲಿ ಜೊತೆಯಾಗಲು ವ್ಯಕ್ತಿಯೊಬ್ಬರು ಮಾಡಿದ ಪ್ರಯತ್ನದ ಕಥೆಯೂ ಹೌದು.

View this post on Instagram

A post shared by DC Tarun (@dctarun)

ಇಲ್ಲಿ ನಡೆಯುತ್ತೆ ನಾಯಿಗಳಿಗೆ ವಿಶೇಷ ಪೂಜೆ… ಕುತ್ತಿಗೆಗೆ ಹಾರ, ಸ್ಪೆಷಲ್ ಆಹಾರ… ಏನಿದು ಕುಕುರ್ ತಿಹಾರ್?

Pavna Das — Wed, 28 Oct 2026 16:25:44 +0530

ಕುಕುರ್ ತಿಹಾರ್

ನೇಪಾಳದಲ್ಲಿ ನಾಯಿಗಳಿಗಾಗಿ ಒಂದು ವಿಶೇಷ ಹಬ್ಬವನ್ನು ಆಚರಿಸಲಾಗುತ್ತದೆ. ಅದಕ್ಕೆ ಕುಕುರ್ ತಿಹಾರ್ ಎಂದು ಕರೆಯಲಾಗುತ್ತದೆ. ಈ ದಿನ ಸಾಕು ನಾಯಿಗಳ ಜೊತೆಗೆ ಬೀದಿ ನಾಯಿಗಳು ಮತ್ತು ಪೊಲೀಸ್ ನಾಯಿಗಳನ್ನೂ ಪೂಜಿಸಲಾಗುತ್ತದೆ. ಕುಕುರ್ ತಿಹಾರ್ ನೇಪಾಳದಲ್ಲಿ ಐದು ದಿನಗಳ ಕಾಲ ನಡೆಯುವ ತಿಹಾರ್ ಹಬ್ಬದ ಒಂದು ಭಾಗವಾಗಿದೆ. 2026ರಲ್ಲಿ ಈ ಹಬ್ಬವನ್ನು ನವೆಂಬರ್ 8ರಂದು ಆಚರಿಸಲಾಗುತ್ತದೆ.

ನಾಯಿಗಳನ್ನು ಏಕೆ ಪೂಜಿಸಲಾಗುತ್ತದೆ?

ಹಿಂದೂ ಧಾರ್ಮಿಕ ನಂಬಿಕೆಯ ಪ್ರಕಾರ, ನಾಯಿಯನ್ನು ಯಮರಾಜನ ಮೆಸೆಂಜರ್ ಎಂದು ಪರಿಗಣಿಸಲಾಗುತ್ತದೆ. ನಾಯಿಗಳು ಪರಲೋಕದ ದ್ವಾರವನ್ನು ಕಾಪಾಡುತ್ತವೆ ಎಂಬ ನಂಬಿಕೆಯೂ ಇದೆ. ಆದ್ದರಿಂದ ಈ ದಿನ ನಾಯಿಗಳನ್ನು ಪೂಜಿಸುವ ಮೂಲಕ ಅವುಗಳ ಮೇಲಿನ ಪ್ರೀತಿ ಮತ್ತು ಕೃತಜ್ಞತೆಯನ್ನು ವ್ಯಕ್ತಪಡಿಸಲಾಗುತ್ತದೆ.

ಮಹಾಭಾರತದ ಒಂದು ಕಥೆಯೂ ಈ ಹಬ್ಬದೊಂದಿಗೆ ಸಂಬಂಧ ಹೊಂದಿದೆ. ಪೌರಾಣಿಕ ನಂಬಿಕೆಯ ಪ್ರಕಾರ, ಯುಧಿಷ್ಠಿರರು ಸ್ವರ್ಗಕ್ಕೆ ತೆರಳುವಾಗ ತಮ್ಮೊಂದಿಗೆ ಒಂದು ನಾಯಿಯನ್ನು ಕರೆದುಕೊಂಡು ಹೋಗಿದ್ದರು. ಆ ನಾಯಿಯನ್ನು ಬಿಟ್ಟು ಸ್ವರ್ಗ ಪ್ರವೇಶಿಸಲು ಅವರು ನಿರಾಕರಿಸಿದ್ದರು. ಈ ಕಥೆಯು ನಿಷ್ಠೆ, ಕರುಣೆ ಮತ್ತು ಪ್ರಾಣಿಗಳ ಮೇಲಿನ ಪ್ರೀತಿಯ ಸಂದೇಶವನ್ನು ಸಾರುತ್ತದೆ.

ಹೂವಿನ ಹಾರ, ಕೆಂಪು ತಿಲಕ ಮತ್ತು ವಿಶೇಷ ಆಹಾರ

ಈ ದಿನ ಜನರು ಬೆಳಿಗ್ಗೆ ನಾಯಿಗಳಿಗೆ ಸ್ನಾನ ಮಾಡಿಸುತ್ತಾರೆ. ಬಳಿಕ ಅವುಗಳ ಕುತ್ತಿಗೆಗೆ ಚೆಂಡು ಹೂಗಳ ಹಾರವನ್ನು ಹಾಕಿ, ಹಣೆಯ ಮೇಲೆ ಕೆಂಪು ತಿಲಕವನ್ನು ಇಡುತ್ತಾರೆ. ನಂತರ ಸಿಹಿತಿಂಡಿಗಳು, ಹಾಲು, ಅನ್ನ ಮತ್ತು ಮಾಂಸದಂತಹ ವಿಶೇಷ ಆಹಾರವನ್ನು ನೀಡುತ್ತಾರೆ. ಬೀದಿ ನಾಯಿಗಳಿಗೂ ಆಹಾರ ನೀಡಲಾಗುತ್ತದೆ ಮತ್ತು ಅವುಗಳ ಆರೈಕೆಗೆ ಗಮನ ಹರಿಸಲಾಗುತ್ತದೆ. ಈ ಸಂಪ್ರದಾಯವು ನಾಯಿಗಳ ಮೇಲಿನ ಪ್ರೀತಿ ಮತ್ತು ಗೌರವವನ್ನು ವ್ಯಕ್ತಪಡಿಸುತ್ತದೆ.

ಪೊಲೀಸ್ ನಾಯಿಗಳಿಗೂ ವಿಶೇಷ ಗೌರವ

ಕುಕುರ್ ತಿಹಾರ್ ಹಬ್ಬದಲ್ಲಿ ಪೊಲೀಸ್ ಇಲಾಖೆ ಮತ್ತು ರಕ್ಷಣಾ ಕಾರ್ಯಗಳಲ್ಲಿ ನೆರವಾಗುವ ನಾಯಿಗಳಿಗೂ ಗೌರವ ಸಲ್ಲಿಸಲಾಗುತ್ತದೆ. ನೇಪಾಳದಲ್ಲಿ ಪೊಲೀಸ್ ನಾಯಿಗಳಿಗೆ ಸ್ಫೋಟಕಗಳನ್ನು ಪತ್ತೆಹಚ್ಚಲು ಮತ್ತು ಜನರನ್ನು ರಕ್ಷಿಸಲು ವಿಶೇಷ ತರಬೇತಿ ನೀಡಲಾಗುತ್ತದೆ. ಈ ದಿನ ಜನರ ಸುರಕ್ಷತೆಯನ್ನು ಕಾಪಾಡುವಲ್ಲಿ ಈ ನಾಯಿಗಳು ನೀಡುವ ಕೊಡುಗೆ ಮತ್ತು ಅವುಗಳ ಸೇವೆಯನ್ನು ಸ್ಮರಿಸಲಾಗುತ್ತದೆ.

ಐದು ದಿನಗಳ ಕಾಲ ನಡೆಯುವ ತಿಹಾರ್ ಹಬ್ಬ

ತಿಹಾರ್ ಹಬ್ಬದ ಸಂದರ್ಭದಲ್ಲಿ ಕಾಗೆಗಳು, ನಾಯಿಗಳು ಮತ್ತು ಹಸುಗಳನ್ನು ಪೂಜಿಸಲಾಗುತ್ತದೆ. ನಂತರ ಲಕ್ಷ್ಮಿ ದೇವಿಯ ಆರಾಧನೆ ಹಾಗೂ ಸಹೋದರ-ಸಹೋದರಿಯರ ನಡುವಿನ ಬಾಂಧವ್ಯವನ್ನು ಸಾರುವ ಹಬ್ಬವನ್ನು ಆಚರಿಸಲಾಗುತ್ತದೆ. ಈ ದಿನಗಳಲ್ಲಿ ಮನೆಗಳಲ್ಲಿ ದೀಪಗಳನ್ನು ಬೆಳಗಿಸಲಾಗುತ್ತದೆ ಮತ್ತು ಹೂವುಗಳಿಂದ ಅಲಂಕರಿಸಲಾಗುತ್ತದೆ.

Marine life: ಹಳೆಯ ರೈಲುಗಳು ಈಗ ಉಪ್ಪುನೀರಿನ ಜಲಚರಗಳ ಮನೆ: ಸಮುದ್ರದೊಳಗೆ ನೂತನ 'ಮೀನುಗಳ ಸಾಮ್ರಾಜ್ಯ' ಸೃಷ್ಟಿ!

Bhimasi M Koleppanavar — Tue, 27 Oct 2026 14:16:17 +0530

ಹಳೆಯ ರೈಲುಗಳು ಈಗ ಉಪ್ಪುನೀರಿನ ಜಲಚರಗಳ ಮನೆ: ಸಮುದ್ರದೊಳಗೆ ನೂತನ 'ಮೀನುಗಳ ಸಾಮ್ರಾಜ್ಯ' ಸೃಷ್ಟಿ!

ಜೂನ್ 2008ರಲ್ಲಿ, ವರ್ಜೀನಿಯಾ ಕರಾವಳಿಯ ಚಿಂಕೋಟೀಗ್ ಎಂಬಲ್ಲಿಂದ ಸುಮಾರು 11 ಮೈಲಿ ದೂರದಲ್ಲಿರುವ 'ಬ್ಲ್ಯಾಕ್‌ಫಿಶ್ ಬ್ಯಾಂಕ್ ರೀಫ್' ಎಂಬ ಜಾಗದಲ್ಲಿ ಈ ಕಾರ್ಯಾಚರಣೆ ನಡೆಸಲಾಯಿತು. ಇಲ್ಲಿ ಒಂದು ನಿಗೂಢವಾದ ಮೀನಿನ ಸಾಮ್ರಾಜ್ಯವೇ ಕಂಡು ಬಂದಿದೆ. ಅಲ್ಲದೇ ಅಲ್ಲಿ ಸೃಷ್ಟಿಯಾದ ಜಲಚರಗಳ ಮನೆಗೆ ಜಗತ್ತೆ ಅಚ್ಚರಿಗೊಂಡಿದೆ. ಈ ಕುರಿತು ಕಂಪ್ಲೀಟ್‌ ರಿಪೋರ್ಟ್ ಇಲ್ಲಿದೆ.

ಏನಿದು ಘಟನೆ?

ನ್ಯೂಯಾರ್ಕ್ ನಗರದಲ್ಲಿ ಬಳಸಿ ನಿವೃತ್ತಿಗೊಳಿಸಲಾಗಿದ್ದ ೪೪ ಸಬ್‌ವೇ ರೈಲು ಬೋಗಿಗಳನ್ನು ಉದ್ದೇಶಪೂರ್ವಕವಾಗಿ ಅಟ್ಲಾಂಟಿಕ್ ಮಹಾಸಾಗರದಲ್ಲಿ ಮುಳುಗಿಸಲಾಯಿತು. ಪ್ರತಿಯೊಂದು ಸ್ಟೀಲ್ ಬೋಗಿಯೂ ಸುಮಾರು 50 ಅಡಿ ಉದ್ದವಿದ್ದು, 17ರಿಂದ 18 ಟನ್ ತೂಕ ಹೊಂದಿದ್ದವು. ಬೋಗಿಗಳನ್ನು ಸಮುದ್ರಕ್ಕೆ ಹಾಕುವ ಮುನ್ನ ಪರಿಸರ ಮಾಲಿನ್ಯ ತಡೆಯಲು ಅವುಗಳಲ್ಲಿದ್ದ ಗಾಜು, ಬಾಗಿಲು, ಗ್ರೀಸ್, ತೈಲ ಮತ್ತು ವೈರಿಂಗ್‌ಗಳನ್ನು ಸಂಪೂರ್ಣವಾಗಿ ತೆಗೆದು ಕೆಮಿಕಲ್ ವಾಶ್ ಮಾಡಲಾಗಿತ್ತು. ಇಂಥ ಭೊಗಿಗಳನ್ನು ಅಲ್ಲಿ ಮುಳುಗಿಸಲಾಯಿತು.

ಹಳೆಯ ರಚನೆಗಳ ಸೇರ್ಪಡೆ!

ಈ ಜಾಗದಲ್ಲಿ ಈಗಾಗಲೇ ಮುಳುಗಿಸಲಾಗಿದ್ದ ಹಳೆಯ ಹಡಗುಗಳು, ಕಾಂಕ್ರೀಟ್ ಪೈಪ್‌ಗಳು ಮತ್ತು ಸೇನಾ ವಾಹನಗಳ ಜೊತೆಗೆ ಈ ಬೋಗಿಗಳನ್ನು ಸೇರಿಸಿ ಕೃತಕ ಬಂಡೆಯನ್ನು ವಿಸ್ತರಿಸಲಾಯಿತು. ಸಮುದ್ರದ ತಳದ ಮರಳಿನಲ್ಲಿ ಮೀನುಗಳಿಗೆ ಮೊಟ್ಟೆಯಿಡಲು ಅಥವಾ ಆಶ್ರಯ ಪಡೆಯಲು ಜಾಗ ಇರುವುದಿಲ್ಲ. ಈ ಬೋಗಿಗಳು ಮೀನುಗಳಿಗೆ 'ಕೃತಕ ಬಂಡೆ' ಅಥವಾ ಸುರಕ್ಷಿತ ಆಶ್ರಯ ತಾಣವಾಗಿ ಕೆಲಸ ಮಾಡುತ್ತಿವೆ.

ಆಹಾರದ ಸರಪಳಿ ವೃದ್ಧಿ!

ಈ ಸ್ಟೀಲ್ ರಚನೆಗಳ ಮೇಲೆ ಮಸೆಲ್ಸ್, ಕರಾವಳಿ ಪಾಚಿ ಮತ್ತು ಹವಳಗಳು ಸುಲಭವಾಗಿ ಬೆಳೆಯುತ್ತವೆ. ಇದರಿಂದಾಗಿ ಸಾಮಾನ್ಯ ಮರಳು ಪ್ರದೇಶಕ್ಕಿಂತ ೪೦೦ ಪಟ್ಟು ಹೆಚ್ಚು ಜಲಚರ ಆಹಾರ ಇಲ್ಲಿ ಉತ್ಪತ್ತಿಯಾಗುತ್ತದೆ. ಬ್ಲ್ಯಾಕ್ ಸೀ ಬಾಸ್ ಮತ್ತು ಟಾಟಾಗ್‌ನಂತಹ ಪ್ರಮುಖ ಮೀನುಗಳು ಇಲ್ಲಿ ಹೆಚ್ಚಾಗಿ ಆಕರ್ಷಿತವಾಗುವುದರಿಂದ ಸ್ಥಳೀಯ ಕ್ರೀಡಾ ಮತ್ತು ವಾಣಿಜ್ಯ ಮೀನುಗಾರಿಕೆಗೆ ದೊಡ್ಡ ಲಾಭವಾಗಿದೆ. ಅಷ್ಟೇ ಅಲ್ಲ ಈ ಬೃಹತ್ ಯೋಜನೆಯಿಂದಾಗಿ ನ್ಯೂಯಾರ್ಕ್‌ನ ಸಾರಿಗೆ ಸಂಸ್ಥೆಗೆ (MTA) ಹಳೆಯ ಬೋಗಿಗಳನ್ನು ಸಾಂಪ್ರದಾಯಿಕವಾಗಿ ರಿಸೈಕಲ್ ಮಾಡುವ ೨೦ ಮಿಲಿಯನ್ ಡಾಲರ್‌ಗೂ ಅಧಿಕ ವೆಚ್ಚ ಉಳಿತಾಯವಾಯಿತು.

ಪರಿಸರ ಪ್ರೇಮಿಗಳ ಮೆಚ್ಚುಗೆ ಮತ್ತು ಯಶಸ್ವಿ ಪ್ರಯೋಗ!

ಆರಂಭದಲ್ಲಿ ಪರಿಸರವಾದಿಗಳು ಈ ಯೋಜನೆಗೆ ಆತಂಕ ವ್ಯಕ್ತಪಡಿಸಿದ್ದರು. ಆದರೆ, ಸಮುದ್ರಕ್ಕೆ ಹಾಕಿದ ಕೆಲವೇ ತಿಂಗಳುಗಳಲ್ಲಿ ಈ ಸ್ಟೀಲ್ ಬೋಗಿಗಳ ಮೇಲೆ ಜಲಚರ ಸಸ್ಯಗಳು ಮತ್ತು ಹವಳಗಳು ದಟ್ಟವಾಗಿ ಬೆಳೆಯಲಾರಂಭಿಸಿದವು. ಇದು ಜಲಚರಗಳ ಸಂತಾನೋತ್ಪತ್ತಿಗೆ ಅತ್ಯಂತ ಯಶಸ್ವಿ ಮತ್ತು ಸುರಕ್ಷಿತ ಪ್ರಯೋಗ ಎಂದು ಸಾಬೀತಾಯಿತು. ಈ ಸಬ್‌ವೇ ಬೋಗಿಗಳು ಮತ್ತು ಸೇನಾ ವಾಹನಗಳು ಸಮುದ್ರದ ಅಡಿಯಲ್ಲಿ ಒಂದು ವಿಭಿನ್ನ ಪ್ರಪಂಚವನ್ನೇ ಸೃಷ್ಟಿಸಿವೆ. ಇದರಿಂದಾಗಿ ಇದು ಕೇವಲ ಮೀನುಗಾರರಿಗೆ ಮಾತ್ರವಲ್ಲದೆ, ಸಮುದ್ರದ ಆಳದ ಸೌಂದರ್ಯವನ್ನು ನೋಡಬಯಸುವ ಸ್ಕೂಬಾ ಡೈವರ್ಸ್‌ಗಳ ನೆಚ್ಚಿನ ಪ್ರವಾಸಿ ತಾಣವಾಗಿ ಬದಲಾಗಿದೆ.

ದೊಡ್ಡ ಪ್ರಮಾಣದ ಮಾದರಿ ಯೋಜನೆ!

ವರ್ಜೀನಿಯಾ ಮಾತ್ರವಲ್ಲದೆ ಅಮೆರಿಕದ ಇತರ ಪೂರ್ವ ಕರಾವಳಿ ರಾಜ್ಯಗಳಾದ ಡೆಲವೇರ್, ನ್ಯೂಜೆರ್ಸಿ ಮತ್ತು ಸೌತ್ ಕೆರೊಲಿನಾಗಳು ಸಹ ಈ ಯೋಜನೆಯಡಿ ಒಟ್ಟು ೨,೫೦೦ ಕ್ಕೂ ಹೆಚ್ಚು ನಿವೃತ್ತ ರೈಲು ಬೋಗಿಗಳನ್ನು ಸಮುದ್ರದಲ್ಲಿ ಮುಳುಗಿಸಿವೆ. ಇದು ಜಾಗತಿಕ ಮಟ್ಟದಲ್ಲಿ ತ್ಯಾಜ್ಯ ವಿಲೇವಾರಿ ಮತ್ತು ಪರಿಸರ ಸಂರಕ್ಷಣೆಯನ್ನು ಒಟ್ಟಿಗೆ ಸಾಧಿಸಿದ ಅತ್ಯಂತ ವಿಶಿಷ್ಟ ಮಾದರಿಯಾಗಿದೆ.

ನಮ್ಮ ಮೆಟ್ರೋ 'ಪಿಂಕ್ ಲೈನ್' ಮಾರ್ಗಕ್ಕೆ CMRS ಗ್ರೀನ್ ಸಿಗ್ನಲ್: ಕೇಂದ್ರದ ಒಪ್ಪಿಗೆ ಸಿಕ್ಕ ತಕ್ಷಣ ಸಂಚಾರ!

Sathish Kumar KH — Wed, 28 Oct 2026 21:19:52 +0530

ಬೆಂಗಳೂರು (ಅ.28): ಬೆಂಗಳೂರಿನ ಟ್ರಾಫಿಕ್ ಸಮಸ್ಯೆಗೆ ಮುಕ್ತಿ ನೀಡುವ ನಿಟ್ಟಿನಲ್ಲಿ ‘ನಮ್ಮ ಮೆಟ್ರೋ’ ಮತ್ತೊಂದು ಬೃಹತ್ ಮೈಲಿಗಲ್ಲು ತಲುಪಿದೆ. ಬಹುನಿರೀಕ್ಷಿತ ನಮ್ಮ ಮೆಟ್ರೋ ಪಿಂಕ್ ಲೈನ್‌ನ (Pink Line) ಮೇಲ್ಸೇತುವೆ (Elevated Section) ಮಾರ್ಗಕ್ಕೆ ಮೆಟ್ರೋ ರೈಲ್ವೆ ಸುರಕ್ಷತಾ ಆಯುಕ್ತರಿಂದ (CMRS - Commissioner for Metro Railway Safety) ಅಧಿಕೃತ ಸುರಕ್ಷತಾ ಕ್ಲಿಯರೆನ್ಸ್ ದೊರೆತಿದೆ. ಈ ಮೂಲಕ ಸಾರ್ವಜನಿಕ ಸೇವೆಗೆ ಸಿದ್ಧವಾಗಿರುವ ಈ ಮಾರ್ಗವು ಶೀಘ್ರದಲ್ಲೇ ಸಂಚಾರಕ್ಕೆ ಮುಕ್ತವಾಗಲಿದೆ.

ಈ ಮಹತ್ವದ ಬೆಳವಣಿಗೆಯ ಕುರಿತು ಸಚಿವ ಕೃಷ್ಣ ಬೈರೇಗೌಡ ಅವರು ತಮ್ಮ ‘ಎಕ್ಸ್’ (ಹಿಂದಿನ ಟ್ವಿಟರ್) ಖಾತೆಯಲ್ಲಿ ಸಂತಸ ಹಂಚಿಕೊಂಡಿದ್ದಾರೆ.

ಸಚಿವ ಕೃಷ್ಣ ಬೈರೇಗೌಡ ಅವರ ಟ್ವೀಟ್‌ನಲ್ಲೇನಿದೆ?

'ಪಿಂಕ್ ಲೈನ್‌ನ ಎಲಿವೇಟೆಡ್ ವಿಭಾಗಕ್ಕೆ ಮೆಟ್ರೋ ರೈಲ್ವೆ ಸುರಕ್ಷತಾ ಆಯುಕ್ತರಿಂದ (CMRS) ಸುರಕ್ಷತಾ ಅನುಮೋದನೆ ದೊರೆತಿರುವುದಕ್ಕೆ ನಮಗೆ ಅತ್ಯಂತ ಸಂತೋಷವಾಗಿದೆ. ಸುದೀರ್ಘ ಹಾಗೂ ನಿರಂತರ ಪ್ರಯತ್ನದ ಬಳಿಕ ಈ ಸುರಕ್ಷತಾ ಮಂಜೂರಾತಿ ಲಭಿಸಿದೆ. ಕೇಂದ್ರ ಸರ್ಕಾರವು ಉದ್ಘಾಟನೆಗೆ ದಿನಾಂಕ ನೀಡಿದ ತಕ್ಷಣವೇ ಈ ಮಾರ್ಗವನ್ನು ಸಾರ್ವಜನಿಕ ಸೇವೆಗೆ ಮುಕ್ತಗೊಳಿಸಲು ನಾವು ಸಂಪೂರ್ಣ ಸಜ್ಜಾಗಿದ್ದೇವೆ. ಉದ್ಘಾಟನೆಯ ದಿನಾಂಕವನ್ನು ನಿಗದಿಪಡಿಸುವಂತೆ ಈಗಾಗಲೇ ಕೇಂದ್ರ ಸರ್ಕಾರಕ್ಕೆ ಪತ್ರ ಬರೆದು ಕೋರಲಾಗಿದೆ. ನಮ್ಮ ಮೆಟ್ರೋ ಜಾಲವನ್ನು ವಿಸ್ತರಿಸುವ ಮೂಲಕ ಸಾರ್ವಜನಿಕರಿಗೆ ಮತ್ತಷ್ಟು ಉತ್ತಮ ಸೇವೆ ಒದಗಿಸಲು ನಾವು ಕಾತರದಿಂದ ಎದುರು ನೋಡುತ್ತಿದ್ದೇವೆ" ಎಂದು ಸಚಿವರು ಟ್ವೀಟ್ ಮಾಡಿದ್ದಾರೆ.

ಏನಿದು CMRS ಅನುಮೋದನೆ? ಇದರ ಮಹತ್ವವೇನು?

ಯಾವುದೇ ಮೆಟ್ರೋ ಮಾರ್ಗದಲ್ಲಿ ವಾಣಿಜ್ಯಿಕವಾಗಿ ಸಾರ್ವಜನಿಕ ರೈಲು ಸಂಚಾರ ಆರಂಭಿಸುವುದಕ್ಕೂ ಮುನ್ನ ಕೇಂದ್ರ ಸರ್ಕಾರದ ಮೆಟ್ರೋ ರೈಲ್ವೆ ಸುರಕ್ಷತಾ ಆಯುಕ್ತರು (CMRS) ಕಠಿಣ ತಪಾಸಣೆ ನಡೆಸುತ್ತಾರೆ:

ಹಳಿಗಳ ಜೋಡಣೆ, ಸಿಗ್ನಲಿಂಗ್, ವಿದ್ಯುತ್ ಸರಬರಾಜು (Traction) ವ್ಯವಸ್ಥೆ.
ತುರ್ತು ಸಂದರ್ಭದಲ್ಲಿ ಪ್ರಯಾಣಿಕರ ಸುರಕ್ಷತೆ ಮತ್ತು ಪ್ಲಾಟ್‌ಫಾರ್ಮ್ ವ್ಯವಸ್ಥೆ.
ಪ್ರಾಯೋಗಿಕ ಸಂಚಾರದ (Trial Run) ಫಲಿತಾಂಶಗಳನ್ನು ಪರಿಶೀಲಿಸಿದ ಬಳಿಕವೇ ಅಂತಿಮ ಗ್ರೀನ್ ಸಿಗ್ನಲ್ ನೀಡಲಾಗುತ್ತದೆ. ಇದೀಗ ಆ ಎಲ್ಲಾ ಪ್ರಕ್ರಿಯೆಗಳು ಯಶಸ್ವಿಯಾಗಿ ಪೂರ್ಣಗೊಂಡಿವೆ.

ಬನ್ನೇರುಘಟ್ಟ ರಸ್ತೆ ಪ್ರಯಾಣಿಕರಿಗೆ ಭಾರಿ ರಿಲೀಫ್:

ಕಾಳೇನ ಅಗ್ರಹಾರದಿಂದ (ಗೊಟ್ಟಿಗೆರೆ) ನಾಗವಾರದವರೆಗಿನ ಒಟ್ಟು 21.3 ಕಿ.ಮೀ ಉದ್ದದ ಪಿಂಕ್ ಲೈನ್ ಮಾರ್ಗದಲ್ಲಿ ಎಲಿವೇಟೆಡ್ ಹಾಗೂ ಸುರಂಗ ಮಾರ್ಗಗಳೆರಡೂ ಇವೆ. ಇದರಲ್ಲಿ ಕಾಳೇನ ಅಗ್ರಹಾರದಿಂದ ತಾವರೆಕೆರೆವರೆಗಿನ ಎಲಿವೇಟೆಡ್ ವಿಭಾಗದ ಕಾಮಗಾರಿ ಪೂರ್ಣಗೊಂಡಿದ್ದು, ಈಗ ಸುರಕ್ಷತಾ ಕ್ಲಿಯರೆನ್ಸ್ ಪಡೆದುಕೊಂಡಿದೆ.

ಈ ಮಾರ್ಗ ಕಾರ್ಯಾರಂಭಗೊಂಡರೆ ಬನ್ನೇರುಘಟ್ಟ ರಸ್ತೆ, ಐಐಎಂಬಿ, ಜೆಪಿ ನಗರ ಹಾಗೂ ಜಯದೇವ ಆಸ್ಪತ್ರೆ ಭಾಗದ ನಿತ್ಯ ಪ್ರಯಾಣಿಕರಿಗೆ ಟ್ರಾಫಿಕ್ ಕಿರಿಕಿರಿಯಿಂದ ಮುಕ್ತಿ ಸಿಗಲಿದೆ. ಪ್ರಮುಖವಾಗಿ ಜಯದೇವ ಇಂಟರ್‌ಚೇಂಜ್ ನಿಲ್ದಾಣದ ಮೂಲಕ ಹಳದಿ ಮಾರ್ಗಕ್ಕೂ ಸಂಪರ್ಕ ಕಲ್ಪಿಸಲು ಸಾಧ್ಯವಾಗುತ್ತದೆ.

ಕೇಂದ್ರದ ದಿನಾಂಕವೊಂದೇ ಬಾಕಿ!

ಬಿಎಂಆರ್‌ಸಿಎಲ್ ಮತ್ತು ರಾಜ್ಯ ಸರ್ಕಾರವು ಈಗಾಗಲೇ ಕೇಂದ್ರ ನಗರಾಭಿವೃದ್ಧಿ ಸಚಿವಾಲಯಕ್ಕೆ ಉದ್ಘಾಟನಾ ದಿನಾಂಕವನ್ನು ನಿಗದಿ ಮಾಡುವಂತೆ ಪತ್ರ ರವಾನಿಸಿದೆ. ಕೇಂದ್ರದಿಂದ ದಿನಾಂಕ ನಿಗದಿಯಾಗುತ್ತಿದ್ದಂತೆಯೇ ಪ್ರಧಾನಿ ಅಥವಾ ಕೇಂದ್ರ ಸಚಿವರ ಸಮ್ಮುಖದಲ್ಲಿ ಅಧಿಕೃತವಾಗಿ ಲೋಕಾರ್ಪಣೆಗೊಳ್ಳಲಿದ್ದು, ಮರುದಿನದಿಂದಲೇ ಸಾರ್ವಜನಿಕರಿಗೆ ಮೆಟ್ರೋ ಸೇವೆ ಲಭ್ಯವಾಗಲಿದೆ.